1, 2. Лут кими мәсиһиләр дә һансы чәтинликлә үзләшир?

 БУ ДҮНЈАНЫН әхлаг дәјәрләри чох ашағы дүшүб. Буна ҝөрә дә өзүмүзү Аллаһын салеһ бәндәси олан Лут кими һисс едирик. О, «ганун танымајан адамларын азғынлығына ҝөрә» әзаб чәкирди, чүнки билирди ки, Јеһова бу шәр әмәлләрә нифрәт едир (2 Бут. 2:7, 8). Үрәјиндә Аллаһ хофу вә Аллаһ севҝиси олдуғу үчүн Лут әтрафдакы инсанларын әхлагсыз давранышына икраһла јанашырды. Бизим дә әтрафымыздакы инсанлар Јеһованын әхлаг гајдаларына демәк олар ки, мәһәл гојмур. Буна бахмајараг, әҝәр биз Аллаһа севҝимизи горусаг вә үрәјимиздә Аллаһ хофу јетишдирсәк, бу дүнјада әхлаги ҹәһәтдән тәмиз гала биләрик (Мәс. 14:2).

² Буна наил олмаг үчүн Јеһова «Мәсәлләр» китабы васитәсилә бизи доғру јола јөнәлдир. Кишили-гадынлы, бөјүклү-кичикли һәр бир мәсиһи бурадакы мәсләһәтләрин хејрини ҝөрә биләр.

3. Мәсәлләр 17:3 ајәсинә әсасән нәјә ҝөрә үрәјимизи горумалыјыг? (Һәмчинин шәклә бахын.)

³ Нәјә ҝөрә мәҹази үрәјимизи горумалыјыг? Әсас сәбәб одур ки, Јеһова үрәјимизи арашдырыр. Бу исә о демәкдир ки, Јеһова бизә баханда инсанларын ҝөрдүјүндән артығыны ҝөрүр. О бизим дахилән неҹә инсан олдуғумузу јахшы билир. (Мәсәлләр 17:3 ајәсини охујун.) Јеһованын бизи севмәсини истәјириксә, ағлымызы әбәди һәјат верән һикмәтлә долдурмалыјыг (Јәһ. 4:14). Беләҹә, Шејтан вә онун дүнјасы ағлымызы нә руһани, нә дә әхлаги ҹәһәтдән зәһәрләјә билмәјәҹәк (1 Јәһ. 5:18, 19). Јеһоваја јахынлашдыгҹа Она севҝимиз вә һөрмәтимиз артаҹаг. Ону кәдәрләндирмәк истәмәдијимиз  үчүн ҝүнаһ етмәк фикри ағлымызын уҹундан белә кечмәјәҹәк. Јанлыш бир шејә тамаһ саланда бу суал барәдә дүшүнәҹәјик: «Мәнә бу гәдәр мәһәббәт ҝөстәрән Аллаһы билә-билә неҹә кәдәрләндирим?» (1 Јәһ. 4:9, 10).

4. Аллаһ горхусу бир баҹыја нәфсә үстүн ҝәлмәјә неҹә көмәк етмишди?

⁴ Хорватијада јашајан Марта b адлы баҹы аз гала әхлагсызлыг едәҹәкди. О јазмышды: «Ајдын дүшүнмәк вә ҝүнаһдан ани һәзз алмаг истәјини боғмаг чох чәтин иди, амма Јеһовадан горхмаг мәни горуду». Аллаһ горхусу ону неҹә горумушду? Марта дејир ки, верәҹәји сәһв гәрарын нәтиҹәси үзәриндә дүшүндү. Биз дә ејни шеји едә биләрик. Сәһв гәрар вермәклә биз Јеһованы кәдәрләндирәҹәјик вә Она әбәдијјәт боју ибадәт етмәкдән мәһрум олаҹағыг (Јар. 6:5, 6). Бундан бетәр нә ола биләр?

5. Лионун башына ҝәләнләрдән нә өјрәнирсиниз?

⁵ Јеһовадан горхмаг бизә көмәк едир ки, пис әмәлләрә бәраәт газандырмајаг. Конгода јашајан Лио адлы гардаш буну аҹы тәҹрүбәсиндән баша дүшдү. Вәфтиз олундугдан дөрд ил сонра о, пис достларла отуруб-дурмаға башлады. Лио елә фикирләширди ки, нә гәдәр ки өзү пис ишләрлә мәшғул дејил, Јеһоваја гаршы ҝүнаһ ишләмир. Амма чох кечмәмиш бу пис достлары ону спиртли ичкиләрдән чох истифадә етмәјә вә әхлагсызлыг етмәјә сөвг етдиләр. Бундан сонра о, мәсиһи валидејнләринин она өјрәтдикләри барәдә дүшүнмәјә башлады вә әввәлки хошбәхтлијини итирдијини баша дүшдү. Бунун нәтиҹәси нә олду? Лио әмәлләриндә дәјишикликләр етмәјә башлады вә ағсаггалларын көмәји илә Јеһоваја ҝери дөндү.  Һал-һазырда о, ағсаггал вә хүсуси өнҹүл кими Јеһоваја севинҹлә гуллуг едир.

6. Инди һансы ики мәҹази гадындан данышаҹағыг?

⁶ Ҝәлин Мәсәлләр 9-ҹу фәсли арашдыраг. Орада ики гадын тәсвир олунуб. Бири һикмәтин, о бири исә ахмаглығын рәмзидир c. Буну арашдыраркән унутмајын ки, Шејтан дүнјасы әхлагсызлыға вә порнографијаја алудә олуб (Ефес. 4:19). Буна ҝөрә дә Аллаһ хофу јетишдирмәк вә шәрдән узаг дурмаг чох ваҹибдир (Мәс. 16:6). Киши вә ја гадын олмағымыздан асылы олмајараг, һамымыз бу фәсилдән ваҹиб дәрсләр өјрәнә биләрик. Һәр ики гадын ҹаһилләрә, ағылсызлара бир нөв белә дејир: «Ҝәл евимә јемәк је» (Мәс. 9:1, 5, 6, 13, 16, 17). Амма бу ики гадынын дәвәтини гәбул едәнләри фәргли агибәт ҝөзләјир.

7. Мәсәлләр 9:13—18 ајәләринә әсасән ахмаг гадынын дәвәтини гәбул едәнләрин агибәти неҹә олур? (Һәмчинин шәклә бахын.)

⁷ Ҝәлин илк нөвбәдә «ахмаг гадын»ын дәвәти һагда данышаг. (Мәсәлләр 9:13—18 ајәләрини охујун.) О, арсызҹасына ҹаһилләри һајлајыб онунла бир сүфрә архасында отурмаға чағырыр. Онун дәвәтини гәбул едәнләрин агибәти неҹә олур? Онларын хәбәри јохдур ки, «өлүмүн дустаглары орададыр». Јәгин, јадыныздадыр, «Мәсәлләр» китабынын әввәлки фәсилләриндә дә белә мәҹазлардан истифадә олунуб. Орада хәбәрдарлыг олунур ки, өзүмүзү «позғун», «әхлагсыз» гадындан ҝөзләјәк. Јазылыб: «Онун еви өлүмә апарыр» (Мәс. 2:11—19). Мәсәлләр 5:3—10 ајәләриндә башга бир «позғун гадын» һагда хәбәрдарлыг вар. Орада дејилир ки, онун «ајаглары өлүмә апарыр».

8. Һансы гәрары вермәлијик?

⁸ Ахмаг гадынын чағырышыны ешидәнләр гәрар вермәлидирләр: онлар дәвәти ја гәбул етмәли, ја да рәдд етмәлидирләр. Ола билсин, биз дә белә бир гәрар гаршысындајыг. Кимсә бизи әхлагсызлыға тәһрик едәндә, телевизорда вә ја интернетдә порнографик ҝөрүнтүләрлә гаршылашанда һансы гәрары верәҹәјик?

9, 10. Һансы сәбәбләрә ҝөрә ҹинси әхлагсызлыгдан узаг олмалыјыг?

⁹ Биз ҹинси әхлагсызлыгдан чәкинмәлијик. Бунун үчүн әсаслы сәбәбләр вар. «Ахмаг гадын» белә дејир: «Оғурлуг су ширин олар». «Оғурлуг су» нәдир? Мүгәддәс Китабда әрлә арвад арасындакы јахынлыг тәравәт ҝәтирән суја бәнзәдилир (Мәс. 5:15—18). Гануни никаһда олан киши илә гадын бир-бири илә ҹинси мүнасибәтдән һәзз ала биләр. Амма «оғурлуг су» барәдә буну гәтијјән демәк олмаз. Ола билсин, «оғурлуг су» дејиләркән  гадаған олунмуш ҹинси мүнасибәтләр нәзәрдә тутулур. Чох вахт әхлагсызлыг едәнләр өз әмәлләрини оғрутәк хәлвәтдә едирләр. Әмәлләри онлара «ширин» су кими ҝәлир. Нәјә ҝөрә? Јәгин, онлар дүшүнүр ки, ҝөрдүкләри ишин үстү ачылмајаҹаг. Амма онлар неҹә дә јанылырлар! Јеһова һәр шеји ҝөрүр. Онун рәғбәтини итирмәкдән бетәр һеч нә ола билмәз. Белә бөјүк иткидән сонра бу суја «ширин» демәк олар? (1 Кор. 6:9, 10). Амма бу һәлә дәрдин јарысыдыр.

¹⁰ Ҹинси әхлагсызлыг рүсвајчылыға, арзуолунмаз һамиләлијә, аиләләрин дағылмасына ҝәтириб чыхарыр, инсан өзүнә олан һөрмәтини итирир. Ајдын мәсәләдир ки, ағыллы адам ахмаг гадынын «евиндән», сүфрәсиндән узаг олар. Әхлагсызлыг едән инсанларын чоху руһани ҹәһәтдән өлмәклә јанашы, вахтсыз өлүмлә нәтиҹәләнән хәстәликләрә дә тутулурлар (Мәс. 7:23, 26). Мәсәлләр 9-ҹу фәсил белә јекунлашыр: «Онун гонаглары Мәзарын дәринликләриндәдир». Бәс онда нәјә ҝөрә чохлары белә бир фаҹиә илә нәтиҹәләнән дәвәти гәбул едир? (Мәс. 9:13—18).

11. Нәјә ҝөрә порнографијаја бахмаг сон дәрәҹә зәрәрлидир?

¹¹ Чохлары порнографија тәләсинә дүшдүјү үчүн онун дәвәтини гәбул едир. Онлар елә дүшүнүр ки, порнографијаја бахмағын инсана һеч бир зәрәри јохдур. Әслиндә исә порнографија чох зәрәрлидир. О, инсанын ләјагәтини алчалдыр вә асылылыг јарадыр. Позғун шәкилләр инсанын јаддашына һәкк олунур, онлары бејиндән силиб атмаг чәтиндир. Үстәлик, порнографија инсанын еһтирасыны өлдүрмүр, әксинә, даһа да аловландырыр (Кол. 3:5; Јаг. 1:14, 15). Елә буна ҝөрә дә порнографијаја баханларын әксәријјәти сонда әхлагсызлыг едир.

12. Еһтирас ојадан шәкилләрдән өзүмүзү горудуғумузу неҹә ҝөстәрә биләрик?

¹² Електрон ҹиһазда гаршымыза порнографик шәкилләр чыхса, неҹә давранмалыјыг? Дәрһал ҝөзүмүзү чәкмәлијик. Јеһова илә достлуғумузун һәјатда саһиб олдуғумуз ән дәјәрли шеј олдуғуну јадымыза салсаг, белә давранмаг асан олаҹаг. Һәтта порнографија сајылмајан шәкилләр дә инсанда еһтирас ојада биләр. Нәјә ҝөрә онлара бахмамалыјыг? Чүнки үрәјимиздә зина етмәјә сәбәб олаҹаг кичик аддым белә атмаг истәмирик (Мәт. 5:28, 29). Таиландда ағсаггал кими хидмәт едән Дејвид адлы бир гардаш дејир: «Өз-өзүмә дүшүнүрәм, бу шәкилләр порнографија олмаса да, онлара бахмағым Јеһованын хошуна ҝәләр? Бунлары фикирләшәндә дүзҝүн давранмаг асан олур».

13. Һикмәтли давранмаға бизә нә көмәк едир?

¹³ Һикмәтли давранмаға бизә нә көмәк едә биләр? Јеһованы наразы салмаг горхусуну јетишдирмәк. Аллаһ горхусу «һикмәтин башы»дыр, јәни тәмәлидир (Мәс. 9:10). Буну Мәсәлләр 9-ҹу фәслин әввәлиндә ајдын ҝөрмәк олар. Орада «һәгиги һикмәт» барәдә бәһс олунур. Орижинал дилдә һикмәт гадын образы илә тәсвир олунуб.

14. Мәсәлләр 9:1—6 ајәләриндә һансы фәргли дәвәт вар?

¹⁴ Мәсәлләр 9:1—6 ајәләрини охујун. Бурада һәгиги һикмәтин Мәнбәји вә Баниси олан Јараданымыздан ҝәлән дәвәт вар (Мәс. 2:6; Ром. 16:27). Ајәләрдә једди сүтуну олан бөјүк бир евдән данышылыр. Бу, Јеһованын нә гәдәр сәхавәтли олдуғуну ҝөстәрир. Јеһова Ондан һикмәт алмаг истәјәнләрә гапысыны тајбатај ачыр.

15. Јеһова бизи нәјә дәвәт едир?

¹⁵ Јеһова сәхавәтли вә бол рузи јетирән  Аллаһдыр. Мәсәлләр 9-ҹу фәсилдә гадын образы илә тәсвир олунан һәгиги һикмәтдә дә бу хүсусијјәтләр вар. Ајәләрдә бу мәҹази гадынын һејванларыны кәсдији, шәрабына әдва вурдуғу вә сүфрәсини ачдығы дејилир (Мәс. 9:2). Даһа сонра 4 вә 5-ҹи ајәләрдә белә јазылыб: «О, [һәгиги һикмәт] ағылсызлара белә дејир: “Ҝәлин чөрәјимдән јејин”». Нәјә ҝөрә биз һәгиги һикмәтин евинә ҝедиб онун ачдығы сүфрәдә јемәк јемәлијик? Чүнки Јеһова истәјир ки, өвладлары һикмәтли даврансынлар вә шәр-хәтадан узаг олсунлар. Јеһова һеч вахт истәмәз ки, өвлады башы даша дәјәндән, јәни әзаб, пешманчылыг чәкәндән сонра нәтиҹә чыхарсын. Елә буна ҝөрә дә О, «һикмәти дүрүст адамлар үчүн горујур» (Мәс. 2:7). Јеһова хофу көмәк едир ки, Ону разы салмаға чалышаг. Онун һикмәтли мәсләһәтини ешидиб өјрәндикләримизә үрәкдән әмәл едәк (Јаг. 1:25).

16. Аллаһ горхусу Алан гардаша һикмәтли гәрар вермәјә неҹә көмәк етди вә бунун һансы нәтиҹәси олду?

¹⁶ Аллаһ горхусу Алан адлы бир ағсаггала дүзҝүн гәрар вермәјә көмәк етмишди. О, мәктәбдә мүәллим ишләјир. Алан дејир: «Һәмкарларым порнографик филмләрә онлара ҹинси тәрбијә верән бир васитә кими јанашырдылар». Амма Алан гардаш бу фикирләрә алданмады. О дејир: «Мән Јеһованы севирәм, Ондан горхурам. Буна ҝөрә дә онлара гәти шәкилдә билдирдим ки, бу филмләрә гәтијјән бахмајаҹағам. Һәмчинин бунун сәбәбини дә изаһ етдим». Алан һәгиги һикмәтин мәсләһәтинә әмәл едиб «дәрракә јолу илә» јеријирди (Мәс. 9:6). Бәзи һәмкарлары Аланын гәти мөвгејини ҝөрүб Мүгәддәс Китабы өјрәнмәјә вә јығынҹаг ҝөрүшләриндә иштирак етмәјә башлајыблар.

17, 18. Һәгиги һикмәтин дәвәтини гәбул едәнләр һансы немәтләри алырлар вә гаршыда онлары нә ҝөзләјир? (Һәмчинин шәклә бахын.)

¹⁷ Јеһова бизим ҝәләҹәјимизи ҝөзәл ҝөрмәк истәјир. Буна ҝөрә дә ики мәҹази гадын образы васитәсилә бизә нәсиһәт верир. Һај-күј салан ахмаг гадынын сәсинә һај верәнләр әхлагсызлығын анҹаг «ширин» тәрәфини ҝөрүрләр, хәлвәтдә әхлагсызлыгдан һәзз алмаг истәјирләр. Амма онлар һеч дүшүнмүрләр ки, бу ани һәзз онларын ҝәләҹәјини мәһв едир. Онларын ахыры мәзардыр (Мәс. 9:13, 17, 18).

¹⁸ Һәгиги һикмәтин дәвәтини гәбул едәнләри исә тамамилә фәргли ҝәләҹәк ҝөзләјир! Һал-һазырда онун гонаглары јахшы тәшкил олунмуш руһани зијафәтдәдирләр. Бу зијафәтин сүфрәсини сағлам вә бир-бириндән ләзиз тәамлар бәзәјир (Әшј. 65:13). Әшија пејғәмбәр васитәсилә Јеһова дејир: «Мәнә диггәтлә гулаг асын, јахшы шејләр  јејин, гој ҹаныныз ләзиз тәамлардан ләззәт алсын» (Әшј. 55:1, 2). Биз Јеһованын севдији шејләри севмәји, нифрәт етдији шејләрә исә нифрәт етмәји өјрәнирик (Зәб. 97:10). Чох хошбәхтик ки, һәгиги һикмәтдән өјрәнмәјә башгаларыны да дәвәт етмәк фүрсәтимиз вар. Санки биз шәһәрин һүндүр јерләриндә дуруб: «Ҹаһилләр бура ҝәлсин»,— дејә ҹар чәкирик. Һәм бу дәвәтә һај верәнләр, һәм дә биз һикмәтин хејрини тәкҹә инди ҝөрмүрүк. Бунун фајдасы сонсуздур, чүнки «дәрракә јолу илә» јеријиб әбәди јашамағымыза јол ачыр (Мәс. 9:3, 4, 6).

19. Ваиз 12:13, 14 ајәләринә әсасән нә етмәјә әзмли олмалыјыг? (Һәмчинин « Аллаһ горхусунун бизә хејри» адлы чәрчивәјә бахын.)

¹⁹ Ваиз 12:13, 14 ајәләрини охујун. Ҝәлин үрәјимиздә Аллаһ горхусу јетишдирәк. Бунун сајәсиндә бу шәр дүнјанын сонунда әхлаги тәмизлијимизи горујаҹағыг вә Јеһова илә достлуғумуз мөһкәм олаҹаг. Аллаһы наразы салмаг горхусу бизи тәшвиг едәҹәк ки, мүмкүн гәдәр чох инсаны һәгиги һикмәти тапмаға вә ондан өјрәнмәјә дәвәт едәк.