1, 2. а) Бәзи мәсиһи валидејнләр ушаглары вәфтиз олмаг истәдијини дејәндә һансы һиссләри кечирир? б) Нәјә ҝөрә вәфтиз олунанлара һәср олунуб-олунмадыглары илә бағлы суал верилир? (Мәгаләнин әввәлиндәки шәклә бахын.)

МАРИЈА * сәһнәнин гаршысында, вәфтиз олмаға һазырлашанларла бир сырада дајаныб. Валидејнләринин нәзәри она дикилиб. Натигин вердији суаллара Марија уҹа сәслә «Бәли!» дејә ҹаваб верир. Инди о, вәфтиз олмаға һазырдыр.

² Маријанын һәјатыны Јеһоваја һәср едиб вәфтиз олмаг гәрары онун валидејнләринә фәрәһ һисси јашадыр. Амма бир мүддәт әввәл анасы Маријанын бу истәји барәдә ешидәндә нараһат олмуш, өз-өзүнә фикирләшмишди: «Ҝөрәсән, Марија вәфтиз олмаг үчүн чох ҝәнҹ дејил? Ҝөрәсән, о, бу аддымын ҹиддилијини баша дүшүр? Бәлкә, јахшы олар, бир аз ҝөзләсин?» Өвладынын јахшылығыны фикирләшән бүтүн валидејнләр ушағынын вәфтиз олмаг истәдијини биләндә, адәтән, өзүнә бу суаллары верир (Ваиз 5:5). Бу кими суалларын јаранмасы нормалдыр, ахы һәср олунмаг вә вәфтиз  мәсиһи һәјатында атылан ән ҹидди аддымдыр! (« Өзүнүзү Јеһоваја һәср етмисиниз?» адлы чәрчивәјә бахын.)

3, 4. а) Һәвари Бутрус вәфтизин ваҹиблији барәдә нә демишди? б) Һансы мәнада вәфтиз Нуһун ҝәмисинә бәнзәјир?

³ Һәвари Бутрус вәфтизи Нуһун тикдији ҝәмијә бәнзәдәрәк демишди: «Инди дә буна охшар бир шеј, вәфтиз мөвҹуддур. Вәфтиз... хилас едир». (1 Бутрус 3:20, 21 ајәләрини охујун.) Нуһ пејғәмбәр һәјатыны Аллаһын ирадәсини јеринә јетирмәјә һәср етмишди. Ҝәми буна әјани бир сүбут иди. Пејғәмбәр Аллаһын она бујурдуғу иши тамлығы илә јеринә јетирди. Онун имандан доған бу әмәли өзүнү вә аиләсини бүтүн дүнјаны бүрүјән дашгындан хилас етди. Ҝөрәсән, һәвари Бутрус бу бәнзәтмә илә нәји вурғуламаг истәјирди?

⁴ Бу ҝәми һәмин дөврүн адамлары үчүн пејғәмбәрин ҝүҹлү иман саһиби олдуғуна сүбут иди. Вәфтиз дә бу һадисәнин шаһиди олан инсанлар үчүн әјани бир сүбутдур ки, вәфтиз олан инсан Мәсиһә иман ҝәтирәрәк һәјатыны Јеһоваја һәср едиб. Өзүнү Аллаһа һәср етмиш бу мәсиһиләр Нуһ пејғәмбәр кими Јеһованын тапшырығыны итаәткарлыгла јеринә јетирир. Јеһова Нуһ пејғәмбәри Дашгындан хилас етдији кими, вәфтиз олмуш садиг хидмәтчиләрини дә Армаҝеддонда һифз едәҹәк (Марк 13:10; Вәһј 7:9, 10). Ҝөрүндүјү кими, һәјаты Јеһоваја һәср етмәк вә вәфтиз олмаг олдугҹа ваҹибдир. Бу иши әсассыз јерә тәхирә салан инсан әбәди ҝәләҹәјини тәһлүкәјә атыр.

5. Бу мәгаләдә һансы суаллара ҹаваб вериләҹәк?

⁵ Вәфтизин бу дәрәҹәдә ҹидди аддым олдуғуну нәзәрә алараг, ҝәлин нөвбәти үч суала ҹаваб тапмаға чалышаг. Мүгәддәс Китабда вәфтизлә бағлы нә јазылыб? Вәфтиз олмаг истәјән инсан вәфтиздән әввәл нә етмәлидир? Ушағына вә ја башга кимәсә Мүгәддәс  Китаб дәрси кечән тәблиғчи вәфтизин ҹидди аддым олдуғуну нәјә ҝөрә һәмишә нәзәрдә сахламалыдыр?

6, 7. а) Јәһјанын етдији вәфтиз нәјин рәмзи иди? б) Јәһјанын етдији вәфтизләрин ичиндә бәнзәри олмајан вәфтиз һансы иди?

⁶ Мүгәддәс Китабда вәфтиз сөзүнә илк дәфә Јәһјанын инсанлары вәфтиз етмәсиндән бәһс едән һадисәдә раст ҝәлинир (Мәт. 3:1—6). Јәһјанын етдији вәфтиз Мусанын ганунуна гаршы едилән ҝүнаһлардан төвбә рәмзи иди. Бу вәфтизләрин арасында бири чох бөјүк әһәмијјәт дашыјырды вә төвбә илә һеч бир әлагәси јох иди. Јәһја Аллаһын оғлуну, камил бир инсаны вәфтиз етмәк шәрәфинә лајиг ҝөрүлмүшдү (Мәт. 3:13—17). Тәбии ки, ҝүнаһсыз олдуғу үчүн Исанын төвбәјә еһтијаҹы јох иди (1 Бут. 2:22). Буна ҝөрә дә онун вәфтизи төвбәнин јох, һәјатыны Аллаһын ирадәсини јеринә јетирмәјә һәср етмәсинин рәмзи иди (Ибр. 10:7).

⁷ Иса Мәсиһ јер үзүндә хидмәт едәндә онун шаҝирдләри дә инсанлары вәфтиз едирди (Јәһ. 3:22; 4:1, 2). Јәһјанын етдији вәфтиз кими бу вәфтиз дә Мусанын ганунуна гаршы едилән ҝүнаһлардан төвбә рәмзи дашыјырды. Амма Иса Мәсиһ дириләндән сонра едилән вәфтизләр тамам фәргли мәна дашыјаҹагды.

8. а) Иса Мәсиһ дириләндән сонра давамчыларына һансы әмри вермишди? б) Мәсиһи вәфтизинин мәнасыны изаһ един.

⁸ Иса Мәсиһ дириләндән сонра араларында киши, гадын вә еһтимал ки, ушагларын да олдуғу 500-дән чох адама ҝөрүнмүшдү. Бу һадисә ерамызын 33-ҹү илинә тәсадүф едир. Ола билсин, Мәсиһ мәһз бу вахт нөвбәти тапшырығы вермишди: «Ҝедин вә бүтүн халгларын ичиндә шаҝирд һазырлајын, онлары Ата, Оғул вә мүгәддәс руһ ады илә вәфтиз един, сизә әмр етдијим һәр шејә риајәт етмәји онлара өјрәдин» (Мәт. 28:19, 20; 1 Кор. 15:6). Чох еһтимал ки, Иса Мәсиһ бу тапшырығы верәндә онун јүзләрлә давамчысы бу сөзләри ешидирди. О, билдирмишди ки, онун бојундуруғуну үзәринә ҝөтүрән, јәни онун шаҝирди олмаг истәјән инсан мүтләг вәфтиз олмалыдыр (Мәт. 11:29, 30). Аллаһа Ону разы салан шәкилдә ибадәт етмәк истәјән бәндә Јеһованын нијјәтиндә Мәсиһин тутдуғу јери билмәли вә бу факты гәбул етмәлидир. Јалныз бу һалда инсан вәфтиз ола биләр. Аллаһ јалныз бу ҹүр вәфтизи гәбул едир. Мүгәддәс Китабда јазылан һадисәләр ҝөстәрир ки, биринҹи әсрдә јени шаҝирдләр вәфтизин әһәмијјәтини баша дүшүрдүләр. Буна ҝөрә дә онлар дәрһал вәфтиз олур, сәбәбсиз јерә бу иши тәхирә салмырдылар (Һәв. 2:41; 9:18; 16:14, 15, 32, 33).

9, 10. Һәбәшистанлы мәмурдан вә һәвари Булусдан вәфтиз олмагла бағлы нә өјрәнирик?

⁹ Һәвариләрин ишләри 8:35, 36 ајәләрини охујун. Бир ҝүн, прозелит олан һәбәшистанлы бир мәмур Јерусәлимдә ибадәт едәндән сонра өз өлкәсинә гајыдырды. Бу вахт мәләјин бујруғу илә Филип она јахынлашыб «Иса һаггындакы мүждәни она данышды». Мәмур ешитдикләринә неҹә мүнасибәт ҝөстәрди? Филипә гулаг асандан сонра онун атдығы аддым ҝөстәрир ки, о, ешитдији һәгигәтин ваҹиблијини баша дүшмүшдү. Мәмур Јеһованын тәләбләринә ујғун јашамаға гәрар вериб дәрһал вәфтиз олду.

¹⁰ Ҝәлин јубанмадан вәфтиз олан даһа бир инсанын нүмунәсинә бахаг. Гејд едәк ки, бу инсан әввәлләр мәсиһиләри тәгиб едирди. О, Аллаһа һәср олунмуш Јәһуди халгынын нүмајәндәси иди. Амма билдијимиз кими бу халг һагг јолдан дөндүјү үчүн Јеһова онлардан үз дөндәрмишди. Бу киши өз дининин, иудаизмин гаты тәәссүбкеши иди. Лакин бир ҝүн о, һагг јолу тапыр, дирилмиш Иса Мәсиһин өзү Аллаһын јолу барәдә она шәһадәт верир. Бәс о, өјрәндикләринә неҹә мүнасибәт ҝөстәрди?  О, Мәсиһин шаҝирди олан Һәнәнјанын көмәјини гәбул етди вә Мүгәддәс Китабда јазылдығы кими, «вәфтиз олунду» (Һәв. 9:17, 18; Гал. 1:14). Јәгин ки, сөһбәтин кимдән ҝетдијини баша дүшдүнүз. Бәли, бу, һәвари Булусдур. Диггәт јетирин ки, Булус Мәсиһин Јеһованын нијјәтиндә тутдуғу јери дәрк едән кими вәфтиз олду. (Һәвариләрин ишләри 22:12—16 ајәләрини охујун.)

11. а) Бу ҝүн Мүгәддәс Китабы өјрәнәнләри вәфтиз олмаға нә тәшвиг едир? б) Һәјатыны Јеһоваја һәср едиб вәфтиз олунан инсанлары ҝөрәндә һансы һиссләри кечиририк?

¹¹ Бу ҝүн дә Мүгәддәс Китабы өјрәнән һәм ҹаван, һәм јашлы инсанлар өјрәндикләри һәгигәтләрә иман ҝәтириб онларын дәјәрини баша дүшдүкләри үчүн һәјатларыны Јеһоваја һәср едиб вәфтиз олурлар. Һәр топлантыда бу инсанлар үчүн хүсуси мәрузәләрин сөјләнмәси дә бу һадисәнин нә гәдәр әһәмијјәтли олдуғуну ҝөстәрир. Јеһованын Шаһидләри Мүгәддәс Китабы өјрәнәнләрин һәгигәти гаврајыб вәфтиз олдуғуну ҝөрәндә чох севинирләр. Вәфтиз олунанларын сырасында ушагларыны ҝөрән мәсиһи валидејнләр дә фәрәһ һисси кечирирләр. Севиндириҹи һалдыр ки, 2017-ҹи хидмәт или әрзиндә әбәди һәјата мејли олан 284 000-дән чох инсан вәфтиз олуб (Һәв. 13:48). Ҝөрүнүр, онлар вәфтизин мәсиһи үчүн тәләб олдуғуну баша дүшүрләр. Бәс вәфтиз олмаг истәјән инсан вәфтиздән әввәл нә етмәлидир?

12. Мүгәддәс Китабы өјрәнән инсан вәфтиз олмаг истәјирсә, нә етмәлидир?

¹² Мүгәддәс Китабы өјрәнән инсан вәфтиз олмаг истәјирсә, әввәлҹә Јеһова Аллаһ, Онун бәшәријјәт үчүн нијјәти вә инсанлары хилас етмәк үчүн етдији ишләр барәдә билик алмалы вә өзүндә иман јетишдирмәлидир (1 Тим. 2:3—6). Бу имандан ирәли ҝәләрәк о, Аллаһын севмәдији әмәлләри тәрҝитмәли вә Јараданын али ганунларына ујғун јашамалыдыр (Һәв. 3:19). Сөзсүз ки, инсан Јеһованын нифрәт етдији әмәлләри ҝөрә-ҝөрә һәјатыны Она һәср едә билмәз (1 Кор. 6:9, 10). Амма Јеһованын јүксәк әхлаг нормаларына ујғун јашамагла иш битмир. Вәфтиз олмаг истәјән инсан мүнтәзәм јығынҹаг ҝөрүшләринә ҝәлмәли, инсанларын һәјатыны хилас едән тәблиғ вә шаҝирд һазырламаг ишиндә иштирак етмәлидир. Бу, Мәсиһин давамчысы олмаг истәјән һәр бир инсан үчүн тәләбдир (Һәв. 1:8). Јалныз бу аддымлары атдыгдан сонра шаҝирд шәхси дуасында һәјатыны Јеһоваја һәср едә вә ҹамаат гаршысында вәфтиз ола биләр.

13. Мүгәддәс Китаб дәрси кечән тәблиғчи вәфтизин мәсиһи үчүн тәләб олдуғуну нәјә ҝөрә һәмишә нәзәриндә сахламалыдыр?

¹³ Өвладына вә ја Мүгәддәс Китаб дәрси кечдији башга бир инсана јухарыдакы аддымлары атмаға көмәк едән тәблиғчи вәфтизин ваҹиб олдуғуну һәмишә нәзәриндә сахламалыдыр. Бу һалда тәблиғчинин шаҝирди илә үнсијјәти даһа сәмәрәли олаҹаг. О, мүнасиб мәгам јарананда һәсролунманын вә вәфтизин ваҹиб олдуғуну хатырлатмаға чәкинмәјәҹәк. Ахы һәр биримиз өвладымызын вә Мүгәддәс Китаб дәрси кечдијимиз инсанларын руһани ҹәһәтдән инкишаф едиб вәфтиз олдуғуну ҝөрмәк истәјирик.

14. Нәјә ҝөрә һеч кими вәфтиз олмаға мәҹбур етмәмәлијик?

¹⁴ Јахшы нијјәтдән ирәли ҝәлсә дә, һеч ким, нә валидејн, нә Мүгәддәс Китаб дәрси кечән тәблиғчи шаҝирди вәфтиз олмаға мәҹбур етмәмәли, она тәзјиг ҝөстәрмәмәлидир. Ахы Јеһова бизи Она ибадәт етмәјә мәҹбур етмир (1 Јәһ. 4:8). Бизим өһдәмизә дүшән иш дәрс кечдијимиз инсана Јеһова Аллаһла достлуг мүнасибәти гурмағын әһәмијјәтини баша салмагдыр. Әҝәр шаҝирд Јеһова барәдә өјрәндији һәгигәтләри, доғрудан да, гијмәтләндирирсә  вә Мәсиһин давамчысы олмаг мәсулијјәтини чијинләринә ҝөтүрмәји үрәкдән арзулајырса, о өзү вәфтиз олмаг истәјәҹәк (2 Кор. 5:14, 15).

15, 16. а) Вәфтиз олмаг истәјәнләр үчүн конкрет јаш тәләби вармы? Изаһ един. б) Башга диндә вәфтиз олмуш инсан Јеһованын Шаһиди олмаг үчүн нәјә ҝөрә јенидән вәфтиз олмалыдыр?

¹⁵ Мүгәддәс Китабы өјрәнән инсанларын инкишаф просеси мүхтәлиф олдуғундан вәфтиз олмаг истәјәнләр үчүн конкрет јаш тәләби јохдур. Мәсәлән, арамызда јеткин јашда олан бир чох баҹы-гардаш вар ки, јенијетмәлик илләриндә вәфтиз олуб вә индијә гәдәр дә Јеһоваја сәдагәтлә хидмәт едир. Бәзиләри исә аһыл јашында, һәтта јашы 100-ү һаглајандан сонра Мүгәддәс Китабы өјрәниб вә вәфтиз олуб.

¹⁶ Мүгәддәс Китабы өјрәнән јашлы бир гадын әввәлләр бир нечә диндә вәфтиз олундуғу үчүн она дәрс кечән баҹыдан сорушмушду ки, јенидән вәфтиз олмағына еһтијаҹ вармы? Баҹы гадынын суалына Мүгәддәс Китабын ајәләри әсасында ҹаваб верди. Гадын бунун Мүгәддәс Китабын тәләби олдуғуну баша дүшдү вә чох кечмәмиш вәфтиз олду. Јашы 80-ә јахын олан бу гадын бу јашында вәфтиз олмағын әһәмијјәтсиз олдуғуну фикирләшмәди. Белә нәтиҹәјә ҝәлирик ки, дүзҝүн вәфтиз Јеһованын ирадәси илә бағлы дәгиг билијә әсасланан вәфтиздир. Одур ки, башга диндә вәфтиз олмуш шаҝирд Јеһованын Шаһиди олмаг истәјирсә, јенидән вәфтиз олмалыдыр. (Һәвариләрин ишләри 19:3—5 ајәләрини охујун.)

17. Вәфтиз ҝүнү нә барәдә дүшүнмәк мүнасиб оларды?

¹⁷ Вәфтиз ҝүнү инсанын һәјатында ән хошбәхт ҝүнләрдән биридир. Бу, һәмчинин һәјаты Јеһоваја һәср етмәјин вә вәфтиз олмағын әһәмијјәти барәдә дүшүнмәк үчүн мүнасиб бир вахтдыр. Јеһоваја вердији әһдә садиг галмаг үчүн инсандан фәдакарлыг тәләб олунур. Елә бу сәбәбдән Иса Мәсиһ гејд етмишди ки, онун шаҝирди олмаг истәјән инсан, бир нөв, бојундуруг алтына ҝирмиш олур. Бәли, Мәсиһин давамчылары «артыг өзләри үчүн дејил, онларын уғрунда өлүб дирилмиш кәс үчүн» јашамалыдырлар (2 Кор. 5:15; Мәт. 16:24).

 18. Нөвбәти мәгаләдә һансы суаллар әтрафында мүзакирә апарылаҹаг?

¹⁸ Ҝөрдүјүмүз кими һәјатыны Јеһоваја һәср етмәк чох ҹидди гәрардыр. Елә бу сәбәбдән Маријанын анасыны мәгаләнин әввәлиндә гејд олунан суаллар нараһат етмишди. Өвлады олан мәсиһиләрдә һәмчинин бу суаллар да јарана биләр: Ушағым вәфтиз олмаға һәгигәтән дә һазырдыр? Һәјатыны Јеһоваја һәср едәҹәк дәрәҹәдә билији вармы? Бәлкә, вәфтиздән әввәл али тәһсил алса вә өзүнә карјера гурса јахшы олар? Бирдән вәфтиз оландан сонра ҹидди ҝүнаһ етди? Нөвбәти мәгалә мәсиһи валидејнләрә бу суаллара ҹаваб тапмаға вә вәфтизә дүзҝүн јанашмаға көмәк едәҹәк.