1. 1 Салоникилиләрә 5:11 ајәсинә әсасән, биз һансы ишдә иштирак едирик?

 НӘ ВАХТСА јығынҹағыныз ибадәт евинин тикинтисиндә вә ја тәмир-бәрпа ишләриндә иштирак едиб? Јәгин, ишләр битәндән сонра кечирдијиниз илк јығынҹаг һәлә дә јадыныздадыр. Үрәјиниз Јеһоваја шүкранла долуб-дашырды. Бәлкә дә, елә көврәлмишдиниз ки, илк нәғмәни ҝүҹлә охумушдунуз. Ибадәт евләримиз Јеһованын адыны шәрәфләндирир. Амма биз һәм дә башга нөв тикинти ишиндә иштирак едирик вә бунунла Јеһованы даһа чох шәрәфләндиририк. Сөһбәт бинадан да дәјәрли олан бир шејдән ҝедир. Биз ибадәт евинә ҝәлән инсанларын иманыны мөһкәмләндиририк. Һәвари Булус мәгаләнин әсас ајәси олан 1 Салоникилиләрә 5:11 ајәсиндә мәсиһиләри белә бир «тикинти ишиндә» иштирак етмәјә тәшвиг едирди. Чүнки ајәдә истифадә олунан «мөһкәмләндирмәк» сөзү јунан дилиндә һәмчинин «тикмәк» мәнасыны верир. (Ајәни охујун.)

2. Бу мәгаләдә нә һагда данышаҹағыг?

² Һәвари Булус диндашларынын иманыны мөһкәмләндирмәјин јолуну јахшы билирди. Булусун онлара ҹаны јанырды. Бу мәгаләдән өјрәнәҹәјик ки, о, диндашларына 1) сынаглара дөзмәјә, 2) бир-бирләри илә сүлһдә олмаға вә 3) Јеһоваја иманларыны мөһкәмләндирмәјә неҹә көмәк етмишди. Ҝәлин ҝөрәк ондан өрнәк ҝөтүрәрәк диндашларымызы неҹә мөһкәмләндирә биләрик (1 Кор. 11:1).

3. Һәвари Булусун хидмәтә вә ишә таразлы јанашдығы нәдән ҝөрүнүрдү?

³ Булус иман баҹы-гардашларыны чох истәјирди. Онлар сынагларла үзләшәндә һалларына аҹыјырды, онлара шәфгәтлә јанашырды. Ахы о өзү дә чәтинлијин нә олдуғуну јахшы билирди.  Бир дәфә Булусун пулу гуртармышды. О өзүнү вә әмәкдашларыны доландырмаг үчүн иш тапмалы иди (Һәв. 20:34). Булусун пешәси чадыр тикмәк иди. О, Коринфә ҝәләндә әввәл-әввәл Прискилла вә Аквиласла бирҝә бу ишлә мәшғул олду. Бунунла јанашы, о, «һәр шәнбә» јәһудиләрә вә јунанлара тәблиғ едирди. Сила вә Тимути Коринфә ҝәләндән сонра исә «Булус бүтүн вахтыны Аллаһын сөзүнү јајмаға һәср етди» (Һәв. 18:2—5). О, һәјатында әсас мәгсәдинин Јеһоваја хидмәт етмәк олдуғуну һеч вахт унутмурду. Булус һәм өзүнү доландырырды, һәм дә хидмәтә ҹан гојурду, буна ҝөрә дә баҹы-гардашлара бу саһәдә ҝөзәл мәсләһәтләр верә билирди. Булус онлара хатырладырды ки, һәјатын гајғылары, аиләни доландырмаг мәсулијјәти «даһа ваҹиб» шејләрә — Јеһоваја ибадәтимизлә бағлы ишләрә мане олмамалыдыр (Филип. 1:10).

4. Булусла Тимути диндашларына тәгибләрә синә ҝәрмәјә неҹә көмәк етмишдиләр?

⁴ Салоникидә јығынҹаг јаранандан гыса мүддәт сонра имана јени ҝәлмиш мәсиһиләр ҝүҹлү тәгибләрлә үзләшдиләр. Гәзәбли күтлә Булусла Силаны тапа билмәјәндә «бир нечә гардашы шәһәр рәһбәрләринин јанына сүрүјүб ҝәтирдиләр» вә чығыр-бағыр салыб дедиләр: «Бу адамларын һамысы Сезарын фәрманларына гаршы чыхырлар» (Һәв. 17:6, 7). Јәгин, имана јени ҝәләнләр шәһәрдәки инсанларын онлара гаршы галхдығыны ҝөрәндә тәшвишә дүшмүшдүләр. Онлар хидмәтдә шөвгләрини итирә биләрдиләр, амма Булус бунун олмасыны истәмирди. Булусла Сила шәһәри тәрк етмәли олса да, бу јени јығынҹағы көмәксиз гојмадылар. Булус салоникилиләрә белә јазмышды: «Иманынызла бағлы сизи мөһкәмләндирмәк вә сизә тәсәлли вермәк үчүн гардашымыз Тимутини јаныныза ҝөндәрдик ки, бу әзијјәтләр һеч кәсин иманыны сарсытмасын» (1 Салон. 3:2, 3). Тимути өзү дә, чох еһтимал ки, доғма јурду Листрада тәгиблә үзләшмишди. О, Булусун орадакы баҹы-гардашлары неҹә мөһкәмләндирдијинин шаһиди олмушду. Тимути Јеһованын Өз хидмәтчиләринә дајаг олдуғуну ҝөрдүјү үчүн имана јени ҝәлән баҹы-гардашлары һәр шејин јахшы олаҹағына әмин едә билмишди (Һәв. 14:8, 19—22; Ибр. 12:2).

5. Брајант адлы гардаша бир ағсаггал неҹә көмәк етмишди?

⁵ Һәвари Булус диндашларыны башга һансы јолла мөһкәмләндирмишди? Булус Барнәба илә бирҝә Листраны, Конјаны вә Антакјаны тәкрар зијарәт едәндә «һәр јығынҹагда ағсаггаллар тәјин етдиләр» (Һәв. 14:21—23). Шүбһәсиз, бу ағсаггаллар јығынҹаглар үчүн әсл тәсәлли мәнбәји иди. Бу ҝүн јығынҹағымыздакы ағсаггаллар да беләдир. Ҝөрүн Брајант адлы бир гардаш нә дејир: «15 јашым оланда атам бизи атыб ҝетди, анам исә јығынҹагдан кәнар едилди. Өзүмү атылмыш һисс едирдим вә чох руһдан дүшмүшдүм». Брајант бу чәтинлијә неҹә дөздү? О дејир: «Тони адлы бир ағсаггал истәр јығынҹагда, истәр башга вахтларда һәмишә мәнимлә сөһбәт едирди. Чәтинликләринә рәғмән хошбәхт олан инсанлардан мисал ҝәтирмишди. Мәнә Зәбур 27:10 ајәсини охумушду вә тез-тез Һизгијјәнин нүмунәсини чәкирди. Һизгијјәнин атасы онун үчүн јахшы нүмунә олмаса да, о, Јеһоваја садиг галмышды». Бу ҹүр дәстәк ҝөрмәсинин Брајанта һансы фајдасы олду? О дејир: «Тонинин диггәти, гајғысы сајәсиндә мән тамвахтлы хидмәтә башладым вә бундан мәмнунлуг дујурам». Әзиз ағсаггаллар, диггәтли олун ки, Брајант кими «хош сөз» ешидиб руһланмаға еһтијаҹы оланлар нәзәриниздән јајынмасын (Мәс. 12:25).

6. Булус диндашларыны мөмин инсанларын нүмунәләри васитәсилә неҹә руһландырмышды?

 ⁶ Булус диндашларына «бөјүк шаһидләр булудунун» Јеһованын вердији ҝүҹ сајәсиндә чәтинликләри ашдығыны хатырлатмышды (Ибр. 12:1). О билирди ки, мүхтәлиф чәтинликләрдән башыуҹа чыхан мөмин инсанларын нүмунәси диндашларыны ҹәсарәтләндирә биләр, онлара диггәтләрини «вар олан Аллаһын шәһәри»нә ҹәмләмәјә көмәк едә биләр (Ибр. 12:22). Ејни шеји бизим һагда да демәк олар. Мәҝәр Јеһованын Ҹәдуна, Бәрәгә, Давуда, Ишмуилә вә диҝәрләринә дајаг олмасы һагда охумаг бизи мөһкәмләндирмәјиб? (Ибр. 11:32—35). Биз һәмчинин бизим дөврдә иман өрнәји олан диндашларымыздан да чох шеј өјрәнирик. Буну баш идарәјә ҝәлән чохсајлы мәктублардан ҝөрмәк олар. Баҹы-гардашлар јазырлар ки, садиг мәсиһиләрин һәјат һекајәләри онларын иманыны чох мөһкәмләндириб.

7. Булусун Ромалылара 14:19—21 ајәләриндәки мәсләһәтиндән нә өјрәнирик?

⁷ Баҹы-гардашлары мөһкәмләндирмәјин диҝәр јолу вар ҝүҹүмүзлә јығынҹагда сүлһүн олмасына чалышмагдыр. Биз фикир ајрылыгларына ҝөрә арамызда парчаланманын јаранмасына јол вермирик. Һәтта әҝәр нәјәсә һаггымыз чатырса вә бунунла һеч бир принсипи позмуругса, өз фикримиздә тәкид етмәјәҹәјик. Бир нүмунәјә бахаг. Ромадакы јығынҹагда һәм јәһуди, һәм дә гејри-јәһуди мәсиһиләр вар иди. Мусанын гануну ләғв олунандан сонра мүәјјән гидалара гојулан гадаға гүввәдән дүшдү (Марк 7:19). Буна ҝөрә дә артыг бәзи јәһуди мәсиһиләр һәр шеји јемәји гәбаһәт сајмырдылар. Амма диҝәр јәһуди мәсиһиләр буну дүзҝүн һесаб етмирдиләр. Бу мәсәләјә ҝөрә јығынҹагда икитирәлик јаранды. Булус јығынҹагда сүлһү горумағын ваҹиблијини вурғулады вә белә деди: «Јахшысы одур, нә әт је, нә шәраб ич, нә дә гардашынын иманыны сарсыдан башга бир иш ҝөр». (Ромалылара 14:19—21 ајәләрини охујун.) Бунунла о, диндашларына баша салмаг истәјирди ки, бу ҹүр мүзакирәләр һәм ајры-ајрылыгда мәсиһиләрин өзүнә, һәм дә бүтүн јығынҹаға пис тәсир едә биләр. Һәм дә Булус башгаларыны бүдрәтмәмәк үчүн өзүндә дә лазыми дәјишикликләри етмәјә һазыр иди (1 Кор. 9:19—22). Биз дә шәхси сечим мәсәләләриндә мүбаһисә етмәмәклә арамыздакы сүлһү горујаҹағыг вә диндашларымызын иманыны сарсытмајаҹағыг.

8. Јығынҹагда сүлһү горумаг үчүн Булус неҹә давранмышды?

⁸ Һәтта ваҹиб мәсәләләрә ҝөрә фикир ајрылығы јарананда Булус сүлһү горумаға чалышырды. Мәсәлән, биринҹи әсрдә јығынҹагда бәзиләри исрар едирди ки, мәсиһилији гәбул едән гејри-јәһудиләр сүннәт олунсун. Ола билсин, онлар ҹамаатын гынағындан горхдуглары үчүн буну истәјирдиләр (Гал. 6:12). Булус бу фикирлә гәтијјән разы дејилди, амма о өз фикрини јеритмәди. Тәвазөкарлыг ҝөстәриб, мәсәләнин һәлли үчүн Јерусәлимдәки һәвариләрин вә ағсаггалларын мәсләһәтинә үз тутду (Һәв. 15:1, 2). Онун бу аддымы сајәсиндә һәмин мәсиһиләр севинҹләрини вә араларындакы бирлији горуја билдиләр (Һәв. 15:30, 31).

9. Булусун нүмунәсини неҹә изләјә биләрик?

⁹ Әҝәр һансыса мәсәләјә ҝөрә арамызда ҹидди мүбаһисә јаранарса, биз сүлһә неҹә ҹан ата биләрик? Јығынҹағын гејдинә галмаг үчүн Јеһованын тәјин етдији гардашлардан мәсләһәт ала биләрик. Һәмчинин Мүгәддәс Китаба әсасланан ҝөстәришләри  нәшрләримиздән вә ја тәшкилатымызын вердији диҝәр рәбһәрликләрдән тапмаг олар. Әҝәр биз өз фикримиздә тәкид етмәсәк, әксинә, диггәтимизи бу ҝөстәришләрә әмәл етмәјә јөнәлтсәк, јығынҹагда сүлһүн олмасына төһфә верәҹәјик.

10. Һәвари Булус башга һансы јолла јығынҹагда сүлһ јаратмаға чалышырды?

¹⁰ Булус баҹы-гардашларын мәнфи јох, мүсбәт ҹәһәтләрини вурғуламагла јығынҹагда сүлһ јарадырды. Мәсәлән, Булус ромалылара јаздығы мәктубун сонунда чохлу мәсиһиләрин адларыны чәкмишди, әксәријјәти һагда хош сөзләр демиш, јахуд да сырф онлара аид нәләрисә вурғуламышды. Биз дә Булусдан нүмунә ҝөтүрәрәк баҹы-гардашларымызын ҝөзәл хүсусијјәтләри һаггында ағыздолусу данышмагла онлар арасындакы достлуғу даһа да мөһкәмләндирмиш олаҹағыг. Бу да өз нөвбәсиндә јығынҹагда мәһәббәт бағларыны ҝүҹләндирәҹәк.

11. Диндашымызла арамызда ҝәрҝинлик јарананда сүлһү неҹә бәрпа едә биләрик?

¹¹ Һәтта бәзән јеткин мәсиһиләр арасында да мүбаһисә јарана биләр. Белә бир шеј Булусла онун јахын досту олан Барнәба арасында баш вермишди. Барнәба нөвбәти тәблиғ сәјаһәтинә Маркы да өзү илә ҝөтүрмәк истәјирди, Булус исә гәтијјән буна гаршы иди. Бу мәсәлә «онларын арасында гызғын чәкишмәјә сәбәб олду» вә онларын јоллары ајрылды (Һәв. 15:37—39). Амма Булус, Барнәба вә Марк араларындакы мүнасибәти јолуна гојдулар вә бунунла да ҝөстәрдиләр ки, јығынҹагда сүлһүн вә бирлијин олмасы онлар үчүн чох ваҹибдир. Сонралар Булус мәктубларында Маркла Барнәбаны тәрифләмишди (1 Кор. 9:6; Кол. 4:10). Биз дә јығынҹагдакы баҹы-гардашларла арамыздакы ҝәрҝинлији арадан галдырмалыјыг вә онларын јахшы ҹәһәтләринә диггәтимизи јөнәлтмәлијик. Онда јығынҹагда бирлији вә сүлһү горумуш олаҹағыг (Ефес. 4:3).

12. Бу ҝүн баҹы-гардашлар һансы чәтинликләрлә үзләшир?

¹² Баҹы-гардашлары мөһкәмләндирмәјин бир јолу да онларын Јеһоваја иманыны ҝүҹләндирмәкдир. Бәзиләри аилә үзвләринин, иш вә ја синиф јолдашларынын ришхәндинә мәруз галыр. Кимисинин сәһһәтиндә ҹидди проблем вар, кимисинин гәлбинә дәјибләр. Бәзиләри исә чохдандыр вәфтиз олунуб вә узун илләрдир бу шәр дүнјанын сонуну ҝөзләјир. Бүтүн бу вәзијјәтләр мәсиһинин иманыны сынаја биләр. Биринҹи әсрдәки мәсиһиләрин дә буна бәнзәр сынаглары олурду. Бәс Булус бу баҹы-гардашлары неҹә мөһкәмләндирмишди?

13. Булус етигадларына ҝөрә ришхәнд олунан диндашларына неҹә көмәк етмишди?

¹³ Булус диндашларынын иманыны Мүгәддәс Јазылар васитәсилә мөһкәмләндирирди. Мәсәлән, ола билсин ки, јәһуди мәсиһиләрин иманларына шәрик олмајан аилә үзвләри иудаизмин мәсиһиликдән үстүн олдуғуну дејәндә онлар неҹә ҹаваб верәҹәкләрини билмирдиләр. Шүбһәсиз, Булусун ибраниләрә јаздығы мәктуб һәмин мәсиһиләрин иманыны мөһкәмләндирмишди (Ибр. 1:5, 6; 2:2, 3; 9:24, 25). Булусун орада ҝәтирдији ҝүҹлү дәлилләр васитәсилә онлар иманларына гаршы чыханлара ҹаваб верә биләрдиләр. Бу ҝүн дә бәзи диндашларымыз ришхәнд олунур. Биз онлара әгидәләрини изаһ етмәк үчүн Мүгәддәс Китаба әсасланан нәшрләрдән лазыми фикирләр тапмаға көмәк едә биләрик. Әҝәр ҝәнҹ диндашларымызы бајрам вә ад ҝүнү гејд етмәдији үчүн әлә салырларса, онлара «Әбәди хошбәхт һәјат!» китабынын 44-ҹү фәсли васитәсилә мөвгеләрини изаһ етмәјә көмәк етмәк олар.

14. Булус тәблиғ вә тәлим иши илә чох мәшғул олса да, нәји унутмурду?

 ¹⁴ Булус диндашларыны «јахшы ишләр» васитәсилә бир-бирләринә мәһәббәт ҝөстәрмәјә тәшвиг едирди (Ибр. 10:24). Булус онлара тәкҹә сөзләри илә јох, әмәлләри илә дә дәстәк олурду. Мәсәлән, Јәһудијјәдәки мәсиһиләр аҹлыг чәкәндә Булус онлара јардымын чатдырылмасына көмәк етмишди (Һәв. 11:27—30). О, тәблиғ вә тәлим иши илә чох мәшғул олса да, мадди јардыма еһтијаҹы олан диндашларына һәмишә неҹәсә көмәк етмәјә чалышырды (Гал. 2:10). Бунунла о, диндашларынын иманыны мөһкәмләндирирди, онлар әмин олурду ки, Јеһова онларын гејдинә галаҹаг. Бу ҝүн биз вахтымызы, ҝүҹүмүзү вә баҹарығымызы тәбии фәлакәтдән зәрәрчәкәнләрә көмәк етмәк үчүн сәфәрбәр едәндә онларын иманыны мөһкәмләндиририк. Бура үмумдүнја ишинә ианә етмәјимиз дә дахилдир. Баҹы-гардашларымыза бу вә ја диҝәр јолларла дәстәк олмагла Јеһованын онлары һеч вахт атмајаҹағына етибар етмәјә көмәк едирик.

15, 16. Иманы зәифләјән диндашларымызла неҹә давранмалыјыг?

¹⁵ Булус иманы зәиф олан диндашларындан әлини үзмүрдү. Онлара ҹаныјананлыг ҝөстәрирди, меһрибан данышырды, сөзләри илә онлар һаггында мүсбәт фикирдә олдуғуну ҝөстәрирди (Ибр. 6:9; 10:39). Мисал үчүн, ибраниләрә мәктубунда о өзүнү дә дахил едәрәк ҹәм шәклиндә данышырды, бунунла ҝөстәрирди ки, вердији мәсләһәтә өзү дә әмәл етмәлидир (Ибр. 2:1, 3). Булус кими, биз дә иманы зәиф олан диндашымыздан әлимизи үзмәмәлијик, әксинә, иманларыны мөһкәмләндирмәк үчүн онларла үрәкдән марагланмалыјыг. Бунунла онлары севдијимизи ҝөстәрәҹәјик. Мүлајим вә меһрибан сәс тонумуз дејәҹәјимиз сөзләр гәдәр ваҹибдир.

 ¹⁶ Булус диндашларына Јеһованын онларын јахшы ишләриндән аҝаһ олдуғуну хатырладырды (Ибр. 10:32—34). Биз дә иманы зәифләјән диндашымызы мөһкәмләндирәркән ејни ҹүр даврана биләрик. Ону тәшвиг едә биләрик ки, һәгигәтә неҹә ҝәлдијини, јахуд чәтин анларында Јеһованын она неҹә дајаг олдуғуну јада салсын. Һәмчинин гејд едә биләрик ки, онун кечмишдә Јеһоваја мәһәббәтдән ирәли ҝәләрәк ҝөрдүјү ишләри Јеһова унутмајыб вә ҝәләҹәкдә дә ону һеч вахт атмајаҹаг (Ибр. 6:10; 13:5, 6). Бу кими сөһбәтләр дәјәрли диндашымызын Јеһоваја хидмәт етмәк һәвәсини аловландыра биләр.

17. Һансы саһәләрдә пүхтәләшә биләрик?

¹⁷ Тикинтидә ишләјән инсан вахт кечдикҹә өз ишиндә пүхтәләшдији кими, ҝәрәк биз дә диндашларымызы мөһкәмләндирмәк ишиндә пүхтәләшәк. Сынагларла үзләшән диндашларымызы мөһкәмләндирмәк үчүн онлара чәтинликләрә синә ҝәрмиш садиг инсанларын нүмунәсини чәкмәк олар. Арамызда сүлһүн олмасы үчүн диндашларымызын ҝөзәл кејфијјәтләрини дилә ҝәтирмәлијик, сүлһү позаҹаг вәзијјәтләрдә сүлһү горумалыјыг вә арамызда ҝәрҝинлик јаранаркән сүлһү бәрпа етмәлијик. Һәмчинин диндашларымызын иманыны бундан сонра да мөһкәмләндирмәк үчүн онларла Мүгәддәс Китаб һәгигәтләри һагда данышмалыјыг, әмәли көмәк ҝөстәрмәлијик вә руһән зәиф оланлара дајаг олмалыјыг.

18. Сиз нә етмәјә гәтијјәтлисиниз?

¹⁸ Тәшкилатымызын тикинти лајиһәләриндә чалышанлар дахилләриндә севинҹ вә мәмнунлуг дујурлар. Биз баҹы-гардашларымызын иманыны мөһкәмләндирмәк ишиндә иштирак етмәклә бу ҹүр һиссләр дуја биләрик. Адәтән заман кечдикҹә биналар ашынмаја мәруз галыр, амма бизим ҝөрдүјүмүз ишин бәһрәси әбәди ола биләр. Ҝәлин бундан сонра да бир-биримизә тәсәлли верәк вә бир-биримизи мөһкәмләндирәк (1 Салон. 5:11).