1. Давуд пејғәмбәр Јеһованы неҹә мәдһ етмишди?

ДАВУД ПЕЈҒӘМБӘР Јеһова һагда ҝөзәл демишди: «Сән гуртулуш галханыны мәнә верирсән, лүтфүн мәни уҹалдыр» (2 Ишм. 22:36; Зәб. 18:35). Бәлкә дә, Давуд бу сөзләри јазанда Ишмуил пејғәмбәрин Исраилин ҝәләҹәк падшаһыны мәсһ етмәк үчүн онлара ҝәлдији ҝүнү хатырламышды. Давуд аиләнин сәккиз оғлундан ән кичији олса да, Јеһова Талутун әвәзинә падшаһ олараг ону сечмишди (1 Ишм. 16:1, 10—13).

2. Бу мәгаләдә нә һагда данышаҹағыг?

² Шүбһәсиз ки, Давуд бир мәзмурчунун Јеһованы вәсф едәрәк дедији нөвбәти сөзләрә шәрик иди: «О әјилиб ҝөјә бахыр, јерә бахыр, мәзлуму тоз-торпагдан галдырыр, јохсулу күллүкдән чыхарыр ки, ону әсилзадәләрлә... јанашы отуртсун» (Зәб. 113:6—8). Бу мәгаләдә әввәлҹә Јеһованын хилгәтинә лүтф ҝөстәрмәсиндән нәләр өјрәнә биләҹәјимизи арашдыраҹағыг. Даһа сонра Дәнјал пејғәмбәрин, Иса Мәсиһин тәвазөкарлыг нүмунәсинә нәзәр салаҹағыг вә Талут падшаһдан һансы ибрәти ҝөтүрә биләҹәјимизи өјрәнәҹәјик.

3. Јеһова бизә неҹә јанашыр вә бу нәјин ҝөстәриҹисидир?

³ Јеһованын лүтфкар олдуғуну гејри-камил, ҝүнаһлы инсанлара мүнасибәтиндән ҝөрүрүк. О бизим ибадәтимизи гәбул етмәклә јанашы, бизи досту олараг ҝөрүр (Зәб. 25:14). Бу достлуғу мүмкүн гылмаг үчүн Јеһова Өзү тәшәббүс ҝөстәриб, Иса Мәсиһи ҝүнаһларымыза ҝөрә гурбан вериб. Јеһова бизә гаршы неҹә дә рәһмли вә мәрһәмәтлидир!

4. Јеһова бизә нә бәхш едиб вә нәјә ҝөрә?

 ⁴ Јеһованын лүтфүнү даһа нәдә ҝөрүрүк? Бир Јарадан кими, О истәсәјди, бизә өз һәјат јолумузу сечмәк ихтијары вермәзди. Амма белә етмәди. Бизи Өз бәнзәриндә јаратды вә сечим азадлығы верди. Аллаһын гаршысында кичик олсаг да, Она үрәкдән ибадәт етмәјимиз, буну севҝидән, итаәтин хејримизә олдуғуну дәрк едәрәк етмәјимиз Онун үчүн әһәмијјәтлидир (Ган. 10:12; Әшј. 48:17, 18). Јеһова неҹә дә лүтфкардыр, Она чох миннәтдарыг!

5. Јеһова бизә тәвазөкар олмағы неҹә өјрәдир? (Үз габығындакы шәклә бахын.)

⁵ Јеһова бизимлә рәфтары әсасында бизә тәвазөкарлығы өјрәдир. О, Каинатда ән һикмәтли Варлыгдыр. Бунунла белә, башгаларынын тәклифини нәзәрә алмаға һазырдыр. Мисал үчүн, Аллаһ јаратдығы һәр шејдә Иса Мәсиһин она көмәк етмәсинә изин вермишди (Мәс. 8:27—30; Кол. 1:15, 16). Јеһова һәр шејә гадир олмасына бахмајараг, башгаларына да мүәјјән сәлаһијјәт верир. О, Иса Мәсиһи Падшаһлығынын Падшаһы кими тәјин едиб вә онунла идарә едәҹәк 144 000 инсана мүәјјән сәлаһијјәт вериб (Лука 12:32). Әлбәттә ки, Јеһова Исаја Падшаһ вә Баш каһин олмасы үчүн тәлим вериб (Ибр. 5:8, 9). Еләҹә дә, Иса илә идарә едәҹәк кәсләрә дә тәлим верир, амма Јеһова онлара тәјинат вериб, сонра да һәр хырдалығына кими ишин неҹә ҝөрүлдүјүнү ҝүдмүр. Әксинә, етибар едир ки, онлар һәр шеји Онун истәдији кими едәҹәк (Вәһј 5:10).

6, 7. Јараданымыздан башгаларына иш тапшырмагла бағлы нә өјрәнирик?

⁶ Һеч кимә мөһтаҹ олмајан Јеһова башгаларына сәлаһијјәт верирсә, биз буну  хүсусилә етмәлијик! Әҝәр сиз аилә башчысы вә ја јығынҹагда ағсаггалсынызса, Јеһовадан өрнәк алараг, башгаларына да иш тапшырын, сонра исә чалышын, онларын һәр аддымыны ҝүдмәјәсиниз. Јеһоваја бәнзәмәјә чалышсаныз, нәинки иш ҝөрүләҹәк, һәмчинин сиз башгаларына тәлим верәҹәксиниз вә онларын ишин өһдәсиндән ҝәләҹәкләринә әминликләрини артыраҹагсыныз (Әшј. 41:10). Мүәјјән сәлаһијјәти олан кәсләр Јеһовадан даһа нә өјрәнә биләр?

⁷ Мүгәддәс Китабдан ҝөрмәк олар ки, Јеһова үчүн јаратдығы мәләкләрин фикри мараглыдыр (1 Пад. 22:19—22). Әзиз валидејнләр, сиз Јеһовадан неҹә өрнәк ҝөтүрә биләрсиниз? Мәсләһәт биләндә ушагларыныздан һансыса ишин неҹә ҝөрүлмәси илә бағлы фикирләрини өјрәнин. Сонра мүнасибдирсә, онларын тәклиф етдији кими давранын.

8. Јеһова Ибраһим пејғәмбәр вә Сара илә неҹә сәбирлә давранмышды?

⁸ Јеһованын лүтфкарлығы бөјүк сәбир саһиби олмасындан да ҝөрүнүр. Аллаһын вердији гәрар бәндәсиндә суал доғуранда онунла сәбирлә давраныр. Мәсәлән, Ибраһим пејғәмбәр Аллаһын Сәдум вә Әмурәни мәһв етмәк гәрарына ҝөрә нараһатлығыны билдирәндә Аллаһ ону диггәтлә динләмишди (Јар. 18:22—33). Јахуд ҝөтүрәк Јеһованын Ибраһимин арвады Сара илә рәфтарыны. Аллаһ билдирәндә ки, Сара гоҹа јашында һамилә галаҹаг, Сара буна ҝүлмүшдү. Амма Јеһова она гәзәбләнмәди (Јар. 18:10—14). Әксинә, Сара илә һөрмәтлә давранды.

9. Валидејнләр вә ағсаггаллар Јеһовадан нә өјрәнә биләр?

⁹ Валидејнләр вә ағсаггаллар, Јеһовадан нә өјрәнирсиниз? Кимсә вердијиниз гәрара наразылығыны билдирәндә неҹә давранырсыныз? Илк реаксијаныз она дүзәлиш етмәк олур? Јохса онун фикрини баша дүшмәјә чалышырсыныз? Сәлаһијјәти олан кәсләр Јеһовадан өрнәк ҝөтүрәндә бу һәм аиләдә, һәм дә јығынҹагда һамынын хејринә олур. Демәли, биз Јеһовадан һансы саһәләрдә өрнәк ҝөтүрмәли олдуғумузу мүзакирә етдик. Инди исә Мүгәддәс Китабда адлары чәкилән бәзи шәхсләрдән тәвазөкарлыгла бағлы нә өјрәнә биләҹәјимиздән данышаҹағыг.

10. Бизә тәлим вермәк үчүн Јеһова һансы үсулдан истифадә едир?

¹⁰ Бөјүк Нәсиһәтчимиз Јеһова Өз Кәламында јаздырдығы нүмунәләр васитәсилә бизә тәлим верир (Әшј. 30:20, 21). Биз Мүгәддәс Китабдан, тәвазөкарлыг да дахил олмагла, илаһи хүсусијјәтләр тәзаһүр етдирән инсанлар һагда охујанда чох шеј өјрәнирик. Һәмчинин бу кими хүсусијјәтләри тәзаһүр етдирмәјән инсанларын агибәтиндән дә ибрәт ҝөтүрә биләрик (Зәб. 37:37; 1 Кор. 10:11).

11. Талут бизә нәдә ибрәтдир?

¹¹ Ҝәлин Талут падшаһын агибәтиндән данышаг. Әввәл-әввәл о чох тәвазөкар бир ҝәнҹ иди. Һәмин вахтларда о өз мәһдудијјәтләрини баша дүшүрдү. Һәтта үзәринә сәлаһијјәт ҝөтүрмәјә белә утанырды (1 Ишм. 9:21; 10:20—22). Амма падшаһ оландан гыса вахт сонра дәјишди, гүрурлу инсан олду. Бир дәфә Талутун Ишмуил пејғәмбәри ҝөзләмәјә сәбри чатмады. О, тәвазөкар давраныб, Јеһованын Өз халгынын хејринә һәрәкәтә кечәҹәјинә етибар етмәди. Әксинә, һаггы чатмајан ишә әл атды, гурбанҝаһда јандырма гурбаны тәгдим етди. Нәтиҹәдә, Јеһованын рәғбәтини вә падшаһлығы итирди (1 Ишм. 13:8—14).  Бу һадисәдән ибрәт ҝөтүрмәклә вә гүрурдан узаг дурмагла мүдрик давранмыш оларыг.

12. Дәнјал пејғәмбәр тәвазөкар олдуғуну неҹә ҝөстәрди?

¹² Ҝәлин Талутдан фәргли олараг јахшы өрнәк олан Дәнјал пејғәмбәрдән данышаг. О, өмрү боју тәвазөкар галды вә һәр аддымында Јеһованын мәсләһәтинә үз тутду. Мәсәлән, Јеһова Навуходоносорун јухусунун јозумуну Дәнјала әјан етмишди. Дәнјал јухуну өз ҝүҹү илә јоздуғуну демәди, тәвазөкарлыгла бүтүн шәрәфи Јеһоваја верди (Дән. 2:26—28). Бундан нә өјрәнирик? Сөјләдијимиз нитг диндашларымызын хошуна ҝәләндә вә ја хидмәтдә јахшы наилијјәтләр әлдә едәндә унутмамалыјыг ки, бүтүн шәрәф јалныз вә јалныз Јеһоваја верилмәлидир. Биз тәвазөкарлыгла дәрк едирик ки, бүтүн бу шејләри Јеһованын көмәји олмадан едә билмәздик (Филип. 4:13). Белә едәндә Иса Мәсиһдән дә өрнәк ҝөтүрмүш олуруг. Неҹә?

13. Исанын Јәһја 5:19, 30 ајәләриндәки сөзләриндән онун тәвазөкарлығы һагда нә өјрәнирик?

¹³ Бахмајараг ки, Иса Мәсиһ Аллаһын Оғлу иди вә камил иди, о өзүнә јох, Јеһоваја ҝүвәнирди. (Јәһја 5:19, 30 ајәләрини охујун.) Иса Мәсиһ һеч вахт Атасынын сәлаһијјәтинә ҝөз дикмәјиб. Филиппилиләрә 2:6 ајәсиндә дејилир ки, Иса «һакимијјәти әлә кечирмәји, јәни Аллаһа бәрабәр олмағы фикринә белә, ҝәтирмәди». Итаәткар оғул олан Иса өз мәһдудијјәтләрини дәрк едирди вә Аллаһын сәлаһијјәтинә һөрмәтлә јанашырды.

14. Иса Мәсиһдән сәлаһијјәтини ашан бир шеј хаһиш едәндә о неҹә давранмышды?

¹⁴ Бир дәфә шаҝирдләри Јагубла Јәһја аналары илә бирҝә Исаја јахынлашараг ондан сәлаһијјәтини ашан бир шеј хаһиш етмишди. Иса бир ан белә дүшүнмәдән демишди ки, Падшаһлыгда онун сағында вә солунда кимин отураҹағына јалныз Атасы Јеһова гәрар верир (Мәт. 20:20—23). Бунунла Иса Мәсиһ ҝөстәрди ки, сәлаһијјәтинин мәһдуд олдуғуну баша дүшүр вә буна һөрмәтлә јанашыр. О, тәвазөкар иди, һеч вахт Јеһованын она вердији сәлаһијјәти ашмырды (Јәһ. 12:49). Биз Иса Мәсиһин ҝөзәл нүмунәсини неҹә изләјә биләрик?

15, 16. 1 Коринфлиләрә 4:6 ајәсиндәки мәсләһәтә неҹә әмәл едә биләрик?

 ¹⁵ Биз 1 Коринфлиләрә 4:6 ајәсиндә јазылан мәсләһәтә әмәл етмәклә Иса Мәсиһин тәвазөкарлыг нүмунәсини изләмиш олуруг. Орада дејилир: «Јазыланлардан кәнара чыхма». Кимсә биздән мәсләһәт аланда өз фикримизи јеритмәјә чалышмырыг, јахуд ағлымыза илк ҝәлән фикри демирик. Онун диггәтини бирбаша Мүгәддәс Китабдакы вә нәшрләримиздәки мәсләһәтә јөнәлдирик. Бунунла сәлаһијјәтимизин мәһдуд олдуғуну гәбул едирик. Тәвазөкар давранараг Гүдрәт Саһибинин һагг һөкмләринин али олдуғуну ҝөстәририк (Вәһј 15:3, 4).

¹⁶ Тәвазөкар олмағымызын Јеһоваја шәрәф ҝәтирмәклә јанашы, башга хејри дә вар. Нөвбәти абзасларда тәвазөкарлығын бизә севинҹ ҝәтирдијини вә башгалары илә јола ҝетмәјә көмәк етдијини ҝөрәҹәјик.

17. Нәјә ҝөрә тәвазөкар инсанлар хошбәхтдир?

¹⁷ Биз тәвазөкар оланда даһа хошбәхт олуруг. Нәјә ҝөрә? Нәјәсә ҝүҹүнүн чатмадығынын фәргиндә олан инсан она ҝөстәрилән көмәјә ҝөрә миннәтдар олур, үрәји севинҹлә долур. Ҝәлин Иса Мәсиһин он ҹүзамлыны сағалтдығы һадисәни јадымыза салаг. Һеч бир ҹүзамлы өзүнү бу ағыр хәстәликдән сағалда билмәзди. Бунунла белә, Иса Мәсиһин сағалтдығы он ҹүзамлыдан јалныз бири гајыдыб миннәтдарлығыны билдирди. О, тәвазөкар олдуғу үчүн анлајырды ки, бу көмәјә еһтијаҹы вар вә буна ҝөрә Аллаһы мәдһ етди (Лука 17:11—19).

18. Тәвазөкарлыг башгалары илә даһа јахшы јола ҝетмәјә неҹә көмәк едир? (Ромалылара 12:10).

¹⁸ Тәвазөкар инсан башгалары илә даһа јахшы јола ҝедир вә даһа асанлыгла јахшы достлуг мүнасибәти гура билир. Чүнки о  башгаларынын јахшы хүсусијјәтләрә саһиб олдуғуну мәмнунијјәтлә гәбул едир вә онлара етибар едир. Тәвазөкар инсан киминсә алдығы тапшырығы јахшы јеринә јетирдијини ҝөрүб севинир, јубанмадан ону тәрифләјир вә она һөрмәт едир. (Ромалылара 12:10 ајәсини охујун.)

19. Һансы сәбәбләрә ҝөрә гүрурдан узаг дурмалыјыг?

¹⁹ Гүрурлу инсан үчүн исә башгаларыны тәрифләмәк чәтиндир, истәјир ки, анҹаг ону тәрифләсинләр. Гүрурлу инсан, вәксәрән, өзүнү башгалары илә мүгајисә едир, рәгабәт апарыр. О кимәсә тәлим кечмәји, сәлаһијјәт вермәји севмир, чүнки дүшүнүр ки, һансыса иши тәкҹә о, јахшы ҝөрә биләр, башгасы өһдәсиндән ҝәлә билмәз. Гүрурлу инсан адәтән һамыдан өндә олмаг истәјир вә башгаларына пахыллыг едир (Гал. 5:26). Бу ҹүр инсанлар надир һалларда узунөмүрлү достлуглар гура билир. Өзүмүздә гүрурун олдуғуну һисс етсәк, Јеһоваја јалвармалыјыг ки, дүшүнҹәмизи јениләшдирмәјә көмәк етсин вә бу пис хүсусијјәт биздә көк салмасын (Ром. 12:2).

20. Нәјә ҝөрә тәвазөкар олмалыјыг?

²⁰ Бизим үчүн мүкәммәл өрнәк олан Јеһоваја чох миннәтдарыг! Бәндәләри илә рәфтарындан Јеһованын лүтфүнү ҝөрүрүк вә бу бизи тәвазөкар олмаға тәшвиг едир. Һәмчинин Мүгәддәс Китабда адлары чәкилән тәвазөкар инсанлардан да өрнәк ҝөтүрмәк истәјирик. Ҝәлин шана, шәрәфә лајиг Јеһованы даима уҹалдаг (Вәһј 4:11). Онда тәвазөкар инсанлары севән Аллаһымызын өнүндә јеријә биләҹәјик.