Булус јазмышды: «Мән ганунун васитәсилә ганун үчүн өлдүм ки, Аллаһ үчүн јашаја билим» (Гал. 2:19).

Һәвари Булусун бу сөзләри Рома әјаләти олан Галатија јығынҹағына баша салмаг истәдији фикирлә бағлы иди. Орадакы бәзи мәсиһиләр јаланчы мүәллимләрин тәсири алтында идиләр. Бу адамлар өјрәдирди ки, хилас олунмаг үчүн Мусанын ганунундакы тәләбләрә әмәл етмәк лазымдыр, хүсусилә дә сүннәт олунмаг тәләбинә. Булус билирди ки, Аллаһ иманлылардан даһа сүннәт олунмағы тәләб етмир. О, әсаслы дәлилләр ҝәтирәрәк бу тәлимләрин јалан олдуғуну исбат етди вә баҹы-гардашларын фидјә гурбанлығына иманыны мөһкәмләндирди (Гал. 2:4; 5:2).

Булус онлара «ганун үчүн өлдүм» дејир. О бунунла нәји нәзәрдә тутурду? Мүгәддәс Китабда ајдын дејилир ки, инсан өләндә һәр шејдән бихәбәр олур вә әтрафда олан һеч бир шејин она тәсири олмур (Ваиз 9:5). Беләликлә, Булус бу сөзләрлә демәк истәјирди ки, Мусанын ганунунун артыг онун үзәриндә һеч бир һөкмү јохдур. О әмин иди ки, фидјә гурбанлығына иманы сајәсиндә «Аллаһ үчүн јашаја» билир.

Булусдакы бу дәјишиклик «ганунун васитәсилә» баш верди. Һансы мәнада? Булус әввәлдә изаһ етмишди ки, «инсан ганунун тәләбләрини иҹра етмәклә јох, јалныз Мәсиһ Исаја олан иман сајәсиндә салеһ сајылыр» (Гал. 2:16). Дүздүр, Мусанын гануну ваҹиб мәгсәдә хидмәт етмишди. Булус буну галатијалылара белә изаһ етмишди: «Ганун вәди алмыш өвлад ҝәләнә кими ҝүнаһлары ашкар етмәк үчүн әлавә едилди» (Гал. 3:19). Бәли, Ганун ајдын шәкилдә ҝөстәрди ки, гејри-камил, ҝүнаһлы инсанлар она мүкәммәл шәкилдә риајәт едә билмәзләр вә онларын бирдәфәлик верилмиш мүкәммәл гурбана еһтијаҹлары вар. Беләликлә, ганун инсанлары «өвлада», јәни Мәсиһә доғру апарырды. Исаја иман ҝәтирән кәс Аллаһын гаршысында салеһ сајыла биләрди (Гал. 3:24). Булус да Ганун васитәсилә Исаны гәбул етдији вә она иман ҝәтирдији үчүн салеһ сајылырды. Беләҹә, о, «ганун үчүн өлдү», «Аллаһ үчүн јашаја» билди. Артыг онун үзәриндә Мусанын ганунунун јох, Аллаһын һөкмү вар иди.

Булус буна бәнзәр фикри ромалылара јаздығы мәктубунда вурғуламышды. «Гардашларым, сиз дә Мәсиһин бәдәни васитәсилә Ганун үчүн өлдүнүз... Биз Ганунун табелијиндән азад едилмишик вә әл-голумузу бағлајан Ганун үчүн өлмүшүк» (Ром. 7:4, 6). Һәм бу ајәләрдән, һәм дә Галатијалылара 2:19 ајәсиндән ҝөрмәк олар ки, Булус Ганунун табелијиндә мәһкум олмуш ҝүнаһкар кими өлмәкдән данышмыр. Әксинә, Булус ачыг шәкилдә азад олунмаг барәдә данышырды. Ганунун нә онун, нә дә онун кими Мәсиһин фидјә гурбанлығына иман сајәсиндә азад олунмуш диҝәр мәсиһиләрин үзәриндә һеч бир һөкмү јох иди.