1. Јахын достлуг мүнасибәтләри неҹә јараныр?

АДӘТӘН киминләсә јахын дост олмаг үчүн онунла бирҝә вахт кечирмәк лазымдыр, һәр шеј бундан башлајыр. Инсанлар бир-бири илә сөһбәт етдикҹә, һиссләрини, фикирләрини бөлүшдүкҹә достлашырлар. Иса Мәсиһлә јахын достлуг мүнасибәти гурмаға ҝәлдикдә исә, буну чәтинләшдирән амилләр вар. Ҝәлин онлардан бәзиләринә бахаг.

2. Чәтинлик јарадан илк амил һансыдыр?

² Биринҹи амил одур ки, биз Иса Мәсиһи һеч вахт ҝөрмәмишик. Биринҹи әсрдә јашамыш бәзи мәсиһиләр дә ону ҝөрмәмишди. Бунунла белә, ҝөрүн һәвари Бутрус нә дејир: «Сиз ону һеч вахт ҝөрмәмисиниз, буна бахмајараг, ону севирсиниз. Ону инди ҝөрмәсәниз дә, она иман едирсиниз» (1 Бут. 1:8). Бәли, Иса Мәсиһи ҝөрмәсәк дә, онунла јахын дост ола биләрик.

3. Чәтинлик јарадан икинҹи амил һансыдыр?

³ Икинҹи амил одур ки, Иса Мәсиһлә үнсијјәт етмәјимиз мүмкүн дејил. Дуа едәркән биз Јеһова илә данышырыг. Иса Мәсиһин ады илә дуа етсәк дә, онунла данышмырыг. Һеч Иса Мәсиһин өзү дә она дуа етмәјимизи истәмир. Нәјә ҝөрә? Чүнки дуа ибадәт формасыдыр, ибадәтә исә јалныз Јеһова лајигдир (Мәт. 4:10). Амма бу о демәк дејил ки, Иса Мәсиһә севҝимизи ҝөстәрә билмәрик.

4. Чәтинлик јарадан үчүнҹү амил һансыдыр вә бу мәгаләдә нә һагда данышаҹағыг?

 ⁴ Үчүнҹү амил исә одур ки, Иса Мәсиһ ҝөјдәдир. Буна ҝөрә дә онунла вахт кечирмәјимиз мүмкүнсүздүр. Амма о, ҹисмән јанымызда олмаса да, ону јахындан таныја биләрик. Бу мәгаләдә Иса Мәсиһлә дост олмаға вә достлуғумузу горумаға көмәк едән дөрд үсулдан данышаҹағыг. Лакин әввәлҹә ҝәлин ҝөрәк нә үчүн Иса Мәсиһлә јахын дост олмалыјыг.

5. Нәјә ҝөрә Иса Мәсиһлә дост олмалыјыг? (Һәмчинин « Иса Мәсиһлә достлуг Јеһова илә достлуға апарыр» вә « Иса Мәсиһин мөвгејинә таразлы мүнасибәт» адлы чәрчивәләрә бахын.)

⁵ Јеһова илә мүнасибәтләримизин мөһкәм олмасы үчүн Иса Мәсиһлә дост олмалыјыг. Нәјә ҝөрә? Ҹәми ики сәбәбә нәзәр салаг. Әввәла, Иса Мәсиһ шаҝирдләринә демишди: «Ата сизи севир, она ҝөрә ки, сиз мәни севирсиниз» (Јәһ. 16:27). Һәмчинин о демишди: «Мәним васитәчилијим олмадан һеч кәс Атанын јанына ҝәлә билмәз» (Јәһ. 14:6). Исанын досту олмадан Јеһованын досту олмаға чалышан инсан, санки евә гапыны ачмадан ҝирмәк истәјир. Иса өзү дә бу ҹүр бәнзәтмәдән истифадә едәрәк «мән гојунлар үчүн гапыјам» демишди (Јәһ. 10:7). Икинҹи сәбәб одур ки, Иса Мәсиһ Јеһованын хүсусијјәтләрини мүкәммәл шәкилдә әкс етдирирди. О, шаҝирдләринә демишди: «Мәни ҝөрән Атаны да ҝөрүб» (Јәһ. 14:9). Буна ҝөрә дә Јеһованы танымағын ваҹиб үсулларындан бири Иса Мәсиһин һәјаты һагда өјрәнмәкдир. Иса һагда өјрәндикҹә она мәһәббәтимиз артаҹаг. Она мәһәббәтимиз артдыгҹа исә, Јеһова илә мүнасибәтләримиз мөһкәмләнәҹәк.

6. Даһа һансы сәбәбә ҝөрә Иса Мәсиһлә дост олмалыјыг? Изаһ един.

 ⁶ Дуаларымыза ҹаваб алмаг үчүн Иса Мәсиһлә дост олмалыјыг. Бунун үчүн дуамызда садәҹә «Иса Мәсиһин ады наминә» ифадәсини ишләтмәк аздыр. Биз Јеһованын дуаларымыза вердији ҹавабда Иса Мәсиһин һансы ролу ојнадығыны баша дүшмәлијик. Иса Мәсиһ һәвариләринә демишди: «Мәним адымла нә истәсәниз, диләјинизи јеринә јетирәҹәјәм» (Јәһ. 14:13). Дуаларымызы ешидиб онлара ҹаваб верән Јеһова олса да, О, гәрарларыны иҹра етмәк сәлаһијјәтини Иса Мәсиһә вериб (Мәт. 28:18). Бунунла јанашы, Јеһова дуаларымыза ҹаваб вермәздән өнҹә Иса Мәсиһин мәсләһәтинә әмәл едиб-етмәдијимизә нәзәр салыр. Мисал үчүн, Мәсиһ демишди: «Әҝәр инсанларын тәгсирләрини бағышлајырсынызса, ҝөјдәки Атаныз да сизи бағышлајаҹаг. Лакин онларын тәгсирләрини бағышламырсынызса, Атаныз да сизин тәгсирләринизи бағышламајаҹаг» (Мәт. 6:14, 15). Ҝөрүн инсанлара Јеһованын вә Иса Мәсиһин бизә ҝөстәрдији мүнасибәти ҝөстәрмәк нә гәдәр ваҹибдир!

7. Иса Мәсиһин фидјә гурбанлығындан кимләр фајдаланыр?

⁷ Иса Мәсиһин фидјә гурбанлығындан јалныз онун јахын достлары фајдаланаҹаг. Нәјә ҝөрә белә демәк олар? Иса демишди ки, «достлары уғрунда ҹаныны фәда» едәҹәк (Јәһ. 15:13). Мәсиһин јер үзүнә ҝәлмәсиндән өнҹә јашамыш мөмин инсанлар онун һаггында өјрәниб, ону севмәли олаҹаглар. Һәтта Ибраһим пејғәмбәрлә јолдашы Сараја, Муса пејғәмбәрә, Раһаба вә диҝәр мөмин киши вә гадынлара да әбәди һәјаты газанмаг үчүн Иса Мәсиһлә достлуг мүнасибәти гурмаг лазым ҝәләҹәк (Јәһ. 17:3; Һәв. 24:15; Ибр. 11:8—12, 24—26, 31).

8, 9. Јәһја 15:4, 5 ајәләринә әсасән, Иса Мәсиһлә достлуг сајәсиндә һансы иши иҹра едә билирик вә нәјә ҝөрә онунла вәһдәтдә галмалыјыг?

⁸ Бизим Падшаһлыг һагда хош хәбәрин тәблиғ вә тәлим ишиндә Иса Мәсиһлә әмәкдашлыг етмәк кими ҝөзәл имканымыз вар. Иса јер үзүндә оларкән мүәллим иди, инсанлара тәлим верирди. Ҝөјә гајыдандан сонра исә о, јығынҹағын башы кими тәблиғ вә тәлим ишинә рәһбәрлик етмәјә давам едир. Иса Мәсиһ ону вә Атасыны даһа чох инсанын танымасы үчүн нә гәдәр чалышдығынызы ҝөрүр вә буну чох гијмәтләндирир. Шүбһә јохдур ки, бу иши јалныз Иса Мәсиһин вә Јеһованын көмәји сајәсиндә ҝөрә биләрик. (Јәһја 15:4, 5 ајәләрини охујун.)

⁹ Мүгәддәс Китабда ајдын шәкилдә јазылыб ки, биз Јеһованы разы салмаг үчүн Иса Мәсиһи севмәли вә бу мәһәббәтин сојумасына имкан вермәмәлијик. Ҝәлин ҝөрәк Иса Мәсиһлә дост олмаг үчүн һансы дөрд аддымы ата биләрик.

10. Иса Мәсиһлә дост олмаг үчүн илк нөвбәдә нә етмәлијик?

¹⁰ 1) Иса Мәсиһи таныјын. Мәтта, Марк, Лука вә Јәһјанын јаздығы Мүждәләри охумагла ону таныја биләрик. Иса Мәсиһин һәјаты барәдә јазыланларын үзәриндә дүшүндүкҹә, инсанларла ҝөзәл рәфтары үрәјимиздә она гаршы мәһәббәт вә һөрмәт јарадыр. Мисал үчүн, о, Аға олса да, шаҝирдләри илә гул кими рәфтар етмирди. Әксинә, фикирләрини, һиссләрини онларла бөлүшүрдү (Јәһ. 15:15). Онлар пис оланда, о да пис олурду, онлар ағлајанда о да ағлајырды (Јәһ. 11:32—36). Һәтта дүшмәнләри дә гәбул едирди ки, Иса Мәсиһә гулаг асанлар  онун досту иди (Мәт. 11:19). Онун шаҝирдләри илә рәфтарыны өрнәк ҝөтүрсәк, инсанларла мүнасибәтләримиз јахшылашаҹаг, үрәјимиздә раһатлыг, хошбәхтлик олаҹаг вә Мәсиһә миннәтдарлығымыз артаҹаг.

11. Иса Мәсиһлә дост олмаг үчүн икинҹи аддым һансыдыр вә бу, нәјә ҝөрә ваҹибдир?

¹¹ 2) Иса Мәсиһ кими дүшүнүн вә давранын. Иса Мәсиһин дүшүнҹәсинә нә гәдәр јахшы бәләд олсаг вә онун кими дүшүнмәјә чалышсаг, достлуғумуз бир о гәдәр мөһкәм олаҹаг (1 Кор. 2:16). Иса Мәсиһдән неҹә өрнәк ала биләрик? Ҝәлин она хас олан ҹәһәтләрдән биринә нәзәр салаг. Иса Мәсиһ өз раһатлығыны јох, башгаларына көмәк етмәји дүшүнүрдү (Мәт. 20:28; Ром. 15:1—3). Бу сәбәбдән о, фәдакар, бағышламаға һазыр иди. Инсанларын онун һаггында дедији сөзләрдән инҹимирди (Јәһ. 1:46, 47). Һәмчинин јол вермирди ки, инсанларын кечмишдә етдији сәһвләр онлара гаршы мүнасибәтинә тәсир етсин (1 Тим. 1:12—14). Биз дә инсанларла мүнасибәтдә Мәсиһдән өрнәк алмалыјыг, чүнки о демишди: «Аранызда мәһәббәт олса, һамы биләҹәк ки, сиз мәним шаҝирдимсиниз» (Јәһ. 13:35). Бу суал үзәриндә дүшүнә биләрсиниз: «Иса Мәсиһдән өрнәк ҝөтүрәрәк баҹы-гардашларла сүлһү горумаг үчүн әлимдән ҝәләни едирәм?»

12. Иса Мәсиһлә дост олмаг үчүн үчүнҹү аддым һансыдыр вә бу аддымы неҹә ата биләрик?

¹² 3) Иса Мәсиһин гардашларына дәстәк олун. Мәсиһ гардашлары үчүн етдијимиз һәр шеји өзү үчүн едилмиш кими гәбул едир (Мәт. 25:34—40). Онлары дәстәкләмәјин башлыҹа үсулу Иса Мәсиһин давамчыларына тапшырдығы иши — Падшаһлыг һагда мүждәни тәблиғ етмәк вә шаҝирд һазырламаг ишини фәал шәкилдә һәјата кечирмәкдир (Мәт. 28:19, 20; Һәв. 10:42). Мәсиһин гардашлары «башга гојунлар»ын көмәји олмадан тәблиғ ишини бүтүн дүнјада һәјата кечирә билмәз (Јәһ. 10:16). Сиз һәр дәфә бу ишдә иштирак едәндә тәкҹә мәсһ олунмуш мәсиһиләрә јох, Исаја да мәһәббәтинизи ҝөстәрирсиниз.

13. Иса Мәсиһин Лука 16:9 ајәсиндә јазылмыш мәсләһәтинә неҹә әмәл едә биләрик?

¹³ Јеһова вә Иса Мәсиһлә дост олмағын диҝәр јолу онларын рәһбәрлик етдији ишә мадди дәстәк олмагдыр. (Лука 16:9 ајәсини охујун.) Мәсәлән, үмумдүнја ишинә етдијимиз ианәләрлә хош хәбәрин уҹгар әразиләрдә тәблиғ олунмасына, ибадәт евләринин вә бу кими диҝәр биналарын тикинтисинә, тәмиринә, еләҹә дә тәбии фәлакәтләрдән вә диҝәр фаҹиәләрдән зәрәрчәкәнләрә дәстәк ола биләрик. Һәмчинин јығынҹағымызын тәләбатлары үчүн ианә едә вә көмәјә еһтијаҹы олдуғуну билдијимиз баҹы-гардашлара әл тута биләрик (Мәс. 19:17). Бу јолларла Мәсиһин гардашларына дәстәк олуруг.

14. Ефеслиләрә 4:15, 16 ајәләринә әсасән, Мәсиһлә дост олмаг үчүн дөрдүнҹү аддым һансыдыр?

¹⁴ 4) Тәшкилатын вердији гәрарлары дәстәкләјин. Јығынҹағын башы олан Иса Мәсиһлә достлуғумузу мөһкәмләндирмәјин бир јолу гајғымыза галмаг үчүн тәјин олунмуш гардашларла әмәкдашлыг етмәкдир. (Ефеслиләрә 4:15, 16 ајәләрини охујун.) Мәсәлән, һал-һазырда тәшкилат чалышыр ки, ибадәт евләриндән максимум шәкилдә истифадә олунсун. Бунун үчүн бәзи јығынҹаглар диҝәр јығынҹагларла бирләшдирилиб вә јығынҹагларын әразиләри дәјишдирилиб. Бу гәрарын сајәсиндә ианә олунан вәсаитләрә хејли гәнаәт олунуб. Амма бунун үчүн тәблиғчиләр јени вәзијјәтә  ујғунлашмалы олуб. Бу сәдагәтли баҹы-гардашларын бәзиләри әввәлки јығынҹагларында узун илләр хидмәт едибләр вә орадакы баҹы-гардашларла јахын олублар. Амма инди онлардан башга јығынҹагда хидмәт етмәләри хаһиш олунуб. Бу садиг мәсиһиләрин тәшкилатдан ҝәлән ҝөстәриши дәстәкләдијини ҝөрмәк Јеһованын гәлбини шад едир!

15. Иса Мәсиһлә достлуғумуз ҝәләҹәкдә неҹә мөһкәмләнәҹәк?

¹⁵ Мүгәддәс руһла мәсһ олунан мәсиһиләрин әбәдијјәт боју Иса Мәсиһин јанында олуб, онунла бирҝә Аллаһын Падшаһлығында идарә етмәк үмидләри вар. Онлар һәрфи мәнада Мәсиһи ҝөрәҹәк, онунла данышаҹаг, онун јанында олаҹаглар (Јәһ. 14:2, 3). Јер үзүндә јашамаг үмиди оланлар да Мәсиһин мәһәббәтиндән вә диггәтиндән кәнарда галмајаҹаг. Онлар Мәсиһи ҝөрмәсәләр белә, араларындакы достлуг ҝүнбәҝүн мөһкәмләнәҹәк. Бу, Јеһованын вә Мәсиһин сајәсиндә әлдә етдикләри ҝөзәл һәјат боју давам едәҹәк (Әшј. 9:6, 7).

16. Мәсиһлә дост оланда һансы немәтләри алырыг?

¹⁶ Мәсиһин достлуг дәвәтини гәбул едәндә чохлу немәтләр алырыг. Мисал үчүн, биз артыг индидән онун мәһәббәтини вә дәстәјини һисс едирик. Ҝәләҹәкдә әбәди јашамаг имканымыз вар. Ән әсасы исә, Иса илә достлуғумуз ән ҝөзәл хәзинәјә саһиб олмаға — Јеһова Аллаһла сых мүнасибәтләр гурмаға имкан јарадыр. Мәсиһин досту адланмаг һәгигәтән дә бөјүк шәрәфдир!