1. Јеһова бизим неҹә олмағымызы истәјир?

 ӨВЛАД саһиби олмаг ата-ана үчүн бөјүк хошбәхтликдир. Онлар көрпә балаларыны чох истәјирләр. Бунунла белә, онун һәмишә көрпә галмасыны һеч вахт истәмәзләр. Һәтта ушағын бөјүмәдијини, инкишафдан галдығыны ҝөрсәләр, нараһат оларлар. Биз дә Исанын давамчысы кими илк аддымларымызы атанда Јеһова чох севинир. О да бизим руһани ҹәһәтдән көрпә галмағымызы истәмир (1 Кор. 3:1). Әксинә, бизи «јеткин» мәсиһи олмаға тәшвиг едир (1 Кор. 14:20).

2. Бу мәгаләдә һансы суаллара ҹаваб тапаҹағыг?

² Јеткин мәсиһи олмаг нә демәкдир? Јеткин мәсиһи олмаг үчүн нә етмәлијик? Бәрк руһани гида бөјүмәјимизә неҹә көмәк едир? Нәјә ҝөрә өзүмүзә һәддән артыг архајын олмамалыјыг? Мәгаләдә бу суалларын ҹавабы арашдырылыр.

ЈЕТКИН МӘСИҺИ ОЛМАГ НӘ ДЕМӘКДИР?

3. Јеткин мәсиһи олмаг нә демәкдир?

³ Мүгәддәс Китабда «јеткин» кими тәрҹүмә олунан јунан сөзү «бөјүк», «камил», «там» мәнасыны да верир a (1 Кор. 2:6). Көрпә ҝет-ҝедә бөјүјүб јеткинлик јашына чатдығы кими, биз дә руһани ҹәһәтдән бөјүјүб јеткин мәсиһи сәвијјәсинә чатмалыјыг. Тәбии ки, бу мәгсәдә чатмаг кифајәт дејил. Биз Јеһова илә мүнасибәтләримизи даима мөһкәмләндирмәлијик (1 Тим. 4:15). Ҝәнҹләр дә дахил олмагла, һәр биримиз јеткин мәсиһи ола биләрик. Бәс јеткин олуб-олмадығымызы неҹә билмәк олар?

4. Кимә јеткин мәсиһи дејилир?

⁴ Јеткин мәсиһи о кәсдир ки, Аллаһын гајда-ганунларынын һамысына әмәл едир, тәкҹә өз үрәји истәјәнләрә јох. Сөзсүз, гејри-камил олдуғу үчүн о да сәһвләр едир. Бунунла  белә, һәр ҝүн чалышыр ки, дүшүнҹәләри вә әмәлләри Јеһоваја хош ҝетсин. О, јени шәхсијјәти ҝејинир вә даима Јеһова кими дүшүнмәјә чалышыр (Ефес. 4:22—24). О, Јеһованын ганун вә принсипләри әсасында дүзҝүн гәрарлар вермәји өјрәниб. Буна ҝөрә дә онун һәр аддымбашы неҹә давранаҹағыны диктә едән гајдалара еһтијаҹы јохдур. Јеткин инсан өзүнә һаким олмағы баҹардығы үчүн вердији гәрара ујғун давранмағы да баҹарыр (1 Кор. 9:26, 27).

5. Јеткин олмајан мәсиһи илә нә баш верә биләр? (Ефеслиләрә 4:14, 15).

⁵ Јеткин олмајан мәсиһи исә инсанларын фырылдағына, фәнд-фелинә тез алданыр. О, медиада јајылан сахта хәбәрләрә, шајиәләрә, јалан мәлуматлара алданыр, ја да дөнүкләрин тәсиринә дүшүр b. (Ефеслиләрә 4:14, 15 ајәләрини охујун.) Адәтән јеткин олмајан мәсиһи башгаларына пахыллыг едир, мүнагишә јарадыр, инҹијир, нәфсинә мәғлуб олур (1 Кор. 3:3).

6. Руһани ҹәһәтдән јеткинләшмәји нәјә бәнзәтмәк олар? (Һәмчинин шәклә бахын.)

⁶ Бајаг гејд етдијимиз кими Мүгәддәс Китабда мәсиһинин руһани ҹәһәтдән јеткинләшмәси көрпә ушағын бөјүмәсинә бәнзәдилир. Ушағын һәлә ағлы кәсмәдији үчүн о, бөјүкләрин нәзарәти алтында олмалыдыр. Буну белә бир нүмунә әсасында изаһ етмәк олар: ана јолу кечәндә балаҹа гызынын әлиндән тутур. Гыз бир аз бөјүјәндән сонра анасы она јолу тәк кечмәјә иҹазә верир. Амма јенә дә тапшырыр ки, јолу кечәндә саға-сола бахсын. Һәмин гыз артыг јеткинлик јашына чатанда тәһлүкәнин нә олдуғуну өзү ајырд едә билир. Тәһлүкәдән узаг олмаг үчүн ушагларын бөјүкләрин көмәјинә еһтијаҹы олдуғу кими, јеткин олмајан мәсиһиләрин дә көмәјә еһтијаҹы вар. Мәсәлән, онлар еһтијаҹ дујур ки, кимсә онлара руһани тәһлүкәләрдән узаг дурмаға вә дүзҝүн гәрарлар вермәјә көмәк етсин. Јеткин мәсиһи исә гәрар верәндә Јеһованын дүшүнҹәсини өјрәнмәк үчүн Мүгәддәс Китаб принсипләрини өлчүб-бичир, сонра да буна ујғун давраныр.

7. Јеткин мәсиһиләрин башгаларынын көмәјинә еһтијаҹы олур?

 ⁷ Бәс бу о демәкдир ки, јеткин мәсиһинин һеч вахт башгасынын көмәјинә еһтијаҹы олмур? Хејр. Она да бәзән кимләринсә көмәји лазым ҝәлә биләр. Амма јеткин олмајан мәсиһи, ола билсин, өзү гәрар вермәк әвәзинә, башгасынын онун јеринә гәрар вермәсини ҝөзләјир. Јеткин мәсиһи исә даһа һикмәтли, тәҹрүбәли инсанлардан көмәк истәсә дә баша дүшүр ки, гәрары өзү вермәлидир вә «өз мәсулијјәт јүкүнү [дашымалыдыр]» (Гал. 6:5).

8. Јеткин мәсиһиләр бир-бириләриндән нә илә фәргләнирләр?

⁸ Бөјүкләр хариҹи ҝөрүнүшҹә бир-бириндән фәргләнир. Ејнилә, јеткин мәсиһиләрин дә хүсусијјәтләри бир-бириндән фәргләнир. Кимиси даһа һикмәтлидир, кимиси даһа ҹәсарәтлидир, кимиси даһа сәхавәтлидир, кимиси дә даһа шәфгәтлидир. Ејнилә, ола биләр ки, ејни вәзијјәтлә үзләшмиш ики јеткин мәсиһи ики мүхтәлиф гәрар версин вә бу гәрарлары Мүгәддәс Китаба әсасән мәгбул олсун. Бу, хүсусилә дә виҹдана әсасән верилән гәрарлара аиддир. Онлар буну баша дүшдүкләри үчүн фәргли гәрар верәндә бир-бириләрини гынамырлар, әксинә, бирлији горумаға чалышырлар (Ром. 14:10; 1 Кор. 1:10).

ЈЕТКИН МӘСИҺИ ОЛМАГ ҮЧҮН НӘ ЕТМӘЛИЈИК?

9. Инсанын руһани ҹәһәтдән јеткинләшмәси өз-өзүнә баш верир? Изаһ един.

⁹ Бөјүмә просеси адәтән тәбии олараг баш верир. Амма руһани ҹәһәтдән бөјүмәк, јеткинләшмәк өз-өзүнә баш верән просес дејил. Мәсәлән, Коринф јығынҹағындакы баҹы-гардашлар хош мүждәни ешитмишдиләр, вәфтиз олунмушдулар, мүгәддәс руһ алмышдылар вә һәвари Булусун онлара шәхсән вердији нәсиһәтләрдән чох шеј өјрәнмишдиләр (Һәв. 18:8—11). Бунунла белә, вәфтизләриндән бир нечә ил кечсә дә, чохлары һәлә дә јеткинләшмәмишди (1 Кор. 3:2). Бәс ејни шејин бизимлә дә баш вермәмәси үчүн нә едә биләрик?

10. Јеткинлијә чатмаг үчүн нә етмәлијик? (Јәһуда 20, 21).

¹⁰ Јеткинлијә чатмаг үчүн биздә илк нөвбәдә ҝүҹлү истәк олмалыдыр. Ҹаһил галмағы сечәнләр руһани ҹәһәтдән һеч вахт инкишаф етмәјәҹәкләр, елә көрпә галаҹаглар (Мәс. 1:22). Биз физики ҹәһәтдән бөјүјән, амма гәрар верәркән һәлә дә валидејнләринин сөзүндән асылы олан кәсләрә бәнзәмәк истәмәрик. Әксинә, биз руһани ҹәһәтдән бөјүмәк мәсулијјәтини өзүмүз дашымаг истәјирик. (Јәһуда 20, 21 ајәләрини охујун.) Һал-һазырда јеткин мәсиһи олмаға чалышырсынызса, дуа един ки, Јеһова гәлбиниздә һәм арзу ојатсын, һәм дә фәалијјәт ҝөстәрмәјиниз үчүн сизә ҝүҹ версин (Филип. 2:13).

11. Јеһова јеткин мәсиһи олмаға бизә неҹә көмәк едир? (Ефеслиләрә 4:11—13).

¹¹ Јеһова билир ки, руһани ҹәһәтдән јеткинләшмәк үчүн бизим көмәјә еһтијаҹымыз вар. О, мүхтәлиф јолларла бизә «јеткин инсан сәвијјәсинә» — «Мәсиһә мәхсус долғунлуғун инкишаф дәрәҹәсинә» јетишмәјә көмәк едир. (Ефеслиләрә 4:11—13 ајәләрини охујун.) Мәсәлән, буну јығынҹагда чобан вә мүәллим кими хидмәт едән гардашлар васитәсилә едир. Һәмчинин О, «Мәсиһин дүшүнҹәсинә» саһиб олмағымыз үчүн бизә мүгәддәс руһуну верир (1 Кор. 2:14—16). Бундан әлавә, Јеһова бизим үчүн дөрд Мүждә назил едиб. Биз орадан Мәсиһин јер үзүндә оларкән неҹә дүшүндүјү, данышдығы вә даврандығы барәдә охујуруг. Иса Мәсиһә  бәнзәмәјә чалышмагла сиз јеткин мәсиһи олмаг мәгсәдинизә чата биләрсиниз.

БӘРК РУҺАНИ ГИДАНЫН РОЛУ

12. «Мәсиһ һаггындакы ибтидаи тәлимләр»ә нә дахилдир?

¹² Јеткинлијә доғру ирәлиләмәк үчүн биз «Мәсиһ һаггындакы ибтидаи тәлимләри» архада гојмалыјыг. Јәни Мүгәддәс Китабдакы әсас тәлимләри билмәк аздыр. Бу тәлимләрә төвбә, иман, вәфтиз вә дирилмә һагда өјрәндикләримиз дахилдир (Ибр. 6:1, 2). Бунлар әсл мәсиһи иманынын тәмәлиндә дуран биликләрдир. Елә буна ҝөрә дә Әллинҹи ҝүн бајрамында һәвари Бутрус издиһамын гаршысында бунлардан данышмышды (Һәв. 2:32—35, 38). Мәсиһин давамчысы олмаг үчүн биз бу ибтидаи тәлимләрә иман ҝәтирмәлијик. Мәсәлән, һәвари Булус гејд етмишди ки, дирилмәни инкар едән өз иманыны да инкар едир (1 Кор. 15:12—14). Амма јеткинләшмәјимиз үчүн тәкҹә бу ибтидаи тәлимләри билмәјимиз кифајәт етмир.

13. Бәрк руһани гидадан фајда әлдә етмәк үчүн нә етмәлијик? (Ибраниләрә 5:14). (Һәмчинин шәклә бахын.)

¹³ Ибтидаи тәлимләрдән фәргли олараг, бәрк руһани гидаја тәкҹә Јеһованын ганунлары јох, һәмчинин принсипләри дә дахилдир. Бу принсипләр бизә Јеһованын дүшүнҹәсини гаврамаға көмәк едир. Бәрк руһани гидадан фајда әлдә етмәк үчүн Аллаһын Кәламыны мүталиә етмәли, охудугларымызын дәринлијинә вармалы вә өјрәндикләримизә әмәл етмәјә чалышмалыјыг. Белә етдикҹә биз Јеһованы разы салан гәрарлар вермәји баҹараҹағыг c. (Ибраниләрә 5:14 ајәсини охујун.)

14. Булус коринфлиләрә јеткинләшмәјә неҹә көмәк етмишди?

¹⁴ Бәзән елә вәзијјәтләр олур ки, Мүгәддәс Китабда бунунла бағлы конкрет ганун јохдур. Бу заман јеткин олмајан мәсиһи дүзҝүн гәрар вермәјә чәтинлик чәкә биләр. Бәзиләринин фикринҹә, ганун јохдурса, истәдијини етмәк олар. Башгалары исә, ола билсин, гајда тәләб олунмајан мәгамларда гајда ахтарсын. Мәсәлән, Коринфдәки мәсиһиләр, ҝөрүнүр, бүтләрә тәгдим едилмиш гидадан јејиб-јемәмәклә бағлы Булусун конкрет  гајда гојмасыны истәјирдиләр. Булус онлара «белә-белә един» демәди. Әксинә, баша салды ки, бу мәсәләдә һәр кәсин өз виҹданына ҝөрә давранмаг «һүгугу» вар. Һәмчинин онлара мүәјјән принсипләри хатырлатды. Бу принсипләрин сајәсиндә онлар һәм өз виҹданларыны ләкәләмәјән, һәм дә башгаларыны бүдрәтмәјән гәрар верә биләҹәкди. Булус бу јолла коринфлиләрә гәрар верәркән өз ағылларыны ишләтмәји өјрәдирди (1 Кор. 8:4, 7—9). Бунун сајәсиндә онлар башгаларынын фикриндән асылы олмајаҹаг вә гајдалар ахтармајаҹагды, беләҹә, јеткин мәсиһи ола биләҹәкдиләр.

15. Булус ибрани мәсиһиләрә руһани ҹәһәтдән инкишаф етмәјә неҹә көмәк етмишди?

¹⁵ Булусун ибрани мәсиһиләрә јаздыгларындан ваҹиб бир шеј өјрәнирик. Һәмин вахт бәзиләри руһани ҹәһәтдән бөјүмәк үчүн өз үзәриндә ишләмирди. Һәтта онлара «бәрк [руһани] гида јох, јенә сүд» лазым иди (Ибр. 5:12). Бу мәсиһиләр Јеһованын јығынҹаг васитәсилә тәдриҹән ачыгладығы һәгигәтләрлә ајаглашмырдылар (Мәс. 4:18). Мәсәлән, јәһудиләрин чоху һәлә дә Мусанын ганунуна әмәл етмәјин тәрәфдары иди. Һалбуки, Мәсиһин гурбанлығы әсасында Мусанын гануну һарадаса 30 ил иди ки ләғв олунмушду (Ром. 10:4; Тит. 1:10). Әслиндә, бу, аз мүддәт дејилди! Бу вахт әрзиндә онлар дүшүнҹәләрини дәјишә биләрдиләр. Булусун ибраниләрә јаздығы мәктубда бәрк руһани гиданын олдуғу данылмаздыр. Ону охујан мәсиһиләр баша дүшә биләрди ки, Јеһованын Иса Мәсиһ васитәсилә тәсис етдији јени ибадәт формасы даһа үстүндүр вә онлар јәһудиләрдән горхмадан ҹәсарәтлә тәблиғ едә биләрләр (Ибр. 10:19—23).

ӨЗҮНҮЗӘ ҺӘДДӘН АРТЫГ АРХАЈЫН ОЛМАЈЫН

16. Јеткинлијә ҹан атмагла јанашы, даһа нә етмәлијик?

¹⁶ Биз јеткин олмаға ҹан атмагла јанашы, ону горумаға да чалышмалыјыг. Бунун үчүн өзүмүзә һәддән артыг архајын олмамалыјыг (1 Кор. 10:12). Биз руһани ҹәһәтдән инкишаф едиб-етмәдијимизи даима јохламалыјыг (2 Кор. 13:5).

17. Булусун колослулара јаздығы мәктубдан јеткин галмағын ваҹиблији һагда нә өјрәнирик?

¹⁷ Колослулара јаздығы мәктубда Булус  јеткинлији горумағын ваҹиблијини бир даһа вурғуламышды. Дүздүр, онлар артыг јеткин мәсиһи иди. Бунунла белә, Булус онлара хәбәрдарлыг етмишди ки, дүнјанын бахышларынын тәләсинә дүшмәмәк үчүн еһтијатлы олсунлар (Кол. 2:6—10). Ҝөрүнүр, јығынҹагдакы мәсиһиләри јахшы таныјан Епафрас да һәмишә дуа едирди ки, онлар «сонда јеткин инсанлар кими мөһкәм» дура билсинләр (Кол. 4:12). Бурадан нә өјрәнирик? Һәм Булус, һәм дә Епафрас бир шеји баша дүшүрдү: јеткинлијини горумаг үчүн инсанын һәм Јеһованын көмәјинә еһтијаҹы вар, һәм дә о өзү бунун үчүн вар ҝүҹү илә чалышмалыдыр. Бу јолла колослулар һансы чәтинликләрлә үзләширләрсә-үзләшсинләр даима јеткин галаҹагдылар.

18. Јеткин мәсиһи илә нә баш верә биләр? (Һәмчинин шәклә бахын.)

¹⁸ Булус ибраниләрә хәбәрдарлыг етмишди ки, јеткин мәсиһи еһтијатлы олмаса, һәмишәлик Аллаһын рәғбәтини итирә биләр. Мәсиһинин үрәји о гәдәр сәртләшә биләр ки, нәтиҹәдә о, төвбә едиб Аллаһын әфвини газанмаға чалышмаз. Јахшы ки, ибраниләр белә бир вәзијјәтдә дејилдиләр (Ибр. 6:4—9). Бәс бу ҝүн вәзијјәт неҹәдир? Бир вахтлар гејри-фәал вә ја јығынҹагдан кәнар едилмиш, амма сонралар төвбә етмиш кәсләр барәдә нә демәк олар? Бу диндашларымызын сәмими төвбәләри ҝөстәрир ки, онлар Булусун бәһс етдији инсанлардан фәргләнирләр. Сөзсүз ки, онлар Јеһоваја ҝери дөнәндә Онун көмәјинә еһтијаҹ дујурлар (Һизг. 34:15, 16). Ағсаггаллар һәмин инсанын руһани ҹәһәтдән ајаға галхмасы үчүн јеткин бир мәсиһидән она көмәк етмәсини хаһиш едә биләрләр.

19. Һансы мәгсәди гојмалыјыг?

¹⁹ Әҝәр јеткин мәсиһи олмаға доғру ирәлиләсәк, онда бу мәгсәдимизә чатаҹағыг. Мүгәддәс Китабдакы дәрин һәгигәтләри өјрәнмәјә давам един вә Јеһованын дүшүнҹәсини јахшы-јахшы гаврајыб Онун кими дүшүнүн. Әҝәр артыг јеткинлик сәвијјәсинә чатмысынызса, ону итирмәмәк үчүн әлиниздән ҝәләни един.