1. Севинмәк үчүн һансы әсаслы сәбәбимиз вар?

НЕҸӘ дә хошдур ки, Јеһованын хидмәтчиләринин сајы илбәил артыр! Бу, Аллаһын халгынын нур кими парладығыны ҝөстәрир. Өтән ил Мүгәддәс Китабы өјрәнәнләрин сајы 10 000 000-дан чох олмушдур. Һәмчинин анма мәрасиминә гатылан милјонларла инсанын Аллаһын мәһәббәтинин тәҹәссүмү олан фидјә һагда өјрәнмәк имканы олмушдур (1 Јәһ. 4:9).

2, 3. а) Нур кими парламағымыза нә мане ола биләр? б) Мәтта 5:14—16 ајәләри әсасында нәји мүзакирә едәҹәјик?

² Бүтүн дүнјада јашајан Јеһованы Шаһидләри мүхтәлиф халглара вә мүхтәлиф дилләрә мәнсубдурлар. Лакин бу, онлара бир аилә кими Јеһова Аллаһын адыны уҹалтмаға мане олмур (Вәһј 7:9). Ана дилимиз, јашадығымыз мәкан фәргли олса да, һамымыз бу дүнјада нур кими парлаја биләрик (Филип. 2:15).

³ Даһа чох инсанын һәгигәтә һај вермәси, арамыздакы бирлик, һәмчинин ојаг галмаға чалышмағымыз Јеһоваја шәрәф ҝәтирир. Ҝәлин ҝөрәк бу саһәләрдә нурумузун парламасы үчүн нә едә биләрик. (Мәтта 5:14—16 ајәләрини охујун.)

4, 5. а) Тәблиғ етмәклә јанашы, нурумузун парламасы үчүн даһа нә едә биләрик? б) Меһрибан давранышымыз һансы бәһрәләр ҝәтирә биләр? (Мәгаләнин әввәлиндәки шәклә бахын.)

⁴ «Јашадығымыз бу ахырзаманда нурунун парламасына јол вермәјән һеч кәс Ағаја садиг гала билмәз». Бу сөзләр «Ҝөзәтчи гүлләси»нин 1925-ҹи ил 1 ијун сајында дәрҹ олунан «Зүлмәтдә шәфәг сачан нур» адлы мәгаләдә јазылмышдыр. Мәгаләдә сонра нөвбәти изаһат ҝәтирилир: «Нурун парламасы үчүн инсан хош хәбәри һәр кәслә бөлүшмәли вә Јеһованын салеһ ганунларына әсасән јашамалыдыр». Ҝөрдүјүмүз кими, нурумузун парламасынын бир јолу хош хәбәри тәблиғ едиб шаҝирд һазырламагдыр (Мәт. 28:19, 20). Бундан әлавә, биз өз давранышымызла да Јеһованын адыны уҹалда биләрик. Тәблиғ едәркән инсанлар бизә фикир верир. Хош тәбәссүм, меһрибанҹасына саламлашмаг һәм өзүмүз, һәм дә ибадәт етдијимиз Аллаһ һагда чох шеј дејир.

⁵ Иса Мәсиһ демишди: «Бир евә ҝирәндә ев сакинләрини саламлајын» (Мәт. 10:12). Исанын вә һәвариләринин тәблиғ етдији әразиләрдә јад инсаны евә дәвәт етмәк нормал һал иди. Бу ҝүн бир чох әразидә белә адәт јохдур. Һәтта чохлары гапыда јад инсаны ҝөрәндә нараһат олур вә ја әсәбиләшир. Бунунла белә, ҝүләрүз вә сәмими шәкилдә ҝәлишимизин мәгсәдини изаһ етмәјимиз ев сакинин нараһатлығыны азалда вә һирсини јатыра биләр. Хош тәбәссүм сөһбәтә ән ҝөзәл башланғыҹдыр. Әдәбијјат арабалары илә иҹтимаи шаһидлик верән баҹы-гардашлар да инсанлары ҝүләрүзлә вә меһрибанҹасына саламлајанда онларын јахынлашыб әдәбијјат ҝөтүрмәјә даһа мејилли олдугларыны мүшаһидә едирләр. Хош рәфтарымыз сајәсиндә инсанларла сөһбәтә башламаг да мүмкүн ола биләр.

6. Бир јашлы әр-арвад хидмәтләрини неҹә ҝенишләндириб?

⁶ Инҝилтәрәдә јашајан бир јашлы әр-арвад сәһһәтләриндә олан проблемләрә ҝөрә ев-ев тәблиғдә әввәлки гәдәр иштирак едә билмирди. Онлар өз нурларыны парлатмаг үчүн евләринин гаршысында әдәбијат масасы гојмаг гәрарына ҝәлирләр. Мәктәбин јахынлығында јашадыгларына ҝөрә бу әдәбијјатлар ушагларыны евә апармаға ҝәлән валидејнләрин диггәтини чәкир. Бәзиләри јахынлашыб «Ҝәнҹләрин суаллары. Практики мәсләһәтләр» китабынын биринҹи вә икинҹи ҹилдини, һәмчинин диҝәр брошүрләри ҝөтүрүр. Бу әр-арвадла ејни јығынҹагда хидмәт едән бир өнҹүл баҹы бу хидмәт нөвүндә онлара гошулур. Баҹынын хош рәфтары вә јашлы әр-арвадын ҝөстәрдији ҹанјананлыг бир валидејни Мүгәддәс Китаб дәрсинә башламаға тәшвиг едиб.

7. Әразинизә тәзә көчән инсанлара неҹә көмәк едә биләрсиниз?

⁷ Сон илләр дүнјанын бир чох өлкәләриндә гачгынларын сајы артыб. Бәс сиз гачгынлара Јеһова Аллаһ вә Онун нијјәти барәдә өјрәнмәјә неҹә көмәк едә биләрсиниз? Илк нөвбәдә, саламламаг үчүн онларын дилиндә бир нечә сөз өјрәнмәк олар. Бу саһәдә сизә «JW Language» тәтбигетмәсинин көмәји дәјә биләр. Орадан сиз һәмчинин инсанларын марағына сәбәб олаҹаг бир-ики ҹүмлә өјрәнә биләрсиниз. Бундан әлавә, онлары jw.org сајтына јөнәлдәрәк өз дилләриндә олан видео вә нәшрләри ҝөстәрә биләрсиниз (Ган. 10:19).

8, 9. а) Һәфтәарасы ибадәт ҝөрүшләримиздә һансы көмәји алырыг? б) Валидејнләр ушагларына ҝөрүшләрдә иштирак етмәјә неҹә көмәк едә биләр?

⁸ Тәблиғ хидмәтиндә даһа сәриштәли олмағымыз үчүн Јеһова «Мәсиһи һәјаты вә ибадәти» ҝөрүшү васитәсилә бизи тәлимләндирир. Ҝөрүшдә алдығымыз практики мәсләһәтләр  сајәсиндә даһа инамла тәкрар сөһбәт едир вә Мүгәддәс Китаб дәрси кечирик.

⁹ Јығынҹаға јени ҝәләнләр ибадәт ҝөрүшләримиздә ушагларын да иштирак етдијинә фикир верирләр. Әзиз валидејнләр, ушагларыныза өз сөзләри илә шәрһ вермәји өјрәдәрәк нур кими парламаларына көмәк един. Јығынҹаға јени ҝәләнләрдән бәзиләри мәһз ушагларын вердији садә, сәмими ҹаваблардан сонра һәгигәти гәбул етмишди (1 Кор. 14:25).

10. Аиләви ибадәт бирлијә неҹә төһфә верир?

¹⁰ Нурумузун парламасы үчүн биз һәмчинин аиләдә вә јығынҹагда бирлијә ҹан атмалыјыг. Мәсәлән, валидејнләр мүнтәзәм аиләви ибадәт кечирмәклә буна наил ола биләр. Бәзи аиләләр JW телевизијасынын ајлыг програмыны аиләви ибадәтләринә дахил едирләр. Мисал үчүн, програма бахдыгдан сонра орадакы фикирләри һәјатынызда неҹә тәтбиг едә биләҹәјинизи мүзакирә етмәк олар. Аиләви ибадәти кечирән валидејн унутмамалыдыр ки, ушаглара вә ҝәнҹләрә верилән өјүд бир-бириндән фәргләнмәлидир. Аиләви ибадәтдән һәр кәсин фајда әлдә етмәси үчүн әлиниздән ҝәләни един (Зәб. 148:12, 13).

11—13. Јығынҹағын бирлијинә төһфә верәрәк башгаларынын нур кими парламасына һәр биримиз неҹә көмәк едә биләрик?

¹¹ Һәтта ҝәнҹләр дә јығынҹағын бирлијинә төһфә верә биләр. Бу јолла онлар башгаларынын да нур кими парламасына көмәк едәҹәк. Әзиз мәсиһи ҝәнҹләр, нијә дә јашлылара диггәт ҝөстәрмәји гаршыныза мәгсәд гојмајасыныз? Мәсәлән, онлардан хидмәтдә кечирдикләри илләр барәдә данышмаларыны хаһиш едә биләрсиниз. Сиз онлардан чох шеј өјрәнәҹәксиниз. Бу, һәм сизи, һәм дә онлары руһландыраҹаг. Бундан башга, јашымыздан асылы олмајараг, һәр биримиз ибадәт евинә ҝәләнләри саламламағы вәрдиш һалына чевирә биләрик. Бу, јығынҹагда бирлијә сәбәб олаҹаг вә јени ҝәләнләри нур кими парламаға тәшвиг едәҹәк. Чох шеј етмәк лазым дејил, ҝәлән гонаглары ҝүләрүзлә саламлајын, әјләшмәси үчүн јер ҝөстәрин, башгалары илә таныш един. Онда онлар өзләрини раһат һисс едәҹәк.

¹² Тәблиғ ҝөрүшүнү апаран гардаш јашлы баҹы-гардашларын хидмәтдә иштирак етмәси үчүн мүәјјән тәдбирләр ҝөрә биләр. Әзиз гардашлар, онлара раһат олан саһәләринин  олуб-олмадығы илә марагланын. Бәзи һалларда хидмәтә чыхмалары үчүн онлара физики ҹәһәтдән көмәк едә биләҹәк ҹаван әмәкдашлар тәјин едә биләрсиниз. Сәһһәтләринә вә вәзијјәтләринә ҝөрә хидмәтдә чох иштирак едә билмәјән диндашларыныза анлајыш ҝөстәрин. Сизин гајғыкеш вә диггәтҹил олмағыныз ҹаванлары вә јашлылары, тәҹрүбәли вә тәҹрүбәсиз оланлары хош мүждәни ҹанла-башла јајмаға тәшвиг едәҹәк (Лав. 19:32).

¹³ Мәзмурчу шөвглә демишди: «Нә јахшыдыр, нә хошдур, гардашлар бир олуб, бир јашајанда!» (Зәбур 133:1, 2 ајәләрини охујун.) Бирҝә ибадәт етмәләри сајәсиндә исраиллиләр бир-биринә мүсбәт тәсир ҝөстәрирдиләр. Мәзмурчу бу бирлији хош әтирли вә тәравәт ҝәтирән јаға бәнзәтмишди. Биз дә баҹы-гардашларымыза меһрибан мүнасибәтимизлә тәравәт ҝәтирә биләрик. Бу, јығынҹагда бирлијә тәкан верәҹәк. Әҝәр бу ҹүр давранырсынызса, әһсән сизә! Бәс үрәјинизи ҝениш ачыб даһа чох диндашынызла јахын мүнасибәт гурмағы гаршыныза мәгсәд гоја биләрсиниз? (2 Кор. 6:11—13).

14. Јашадығыныз әразидә нур кими парламаға неҹә ҹан ата биләрсиниз?

¹⁴ Јашадығыныз әразидә Мүгәддәс Китаб һәгигәтинин даһа ҝур парламасы үчүн нә едә биләрсиниз? Хош сөзләриниз вә хејирхаһ әмәлләриниз гоншуларынызда һәгигәтә мараг ојада биләр. Өзүнүздән сорушун: «Гоншуларым мәни неҹә инсан кими таныјыр? Ев-ешијими тәмиз вә сәлигәли сахлајырам? Хејрә-шәрә јарајан гоншујам?» Баҹы-гардашларла сөһбәт едәркән онларын хејирхаһлыгларынын вә нүмунәви давранышларынын гоншуларына, гоһумларына, иш вә мәктәб јолдашларына неҹә тәсир етдијини сорушун. Әминик ки, онлар сизә чохлу мараглы һадисәләр данышаҹаг (Ефес. 5:9).

15. Нә үчүн ојаг галмаг чох ваҹибдир?

¹⁵ Нурумузун даима парлаг олмасыны истәјириксә, һансы дөврдә јашадығымызы унутмамалыјыг. Иса Мәсиһ давамчыларына дөнә-дөнә «ојаг галын» демишди (Мәт. 24:42; 25:13; 26:41). Әҝәр биз бөјүк мүсибәтә чох галдығыны, бизим дөврүмүздә ҝәлмәјәҹәјини дүшүнүрүксә, тәблиғ ишинин нә гәдәр тәҹили олдуғунун фәргинә вармајаҹағыг (Мәт. 24:21). Нурумуз даһа ҝур парламаг әвәзинә, ҝетдикҹә зәифләјә вә һәтта сөнә биләр.

16, 17. Ојаг галмаг үчүн нә едә биләрик?

¹⁶ Јашадығымыз ахырзаманда вәзијјәт ҝүнү ҝүндән писләшдији үчүн ојаг галмаг инди даһа ваҹибдир. Јеһова дүз тәјин етдији вахтда һәрәкәтә кечәҹәк, буна шүбһә јохдур! (Мәт. 24:42—44). Бу вахта гәдәр сәбир ҝөстәриб ојаг галмаг лазымдыр. Мүгәддәс Китабы һәр ҝүн охујун вә дуаја һәмишә өнәм верин (1 Бут. 4:7). Ојаг галараг илләрдир нур кими парлајан баҹы-гардашларын нүмунәсиндән өрнәк алын. Мәсәлән, «Ҝөзәтчи гүлләси»нин 2012-ҹи ил 15 апрел сајынын 18—21-ҹи сәһифәләриндә јерләшән «Артыг јетмиш илдир ки, јәһудинин әтәјиндән јапышмышам» адлы мәгаләсиндә белә бир мәсиһинин һәјат һекајәси јер алыр.

¹⁷ Гој вахтынызын чоху Јеһоваја ибадәтдә кечсин. Башгаларына јахшылыг един, баҹы-гардашларла вахт кечирин. Бу, сизә бөјүк севинҹ бәхш едәҹәк вә вахтын неҹә кечдијини һисс етмәјәҹәксиниз (Ефес. 5:16). Өтән әсрдә баҹы-гардашларымыз хидмәтә ҹан гојмуш вә чох шејә наил олмушдулар. Лакин бу ҝүн Јеһованын гүдрәтли әли алтында биз даһа бөјүк ишләр һәјата кечиририк. Јеһованын иши ағласығмаз дәрәҹәдә ирәлиләјиб! Бәли, нурумуз шөлә сачыр!

18, 19. Ағсаггаллар бизә ојаг галмаға вә фәал олмаға неҹә көмәк едә биләрләр? Нүмунә әсасында изаһ един.

 ¹⁸ Чохлу сәһвләрә јол версәк дә, Јеһованын ибадәтимизи гәбул етдијини билмәк чох хошдур. Бизә көмәк етмәк үчүн Јеһова «инсан тимсалында һәдијјәләр», јәни ағсаггаллар вериб. (Ефеслиләрә 4:8, 11, 12 ајәләрини охујун.) Одур ки, ағсаггаллар сизә баш чәкәндә фүрсәтдән истифадә едиб онларын билијиндән, вердији мәсләһәтләрдән фајдаланмаға чалышын.

¹⁹ Инҝилтәрәдә бир әр-арвад аиләләриндәки проблемлә бағлы ағсаггаллардан көмәк истәјир. Баҹы әринин Јеһоваја ибадәтдә башчылығы үзәринә ҝөтүрмәдијинә ҝөрә нараһат иди. Гардаш исә өјрәтмәк габилијјәтинин зәиф олдуғуну дејир вә мүнтәзәм олараг аиләви ибадәт кечирмәдијини етираф едир. Бу аиләни зијарәт едән ики ағсаггал онларын диггәтини Иса Мәсиһин нүмунәсинә јөнәлдир. Онлар гардаша Мәсиһин шаҝирдләринин гејдинә галмасы вә онларын тәләбатларыны нәзәрә алмасы барәдә дүшүнмәји мәсләһәт ҝөрүр. Баҹыны исә, Мәсиһ кими сәбирли олмаға тәшвиг едир. Ағсаггаллар һәмчинин бу әр-арвада ики ушаглары илә бирҝә аиләви ибадәт кечирмәклә бағлы практики мәсләһәтләр верир (Ефес. 5:21—29). Бир мүддәт сонра әрин чалышганлығыны ҝөрәрәк ағсаггаллар ону тәрифләјир, һәмчинин ону тәслим олмамаға вә јахшы аилә башчысы олмаг үчүн Јеһованын мүгәддәс руһуна архаланмаға тәшвиг едир. Гардашларын гајғысы вә дәстәји бу аиләјә нур сачмаға көмәк еләди.

20. Нур кими парламағын сајәсиндә нә әлдә едәҹәксиниз?

²⁰ Мәзмурчу охујурду: «Нә хошбәхтдир Јеһовадан горхан, Онун јоллары илә јеријән инсан!» (Зәб. 128:1). Инсанлары Аллаһа ибадәт етмәјә сәсләјин, давранышынызла бирлијә төһфә верин вә ојаг галмаға чалышын. Онда нур кими парлајаҹаг вә әсил хошбәхтлијә наил олаҹагсыныз. Инсанлар да јахшы ишләринизи ҝөрүб ҝөјдәки Атамызы мәдһ етмәк истәјәҹәкләр (Мәт. 5:16).