1. 3 Јәһја 3, 4 ајәләринә әсасән, бизи севиндирән нәдир?

ҺӘВАРИ ЈӘҺЈА чохларына һәгигәти өјрәнмәјә көмәк етмишди. Тәсәввүр етмәк олар, онларын һәлә дә Јеһоваја сәдагәтлә хидмәт етдијини ешидәндә о нә гәдәр севинмишди. Амма онлар чохлу проблемләрлә үзләширдиләр. Буна ҝөрә дә Јәһја өвлады кими јанашдығы бу садиг мәсиһиләрин иманыны мөһкәмләндирмәк үчүн әлиндән ҝәләни едирди. Биз дә доғма өвладымызын, јахуд һәгигәти өјрәтдијимиз инсанын Јеһоваја һәср олундуғуну вә Она хидмәти давам етдирдијини ҝөрәндә севинирик. (3 Јәһја 3, 4 ајәләрини охујун.)

2. Һәвари Јәһјанын мәктубларынын мәгсәди нә иди?

² Чох јәгин ки, һәвари Јәһја ерамызын 98-ҹи илиндә ја Ефесдә, ја да онун јахынлығында јашајырды. Ҝөрүнүр, о, сүрҝүндә олдуғу Патмос адасындан гајыдандан сонра ораја көчмүшдү. Тәхминән һәмин вахтларда Јеһова мүгәддәс руһу илә ону үч мәктуб јазмаға јөнәлтмишди. Бу мәктубларын мәгсәди садиг мәсиһиләри Иса Мәсиһә иманларыны горумаға вә һәгигәт јолунда јеримәјә һәвәсләндирмәк иди.

3. Һансы суалларын ҹавабыны тапаҹағыг?

³ Јәһја сағ галмыш сонунҹу һәвари иди. Сахта тәлимләрин јығынҹаглара сирајәт етмәси ону чох нараһат едирди * (1 Јәһ. 2:18, 19, 26). Дөнүкләр Аллаһы таныдыгларыны иддиа етсәләр дә, Онун әмрләринә әмәл етмирдиләр. Ҝәлин Јәһјанын мәктубунда јазылан мәсләһәти арашдыраг. Бу мәгаләдә нөвбәти суалларын ҹавабыны тапаҹағыг: Һәгигәт јолунда јеримәк нә демәкдир? Һансы манеәләрлә үзләширик? Бир-биримизә һәгигәтдә јеримәјә неҹә көмәк едә биләрик?

4. 1 Јәһја 2:3—6 вә 2 Јәһја 4, 6 ајәләринә әсасән, һәгигәт јолунда јеримәк үчүн нә етмәлијик?

⁴ Һәгигәт јолунда јеримәк үчүн биз Мүгәддәс Китабда јазылан һәгигәти билмәлијик. Бундан әлавә, Јеһованын әмрләринә риајәт етмәлијик. (1 Јәһја 2:3—6; 2 Јәһја 4, 6 ајәләрини охујун.) Иса Мәсиһ Јеһоваја итаәт етмәкдә камил өрнәк гојуб. Одур ки, Јеһоваја итаәт етмәјин ваҹиб үсулларындан бири Исанын нүмунәсини мүмкүн гәдәр дәгигликлә изләмәкдир (Јәһ. 8:29; 1 Бут. 2:21).

5. Нәјә әмин олмалыјыг?

⁵ Даим һәгигәт јолунда јеримәк үчүн биз әмин олмалыјыг ки, һәгигәтин мәнбәји Јеһовадыр вә Онун Кәламында јазыланлар доғрудур. Һәмчинин вәд олунмуш Мәсиһин Иса олдуғуна әмин олмалыјыг. Бу ҝүн чохлары Исанын Аллаһын Падшаһлығынын Падшаһы олдуғуну шүбһә алтына алыр. Јеһова вә Иса Мәсиһ һаггында һәгигәти мүдафиә едә билмәјәнләри, Јәһјанын да хәбәрдарлыг етдији кими, јолдан чыхаран «чохлу јаланчы» вар (2 Јәһ. 7—11). Јәһја јазырды: «Исанын Мәсиһ олдуғуну инкар едән јаланчы дејилсә, бәс нәдир?» (1 Јәһ. 2:22). Бу јаланын гурбаны олмамағын јеҝанә јолу Аллаһын Кәламыны мүталиә етмәкдир. Јалныз бу тәгдирдә Јеһованы вә Иса Мәсиһи таныјаҹағыг (Јәһ. 17:3). Јалныз бу тәгдирдә һәгигәтдә јеридијимизә әмин олаҹағыг.

6. Ҝәнҹ мәсиһиләрин үзләшдији манеәләрдән бири һансыдыр?

⁶ Бүтүн мәсиһиләр еһтијатлы олмалыдыр ки, инсан фикирләри онлары јолдан чыхармасын (1 Јәһ. 2:26). Хүсусилә дә ҝәнҹләр өзләрини бу тәләдән ҝөзләмәлидир. Франсадан олан 25 јашлы Алексија * баҹы дејир: «Јенијетмә јашларымда тәкамүл тәлими вә инсан фәлсәфәси фикирләрими гарышдырмышды. Бәзән бу мөвзулар мәндә мараг доғурурду. Амма фикирләшдим ки, дәрсдә дејиләнләрә гулаг асыб, Јеһованын Мүгәддәс Китаб васитәсилә нә дедијинә гулаг асмамаг дүз дејил». Алексија «Һәјат неҹә әмәлә ҝәлиб? Тәкамүл, јохса јарадылма  јолу илә?» * адлы китабы мүталиә етди. Бир нечә һәфтә сонра онун шүбһәләриндән әсәр-әламәт галмады. Алексија дејир: «Арашдырыб әмин олдум ки, Мүгәддәс Китабда јазыланлар һәгигәтдир. Һәмчинин анладым ки, орада јазыланлара ујғун јашамаг мәнә севинҹ вә гәлб раһатлығы бәхш едәҹәк».

7. Һәр биримиз һансы саһәдә еһтијатлы олмалыјыг вә нәјә ҝөрә?

⁷ Гоҹалы-ҹаванлы бүтүн мәсиһиләр еһтијатлы олмалыдырлар ки, икили һәјат сүрмәсинләр. Һәвари Јәһја гејд етмишди ки, һәм әхлагсыз һәјат сүрмәк, һәм дә һәгигәт јолунда јеримәк мүмкүн дејил (1 Јәһ. 1:6). Јеһованын инди дә, ҝәләҹәкдә дә биздән разы галмасыны истәјириксә, һәмишә елә давранмалыјыг ки, санки кимсә бизи мүшаһидә едир. Әслиндә, ҝизли ҝүнаһ анлајышы јохдур, чүнки Јеһова һәр шеји ҝөрүр (Ибр. 4:13).

8. Һансы бахышы мәнимсәмәмәлијик?

⁸ Биз бу дүнјанын ҝүнаһа бахышыны мәнимсәмәмәлијик. Һәвари Јәһја јазмышды: «Әҝәр: “Биздә ҝүнаһ јохдур”, — дејириксә, онда өзүмүзү алдадырыг» (1 Јәһ. 1:8). Јәһјанын дөврүндә дөнүкләр иддиа едирдиләр ки, инсан ҝүнаһлы һәјат сүрсә дә, Аллаһла јахын ола биләр. Бизим дөврдә дә инсанлар бу ҹүр дүшүнүр. Чохлары Аллаһа инандығыны десә дә, Онун ҝүнаһа бахышы илә разы дејил, әләлхүсус да ҹинси мүнасибәт мәсәләсиндә. Онлар Јеһованын ҝүнаһ сајдығы әмәлләри шәхси сечим вә ја алтернатив һәјат тәрзи адландырыр.

9. Мүгәддәс Китаба әсасланан әгидәләринә бағлы галмағын ҝәнҹләрә һансы фајдасы вар?

⁹ Хүсусилә ҝәнҹ мәсиһиләрә мәктәб вә ја иш јолдашларынын ҹинси мүнасибәтлә бағлы јанлыш фикирләринин тәсири алтына дүшмәмәк  чәтиндир. Александр адлы бир гардаш бу ҹүр сынагла үзләшмишди. О дејир: «Мәктәбдә бир нечә гыз мәни онларла ҹинси мүнасибәтдә олмаға тәһрик едирди. Онлар дејирди ки, “әҝәр сәнин ҝөрүшдүјүн гыз јохдурса, демәли, һомосексуалсан”». Сизин дә бу ҹүр сынагларыныз варса, унутмајын ки, Мүгәддәс Китаба әсасланан әгидәнизә бағлы галсаныз, өзүнүзә гаршы һөрмәти итирмәјәҹәксиниз, физики вә мәнәви сағламлығынызы, еләҹә дә Јеһова илә мүнасибәтләринизи горујаҹагсыныз. Һәр дәфә сынагдан башыуҹа чыхдыгҹа, дүзҝүн давранмаг асанлашаҹаг. Бир шеји дә унутмајын ки, дүнјанын ҹинси мүнасибәтә тәһриф олунмуш бахышы Шејтандан гајнагланыр. Одур ки, бу бахышы рәдд едәндә она галиб ҝәлирсиниз (1 Јәһ. 2:14).

10. 1 Јәһја 1:9 ајәси Јеһоваја тәмиз виҹданла хидмәт етмәјимизә неҹә тәкан верир?

¹⁰ Биз дәрк едирик ки, һансы әмәлин ҝүнаһ олдуғуну тәјин етмәк һүгугу Јеһоваја мәхсусдур. Һәмчинин әлимиздән ҝәләни едирик ки, ҝүнаһ етмәјәк. Ҝүнаһ ишләмишиксә, дуа едиб ҝүнаһымызы Аллаһа етираф етмәлијик. (1 Јәһја 1:9 ајәсини охујун.) Әҝәр ағыр ҝүнаһ етмишиксә, Јеһованын гејдимизә галмаг үчүн тәјин етдији ағсаггаллардан көмәк истәмәлијик (Јаг. 5:14—16). Амма кечмиш сәһвләримизә ҝөрә өзүмүзү јејиб-битирмәмәлијик. Чүнки меһрибан Атамыз ҝүнаһларымызын әфви үчүн Иса Мәсиһи гурбан вериб. Јеһова дејирсә ки, төвбә едән ҝүнаһкары бағышлајаҹаг, демәли, бағышлајаҹаг. Буна ҝөрә дә Јеһоваја тәмиз виҹданла хидмәт етмәјимизә мане олан һеч нә јохдур (1 Јәһ. 2:1, 2, 12; 3:19, 20).

11. Иманымыза тәһлүкә јарадан тәлимләрдән өзүмүзү неҹә горуја биләрик?

¹¹ Биз дөнүк тәлимләри рәдд етмәлијик. Мәсиһи јығынҹағынын әсасы гојуландан  бәри Иблис чохлу јаланчылар васитәсилә Аллаһын садиг хидмәтчиләринин ағлына шүбһә тохумлары сәпмәјә чалышыр. Бу сәбәбдән, һәгигәти јаландан ајырд етмәји баҹармалыјыг *. Дүшмәнләримиз интернетдән вә ја сосиал шәбәкәләрдән истифадә едәрәк Јеһоваја етибарымызы сарсытмаға вә гардашларымыза мәһәббәтимизи сојутмаға чалышыр. Бунларын архасында кимин дурдуғуну унутмајаг вә она гаршы дураг! (1 Јәһ. 4:1, 6; Вәһј 12:9).

12. Нә үчүн өјрәндијимиз һәгигәтләрә иманымызы артырмалыјыг?

¹² Шејтанын бүтүн бу ҹәһдләринә гаршы дурмаг үчүн Иса Мәсиһә вә онун Аллаһын нијјәтиндәки ролуна иманымызы артырмалыјыг. Һәмчинин етибар етмәлијик ки, Јеһова јалныз садиг вә ағыллы нөкәр васитәсилә тәшкилатыны идарә едир (Мәт. 24:45—47). Етибарымызы артырмаг үчүн Аллаһын Кәламыны мүнтәзәм мүталиә етмәк лазымдыр. Онда иманымыз дәринә көк салмыш ағаҹ кими мөһкәм олаҹаг. Һәвари Булус Колос јығынҹағына јаздығы мәктубда белә бәнзәтмә истифадә етмишди: «Ағамыз Мәсиһ Исаны гәбул етдијиниз кими, бундан сонра да онунла вәһдәтдә јеријин... Исада көк атыб бөјүјүн, иманда сарсылмаз олун» (Кол. 2:6, 7). Мәсиһи иманыны јахшы мөһкәмләндирибсә, Шејтан вә тәрәфдарлары ону сарсытмаға мүвәффәг олмајаҹаг (2 Јәһ. 8, 9).

13. Бу дүнја бизә һансы мүнасибәти ҝөстәрир вә нәјә ҝөрә?

¹³ Биз билирик ки, бу дүнја бизә нифрәт едәҹәк (1 Јәһ. 3:13). Һәвари Јәһја демишди: «Бүтүн дүнја... Шәририн әлиндәдир» (1 Јәһ. 5:19). Бу дүнјанын сону ҝүнү-ҝүндән јахынлашдыгҹа Шејтанын гәзәби даһа да аловланыр (Вәһј 12:12). О, тәкҹә әхлагсызлыг, дөнүкләрин јаланы вә бу кими диҝәр ҝизли фәндләрә әл атмыр. Һәмчинин ачыг-ашкар һүҹума кечир. Шејтан билир ки, бизим тәблиғ ишимизи дајандырмаг, јахуд бизи имандан дөндәрмәк үчүн аз вахты галыб. Буна ҝөрә дә тәәҹҹүблү дејил ки, бир нечә өлкәдә фәалијјәтимиз мәһдудлашдырылыб вә ја гадаған едилиб. Амма һәмин өлкәләрдә јашајан баҹы-гардашларымыз бөјүк дөзүм ҝөстәрир. Онлар сүбут едир ки, Шејтан нә едирсә етсин, биз галиб ҝәлә биләрик!

14. Баҹы-гардашларымыза һәгигәтдә галмаға көмәк етмәјин бир јолу һансыдыр?

¹⁴ Баҹы-гардашларымыза һәгигәтдә галмаға көмәк етмәк үчүн онлара шәфгәт ҝөстәрмәлијик (1 Јәһ. 3:10, 11, 16—18). Бир-биримизи јалныз һәр шеј јахшы оланда јох, һәмчинин проблемләр јарананда да севмәлијик. Ола билсин, диндашымызын доғмасы вәфат едиб вә онун тәсәллијә, көмәјә еһтијаҹы вар. Јахуд тәбии фәлакәт заманы баҹы-гардашларымызын ибадәт евләринә вә ја өз евләринә зәрәр дәјиб, онларын тәмир-бәрпасына көмәк лазымдыр. Диндашларымыза севҝимиз вә шәфгәтимиз тәкҹә сөзләримиздән јох, әмәлләримиздән дә ҝөрүнмәлидир.

15. 1 Јәһја 4:7, 8 ајәләринә әсасән, биз нә етмәлијик?

¹⁵ Бир-биримизә мәһәббәт ҝөстәрәндә севән Јараданымыза бәнзәмиш олуруг. (1 Јәһја 4:7, 8 ајәләрини охујун.) Мәһәббәт ҝөстәрмәјин үсулларындан бири бир-биримизи бағышламагдыр. Тутаг ки, кимсә бизим хәтримизә дәјиб. Биз ону бағышламагла вә етдији сәһви унутмагла она  мәһәббәт ҝөстәрмиш олуруг (Кол. 3:13). Алдо адлы бир гардашла белә бир шеј баш вермишди: хәтрини истәдији бир гардаш онун мәнсуб олдуғу мәдәнијјәт һагда хошаҝәлмәз фикир сөјләмишди. Алдо дејир: «Јеһоваја чох дуа едирдим ки, о гардаша аҹыглы галмајым». Алдо башга бир шеј дә етди. О, һәмин гардашла хидмәтә чыхды. Хидмәтдә оларкән гардашын дедији сөзүн она неҹә пис тәсир етдијини сөјләди. Алдо дејир: «Гардаш ешидәндә ки, онун сөзләри мәним хәтримә дејиб, үзр истәди. Онун сәсинин тонундан ҝөрүнүрдү ки, дедији сөзә ҝөрә чох пешмандыр. Проблеми һәлл етдик вә јенидән арамыз јахшы олду».

16, 17. Нәјә гәти гәрарлы олмалыјыг?

¹⁶ Һәвари Јәһја диндашларыны чох истәјирди, онларын иманда мөһкәм олмасы онун үчүн чох өнәмли иди. Үч мәктубда вердији өјүд-нәсиһәтдән бу, ајдын ҝөрүнүр. Неҹә дә хошдур ки, Иса Мәсиһлә ҝөјдә идарә едәҹәк киши вә гадынлар онун кими мәһәббәтли вә гајғыкешдир! (1 Јәһ. 2:27).

¹⁷ Ҝәлин бу мәгаләдә өјрәндијимиз мәсләһәтләрә әмәл едәк. Һәгигәтдә јеримәјә, јәни һәјатымызын һәр саһәсиндә Јеһоваја итаәт етмәјә гәти гәрарлы олаг. Аллаһын Кәламыны мүталиә едиб, орада јазыланларын һәгигәт олдуғуна етибар едәк. Иса Мәсиһә иманымызы ҝүҹләндирәк. Инсан фикирләрини вә дөнүк тәлимләри рәдд едәк. Икили һәјат јашамаг, ҝүнаһ ишләмәк тәзјигинә гаршы дураг. Јеһованын јүксәк әхлаг нормаларыны рәһбәр тутаг. Диндашларымыз хәтримизә дәјәндә онлары бағышламагла, јардыма мөһтаҹ оланда әл узатмагла онлара мөһкәм галмаға көмәк едәк. Онда һансы чәтинлијимиз олурса олсун, һәгигәт јолунда даим јеријәҹәјик.