1. Руһ дүшкүнлүјүнүн һансы зәрәрләри вар?

ҺӘР ҜҮН проблемләрлә үзләширик. Чалышырыг, баҹардығымыз гәдәр онлара таб ҝәтирәк. Бир тәрәфдән дә руһ дүшкүнлүјү оланда, проблемләрә дөзмәк даһа чәтин олур. Она ҝөрә дә руһ дүшкүнлүјүнә әминлијимизи, ҹәсарәтимизи, севинҹимизи әлимиздән алмаг истәјән оғру кими бахмалыјыг. Мәсәлләр 24:10 ајәсиндә дејилир: «Дар ҝүндә руһдан дүшсән, ҝүҹүн түкәнәр». Доғрудан да, руһ дүшкүнлүјү ҝүҹүмүзү совура биләр. Онда проблемләрин өһдәсиндән ҝәлмәјә ҝүҹүмүз галмаз.

2. Руһ дүшкүнлүјүнә нә сәбәб ола биләр вә бу мәгаләдә нәји мүзакирә едәҹәјик?

² Бизи нәләр руһдан сала биләр? Чох шеј. Һәм инсанын өзү илә бағлы амилләр, һәм дә кәнар амилләр. Мәсәлән, сәһвләримиз, зәиф ҹәһәтләримиз вә хәстәлијимиз. Һәмчинин арзусунда олдуғумуз тәјинаты алмајанда вә ја тәблиғ етдијимиз әрази бәрәкәтли олмајанда да руһдан дүшә биләрик. Бу мәгаләдә өјрәнәҹәјик ки, руһ дүшкүнлүјүнүн өһдәсиндән ҝәлмәк үчүн нә едә биләрик.

3. Сәһвләримизә ҝөрә руһдан дүшмәмәјә бизә нә көмәк едә биләр?

³ Биз сәһвләримизә вә зәиф ҹәһәтләримизә ҝөрә чох асанлыгла руһдан дүшә биләрик. Елә дүшүнә биләрик ки, сәһвләримиз уҹбатындан Јеһова бизи јени дүнјада ҝөрмәк истәмир. Амма бу ҹүр дүшүнҹә чох зәрәрлидир. Бәс сәһв етмәјимизә неҹә јанашмалыјыг? Мүгәддәс Китабда дејилир ки, Иса Мәсиһдән башга бүтүн инсанлар ҝүнаһ ишләјиб (Ром. 3:23). Амма бу сөзләри јаздыран Јеһова биздә сәһв ахтармыр, биздән мүкәммәллик ҝөзләмир. Әксинә, О бизи севдији үчүн бизә көмәк етмәк истәјир. Һәмчинин О, сәбирлидир. Јеһова  ҝөрүр ки, бизләр зәиф ҹәһәтләримизлә, дәјәрсизлик һисси илә чох мүбаризә апарырыг. Буна ҝөрә дә бизә көмәк етмәјә һазырдыр (Ром. 7:18, 19).

4, 5. 1 Јәһја 3:19, 20 ајәләринә әсасән, ики баҹыја руһ дүшкүнлүјүнә мәғлуб олмамаға нә көмәк етди?

⁴ Ҝәлин Деборанын вә Маријанын * нүмунәсинә бахаг. Ушаг јашларында Дебора аиләсиндән ҝөрдүјү пис рәфтара ҝөрә өзүнү дәјәрсиз һисс едирди. Демәк олар ки, о, аиләсиндән тәриф ешитмәмишди. Буна ҝөрә дә өзүнүн чох пис инсан олдуғуну дүшүнүрдү. Хырда сәһвләрә ҝөрә өзүнү чох гынајырды, дүзәлмәз инсан олдуғуну дүшүнүрдү. Маријада да ејни проблемләр вар иди. Гоһумлары тәрәфиндән алчалдыҹы рәфтара мәруз галырды. Буна ҝөрә дә онда өзүнә гаршы ҝүҹлү дәјәрсизлик һисси вар иди. Һәтта вәфтиз олунандан сонра белә өзүнү Аллаһын адыны дашымаға лајиг билмирди.

⁵ Амма бу ики баҹы Јеһоваја хидмәти дајандырмады. Онлар һәрарәтлә Јеһоваја дуа едир, нараһатчылыгларыны Онунла бөлүшүрдүләр (Зәб. 55:22). Онлар баша дүшдүләр ки, Јеһова кечмишдә јашадыгларымыздан аҝаһдыр вә өзүмүзә тәнгиди јанашмағымыза нәләрин сәбәб олдуғуну билир. Һәмчинин О, үрәјимиздәки ҝөзәлликләри дә ҝөрүр, о ҝөзәлликләри ки, биз ҝөрә билмирик. (1 Јәһја 3:19, 20 ајәләрини охујун.)

6. Сәһвини тәкрарлајан инсанда өзү һаггында һансы фикир јарана биләр?

⁶ Ола биләр ки, инсан дәринә көк салмыш вәрдишләри илә мүбаризә апарыр. Амма бәзән мәғлуб олур вә буна ҝөрә руһ дүшкүнлүјүнә гапылыр. Тәбии ки, сәһв едәндә инсанын өзүнү гынамасы нормалдыр (2 Кор. 7:10). Амма өзүмүзү һәддән артыг чох гынамамалыјыг. Һеч вахт дүзәлмәјәҹәјимизи, Јеһованын бизи бағышламајаҹағыны дүшүнмәмәлијик. Чүнки бу белә дејил. Үстәлик, бу ҹүр дүшүнҹә Јеһоваја хидмәти дајандырмағымыза ҝәтириб чыхара биләр. Мәсәлләр 24:10 ајәсиндә јазылан сөзләри бир даһа хатырлајаг. Орада дејилир ки, руһдан дүшсәк, ҝүҹүмүз түкәнәр. Бунун әвәзинә, Јеһоваја дуа едиб әфвини диләјәрәк, араныздакы мәсәләни һәлл един (Әшј. 1:18). Јеһова сизин үрәкдән төвбә етдијинизи ҝөрүб ҝүнаһынызы бағышлајаҹаг. Бундан әлавә, ағсаггаллара јахынлашын. Онлар сәбирлә сизә көмәк едәҹәк ки, руһән дирчәләсиниз (Јаг. 5:14, 15).

7. Зәифликләримизлә мүбаризә апарырыгса, нәјә ҝөрә руһдан дүшмәмәлијик?

⁷ Франсадан олан Жан-Лук адлы ағсаггал зәифликләри илә мүбаризә апаранлара белә  дејир: «Јеһованын ҝөзүндә салеһ инсан һеч вахт сәһв етмәјән инсан јох, сәһвинә ҝөрә пешман олан вә ону тәкрарламамаг үчүн вар ҝүҹү илә чалышан инсандыр» (Ром. 7:21—25). Буна ҝөрә дә зәифлијинизлә мүбаризә апармағынызын сизи дәјәрдән салдығыны дүшүнмәјин. Унутмајын ки, биз һамымыз ҝүнаһ ишләјирик, јалныз Јеһованын фидјә васитәсилә ҝөстәрдији лүтф сајәсиндә салеһ сајыла биләрик (Ефес. 1:7; 1 Јәһ. 4:10).

8. Руһ дүшкүнлүјү илә мүбаризәдә кимләрдән көмәк истәјә биләрик?

⁸ Руһани аиләмизин, баҹы-гардашларымызын көмәји илә руһ дүшкүнлүјүнүн өһдәсиндән ҝәлә биләрик! Үрәјимизи бошалтмаг истәјәндә онлар бизи ҹан-дилдән динләјәҹәкләр, сөзләри илә бизә гол-ганад верәҹәкләр (Мәс. 12:25; 1 Салон. 5:14). Ниҝеријадан олан Ҹој адлы баҹы ҝүҹлү руһ дүшкүнлүјүндән әзијјәт чәкирди. О дејир: «Баҹы-гардашларым олмаса иди, нә едәрдим? Онларын дәстәји мәним үчүн сүбутдур ки, Јеһова дуаларыма ҹаваб верир. Һәтта онлардан пәришан һалда олан инсанлара тәсәлли вермәји өјрәндим». Амма нәзәрә алын ки, һеч дә һәмишә баҹы-гардашларымыз бизим руһланмаға еһтијаҹ дујдуғумузу билмир. Она ҝөрә дә лазым ҝәлә биләр ки, өзүмүз диндашымыза јахынлашыб, көмәјә еһтијаҹ дујдуғумузу дејәк.

9. Зәбур 41:3 вә 94:19 ајәләри бизи неҹә руһландырыр?

⁹ Јеһоваја сығынын. Нахош оланда, хүсусилә дә хроники хәстәлијимиз оланда никбин дүшүнмәк чәтин олур. Бу ҝүн Јеһова бизи мөҹүзәви шәкилдә сағалтмаса да, О бизи тәсәлли едир, дөзмәк үчүн ҝүҹ верир. (Зәбур 41:3; 94:19 ајәләрини охујун.) Мәсәлән, О, диндашымызын үрәјиндә истәк ојада биләр ки, бизә ев ишләриндә, алыш-вериш мәсәләсиндә көмәк етсин вә ја бизимлә бирҝә дуа етсин. Јахуд Кәламындан тәсәлливериҹи фикирләри јадымыза сала биләр, мәсәлән, хәстәлијин, ағры-аҹынын олмајаҹағы јени дүнја илә бағлы вердији мөһтәшәм вәдини хатырлада биләр (Ром. 15:4).

10. Исанга бәдбәхт һадисәдән сонра руһ дүшкүнлүјүнә гапылмамаға нә көмәк етди?

¹⁰ Ниҝеријадан олан Исанг бәдбәхт һадисә нәтиҹәсиндә ифлиҹ галыб. Һәким она демишди ки, о, һеч вахт ҝәзә билмәјәҹәк. «Чох сарсылмышдым, пәришан һалда идим», — дејә о бөлүшүр. О елә бу әһвалда галды? Хејр! Бәс она нә көмәк етди? О дејир: «Нә мән, нә дә арвадым Јеһоваја дуа етмәји вә Онун Кәламыны мүталиә етмәји дајандырмадыг. Һәмчинин гәтијјәтли идик ки, јени дүнјада јашамаг үмиди дә дахил олмагла, саһиб олдуғумуз немәтләрә ҝөрә дахилимиздә шүкран һисси олсун».

11. Синди баҹыја ағыр хәстәлији заманы севинҹини горумаға нә көмәк етди?

¹¹ Мексикада јашајан Синдијә өлүмҹүл хәстәлик диагнозу гојулмушду. Буна дөзмәјә она нә көмәк етди? Синди мүалиҹә алдығы дөврдә гаршысына мәгсәд гојду ки, һәр ҝүн тәблиғ едәҹәк. О дејир: «Бунун сајәсиндә фикрими әмәлијјатыма, ағрыларыма, хәстәлијимә јох, инсанлара ҹәмләјә билирдим. Белә едирдим: һәкимләрлә, тибб баҹылары илә сөһбәт едәндә чалышырдым, онларын аиләләри илә дә марагланым, нә үчүн белә ағыр пешә сечдикләрини сорушурдум. Беләҹә, онлара һансы мөвзуларын мараглы олаҹағыны тәхмин едә билирдим. Бәзиләри дејирди ки, тәк-түк хәстә олар ки, онлардан һал-әһвал тутсун. Чохлары онларла марагландығыма ҝөрә миннәтдарлығыны билдирирди. Һәтта бәзиләри мәнә үнванларыны вә телефон нөмрәләрини вермишди.  Һәјатымын бу ағыр дөнәминдә Јеһова мәним дахилимә елә севинҹ вермишди ки, өзүм дә мәәттәл галмышдым!» (Мәс. 15:15).

12, 13. Јашлы вә хәстә инсанлар хидмәтдә неҹә иштирак едә билир вә бу һансы нәтиҹәләр верир?

¹² Јашлы вә хәстә олан инсанлар хидмәтдә чох шеј едә билмәдикләринә ҝөрә руһ дүшкүнлүјүнә гапыла биләрләр. Амма буна рәғмән, онларын чоху ҝөзәл шаһидлик вермәјә мүвәффәг олуб. Бирләшмиш Штатларда Лорел адлы баҹымыз 37 ил «дәмир ағҹијәр» адланан нәфәс апараты илә јашајыб. Онда хәрчәнҝ хәстәлији вар иди, бир нечә ҹидди әмәлијјат кечирмишди вә хроники дәри хәстәлијиндән әзијјәт чәкирди. Бу дәрәҹәдә ағыр вәзијјәтинә бахмајараг, о, тәблиғи дајандырмады. Евинә ҝәлән тибб баҹыларына вә диҝәр тибб ишчиләринә тәблиғ едирди. Бу һансы бәһрәләри ҝәтирди? О, ән азы, 17 нәфәрә Јеһованын Шаһиди олмаға көмәк етди! *

¹³ Франсадан олан Ришар адлы ағсаггал евдән чөлә чыха билмәјән, јахуд да гоҹалар евиндә јашајанлара мараглы идеја верир: «Мәсләһәт ҝөрүрәм ки, нәшрләримиздән кичик стенд дүзәлтсинләр. Стенд мараға сәбәб олур вә сөһбәтә јол ачыр. Бу ҹүр сөһбәтләр ев-ев тәблиғ етмәк имканы олмајан баҹы-гардашлары руһландыра биләр». Евдән чөлә чыха билмәјән баҹы-гардашлар һәмчинин мәктуб вә ја телефон васитәсилә дә шаһидлик верә биләрләр.

14. Давуд падшаһ бизим үчүн һансы саһәдә нүмунә гојуб?

¹⁴ Ола билсин, јашымыз, сағламлығымыз вә диҝәр амилләр уҹбатындан Јеһоваја хидмәтдә истәдијимиз тәјинаты алмајаг. Белә вәзијјәтдә Давуд падшаһдан чох шеј өјрәнә биләрик. Давуд падшаһ Јеһованын мәбәдини тикмәк һәсрәтиндә иди. Амма биләндә ки, Јеһова мәбәди тикмәк үчүн ону јох, башгасыны сечиб, һәмин адамы ҹан-дилдән дәстәкләди. Һәтта бу лајиһә үчүн күлли мигдарда ианә етди. Давуд, һәгигәтән дә, бизим үчүн ҝөзәл нүмунәдир! (2 Ишм. 7:12, 13; 1 Салн. 29:1, 3—5).

15. Һүг адлы гардаш руһ дүшкүнлүјүнүн өһдәсиндән неҹә ҝәлди?

¹⁵ Франсада јашајан Һүг адлы гардаш сәһһәти илә бағлы проблемә ҝөрә ағсаггал хидмәтини дајандырмалы олмушду. Һәтта о, евдә ади ишләри дә ҝөрә билмирди. О дејир: «Әввәл-әввәл чох мәјус идим, өзүмү лазымсыз һисс едирдим. Амма бир мүддәт сонра баша дүшдүм ки, вәзијјәтимлә барышмалыјам. Беләҹә, Јеһоваја хидмәтдә баҹардығым шејләри етмәкдән севинҹ дујмаға башладым. Тәслим олмамаға  гәти гәрарлыјам. Ҹәдун вә онунла олан 300 нәфәр кими, мән дә јорулмағыма бахмајараг, мүбаризәни давам етдирәҹәјәм!» (Һак. 8:4).

16. Мәләкләрин нүмунәсиндән нә өјрәнә биләрик?

¹⁶ Бу саһәдә садиг мәләкләр бизә ҝөзәл нүмунәдир. Јеһова мәләкләрә бујурмушду ки, пис падшаһ олан Әһәби товламаг үчүн тәклифләрини десинләр. Мәләкләрин һәрәси бир шеј деди. Амма Јеһова онларын арасындан бирини сечди вә деди ки, падшаһы товламаг онда алынаҹаг (1 Пад. 22:19—22). Бәс диҝәр садиг мәләкләр руһдан дүшдү? «Әбәс јерә чалышдым», — дејә дүшүндү? Әлбәттә ки, јох. Мәләкләр тәвазөкардыр вә истәјирләр ки, бүтүн шәрәф Јеһоваја мәхсус олсун (Һак. 13:16—18; Вәһј 19:10).

17. Арзусунда олдуғумуз тәјинаты алмадығымыза ҝөрә руһдан дүшмүшүксә, нә етмәлијик?

¹⁷ Унутмајын, Аллаһын адыны дашымаг вә Падшаһлығыны бәјан етмәк ән бөјүк шәрәфдир. Тәјинатлар ҝәлди-ҝедәрди вә Јеһова бизә тәјинатымыза ҝөрә дәјәр вермир. Јеһова вә баҹы-гардашлар бизи тәвазөкар, һәлим олдуғумуза ҝөрә севирләр. Буна ҝөрә дә Јеһоваја јалварын ки, тәвазөкар вә һәлим галмағыныза көмәк етсин. Јеһованын Кәламында гәләмә алынан ҝөзәл тәвазөкарлыг вә һәлимлик нүмунәләри үзәриндә дүшүнүн. Баҹардығыныз саһәләрдә баҹы-гардашлара ҹанла-башла хидмәт един (Зәб. 138:6; 1 Бут. 5:5).

18, 19. Тәблиғ етдијиниз әрази бәһрәсиз олса белә, хидмәтдән неҹә севинҹ дуја биләрсиниз?

¹⁸ Елә олубму ки, тәблиғ етдијиниз әразинин бәһрәсиз олдуғуну дүшүнүб, мәјуслуға гапыласыныз? Јахуд, ола билсин, сизин әразидә инсанлары евдә тапмаг чәтиндир. Белә вәзијјәтләрдә севинҹимизи горумаг, јахуд артырмаг үчүн нә едә биләрик? « Хидмәтдән севинҹ дујмағын јоллары» адлы чәрчивәдә бәзи фајдалы мәсләһәтләр вар. Һәмчинин тәблиғ ишинә дүзҝүн јанашмаг да ваҹибдир. Һансы мәнада?

¹⁹ Унутмајын ки, тәблиғ етмәкдә әсас мәгсәд Аллаһын адыны вә Падшаһлығыны бәјан етмәкдир. Иса Мәсиһ ачыг-ајдын демишди ки, аз сајда инсан һәјата апаран јола гәдәм гојаҹаг (Мәт. 7:13, 14). Тәблиғ ишиндә иштирак едәндә бизә Јеһова, Иса вә мәләкләрлә әмәкдашлыг етмәк шәрәфи нәсиб олур (Мәт. 28:19, 20; 1 Кор. 3:9; Вәһј 14:6, 7). Јеһова лајиг олан кәсләри  Өзүнә ҹәлб едир (Јәһ. 6:44). Ишдир, мүждәләдијимиз хәбәрә инсан гулаг асмаса, ола билсин, нөвбәти дәфә гулаг асаҹаг.

20. Әрәмја 20:8, 9 ајәләриндән мәјуслугла мүбаризә апармагла бағлы нә өјрәнирик?

²⁰ Биз Әрәмја пејғәмбәрдән чох шеј өјрәнә биләрик. Онун тәблиғ етдији әрази чох чәтин әрази иди. Инсанлар «бүтүн ҝүнү» ону тәһгир едир, әлә салырды. (Әрәмја 20:8, 9 ајәләрини охујун.) Бир мәгамда пејғәмбәр о гәдәр мәјус олмушду ки, аз галмышды тәслим олсун. Амма о тәслим олмады. Нәјә ҝөрә? Јеһованын сөзү Әрәмјанын үрәјиндә аловланан атәш олду, даһа ону өзүндә сахлаја билмәди! Ағлымызы вә үрәјимизи Аллаһын Кәламы илә долдурсаг, ејни шеј бизимлә дә баш верәҹәк. Бу, Аллаһын Кәламыны һәр ҝүн мүталиә едиб, дәринлијинә вармаг үчүн даһа бир сәбәбдир. Бунун сајәсиндә севинҹимиз артдыгҹа-артаҹаг вә тәблиғимиз даһа бәһрәли олаҹаг (Әрм. 15:16).

21. Руһ дүшкүнлүјүнүн өһдәсиндән неҹә ҝәлә биләрик?

²¹ Јухарыда ады чәкилән Дебора дејир: «Руһ дүшкүнлүјү Шејтанын истифадә етдији ҝүҹлү силаһдыр». Амма истәнилән силаһ Јеһованын гаршысында аҹиздир. Буна ҝөрә дә руһдан дүшмәјинизә нәјин сәбәб олмасындан асылы олмајараг, сизә дајаг олмасы үчүн Јеһоваја јалварын. О, сәһвләринизә вә зәиф ҹәһәтләринизә ҝөрә руһ дүшкүнлүјүнә гапылмамағыныза көмәк едәҹәк. Хәстәлијинизлә чарпышаркән сизә дајаг олаҹаг. Хидмәтдәки тәјинатлара таразлы јанашмағыныза көмәк едәҹәк. Һәмчинин тәблиғ әразинизә мүсбәт јанашмағыныза көмәк едәҹәк. Бундан әлавә, бүтүн нараһатчылыгларынызы Јеһоваја данышын, үрәјинизи Она бошалдын. Онун көмәји илә биз руһ дүшкүнлүјү илә мүбаризәдә галиб ҝәлә биләрик.