1. Һәр биримиздән нә ҝөзләнилир?

ЧӘТИН бир јарышда гачмаг истәјәрдиниз, хүсусилә дә хәстә вә јорғун олдуғунуз һалда? Јәгин ки, јох. Амма һәвари Булус бүтүн мәсиһиләрин јарыш иштиракчылары олдугларыны демишди (Ибр. 12:1). Фәрги јохдур, ҹаваныг, јохса јашлы, ҝүҹүмүз вар, јохса јох, һәр биримиз Јеһованын бизә вәд етдији мүкафаты алмаг үчүн јарышда сона кими иштирак етмәлијик (Мәт. 24:13).

2. 2 Тимутијә 4:7, 8 ајәләринә әсасән, нәјә ҝөрә Булус алныачыглыгла даныша билирди?

² Булус бу мөвзуда алныачыглыгла даныша билирди, чүнки гаршысындакы «мәсафәни ахырадәк» гачмышды. (2 Тимутијә 4:7, 8 ајәләрини охујун.) Бәс һәвари Булус конкрет олараг һансы јарышдан данышырды?

3. Һәвари Булус һансы јарышдан данышырды?

³ Булус ваҹиб мөвзулары баша салмаг үчүн һәрдән гәдим Јунаныстанда кечирилән идман јарышларыны мисал чәкирди (1 Кор. 9:25—27; 2 Тим. 2:5). О, бир нечә дәфә мәсиһи һәјатыны гачыш үзрә јарышда иштирак етмәјә бәнзәтмишди (1 Кор. 9:24; Гал. 2:2,һаш.; Филип. 2:16). Инсан өзүнү Јеһоваја һәср едиб вәфтиз олунанда бу «јарыша» гатылыр (1 Бут. 3:21). Јеһова она әбәди һәјат мүкафатыны верәндә исә финиш хәттини кечир (Мәт. 25:31—34, 46; 2 Тим. 4:8).

4. Бу мәгаләдә нәји арашдыраҹағыг?

⁴ Узаг мәсафәјә гачышла мәсиһи һәјаты арасында һансы охшарлыг вар? Чох охшарлыг вар, ҝәлин онлардан үчүнә нәзәр салаг.  Биринҹиси, дүзҝүн јолу тутмалыјыг; икинҹиси, диггәтимизи финиш хәттинә ҹәмләмәлијик; үчүнҹүсү, јол боју үзләшәҹәјимиз чәтинликләри ашмалыјыг.

5. Биз һансы јолу тутмалыјыг вә нәјә ҝөрә?

⁵ Јарышда иштирак едән гачышчылар мүкафат алмаг үчүн јарыш тәшкилатчыларынын тәјин етдији јолла гачмалыдыр. Ејнилә, биз дә әбәди һәјат мүкафатыны алмаг истәјириксә, мәсиһи јолуну тутмалы, башга сөзлә, мәсиһи һәјат тәрзи илә јашамалыјыг (Һәв. 20:24; 1 Бут. 2:21). Амма Шејтан вә онун изи илә ҝедән кәсләр истәјир ки, биз башга истигамәт тутаг; «онларла бирликдә» гачаг (1 Бут. 4:4). Шејтанын јолу илә ҝедәнләр бизим тутдуғумуз һәјат јолуна ришхәнд едиб, өз јолларынын даһа јахшы олдуғуну вә азадлыға апардығыны иддиа едирләр. Амма онлар чох јанылырлар! (2 Бут. 2:19).

6. Брајнын нүмунәсиндән нә өјрәнирик?

⁶ Шејтан дүнјасына ујан гачышчылар чох кечмәмиш баша дүшүрләр ки, тутдуглары јол азадлыға јох, көләлијә апарыр (Ром. 6:16). Брајн адлы бир нәфәрин нүмунәсинә бахаг. Валидејнләри она мәсиһи јолуну тутмағы ашылајырдылар. Амма јенијетмә јашларында оланда Брајн бу јолун хошбәхтлијә апардығына шүбһә етмәјә башлады. Беләҹә, о, Шејтанын нормаларына ујғун јашајанларла бирҝә гачмаг гәрарына ҝәлди. Брајн дејир: «О вахт баша дүшмүрдүм ки, арзусунда олдуғум бу дырнагарасы азадлыг мәни асылылыг тәләсинә салаҹаг. Ҝет-ҝедә наркотик вә спиртли ички алудәчиси олдум, позғун һәјат сүрмәјә башладым. Нөвбәти бир нечә ил әрзиндә даһа ҝүҹлү наркотик маддәләрин дадына бахдым вә беләҹә, онлардан чохунун гулу олдум... Бу тәләбатларымы тәмин етмәк үчүн наркотик сатмаға башладым». Нәһајәт, Брајн Јеһованын гајда-ганунлары илә јашамаг гәрарына ҝәлди. О, тутдуғу јолу дәјишди вә 2001-ҹи илдә вәфтиз олунду. Брајн мәсиһи јолу илә ҝетдији үчүн инди сөзүн әсл мәнасында хошбәхтдир *.

7. Мәтта 7:13, 14 ајәләринә әсасән, гаршымызда һансы ики јол вар?

⁷ Дүзҝүн јолу тутмағымыз олдугҹа ваҹибдир! Шејтан истәјир ки, һамымыз «һәјата апаран» енсиз јолда гачмағы дајандырыб, чохларынын гачдығы енли јола гәдәм гојаг. Бу, мәшһур вә асан јолдур, амма «мәһвә апаран» јолдур. (Мәтта 7:13, 14 ајәләрини охујун.) Дүзҝүн јолла ҝетмәк вә бу јолдан сапмамаг үчүн Јеһоваја бел бағламалы вә Она гулаг асмалыјыг.

8. Гачышчылар бүдрәјиб јыхыланда нә едирләр?

⁸ Узун мәсафә үзрә јарышда гачышчылар бүдрәјиб јыхылмамаг үчүн диггәтләрини гаршыларындакы јола ҹәмләјирләр. Лакин ола биләр ки, иштиракчылар тәсадүфән бир-бирини итәләсин, јахуд ајаглары чалаја дүшсүн. Ишдир, онлар јыхылсалар, ајаға галхыб јарышы давам етдирирләр. Гачышчылар диггәти онлары јыхан амилләрә јох, финиш хәттинә вә газанмаг истәдикләри мүкафата ҹәмләјирләр.

9. Бүдрәјән заман нә етмәлијик?

⁹ Һәјат јолундакы јарышда иштирак едән бизләр сөз вә давранышымызла сәһв едиб дәфәләрлә бүдрәјирик. Јахуд да ола биләр ки, бизимлә бирҝә гачанлар сәһвләри илә бизи инҹитсин. Бу кими һаллар ҝөзләниләндир. Һәр биримиз гејри-камилик вә ејни јолда — дар јолда гачырыг. Буна ҝөрә дә мәҹази диллә десәк, бәзән бир-биримизә дәјирик. Булус да гејд етмишди ки, һәрдән биримизин диҝәриндән шикајәти олаҹаг (Кол. 3:13). Амма ҝәлин диггәтимизи бизи бүдрәдән амилә јох, гаршыдакы мүкафата ҹәмләјәк. Ишдир, бүдрәсәк, ајаға галхыб гачмаға давам едәк. Әҝәр кин сахлајыб аҹыглы галсаг вә ајаға галхмаг истәмәсәк, финиш хәттини кечмәјәҹәк вә мүкафаты алмајаҹағыг. Үстәлик, дар јолда гачанлара мане олаҹағыг.

10. Башгаларынын «иман јолундан дөнмәсинә баис» олмамаг үчүн нә едә биләрик?

¹⁰ Диндашымызын «јыхылмасына, иман јолундан дөнмәсинә баис» олмамағын диҝәр јолу өз һүгугларымызы тәләб етмәк әвәзинә, мүмкүн гәдәр ҝүзәштә ҝетмәкдир (Ром. 14:13, 19—21; 1 Кор. 8:9, 13). Бизим иштирак етдијимиз јарыш диҝәр јарышлардан фәргләнир. Диҝәр јарышларын иштиракчылары бир-бири илә рәгабәт апарыр вә һәр кәс чалышыр ки, мүкафаты өзү газансын. Онлар јалныз өзләрини дүшүнүр. Буна ҝөрә дә габаға кечмәк үчүн һәтта диҝәр иштиракчылары кәнара итәләјә биләрләр. Онлардан фәргли олараг, биз бир-биримизлә јарышмырыг (Гал. 5:26; 6:4). Мәгсәдимиз мүмкүн гәдәр чох адама бизимлә бирҝә финиш хәттини кечмәјә вә һәјат мүкафатыны алмаға көмәк етмәкдир. Она ҝөрә дә һәвари Булусун Аллаһдан илһам алараг јаздығы мәсләһәтә әмәл етмәјә чалышырыг. О демишди: «Тәкҹә өзүнүзү фикирләшмәјин, башгаларыны да фикирләшин» (Филип. 2:4).

11. Гачышчылар диггәтләрини нәјә ҹәмләјир вә нә үчүн?

 ¹¹ Адәтән гачышчылар диггәтләрини гаршыларындакы јола ҹәмләмәклә јанашы, финиш хәттини дә унутмурлар. Хәтти һәлә ҝөрмәсәләр дә, ону кечиб мүкафаты газандыгларыны тәсәввүрләриндә ҹанландырырлар. Даима бу мүкафат барәдә дүшүнмәк онлара мотивасија верир.

12. Јеһова бизә һансы мүкафаты верәҹәјинә зәманәт верир?

¹² Јеһова һәјат уғрунда јарышы баша вуранлара ҝөјдә, јахуд да јер үзү ҹәннәтдә әбәди һәјат мүкафаты верәҹәјинә зәманәт верир. Мүгәддәс Китаб бу мүкафат барәдә мәлумат вердијиндән, биз ҝәләҹәкдә һәјатымызын неҹә ҝөзәл олаҹағыны тәсәввүр едә билирик. Үмидимизи үрәјимиздә вә зеһнимиздә ҹанлы тутсаг, һеч нәјин бизи бүдрәтмәсинә јол вермәјәҹәјик.

13. Гәдимдәки гачышчылардан һансы үстүнлүјүмүз вар?

¹³ Гәдим Јунан ојунларында гачышчылар јорғунлуг вә ағрыларла мүбаризә апармалы олурду. Онлар јалныз етдикләри мәшгләрә вә өз ҝүҹләринә ҝүвәнә биләрдиләр. Һәмин гачышчылар кими, биз дә јарышда неҹә гачмалы олдуғумуза даир тәлим алырыг. Лакин бизим бу гачышчылардан үстүнлүјүмүз вар. Биз түкәнмәз ҝүҹ-гүввәтә саһиб олан Јеһоваја бел бағлаја биләрик. О сөз верир ки, Она ҝүвәнсәк, нәинки бизә тәлим верәҹәк, һәмчинин бизи ҝүҹлү едәҹәк! (1 Бут. 5:10).

14. 2 Коринфлиләрә 12:9, 10 ајәләри чәтинликләрлә мүбаризәдә бизә неҹә көмәк едир?

¹⁴ Булусун бир чох чәтинлији вар иди. Тәһгир вә тәгиб олунмасы бир јана, о, бәзән өзүнү чох зәиф һисс едирди, өз тәбиринҹә десәк, ҹисминә бир тикан батырылмышды вә бунунла мүбаризә апармалы олурду (2 Кор. 12:7). Лакин Булус бу чәтинликләрә хидмәтини дајандырмаг үчүн бир сәбәб кими јох, Јеһоваја бел бағламаг үчүн бир фүрсәт кими бахырды. (2 Коринфлиләрә 12:9, 10 ајәләрини охујун.) Бу ҹүр дүшүнҹәјә саһиб олдуғу үчүн Јеһова она бүтүн чәтинликләриндә көмәк етди.

15. Һәвари Булусдан өрнәк алмағын сајәсиндә нәји дуја биләрик?

¹⁵ Ола биләр ки, биз дә иманымыза ҝөрә тәһгир олунаг вә ја тәгибләрә мәруз галаг. Јахуд ола билсин, сәһһәтимиз зәифдир вә ҝүҹүмүз түкәниб. Һәвари Булусдан өрнәк алсаг, бу чәтинликләр Јеһованын дәстәјини дујмаг үчүн бир фүрсәт олаҹаг.

16. Сәһһәтиниз зәиф олса да, нә едә биләрсиниз?

¹⁶ Јатаға, јахуд әлил арабасына мәһкумсунуз? Дизләриниздә тагәт, ҝөзләриниздә нур галмајыб? Неҹә дүшүнүрсүнүз, белә вәзијјәтдә ҝәнҹ вә сағлам инсанларла бирҝә һәјат уғрунда јарышда гачмағыныз мүмкүндүр? Әлбәттә, мүмкүндүр! Бу ҝүн әбәди һәјата апаран јолда бир чох јашлы вә сәһһәти зәиф олан иман баҹы-гардашымыз гачыр. Сөзсүз ки, онлар буну өз ҝүҹләри һесабына етмир. Онлар ибадәт ҝөрүшүнә телефон бағлантысы васитәсилә гошулмагла, јахуд ҝөрүшүн видео јазысына бахмагла Јеһовадан ҝүҹ алырлар. Һәмчинин һәкимләрә, тибб баҹыларына вә гоһумларына тәблиғ етмәклә шаҝирд һазырламаг ишиндә иштирак едирләр.

17. Јеһова физики мәһдудијјәтләри олан кәсләрә неҹә јанашыр?

¹⁷ Гојмајын ки, физики мәһдудијјәтләриниз сизи руһдан салсын вә һәјат уғрунда јарышда гача билмәјәҹәјинизи дүшүнәсиниз. Јеһова иманыныза вә илләр әрзиндә Онун уғрунда чәкдијиниз зәһмәтә ҝөрә  сизи чох севир. Инди Јеһованын көмәјинә даһа чох еһтијаҹыныз вар вә О, әсла сиздән үз дөндәрмәјәҹәк (Зәб. 9:10). Әксинә, сизә даһа да јахынлашаҹаг. Сәһһәти илә бағлы проблемләри олан бир баҹынын сөзләринә диггәт јетирәк: «Сәһһәтим писләшдикҹә башгалары илә һәгигәт барәдә данышмаг имканым азалыр. Амма билирәм ки, һәтта Јеһованын јолунда ҝөрдүјүм кичик ишләр белә, Онун гәлбини севиндирир вә бу, мәнә хошбәхтлик бәхш едир». Руһдан дүшәндә унутмајын ки, тәк дејилсиниз, Јеһова сизинләдир. Һәвари Булусун нүмунәси үзәриндә дүшүнүн вә онун руһландырыҹы сөзләрини јадыныза салын. О демишди: «Зәифликләрә... гатлашмагдан һәзз алырам. Мән зәиф оланда ҝүҹлүјәм» (2 Кор. 12:10).

18. Нәјә ҝөрә Јеһованын бәзи хидмәтчиләри даһа ағыр вәзијјәтдәдирләр?

¹⁸ Әбәди һәјата апаран јолда гачанларын бәзиләри башга бир чәтинликлә үзләшир. Онлар башгаларынын ҝөрүб дуја билмәјәҹәји проблемләрлә мүбаризә апарырлар. Мәсәлән, депрессијадан әзијјәт чәкир вә ја ҝүҹлү нараһатлыг кечирирләр. Нәјә ҝөрә демәк олар ки, Јеһованын бу әзиз хидмәтчиләри даһа ағыр вәзијјәтдәдирләр? Чүнки инсанын голу сыныгдырса вә ја әлил арабасына мәһкумдурса, һәр кәс бу проблеми ҝөрә вә көмәк етмәк истәјә биләр. Амма мәнәви вә ја әгли изтираб чәкәнләрин пис вәзијјәтдә олдуглары үздән ҝөрүнмәјә биләр. Чәкдикләри ағрылар голу-гычы сынмыш инсанын ағрылары гәдәр ҝерчәк олса да, бәзән онлар башгаларынын шәфгәтиндән кәнарда галыр.

19. Мефибошетин нүмунәсиндән нә өјрәнирик?

¹⁹ Әҝәр һансыса чәтинликләриниз хидмәтинизи мәһдудлашдырырса, јахуд башгаларынын сизи дүз баша дүшмәдијинә ҝөрә мәјус олмусунузса, Мефибошетин нүмунәси сизи руһландыра биләр (2 Ишм. 4:4). О, әлил иди вә буна ҝөрә әзијјәт чәкирди. Үстәлик, Давуд падшаһ јанлыш гәнаәтә ҝәләрәк она гаршы һагсызлыг етмишди. Әслиндә, башына ҝәләнләрин һеч бириндә Мефибошетин ҝүнаһы јох иди. Амма о, буна ҝөрә бәдбин инсана чеврилмәди. Мефибошет һәјатындакы мүсбәт шејләри гијмәтләндирирди. О, Давудун кечмишдә она ҝөстәрдији хејирхаһлыға ҝөрә миннәтдар иди (2 Ишм. 9:6—10). Беләҹә, Давуд падшаһ јанлыш гәнаәтә ҝәләндә Мефибошет вәзијјәтә һәртәрәфли бахмаға чалышмышды. Давудун сәһвинин ону залымлашдырмасына јол вермәмишди. Нә дә Давудун етдикләринә ҝөрә Јеһованы ҝүнаһландырмамышды. Мефибошет Јеһованын мәсһ етдији падшаһы баҹардығы гәдәр дәстәкләмәк барәдә дүшүнүрдү (2 Ишм. 16:1—4; 19:24—30). Јеһова да онун бу ҝөзәл нүмунәсини  Өз Кәламына јаздырды ки, ондан өрнәк алаг (Ром. 15:4).

20. Бәзиләри нараһатлыг уҹбатындан һансы һиссләри кечирир, бәс онлар нәјә әмин ола биләр?

²⁰ Бәзи баҹы-гардашлар һәмишә ҝүҹлү нараһатлыг һисси јашадыгларындан ҹәмијјәт ичиндә оланда һәјәҹан, тәлаш кечирирләр. Онлара чох адам олан јердә олмаг чәтин ҝәлсә дә, јығынҹаг ҝөрүшләринә, топлантылара ҝәлмәјә давам едирләр. Танымадыглары инсанларла данышмаға чәкинсәләр дә, тәблиғә чыхырлар. Әҝәр бунлары етмәк сизә дә чәтиндирсә, әмин олун ки, сиз тәк дејилсиниз. Чохлары бу кими шејләрлә мүбаризә апарыр. Јадда сахлајын ки, Јеһова бүтүн үрәклә етдијиниз ишләрдән разыдыр. Тәслим олмамағыныз ҝөстәрир ки, О сиздән разыдыр вә сизә лазым олан ҝүҹү верир * (Филип. 4:6, 7; 1 Бут. 5:7). Физики мәһдудијјәтләринизә вә ја мәнфи емосијалара рәғмән, Јеһоваја хидмәт едирсинизсә, Онун сиздән разы галдығына әмин ола биләрсиниз.

21. Јеһованын көмәји сајәсиндә һәр биримиз нәји баҹараҹағыг?

²¹ Нә јахшы ки, гачыш үзрә јарышларла һәвари Булусун данышдығы јарыш арасында фәрг вар. Мүгәддәс Китаб дөврүндә кечирилән гачыш үзрә јарышларда јалныз бир нәфәр мүкафат газанырды. Амма мәсиһи јолунда сәдагәтли галан һәр бир кәс әбәди һәјат мүкафатыны алаҹаг (Јәһ. 3:16). Һәмчинин гачыш үзрә јарышын бүтүн иштиракчылары физики ҹәһәтдән мөһкәм олмалы иди, әкс һалда, онларын галиб ҝәлмәк еһтималы чох аз олурду. Лакин мәсиһи јолунда гачышда иштирак едән бизләрин бир чоху һеч дә мөһкәм физики сағламлыға саһиб дејил. Бунунла белә, биз дөзүмлә гачырыг (2 Кор. 4:16). Јеһованын көмәји илә һәр биримиз мәсафәни ахырадәк гачаҹағыг!