1. Вәфтиз олмаг нәјә ҝөрә мүтләгдир? (Мәгаләнин әввәлиндәки шәклә бахын.)

ҺӘР ил минләрлә инсан һәјатыны Јеһоваја һәср едиб вәфтиз олур. Онларын арасында ушаг вә јенијетмәләр дә аз дејил. Бу ҝәнҹләрдән бәзиләри көрпәликдән Јеһованын тәлим-тәрбијәсини алыб. Афәринләр олсун онлара ки, бу јашларында белә мүһүм аддымы атыблар. Чүнки мәсиһи олмаг вә хиласа јетишмәк үчүн вәфтиз мүтләгдир (Мәт. 28:19, 20; 1 Бут. 3:21).

2. Нәјә ҝөрә һәјатыны Јеһоваја һәср етмәкдән горхмаг вә бу аддымдан чәкинмәк лазым дејил?

² Вәфтиз чохлу немәтләрә гапы ачыр вә ејни заманда, инсанын үзәринә мәсулијјәт гојур. Вәфтиз олундуғунуз ҝүн сизә нөвбәти суалла мүраҹиәт олунмушду: «Иса Мәсиһин гурбанлығы әсасында ҝүнаһларындан төвбә етмисәнми вә Јеһованын ирадәсини јеринә јетирмәк үчүн өзүнү Она һәср етмисәнми?» Сиз бу суала «бәли» дејә ҹаваб вердиниз вә вәфтиз олундунуз. Бу, һәјатынызы Јеһоваја һәср етдијинизин символу иди. Һәјатынызы Јеһоваја һәср етмәклә Ону һәмишә севәҹәјинизә вә Онун ирадәсини һәр  шејдән үстүн тутаҹағыныза сөз вермишдиниз. Бу, чох ҹидди әһддир. Бу әһд һеч вахт инсана пешманчылыг ҝәтирмәз. Чүнки һәјатыны Јеһоваја етибар етмәк әсла јанлыш гәрар ола билмәз. Инди ҝәлин, мәсәләјә башга тәрәфдән бахаг. Әҝәр инсан һәјатыны Јеһовасыз јашајырса, Шејтанын гулу олур. Шејтан исә, билдијимиз кими, инсанын хиласы үчүн чалышмыр. Әксинә, о, сизин Јеһовадан үз чевириб онун тәрәфини тутмағынызы, бунунла да әбәди һәјатдан мәһрум олмағынызы истәјир.

3. Һәјатыны Јеһоваја һәср етмәк инсана һансы немәтләри бәхш едир?

³ Өзүнүзү Јеһоваја һәср едиб вәфтиз олмагла һансы немәтләрә саһиб олдуғунуз барәдә дүшүнүн. Һәјатынызы Јеһованын әлләринә әманәт етдијиниз үчүн даһа бөјүк әминликлә дејә биләрсиниз: «Јеһова мәним тәрәфимдәдир, горхмарам, инсан мәнә нә едә биләр?» (Зәб. 118:6). Бәли, Јеһованын тәрәфиндә олмаг вә Онун разылығыны газанмаг гәдәр бөјүк хошбәхтлик ола билмәз.

4, 5. а) Нәјә ҝөрә һәр кәс фәрди олараг Аллаһла мүнасибәт гурмалыдыр? б) Јашындан асылы олмајараг, һәр бир мәсиһи һансы чәтинликләрлә үзләшир?

⁴ Команда ојунларында гәләбә газанан тәрәфин һәр бир үзвү дә галиб сајылыр. Аллаһла мүнасибәтимиздә исә бу белә дејил. Аиләнин һәр бир үзвү фәрди олараг Аллаһла мүнасибәт гурмалыдыр. Бу исә о демәкдир ки, вәфтиз олунмуш мәсиһи кими, сиз өз хиласыныза өзүнүз ҹавабдеһсиниз, һәтта валидејнләринизлә јашасаныз белә. Бу чох ваҹибдир, чүнки сиз ҝәләҹәкдә һансы чәтинликләрлә үзләшәҹәјинизи билмирсиниз. Мәсәлән, ҝөтүрәк ушаг вахты вәфтиз олан мәсиһиләри: артыг јенијетмә јашында онлар фәргли һиссләр јашајыр, фәргли сынагларла үзләширләр. Бунунла бағлы бир јенијетмә баҹы дејир: «Ушаг оланда синиф јолдашынын ад ҝүнү тортундан јејә билмәдијинә ҝөрә, адәтән, инсан пис олмур. Амма бир нечә ил сонра, ҹинси истәкләрин ҝүҹлү олдуғу дөврдә тәслим олмамаг үчүн артыг сәнә әминлик лазымдыр; сән әмин олмалысан ки, Јеһованын ганунларына итаәт етмәк ән доғру сечимдир».

⁵ Иманы сынаға чәкән јени чәтинликләрлә јалныз ҝәнҹләр үзләшмир. Јеткин јашда вәфтиз олан мәсиһиләр дә һеч вахт растлашмадыглары бир чох чәтинликләр јашајыр. Бу, аилә, сәһһәт, иш вә саирлә бағлы проблемләр ола биләр. Ҝөрүндүјү кими, јашындан асылы олмајараг, һәр бир мәсиһи Јеһоваја сәдагәтини сынајан проблемләрлә гаршылаша биләр (Јаг. 1:12—14).

6. а) Һансы мәнада Јеһова илә бағладығымыз әһд гејд-шәртсиздир? б) Филиппилиләрә 4:11—13 ајәләриндән нә өјрәнирик?

⁶ Истәнилән сынаг гаршысында Јеһоваја садиг галмаг истәјирсинизсә, Онунла гејд-шәртсиз әһд бағладығынызы унутмајын. Сиз Каинатын Һөкмдары Јеһова Аллаһа сөз вермисиниз ки, һәмишә Она садиг галаҹагсыныз, һәтта, валидејнләриниз, достларыныз Ондан дөнсә белә (Зәб. 27:10). Јеһованын көмәји илә сиз һәр бир вәзијјәтдә вердијиниз сөзүн үстүндә дура биләрсиниз. (Филиппилиләрә 4:11—13 ајәләрини охујун.)

7. «Горху вә еһтирамла хиласа јетишмәјә чалыш»маг нә демәкдир?

⁷ Јеһова сизинлә дост олмаг истәјир. Амма бу достлуғу горумаг вә хиласа јетишмәк үчүн ҝүҹ сәрф етмәк лазымдыр. Филиппилиләрә 2:12 ајәси бу фикри тәсдигләјир. Орада дејилир: «Бундан сонра да горху вә еһтирамла хиласа јетишмәјә чалышын». Бу ајәдән ҝөрүнүр ки, һәр бир чәтинликдә Јеһова илә достлуғунузу горумаг, Она садиг галмаг үчүн нә едәҹәјинизи јахшы-јахшы дүшүнмәлисиниз. Бу мәсәләдә һеч вахт өзүнүзә архајын олмамалысыныз.  Чүнки бәзән, Аллаһа илләрлә хидмәт едән мәсиһиләр белә, Ондан узаглашыблар. Бәс хиласа јетишмәк үчүн һансы аддымлары атмалысыныз?

8. Фәрди мүталиәјә нә дахилдир вә нәјә ҝөрә мүталиә етмәк мүтләгдир?

⁸ Јеһова илә мөһкәм дост олмаг истәјирсинизсә, Онунла сых үнсијјәт етмәлисиниз. Бу үнсијјәтә динләмәк вә данышмаг дахилдир. Сиз фәрди мүталиә заманы Мүгәддәс Китабы арашдыранда Јеһованы динләмиш олурсунуз. Бунун үчүн Мүгәддәс Китабы вә она әсасланан нәшрләри охујуб тәһлил етмәлисиниз. Амма буна мәктәб дәрсләри кими јанашмајын. Бу, имтаһандан кечмәк үчүн мәлуматы әзбәрләмәјә бәнзәмәмәлидир. Сәмәрәли мүталиә даһа чох тәдгигат ишинә бәнзәјир. Бу заман сиз Јеһованын варлығынын јени јөнләрини бир нөв «кәшф едирсиниз». Бунун сајәсиндә сиз Јеһоваја, Јеһова да сизә јахынлашаҹаг (Јаг. 4:8).

9. Һансы вәсаитләр мүталиәни зәнҝинләшдирә биләр?

⁹ Тәшкилатымыз сиз ҝәнҹләр үчүн чох сајда вәсаитләр тәгдим едиб ки, мүталиәни сәмәрәли кечирә биләсиниз. Мисал үчүн, jw.org сајтынын «Јенијетмәләр» бөлмәсиндәки «Аллаһын Кәламындан билијини артыр» рубрикасы сизә Мүгәддәс Китаб һадисәләриндән дәрс ҝөтүрмәјә көмәк едә биләр. Һәмчинин сиз сајтын «Мүгәддәс Китаб нә өјрәдир?» бөлмәсиндәки чалышма вәрәгәләри васитәсилә иманынызы мөһкәмләндирә вә башгаларына инанҹларыныз барәдә доғру шәкилдә данышмағы өјрәнә биләрсиниз. Бундан башга «Ојанын!» журналынын 2009-ҹу ил, апрел сајында дәрҹ олунан «Ҝәнҹләрин суаллары. Мүгәддәс Китабы охумағы неҹә мараглы едим?» адлы мәгаләдә (түрк.) мүталиә илә бағлы фајдалы мәсләһәтләр тапа биләрсиниз. Бир сөзлә, хиласа јетишмәк үчүн мүталиә етмәк ваҹибдир. (Зәбур 119:105 ајәсини охујун.)

10. Нәјә ҝөрә дуа етмәк мәсиһи үчүн мүтләгдир?

¹⁰ Артыг гејд олундуғу кими, мүталиә едәндә биз Јеһованы динләјирик. Онунла данышмаг үчүн исә дуа етмәк лазымдыр. Биз дуаја, садәҹә бир ајин, јахуд арзуларымызы јеринә јетирән «сеһрли чубуг» кими јанашмамалыјыг. Дуа Јараданымызла реал үнсијјәт гурмаг үчүн васитәдир.  Әмин олун, Јеһова сизи динләмәјә һазырдыр. (Филиппилиләрә 4:6 ајәсини охујун.) Мүгәддәс Китаб бизи истәнилән проблемлә гаршылашанда «гајғы јүкүнү Јеһоваја вер»мәјә сәсләјир (Зәб. 55:22). Бәс дуанын ҝүҹүнә инанырсыныз? Милјонларла баҹы-гардашымыз шәхси тәҹрүбәсиндән дуанын инсана көмәк етдијини тәсдиг едә биләр. Сиз дә дуа един вә нәтиҹәсини ҝөрүн!

11. Нәјә ҝөрә Јеһоваја һәмишә миннәтдарлыг билдирмәк лазымдыр?

¹¹ Дуа әнамы јалныз Јеһовадан көмәк истәмәк үчүн верилмәјиб. Дуада һәмчинин Она шүкранларымызы да билдирмәлијик. Мүгәддәс Китабда дејилир: «Шүкүр едәнләрдән олун» (Кол. 3:15). Бәзән башымыз проблемләрә о гәдәр гарышыр ки, һәјатымыздакы јахшы шејләри ҝөрә билмирик. Буна ҝөрә дә, гаршыныза белә бир мәгсәд гојун: һәр ҝүн шүкүр етмәк үчүн ән азы үч сәбәб тапын вә дуада Јеһоваја миннәтдарлығынызы билдирин. 12 јашында вәфтиз олунмуш Абигаил адлы бир јенијетмә баҹымыз дејир: «Биз һәјатда һамыдан чох Јеһоваја миннәтдар олмалыјыг. Һәр фүрсәтдә вердији немәтләрә ҝөрә Она миннәтдарлығымызы билдирмәлијик. Бир дәфә ешитдијим мараглы бир фикир мәни дүшүнмәјә вадар етмишди: “Бу ҝүн Јеһоваја шүкран билдирмәдијимиз немәтләр сабаһ јухудан ојананда јоха чыхсајды, әлимиздә нә галарды *?”»

12, 13. Јеһованын шәхсән сизә ҝөстәрдији кәрамәт барәдә дүшүнмәк нәјә ҝөрә ваҹибдир?

¹² Аллаһын көмәји илә бир чох бәлалардан гуртулмуш Давуд падшаһ бир мәзмурда белә јазмышды: «Дадын, ҝөрүн неҹә ҝөзәлдир Јеһова, Она сығынан нә бәхтијардыр!» (Зәб. 34:8). Бу ајә ҝөстәрир ки, Јеһованын кәрамәтини шәхсән дадмаг чох ваҹибдир. Јеһова хидмәтчиләринә Она садиг галмаға көмәк едир. Буну тәсдиг едән һадисәләри Мүгәддәс Китабдан вә нәшрләримиздән охујур, ибадәт ҝөрүшләриндә ешидирик. Амма руһани ҹәһәтдән јеткинләшдикҹә чалышын, Јеһованын шәхсән сизә неҹә көмәк етдијини ҝөрәсиниз. Һеч дүшүнмүсүнүз, Јеһова кәрамәтини шәхсән сизә неҹә ҝөстәриб?

¹³ Јеһованын кәрамәтинин бир јөнү вар ки, ону мәсиһиләрин һамысы дадыб. Јеһова бизи Өзү вә Оғлу илә дост олмаға дәвәт едиб. Иса Мәсиһ демишди: «Әҝәр мәни ҝөндәрмиш Атам ҹәлб етмәсә, һеч ким мәним ардымҹа ҝәлә билмәз» (Јәһ. 6:44). Бу ајәни өзүнүзә аид едә билирсиниз? Ҝәнҹләр дејә биләр ки, Јеһова мәним валидејнләрими ҹәлб едиб, мән исә, садәҹә, онларын јолу илә ҝедирәм. Амма сиз һәјатынызы Јеһоваја һәср едиб вәфтиз олмагла Онунла шәхси мүнасибәтләр гурмусунуз. Инди О, сизи валидејнләринизә ҝөрә јох, өзүнүзә ҝөрә таныјыр. Мүгәддәс Китаб бизи әмин едир: «Ким Аллаһы севирсә, Аллаһ ону таныјыр» (1 Кор. 8:3). Одур ки, Јеһованын тәшкилатындакы јеринизи һәмишә гијмәтләндирин.

14, 15. Тәблиғ етмәк иманынызы неҹә мөһкәмләндирә биләр?

¹⁴ Сиз Јеһованын кәрамәтини һәмчинин тәблиғ етмәклә дада биләрсиниз. Чүнки тәблиғ едәндә Јеһованын көмәјини һисс едәҹәксиниз. Иманыныз барәдә мәктәб јолдашларыныза да даныша биләрсиниз. Һәрдән бәзи ҝәнҹләр һәмјашыдларына тәблиғ етмәјә чәкинир. Јәгин бу һиссләр сизә дә танышдыр. Ола билсин, сиз онларын һансы мүнасибәти ҝөстәрәҹәјини билмәдијиниз үчүн горхурсунуз. Бир нечә нәфәрә бирдән тәблиғ етмәк исә хүсусилә чәтин ола биләр. Бәс бу һиссләри ашмаға сизә нә көмәк едәр?

¹⁵ Әввәла, өјрәндикләринизин һәгигәт  олдуғуна нәјә ҝөрә әмин олдуғунузу мүәјјән един. Jw.org сајтындакы чалышма вәрәгәләри сизин дилдә вармы? Дәгиг билмирсинизсә, бахыб јохлајын. Бу вәрәгәләр сизә нәјә инандығынызы, нијә инандығынызы мүәјјән етмәјә вә етигадынызы башгаларына изаһ етмәјә көмәк едәҹәк. Мөһкәм әминлик вә јахшы һазырлыг сајәсиндә Јеһова һаггында шәһадәт вермәк ичиниздән ҝәләҹәк (Әрм. 20:8, 9).

16. Ҹәсарәтлә тәблиғ етмәјә сизә нә көмәк едә биләр?

¹⁶ Бәзән инсан јахшы һазырлашса да, иманы барәдә данышмаға тәрәддүд едә биләр. 13 јашында вәфтиз олунмуш 18 јашлы баҹымыз дејир: «Инандығым шејләрин һәгигәт олдуғуна әминәм, амма һәрдән фикирләрими ифадә етмәк чох чәтин олур». Бәс бу чәтинлији ашмаға она нә көмәк едир? Баҹы дејир: «Синиф јолдашларым һара ҝетдикләри, нә иш ҝөрдүкләри барәдә раһат данышырлар. Дүшүндүм ки, мән нијә белә данышмајым?! Инди мән дә чалышырам сәрбәст олум; онларла олуб-кечәнләр барәдә сөһбәт едирәм. Мәсәлән, сөһбәтә белә башлајырам: “О ҝүн Мүгәддәс Китаб дәрси кечирдим...” Һәтта данышдығым һадисә сырф Мүгәддәс Китабла бағлы олмаса да, артыг онларда мараг јараныр ки, мән Мүгәддәс Китаб дәрсини неҹә кечирәм. Һәрдән онлар бу барәдә суаллар да верирләр. Бу үсулдан нә гәдәр чох истифадә едирәмсә, данышмаг бир о гәдәр асан олур. Белә сөһбәтләрдән сонра өзүмү әла һисс едирәм!»

17. Сизә инанҹыныз барәдә башгаларына данышмаға даһа нә көмәк едә биләр?

¹⁷ Әҝәр инсанлара һөрмәт ҝөстәрсәниз, онларла сәмими олсаныз, бөјүк еһтимал ки, онлар сизә хош мүнасибәт ҝөстәрәҹәк. Јенијетмә јашында вәфтиз олан 17 јашлы Оливија баҹы дејир: «Һәмишә горхурдум ки, сөһбәт вахты Мүгәддәс Китабдан данышмаға башласам, мәнә фанатик кими бахарлар». Сонра баҹы дүшүнҹәсини дәјишир. Оливија диггәтини өз горхуларына јох, инсанлара ҹәмләмәјә башлајыр. Баҹы дејир: «Әтрафымыздакы ҝәнҹләрин чоху Јеһованын Шаһидләри барәдә һеч нә билмир. Онларын таныдығы јеҝанә Јеһованын Шаһиди бизик. Буна ҝөрә дә, бизим давранышымыз онларын тәблиғимизә мүнасибәтинә тәсир едә биләр. Әҝәр иманымыз барәдә утанараг, горхараг, јахуд сыхыла-сыхыла данышарыгса, онларда елә тәәссүрат јаранар ки, бу јолда олдуғумуз үчүн утанырыг. Һәтта гәтијјәтсизлијимизи ҝөрүб бизимлә кобуд данышарлар. Амма сәрбәст вә әминликлә данышсаг, фикримизи ади сөһбәт шәклиндә чатдырсаг, онларын һөрмәтини газана биләрик».

18. Хиласа јетишмәк үчүн һансы аддымлары атмалысыныз?

¹⁸ Ҝөрдүјүмүз кими, хиласа јетишмәк үчүн шәхсән чалышмағыныз мүтләгдир. Бунун үчүн сиз Мүгәддәс Китабы охумалы, охудугларыныздан нәтиҹә чыхармалы, дуа етмәли, Јеһованын сизә вердији немәтләр барәдә дүшүнмәлисиниз. Бу мәсләһәтләрә әмәл етдикҹә Јеһова илә достлуғун бөјүк шәрәф олдуғуна әминлијиниз артаҹаг. Бу да өз нөвбәсиндә сизи инанҹларыныз барәдә башгаларына данышмаға тәшвиг едәҹәк. (Зәбур 73:28 ајәсини охујун.)

19. Нәјә ҝөрә хиласа јетишмәк үчүн сәј ҝөстәрмәјә дәјәр?

¹⁹ Иса Мәсиһ демишди: «Ким ардымҹа ҝәлмәк истәјирсә, гој өзүнү инкар етсин, ишҝәнҹә дирәјини ҝөтүрүб даима ардымҹа ҝәлсин» (Мәт. 16:24). Сөзсүз ки, Мәсиһин шаҝирди олмаг, һәјатыны Јеһоваја һәср едиб вәфтиз олмаг бөјүк мәсулијјәтдир. Амма бу аддымы атандан сонра сизин гаршынызда сонсуз немәтләрә вә әбәди Ҹәннәт һәјатына гапы ачылыр. Одур ки, ирәли ҝедин, хиласа јетишмәк үчүн әлиниздән ҝәләни един!