1, 2. Мәтта 5:11 ајәсинә әсасән, үзләшдијимиз сынаглара неҹә јанашмалыјыг?

ИСА МӘСИҺ давамчыларынын, сөзүн әсл мәнасында, хошбәхт олаҹағыны вәд етмишди. Бунунла јанашы, хәбәрдар етмишди ки, онлар чәтинликләрлә үзләшәҹәк (Мәт. 10:22, 23; Лука 6:20—23). Биз Исанын шаҝирди олдуғумуз үчүн хошбәхтик. Бәс аиләмиз бизә мане олурса, дөвләт тәрәфиндән тәгибләрә мәруз галырыгса, иш вә ја синиф јолдашымыз бизи пис һәрәкәтләрә вадар едирсә, һансы һиссләри кечиририк? Ола биләр, бу шејләр биздә нараһатлыг доғурур.

² Инсанлар тәгибләрә севиндириҹи бир шеј кими бахмыр. Анҹаг Мүгәддәс Китаб бизә мәһз буну бујурур. Шаҝирд Јагуб јазмышды ки, сынагларла үзләшәркән биз тәлаша дүшмәмәлијик, әксинә, онлары севинҹлә гаршыламалыјыг (Јаг. 1:2, 12). Иса да демишди ки, биз тәгибләрә мәруз галсаг да, хошбәхт олмалыјыг. (Мәтта 5:11 ајәсини охујун.) Бәс сынагларла үзләшәркән севинҹи горумаг неҹә мүмкүндүр? Јагубун биринҹи әсрдәки мәсиһиләрә јазығы мәктубдан бунунла бағлы чох шеј өјрәнә биләрик. Онун јаздығы бәзи фикирләри арашдырмаздан өнҹә ҝәлин ҝөрәк һәмин мәсиһиләр һансы чәтинликләрлә үзләшмишдиләр.

3. Јагуб Исанын шаҝирди оландан гыса мүддәт сонра нәләр баш верди?

³ Исанын гардашы Јагуб шаҝирд оландан гыса мүддәт сонра Јерусәлимдәки мәсиһиләрә гаршы тәгибләр башлады (Һәв. 1:14; 5:17, 18). Шаҝирд Стефан өлдүрүләндән сонра мәсиһиләр «Јәһудијјә вә Сәмәријјә бөлҝәләринә дағылышды». Һәтта бәзиләри даһа узаға, «Кипр вә Антакјаја ҝедиб чыхдылар» (Һәв. 7:58—8:1; 11:19). Сөзсүз ки, онлар чохлу чәтинликләрлә  үзләшмишдиләр. Бүтүн бунлара бахмајараг, онлар ҝетдикләри һәр јердә хош хәбәри ҹанла-башла тәблиғ едирдиләр вә Рома империјасынын бир чох әразиләриндә јығынҹаглар јаранмаға башлады (1 Бут. 1:1). Амма биринҹи әсрдәки мәсиһиләри гаршыда даһа ағыр дөвр ҝөзләјирди.

4. Биринҹи әсрдәки мәсиһиләрин башга һансы чәтинликләри олмушду?

⁴ Биринҹи әсрдәки мәсиһиләрин чәтинликләринин сајы-һесабы јох иди. Мәсәлән, ерамызын тәхминән 50-ҹи илиндә Рома императору «Клавди бүтүн јәһудиләрә Ромадан чыхмағы әмр етмишди». Буна ҝөрә дә мәсиһилији гәбул едән јәһудиләр өз евләрини тәрк едиб, башга јерләрдә јашамаға мәҹбур галмышдылар (Һәв. 18:1—3). Тәхминән ерамызын 61-ҹи илиндә һәвари Булус јазмышды ки, диндашлары ҹамаат гаршысында тәһгир олунур, зиндана атылыр, варлары, јохлары талан олунур (Ибр. 10:32—34). Үстәлик, диҝәр инсанлар кими, бәзи мәсиһиләр дә касыб иди вә хәстәликдән әзијјәт чәкирди (Ром. 15:26; Филип. 2:25—27).

5. Һансы суаллары арашдыраҹағыг?

⁵ Јагуб ерамызын 62-ҹи илиндән өнҹә мәктубуну јазаркән баҹы-гардашларын һансы сынагларла үзләшдијини чох јахшы билирди. Јагуб Јеһованын илһамы илә һәмин мәсиһиләрә сынаглара бахмајараг, севинҹләрини горумаға көмәк едәҹәк бәзи мәсләһәтләр јазмышды. Ҝәлин Јагубун мәктубуна нәзәр салаг вә нөвбәти суалларын ҹавабыны тапаг. Јагуб һансы севинҹдән данышырды? Мәсиһинин севинҹини итирмәсинә нә сәбәб ола биләр? Һикмәт, иман вә ҹәсарәт һансы сынагла үзләшириксә үзләшәк, севинҹимизи горумаға неҹә көмәк едә биләр?

6. Лука 6:22, 23 ајәләринә әсасән, мәсиһиләр сынагларла үзләшәндә нәјә ҝөрә севинә биләр?

⁶ Бәзиләри дүшүнүр ки, сағлам олсалар, чохлу пуллары олса вә јахшы аилә мүнасибәтләри олса, онда хошбәхт оларлар. Амма Јагуб Аллаһын руһунун бәһрәсинин бир һиссәси олан севинҹдән данышырды. Инсанын бу ҹүр севинҹә саһиб олмасы онун вәзијјәтиндән асылы дејил (Гал. 5:22). Мәсиһи Јеһованы разы салдығыны, Исанын нүмунәсини изләдијини билдији үчүн севинҹ, башга сөзлә дәрин хошбәхтлик һисси дујур. (Лука 6:22, 23 ајәләрини охујун; Кол. 1:10, 11.) Севинҹимизи чырағын аловуна бәнзәтмәк олар. Алов чырағын ичиндә олдуғу үчүн о, күләјә вә јағыша рәғмән, јанмаға давам едир. Еләҹә дә бизим һәјатымызда нә баш верирсә версин, севинҹимиз сөнмүр. Хәстә олмағымыз, пулумузун олмамасы севинҹимизин аловуну зәифләтмир. Аилә үзвләри вә ја башгалары тәрәфиндән олунан тәгибләр дә ону сөндүрмүр. Һәр дәфә тәгиблә үзләшәндә бу севинҹ азалмыр, даһа да аловланыр. Үзләшдијимиз иман сынаглары ҝөстәрир ки, биз Мәсиһин әсл шаҝирдләријик (Мәт. 10:22; 24:9; Јәһ. 15:20). Елә буна ҝөрә дә Јагуб јазмышды: «Гардашлар, үзләшдијиниз мүхтәлиф сынаглары севинҹлә гаршылајын» (Јаг. 1:2).

7, 8. Сынаглар нәтиҹәсиндә иманымыз неҹә мөһкәмләнир?

⁷ Јагуб мәсиһиләрин һәтта ағыр сынаглара таб ҝәтирмәјә һазыр олмасынын даһа бир сәбәбини изаһ едир. О јазыр: «Сынанмыш иманыныз сиздә дөзүм һасил едир» (Јаг. 1:3). Сынаглары поладдан кәсиҹи аләт дүзәлтмәк үчүн истифадә олунан ода бәнзәтмәк олар. Полады һәр дәфә гыздырыб сојутдугҹа даһа да мөһкәм олур. Ејнилә дә, биз сынагларла үзләшәндә иманымыз мөһкәмләнир. Мәһз буна ҝөрә дә Јагуб јазмышды: «Гој дөзүм өз ишини тамамласын ки, сиз камил вә һәр ҹәһәтдән сағлам оласыныз» (Јаг. 1:4). Сынагларын иманымызы мөһкәмләндирдијини ҝөрәндә онлара севинҹлә таб ҝәтирә биләҹәјик.

⁸ Јагуб һәмчинин мәктубунда ҝөстәрмишди ки, нәләр севинҹимизи итирмәјимизә ҝәтириб чыха биләр. Инди исә ҝәлин бу манеәләр һагда данышаг вә ҝөрәк онлары неҹә аша биләрик.

9. Нәјә ҝөрә бизә һикмәт лазымдыр?

⁹ Манеә: нә етмәли олдуғумузу билмәмәк. Чәтинликләрлә үзләшән заман биз Јеһованы разы салаҹаг, баҹы-гардашлара фајда ҝәтирәҹәк вә сәдагәтимизи горумағымыза көмәк едәҹәк һикмәтли гәрарлар вермәк истәјирик (Әрм. 10:23). Дүзҝүн давранмаг вә бизи тәгиб едәнләрә дүзҝүн ҹаваб верә билмәк үчүн бизә һикмәт лазымдыр. Нә едәҹәјимизи билмәсәк, өзүмүзү вәзијјәтин  гурбаны кими һисс едәҹәјик вә асанлыгла севинҹимизи итирәҹәјик.

10. Јагуб 1:5 ајәсинә әсасән, һикмәт саһиби олмаг үчүн биз нә етмәлијик?

¹⁰ Чыхыш јолу: Јеһовадан һикмәт диләјин. Чәтинликләрә севинҹлә таб ҝәтирмәк үчүн әввәла Јеһоваја дуа етмәлијик. Ондан һикмәт диләмәлијик ки, бизә дүзҝүн гәрар вермәјә көмәк етсин. (Јагуб 1:5 ајәсини вә һашијәни охујун.) Бәс Јеһованын дуаларымыза дәрһал ҹаваб вермәдијини дүшүнүрүксә, онда неҹә? Јагуб гејд едир ки, биз даима диләмәлијик. Бизим Јеһовадан даима һикмәт диләмәјимиз Ону бездирмир. Буна ҝөрә О бизә аҹыгланмајаҹаг. Бизим сәмави Атамыз Ондан һикмәт диләјәнә «сәхавәтлә» верир (Зәб. 25:12, 13). О, вәзијјәтимиздән аҝаһдыр, бизә үрәји јаныр, бизә көмәк етмәји чох истәјир. Әлбәттә ки, буну билмәк бизә бөјүк севинҹ бәхш едир! Бәс Јеһова бизә һикмәти һансы јолла верир?

11. Һикмәтә јијәләнмәк үчүн даһа нә етмәлијик?

¹¹ Јеһова бизә Өз Кәламы васитәсилә һикмәт верир (Мәс. 2:6). Бунун үчүн биз Аллаһын Кәламыны вә она әсасланан нәшрләри мүталиә етмәлијик. Амма мәгсәдимиз садәҹә билик топламаг олмалы дејил. Биз Аллаһын мәсләһәтинә әмәл етмәклә Онун һикмәтинин һәјатымыза јөн вермәсинә имкан вермәлијик. Јагуб јазмышды: «Һәм дә сөзүн иҹрачысы олун,.. ону тәкҹә ешитмәклә кифајәтләнмәјин» (Јаг. 1:22). Биз Аллаһын мәсләһәтинә әмәл едәндә даһа сүлһпәрвәр, мүлајим вә мәрһәмәтли олуруг (Јаг. 3:17). Бу мәсләһәтләр бизә истәнилән сынаға севинҹимизи итирмәдән таб ҝәтирмәјә көмәк едир.

12. Аллаһын Кәламына јахшы бәләд олмаг нәјә ҝөрә ваҹибдир?

¹² Аллаһын Кәламы ҝүзҝү кимидир. Зәиф ҹәһәтләримизи ҝөрмәјә көмәк едир вә онлары дүзәлтмәјин јолларыны өјрәдир (Јаг. 1:23—25). Тутаг ки, Аллаһын Кәламыны  мүталиә едәндә ҝөрүрүк ки, биздә тәмкин чатышмыр. Јеһованын көмәјилә биз мүлајим олмағын јолларыны өјрәнирик. Беләҹә, һансыса инсан вә ја проблем уҹбатындан бизи өзүмүздән чыхараҹаг вәзијјәт јарананда неҹә давранаҹағымызы билирик. Биз мүлајим оланда ҝәрҝин вәзијјәтин өһдәсиндән даһа јахшы ҝәлирик, даһа ајдын дүшүнүрүк вә даһа јахшы гәрарлар веририк (Јаг. 3:13). Ҝөрүн Аллаһын Кәламына јахшы бәләд олмаг неҹә ваҹибдир!

13. Нәјә ҝөрә Мүгәддәс Китабда адлары чәкилән шәхсләрин нүмунәсинә нәзәр салмалыјыг?

¹³ Бәзән биз сәһв едәндән сонра баша дүшүрүк ки, о һәрәкәти етмәмәли идик. Өз аҹы тәҹрүбәмиздән өјрәнмәкдәнсә, јахшы олар ки, башгаларына бахаг, онларын һәм сәһвләриндән, һәм дә дүзҝүн гәрарларындан нәтиҹә чыхараг. Елә бу сәбәбдән Јагуб бизи Ибраһим, Раһаб, Әјјуб, Илјас кими мөмин инсанларын нүмунәсинә нәзәр салмаға тәшвиг едир (Јаг. 2:21—26; 5:10, 11, 17, 18). Онлар севинҹләринә әнҝәл олаҹаг сынаглары аша билмишдиләр. Бу дөзүм өрнәкләри ҝөстәрир ки, Јеһованын көмәји илә биз дә баҹарарыг.

14, 15. Нәјә ҝөрә үрәјимиздәки шүбһәләри арадан галдырмалыјыг?

¹⁴ Манеә: арадан галдырылмајан шүбһәләр. Бәзән елә ола биләр ки, Аллаһын Кәламында јазылмыш һансыса фикри баша дүшмәјә чәтинлик чәкәк. Јахуд елә ола биләр ки, дуа етмишик, амма Јеһова дуамыза истәдијимиз кими ҹаваб вермәјиб. Бу да үрәјимиздә шүбһәләр јарада биләр. Әҝәр бу шүбһәләрә әһәмијјәт вермәсәк, иманымыз зәифләјәр вә Јеһова илә мүнасибәтимиз корлана биләр (Јаг. 1:7, 8). Ҝәләҹәјә олан үмидимизи итирә биләрик.

¹⁵ Һәвари Булус ҝәләҹәјә олан үмидимизи лөвбәрә бәнзәтмишди (Ибр. 6:19). Лөвбәр фыртына заманы ҝәмини сабит сахлајыр вә онун гајалара чырпылмасынын гаршысыны алыр. Амма ҝәрәк лөвбәри ҝәмијә бирләшдирән зәнҹир мөһкәм олсун. Пас зәнҹири јејәрсә, лөвбәр јарарсыз олар. Ејнилә шүбһәләр дә иманымызы зәифләдә биләр. Шүбһәләри олан инсан тәгибләрлә үзләшән заман Јеһованын Өз вәдини јеринә јетирәҹәјинә иманыны итирә биләр. Иманымызы итирсәк, үмидимизи итирәҹәјик. Јагубун да дедији кими, «шүбһә едән адам күләјин галдырыб ора-бура чырпдығы дәниз далғасына бәнзәр» (Јаг. 1:6). Белә инсан чәтин ки севинҹ дујсун!

16. Үрәјимиздә шүбһәләр варса, нә етмәлијик?

¹⁶ Чыхыш јолу: үрәјиниздәки шүбһәләри арадан галдырын, иманынызы ҝүҹләндирин. Гәтијјәтсиз олмајын. Илјас пејғәмбәрин дөврүндә Јеһованын халгы гәтијјәтсиз олмушду. Илјас онлара демишди: «Нә вахта гәдәр ики тәрәфә әјиләҹәксиниз? Әҝәр Јеһова Аллаһдырса, Онун далынҹа ҝедин. Јох әҝәр Баал Аллаһдырса, онда онун далынҹа ҝедин!» (1 Пад. 18:21). Бу бизә дә аиддир. Биз мүталиә едиб, әмин олмалыјыг ки, доғрудан да Јеһова вар олан Аллаһдыр, Мүгәддәс Китаб Онун Кәламыдыр вә Јеһованын Шаһидләри Онун халгыдыр (1 Салон. 5:21). Бунун сајәсиндә шүбһәләримиз арадан галхаҹаг вә иманымыз ҝүҹләнәҹәк. Әҝәр шүбһәләри дәф етмәк үчүн көмәјә еһтијаҹымыз варса, ағсаггаллара мүраҹиәт едә биләрик. Биз Јеһоваја хидмәтдә севинҹимизи горумаг үчүн гәти аддымлар атмалыјыг!

17. Ҹәсарәтимизи итирсәк, нә баш верәр?

¹⁷ Манеә: руһдан дүшмәк. Аллаһын Кәламында дејилир: «Дар ҝүндә руһдан дүшсән, ҝүҹүн түкәнәр» (Мәс. 24:10). «Руһдан дүшмәк» кими тәрҹүмә олунан ибрани сөзү һәмчинин «ҹәсарәтини итирмәк» мәнасыны верир. Ҹәсарәтинизи итирсәниз, чох кечмәмиш севинҹинизи дә итирәҹәксиниз.

18. Дөзүм ҝөстәрмәк нә демәкдир?

 ¹⁸ Чыхыш јолу: Јеһованын сизә дөзүмлү олмаг үчүн ҹәсарәт верәҹәјинә бел бағлајын. Сынаглара дөзмәк үчүн ҹәсарәтли олмалыјыг (Јаг. 5:11). Јагубун истифадә етдији «дөзүм» сөзү «инсанын мөвгејиндә сарсылмаз галмасы» фикрини верир. Буну јахшы баша дүшмәк үчүн ағлымызда дүшмәнин амансыз тәгибләринә бахмајараг, өз јериндә ҹәсарәтлә дајанан әсҝәри ҹанландыра биләрик.

19. Һәвари Булусдан нә өјрәнирик?

¹⁹ Һәвари Булус ҹәсарәтлә дөзүм ҝөстәрмәкдә мөһтәшәм нүмунәдир. Бәзән о өзүнү зәиф һисс етсә дә, Јеһованын она лазыми ҝүҹү верәҹәјинә бел бағладығы үчүн сынаглар гаршында дөзүм ҝөстәрә билирди (2 Кор. 12:8—10; Филип. 4:13). Биз дә тәвазөкарлыгла гәбул етсәк ки, Јеһованын көмәјинә еһтијаҹымыз вар, мөһкәм вә ҹәсарәтли ола биләрик (Јаг. 4:10).

20, 21. Нәјә әмин ола биләрик?

²⁰ Архајын ола биләрик ки, үзләшдијимиз сынаглар Јеһованын ҹәзасы дејил. Јагуб бизи әмин едир: «Сынагларла үзләшәндә гој һеч кәс: “Аллаһ мәни сынаға чәкир”, — демәсин, чүнки Аллаһ һеч кәси писликлә сынамыр вә Онун Өзүнү дә писликлә сынамаг мүмкүн дејил» (Јаг. 1:13). Сынагларын Јеһовадан олмадығына там инансаг, Она даһа да јахын олаҹағыг (Јаг. 4:8).

²¹ Јеһова «дәјишкән дејил» (Јаг. 1:17). О, биринҹи әсрдәки мәсиһиләрә сынаглар заманы дајаг олдуғу кими, бизим дә һәр биримизә дајаг олаҹаг. Үрәкдән дуа едиб, Јеһовадан һикмәт, иман вә ҹәсарәт диләјин. О сизин дуаныза ҹаваб верәҹәк. Беләҹә, әмин олаҹагсыныз ки, сынагларла үзләшәркән Јеһова севинҹинизи горумаға көмәк едәҹәк!