1. Нә үчүн Јеһова Өзүнү анаја бәнзәдир?

«ҺЕЧ ана сүдәмәр көрпәсини унудар?» Јеһова Аллаһ бу суалы Әшија пејғәмбәрин јашадығы дөврдә вермишди. О, Исраил халгына демишди: «Ана ушағыны унутса белә, Мән сәни һеч вахт унутмарам» (Әшј. 49:15). Јеһованын Өз һиссләрини ана һиссләринә бәнзәтмәсинә Мүгәддәс Китабда чох аз раст ҝәлинир. Бурада Јеһова ана илә бала арасындакы бағлылығы нүмунә чәкәрәк хидмәтчиләрини нә гәдәр дәрин мәһәббәтлә севдијини ифадә едир. Әксәр аналар бир баҹынын дедији сөзләрә шәрикдир: «Ушаг әмиздирән ана илә бала арасында өмүрлүк давам едән хүсуси бағлылыг һисси јараныр».

2. Хидмәтчиләриндән биринин белә Јеһовадан узаглашмасы Она неҹә тәсир едир?

² Һәтта бирҹә хидмәтчисинин дә јығынҹагла әлагәсини кәсмәси вә тәблиғдә иштирак етмәмәси Јеһованын диггәтиндән јајынмыр. Ҝөрүн һәр ил минләрлә хидмәтчисинин гејри-фәал * олдуғуну ҝөрмәк Јеһованын гәлбини нә гәдәр кәдәрләндирир.

3. Јеһованын истәји нәдир?

³ Гејри-фәал олмуш баҹы-гардашларымызын бир чоху јығынҹаглара гајыдыр вә биз буна чох севинирик! Јеһова онларын ҝери дөнмәсини истәјир, елә биз дә (1 Бут. 2:25). Бәс онлара ҝери гајытмаға неҹә көмәк едә биләрик? Бу суала ҹаваб вермәздән өнҹә ҝәлин ҝөрәк бәзиләри тәблиғ етмәји вә јығынҹаға ҝәлмәји нәјә ҝөрә дајандырыр.

4. Иш бәзиләринин һәјатына неҹә тәсир ҝөстәрир?

⁴ Бәзиләри ишә һәддиндән чох вахт ајырмаға башлајыб. Ҹәнуб-Шәрги Асијада јашајан Һүнг * адлы бир гардаш дејир: «Бүтүн вахтымы, ҝүҹүмү ишә сәрф едирдим. Ағылсызҹасына өзүмү инандырмышдым ки, мадди вәзијјәтим јахшы олса, Јеһоваја даһа јахшы хидмәт едә биләҹәјәм. Буна ҝөрә дә даһа чох ишләјирдим. Јаваш-јаваш јығынҹаглары бурахмаға башладым вә сонда јығынҹагла бүтүн әлагәми кәсдим. Шејтан бу дүнјада һәр шеји елә гуруб ки, инсаны јаваш-јаваш Аллаһдан узаглашдырсын».

5. Ард-арда башына ҝәлән проблемләр бир баҹыја неҹә тәсир етмишди?

⁵ Бәзи баҹы-гардашларымызы проблемләр әлдән салыб. Британијадан олан Анна адлы баҹы беш ушаг анасыдыр. О дејир: «Ушагларымдан бири ҹидди гүсурларла дүнјаја ҝәлиб. Сонралар гызымын бири јығынҹагдан кәнар олунду, оғлумун бириндә исә әгли хәстәлик јаранды. О гәдәр мәјуслуға гапылмышдым ки, нә јығынҹаглара ҝедирдим, нә дә тәблиғә. Нәтиҹәдә, гејри-фәал олдум». Бизим Анна баҹыја вә бу кими проблемләри олан диҝәр диндашларымыза үрәјимиз јаныр.

6. Колослулара 3:13 ајәсиндәки мәсләһәтә әмәл етмәмәк инсаны Јеһовадан неҹә узаглашдыра биләр?

⁶ Колослулара 3:13 ајәсини охујун. Јеһованын бәзи хидмәтчиләри һансыса диндашынын һәрәкәтиндән инҹијиб. Һәвари Булус гејд етмишди ки, ола билсин, бәзән биримизин «диҝәриндән шикајәт» етмәјә әсаслы сәбәби олаҹаг. Һәтта ола билсин, диндашымыз бизә гаршы әдаләтсизлик едиб. Еһтијаты әлдән версәк, үрәјимиздә кин јарана биләр. Аҹыглы галмаг инсаны тәдриҹән Јеһованын халгындан узаглашдыра биләр. Ҹәнуби Америкадан олан Пабло адлы бир гардашын һадисәсинә нәзәр салаг. Бир нәфәр она бөһтан атыб ҝүнаһ ишләтмәкдә иттиһам етмишди. Ҝүнаһсыз олдуғу һалда, Пабло јығынҹагдакы мәсулијјәтләрини итирди. Бәс о, неҹә давранды? Гардаш дејир: «Чох аҹыглы идим. Јаваш-јаваш јығынҹагдан узаглашдым».

7. Виҹдан әзабы инсана неҹә тәсир едә биләр?

⁷ Јахуд ола биләр ки, кечмишдә ҝүнаһ ишләмиш шәхсин виҹданы она әзаб версин вә о, Аллаһын мәһәббәтинә лајиг олмадығыны дүшүнсүн. Төвбә етмәсинә вә лүтф ҝөрмәсинә рәғмән, о, Аллаһын хидмәтчиси олмаға лајиг олмадығыны дүшүнә биләр. Франсиско адлы бир гардаш мәһз белә һиссләр кечирирди. О дејир: «Ҹинси әхлагсызлыг етдијим үчүн төһмәт алмышдым. Әввәл-әввәл јығынҹаглара ҝетсәм дә, сонрадан мәјуслуға гапылдым, өзүмү Јеһованын халгы арасында олмаға лајиг билмирдим. Виҹданым мәни раһат бурахмырды, әмин идим ки, Јеһова мәни бағышламајыб. Бир вахт сонра јығынҹагдан тамам узаглашдым». Бу ҹүр вәзијјәтләрлә үзләшән баҹы-гардашлара гаршы һансы һиссләр кечирирсиниз? Онларын һалына аҹыјырсыныз? Ән ваҹиби, Јеһова онлара неҹә јанашыр?

8. Јеһова бир заманлар Она хидмәт етмиш бәндәләрини унудур? Изаһ един.

⁸ Јеһова бир заманлар Она хидмәт етмиш, амма мүәјјән мүддәт халгындан узаглашан бәндәләрини унутмур. Һәмчинин бәндәләринин Она хидмәтдә етдикләрини дә јадындан чыхармыр (Ибр. 6:10). Әшија пејғәмбәр Јеһованын Өз халгыны  неҹә севдијини ҝөстәрмәк үчүн ҝөзәл бир мүгајисәдән истифадә етмишди. О јазмышды: «Чобан кими сүрүсүнә бахаҹаг, әли илә гузуларыны бир јерә топлајаҹаг, онлары гојнунда апараҹаг» (Әшј. 40:11). Гузуларындан бири сүрүдән узаглашанда Бөјүк Чобанымыз һансы һиссләри кечирир? Иса Мәсиһин шаҝирдләринә вердији суалдан Јеһованын кечирдији һиссләри ачыг-ајдын ҝөрмәк олар: «Неҹә билирсиниз, јүз гојуну олан адамын бир гојуну итсә, мәҝәр о, дохсан доггуз гојуну дағда гојуб азмыш гојуну ахтармаға ҝетмәз? Әҝәр ону тапса, инанын, дохсан доггуз азмамыш гојундан даһа чох о гојуна ҝөрә шадланаҹаг» (Мәт. 18:12, 13).

9. Јахшы чобан сүрүсүнә неҹә јанашыр? (Үз габығындакы шәклә бахын.)

⁹ Јеһова Аллаһы һансы мәнада чобана бәнзәтмәк олар? Гәдимдә јахшы чобан үчүн гојунлары чох дәјәрли иди. Мәсәлән, Давуд сүрүсүнү горумаг үчүн ширлә, ајы илә вурушурду (1 Ишм. 17:34, 35). Јахшы чобан сүрүдән бирҹә гузунун белә итмәсини сезәрди (Јәһ. 10:3, 14). О, дохсан доггуз гојуну ағыла салыб, јахуд башга чобана тапшырыб итмиш бирҹә гојунуну ахтармаға ҝедәрди. Иса Мәсиһ бу мисал васитәсилә ваҹиб бир һәгигәти өјрәтмәк истәјир: «Мәним ҝөјдәки Атам бу кичикләрдән бирҹәҹијинин белә мәһв олмасыны истәмир» (Мәт. 18:14).

10. Һизгијал 34:11—16 ајәләринә әсасән, Јеһова итмиш гојунлары үчүн нә едәҹәјини вәд едиб?

¹⁰ Јеһова сүрүдән узаг дүшмүш «кичикләр» дә дахил олмагла, һәр биримизи чох севир. О, Һизгијал пејғәмбәр васитәсилә вәд етмишди ки, итмиш гојунларыны ахтараҹаг вә онлара руһани сағламлыгларыны бәрпа етмәјә көмәк едәҹәк. Һәмчинин онлары гуртармаг үчүн һансы аддымлар атаҹағыны да билдирмишди. Бу аддымлар исраилли чобанын гојуну итән заман ҝөрдүјү тәдбирләрә бәнзәјир. (Һизгијал 34:11—16 ајәләрини охујун.) Әввәлҹә,  чобан гојуну ахтармаға башлајыр; бу, чобанын чохлу вахтыны вә ҝүҹүнү ала биләр. Итмиш гојуну тапандан сонра чобан ону сүрүјә гајтарыр. Даһа сонра, ишдир, гојун јаралы, јахуд аҹ олса, чобан онун јарасыны сарыјыр, ону гојнунда ҝәздирир вә једиздирир. Јеһованын сүрүсүнүн чобаны олан ағсаггаллар да јығынҹагдан узаглашан истәнилән адама көмәк етмәк үчүн ејни аддымлары атмалыдыр (1 Бут. 5:2, 3). Ағсаггаллар онлары ахтарыб тапыр, сүрүјә дөнмәјә көмәк едир вә руһани ҹәһәтдән дәстәк олараг мәһәббәт ҝөстәрирләр *.

11. Гәдимдә јахшы чобан нәји билирди?

¹¹ Гәдимдә јахшы чобан билирди ки, гојун итә биләр. Ишдир, гојун сүрүдән узаглашардыса, чобан онунла сәрт давранмырды. Ҝәлин ҝөрәк Јеһова Ондан бир мүддәтлик узаглашмыш хидмәтчиләринә неҹә көмәк етмишди.

12. Јеһова Јунус пејғәмбәрә гаршы неҹә давранмышды?

¹² Јунус пејғәмбәр Јеһоваја итаәтсизлик едиб Нејнәваја ҝетмәмишди. Буна бахмајараг, Јеһова онун үстүндән хәтт чәкмәјә тәләсмәди. Јахшы чобантәк ону гуртарды вә тапшырығыны јеринә јетирмәк үчүн ҝүҹ верди (Јун. 2:7; 3:1, 2). Даһа сонра балгабаг биткиси васитәсилә Јунуса инсан һәјатынын нә гәдәр дәјәрли олдуғуну баша салды (Јун. 4:10, 11). Бундан нә өјрәнирик? Ағсаггаллар гејри-фәал олмуш тәблиғчидән әлләрини үзмәјә тәләсмәмәлидир. Әксинә, онун јығынҹагдан узаглашмасына нәјин сәбәб олдуғуну мүәјјән етмәлидир. Һәмин шәхс Јеһоваја ҝери дөнәндән сонра исә она мәһәббәт вә диггәт ҝөстәрмәјә давам етмәлидир.

13. Јеһова Зәбур 73-ҹү мәзмурун јазарынын сөзләринә неҹә јанашды вә биз бундан нә өјрәнә биләрик?

¹³ Зәбур 73-ҹү мәзмурун јазары писләрин фираван јашадығыны зәнн етдији үчүн руһдан дүшмүшдү (Зәб. 73:12, 13, 16).  Бәс Јеһова нә етди? О, мәзмурчуну мүһакимә етмәди. Һәтта онун сөзләрини Мүгәддәс Китаба јаздырды. Мәзмурчу нәһајәтдә Јеһова илә јахшы мүнасибәтләрә саһиб олмағын һәјатда һәр шејдән даһа дәјәрли олдуғуну баша дүшдү (Зәб. 73:23, 24, 26, 28). Бундан нә өјрәнирик? Ағсаггаллар Јеһоваја хидмәтин немәтләр бәхш етдијини суал алтына гојан шәхсләр барәдә һөкм чыхармаға тәләсмәмәлидир. Онлары мүһакимә етмәкдәнсә, јахшы олар ки, нә үчүн бу ҹүр данышдыгларыны, бу ҹүр даврандыгларыны анламаға чалышсынлар. Јалныз бундан сонра ағсаггаллар Мүгәддәс Китаб васитәсилә онлары руһландыра биләр.

14. Илјас пејғәмбәрин нә үчүн көмәјә еһтијаҹы вар иди вә Јеһова она неҹә көмәк етди?

¹⁴ Илјас пејғәмбәр мәликә Изәбилдән гачмышды (1 Пад. 19:1—3). О дүшүнүрдү ки, Јеһоваја хидмәт едән бир пејғәмбәр дә галмајыб вә онун индијәдәк етдикләринин һамысы мәнасыз имиш. Пејғәмбәр о гәдәр пәришан иди ки, өлмәк истәјирди (1 Пад. 19:4, 10). Лакин Јеһова ону мәзәммәт етмәди, әксинә, әмин етди ки, о, тәк галмајыб, Онун ҝүҹүнә етибар едә биләр вә һәлә ҝөрүләси чох иш вар. Илјас нараһатлығы барәдә данышаркән Јеһова диггәтлә динләди вә она јени тапшырыг верди (1 Пад. 19:11—16, 18). Бундан нә өјрәнирик? Һәр биримиз Јеһованын гузулары илә меһрибан давранмалыјыг. Бу, хүсусилә дә ағсаггаллардан ҝөзләнилир. Дәрдини бөлүшән инсанын аҹыглы данышмасындан, јахуд Јеһованын мәрһәмәтинә лајиг олмадығыны дүшүнмәсиндән асылы олмајараг,  ағсаггаллар ону диггәтлә динләмәлидир. Сонра ону әмин етмәлидир ки, Јеһова үчүн чох дәјәрлидир.

15. Јәһја 6:39 ајәсинә әсасән, Иса Мәсиһ Јеһованын хидмәтчиләринә неҹә јанашырды?

¹⁵ Јеһова итмиш гузуларына неҹә јанашмағымызы истәјир? Бу саһәдә Иса Мәсиһин нүмунәсини изләјә биләрик. О билирди ки, Јеһова үчүн хидмәтчиләри чох дәјәрлидир. Буна ҝөрә дә «Исраил евинин итмиш гојунларынын» Јеһоваја ҝери дөнмәсинә көмәк етмәк үчүн әлиндән ҝәләни едирди (Мәт. 15:24; Лука 19:9, 10). Иса јахшы чобан иди вә вар ҝүҹү илә чалышырды ки, Јеһованын сүрүсүндән бирҹә гојуну белә итирмәсин. (Јәһја 6:39 ајәсини охујун.)

16, 17. Ағсаггаллар Јеһовадан узаг дүшмүш кәсләрә көмәк етмәк мәсәләсинә неҹә јанашмалыдыр? (« Јеһовадан узаг дүшәнләрин кечирдији һиссләр» адлы чәрчивәјә бахын.)

¹⁶ Һәвари Булус Ефес јығынҹағынын ағсаггалларыны Иса Мәсиһдән өрнәк ҝөтүрмәјә тәшвиг етмишди. О демишди: «Зәифләрә көмәк етмәлисиниз вә Ағамыз Исанын дедији сөзләри, “вермәк алмагдан даһа чох хошбәхтлик ҝәтирир” сөзләрини унутмамалысыныз» (Һәв. 20:17, 35). Бу сөзләр ајдын ҝөстәрир ки, ағсаггалларын үзәринә ваҹиб бир өһдәчилик дүшүр. Испанијада ағсаггал кими хидмәт едән Салвадор гардаш дејир: «Јеһованын итмиш гојунларыны нә гәдәр чох севдији һагда дүшүнәндә әлимдән ҝәлән гәдәр онлара көмәк етмәк истәјирәм. Билирәм ки, Јеһова мәндән бир руһани чобан кими онларын гејдинә галмағы ҝөзләјир».

¹⁷ Мәгалә боју һаггында бәһс етдијимиз инсанларын һамысы алдыглары көмәк сајәсиндә Јеһоваја ҝери дөнүбләр. Һал-һазырда бир чохлары да бу аддымы атмаг истәјир. Нөвбәти мәгаләдә онлара Јеһоваја ҝери дөнмәјә көмәк етмәк үчүн нә едә биләҹәјимизи әтрафлы арашдыраҹағыг.