1. Јеһова Өз хидмәтчиләринин дуасына неҹә ҹаваб верир?

 ТӘСӘВВҮР ЕДИН, кимсә һәрарәтлә Јеһоваја дуа едиб Ондан көмәк истәјир. Јеһова да онун дуасына сизин васитәнизлә ҹаваб верир. Бу, чох бөјүк шәрәфдир! Јашлы вә ја ҹаван, баҹы вә ја гардаш, ағсаггал, јығынҹаг хидмәтчиси, өнҹүл вә ја ади тәблиғчи олмағыныздан асылы олмајараг, Јеһова һәр кәсә бу шәрәфи нәсиб едә биләр. Бәли, Јеһова Ону севән, Ондан имдад диләјән бәндәләринә чох вахт ағсаггаллар вә диҝәр садиг мәсиһиләр васитәсилә дајаг олур (Кол. 4:11). Хәстәлик јајыланда, фәлакәт баш верәндә, тәгибләр оланда биз бу ишдә Јеһованын сағ әли ола биләрик.

2. Нәјә ҝөрә хәстәлик јајыланда башгаларына көмәк етмәк чәтин олур?

² Һансыса хәстәлик јајыланда бир-биримизә көмәк етмәк чәтин олур. Мәсәлән, достларымыза баш чәкмәк истәјирик, амма тәһлүкәли олдуғу үчүн буну едә билмирик. Истәјирик, корлуг чәкән диндашымызы гонаг дәвәт едәк, амма бу да мүмкүн олмур. Јахуд диндашларымыза көмәк етмәк истәјирик, амма өз аилә үзвләримиз хәстә олдуғу вә ја мадди сыхынты чәкдији үчүн буну етмәк чәтин олур. Бунунла белә, баҹы-гардашларымыза дајаг олмағын ваҹиблијини баша дүшүрүк вә ҝүҹүмүз дахилиндә буну едәндә Јеһоваја хош олур (Мәс. 3:27; 19:17). Бәс диндашларымыза неҹә көмәк едә биләрик?

3. Дезинин јығынҹағындакы ағсаггалларын нүмунәсиндән нә өјрәнирик? (Әрәмја 23:4).

³ Ағсаггаллар нә едә биләр? Әзиз ағсаггаллар, баҹы-гардашларла  јахындан таныш олун. (Әрәмја 23:4 ајәсини охујун.) Өтән мәгаләдә ады чәкилән Дези b баҹы дејир: «Тәблиғ групумуздакы ағсаггаллар пандемијадан әввәл һәмишә бизимлә хидмәт едирдиләр, бирҝә вахт кечирирдиләр». Бунун сајәсиндә COVID-19 пандемијасы башлајанда вә Дези аилә үзвләриндән бәзиләрини итирәндә һәмин ағсаггаллар она көмәк едә билмишдиләр.

4. Ағсаггаллар нәјин сајәсиндә Дезијә көмәк едә билди вә бундан нә өјрәнирик?

⁴ Дези дејир: «Ағсаггалларла достлашмышдым, буна ҝөрә дә онлара һиссләрими, нараһатлыгларымы демәк мәнә асан олду». Бу сөзләрдә дәрин мәна вар. Әзиз ағсаггаллар, чәтин вахтлар јетишмәмишдән әввәл баҹы-гардашлара гајғы ҝөстәрин. Онларла дост олун. Хәстәлик јајылдығы үчүн онлара баш чәкә билмирсинизсә, башга үсулларла онларла әлагә сахлајын. Дези дејир: «Бәзән ҝүн әрзиндә бир нечә ағсаггал мәнә ја зәнҝ едирди, ја да месаж ҝөндәрирди. Онларын дедији ајәләр мәнә бөјүк тохтаглыг верирди, бахмајараг ки, һәмин ајәләри чох јахшы билирдим».

5. Ағсаггаллар баҹы-гардашларын нәјә еһтијаҹ дујдуғуну неҹә өјрәнә биләр вә онлара неҹә көмәк едә биләрләр?

⁵ Баҹы-гардашлара нәзакәтлә суаллар вериб нәјә еһтијаҹ дујдугларыны өјрәнин (Мәс. 20:5). Ҝөрүн онларын јемәји, ичмәји, лазыми дәрманлары вар? Бәлкә, башга шејә еһтијаҹ дујурлар? Ишләрини итирмәк тәһлүкәси јохдур? Кирајә пулуну өдәјә билирләр? Бәлкә, һөкумәтдән јардым алмаг үчүн әризә јазмаға көмәк етмәк лазымдыр? Диндашлары Дезијә мадди ҹәһәтдән әл тутурдулар. Амма она сынаглара дөзмәјә ән чох ағсаггалларын руһани вә мәнәви ҹәһәтдән дајаг олмасы көмәк етди. О дејир: «Ағсаггаллар мәнимлә бирҝә дуа едирдиләр. Дүздүр, онларын дуада нә дедикләри јадымда дејил, амма һәмин вахт кечирдијим һиссләр һеч јадымдан чыхмыр. Санки Јеһова дејирди: “Сән тәк дејилсән”» (Әшј. 41:10, 13).

6. Мәсиһиләр бир-биринә неҹә көмәк едә биләр? (Шәклә бахын.)

⁶ Башгалары нә едә биләр? Дүздүр, баҹы-гардашларын гајғысына галмаг әсас етибарилә ағсаггалларын өһдәсинә дүшүр. Амма Јеһова һамымызы тәшвиг едир ки, диндашларымызы руһландыраг, онлара көмәк едәк  (Гал. 6:10). Хәстәләнән диндашымыз үчүн етдијимиз хырда бир шеј ону чох руһландыра биләр. Мәсәлән, ушаглар һансыса гардаша ачыгҹа вә ја рәсм чәкиб ҝөндәрә биләрләр. Ҹаван мәсиһиләр баҹыја ев ишләриндә вә ја алыш-вериш етмәкдә көмәк едә биләрләр. Јахуд хәстә олан диндашымыз үчүн јемәк һазырлајыб, гапыдан верә биләрик. Әлбәттә, хәстәлик ҝениш вүсәт аланда јығынҹагда һәр кәс руһланмаға еһтијаҹ дујур. Ибадәт ҝөрүшләриндә истәр ҹанлы иштирак един, истәрсә дә видеоконфранс васитәсилә гошулун, јығынҹагдан сонра баҹы-гардашларла үнсијјәтә гала биләрсиниз. Унутмајын ки, ағсаггалларын да руһланмаға еһтијаҹы вар. Хәстәлик јајылан заман ағсаггалларын иши даһа чох олур, буна ҝөрә дә бәзи мәсиһиләр онлара миннәтдарлыг мәктублары ҝөндәрирләр. Ҝәлин һамымыз бир-биримизә тәсәлли верәк, бир-биримизи мөһкәмләндирәк (1 Салон. 5:11). Белә етсәк, һәр биримиз үчүн јахшы олаҹаг.

7. Фәлакәтләр инсанлара һансы зәрәри вурур?

⁷ Фәлакәтләр бир ҝөз гырпымында инсанын һәјатыны алт-үст едир. Инсанлар мал-мүлкләрини, ев-ешикләрини, һәтта әзизләрини итирирләр. Бу ҹүр бәлалар баҹы-гардашларымыздан да јан кечмир. Онлара неҹә көмәк едә биләрик?

8. Ағсаггаллар вә аилә башчылары фәлакәт баш вермәмишдән әввәл нә етмәлидирләр?

⁸ Ағсаггаллар нә едә биләр? Әзиз ағсаггаллар, баҹы-гардашлара әввәлҹәдән фәлакәтләрә һазырлашмаға көмәк един. Јығынҹагда һамыја изаһ един ки, фәлакәтләр заманы һансы аддымлары атмалыдырлар вә ағсаггалларла неҹә әлагә јаратмалыдырлар. Әввәлки мәгаләдә һаггында данышдығымыз Маргарет баҹы дејир: «Јығынҹағын тәләбатлары бәндиндә ағсаггаллар бизи хәбәрдар етдиләр ки, јанғын мөвсүмү һәлә битмәјиб. Әҝәр тәһлүкә јаранса вә дөвләт тәхлијә елан етсә, дәрһал евимизи тәрк едәк». Онлар бу ҝөстәриши там вахтында вердиләр, чүнки ҹәми беш һәфтә сонра ҝүҹлү јанғын баш верди. Аиләви ибадәт вахты аилә башчылары фәлакәт заманы һамынын нә етмәли олдуғуну мүзакирә етмәлидир. Әҝәр сиз вә өвладларыныз габагҹадан һазырлыглы олсаныз, фәлакәт баш верән заман тәлаша дүшмәјәҹәксиниз.

9. Ағсаггаллар фәлакәтдән әввәл вә фәлакәт вахты неҹә фәалијјәт ҝөстәрирләр?

⁹ Груп нәзарәтчиләри фәлакәт баш вермәмишдән әввәл мүмкүн гәдәр групларындакы тәблиғчиләрин әлагә мәлуматларыны өјрәнмәлидирләр. Гардашлар сијаһы тутмалыдырлар вә вахташыры бу мәлуматы јениләмәлидирләр. Бунун сајәсиндә фәлакәт баш верәндә һәр бир тәблиғчи илә әлагә јарадыб, нәјә еһтијаҹы олдуғуну өјрәнә биләҹәкләр. Бундан сонра онлар әлдә етдикләри мәлуматы ағсаггаллар шурасынын координаторуна өтүрмәлидирләр. О да өз нөвбәсиндә рајон нәзарәтчиси илә әлагә сахлајаҹаг. Бу гардашларын бирҝә әмәји сајәсиндә баҹы-гардашлара лазыми көмәк ҝөстәриләҹәк. Јанғын баш верәндә Маргарет баҹынын рајон нәзарәтчиси 36 саат ојаг галмышды. Белә ки, ағсаггаллар евини тәрк едән 450 баҹы-гардашла әлагә јаратмаға, онлара көмәк етмәјә чалышырды, рајон нәзарәтчиси дә бу иши низамлајырды (2 Кор. 11:27). Беләҹә, һәр кәс үчүн галмаға јер тапылды.

10. Нәјә ҝөрә ағсаггаллар баҹы-гардашлары руһландырмағын ваҹиб олдуғуну һесаб едирләр? (Јәһја 21:15).

¹⁰ Баҹы-гардашлара руһани вә мәнәви көмәк ҝөстәрмәк дә ағсаггалларын мәсулијјәтинә  дахилдир (1 Бут. 5:2). Фәлакәт баш верәндә ағсаггаллар илк нөвбәдә дәгигләшдирмәлидирләр ки, һәр бир баҹы-гардаш тәһлүкәсизликдәдир, онларын јемәји, палтары вә галмаға јери вар. Лакин фәлакәтдән ајлар сонра да баҹы-гардашларын руһани вә мәнәви көмәјә еһтијаҹы олаҹаг. (Јәһја 21:15 ајәсини охујун.) Филиал комитәсинин үзвү олан Һаролд адлы бир гардаш фәлакәтдән зәрәр чәкән бир чох баҹы-гардашла сөһбәт едиб. О дејир: «Фәлакәтин вурдуғу јара тез сағалмыр. Бу баҹы-гардашлар өзләринә ҝәләндән сонра да өлән әзизләринин вә ев-ешикләринин хатирәси, фәлакәт заманы јашадыглары аҹы анлар онлара изтираб верә биләр. Бу һиссләр тәбиидир. Бу, о демәк дејил ки, онларын иманы зәифдир».

11. Аиләләрин һансы саһәләрдә көмәјә еһтијаҹы вар?

¹¹ Ағсаггаллар «ағлајанларла ағлајын» мәсләһәтинә әмәл едирләр (Ром. 12:15). Фәлакәтдән сағ чыханлары инандырмаг лазымдыр ки, Јеһова вә баҹы-гардашлар онлары һәлә дә севир. Ағсаггаллар аиләләрә руһани ишләрдән — дуадан, мүталиәдән, јығынҹагдан, тәблиғдән галмамаға көмәк етмәлидирләр. Һәмчинин ағсаггаллар валидејнләри тәшвиг етмәлидирләр ки, онлар өвладларынын диггәтини һеч бир фәлакәтин мәһв етмәјә гадир олмадығы шејләрә ҹәмләсинләр. Әзиз валидејнләр, өвладларыныза ашылајын ки, Јеһова һәмишә онларын Досту олаҹаг, һеч вахт онлары атмајаҹаг; һәмчинин онлар һәмишә үмумдүнја аиләнин үзвү олаҹаглар вә бу аиләдәки баҹы-гардашлар һәр заман онларын көмәјинә јетмәјә һазырдыр (1 Бут. 2:17).

12. Башгалары фәлакәтдән зәрәрчәкәнләрә неҹә көмәк едә биләр? (Шәклә бахын.)

¹² Башгалары нә едә биләр? Әҝәр фәлакәт сизә јахын әразидә баш верибсә, көмәк етмәк истәјинизи ағсаггаллара билдирин. Евләрини тәрк едәнләри, тикинтидә көмәк етмәк үчүн ҝәлән көнүллүләри бир мүддәт евиниздә гонаг сахлаја биләрсиниз. Јахуд дарда оланлара әрзаг вә диҝәр зәрури шејләри чатдыра биләрсиниз. Һәтта фәлакәт сиздән узагда баш версә дә, јенә дә көмәк етмәк мүмкүндүр. Мәсәлән, онлар үчүн дуа един (2 Кор. 1:8—11). Үмумдүнја иш үчүн ианә етмәклә зәрәрчәкәнләрә јардым ишини дәстәкләјин (2 Кор. 8:2—5). Әҝәр фәлакәт баш верән әразијә көмәк етмәјә ҝедә биләрсинизсә, бу барәдә ағсаггаллара дејин. Дәвәт олунсаныз, сизә тәлим  кечәҹәкләр ки, тәләбат олан јердә там төһфә верә биләсиниз.

13. Фәалијјәтимизин гадаған олундуғу өлкәләрдә гардашларымыз һансы чәтинликлә үзләширләр?

¹³ Фәалијјәтимизин гадаған олундуғу өлкәләрдә вәзијјәт даһа да чәтиндир. Чүнки һәмин әразидә јашајан диндашларымыз да мадди чәтинликләрлә үзләширләр, хәстәләнирләр, доғмаларыны итирирләр. Амма гадаға уҹбатындан ағсаггаллар онлара баш чәкә билмир, раһат үнсијјәт едиб руһландыра билмир. Өтән мәгаләдә ады чәкилән Андреј гардаш да белә бир вәзијјәтлә үзләшмишди. Онун тәблиғ групунда олан бир баҹы мадди ҹәһәтдән корлуг чәкирди. Сонра баҹы автомобил гәзасына дүшдү. О, бир нечә әмәлијјат кечирмәли иди, ишләјә дә билмирди. Гадағалара, пандемијаја бахмајараг, гардашлар она әлләриндән ҝәлән гәдәр көмәк етдиләр. Баҹынын вәзијјәтини Јеһова да ҝөрүрдү.

14. Јеһоваја ҝүвәнмәк мәсәләсиндә ағсаггаллар неҹә нүмунә гоја биләр?

¹⁴ Ағсаггаллар нә едә биләр? Андреј Јеһоваја дуа етди вә әлиндән ҝәләни етди. Јеһова да онун дуасына ҹаваб олараг, јығынҹагдакы баҹы-гардашларын үрәјиндә һәмин баҹыја көмәк етмәк истәји ојатды. Кимиси баҹыны һәкимә апарырды, кимиси мадди ҹәһәтдән көмәк едирди. Бир сөзлә, Јеһова онлары тәшвиг етди ки, ким неҹә баҹарыр, баҹыја көмәк етсин. Беләҹә, баҹынын бүтүн еһтијаҹлары өдәнилди (Ибр. 13:16). Әзиз ағсаггаллар, фәалијјәтимиз гадаған алтындадырса, диндашларыныздан көмәк истәјин (Әрм. 36:5, 6). Ән әсасы исә, Јеһоваја архаланын. О, баҹы-гардашларын гајғысына галмаға сизә көмәк едәҹәк.

15. Тәгибләр вахты арамыздакы бирлији неҹә горуја биләрик?

¹⁵ Башгалары нә едә биләр? Фәалијјәтимиз гадаға алтында оланда биз кичик груплар шәклиндә јығышмалы олуруг. Бу заман арамыздакы сүлһү горумаг хүсусилә ваҹибдир. Шејтана гаршы мүбаризә апарын, бир-биринизә гаршы јох. Диндашларынызын сәһвләринин үстүндән кечин, һәр бир наразылығы дәрһал јолуна гојун (Мәс. 19:11; Ефес. 4:26). Бир-биринизә әл тутмаға һазыр олун (Тит. 3:14). Дарда олан баҹыја ҝөстәрилән көмәјин тәблиғ групуна мүсбәт тәсири олду. Онлар бир аилә кими меһрибан олдулар (Зәб. 133:1).

16. Колослулара 4:3, 18 ајәләринә әсасән, тәгиб олунан диндашларымыза неҹә көмәк едә биләрик?

 ¹⁶ Минләрлә мәсиһи гадағалара бахмајараг, Јеһоваја хидмәт едир. Онлардан бәзиләри иманына ҝөрә һәбсдәдир. Биз онлар үчүн, аиләләри үчүн, һәмчинин өз азадлығыны рискә атараг онлара руһани, физики вә һүгуги јардым ҝөстәрән диндашларымыз үчүн дуа едә биләрик c. (Колослулара 4:3, 18 ајәләрини охујун.) Дуанын ҝүҹүнү һеч вахт унутмајын! (2 Салон. 3:1, 2; 1 Тим. 2:1, 2).

17. Индидән тәгибләрә неҹә һазырлаша биләрсиниз?

¹⁷ Аиләликҹә индидән тәгибләрә һазырлашын (Һәв. 14:22). Бу, о демәк дејил ки, тәсәввүрүнүздә дәһшәтли сәһнәләр ҹанландырмалысыныз. Хејр, өзүнүзүн вә ушагларынызын Јеһова илә достлуғуну мөһкәмләндирин. Нараһатлыг кечирәндә үрәјинизи Јеһоваја бошалдын (Зәб. 62:7, 8). Јеһоваја етибар етмәк үчүн һансы әсасларынызын олдуғуну аиләликҹә мүзакирә един d. Фәлакәтләрә һазырлашдығыныз кими, тәгибләрә дә һазырлашсаныз, өвладларыныз ҹәсарәтли олаҹаг вә Јеһоваја етибар етдикләри үчүн тәлаша дүшмәјәҹәкләр.

18. Бизи неҹә ҝәләҹәк ҝөзләјир?

¹⁸ Аллаһын сүлһү үрәјимизә раһатлыг верир (Филип. 4:6, 7). Бу сүлһ сајәсиндә хәстәлик, фәлакәт, тәгиблә үзләшәндә белә, тәлаша дүшмүрүк. Ағсаггаллар усанмадан бизим гејдимизә галырлар. Үстәлик, һамымызын бир-биримизә көмәк етмәк имканы вар. Һазыркы сакитлик дөврүндә ҝәләҹәк сынаглара, һәтта бөјүк мүсибәтә һазырлаша биләрик (Мәт. 24:21). Һәмин вахт һәм өзүмүз сакитлији горумалыјыг, һәм дә башгаларына тәлаша дүшмәмәјә көмәк етмәлијик. Бу бәла өтүб кечәндән сонра даһа һеч нә бизим гәлб раһатлығымызы әлимиздән алмајаҹаг. Нәһајәт, Јеһованын әзәлдән нијјәт етдији һәјата говушаҹағыг, әбәди сүлһдән һәзз алаҹағыг! (Әшј. 26:3, 4).