1. Нәјә ҝөрә Шејтаны овчуја бәнзәтмәк олар?

ОВЧУНУН бир амалы олур: шикарыны тутмаг вә ја өлдүрмәк. О бунун үчүн мүхтәлиф тәләләрдән вә торлардан истифадә едир. Әјјубун сахта достларындан бири дә бу һагда данышмышды (Әјј. 18:8—10). Овчу шикарыны тәләјә салмаға неҹә наил олур? О, һәмин һејваны јахшыҹа мүшаһидә едир: о, һараларда олур, нәләри хошлајыр, нә ҹүр тәләләр онун үчүн ҝөзләнилмәз олар. Шејтан да бу ҹүр овчудур. О бизи мүшаһидә едир: һара ҝедирик, нәјә марағымыз вар. Сонра ағлымыза ҝәлмәјәҹәјини дүшүндүјү бир тәлә гурур. Амма Мүгәддәс Китабда дејилир ки, ишдир, онун торуна дүшсәк, орадан азад ола биләрик. Һәмчинин Мүгәддәс Китабдан өјрәнирик ки, бу кими торлара үмумијјәтлә дүшмәмәк үчүн нә едә биләрик.

2. Шејтанын ән уғурлу тәләләриндән икиси һансыдыр?

² Шејтанын истифадә етдији ән уғурлу тәләләрдән икиси гүрур вә тамаһкарлыгдыр *. Шејтан бу мәнфи хүсусијјәтләрдән мин илләрдир истифадә едир. О, овчутәк шикарыны тәләјә, јахуд тора салыр (Зәб. 91:3). Амма Шејтанын тәләсинә дүшмәмәк мүмкүндүр. Чүнки Јеһова бизи Шејтанын фәндләриндән аҝаһ едир (2 Кор. 2:11).

3. Јеһова Мүгәддәс Китабда бәзи нүмунәләри нә үчүн јаздырыб?

³ Јеһова реал һадисәләр әсасында бизә гүрур вә тамаһкарлығын неҹә тәһлүкәли олдуғуну өјрәдир. Инди бу кими һадисәләрдән бәзиләрини нәзәрдән кечирәҹәјик. Диггәт јетирин, Шејтан Јеһованын һәтта јеткин хидмәтчиләрини неҹә јолдан чыхармышды. Амма әлбәттә, бу, о демәк дејил ки, Шејтанын  тәләләриндән гачмаг мүмкүн дејил. Јеһова бу нүмунәләри Мүгәддәс Китаба бизә «хәбәрдарлыг мәгсәдилә» јаздырыб (1 Кор. 10:11). Јеһова билир ки, биз онлардан дәрс ҝөтүрүб, Шејтанын тәләләриндән гуртула вә ја онлара үмумијјәтлә дүшмәјә биләрик.

4. Гүрурлу олсаг, агибәтимиз неҹә олар?

⁴ Шејтан истәјир ки, биз гүрурлу инсан олаг. О билир ки, биз гүррәләнсәк, онун кими олаҹағыг вә әбәди јашамаг имканыны итирәҹәјик (Мәс. 16:18). Булус хәбәрдар етмишди ки, инсан еһтијатлы олмаса, «гүррәләниб Иблисә чыхарылмыш һөкмә дүчар» олар (1 Тим. 3:6, 7). Бу, һәр биримизлә баш верә биләр, фәрги јохдур һәгигәтдә јенијик, јохса узун илләрдир Јеһоваја хидмәт едирик.

5. Ваиз 7:16, 20 ајәләринә әсасән, инсанын гүрурлу олдуғу өзүнү нәдә бүрузә верә биләр?

⁵ Гүрур бир нөв худбинликдир. Шејтанын мәгсәди одур ки, биз худбин олаг, Јеһовадан чох өзүмүз һагда фикирләшәк, хүсусилә дә проблемләрлә үзләшәндә. Мәсәлән, олубму ки, сизи һагсыз јерә иттиһам етсинләр, јахуд сизинлә әдаләтсиз даврансынлар? Бу заман Јеһованы вә ја тәшкилаты ҝүнаһландырсаг, бу, Шејтанын үрәјиндән олар. Шејтан истәјир ки, проблемимизи һәлл етмәк үчүн Јеһованын Кәламы васитәсилә вердији мәсләһәтләрә әмәл етмәјәк, өз билдијимиз кими давранмағын јеҝанә чыхыш јолу олдуғуну дүшүнәк. (Ваиз 7:16, 20 ајәләрини охујун.)

6. Нидерланддан олан баҹыдан нә өјрәнирик?

⁶ Нидерланддан олан бир баҹымыз башгаларынын сәһвләрини ҝөрүб чох гыҹыгланырды. О, бу вәзијјәтә дөзә билмир вә онларла мүнасибәтини кәсмәк гәрарына ҝәлир. Баҹы дејир: «Өзүмү јалгыз һисс едирдим вә онлары да бағышламағы баҹармырдым. Јолдашыма дедим ки, башга јығынҹаға кечмәлијик». Сонра баҹы JW телевизијасында 2016-ҹы илин март ајынын програмына бахды. Орада башгаларынын гејри-камиллијинә неҹә јанашмагла бағлы мәсләһәтләр јер алырды. Баҹы дејир: «Мән баша дүшдүм ки,  јығынҹагдакы баҹы-гардашлары дәјишмәјә чалышмагданса, дүрүст вә тәвазөкар олуб, өз сәһвләримә нәзәр јетирмәлијәм. Һәмин ајлыг програм мәнә диггәтими Јеһоваја вә Онун али һакимијјәтинә ҹәмләмәјә көмәк етди». Бурадан һансы нәтиҹәни чыхара биләрик? Чәтинликләрлә үзләшән заман фикринизи Јеһоваја көкләјин. Она јалварын ки, башгаларына Онун кими бахмағыныза көмәк етсин. Јеһова онларын сәһвини ҝөрүр, амма бағышламаға һазырдыр. Истәјир ки, сиз дә белә давранасыныз (1 Јәһ. 4:20).

7. Үзијјә падшаһла нәләр баш вермишди?

⁷ Гүрур Јәһуда падшаһы Үзијјәнин мәсләһәти рәдд етмәсинә вә өзбашыналыг етмәсинә ҝәтириб чыхартды. О, баҹарыглы инсан иди, һәрби јүрүшләрдә, тикинти лајиһәләриндә вә тәсәррүфат саһәсиндә бөјүк наилијјәтләр әлдә етмишди. «Аллаһ онун ишини аванд едирди» (2 Салн. 26:3—7, 10). «Амма о, ҝүҹләнәндә гүрурланды вә бу гүрур ону учурума апарды». Јеһова һәлә лап чохдан бујурмушду ки, мәбәддә јалныз каһин бухур тәгдим едә биләр. Амма Үзијјә падшаһ өзбашыналыг едиб, бухур тәгдим етмәк үчүн мәбәдә дахил олду. Бу, Јеһоваја аҹыг ҝетди вә бу гүрурлу инсаны ҹүзама мүбтәла етди. Үзијјә өмрүнүн ахырынадәк ҹүзамлы галды (2 Салн. 26:16—21).

8. 1 Коринфлиләрә 4:6, 7 ајәләринә әсасән, үрәјимиздә гүрурун баш галдырмамасы үчүн нә едә биләрик?

⁸ Ола биләрми ки, биз дә, Үзијјә кими, гүрур тәләсинә дүшәк? Ҝәлин Хосе адлы гардашын башына ҝәләнләрдән данышаг. О, чох уғурлу бизнесмен иди. Јығынҹагда да сајылыб-сечилән бир ағсаггал иди. О, бөјүк топлантыларда чыхышлар едирди. Рајон нәзарәтчиләри онунла мәсләһәтләширди. «Амма мән өз баҹарығыма, өз тәҹрүбәмә ҝүвәнирдим», — дејә о етираф едир вә сөзүнә давам едир: «Јеһова јаддан чыхмышды. Дүшүнүрдүм ки, ҝүҹлүјәм. Она ҝөрә дә Јеһованын вердији мәсләһәтләри вә хәбәрдарлыглары гулагардына вурурдум». Хосе ҹидди ҝүнаһ ишләди вә јығынҹагдан кәнар едилди. Бир нечә ил бундан өнҹә о бәрпа олунуб. Инди Хосе дејир: «Јеһова мәнә өјрәтди ки, өнәмли олан Онун бујругларына әмәл етмәјимиздир, һансыса мөвге саһиби олмағымыз јох». Ҝәлин унутмајаг ки, истәнилән габилијјәти, јығынҹагда алдығымыз истәнилән мәсулијјәти бизә Јеһова вериб. (1 Коринфлиләрә 4:6, 7 ајәләрини охујун.) Гүрурлу олсаг, Јеһова үчүн јарарсыз олаҹағыг.

9. Тамаһкарлыг Шејтаны вә Һәвваны нәјә сүрүкләди?

⁹ Тамаһкарлыг һагда дүшүнәндә ағлымыза илк ҝәлән Шејтан Иблис олур. О, Јеһованын мәләји иди. Сөзсүз ки, онун чохлу мәсулијјәтләри вар иди. Амма Шејтан даһа артығыны арзулады. О истәјирди ки, она ибадәт олунсун. Һалбуки ибадәт јалныз Јеһоваја олунмалыдыр. Шејтан бизи дә өзүнә охшатмаға чалышыр. О истәјир ки, биз саһиб олдуғумуз шејләрә гане олмајаг. О, илк дәфә буна Һәвва илә данышанда ҹәһд етмишди. Јеһова һәм Һәвваны, һәм дә Адәми боллуҹа гида илә тәмин етмишди. Бир ағаҹдан башга, «бағдакы бүтүн ағаҹларын мејвәсиндән» јемәјә иҹазә вермишди (Јар. 2:16). Амма Шејтан Һәвваја тәлгин етди ки, о, гадаған олунмуш ағаҹын да мејвәсиндән јемәлидир. Һәвва да Шејтана ујуб, саһиб олдуғу шејләрә гане олмады, даһа артығыны арзулады. Биз јахшы билирик бу нә илә нәтиҹәләнди. Һәвва ҝүнаһ ишләди вә өлүмә мәһкум олунду (Јар. 3:6, 19).

10. Тамаһкарлыг Давуд үчүн неҹә тәлә олду?

¹⁰ Јеһова Давудун башындан бол-бол немәтләр төкмүшдү. Она вар-дөвләт, падшаһлыг нәсиб етмиш, мүһарибәләрдә гәләбә газандырмышды. Давуд бүтүн бунлара ҝөрә чох миннәтдар иди. О демишди ки, Јеһованын вердији немәтләри сајыб гуртара билмир (Зәб. 40:5). Амма сонрадан Давуд тамаһкарлыг етди вә Јеһованын она вердикләриндән даһа артығыны истәди. Бахмајараг ки, онун чохлу арвады вар иди, башгасынын арвадына тамаһ салды. Бу гадын Бадсәба иди. Онун јолдашы һет Урјај иди. Давуд худбин давраныб Бадсәба илә јахынлыг етди вә гадын һамилә галды. Һәлә бу азмыш кими, Урјајы да өлдүртдү (2 Ишм. 11:2—15). Ҝөрәсән, Давуд нә дүшүнүрдү? Фикирләширди ки, Јеһова ону ҝөрмүр? О, узун мүддәт Јеһоваја сәдагәтлә хидмәт етсә дә, тамаһкарлығын гурбаны олду вә бу она баһа баша ҝәлди. Јахшы ки, Давуд ҝүнаһыны етираф едиб төвбә етди. Ҝөрүн о, јенидән Јеһованын рәғбәтини газандығы үчүн неҹә миннәтдар иди! (2 Ишм. 12:7—13).

11. Ефеслиләрә 5:3, 4 ајәләринә әсасән, тамаһкарлыға үстүн ҝәлмәјә нә көмәк едә биләр?

¹¹ Давудла баш верәнләрдән нә өјрәнирик? Өјрәнирик ки, Јеһованын бизә вердији һәр шејә ҝөрә һәмишә миннәтдар олсаг, тамаһкарлыға үстүн ҝәлә биләҹәјик.  (Ефеслиләрә 5:3, 4 ајәләрини охујун.) Нәјимиз варса, она гане олмалыјыг. Мүгәддәс Китабы јени өјрәнәнләрә мәсләһәт ҝөрүлүр ки, Јеһованын вердији бир немәт үзәриндә дүшүнсүнләр вә буна ҝөрә Она миннәтдарлыгларыны билдирсинләр. Демәли, инсан һәфтә әрзиндә һәр ҝүн буну етсә, һәфтәнин сонунда једди мүхтәлиф мөвзу һаггында дуа етмиш олаҹаг (1 Салон. 5:18). Бәс сиз һәр ҝүн нәјәсә ҝөрә Јеһоваја миннәтдар олурсунуз? Әҝәр Јеһованын сизин үчүн етдији һәр шеј барәдә дүшүнсәниз, онда үрәјиниз шүкран һисси илә долуб-дашаҹаг. Үрәјиниздә шүкран һисси олса, саһиб олдугларыныза гане олаҹагсыныз. Гане оланда исә тамаһкар олмајаҹагсыныз.

12. Тамаһкар олдуғу үчүн Јәһуда Искәрјут нә етди?

¹² Тамаһкарлыг Јәһуда Искәрјуту мәнфур, хаин бир инсана чевирди. Амма о, башланғыҹда белә инсан дејилди (Лука 6:13, 16). Иса ону һәвари сечмишди. Нәзәрә алсаг ки, Иса она пул гутусу тапшырмышды, демәли, о, баҹарыглы вә етибарлы инсан иди. Иса вә һәвариләри бу пулдан тәблиғ заманы јаранан еһтијаҹлары үчүн истифадә едирдиләр. Бир нөв, бу, бу ҝүн үмумдүнја иши үчүн едилән ианәләрә бәнзәјирди. Бир мүддәт сонра Јәһуда оғурлуг етмәјә башлады. Һалбуки, о, Исанын дәфәләрлә тамаһкарлыг һагда етдији хәбәрдарлығы ешитмишди (Марк 7:22, 23; Лука 11:39; 12:15). Амма Јәһуда бу хәбәрдарлыглары гулагардына вурмушду.

13. Јәһуданын тамаһкар олдуғу нә заман үзә чыхды?

¹³ Јәһуданын үрәјиндә тамаһкарлығын баш галдырдығы Исанын өлүмүндән бир мүддәт әввәл баш верән бир һадисәдә үзә чыхды. Иса вә шаҝирдләри, о ҹүмләдән Мәрјәм вә баҹысы Марта ҹүзамлы Шимонун евиндә гонаг идиләр. Јемәк заманы Мәрјәм ајаға галхыб, Исанын башына әтирли јағ төкдү. Бу, чох баһалы јағ иди. Бу, Јәһуданын вә орада отуран шаҝирдләрин хошуна ҝәлмәди. Бәлкә дә, шаҝирдләр дүшүнүрдү ки, бу пуллары хидмәтдә сәрф етсә идиләр, даһа јахшы оларды. Амма Јәһуданын дәрди башга иди. О, «оғру олдуғу үчүн» гутуја атылан пуллары оғурламаг истәјирди. Һәтта даһа сонра тамаһ Јәһудаја о гәдәр ҝүҹ ҝәлди ки, Исаны гул гијмәтинә сатды (Јәһ. 12:2—6; Мәт. 26:6—16; Лука 22:3—6).

14. Бир әр-арвад Лука 16:13 ајәсиндәки мәсләһәтә неҹә әмәл етди?

¹⁴ Иса давамчыларына ваҹиб бир һәгигәти хатырлатмышды: «Сиз һәм Аллаһын, һәм дә вар-дөвләтин нөкәри ола билмәзсиниз». (Лука 16:13 ајәсини охујун.) Бу һәгигәт дәјишмәјиб. Ҝөрүн Румынијадан олан бир әр-арвад Исанын бу сөзләринә неҹә әмәл етди. Онлара јашајыш сәвијјәси јүксәк олан бир өлкәдә мүвәггәти олараг ишләмәк тәклиф олунду. Онлар дејир: «Бизим банка чохлу борҹумуз вар иди. Әввәлҹә елә дүшүндүк ки, бу иш Јеһовадандыр». Интәһасы, бу иш онларын Јеһоваја хидмәтинә әнҝәл олаҹагды. Онлар «Ҝөзәтчи гүлләси»нин 2008-ҹи ил 15 август сајында јерләшән «Сәмими-гәлбдән садиг гал» адлы мәгаләни охујандан сонра гәрарларыны вердиләр. Онлар дејир: «Әҝәр биз башга өлкәјә даһа чох пул газанмаг нијјәти илә көчүрүксә, онда Јеһова илә мүнасибәтләримиз икинҹи дәрәҹәли олаҹаг. Јахшы баша дүшүрдүк ки, руһанилијимиз зәифләјәҹәк». Онлар бу иш тәклифиндән имтина етдиләр. Бәс сонра нә олду? Гардаш өз өлкәсиндә иш тапды вә онун газанҹы еһтијаҹларыны өдәмәјә бәс едирди. Баҹы дејир: «Јеһова хидмәтчиләринин дадына чатмаға гадирдир». Бу әр-арвад пулу јох, Јеһованы өз Ағалары етдикләри үчүн чох хошбәхтдирләр.

15. Шејтанын тәләләриндән азад олмағын мүмкүн олдуғуна нәјә ҝөрә әминик?

¹⁵ Бәс әҝәр ҝөрсәк ки, биздә тамаһкарлыг вә гүрур баш галдырыб, нә етмәлијик? Бу тәләләрдән гуртулмаг мүмкүндүр! Булус демишди ки, Иблисин торуна дири-дири дүшәриксә белә, онун әлиндән азад ола биләрик (2 Тим. 2:26). Белә ки, Давуд Натанын мәзәммәтинә гулаг асды, тамаһкарлыг етдијинә ҝөрә төвбә етди вә Јеһова илә мүнасибәтләрини бәрпа етди. Һеч вахт унутмајын ки, Јеһова Шејтандан гүдрәтлидир. Одур ки, Јеһованын көмәјини гәбул етсәк, Шејтанын гурдуғу истәнилән тәләдән азад ола биләрик.

16. Шејтанын тәләләринә дүшмәмәјә бизә нә көмәк едә биләр?

¹⁶ Әлбәттә, даһа јахшы олар ки, Шејтанын тәләләринә үмумијјәтлә дүшмәјәк. Бу, јалныз Јеһованын көмәји илә мүмкүндүр. Амма ҝәрәк өзүмүзә архајын олмајаг! Һәтта Јеһоваја узун мүддәт хидмәт едән инсанларын үрәјиндә гүрур вә тамаһкарлыг баш галдырыб. Буна ҝөрә һәр ҝүн Јеһоваја дуа едиб јалварын ки, дүшүнҹәнизи вә һәрәкәтләринизи јохламаға сизә көмәк етсин (Зәб. 139:23, 24). Әлиниздән ҝәләни един ки, һеч вахт гүрурлу вә тамаһкар инсан олмајасыныз!

17. Тезликлә дүшмәнимиз Иблислә нә баш верәҹәк?

¹⁷ Шејтан мин илләрин овчусудур. Амма тезликлә о, буховланаҹаг, сонда исә мәһв едиләҹәк (Вәһј 20:1—3, 10). Биз һәмин ҝүнү һәсрәтлә ҝөзләјирик. О вахта гәдәр исә ҝәлин Шејтанын тәләләринә дүшмәмәк үчүн ҝөзүмүзү дөрд ачаг. Вар ҝүҹүнүзлә чалышын ки, гүрур вә тамаһкарлыг сизә һаким кәсилмәсин. «Иблисә мүгавимәт ҝөстәрин вә о, сиздән гачаҹаг» (Јаг. 4:7).