ЈЫҒЫНҸАГДА елә бир мәсулијјәт вармы ки, һал-һазырда ону иҹра етмәјә вәзијјәтиниз әл вермир? Ола билсин, бу мәсулијјәт башгасына һәвалә олунуб. Јахуд ола билсин, бир вахтлар иҹра етдијиниз тәјинаты инди јашыныз, сәһһәтиниз, мадди чәтинлик вә ја аилә мәсулијјәтләриниз уҹбатындан дајандырмалы олмусунуз. Бәлкә дә, узун илләр иҹра етдијиниз тәјинатын дајанмасына сәбәб тәшкилатдакы дәјишикликләр олуб. Сәбәбләрдән асылы олмајараг, ола билсин, Јеһоваја истәдијиниз гәдәр хидмәт етмәдијинизи дүшүнүрсүнүз. Бәлкә дә, буна ҝөрә һәрдән мәјуслуға гапылырсыныз вә бу, башадүшүләндир. Бәс руһ дүшкүнлүјү, һиддәт, күскүнлүк кими мәнфи һиссләрин үрәјиниздә көк атмамасы үчүн нә едә биләрсиниз? Севинҹинизи неҹә горуја биләрсиниз?

Вәфтизчи Јәһјанын нүмунәси сизә бу саһәдә көмәк едә биләр. Јәһја мүстәсна шәрәфә малик иди, амма јәгин ки, һәјатындакы һадисәләрин бу ҹүр ҹәрәјан едәҹәјини ҝөзләмирди. Онун һеч ағлына да ҝәлмәзди ки, хидмәт етдијиндән чох һәбсдә јатаҹаг. Буна бахмајараг, Јәһја севинҹини итирмәди вә бүтүн һәјаты боју бу әһвал-руһијјәни горуду. Она нә көмәк етди? Бәс чәтин вәзијјәтләрдә биз неҹә севинҹимизи горуја биләрик?

Ерамызын 29-ҹу илиндә Јәһја Аллаһын она тапшырдығы иши ҝөрмәјә башлады. О, «төвбә един, чүнки сәмави Падшаһлыг јахынлашыр» дејәрәк Мәсиһин ҝәлишини мүждәләјирди (Мәт. 3:2; Лука 1:12—17). Чохлары онун чағырышына һај верди. Һәтта инсанлар узаг јоллар гәт едәрәк ону динләмәјә ҝәлир, төвбә едиб вәфтиз олунурду. Һәмчинин Јәһја ҹәсарәтлә өзүндәнразы дин хадимләринә дәјишмәјәҹәкләри тәгдирдә, һөкмә дүчар олаҹагларыны билдирирди (Мәт. 3:5—12). Јәһјанын хидмәтинин кулминасија нөгтәси ерамызын 29-ҹу илинин пајызында Иса Мәсиһи вәфтиз етмәси иди. О вахтдан сонра Јәһја инсанлары вәд едилмиш Мәсиһин ардынҹа ҝетмәјә јөнәлдирди (Јәһ. 1:32—37).

Иса Мәсиһ Јәһјанын мүстәсна ролу олдуғуну вурғулајараг демишди: «Бәшәр өвладлары арасында Вәфтизчи Јәһјадан бөјүјү олмајыб» (Мәт. 11:11). Шүбһәсиз, алдығы немәтләр  Јәһјаја севинҹ бәхш едирди. Онун кими, бу ҝүн дә чохлары бол немәтләр алыр. Мәсәлән, Тери гардашын нүмунәсинә нәзәр салаг. Гардаш һәјат јолдашы Сандра илә бирликдә 50 илдән чох тамвахтлы хидмәтдә олуб. О дејир: «Чохлу мөһтәшәм тәјинатларым олуб. Өнҹүл, бејтелли, хүсуси өнҹүл, рајон нәзарәтчиси, вилајәт нәзарәтчиси вә һал-һазырда јенидән хүсуси өнҹүл хидмәти». Һәгигәтән дә, Јеһованын тәшкилатында тәјинатлар алмаг инсана севинҹ бәхш едир, бунунла белә, Јәһјанын нүмунәсиндән ҝөрәҹәјимиз кими, вәзијјәт дәјишәндә бу севинҹи горујуб-сахламаг зәһмәт тәләб едир.

Вәфтизчи Јәһјанын севинҹини итирмәмәсинин сирри, она тапшырылан мәсулијјәтләрә ҝөрә даима миннәтдар олмасы иди. Ҝәлин бир нүмунәјә бахаг. Иса Мәсиһин вәфтизиндән сонра Јәһјанын давамчылары азалмаға, Мәсиһин давамчылары исә артмаға башламышды. Јәһјанын шаҝирдләри тәшвиш ичиндә онун јанына ҝәлиб демишдиләр: «Бах, о вәфтиз едир вә һамы онун јанына ҝедир» (Јәһ. 3:26). Јәһја ҹавабында демишди: «Ҝәлин кимә мәхсусдурса, бәј дә одур. Амма бәјин досту бәјин јанында дуранда вә онун сәсини ешидәндә үрәкдән севинир. Мән дә беләҹә үрәкдолусу севинирәм» (Јәһ. 3:29). Јәһја Иса илә рәгабәт апармырды, нә дә ки, Исанын ҝөрдүјү ишин даһа ваҹиб олдуғуна ҝөрә өз ишинин дәјәрсиз олдуғуну дүшүнмүрдү. Әксинә, о, «бәјин досту» олмаг шәрәфини гијмәтләндирәрәк севинҹини горујурду.

Јәһјанын хидмәти асан олмаса да, бахыш тәрзи она севинҹини горумаға көмәк едирди. Мәсәлән, о, доғуландан бәри нәзири иди вә буна ҝөрә дә һәјаты боју дилинә шәраб дәјмәмәли иди (Лука 1:15). Иса Мәсиһ Јәһјанын сүрдүјү садә һәјат тәрзи барәдә «Јәһја ҝәлиб нә јејир, нә ичир» демишди. Јәһјадан фәргли олараг, Иса Мәсиһ вә шаҝирдләри диҝәр инсанлар кими ади һәјат тәрзи сүрүрдү вә бу кими мәһдудијјәтләри јох иди (Мәт. 11:18, 19). Үстәлик, Јәһја һеч бир мөҹүзә ҝөстәрмәдији һалда, билирди ки, Исанын шаҝирдләринә, о ҹүмләдән бир вахтлар онун давамчысы оланлара белә бир сәлаһијјәт верилиб (Мәт. 10:1; Јәһ. 10:41). Јәһја диггәтини Иса илә онун шаҝирдләри арасындакы фәргләрә јох, Јеһованын она тапшырдығы иши ҝөрмәјә ҹәмләмишди.

Јеһоваја хидмәтдә һал-һазыркы тәјинатымызы дәјәрләндиририксә, севинҹимизи горуја биләҹәјик. Јухарыда ады чәкилән Тери гардаш дејир: «Мәнә һансы тәјинат һәвалә олунурдуса, диггәтими она ҹәмләјирдим». О, тамвахтлы хидмәтдә кечирдији илләрә бојланараг дејир: «Һеч нәјә ҝөрә пешман дејиләм, әксинә, хош хатирәләрим вар».

Севинҹимизи артырмаг үчүн Јеһоваја хидмәтдә верилән истәнилән тәјинатын нә үчүн дәјәрли олдуғуну анламалыјыг. Һәр бир тәјинаты дәјәрли едән онун өнүмүздә Аллаһын әмәкдашы олмаг имканы ачмасыдыр (1 Кор. 3:9). Дәјәрли бир әшјанын парлаглығыны горумасы үчүн ону силмәк лазымдыр. Буна бәнзәр тәрздә, мәнфи фикирләрин севинҹимизә ләкә салмамасы үчүн Аллаһла әмәкдашлығын неҹә бөјүк шәрәф олдуғу үзәриндә дүшүнмәк ҝәрәкдир. Өз ҝөрдүјүмүз ишләри башгаларынын ҝөрдүјү ишләрлә мүгајисә етмәмәлијик. Јеһованын бизә һәвалә етдији ишин башгаларынын ҝөрдүјү ишдән дәјәрсиз олдуғуну дүшүнмәмәлијик (Гал. 6:4).

Јәгин ки, Јәһја тәјинатынын әбәди олмајаҹағыны билирди, лакин онун гәфил баша чатаҹағыны тәсәввүр белә едә билмәзди (Јәһ. 3:30). Ерамызын 30-ҹу илиндә, Мәсиһин вәфтизиндән алты ај сонра падшаһ Һирод Јәһјаны һәбс едир. Лакин Јәһја јенә дә шәһадәт вермәјә давам едирди (Марк 6:17—20). Һәјатында баш верән дәјишикликләрә рәғмән, она севинҹини горумаға нә көмәк етди? Јәһја диггәтини руһани шејләрә ҹәмләјирди.

Һәбсдә олдуғу мүддәтдә Јәһја Исанын хидмәтини неҹә ҝенишләндирдији барәдә мәлуматлар алырды (Мәт. 11:2; Лука 7:18). Јәһја Исанын вәд олунмуш Мәсиһ олдуғуна әмин иди, бунунла белә, онун Мәсиһлә бағлы бүтүн пејғәмбәрликләри неҹә јеринә јетирәҹәјини билмәк истәјирди. Мәсиһин падшаһ олаҹағыны билдији  үчүн о дүшүнә биләрди: «Ҝөрәсән, Иса тезликлә идарә етмәјә башлајаҹаг? Ҝөрәсән, о, мәни һәбсдән азад едәҹәк?» Јәһја Исанын нәләр едәҹәјини там баша дүшмәк үчүн ики шаҝирдини онун јанына ҝөндәриб сорушур: «Ҝәлишини ҝөзләдијимиз Мәсиһ сәнсән, јохса башгасыны ҝөзләјәк?» (Лука 7:19). Шаҝирдләр ҝәлиб Исанын ҝөрдүјү мөҹүзәләр барәдә данышанда Јәһја јәгин ки, чох диггәтлә гулаг асырды. Иса шаҝирдләр васитәсилә Јәһјаја нөвбәти сөзләри чатдырмышды: «Корларын ҝөзләри ачылыр, топаллар ҝәзир, ҹүзамлылар тәмизләнир, карлар ешидир, өлүләр дирилир, јохсуллара мүждә билдирилир» (Лука 7:20—22).

Шаҝирдләринин ҝәтирдији хәбәр сөзсүз ки, Јәһјаны чох руһландырмышды. Бу, Исанын Мәсиһә аид пејғәмбәрликләри јеринә јетирдијини тәсдиг едирди. Јәһја Мәсиһин ҝәлиши илә һәбсдән азад олунмаса да, хидмәтинин һәдәр олдуғуну дүшүнмүрдү. Чәтинликләринә бахмајараг, онун хошбәхт олмаг үчүн сәбәби вар иди.

Јәһја кими, биз дә диггәтимизи Јеһоваја хидмәтә ҹәмләсәк, һәр шејә севинҹлә вә сәбирлә таб ҝәтирә биләҹәјик (Кол. 1:9—11). Һәр шејә таб ҝәтирмәк үчүн Мүгәддәс Китабы мүталиә едиб, үзәриндә дүшүнмәк ҝәрәкдир. Бу, бизә Јеһоваја етдијимиз хидмәтин һәдәр олмадығыны хатырладаҹаг (1 Кор. 15:58). Сандра дејир: «Һәр ҝүн Мүгәддәс Китабдан бир фәсил охумаг Јеһоваја даһа да јахынлашмағыма көмәк едир. Беләҹә, диггәтими өзүмә јох, Јеһоваја ҹәмләјирәм». Һәмчинин диггәтимизи баҹы-гардашларын Падшаһлыг јолунда ҝөрдүјү ишләр барәдә чыхан хәбәрләрә ҹәмләсәк, өзүмүз һагда јох, Јеһованын нәләри һәјата кечирдији барәдә дүшүнәҹәјик. Сандра баҹы дејир: «JW телевизијасында јајымланан ајлыг програмлар сајәсиндә өзүмүзү тәшкилата даһа јахын һисс едирик. Бу, тәјинатымыздан севинҹ дујмаға көмәк едир».

Вәфтизчи Јәһја гыса сүрән фәалијјәти әрзиндә «Илјасын руһу вә ҝүҹү илә» тәблиғ едирди вә Илјас кими, о да «ади бир инсан иди» (Лука 1:17; Јаг. 5:17). Јәһјадан өрнәк алараг, миннәтдар олсаг вә диггәтимизи Јеһоваја хидмәтә ҹәмләсәк, һәјатымызда нә баш верир-версин, Падшаһлығын ишиндә севинҹимизи итирмәјәҹәјик.