1, 2. 1 Бутрус 2:21 ајәсиндәки сөзләри һансы нүмунә әсасында изаһ едәрдиниз?

ТӘСӘВВҮР ЕДИН КИ, сиз бир дәстә адамла гарла өртүлү, тәһлүкәли бир әразидә јол ҝедирсиниз. Дәстәнин өнүндә тәҹрүбәли бәләдчи ҝедир. О ирәлиләдикҹә јумшаг гарын үстүндә ајағынын изи галыр. Амма бир гәдәр јол ҝедәндән сонра ҝөрүрсүнүз ки, бәләдчи јохдур. Буна бахмајараг, тәлаша дүшмүрсүнүз. Әксинә, сиз дә, јолдашларыныз да бәләдчинин гојдуғу изләрлә ҝетмәјә чалышырсыныз.

² Ејнилә, биз мәсиһиләр дә тәһлүкәли бир әразидә, бу шәр дүнјада јол ҝедирик. Хошбәхтликдән Јеһова бизә камил бир бәләдчи, Оғлу Иса Мәсиһи вериб (1 Бут. 2:21). Биз онун изләрилә ҝедә биләрик. Мүгәддәс Китаб үзрә бир елми ишә әсасән, бурада Бутрус Исаны бәләдчијә бәнзәдир. Иса да бәләдчи кими из гојуб ки, биз онун ардынҹа ҝедәк. Ҝәлин бунунла бағлы үч суалы нәзәрдән кечирәк. Исанын гојдуғу изләрлә ҝетмәк нә демәкдир? Биз нәјә ҝөрә онун изи илә ҝетмәлијик? Вә буну неҹә ҝедә биләрик?

3. Киминсә изи илә ҝетмәк нә демәкдир?

³ Киминсә изи илә ҝетмәк нә демәкдир? Мүгәддәс Китабда «ҝетмәк», «ајаг» сөзләри бәзән инсанын һәјат јолуну билдирир (Јар. 6:9; Мәс. 3:23). Инсанын өз һәјаты илә гојдуғу нүмунәни јеријәркән гојдуғу изә бәнзәтмәк олар. Демәли, киминсә изи илә ҝетмәк ондан нүмунә ҝөтүрмәк демәкдир.

4. Исанын изи илә ҝетмәк нә демәкдир?

 ⁴ Бәс Исанын изи илә ҝетмәк нә демәкдир? Садә диллә десәк, ондан өрнәк алмаг демәкдир. Мәгаләнин әсас ајәсиндә Бутрус Исанын әзаблара дөзмәкдә гојдуғу ҝөзәл нүмунәдән данышыр. Бунунла белә, биз диҝәр саһәләрдә дә Исадан өрнәк ҝөтүрә биләрик (1 Бут. 2:18—25). Бәли, Исанын бүтүн һәјаты, дедији вә етдији һәр шеј бизим үчүн ҝөзәл нүмунәдир.

5. Гејри-камил инсан Исанын мүкәммәл нүмунәсини изләјә биләр? Изаһ един.

⁵ Бәс гејри-камил инсан Исанын изи илә ҝедә биләр? Бәли. Бутрус демәди ки, биз Исанын изи илә мүкәммәл шәкилдә ҝедәк. О садәҹә бизи Исанын изи илә ҝетмәјә сәсләди. Исанын изи илә ҝетмәк үчүн гејри-камиллијимизин јол вердији гәдәр әлимиздән ҝәләни едириксә, онда демәк олар ки, биз Исанын ҝетдији јолла јеријирик (1 Јәһ. 2:6).

6, 7. Исанын изи илә ҝетмәк бизи Јеһоваја неҹә јахынлашдырыр?

⁶ Исанын изи илә ҝетмәк бизи Аллаһа јахын едир. Нә үчүн белә дејә биләрик? Биринҹиси, Иса Јеһованын бәјәндији кими јашамагла бағлы ҝөзәл нүмунә гојуб (Јәһ. 8:29). Демәли, Исанын изи илә ҝетсәк, Јеһова бизим дә һәјатымыздан разы галар. Вә биз әмин ола биләрик ки, сәмави Атамыз Онунла дост олмаг үчүн әлиндән ҝәләни едән кәсләрә јахынлашаҹаг (Јаг. 4:8).

⁷ Икинҹиси, Иса Атасына мүкәммәл сурәтдә бәнзәјирди. Буна ҝөрә о демишди: «Мәни ҝөрән Атаны да ҝөрүб» (Јәһ. 14:9). Биз Исанын хүсусијјәтләриндән вә башгалары илә рәфтарындан өрнәк ала биләрик. Мәсәлән, Исанын ҹүзамлыја јазығы ҝәлмишди. Ҹидди хәстәликдән әзијјәт чәкән бир гадына шәфгәт ҝөстәрмишди вә  әзизини итирәнләрә ҝөрә кәдәрләнмишди. Исадан өрнәк ҝөтүрәндә Јеһовадан өрнәк ҝөтүрмүш олуруг (Марк 1:40, 41; 5:25—34; Јәһ. 11:33—35). Нә гәдәр чох Јеһоваја бәнзәсәк, бир о гәдәр Она јахын оларыг.

8. Исанын изи илә ҝетмәк бизә дүнјаја галиб ҝәлмәјә неҹә көмәк едәҹәк?

⁸ Исанын изи илә ҝетсәк, бу шәр дүнја диггәтимизи ибадәтдән јајындырмајаҹаг. Јер үзүндәки һәјатынын сон ҝеҹәсиндә Иса демишди: «Мән дүнјаја галиб ҝәлдим» (Јәһ. 16:33). Бу сөзләрлә Иса демәк истәјирди ки, бу дүнјанын инсанларынын дүшүнҹә вә давраныш тәрзи, мәгсәдләри ону өз гәлибинә сала билмәди. Иса һеч вахт јер үзүнә ҝәлишинин мәгсәдини — Јеһованын адыны мүгәддәс тутмаг мәгсәдини унутмады. Бәс бизим һаггымызда нә демәк олар? Бу дүнјада диггәтимизи ибадәтдән јајындыран шејләр чохдур. Амма Иса кими диггәтимизи Јеһованын ирадәсини јеринә јетирмәјә ҹәмләсәк, биз дә дүнјаја галиб ҝәләҹәјик (1 Јәһ. 5:5).

9. Әбәди һәјата апаран јолдан сапмамаг үчүн нә етмәлијик?

⁹ Исанын изи илә ҝетсәк, әбәди јашаја биләҹәјик. Бир дәфә варлы бир ҹаван Исаја јахынлашыб сорушду ки, әбәди һәјаты алмаг үчүн нә етмәлидир. Иса исә ҹавабында деди: «Ардымҹа ҝәл» (Мәт. 19:16—21). Һәмчинин онун Мәсиһ олдуғуна инанмајан бәзи јәһудиләрә деди: «Мәним гојунларым... ардымҹа ҝәлирләр. Мән онлара әбәди һәјат верәҹәјәм» (Јәһ. 10:24—29). Бундан башга, Иса онун тәлимләри илә марагланан вә Синедрионун үзвү олан Никодемә дә деди ки, она иман едәнләрин әбәди һәјаты олаҹаг (Јәһ. 3:16). Исанын дедикләрини етмәклә вә онун кими давранмагла она иман етдијимизи ҝөстәририк. Белә етсәк, әбәди һәјата апаран јолдан һеч вахт сапмајаҹағыг (Мәт. 7:14).

10. Исаны даһа јахшы танымаг үчүн нә етмәлијик? (Јәһ. 17:3)

¹⁰ Исанын изи илә ҝетмәздән әввәл биз Ону танымалыјыг. (Јәһја 17:3 ајәсини охујун.) Исаны танымаг даими бир просесдир. Биз Исаны мүмкүн гәдәр јахшы танымалыјыг. Онун кејфијјәтләри, дүшүнҹә тәрзи вә дәјәрләри барәдә даима өјрәнмәлијик. Һәгигәтдә нечә мүддәт олмағымыздан асылы олмајараг, биз Јеһованы вә Исаны танымаға давам етмәлијик.

11. Дөрд Мүждәдә нәдән бәһс олунур?

¹¹ Јеһова Кәламында јаздырдығы дөрд Мүждә васитәсилә Оғлуну бизә таныдыр. Мүждәләрдә Исанын һәјаты вә хидмәти илә бағлы әһвалатлар јазылыб. Орада Исанын сөзләри, әмәлләри вә һиссләри гәләмә алыныб. Бу дөрд Мүждә Исанын гојдуғу нүмунә үзәриндә ҹидди дүшүнмәјә көмәк  едир (Ибр. 12:3). Бу Мүждәләр бизи Исанын изләри илә таныш едир. Одур ки, Мүждәләри арашдырмагла биз Исаны даһа јахындан таныја биләрик вә беләҹә, онун изи илә ҝедә биләрик.

12. Мүждәләрдән там фајда әлдә етмәк үчүн нә етмәлијик?

¹² Мүждәләрдән там фајда әлдә етмәк үчүн онлары садәҹә охумаг кифајәт дејил. Вахт ајырыб орада јазыланлары диггәтлә арашдырмалы вә үзәриндә дәриндән дүшүнмәлијик. (Јушә 1:8 ајәсиндәки һашијә илә әлагәләндирин.) Ҝәлин ики мәсләһәтә диггәт јетирәк. Ҝөрәк Мүждәләрдән өјрәндикләримизин үзәриндә неҹә дүшүнә биләрик вә охудугларымыза неҹә әмәл едә биләрик.

13. Мүждәләрдә јазылмыш һадисәләри тәсәввүрүмүздә неҹә ҹанландыра биләрик?

¹³ Биринҹиси, Мүждәләрдә јазылмыш һадисәләри тәсәввүрүнүздә ҹанландырын. Тәхәјјүлүнүзү ишә салараг охудуғунуз әһвалаты ҝөрмәјә, ешитмәјә, дујмаға чалышын. Бунун үчүн Јеһованын тәшкилатынын тәгдим етдији нәшрләрдә ахтарыш апарын. Контексти нәзәрә алын, јәни охудуғунуз парчадан әввәлки вә сонракы һадисәләри арашдырын. Инсанлар вә јерләр һагда әлавә мәлумат ахтарын. Мүталиә етдијиниз һадисәнин диҝәр Мүждәләрдә неҹә тәсвир олундуғуна диггәт јетирин. Бәзән бир Мүждәдә елә тәфсилатлар јер алыр ки, онлара диҝәр Мүждәләрдә раст ҝәлинмир.

14, 15. Мүждәләрдән өјрәндикләримизә неҹә әмәл едә биләрик?

¹⁴ Икинҹиси, Мүждәләрдә Иса һаггында өјрәндикләринизә әмәл един (Јәһ. 13:17). Һансыса бир әһвалаты арашдырандан сонра дүшүнүн: «Бурадан өјрәндикләримә неҹә әмәл едә биләрәм? Өјрәндијим бу мәлуматы кимә данышыб көмәк едә биләрәм?» Киминсә барәсиндә дүшүнүн вә јери ҝәләндә нәзакәтли шәкилдә өјрәндикләринизи онунла бөлүшүн.

 ¹⁵ Ҝәлин инди бир нүмунә әсасында бу ики мәсләһәти неҹә тәтбиг едә биләҹәјимизә бахаг. Касыб дул гадынын әһвалатына нәзәр салаҹағыг.

16. Марк 12:41 ајәсиндәки сәһнәни тәсвир един.

¹⁶ Әһвалаты тәсәввүрүнүздә ҹанландырын. (Марк 12:41 ајәсини охујун.) Бу сәһнәни тәсәввүр един. Ерамызын 33-ҹү или, нисан ајынын он биридир. Исанын өлүмүнә бир һәфтәдән дә аз вахт галыб. Иса Мәсиһ ҝүнүнүн чох һиссәсини мәбәддә тәлим вермәклә кечириб. Амма дин хадимләри бүтүн ҝүнү она аман вермәјиб. Әввәл-әввәл бәзиләри онун сәлаһијјәтини шүбһә алтына алды. Бир башгалары исә Исаны сөздә тутмаг үчүн долашыг суаллар верирди (Марк 11:27—33; 12:13—34). Инди Иса мәбәдин башга тәрәфиндәдир, еһтимал ки, «Гадынлар һәјәти» адланан әразисиндә. Бурада о, дивар бојунҹа гојулмуш хәзинә габларыны ҝөрүр. О әјләшир вә ҹамаатын хәзинә габларына ианә атмағына бахмаға башлајыр. Ҝөрүр ки, варлылар хәзинә габларына чохлу пул атырлар. Јәгин о бу габлара јахын әјләшиб. Буна ҝөрә дә габа дүшән пулларын ҹинҝилтисини ешидир.

17. Марк 12:42 ајәсиндәки дул гадын нә етди?

¹⁷ Марк 12:42 ајәсини охујун. Бир гәдәр сонра Исанын ҝөзү бир гадына саташыр. Бу, касыб бир дул гадындыр. Онун ҝүзәраны чох чәтиндир. Һеч зәрури шејләри алмаға белә пулу јохдур. Амма о да хәзинә габына јахынлашыр вә еһтијатла ики хырда пул атыр. Јәгин бу пуллар габа дүшәндә һеч ҹинҝилтиси дә ешидилмәјиб. Иса онун һансы пулу атдығыны билир. О, ики лепта атыб. Бу пул һәмин вахт дөвријјәдә олан ән хырда пул иди. Бу пула ән уҹуз јемәли гушлардан олан бир сәрчә дә дүшмүрдү.

18. Марк 12:43, 44 ајәләринә әсасән, Иса дул гадынын ианәси барәдә нә деди?

¹⁸ Марк 12:43, 44 ајәләрини охујун. Бу дул гадынын давранышы Исаја дәрин тәсир бағышлады. Одур ки, шаҝирдләрини јанына чағырыб дул гадыны ҝөстәрәрәк деди: «Буну билин ки, бу касыб дул гадын хәзинә габына һамыдан чох атды». Иса бунун сәбәбини белә изаһ етди: «Чүнки онларын һамысы [хүсусән дә варлылар] варларынын артыглығындан ианә вердиләр, бу гадын исә јохсул ола-ола доланмаг үчүн нәји вардыса һамысыны верди». Бу иманлы гадын сон гәпијини ианә вермәклә Јеһованын онун гајғысына галаҹағына етибар етдијини ҝөстәрди (Зәб. 26:3).

19. Исанын касыб дул гадын барәдә дедији сөзләрдән нә өјрәнирик?

¹⁹ Өјрәндијинизә әмәл един. Дүшүнүн: «Исанын касыб дул гадын һагда дедији сөзләрдән нә өјрәнирәм?» Ҝәлин фикирләшәк. Шүбһәсиз, бу дул гадын да истәјәрди ки, Јеһова үчүн даһа чох ианә етсин. Бунунла белә, о, баҹардығыны етди. Әлиндә нә вар идисә, Јеһоваја верди. Иса билирди ки, бу гадынын ианәси Јеһованын ҝөзүндә дәјәрлидир. Демәли, бу әһвалатдан ваҹиб бир шеји өјрәнирик: Биз әлимиздән ҝәләни едәндә, бүтүн гәлбимизлә, варлығымызла ибадәт едәндә Јеһова разы галыр (Мәт. 22:37; Кол. 3:23). Јеһова ҝөрәндә ки, биз баҹардығымыз һәр шеји едирик севинир. Биз ибадәт үчүн вахтымызы вә ҝүҹүмүзү әсирҝәмәјәндә, мәсәлән, тәблиғдә, ибадәт ҝөрүшләриндә иштирак етмәк үчүн әлимиздән ҝәләни едәндә Јеһованын көнлү шад олур.

20. Дул гадын һагда әһвалатдан өјрәндикләринизә неҹә әмәл едә биләрсиниз? Нүмунә чәкин.

²⁰ Бу әһвалатдан өјрәндикләринизә неҹә әмәл едә биләрсиниз? Дүшүнүн ҝөрүн кимләри  руһландыра биләрсиниз? Кимләри чәкдикләри зәһмәтин Јеһова үчүн дәјәрли олдуғуна әмин едә биләрсиниз? Мисал үчүн, елә бир јашлы баҹы таныјырсынызмы ки, сәһһәтинә ҝөрә әввәлки гәдәр хидмәтдә иштирак едә билмәдији үчүн өзүнү дәјәрсиз һисс етсин, ҝүнаһландырсын? Јахуд елә бир гардаш таныјырсынызмы ки, хроники хәстәлији уҹбатындан ҝөрүшләрин һәр бириндә иштирак едә билмәдији үчүн руһдан дүшсүн? Белә диндашларынызын иманыны мөһкәмләндирмәк үчүн «јахшы сөз сөјләјин» (Ефес. 4:29). Касыб дул гадын һагда әһвалатдан өјрәндијиниз руһландырыҹы фикирләри онларла бөлүшүн. Сизин сөзләриниз онлары әмин едә биләр ки, әлимиздән ҝәләни едириксә, Јеһова разы галыр (Мәс. 15:23; 1 Салон. 5:11). Јеһованын јолунда, һәтта аз да олса, әлиндән ҝәләни едәнләри тәрифләјәндә Исанын изләри илә ҝетмиш олурсунуз.

21. Сиз нә етмәјә гәтијјәтлисиниз?

²¹ Нә јахшы ки Мүждәләрдә Исанын һәјаты барәдә бу гәдәр чох мәлумат вар. Бунун сајәсиндә биз ондан өрнәк алыр вә онун изи илә ҝедә билирик. Фәрди мүталиә заманы вә ја аиләви ибадәтиниздә Мүждәләри арашдыра биләрсиниз. Һәмчинин унутмајын ки, охудугларыныздан там фајда әлдә етмәк үчүн һадисәләри тәсәввүрүнүздә ҹанландырмалы вә өјрәндикләринизә әмәл етмәлисиниз. Амма Иса кими давранмагдан әлавә, онун дедикләринә дә гулаг асмалыјыг. Нөвбәти мәгаләдә арашдыраҹағыг ки, Исанын өлүмүндән әввәл дедији сон сөзләрдән нә өјрәнә биләрик.