1. Јеһованын ҝүнүндә хилас олмаг үчүн нә етмәлијик?

 МҮГӘДДӘС КИТАБДА «Јеһованын ҝүнү» дејиләндә Онун дүшмәнләрини мәһв етдији вә халгына гуртулуш вердији вахт нәзәрдә тутулур. Гәдимдә Јеһова бәзи халглар үзәриндә һөкмүнү иҹра етмишди (Әшј. 13:1, 6; Һизг. 13:5; Сәф. 1:8). Бизим дөврдә «Јеһованын ҝүнү» Бөјүк Бабилә һүҹум илә башлајыб Армаҝеддон мүһарибәси илә битәҹәк. Һәмин ҝүн хилас олмаг үчүн биз артыг индидән һазырлашмалыјыг. Иса да демишди ки, биз бөјүк мүсибәтә һазыр олмалыјыг. О бу сөзләрлә бир дәфә јох, даима һазыр олмағы нәзәрдә тутурду (Мәт. 24:21; Лука 12:40).

2. Салоникилиләрә биринҹи мәктубун бизә һансы фајдасы вар?

² Һәвари Булус салоникилиләрә јаздығы биринҹи мәктубда бир нечә нүмунә чәкмишди. Бу нүмунәләрлә мәсиһиләрә Јеһованын һөкм ҝүнүнә һазыр олмаға көмәк етмишди. Булус билирди ки, Јеһованын ҝүнү елә бу дәгигә ҝәлмәјәҹәк (2 Салон. 2:1—3). Амма јенә дә онлары тәшвиг етмишди ки, һәмин ҝүн сабаһ ҝәләҹәкмиш кими она һазырлашсынлар. Бу мәсләһәт бизә дә аиддир. Ҝәлин нөвбәти суаллары арашдыраг: 1) Јеһованын ҝүнү неҹә ҝәләҹәк? 2) Һәмин ҝүн кимләр хилас олмајаҹаг? 3) Хилас олмаг үчүн индидән нә едә биләрик? Булусун јаздыглары бу суалларын ҹавабыны тапмаға көмәк едәҹәк.

3. Һансы мәнада Јеһованын ҝүнү ҝеҹә ҝәлән оғру кими ҝәләҹәк? (Һәмчинин шәклә бахын.)

³ «Ҝеҹә ҝәлән оғру кими» (1 Салон. 5:2). Бу, Јеһованын ҝүнүнүн ҝәлишини тәсвир едән үч нүмунәдән биринҹисидир. Оғрулар адәтән ҹәлд һәрәкәт едир вә ҝеҹә вахты инсанларын ҝөзләмәдији бир анда ҝәлир. Јеһованын ҝүнүнүн ҝәлиши дә әксәр инсанлар үчүн ҝөзләнилмәз олаҹаг. Һадисәләрин сүрәтлә ҹәрәјан етмәси һәтта әсл мәсиһиләри дә тәәҹҹүбләндирәҹәк.  Амма шәр инсанлардан фәргли олараг, биз мәһв олмајаҹағыг.

4. Һансы мәнада Јеһованын ҝүнү доғуш санҹыларына бәнзәјир?

⁴ «Һамилә гадыны гәфилдән доғум санҹылары тутдуғу кими» (1 Салон. 5:3). Һамилә гадын доғушун нә вахт башлајаҹағыны дәгиг билмир. Амма о әминдир ки, бу, мүтләг баш верәҹәк. Адәтән доғуш гәфилдән башлајыр, ағрылы вә гачынылмаз олур. Ејнилә биз дә Јеһованын ҝүнүнүн башлајаҹағы ҝүнү вә сааты билмирик. Амма әминик ки, һәмин ҝүн ҝәләҹәк вә Јеһованын шәр инсанлар үзәриндә һөкмү гәфил вә гачынылмаз олаҹаг.

5. Һансы мәнада бөјүк мүсибәт ҝүн ишығына бәнзәјир?

⁵ Ҝүн ишығы кими. Булус үчүнҹү нүмунәсиндә дә ҝеҹә ҝәлән оғрудан данышыр. Амма бу дәфә о, Јеһованын ҝүнүнү ҝүн ишығына бәнзәдир (1 Салон. 5:4). Бәзән ҝеҹә ҝәлән оғруларын башлары елә гарышыр ки, вахтын неҹә кечдијини һисс етмирләр. Ҝүн ишығы исә онлары гәфил јахалајыр вә ишләрини ифша едир. Бөјүк мүсибәт дә оғру кими гаранлыгда Јеһованын бәјәнмәдији ишләри ҝөрәнләри ифша едәҹәк. Онлардан фәргли олараг биз Јеһованын ҝүнүнә һазыр олмалыјыг. Бунун үчүн Јеһованын бәјәнмәдији ишләрдән узаг олмалы вә һәр ҹүр јахшылыға, салеһлијә вә һәгигәтә ҹан атмалыјыг (Ефес. 5:8—12). Даһа сонра Булус кимләрин хилас олмајаҹағыны ҝөстәрмәк үчүн ики нүмунә чәкир.

6. Һансы мәнада әксәр инсанлар јатыр? (1 Салоникилиләрә 5:6, 7).

⁶ «Јатан адам»лар. (1 Салоникилиләрә 5:6, 7 ајәләрини охујун.) Булус Јеһованын ҝүнүндә хилас ола билмәјәҹәк  адамлары јатан адамлара бәнзәдир. Јатан адам әтрафда баш верәнләрдән вә вахтын неҹә кечдијиндән хәбәрсиз олур. Она ҝөрә дә ваҹиб һадисәләри гачырыр. Бу ҝүн дә әксәр инсанлары јатан адамлара бәнзәтмәк олар (Ром. 11:8). Онлар ахырзаманда јашадығымызы вә тезликлә бөјүк мүсибәтин ҝәләҹәјини ҝөстәрән сүбутлара лагејд јанашырлар. Дүнјада баш верән глобал һадисәләр онларын бәзиләрини руһани јухудан ојадыр вә Падшаһлыг хәбәринә мараг јарадыр. Амма чохлары ојаг галмаг әвәзинә, јенидән јухуја ҝедир. Һәтта Јеһованын һөкм ҝүнүнә инананларын бәзиләри дүшүнүр ки, һәлә о ҝүнә чох вар (2 Бут. 3:3, 4). Амма биз баша дүшүрүк ки, һәр өтән ҝүн ојаг галмаг даһа ваҹибдир.

7. Нәјә ҝөрә Јеһованын мәһв едәҹәји инсанлар сәрхошлара бәнзәдилир?

⁷ «Сәрхошлуг едән»ләр. Һәвари Булус Аллаһын мәһв едәҹәји инсанлары сәрхошлара бәнзәдиб. Алкоголун тәсири алтында олан инсанлар әтрафда баш верәнләрә ҝеҹ реаксија верир вә сәһв гәрарлар гәбул едир. Ејнилә шәр инсанлар да Јеһованын хәбәрдарлығына мәһәл гојмурлар. Онлар өзләрини мәһвә апаран јолу сечирләр. Амма Јеһова мәсиһиләри ајдын дүшүнмәјә, ајыг галмаға сәсләјир (1 Салон. 5:6). Бир Мүгәддәс Китаб алими изаһ етмишди ки, «ајыг олмаг сакит вә сабит дүшүнҹәни горумаг демәкдир. Бу заман инсан вәзијјәти һәртәрәфли өлчүб-бичмәји вә дүзҝүн гәрарлар вермәји баҹарыр». Нәјә ҝөрә сакит вә сабит дүшүнҹәни горумалыјыг? Сијаси вә сосиал мәсәләләрә гарышмамаг үчүн. Јеһованын ҝүнү јахынлашдыгҹа бу мәсәләләрдә битәрәф галмаг даһа да чәтин олаҹаг. Бунунла белә, тәзјигләр гаршысында неҹә давранаҹағымыза ҝөрә нараһат олмамалыјыг. Јеһованын руһу бизә сакит вә сабит дүшүнҹәни горумаға вә дүзҝүн гәрарлар вермәјә көмәк едәҹәк (Лука 12:11, 12).

8. Бизә ајыг галмаға көмәк едән хүсусијјәтләр 1 Салоникилиләрә 5:8 ајәсиндә неҹә тәсвир олунуб? (Һәмчинин шәклә бахын.)

⁸ Зиреһи вә дәбилгәни ҝејинин. Булус бизи ојаг олан јараг-јасаглы әсҝәрә бәнзәдир. (1 Салоникилиләрә 5:8 ајәсини охујун.) Һәрби хидмәтдә олан әсҝәр һәр ан дөјүшә һазыр олмалыдыр, ејнилә биз дә. Биз иман вә мәһәббәт зиреһини ҝејинмәклә вә үмид дәбилгәсини башымыза гојмагла Јеһованын ҝүнүнә һазыр ола биләрик. Бу хүсусијјәтләрин бизә бөјүк көмәји дәјир.

9. Иман бизи неҹә горујур?

⁹ Зиреһ әсҝәрин үрәјини горујурду. Иман вә мәһәббәт дә бизим мәҹази үрәјимизи горујур. Онлар бизә даима Јеһоваја хидмәт етмәјә вә Исанын ардынҹа ҝетмәјә көмәк едир. Иманымыз сајәсиндә әминик ки, бүтүн гәлбимизлә Јеһованы ахтарсаг, О бизи мүкафатландыраҹаг (Ибр. 11:6). Иман көмәк едәҹәк ки, чәтинликләрә дөзмәли олсаг белә, Рәһбәримиз Исаја садиг галаг. Бәс иманымызы неҹә мөһкәмләндирә биләрик? Тәгибләр вә мадди чәтинликләр гаршысында садиглијини горујан баҹы-гардашларын нүмунәси барәдә дүшүнмәклә. Һәјатыны садәләшдириб Падшаһлығы һәр шејдән үстүн тутан баҹы-гардашлардан өрнәк ҝөтүрмәк исә бизә маддијјат тәләсинә дүшмәмәјә көмәк едә биләр b.

10. Аллаһа вә инсанлара мәһәббәт бизә тәблиғ ишиндә дөзүмлү олмаға неҹә көмәк едир?

¹⁰ Мәһәббәтин дә ајыг галмағымызда ваҹиб ролу вар (Мәт. 22:37—39). Тәблиғ  етдијимиз үчүн биз мүәјјән чәтинликләрлә үзләшә биләрик, амма Аллаһа мәһәббәт буна бахмајараг, хидмәтимизи давам етдирмәјә көмәк едир (2 Тим. 1:7, 8). Мәһәббәти иманымыза шәрик олмајан инсанлара да ҝөстәрдијимиз үчүн тәблиғ етмәјә вә саһәләримизи ишләмәјә давам едирик, үстәлик, телефон вә мәктуб васитәсилә шаһидлик веририк. Биз инсанларын бир ҝүн дәјишиб дүзҝүн давранаҹагларына үмидимизи итирмирик (Һизг. 18:27, 28).

11. Диндашларымыза мәһәббәтимиз бизи нәјә тәшвиг едир? (1 Салоникилиләрә 5:11).

¹¹ Биз һәм дә баҹы-гардашларымызы севирик. Онлары севдијимизи неҹә ҝөстәририк? Бир-биримизә тәсәлли вермәклә вә мөһкәмләндирмәклә. (1 Салоникилиләрә 5:11 ајәсини охујун.) Дөјүшдә јан-јана вурушан әсҝәрләр кими биз дә бир-биримизә дајаг олуруг. Сөзсүз ки, дөјүшүн гызғын вахтында әсҝәр диҝәр әсҝәр јолдашыны тәсадүфән јаралаја биләр. Амма о буну һеч вахт гәсдән етмәз. Ејнилә биз дә һеч вахт биләрәкдән баҹы-гардашларымызы инҹитмәрик, јахуд пислијә писликлә ҹаваб вермәрик (1 Салон. 5:13, 15). Мәһәббәт ҝөстәрмәјин диҝәр јолу рәһбәрлик едән гардашлара һөрмәт етмәкдир (1 Салон. 5:12). Булус Салоники јығынҹағына илк мәктубуну јазанда јығынҹаг һеч бир ил јох иди ки јаранмышды. Јәгин, тәјин олунмуш гардашлар тәҹрүбәсиз иди вә ола билсин, сәһвләрә јол верирди. Амма онлар јенә дә һөрмәтә лајиг идиләр. Бөјүк мүсибәт јахынлашдыгҹа, ола билсин, биз ҝөстәриш алмаг үчүн ағсаггаллардан индикиндән дә чох асылы олаҹағыг. Ола биләр, һәмин вахт баш идарә вә филиалла әлагәмизи итирәк. Она ҝөрә дә индидән ағсаггаллары севиб онлара һөрмәт етмәк ваҹибдир. Нә олурса олсун, ҝәлин ајыг-сајыглығымызы горујаг, диггәтимизи ағсаггалларын сәһвләринә јох, Јеһованын Иса Мәсиһ васитәсилә онлары истигамәтләндирдијинә јөнәлдәк.

12. Үмид дүшүнҹәмизи неҹә горујур?

¹² Дәбилгә әсҝәрин башыны горудуғу кими хиласа олан үмидимиз дә бизим дүшүнҹәләримизи горујур. Мөһкәм үмид  сајәсиндә бу дүнјанын етдији тәклифләрин пуч олдуғуну баша дүшүрүк (Филип. 3:8). Үмидимиз бизә сакит вә сабит галмаға көмәк едир. Үмид Африкада хидмәт едән Волес вә Лоринда адлы бир әр-арвада да көмәк етмишди. Үч һәфтә әрзиндә онлардан бири анасыны, бири дә атасыны итирди. COVID-19 пандемијасы уҹбатындан онлар өз евләринә гајыдыб аиләләринин јанында ола билмәдиләр. Волес јазмышды: «Дирилмәјә олан үмидим сајәсиндә мән онларын бу дүнјада сон ҝүнләрини јашадығыны јох, јени дүнјада јашајаҹаглары илк ҝүнләрини дүшүнүрәм. Онлары итирдијимә ҝөрә кәдәрләнәндә бу үмид мәни сакитләшдирир».

13. Мүгәддәс руһу алмаг үчүн нә етмәлијик?

¹³ «Руһун аловуну сөндүрмәјин» (1 Салон. 5:19). Булус мүгәддәс руһу дахилимиздә олан алова бәнзәтмишди. Биздә мүгәддәс руһ оланда Јеһованын бәјәндији кими давранмаг истәји ичимиздә алышыб-јаныр вә Онун ишини даһа бөјүк шөвглә, ҹанла-башла јеринә јетиририк (Ром. 12:11). Бәс мүгәддәс руһу алмаг үчүн нә етмәлијик? Дуа едиб ону диләмәлијик, Аллаһын руһу илә јазылмыш Кәламы мүталиә етмәлијик вә Аллаһын руһу илә идарә олунан тәшкилата бағлы олмалыјыг. Бүтүн бунлар бизә «руһун бәһрәси»ни јетишдирмәјә көмәк едәҹәк (Гал. 5:22, 23).

14. Аллаһын руһуну даим алмаг үчүн нәдән гачмалыјыг? (Һәмчинин шәклә бахын.)

¹⁴ Аллаһын мүгәддәс руһуну алдыгдан сонра биз еһтијатлы олмалыјыг ки, «руһун аловуну сөндүрмә»јәк. Аллаһ Өз мүгәддәс руһуну дүшүнҹәсини вә давранышыны тәмиз сахлајанлара верир. Натәмиз фикирләри олан вә бу ҹүр давранан инсана Јеһова даһа мүгәддәс руһуну вермәјәҹәк (1 Салон. 4:7, 8). Биз һәмчинин мүгәддәс руһу алмаг үчүн пејғәмбәрликләрә һәгарәтлә јанашмамалыјыг (1 Салон. 5:20). Бу ајәдә «пејғәмбәрликләр» дејиләндә Аллаһын мүгәддәс руһу илә вердији хәбәрләр нәзәрдә тутулур. Бу хәбәрләрә Јеһованын ҝүнү вә сонун јахын олдуғу  илә бағлы мәлуматлар да дахилдир. Биз Армаҝеддонун бизим јашадығымыз дөврдә ҝәлмәјәҹәјини дүшүнәрәк о ҝүнү ағлымыздан узаглашдырмырыг. Әксинә, Јеһованын ҝүнүнү бәрк-бәрк јадда сахлајараг бир нөв онун ҝәлишини сүрәтләндиририк. Бунун үчүн һәр ҝүн «мөмин» әмәлләрлә мәшғул олуруг вә давранышымызы тәмиз сахлајырыг (2 Бут. 3:11, 12).

15. Јалан мәлуматлара вә ҹинләрин апардығы пропагандаја алданмамаг үчүн нә етмәлијик? (1 Салоникилиләрә 5:21).

¹⁵ Јахын ҝәләҹәкдә Аллаһын дүшмәнләри сүлһә вә тәһлүкәсизлијә наил олдугларыны иддиа едәҹәкләр (1 Салон. 5:3). Ҹинләрин јајдығы пропаганда дүнјаны бүрүјәҹәк вә чохларыны алдадаҹаг (Вәһј 16:13, 14). Бәс биз дә алданаҹағыг? Әҝәр «һәр шејин доғру олуб-олмадығыны» јохласаг, алданмајаҹағыг. (1 Салоникилиләрә 5:21 ајәсини охујун.) «Јохламаг» кими тәрҹүмә олунан јунан сөзү дәјәрли металларын һәгигилијинин јохланылмасына аид истифадә олунан сөз иди. Беләликлә, охудуғумуз вә ешитдијимиз һәр шејин дүзҝүн олуб-олмадығыны јохламалыјыг. Бу, салоникилиләр үчүн ваҹиб иди. Бөјүк мүсибәт јахынлашдыгҹа бизләр үчүн даһа чох ваҹиб олаҹаг. Биз һәр дејилән сөзә инанмырыг, әксинә, ағлымызы ишләдәрәк ешитдијимиз вә охудуғумуз һәр бир шеји Мүгәддәс Китабын вә Јеһованын тәшкилатынын дедикләри илә тутушдуруруг. Бунун сајәсиндә биз ҹинләрин апардығы пропагандаја вә һијләјә алданмајаҹағыг (Мәс. 14:15; 1 Тим. 4:1).

16. Бизим һансы үмидимиз вар вә бу бизи нәјә тәшвиг едир?

¹⁶ Биз билирик ки, Јеһованын халгы бөјүк мүсибәтдән сағ чыхаҹаг. Амма ајры-ајрылыгда сабаһ башымыза нәјин ҝәләҹәјини билмирик (Јаг. 4:14). Истәр бөјүк мүсибәтдән сағ чыхаг, истәрсә дә ондан әввәл өләк, Јеһоваја садиг галсаг, әбәди һәјата говушаҹағыг. Мәсһ олунмушлар Иса илә бирликдә ҝөјдә олаҹаглар. «Башга гојунлар» исә јердә ҹәннәтдә јашајаҹаглар. Ҝәлин бүтүн диггәтимизи мөһтәшәм үмидимизә ҹәмләјәк вә Јеһованын ҝүнүнә һазыр олаг!