Бу арзу гејри-тәбиидир? Гәтијјән. Мүгәддәс Китабда дејилир ки, бу арзуну Аллаһ бизим үрәјимизә гојуб (Ваиз 3:11). Орада һәмчинин јазылыб ки, «Аллаһ мәһәббәтдир» (1 Јәһја 4:8). Белә исә мәһәббәтли Аллаһ үрәјимизә әбәди јашамаг арзусуну гојуб, сонра исә бу арзунун ҝерчәкләшмәсини гејри-мүмкүн едәрди? Бу, ағлабатандыр?

Бирмәналы шәкилдә демәк олар ки, өлүм дост дејил. Мүгәддәс Китабда өлүм «дүшмән» адланыр (1 Коринфлиләрә 15:26). Бу һәјатда өлүм кимисини тез јахалајыр, кимисини ҝеҹ, амма әввәл-ахыр һамыны һаглајыр. Чохлары өлүмүн ады ҝәләндә горхуја дүшүр. Бәс бу дүшмән нә вахтса мәһв едиләҹәк? Белә бир шеј мүмкүндүр?

Бәлкә дә, сизә тәәҹҹүблү ҝәләҹәк, амма Аллаһ инсанларын өлмәсини һеч вахт нијјәт етмәјиб. Төврат китабында јазыланлар сүбут едир ки, Аллаһын нијјәти инсанларын јер үзүндә әбәди јашамасы олуб. Јеһова * Аллаһ инсаны јаратмаздан әввәл Јер күрәсини јашајыш үчүн һәртәрәфли һазырламышды. Сонра илк инсаны Адәми јарадыб, Әдән бағы адланан ҹәннәтдә јерләшдирмишди. Бундан сонра Аллаһ јаратдыгларынын һамысына бахмыш вә ҝөрмүшдү ки, һәр шеј чох јахшыдыр (Јарадылыш 1:26, 31).

Адәм камил, Аллаһын бәнзәриндә јарадылмышды (Ганунун тәкрары 32:4). Адәмин арвады Һәвва да  гүсурсуз, әгли вә физики ҹәһәтдән камил иди. Јеһова Аллаһ онлара демишди: «Төрәјиб чохалын, бүтүн јер үзүнү долдурун вә она саһиб олун. Дәниздәки балыгларын, ҝөјдәки ганадлы мәхлугларын вә јердәки диҝәр ҹанлыларын үзәриндә һөкмранлыг един» (Јарадылыш 1:28).

Јер үзүнү инсанларла долдурмаг үчүн вахт лазым иди. Һәвва өвладлар дүнјаја ҝәтирмәли иди, онларын да өз өвладлары олмалы иди. Бу о вахта гәдәр давам едәҹәкди ки, јер үзү Аллаһын нијјәт етдији кими, инсанларла долсун (Әшија 45:18). Әҝәр Адәмин вә Һәвванын өмрү јалныз өвладларыны вә нәвәләрини ҝөрмәјә чатаҹагдыса, онлар бүтүн јер үзүнүн өвладлары илә мәскун олдуғуну ҝөрмәјәҹәкдиләрсә, о заман Јеһова Аллаһын онлара белә бир тапшырыг вермәси нә гәдәр мәнтигәујғун оларды?

Јахуд ҝөтүрәк һејванлар үзәриндә һөкмранлыг етмәк тапшырығыны. Аллаһ Адәмә демишди ки, һејванлара ад версин. Бунун үчүн вахт лазым иди (Јарадылыш 2:19). Һејванлара һөкмранлыг етмәк үчүн исә Адәм онлара јахшы бәләд олмалы, онлара неҹә гуллуг етмәји билмәли иди. Бу исә лап чох вахт апараҹагды.

Аллаһын јер үзүнү долдурмаг вә һејванлара һөкмранлыг етмәк әмри ҝөстәрир ки, илк инсан ҹүтлүјү узун өмүр сүрмәк үчүн јарадылмышды. Әслиндә, Адәм, доғрудан да, узун өмүр сүрдү.

Мүгәддәс Китабда јазыланлардан ҝөрүрүк ки, бир заманлар инсанлар биздән гат-гат чох јашајыблар. Орада јазылыб ки, Адәм 930 ил өмүр сүрмүшдү. Сонра 900 илдән чох јашајан даһа алты нәфәрин ады чәкилир: Шејс, Әнуш, Гинан, Јарәд, Мәтушәләһ вә Нуһ. Онларын һамысы Нуһ әјјамындакы Дашгындан әввәл јашамышдылар. Нуһ өзү дә Дашгындан әввәл 600 ил јашамышды (Јарадылыш 5:5—27; 7:6; 9:29). Бу гәдәр чох јашамаг неҹә мүмкүн олуб?

Бу инсанларын һамысы бәшәријјәтин камиллијә јахын олдуғу дөврдә јашамышды. Ҝөрүнүр, онларын узунөмүрлү олмасынын әсас сәбәби бу олмушдур. Бәс камиллик узун өмүрлә неҹә бағлыдыр? Өлүм неҹә мәһв едиләҹәк? Бу суалларын ҹавабыны билмәк үчүн әввәлҹә инсанларын нәјә ҝөрә гоҹалыб өлдүјүнү баша дүшмәлијик.