Нәјә ҝөрә Иса Мәсиһ сон нәфәсини вермәздән әввәл Давудун Зәбур 22:1 ајәсиндәки сөзләрини ситат ҝәтирди?

Иса Мәсиһин өлүмүндән әввәл дедији сон сөзләрдән бири дә Мәтта 27:46 ајәсиндә јазылыб: «Аллаһым, Аллаһым, нијә мәни тәрк етдин?» Бу сөзләрлә Иса Давудун Зәбур 22:1 ајәсиндә јаздығы пејғәмбәрлији јеринә јетирди (Марк 15:34). Исанын бу сөзләри мәјус олдуғу үчүн, јахуд бир анлыг иманыны итирдији үчүн дедијини дүшүнмәк јанлыш оларды. Иса нә үчүн өлмәли олдуғуну там баша дүшүрдү вә буна һазыр иди (Мәт. 16:21; 20:28). Иса һәм дә баша дүшүрдү ки, Јеһова ону сон анында һеч бир шәкилдә горумајаҹаг (Әјј. 1:10). Јеһова Исаны горумамагла изин верди ки, Иса һәр нә гәдәр дәһшәтли өлүмлә үзләшсә дә, садиг галаҹағыны сүбут етсин (Марк 14:35, 36).

Бәс нәјә ҝөрә Иса бу мәзмурдан ситат ҝәтирди? Биз бу барәдә гәти һеч нә дејә билмәсәк дә, ҝәлин бәзи еһтималлара бахаг *.

Ола билсин, Иса бу сөзләрлә өлүм анында Јеһованын онун јанында олмадығыны вурғуламаг истәјирди. Иса фидјәни Јеһованын көмәји олмадан өдәмәли иди. О, «һәр кәсин әвәзинә өлүмү» дадмалы иди (Ибр. 2:9).

Ола билсин, Иса бу сөзләрлә бүтүн мәзмура диггәт чәкмәк истәјирди. Һәмин дөврдә јәһудиләрин бир чох мәзмуру әзбәр билмәси ади һал иди. Мәзмурдан бир ајә ешидәндә, еһтимал ки, бүтүн мәзмур јадларына  дүшәҹәкди. Әҝәр Исанын мәгсәди бу идисә, онда о, јәһуди давамчыларына бу мәзмурда јерләшән бир чох пејғәмбәрлији хатырламаға көмәк етмишди. Чүнки 22-ҹи мәзмурда Исанын өлүмү әрәфәсиндәки һадисәләрлә бағлы пејғәмбәрликләр вар (Зәб. 22:7, 8, 15, 16, 18, 24). Һәмчинин мәзмурун сон ајәләри Јеһованы уҹалдыр вә Ону бүтүн дүнјанын Падшаһы кими тәсвир едир (Зәб. 22:27—31).

Ола билсин, Иса Давудун бу сөзләрини ситат ҝәтирмәклә өзүнүн ҝүнаһсыз олдуғуну вурғуламаг истәјирди. Өлүмүндән әввәл ганунсуз мәһкәмә гуруб, Исаны күфр етмәкдә тәгсирли билдиләр (Мәт. 26:65, 66). Бу мәһкәмә тез-тәләсик ҝеҹәнин бир аләминдә гурулду вә һеч бир гајда-гануна риајәт едилмәдән Исаја һөкм охунду (Мәт. 26:59; Марк 14:56—59). Ола билсин, Иса: «Аллаһым, Аллаһым, нијә мәни тәрк етдин?» — демәклә бу ҹүр ҹәзаја лајиг һеч бир ҝүнаһ ишләтмәдијини вурғуламаг истәјирди.

Ола билсин, Иса хатырлатмаг истәјирди ки, Јеһова бу мәзмурун јазары Давудун әзаб чәкмәсинә изин версә дә, әслиндә ондан наразы дејилди. Давудун сөзләри онун иманыны итирдијини ҝөстәрмирди. Бу сөзләрдән сонра Давуд Јеһованын халгыны хилас едәҹәјинә иман етдијини дилә ҝәтирмишди. Јеһова да она немәтләр вермәјә давам етмишди (Зәб. 22:23, 24, 27). Ејнилә, «Давуд Оғлу» Исанын ишҝәнҹә дирәјиндә әзаб чәкмәси Јеһованын ондан наразы олдуғуну ҝөстәрмирди (Мәт. 21:9).

Ола билсин, Иса бу сөзләрлә, Јеһованын ону тәк бурахмалы олдуғуна ҝөрә кәдәрини ифадә едирди. Оғлунун әзаб чәкәрәк өлмәси әзәлдән Јеһованын нијјәтиндә олмајыб. Адәмлә Һәвва Јеһоваја үсјан едәндән сонра буна еһтијаҹ јаранды. Иса Мәсиһ һеч бир ҝүнаһ ишләмәмишди. Амма о әзаб чәкиб өлмәли иди ки, Шејтанын иддиаларына ҹаваб версин вә Адәмин итирдијини ҝери алмаг үчүн лазым олан фидјәни өдәсин (Марк 8:31; 1 Бут. 2:21—24). Бунун үчүн исә Јеһова бир анлыг Өз мүдафиәсини Исадан чәкмәли иди. Белә бир һал Исанын өмрүндә биринҹи дәфә иди, баш верирди.

Ола билсин, Иса бу сөзләрлә шаҝирдләринин диггәтини дирәкдә едам едилмәсинин сәбәбинә јөнәлтмәк истәјирди *. Иса билирди ки, Онун дирәкдә ҹинајәткар кими едам едилмәси чохларыны бүдрәдәҹәк (1 Кор. 1:23). Амма Исанын давамчылары диггәтләрини онун өлүмүнүн әсл сәбәбинә ҹәмләсәләр, бунун маһијјәтини баша дүшәҹәкләр (Гал. 3:13, 14). Онда Исаја ҹинајәткар кими јох, Хиласкар кими бахаҹаглар.

Исанын бу сөзләри һансы мәгсәдлә демәсиндән асылы олмајараг, о баша дүшүрдү ки, дирәкдә едам олунмагла Аллаһын ирадәсини јеринә јетирир. Иса бу мәзмурдан ситат ҝәтирәндән сонра деди: «Тамам олду!» (Јәһ. 19:30; Лука 22:37). Бәли, Јеһованын ани олараг Исаны тәк гојмасы сајәсиндә о, јер үзүнә ҝәлишинин мәгсәдини тамлыгла иҹра етди. Һәмчинин «Мусанын Төвратында, Пејғәмбәрләрин китабында вә Зәбурда» онун һагда јазылан пејғәмбәрликләри јеринә јетирди (Лука 24:44).