1. Нәјә ҝөрә бәзән Јеһованын хидмәтчиләри өзләрини тәнһа һисс едир?

ЧОХУМУЗ вахташыры өзүмүзү тәнһа һисс едирик. Бәзиләримиздә бу һисс тез өтүб кечир, бәзиләримиздә исә јува салыб. Һәтта һәрдән әһатәмиздә инсанлар ола-ола да, өзүмүзү тәнһа һисс едирик. Кимиси јени јығынҹаға өјрәшә билмир. Кимиси мөһкәм бағлары олан аиләдә бөјүјүб, буна ҝөрә дә аиләсиндән узаға көчәндә өзүнү тәнһа һисс едир. Кимиси вәфат етмиш әзизи илә бирҝә кечирдији ҝүнләр үчүн дарыхыр. Бәзи мәсиһиләрин исә, хүсусилә дә һәгигәтә тәзә ҝәләнләрин иманда олмајан аилә үзвләри вә ја көһнә достлары онлардан үз дөндәриб вә ја онлары тәгиб едир.

2. Бу мәгаләдә һансы суалларын ҹавабыны тапаҹағыг?

² Јеһова бизимлә бағлы һәр шеји билир вә бизи баша дүшүр. О бизим тәнһалыг һисси кечирдијимиздән дә аҝаһдыр вә бизә көмәк етмәк истәјир. Јеһова бизә неҹә көмәк едир? Биз өзүмүзә неҹә көмәк едә биләрик? Бәс јығынҹағымызда өзүнү тәнһа һисс едән диндашларымыза неҹә көмәк едә биләрик? Ҝәлин бу суалларын ҹавабыны бир-бир арашдыраг.

3. Јеһова Илјасын вәзијјәтинә биҝанә олмадығыны неҹә ҝөстәрди?

³ Јеһова бүтүн хидмәтчиләринин рифаһы илә јахындан марагланыр. О, һәр биримизә јахындыр. Бизим мәјуслуға гапылмағымыз Јеһованын нәзәриндән јајынмыр (Зәб. 145:18, 19). Ҝәлин Илјас пејғәмбәри јадымыза салаг. Јеһова онун һиссләриндән аҝаһ иди вә она көмәк әли узатды. Бу мөмин  инсан Исраил тарихинин чох ағыр бир дөнәминдә јашајырды. Аллаһа дүшмән кәсилмиш сәлаһијјәт саһибләри Онун хидмәтчиләрини амансызҹасына тәгиб едирди вә Илјас онларын әсас һәдәфи иди (1 Пад. 19:1, 2). Үстәлик, Илјас дүшүнүрдү ки, Јеһоваја ибадәт едән тәкҹә о галыб вә ҝөрүнүр, бу ону даһа да руһдан салырды (1 Пад. 19:10). Јеһова дәрһал пејғәмбәринин дадына јетди. Мәләјини ҝөндәриб Илјасы әмин етди ки, о, тәк дејил, Јеһоваја һәлә дә сәдагәтлә хидмәт едән чохлу исраилли вар (1 Пад. 19:5, 18).

4. Марк 10:29, 30 ајәләринә әсасән, Јеһова јахынларынын көмәјиндән мәһрум оланлара неҹә гајғы ҝөстәрир?

⁴ Јеһова билир ки, бәзиләримиз Она хидмәт етмәкдән өтрү бөјүк гурбанлар вермәли олуруг. Бу гурбанлардан бири иманда олмајан аилә үзвләринин вә достларынын көмәјиндән мәһрум олмагдыр. Һәвари Бутрус нараһат олдуғу үчүн бир дәфә Исадан сорушмушду: «Биз һәр шеји гојуб сәнин ардынҹа ҝәлдик. Бунун әвәзиндә нә алаҹағыг?» (Мәт. 19:27). Иса шаҝирдләрини меһрибанлыгла әмин етди ки, онларын бөјүк руһани аиләси олаҹаг. (Марк 10:29, 30 ајәләрини охујун.) Бу аиләнин башы олан Јеһова сөз верир ки, Она хидмәт едәнләрдән көмәјини әсирҝәмәјәҹәк (Зәб. 9:10). Ҝәлин ҝөрәк өзүнүзү тәнһа һисс едән заман Јеһованын көмәјини алмаг үчүн нә едә биләрсиниз.

5. Нәјә ҝөрә Јеһованын бизә дајаг олдуғу барәдә дүшүнмәлијик?

⁵ Јеһованын сизә неҹә дајаг олдуғу барәдә дүшүнүн (Зәб. 55:22). Онда ҝөрәҹәксиниз ки, сиз тәк дејилсиниз. Карол * адлы субај баҹынын аилә үзвләриндән һеч кәс һәгигәтдә дејил. О дејир: «Архаја баханда вә дүшүнәндә ки, Јеһова мәнә сынаглар заманы неҹә көмәк едиб, ҝөрүрәм ки, мән тәк дејиләм вә бир даһа әмин олурам ки, ҝәләҹәкдә дә Јеһова мәнимлә олаҹаг».

6. 1 Бутрус 5:9, 10 ајәләри тәнһалыгдан әзијјәт чәкәнләри неҹә руһландыра биләр?

 ⁶ Проблемләри олан диндашларыныза Јеһованын дајаг олмасы барәдә фикирләшин. (1 Бутрус 5:9, 10 ајәләрини охујун.) Аиләдә узун илләрдир тәк Јеһованын Шаһиди олан Һироши гардаш дејир: «Јығынҹаға баханда ајдын ҝөрүнүр ки, проблемсиз адам јохдур. Һәр кәс Јеһоваја хидмәтдә әлиндән ҝәләни едир. Буну ҝөрмәк һәгигәтдә тәк олан бизләри чох руһландырыр».

7. Дуа сизә неҹә көмәк едир?

⁷ Ибадәтинизә көкләнин. Дуа едиб, нә һиссләр кечирирсинизсә, һамысыны Јеһоваја данышын (1 Бут. 5:7). Масиел баҹы Јеһоваја хидмәт етмәк гәрарына ҝәләндә аиләси она дәстәк олмадығына ҝөрә өзүнү тәнһа һисс едирди. О дејир: «Тәнһалығымла мүбаризә апармаға мәнә әсас етибарилә Јеһоваја һәрарәтлә дуа етмәк көмәк олду. Јеһова мәнә әсл Ата олду, Она һәр ҝүн дөнә-дөнә дуа едирдим. Бүтүн һиссләрими Она данышырдым».

8. Мүгәддәс Китабы охумаг вә дүшүнмәк сизә неҹә көмәк едир?

⁸ Аллаһын Кәламыны мүнтәзәм охујун, Јеһованын сизи севдијинә дәлаләт едән ајәләр үзәриндә дүшүнүн. Аилә үзвләриндән һәмишә јаралајыҹы сөзләр ешидән Бианка баҹы дејир: «Мүгәддәс Китабдан вә нәшрләримиздән мәнимкинә бәнзәр вәзијјәтләрлә үзләшмиш Јеһованын садиг хидмәтчиләри һагда охујурам вә өзүм үчүн нәтиҹә чыхарырам. Бунун мәнә бөјүк көмәји дәјир». Бәзи мәсиһиләр Зәбур 27:10 вә Әшија 41:10 ајәләри кими хүсусилә руһландырыҹы олан ајәләри әзбәрләјирләр. Диҝәрләри диггәт јетирмишләр ки, јығынҹаға һазырлашанда вә Мүгәддәс Китабы охујанда тәлим нәшрләринин аудиојазыларына гулаг асмаг онлара өзләрини тәк һисс етмәмәјә көмәк едир.

9. Јығынҹагда иштирак етмәјин сизә һансы көмәји дәјир?

⁹ Јығынҹагларда мүнтәзәм иштирак етмәк үчүн әлиниздән ҝәләни един. Һәм јығынҹағын програмындан руһланаҹагсыныз, һәм дә баҹы-гардашлары јахындан таныјаҹагсыныз (Ибр. 10:24, 25). Бајаг ады чәкилән Масиел дејир: «Бахмајараг ки, чох утанҹаг идим, гәт етмишдим ки, һеч бир јығынҹағы бурахмајым вә ҝөрүшләрдә шәрһләр верим. Бу мәнә көмәк етди ки, јығынҹаға гајнајыб-гарышым».

10. Јығынҹагдакы баҹы-гардашларла достлашмаг нәјә ҝөрә ваҹибдир?

¹⁰ Диндашларынызла дост олун. Нәсә өјрәнә биләҹәјиниз баҹы-гардашларла достлашын. Онларын сизинлә ејни јашда вә ејни милләтдән олмасы ваҹиб дејил. Мүгәддәс Китабда  јазылыб ки, һикмәт аһыллардады (Әјј. 12:12). Аһыллар да јашҹа кичик олан садиг мәсиһиләрдән чох шеј өјрәнә биләр. Бахмајараг ки, Давуд Јонатандан јашҹа чох кичик иди, амма бу онлара дост олмаға мане олмады (1 Ишм. 18:1). Давудла Јонатан бир-биринә дајаг олурду ки, чәтинликләрә рәғмән, Јеһоваја ибадәт етсинләр (1 Ишм. 23:16—18). Һал-һазырда аиләсиндә јеҝанә Јеһованын Шаһиди олан Ирина адлы баҹы дејир: «Диндашларымыз бизим үчүн әсл ата, ана, баҹы вә ја гардаш ола биләр. Јеһова онларын васитәсилә бизә еһтијаҹ дујдуғумуз көмәји ҝөстәрә биләр».

11. Мөһкәм достлуг мүнасибәти гурмаг үчүн нә етмәк лазымдыр?

¹¹ Јени кәсләрлә достлашмаг асан олмаја биләр, хүсусилә дә утанҹағыгса. Ратна адлы баҹы чохлу тәгибләрә бахмајараг, һәгигәтә ҝәлмишди. О, хасијјәтҹә чох утанҹагдыр. Ратна дејир: «Гәбул етмәлијдим ки, руһани аиләмин көмәјинә еһтијаҹым вар». Инсана үрәјиндәкиләри киминләсә бөлүшмәк чәтин ола биләр. Амма бу ҹүр ачыг үнсијјәт јахын достлуға апарыр. Достларыныз сизи руһландырмаг, сизә дәстәк олмаг истәјир. Амма ҝәрәк буну неҹә етмәклә бағлы онлара көмәк едәсиниз.

12. Хидмәт бизә неҹә көмәк едә биләр?

¹² Баҹы-гардашларла достлашмағын ән ҝөзәл јолларындан бири хидмәтдә әмәкдашлыг етмәкдир. Јухарыда ады чәкилән Карол дејир: «Хидмәтдә вә диҝәр руһани ишләрдә баҹыларла вахт кечирмәјин сајәсиндә јахшы достлуглар гурмушам. Јеһова илләр әрзиндә бу достлар васитәсилә мәнә дајаг олуб». Садиг мәсиһиләрлә достлуг гурмаг үчүн зәһмәт чәкмәјә дәјәр. Јеһова бу достлар васитәсилә мәнфи һиссләрлә, мәсәлән, тәнһалыгла мүбаризә апармаға көмәк едир (Мәс. 17:17).

13. Һәр биримизин үзәринә һансы мәсулијјәт дүшүр?

¹³ Биз чалышмалыјыг ки, јығынҹагда меһрибан аб-һава јарадаг, бир-биримизә мәһәббәт ҝөстәрәк. Беләҹә, һеч кәс өзүнүн тамамилә тәк галдығыны һисс етмәјәҹәк. Бу, һәр биримизин мәсулијјәтидир (Јәһ. 13:35). Бизим һансыса сөзүмүз вә ја һәрәкәтимиз тәсәввүр белә етмәдијимиз гәдәр диндашымызы руһландыра биләр. Бир баҹы демишди: «Мән һәгигәти өјрәнәндә јығынҹаг мәним аиләм олду. Онларын көмәји олмасајды, Јеһованын Шаһиди ола билмәздим». Һәгигәтдә тәк олан диндашынызын өзүнү јығынҹаға јад һисс етмәмәси үчүн нә едә биләрсиниз?

14. Јениләрлә достлашмаг үчүн нә едә биләрсиниз?

¹⁴ Дост әлини узадын. Буна јығынҹаға јени ҝәләнләри меһрибан гаршыламагла башлаја биләрсиниз (Ром. 15:7). Амма биз тәкҹә достјана саламлашмаг јох, тәдриҹән мөһкәм достлуг мүнасибәти гурмаг истәјирик. Она ҝөрә дә јениләрә гаршы меһрибан, ҹаныјанан олун. Шәхси һәјатларына мүдахилә етмәдән һансы проблемләрлә үзләшдикләрини анламаға чалышын. Ола билсин, бәзиләринә һиссләрини ифадә етмәк чәтиндир. Буна ҝөрә онлары данышмаға мәҹбур етмәјин. Достјана давранын, онларын сыхылмадан ҹаваб верә биләҹәји суаллар верин вә сәбирлә гулаг асын. Мәсәлән, һәгигәти неҹә өјрәндијини соруша биләрсиниз.

15. Јеткин мәсиһиләр јығынҹагдакылара неҹә көмәк едә биләр?

¹⁵ Јеткин мәсиһиләр, хүсусилә дә ағсаггаллар јығынҹагдакы һәр кәсин гејдинә  галанда һамы руһани ҹәһәтдән инкишаф едир. Мелиса адлы баҹыны анасы һәгигәтдә бөјүдүб. Мелиса дејир: «Илләр әрзиндә мәнә руһани ата олан гардашлара нә гәдәр миннәтдар олсам, аздыр. Данышмаға еһтијаҹ дујанда билирәм ки, мәни динләјәҹәк кимсә вар». Маурисио адлы ҹаван гардаша дәрс кечән тәблиғчи һәгигәтдән ҝедәндә Маурисио өзүнү руһән јетим һисс едирди. О дејир: «Ағсаггаллар мәним гејдимә галды, бунун мәнә бөјүк көмәји дәјди. Онлар тез-тез мәнимлә сөһбәт едирди, тәблиғдә әмәкдашлыг едирдиләр, фәрди мүталиәләриндән тапдыглары инҹиләри бөлүшүрдүләр, һәтта бирликдә идман ојунлары ојнајырдыг». Һәм Мелиса, һәм дә Маурисио Јеһоваја тамвахтлы хидмәт едир.

16, 17. Башгаларына һансы саһәләрдә әмәли көмәк ҝөстәрә биләрик?

¹⁶ Әмәли көмәк ҝөстәрин (Гал. 6:10). Лео адлы гардаш аиләсиндән чох узаг бир өлкәдә хүсуси тәјинатлы мүждәчи кими хидмәт едир. О дејир: «Чох вахт инсана јериндә едилмиш садә бир јахшылыг елә онун еһтијаҹ дујдуғу шеј олур. Јадымдадыр, бир дәфә автомобил гәзасына дүшмүшдүм. Биртәһәр евә ҝәлиб чыхдым, амма јаман дилхор вәзијјәтдә идим. Сонра бир мәсиһи әр-арвад садә сүфрә ачыб, мәни бирҝә јемәк јемәјә дәвәт етди. Нә једијим јадымда дејил, амма онларын мәнә диггәтлә гулаг асмалары јахшы јадымдадыр. Бундан сонра хејли раһатлашдым».

¹⁷ Биз бөјүк топлантыларда вә бу кими диҝәр руһани тәдбирләрдә олмағы чох хошлајырыг. Әсасән она ҝөрә ки, бурада баҹы-гардашларла бирҝә вахт кечиририк, топланты програмы һаггында данышырыг. Амма ҝөрүн јухарыда ады чәкилән Карол нә дејир: «Топлантыларда иштирак етмәк мәнә хүсусилә чәтиндир. Чүнки әтрафымда јүзләрлә, һәтта минләрлә баҹы-гардаш олса да, һамысы өз аиләсинин јанындадыр, буну ҝөрәндә мән өзүмү даһа да тәнһа һисс едирәм». Бир башгаларына исә һәјат јолдашларыны итирәндән сонра илк дәфә топлантыја тәк ҝетмәк чох чәтин олур. Бу ҹүр чәтинликләри олан кимисә таныјырсыныз?  Она тәклиф едә биләрсиниз ки, нөвбәти руһани тәдбирдә сизин аиләнизлә бирҝә олсун?

18. Гонагпәрвәрлик ҝөстәрәркән 2 Коринфлиләрә 6:11—13 ајәләрини неҹә тәтбиг едә биләрик?

¹⁸ Бирҝә вахт кечирин. Мүхтәлиф баҹы-гардашларла, хүсусилә дә өзләрини тәк һисс едәнләрлә бирҝә вахт кечирин. Үрәјимизи әсас етибарилә бу ҹүр баҹы-гардашлар үчүн ҝениш ачмалыјыг. (2 Коринфлиләрә 6:11—13 ајәләрини охујун.) Бајаг ады чәкилән Мелиса дејир: «Достларымыз бизи евләринә гонаг чағыранда, бирҝә истираһәтә ҝетмәји тәклиф едәндә бизә хош олурду». Бәс сиз јығынҹағынызда кимә гонагпәрвәрлик ҝөстәрә биләрсиниз?

19. Диндашларымыз, әсасән, нә заман онларла вахт кечирмәјимизә еһтијаҹ дуја биләр?

¹⁹ Елә ҝүнләр ола биләр ки, диндашымыз бизимлә вахт кечирмәјә даһа чох еһтијаҹ дујсун. Бәзиләринә иманда олмајан аилә үзвләринин бајрам кечирдији вахтлар чох чәтин олур. Бәзиләри үчүн исә илин һансыса ҝүнләри, мәсәлән, јахынларыны итирдикләри ҝүн чох ағырды. Бу ҹүр чәтинликлә үзләшән диндашымызла вахт кечирәндә ҹан-дилдән онун гејдинә галдығымызы ҝөстәририк (Филип. 2:20).

20. Өзүмүзү тәнһа һисс едәндә Исанын Мәтта 12:48—50 ајәләриндәки сөзләри бизә неҹә көмәк едә биләр?

²⁰ Мәсиһиләрин бәзән өзләрини тәнһа һисс етмәләринин бир чох сәбәби ола биләр. Амма унутмамалыјыг ки, Јеһова бизим бу ҹүр һиссләр кечирмәјимиздән јахшы аҝаһдыр. О бизә лазыми көмәји ҝөстәрир вә буну әксәр вахт диндашларымыз васитәсилә едир. (Мәтта 12:48—50 ајәләрини охујун.) Биз дә руһани аиләмизә дајаг олмаг үчүн әлимиздән ҝәләни едәндә Јеһованын бу һәдијјәсинә миннәтдарлығымызы ҝөстәрмиш олуруг. Бәзән өзүмүзү тәнһа һисс етсәк дә, биз һеч заман тәк дејилик, Јеһова һәмишә бизимләдир!