1. Јеһова һәјаты нәјә ҝөрә јарадыб?

БИР ВАХТЛАР Јеһова тәк иди, амма Өзүнү тәнһа һисс етмирди. Онун һеч нәјә еһтијаҹы јох иди. Бунунла белә, Аллаһ башгаларына да һәјат бәхш етмәк истәди. Мәһәббәтдән ирәли ҝәләрәк Јеһова јарадылыша башлады (Зәб. 36:9; 1 Јәһ. 4:19).

2. Јеһованын хәлг етдији хилгәтә баханда Иса Мәсиһ вә мәләкләр һансы һиссләри кечирирди?

² Әввәлҹә, Јеһова Исаны јаратды. Сонра онун васитәсилә һәр шеји, о ҹүмләдән милјонларла шүурлу руһани варлыг јаратды (Кол. 1:16). Аллаһла бирҝә чалышмаг Исаја севинҹ бәхш едирди (Мәс. 8:30). Аллаһын јаратдығы мәләкләр дә севинирдиләр, онларын ҝөзү гаршысында Аллаһ Иса илә бирҝә јери вә ҝөјү јарадырды. Мәләкләр севинҹләрини неҹә ҝөстәрирдиләр? Јер күрәси јарананда онлар һајгырыб алгыш охумушду, шүбһәсиз, Јеһованын јаратдығы һәр бир шејдән сонра да, о ҹүмләдән шаһ әсәри инсаны јараданда да онлар алгыш охуду (Әјј. 38:7; Мәс. 8:31). Јеһованын хәлг етдији хилгәт Онун мәһәббәтинин вә һикмәтинин тәзаһүрү иди (Зәб. 104:24; Ром. 1:20).

3. 1 Коринфлиләрә 15:21, 22 ајәләринә әсасән, Иса Мәсиһин фидјә гурбанлығы сајәсиндә нә мүмкүндүр?

³ Аллаһ јаратдығы ҝөзәл Јер планетиндә бәшәр аиләсинин әбәди јашамасыны нијјәт етмишди. Амма Адәмлә Һәвва Јараданларына гаршы чыханда ҝүнаһ вә өлүм гара  булудтәк јер үзүнү бүрүдү (Ром. 5:12). Бәс Јеһова буна неҹәсә чарә гылды? О, дәрһал бәшәријјәти неҹә хилас едәҹәјини бәјан етди (Јар. 3:15). Јеһова Исаны фидјә вермәклә Адәмлә Һәвванын өвладларыны ҝүнаһ вә өлүмдән гуртармағы нијјәт етди. Беләҹә, Јеһова Она ибадәт етмәји сечән һәр кәсә әбәди һәјат мүкафатыны верә биләҹәкди (Јәһ. 3:16; Ром. 6:23; 1 Коринфлиләрә 15:21, 22 ајәләрини охујун).

4. Бу мәгаләдә һансы суаллары арашдыраҹағыг?

⁴ Өлән инсанларын дирилмәси илә бағлы мүәјјән суаллар јараныр. Дирилмә неҹә баш верәҹәк? Өлән әзизләримиз дириләндә онлары таныја биләҹәјик? Онлара говушанда һансы һиссләри кечирәҹәјик? Дирилмә вәдиндән Јеһованын мәһәббәти, һикмәти вә сәбри һагда нә өјрәнирик? Ҝәлин бу суаллары бир-бир арашдыраг.

5. Нәјә ҝөрә демәк олар ки, инсанлар низамлы, мәрһәләли шәкилдә дириләҹәк?

⁵ Јеһова Иса Мәсиһ васитәсилә өлүләри дирилтмәјә башлајанда, чох јәгин ки, милјонларла инсанын һамысыны ејни вахта дирилтмәјәҹәк. Чүнки јерин әһалисинин бирдән-бирә артмасы хаос јарада биләр. Јеһова исә һеч нәји гармагарышыг етмир. О билир ки, инсанларын арасында сүлһүн олмасы үчүн низам-интизам ваҹиб рол ојнајыр (1 Кор. 14:33). Јеһова Аллаһ һикмәт вә сәбир ҝөстәрәрәк Иса Мәсиһлә бирликдә Јер күрәсини мәрһәләли шәкилдә һазырламышды, сонра инсанлары јаратмышды. Иса Мәсиһ дә миниллик һакимијјәти заманы Армаҝеддондан сағ чыханларла бирҝә јер үзүнү дириләҹәк кәсләр үчүн һазырлајанда ејнилә һикмәтлә вә сәбирлә давранаҹаг.

6. Һәвариләрин ишләри 24:15 ајәсинә әсасән, дириләнләрин арасында кимләр олаҹаг?

 ⁶ Армаҝеддондан сағ чыханларын едәҹәји ән ваҹиб иш дирилән инсанлара Аллаһын Падшаһлығы вә Јеһованын тәләбләри һаггында өјрәтмәк олаҹаг. Чүнки дирилән инсанларын әксәријјәти гејри-салеһләр олаҹаг. (Һәвариләрин ишләри 24:15 ајәсини охујун.) Онлар Мәсиһин фидјә гурбанлығындан там јарарланмаг үчүн өзләриндә чохлу дәјишикликләр етмәли олаҹаг. Тәсәввүр едирсиниз, Јеһованы һеч танымајан милјонларла инсана һәгигәти өјрәтмәк нә гәдәр бөјүк ишдир! Ҝөрәсән, бу ҝүн олдуғу кими, онлара Мүгәддәс Китаб дәрси фәрди олараг кечиләҹәк? Ҝөрәсән, јениләр јығынҹаглара тәјин олунаҹаг вә онлардан сонра дириләнләри өјрәтмәк үчүн тәлим алаҹаг? Јашајарыг, ҝөрәрик. Амма бир шеји билирик ки, Мәсиһин миниллик һакимијјәтинин сонунда «дүнја башдан-баша Јеһова барәдә биликлә долаҹаг» (Әшј. 11:9). Ҝөрүн бизим мин ил әрзиндә ҝөрәҹәјимиз нә гәдәр мараглы, нә гәдәр чох ишимиз олаҹаг!

7. Јеһованын халгы дириләнләрә тәлим верәркән нәјә ҝөрә анлајышлы ола биләҹәк?

⁷ Мәсиһин миниллик һакимијјәти заманы Јеһованын јер үзүндәки бүтүн бәндәләри Ону разы салмаг үчүн өзләриндә дәјишиклик етмәли олаҹаг. Буна ҝөрә дә онлар дириләнләрә ҝүнаһлы мејилләри илә мүбаризә апармаға вә Јеһованын ганунлары илә јашамаға көмәк едәркән анлајышлы ола биләҹәк (1 Бут. 3:8). Әлбәттә ки, дирилән инсанлар Јеһованын халгынын неҹә тәвазөкар олдуғуну, хиласа јетишмәк үчүн онларын да чалышдығыны ҝөрәндә Јеһоваја ибадәтдә онлара гошулмаг истәјәҹәк (Филип. 2:12).

8. Нәјә әсасән дејә биләрик ки, дирилән әзизләрини гаршылајанлар онлары таныја биләҹәк?

⁸ Бир чох сәбәбә ҝөрә дејә биләрик ки, дирилән әзизләрини гаршылајанлар онлары таныја биләҹәк. Мәсәлән, кечмишдә баш верән дирилмә һадисәләри ҝөстәрир ки, инсанын өлүмдән гыса мүддәт өнҹә ҝөрүнүшү, данышығы, дүшүнҹәси неҹә идисә, Јеһова она јенидән һәјат верәндә елә дә олаҹаг. Јадыныздадырса, Иса өлүмү јухуја, инсанын дирилмәсини исә јухудан ојанмаға бәнзәтмишди (Мәт. 9:18, 24; Јәһ. 11:11—13). Инсан јухудан ојананда онун ҝөрүнүшү вә сәси јатмаздан әввәл неҹә идисә елә галыр, јаддашы да үстүндә олур. Мисал үчүн, ҝөтүрәк Илазәрин һадисәсини. О, дөрд ҝүн иди ки, өлмүшдү, һәтта бәдәни чүрүмәјә башламышды. Амма Иса ону дирилдәндә Илазәрин баҹылары ону о дәгигә таныды, тәбии ки, Илазәр дә онлары (Јәһ. 11:38—44; 12:1, 2).

9. Нәјә ҝөрә дејә биләрик ки, дириләнләр камил әглдә вә бәдәндә дирилмәјәҹәк?

⁹ Јеһова вәд едиб ки, Ҹәннәтдә һеч кәс «хәстәјәм» демәјәҹәк (Әшј. 33:24; Ром. 6:7). Одур ки, Јеһова өлән инсанлары һәјата гајтаранда онлары сағлам бәдәндә дирилдәҹәк. Амма онлар дәрһал камил олмајаҹаг. Әкс һалда, јахынлары онлары танымаз. Ҝөрүнүр, Мәсиһин миниллик һакимијјәти заманы бүтүн инсанлар тәдриҹән камилләшәҹәк. Иса Падшаһлығы Јеһованын табелијинә јалныз мин илин сонунда верәҹәк. Онда Падшаһлыг, бүтүн бәшәријјәти камиллијә јетишдирмәк дә дахил олмагла, өз вәзифәсини там шәкилдә иҹра едәҹәк (1 Кор. 15:24—28; Вәһј 20:1—3).

10. Өлән инсанларын дирилмәси биздә һансы һисси ојадаҹаг?

¹⁰ Доғмаларыныза јенидән говушаҹағыныз аны тәсәввүр едирсиниз? Бәлкә дә, билмәјәҹәксиниз севинҹдән ағлајасыныз, јохса ҝүләсиниз. Бәлкә дә, Јеһоваја охудуғунуз шаграг нәғмәләрин сәси әтрафы бүрүјәҹәк. Шәксиз-шүбһәсиз, дирилмәни мүмкүн гылан гајғыкеш Аллаһымыза вә Иса Мәсиһә мәһәббәтиниз ашыб-дашаҹаг.

11. Јәһја 5:28, 29 ајәләринә әсасән, Аллаһын салеһ гајда-ганунлары илә јашајанларын мүкафаты нә олаҹаг?

¹¹ Дирилән инсанлар көһнә шәхсијјәти әјинләриндән чыхарыб, Јеһованын салеһ гајда-ганунларына ујғун јашајанда ҝөрүн неҹә севинәҹәкләр. Өзләриндә дәјишикликләр едәнләр һәјата говушмаг үчүн дирилмиш олаҹаг. Дәјишмәк истәмәјәнләрә исә Ҹәннәтдә јашамаға давам едиб орадакы әмин-аманлығы позмаға иҹазә верилмәјәҹәк (Әшј. 65:20; Јәһја 5:28, 29 ајәләрини охујун).

12. Јеһова јер үзүнүн бүтүн сакинләринә һансы сәрвәти верәҹәк?

¹² Аллаһын Падшаһлығынын идарәчилији алтында һәр кәс Мәсәлләр 10:22 ајәсиндәки сөзләрин ҝерчәк олдуғуну ҝөрәҹәк: «Јеһованын вердији бәрәкәтдир инсана сәрвәт ҝәтирән. О, бу бәрәкәтә кәдәр гатмаз». Јеһованын халгы мүгәддәс руһун көмәји илә руһани ҹәһәтдән сәрвәтли олаҹаг, јәни ҝет-ҝедә Мәсиһә даһа да бәнзәјәҹәк вә камиллијә доғру ирәлиләјәҹәк (Јәһ. 13:15—17; Ефес. 4:23, 24). Һәр өтән ҝүн онлар даһа сағлам, даһа јахшы инсан олаҹаг. Ҝөрүн бу неҹә хошбәхт һәјат олаҹаг! (Әјј. 33:25). Бәс дирилмә һаггында дүшүнмәк бизә бу ҝүн неҹә көмәк едә биләр?

13. Зәбур 139:1—4 ајәләринә әсасән, Јеһова бизи нә гәдәр јахшы таныјыр вә дирилмә буна неҹә сүбутдур?

¹³ Гејд олундуғу кими, Јеһова өлүләри дирилдәркән онларын јаддашыны вә хасијјәтини ҝери гајтараҹаг. Тәсәввүр едирсиниз, бу нә демәкдир?! Јеһова сизи о гәдәр севир ки, бүтүн фикирләринизә, һиссләринизә, дедикләринизә, етдикләринизә диггәт јетириб јадында сахлајыр. Һәтта өлсәниз белә, хатирәләринизи, фикирләринизи, хасијјәтинизи олдуғу кими, асанлыгла бәрпа етмәк игтидарындадыр. Јеһованын һәр бир бәндәсини јахындан танымасы Давуд падшаһа да мәлум иди. (Зәбур 139:1—4 ајәләрини охујун.) Јеһованын бәндәләринә мүнасибәти сиздә һансы һиссләри доғурур?

14. Јеһованын бизи јахшы таныдығыны билмәк биздә һансы һиссләр һасил етмәлидир?

¹⁴ Јеһованын бизи бу гәдәр јахшы танымасы һагда дүшүнәндә горхуја гапылмамалыјыг. Унутмајаг ки, Јеһова бизи чох севир. Һәр биримиз Онун үчүн хүсусијик. Јеһова һәјатымыз боју бизи биз едән һәр шејдән аҝаһдыр. Неҹә дә тәсәлливериҹи фикирдир! Одур ки, өзүмүзү һеч заман јалгыз һисс етмәмәлијик. Јеһова һәр ҝүн, һәр ан јанымыздадыр, даима бизә дајаг олмаг үчүн фүрсәт ахтарыр (2 Салн. 16:9).

15. Нәјә ҝөрә дирилмә үмиди Јеһованын һикмәтинин сүбутудур?

¹⁵ Өлүм һәдәси чох ҝүҹлү силаһдыр. Шејтанын әлалтылары бунун васитәсилә инсанлары достларыны сатмаға вә етигадларындан дөнмәјә мәҹбур едир. Амма бу үсул  бизә кечмир. Билирик ки, һәтта дүшмәнләримиз һәјатымыза сон гојса да, Јеһова бизә јенидән һәјат вермәјә гадирдир (Вәһј 2:10). Әминик ки, онлар нә едирләрсә етсинләр, бизи Јеһовадан ајыра билмәзләр (Ром. 8:35—39). Доғрудан да, Јеһова бизә дирилмә үмиди вермәклә бөјүк һикмәт тәзаһүр етдириб! Бу үмид васитәсилә О, Шејтанын ән ҝүҹлү силаһыны зәрәрсизләшдириб, бизи исә јенилмәз ҹәсарәт силаһы илә силаһландырыб.

16. Һансы суаллар Јеһоваја етибарынызы јохламаға көмәк едәҹәк?

¹⁶ Јеһованын дүшмәнләри сизи өлүмлә һәдәләсәләр, һәјатынызы Јеһованын әлләринә етибар едәҹәксиниз? Буну неҹә билмәк олар? Нөвбәти суалларла өзүнүзү јохлајын: «Һәр ҝүн вердијим кичик гәрарлардан мәним Јеһоваја етибар етдијим ҝөрүнүр?» (Лука 16:10). «Сүрдүјүм һәјат тәрзи Падшаһлығы һәр шејдән үстүн тутдуғум тәгдирдә, Јеһованын гајғыма галаҹағына инандығымы ҝөстәрир?» (Мәт. 6:31—33). Әҝәр бу суаллара ҹавабыныз мүсбәтдирсә, демәли, Јеһоваја етибар едирсиниз вә ҝәләҹәкдә үзләшәҹәјиниз истәнилән сынаға һазырсыныз (Мәс. 3:5, 6).

17. а) Дирилмә Јеһованын сәбирли олдуғуну неҹә ҝөстәрир? б) Јеһованын сәбрини гијмәтләндирдијимизи неҹә ҝөстәрә биләрик?

¹⁷ Јеһова бу дүнјаја сон гојаҹағы ҝүнү вә сааты артыг тәјин едиб (Мәт. 24:36). О, сәбирсиз олуб вахтындан тез һәрәкәтә кечмәјәҹәк. Јеһова өлүләри дирилтмәјин һәсрәтини чәкир, амма сәбир ҝөстәрир (Әјј. 14:14, 15). О, вахты чатанда онлары һәјата гајтараҹаг (Јәһ. 5:28). Аллаһын сәбринә ҝөрә Она шүкүр етмәлијик. Онун сәбри сајәсиндә, биз дә дахил олмагла, чохлу адамын төвбәјә ҝәлмәк имканы олуб (2 Бут. 3:9). Јеһова истәјир ки, мүмкүн гәдәр чох инсан әбәди һәјаты газана билсин. Буна ҝөрә дә ҝәлин Онун сәбрини гијмәтләндирдијимизи ҝөстәрәк. Буну неҹә едә биләрик? «Әбәди һәјата апаран јолда јеримәјә мејли оланлары» ахтармаг үчүн вар ҝүҹүмүзлә чалышмалыјыг, һәмчинин онлара Јеһованы севмәјә вә Она ибадәт етмәјә көмәк етмәлијик (Һәв. 13:48). Онда бизим кими, онлар да Јеһованын сәбринин хејрини ҝөрәҹәк.

18. Нәјә ҝөрә башгаларына гаршы сәбирли олмалыјыг?

 ¹⁸ Јеһова миниллијин сона чатмасыны сәбирлә ҝөзләјәҹәк ки, биз камил олаг. Һәмин вахта гәдәр исә, О, ҝүнаһларымызы бағышламаға һазырдыр. Бәс онда биз нијә башгаларында јахшы хүсусијјәтләри ҝөрүб, онларла сәбирлә давранмајаг? Ҝәлин бир баҹынын һадисәсинә нәзәр салаг. Онун јолдашы шиддәтли нараһатлыг һиссиндән әзијјәт чәкирди вә јығынҹаглара ҝетмәји дајандырды. Баҹы дејир: «Буну ҝөрмәк мәнә чох ағыр иди. Бир аилә кими ҝәләҹәклә бағлы гурдуғумуз планлар алт-үст олмушду». Буна бахмајараг, о, әринә гаршы сәбирлә давранды. Баҹы Јеһоваја бел бағлады вә руһдан дүшмәди. Јеһовадан өрнәк ҝөтүрәрәк әриндә јахшы хүсусијјәтләри ҝөрмәјә чалышды. Баҹы дејир: «Јолдашымын ҝөзәл хасијјәти вар, о, баҹардығы гәдәр өз үзәриндә ишләмәјә чалышыр, јаваш-јаваш бу онда алыныр». Бәли, чох ваҹибдир ки, аиләмиздә вә јығынҹагда ҹидди чәтинликләрини ашмаға чалышанлара гаршы сәбир ҝөстәрәк!

19. Нә етмәјә гәтијјәтли олмалыјыг?

¹⁹ Иса Мәсиһ вә мәләкләр јерин јаранмасыны ҝөрәндә чох севиндиләр. Амма, тәсәввүр едирсиниз, онлар јер үзүнүн камил, Јеһованы севән вә Она ибадәт едән инсанларла долдуғуну ҝөрәндә неҹә севинәҹәкләр? Бундан әлавә, Иса Мәсиһлә ҝөјдә идарә етмәк үчүн јер үзүндән сечилмиш кәсләр ҝөрдүкләри ишин бәшәријјәтә нә гәдәр фајда ҝәтирдијини ҝөрәндә севинҹләринин һәдди-һүдуду олмајаҹаг (Вәһј 4:4, 9—11; 5:9, 10). Кәдәр ҝөз јашларыны севинҹ ҝөз јашларынын әвәз етдији, хәстәлијин, ағры-аҹынын, өлүмүн әбәдилик јох олаҹағы бир дүнјада јашмаг ҝөрүн неҹә мөһтәшәм олаҹаг (Вәһј 21:4). Һәмин вахт јетишәнә гәдәр исә ҝәлин гәтијјәтли олаг, мәһәббәтли, һикмәтли вә сәбирли Аллаһымыздан өрнәк алаг. Онда һәјатымызда һансы чәтинлик олурса олсун, севинҹимизи горујаҹағыг (Јаг. 1:2—4). Бәли, Јеһованын вердији дирилмә вәдинә ҝөрә шүкранлар уҹалдырыг! (Һәв. 24:15).