1. Биринҹи әсрдәки мәсиһиләр һансы чәтинликләрлә үзләширдиләр?

ҺӘВАРИ Бутрус 62—64-ҹү илләр арасы «Понт, Галатија, Каппадокија, Асија вә Битинијаја сәпәләнмиш гәрибләрә» мәктуб јазмышды (1 Бут. 1:1). Фәргли мәдәнијјәтләрдән олан бу баҹы-гардашларын руһланмаға вә мәсләһәтә еһтијаҹы вар иди. Онлар ҝүҹлү тәгибләрә вә тәһгирләрә мәруз галмышдылар. Бутрусун мәктубдакы «һәр шејин сону јахындыр» сөзләриндән ајдын олур ки, «одлу-аловлу сынаглар»дан кечән бу диндашларымыз, һәмчинин чох ҝәрҝин бир вахтда јашајырдылар. О дәһшәтли ҝүнә, Јерусәлимин дағылаҹағы вахта һарадаса он ил галмышды. Мүхтәлиф әразиләрдә јашајан мәсиһиләрә бу кешмәкешли дөврдә мөһкәм галмаг үчүн көмәк лазым иди (1 Бут. 4:4, 7, 12).

2, 3. Нәјә ҝөрә һәвари Бутрус мәсиһиләри гонагпәрвәр олмаға сәсләјирди? (Мәгаләнин әввәлиндәки шәклә бахын.)

² Бутрус мәктубунда бир сыра мәсләһәтләрлә јанашы баҹы-гардашлары бир-биринә гонагпәрвәрлик ҝөстәрмәјә сәсләјирди (1 Бут. 4:9). «Гонагпәрвәрлик» кими тәрҹүмә олунан јунан сөзү «гәрибләрә мәһәббәт вә ја хејирхаһлыг» мәнасыны дашыјыр. Диггәт јетирин ки, һәвари мәсиһиләри јадлара јох, бир-биринә, нечә вахтдыр таныдыглары, үнсијјәт етдикләри инсанлара гонагпәрвәрлик ҝөстәрмәјә тәшвиг едирди. Ҝөрәсән, бунун онлара һансы көмәји дәјә биләрди?

 ³ Гонагпәрвәрлик онлары бир-биринә јахын, меһрибан едәҹәкди. Јәгин, гонагпәрвәрлијин бу ҹүр мүсбәт тәсир ҝөстәрдијини сиз дә өз тәҹрүбәниздән ҝөрмүсүнүз. Мәсәлән, јадыныза салын, кимсә сизи евинә гонаг чағыранда сизә неҹә хош олмушду. Тәбии ки, бу гонаглыгдан галан хош хатирәләрин дә өз јери вар. Ола билсин, јығынҹагдан кимисә гонаг чағырандан сонра онунла мүнасибәтинизин неҹә јахшылашдығы јадыныза дүшүр. Бәли, гонагпәрвәрлик ҝөстәрмәк бир-биримизи јахындан танымағын ән ҝөзәл јолудур. Һәвари Бутрусун дөврүндә јашајан мәсиһиләр бир-биринә јахын олмалы идиләр, чүнки вәзијјәт ҝетдикҹә ағырлашырды. Бу, бизә дә аиддир, ахы биз дә ахырзаман кими ағыр бир вахтда јашајырыг (2 Тим. 3:1).

4. Бу мәгаләдә һансы суаллар нәзәрдән кечириләҹәк?

⁴ Инди исә ҝәлин ҝөрәк баҹы-гардашлара гонагпәрвәрлик ҝөстәрмәк үчүн һансы фүрсәтләримиз вар? Бизә гонагпәрвәрлик ҝөстәрмәјә әнҝәл олан манеәләри неҹә аша биләрик? Вә бизи гонаг чағырыбларса, неҹә давранмалыјыг?

5. Ҝөрүшләримиздә гонагпәрвәрлији неҹә ҝөстәрә биләрик?

⁵ Ҝөрүшләримиздә. Јеһова Аллаһ вә Онун тәшкилаты бизи һәр һәфтә ибадәт ҝөрүшләринә, руһани сүфрәјә гонаг чағырыр. Биз дә ҝөрүшләрә ҝәлән диҝәр гонаглары хош гаршыламаға чалышырыг (Ром. 15:7). Јени гонаглары гаршыламагла исә биз бир нөв Јеһова илә бирҝә ев саһиблији етмиш олуруг. Одур ки, ҝәлин јығынҹаға тәзә ҝәлән һәр кәсә, үст-башына, ҝејим-кеҹиминә фәрг гојмадан «хошҝәлдин» дејәк (Јаг. 2:1—4). Ҝөрсәк ки, һәлә һеч ким онлара јахынлашмајыб өз јанымызда отурмағы тәклиф едә биләрик. Онлара ҝөрүшүн ҝедишаты илә бағлы мәлумат версәк, ајәләр охунанда изләмәјә көмәк етсәк, сөзсүз ки, онлара хош олар. Бу, «гонагпәрвәр олун» мәсләһәтинә әмәл етмәк үчүн ҝөзәл бир фүрсәтдир (Ром. 12:13).

6. Евимизин истәкли гонаглары кимләр олмалыдыр?

⁶ Гәлјаналтыја вә ја јемәјә дәвәт един. Пејғәмбәрләрин дөврүндә гонаға сүфрә ачмаг гонагпәрвәрлик әламәти иди. Киминләсә дуз-чөрәк кәсмәк достлуға вә меһрибанчылыға дәвәт сајылырды (Јар. 18:1—8; Һак. 13:15; Лука 24:28—30). Бәс бизим евимизин, сүфрәмизин истәкли гонаглары кимләр олмалыдыр? Тәбии ки, јығынҹағымыздакы баҹы-гардашлар, һәјатымызын ајрылмаз һиссәси олан диндашларымыз. Ахы дар ҝүнүмүздә бизә бир-биримиздән савајы һеч ким дајаг олмајаҹаг. Биз онларла дост олмалы, меһрибан мүнасибәт сахламалыјыг. Јери дүшмүшкән, 2011-ҹи илдә Рәһбәрлик Шурасы АБШ-дакы Бејтелдә мараглы бир дәјишиклик етмишди. «Ҝөзәтчи гүлләси» мүзакирәсинин вахтыны 18:45-дән 18:15-ә кечирмишди. Билирсиниз нијә? Еланда дејилмишди ки, ҝөрүш бир аз тез битдији үчүн бејтеллиләрә бир-бирини гонаг чағырмаг даһа раһат олар. Сонра диҝәр филиаллар да бу ҝөрүшү ејни гајда илә кечирмәјә башлады. Бунун сајәсиндә бејтеллиләр бир-биринә даһа јахын олублар.

7, 8. Јығынҹағымыза мәрузә сөјләмәјә ҝәлән гардашлара неҹә гонагпәрвәрлик ҝөстәрә биләрик?

⁷ Јығынҹағымызда мәрузә илә чыхыш едән гардашлары, рајон нәзарәтчисини вә ара-сыра филиал нүмајәндәсини ҝөрмәк бизә чох хош олур. Бу зијарәтләр онлара гонагпәрвәрлик ҝөстәрмәк үчүн әла фүрсәтдир. (3 Јәһја 5—8 ајәләрини охујун.) Бу фүрсәтдән истифадә едиб онлары јүнҝүл гәлјаналтыја вә ја јемәјә дәвәт етмәк олар.

⁸ АБШ-да јашајан бир баҹы дејир: «Узун илләр јолдашымла мән јығынҹағымызда мәрузә дејән гардашлары вә һәјат јолдашларыны евимиздә гонаг етмишик. Һәр гонаглыг чох хош вә шән кечиб, ән әсасы исә бу ҝөрүшләр бизим иманымызы мөһкәмләндириб. Буна ҝөрә гәтијјән пешман дејилик».

9, 10. а) Кимләри евимиздә гонаг галмаға дәвәт едә биләрик? б) Шәраити зәиф олан баҹы-гардашлар да гонагпәрвәрлик ҝөстәрә биләрми? Мисал чәкин.

⁹ Гонаг галмаға дәвәт един. Гәдимдә  гонагпәрвәрлијә, һәмчинин гонаг үчүн евдә јер ајырмаг да дахил иди (Әјј. 31:32; Флм. 22). Бизим дөврдә дә, бәзән буна еһтијаҹ јараныр. Мәсәлән, рајон нәзарәтчиләри јығынҹаглары зијарәт едәндә онлара галмаг үчүн јер лазым олур. Теократик мәктәбләрдә тәлим алан баҹы-гардашлар вә тикинтидә иштирак едән көнүллүләр дә бу ҹүр гајғыја еһтијаҹ дујур. Бу ҹүр гонагпәрвәрлији, хүсусилә тәбии фәлакәт нәтиҹәсиндә евсиз-ешиксиз галан диндашларымыза ҝөстәрмәк лазымдыр. Өз евләри тәмир олунана кими онларла евимизи пајлаша биләрик. Биз дүшүнмәмәлијик ки, бу, анҹаг јахшы ев-ешији оланларын өһдәсинә дүшүр. Јәгин онлар артыг дәфәләрлә буну едибләр. Биз шәраити зәиф олан диндашларымызы да еһтијаҹы оланлара евләринин гапысыны ачмаға сәсләјирик.

¹⁰ Ҹәнуби Корејадан олан бир гардаш теократик мәктәбләрдә охујан баҹы-гардашларын онларда галдығы вахтлары хатырлајараг јазмышды: «Тәзә-тәзә мән чох сыхылырдым. Чүнки һәм тәзә евләнмишдик, һәм дә евимиз чох балаҹа иди. Амма бу баҹы-гардашлары гонаг етмәјимиз бизим ҝәнҹ аиләјә чох шеј өјрәтди. Биздә галан әр-арвадларын тимсалында ҝөрүрдүк ки, Јеһоваја бирҝә хидмәт етмәк, бирҝә руһани мәгсәдләрә ҹан атмаг аиләни неҹә хошбәхт едир».

11. Нәјә ҝөрә јығынҹағымыза тәзә кечәнләрә гонагпәрвәрлик ҝөстәрмәлијик?

¹¹ Јығынҹағыныза јени кечәнләр. Ола билсин, сизин јығынҹагда башга јығынҹагдан кечән баҹы-гардашлар вар. Онлардан бәзиләри јәгин ки, тәблиғчиләрә еһтијаҹ олдуғу үчүн кечиб. Бәлкә дә онларын арасында јығынҹағыныза көмәк мәгсәдилә ҝөндәрилән өнҹүлләр дә вар. Бу баҹы-гардашлар һәјатларында чох шеј дәјишмәли олублар. Инди онлар үчүн чох шеј јенидир: әрази, јығынҹаг, һәтта, ола билсин, дил вә мәдәнијјәт дә. Ҝәлин онлара көмәк әлимизи узадаг: онлары гәлјаналтыја, јемәјә вә ја ҝәзинтијә дәвәт едәк. Бу, онлара јени достлар газанмаға вә јени шәраитә өјрәшмәјә көмәк едәҹәк.

12. Һансы һадисәдән ҝөрүнүр ки, гонагпәрвәрлик ҝөстәрмәк үчүн чох шеј лазым дејил?

¹² Гонагпәрвәр олмаг үчүн тәмтәраглы сүфрә ачмаға еһтијаҹ јохдур. (Лука 10:41, 42 ајәләрини охујун.) Буну бир гардашын сөзләриндән ҝөрмәк олар. Һәјат јолдашы илә бирҝә хүсуси тәјинатлы мүждәчи кими хидмәт етдији илк ҝүнләри хатырлајараг гардаш дејир: «Онда биз чох ҹаван вә тәҹрүбәсиз идик. Аиләмиз үчүн дә чох дарыхырдыг. Бир ахшам арвадым о дәрәҹәдә дарыхырды ки, нә етсәм, кефини ача билмирдим. Һарадаса саат сәккизин јарысы оларды гапымыз дөјүлдү. Гапыны ачанда ҝөрдүк ки, Мүгәддәс Китабы өјрәнән бир гадын әлиндә үч әдәд портағал гапынын ағзында дуруб. О, бизимлә саламлашмаға ҝәлмишди. Ону ичәри дәвәт етдик. Әввәлҹә она бир стәкан су вердик. Сонра чај дәмләдик, исти шоколад дүзәлтдик. Лакин бир проблем вар иди, нә биз суаһили дилини билирдик, нә о, инҝилис дилини. Амма бу һадисә јығынҹагда ҝөзәл достлар газанмағымыза тәкан олду».

13. Гонагпәрвәр олмағын һансы фајдалары вар?

¹³ Бәзи инсанлар гонаг чағырмаға чәкинир. Амма бунунла онлар өзләрини хош үнсијјәтдән, өмүрлүк достлар газанмаг фүрсәтиндән мәһрум едирләр. Гејд едәк ки, гонагпәрвәрлик тәнһалыға гаршы ән ҝүҹлү дәрмандыр. Бәс бәзиләринә гонаг чағырмаға мане олан нәдир? Сәбәбләр мүхтәлифдир.

14. Әҝәр гонаг чағырмамаға сәбәб вахтымызын вә ҝүҹүмүзүн мәһдуд олмасыдырса, вәзијјәти неҹә дүзәлдә биләрик?

¹⁴ Вахтын вә ҝүҹүн азлығы. Дүздүр, Јеһованын хидмәтчиләри чох мәшғул инсанлардыр вә чијинләриндә чохлу мәсулијјәт јүкү дашыјырлар. Бу сәбәбдән бәзиләри гонаг чағырмаг үчүн вахтынын вә ҝүҹүнүн олмадығыны дејә биләр. Әҝәр сиздә дә вәзијјәт бу јердәдирсә, јахшы оларды, өз ҝүндәлик ҹәдвәлинизи нәзәрдән кечирәсиниз. Гонаг ҝетмәк, гонаг чағырмаг үчүн вахтыныз вә ҝүҹүнүз олсун дејә, ола билсин, ҹәдвәлиниздә мүәјјән дәјишиклик  етмәк лазым ҝәлсин. Бу ҹүр шејләрә вахт ајырмаг һеч дә гәбаһәт дејил, әксинә бу чох ваҹибдир. Чүнки Аллаһын Кәламы мәсиһиләри гонагпәрвәр олмаға сәсләјир (Ибр. 13:2). Ола билсин, бунун үчүн аз әһәмијјәтли ишләрә ајырдығыныз вахтдан кәсмәли олаҹагсыныз.

15. Бәзи мәсиһиләри гонаг чағырмагла бағлы һансы фикир нараһат едир?

¹⁵ Өзүмүзлә бағлы мәнфи фикирләр. Елә олубму ки, кимисә гонаг чағырмаг истәмисиниз, амма буну баҹармајаҹағынызы дүшүнүб фикриниздән дашынмысыныз? Ола билсин, сәбәб утанҹаг олмағыныздыр вә ја фикирләширсиниз ки, сизинлә үнсијјәт етмәк гонаглара дарыхдырыҹы олаҹаг. Јахуд да әлиниз ашағы олдуғундан гонаглары јығынҹагдакы диҝәр баҹы-гардашлар кими гаршылаја билмәјәҹәјинизи дүшүнмүсүнүз. Ев мәсәләсинә ҝәлдикдә исә, әсас евин тәмтәрағы дејил, онун тәмиз вә раһат олмасыдыр.

16, 17. Гонаг чағырмагла бағлы нараһатлығы нә азалда биләр?

¹⁶ Гонаг чағырмагла бағлы нараһатлыг кечирән тәк сиз дејилсиниз. Ҝәлин ҝөрәк, Британијадан олан бир ағсаггал бу барәдә нә дејир: «Гонаг чағыранда инсаны ән чох һәјәҹана салан һазырлыг просеси олур. Јеһоваја хидмәтлә бағлы истәнилән мәсәләдә олдуғу кими, бу мәсәләдә дә әлдә олунан фајда вә мәмнунлуг о һәјәҹаны унутдурур. Мәнә гонагларла бир јердә отуруб садәҹә кофе ичиб сөһбәт етмәк дә севинҹ ҝәтирир». Сизә бир мәсләһәт верәк: гонағыныза диггәт вә гајғы ҝөстәрин, о, сиздән јүз фаиз разы галаҹаг (Филип. 2:4). Демәк олар, һамы өз һәјатыны данышмағы севир. Одур ки, гонаглыглар баҹы-гардашларын һәјат һекајәсини динләмәк үчүн ҝөзәл имкандыр. Бир ағсаггал гардаш јазмышды: «Јығынҹагдакы дост-танышлары евә гонаг чағырмаг мәнә онлары даһа јахшы баша дүшмәјә көмәк едир, һәмчинин онлары даһа јахындан танымаг, хүсусилә дә һәгигәтә неҹә ҝәлдикләрини өјрәнмәк үчүн ҝөзәл имкан јарадыр». Бәли, мәһәббәт вә диггәт һәр бир гонағы мәмнун едән хүсусијјәтдир.

¹⁷ Теократик мәктәбләрдә тәлим алан баҹы-гардашлары евиндә гонаг едән бир баҹы дејир: «Дүзү, әввәл-әввәл евимдә гонаг гәбул еләмәјә утанырдым. Чүнки евим касыбјана, мебелләрим ишләнмиш иди. Бу мәктәбләрин бириндә дәрс дејән бир гардашын һәјат јолдашынын сөзләри мәнә раһатлыг верди. О деди ки, һәјат јолдашы илә бирликдә сәјјар хидмәтдә оланда јадларында галан ән ҝөзәл һәфтәләр руһани ҹәһәтдән јеткин баҹы-гардашларын евиндә кечирдикләри һәфтәләр олуб. Бу баҹы-гардашлар варлы дејилдиләр, амма әсас о иди ки, онларын мәгсәдләри бизимки илә үст-үстә дүшүрдү: онлар Јеһоваја хидмәт етмәјә вә садә јашамаға чалышырдылар. Баҹынын бу сөзләри, бир вахтлар анамын дедији сөзләри јадыма салды. О дејәрди: “Мәһәббәт олан јердә тәрәвәз јемәк даһа јахшыдыр”» (Мәс. 15:17). Ҝөрдүјүмүз кими, гонаг чағыранда нараһат олмаға дәјмәз. Гонағынызын разы галмасыны истәјирсинизсә, она мәһәббәт ҝөстәрин.

18, 19. Гонагпәрвәрлик киминсә һаггында јаранан мәнфи фикри арадан галдырмаға неҹә көмәк едир?

¹⁸ Кимәсә гаршы јаранан мәнфи фикир. Јығынҹағынызда һәрәкәтләри илә сизи гыҹыгландыран инсан варса, она мүнасибәтинизи дүзәлтмәјә чалышын, әкс һалда бу һиссләр дәринләшә биләр. Јәгин ки, һәмин инсанын хасијјәтини бәјәнмәдијиниз үчүн ону гонаг чағырмаг истәмәјәҹәксиниз. Даһа бир сәбәб о ола биләр ки, диндашыныз вахтилә сизин хәтринизә дәјиб вә сиз онун бу һәрәкәтини унуда билмирсиниз.

¹⁹ Инсанларла, һәтта дүшмәнләримизлә мүнасибәтләримизи јахшылашдырмаг үчүн Мүгәддәс Китаб бизи гонагпәрвәр олмаға сәсләјир. (Мәсәлләр 25:21, 22 ајәләрини охујун.) Киминләсә аранызда сојуглуг вә ҝәрҝинлик варса, ону гонаг чағырмагла мүнасибәти дүзәлтмәк олар. Беләҹә, һәмин инсанын ҝөзәл ҹәһәтләрини кәшф едә биләрсиниз, о ҹәһәтләри ки, Јеһова бу инсанда ҝөрүб ону һәгигәтә ҹәлб едиб (Јәһ. 6:44). Сиздән гонагпәрвәрлик ҝөзләмәјән инсанлара мәһәббәт ҝөстәриб онлары гонаг чағырмаг  ҝөзәл мүнасибәтләрин башланғыҹы ола биләр. Бәс неҹә едәк ки, бизи гонаг чағырмаға тәшвиг едән мәһз мәһәббәт олсун? Бунун бир үсулу Филиппилиләрә 2:3 ајәсиндәки «тәвазөкар олуб башгаларыны өзүнүздән үстүн сајын» мәсләһәтинә әмәл етмәкдир. Бунун сајәсиндә баҹы-гардашларын мүәјјән саһәләрдә, мәсәлән иман, дөзүм, ҹәсарәт вә саир хүсусијјәтләр ҝөстәрмәкдә биздән үстүн олдуғуну ҝөрәҹәјик. Нәтиҹәдә, онлара мәһәббәтимиз артаҹаг вә тәшкил етдијимиз гонаглыг сәмими аб-һавада, мүнасибәтләрә мүсбәт тәсир едән шәкилдә кечәҹәк.

20. Бир гонаг кими ев саһибини неҹә разы сала биләрик?

²⁰ Давуд пејғәмбәр Аллаһа белә суал етмишди: «Еј Јеһова, чадырында ким меһман олар?» (Зәб. 15:1). Сонра о, Аллаһын Өз евиндә меһман олмаға лајиг ҝөрдүјү инсанлара хас хүсусијјәтләри садаламышды. Онлардан бири сөзүнүн ағасы олмагдыр. Зәбур 15:4 ајәсиндә бу барәдә дејилир: «Зәрәринә олса белә, әһдиндән дөнмәз». Кимәсә гонаг ҝәләҹәјимизә сөз вермишиксә, ҹидди сәбәб олмадан ҝетмәмәк дүзҝүн дејил. Јәгин ки, бизи гонаг чағыран адам артыг һазырлыг ҝөрүб, ҝетмәмәклә онун зәһмәтини пуч етмиш олуруг (Мәт. 5:37). Бәзиләри даһа јахшы һесаб етдикләри гонаглыға ҝетмәк үчүн, әввәл гәбул етдикләри дәвәтә сонрадан «јох» дејирләр. Бу, һеч дә севҝи вә һөрмәтдән хәбәр вермир. Әслиндә, бизи гонаг чағыран адама миннәтдар олмалы вә нә тәклиф етсә, она гане олмалыјыг (Лука 10:7). Ҹидди сәбәбдән ирәли ҝәләрәк гонаглыға ҝедә билмириксә, јахшы оларды, ев саһибинә мәһәббәт вә һөрмәт ҝөстәриб бу барәдә мүмкүн гәдәр тез хәбәр верәк.

21. Нәјә ҝөрә гонаг ҝедәндә јерли адәт-әнәнәләри нәзәрә алмалыјыг?

²¹ Гонаг ҝедәндә јерли адәт-әнәнәләри дә нәзәрә алмаг ваҹибдир. Бәзи халгларда ҝөзләнилмәјән гонаг хош гаршыланыр, бәзиләриндә исә гонаг ҝедәндә мүтләг хәбәр вермәк лазымдыр. Елә әразиләр вар ки, јемәјин ән јахшы һиссәси гонаг үчүн чәкилир, башга әразиләрдә исә бу мәсәләдә ев јијәси дә, гонаг да ејни тутулур. Бәзи бөлҝәләрдә гонаглыға әлидолу ҝетмәк адәти вар, диҝәрләриндә исә, әксинә, гонаг һеч нә ҝәтирмәјәндә ев јијәси мәмнун галыр. Бәзи мәдәнијјәтләрдә белә бир адәт вар ки, кимсә сәни гонаг чағыранда дәрһал разылашмаг олмаз, бир-ики дәфә нәзакәтлә имтина етмәк лазымдыр. Бәзиләриндә исә бу, һөрмәтсизлик кими гәбул олунур. Ҝәлин јерли адәт-әнәнәләри нәзәрә алаг ки, бизи гонаг чағыран адам биздән разы галсын.

22. Нәјә ҝөрә бир-биримизә гонагпәрвәрлик ҝөстәрмәк олдугҹа ваҹибдир?

²² Һәвари Бутрус јазмышды: «Һәр шејин сону јахындыр» (1 Бут. 4:7). Һазырда бу сон даһа да јахындыр. Тезликлә бәшәр тарихиндә ҝөрүнмәмиш мүсибәт олаҹаг. Шејтан дүнјасынын мәһвә доғру ирәлиләдији бу дөврдә биз мәсиһиләр бир-биримизи ҝүҹлү мәһәббәтлә севмәлијик. Одур ки, һәвари Бутрусун «бир-биринизә... гонагпәрвәрлик ҝөстәрин» мәсләһәтинә әмәл етмәк бу ҝүн габагкы дөврләрә нисбәтән даһа ваҹибдир (1 Бут. 4:9). Бәли, биз һәмишә, һәм бу ҝүн, һәм дә Ҹәннәтдә бир-биримизә гонагпәрвәрлик ҝөстәрмәлијик.