1. Иса Мәсиһ сәмави хәзинә барәдә нә демишди?

БҮТҮН әнамлары ҝөрмәк мүмкүн дејил. Әслиндә, ән дәјәрли әнамлар ҝөрүнмәјән әнамлардыр. Иса Мәсиһ Дағүстү вәзиндә мадди шејләрдән гат-гат үстүн олан сәмави хәзинә барәдә данышмышды. О, фикринә белә јекун вурмушду: «Хәзинәниз һарададырса, үрәјиниз дә орада олаҹаг» (Мәт. 6:19—21). Нәји хәзинә, јәни чох дәјәрли һесаб етсәк, үрәјимиз дә бизи онун ардынҹа ҝетмәјә сөвг едәҹәк. Сәмави хәзинә топламаг үчүн Аллаһ гаршысында тәмиз ада саһиб олмалыјыг. Иса Мәсиһин дедији кими, бу ҹүр хәзинә һеч вахт мәһв олмур вә оғурланмыр.

2. а) 2 Коринфлиләрә 4:17, 18 ајәләриндә һәвари Булус бизи нәјә тәшвиг едир? б) Бу мәгаләдә нәји арашдыраҹағыг?

² Һәвари Булус «ҝөзүмүзү... ҝөрүнмәјән шејләрә» дикмәјә тәшвиг едир. (2 Коринфлиләрә 4:17, 18 ајәләрини охујун.) Бу ҝөрүнмәјән шејләр хәзинәдир вә бу хәзинәнин ичиндә јени дүнјада саһиб олаҹағымыз әнамлар вар. Бу мәгаләдә инди саһиб ола биләҹәјимиз дөрд ҝөрүнмәјән әнамы нәзәрдән кечирәҹәјик. Бунлар Аллаһла достлуг, дуа әнамы, Аллаһын мүгәддәс руһунун көмәји вә тәблиғ ишиндә алдығымыз сәмави дәстәкдир. Мәгалә боју һәмчинин бу ҝөрүнмәјән әнамлары гијмәтләндирмәјин јолларыны арашдыраҹағыг.

3. Ҝөрүнмәјән хәзинәләр арасында ән дәјәрлиси нәдир вә она саһиб олмаг неҹә мүмкүндүр?

³ Ҝөрүнмәјән хәзинәләр арасында ән дәјәрлиси Јеһова Аллаһла достлугдур (Зәб. 25:14). Мүгәддәс Аллаһын ҝүнаһлы инсанла достлуг етмәси неҹә мүмкүндүр? Иса Мәсиһин  «бәшәријјәтин ҝүнаһыны јујан» фидјә гурбанлығы сајәсиндә (Јәһ. 1:29). Иса Мәсиһ өз һәјатыны фәда етмәздән әввәл Јеһова әмин иди ки, о, сон нәфәсинәдәк садиг галаҹаг. Буна ҝөрә дә Иса Мәсиһин өлүмүндән өнҹә јашамыш инсанларын Онунла дост олмасына изин вермишди (Ром. 3:25).

4. Мәсиһиликдән өнҹә Аллаһын досту олмуш инсанлар кимләр иди?

⁴ Ҝәлин мәсиһиликдән өнҹә Аллаһын досту олмуш инсанлары јадымыза салаг. Ибраһим пејғәмбәр мөһтәшәм иман саһиби иди. Һәтта пејғәмбәрин өлүмүндән 1000 илдән чох вахт кечәндән сонра да Јеһова ону Өз досту адландырмышды (Әшј. 41:8). Бәли, өлүм белә Јеһованы Өз достларындан ајыра билмәз. Ибраһим пејғәмбәр бу ҝүн дә Јеһованын јаддашында јашајыр (Лука 20:37, 38). Јеһованын диҝәр досту Әјјуб пејғәмбәрдир. Јеһова һүзуруна топлашмыш мәләкләрин өнүндә гулу Әјјубдан архајын олдуғуну демишди. Ону «дүрүст, камил, Аллаһдан горхан, шәрдән узаг дуран» адам адландырмышды (Әјј. 1:6—8). Бәс тәхминән 80 ил әрзиндә бүтпәрәст дијарда јашамағына рәғмән, сәдагәтини горумуш Дәнјал пејғәмбәр һагда Јеһова нә дүшүнүрдү? Мәләкләр јаша долмуш пејғәмбәри дүз үч дәфә «истәкли бәндә» адландырмышды (Дән. 9:23; 10:11, 19). Әмин ола биләрик ки, Јеһова һәјата ҝөз јуммуш дәјәрли достларыны дирилдәҹәји ҝүнү һәсрәтлә ҝөзләјир (Әјј. 14:15).

5. Јеһова илә достлуғун тәмәлиндә нә дурур?

⁵ Бу ҝүн Јеһованын досту олан нә гәдәр гејри-камил инсан вар? Милјонларла. Буну һарадан билирик? Бүтүн дүнјада чохлу сајда киши, гадын вә ушаг давранышы илә Аллаһын досту олмаг истәдијини ҝөстәрир. Мүгәддәс Китабда јазылыб ки, Јеһова «салеһ адамла достлуг едәр» (Мәс. 3:32). Бу достлуғун тәмәлиндә Иса Мәсиһин фидјә гурбанлығына иман дурур. Јеһова Аллаһ фидјә гурбанлығыны әсас тутараг изин верир ки, өзүмүзү Она һәср едиб вәфтиз олаг. Биз бу ваҹиб аддымлары атанда Каинатда ән али Варлығын, Јеһованын досту олан, һәјатыны Она һәср етмиш милјонларла мәсиһинин сырасына гошулуруг!

6. Аллаһла достлуғун бизим үчүн гијмәтли олдуғуну неҹә ҝөстәрә биләрик?

⁶ Аллаһла достлуғун бизим үчүн гијмәтли олдуғуну неҹә ҝөстәрә биләрик? Јүз илдән артыг мүддәт әрзиндә садиг өмүр сүрмүш Ибраһим вә Әјјуб пејғәмбәрдән өрнәк ҝөтүрәрәк, биз дә нә гәдәр хидмәт етмәјимиздән асылы олмајараг, Аллаһа садиг галмалыјыг. Дәнјал пејғәмбәр кими, Аллаһла достлуг бизим үчүн дә ҹанымыздан гијмәтли олмалыдыр (Дән. 6:7, 10, 16, 22). Јеһованын көмәји илә үзләшә биләҹәјимиз истәнилән чәтинлији ашараг достлуг бағларымызы мөһкәм сахлаја биләрик (Филип. 4:13).

7. а) Мәсәлләр 15:8 ајәсинә әсасән, Јеһова дуаларымыза неҹә јанашыр? б) Јеһова дуаларымыза неҹә ҹаваб верир?

⁷ Ҝөрүнмәјән хәзинәләрдән бири дә дуадыр. Адәтән достлар бир-бири илә фикирләрини, һиссләрини бөлүшүр. Буну Јеһова илә достлуға да шамил етмәк олар. Јеһова Өз Кәламы васитәсилә бизимлә данышыр, бизә фикирләрини, һиссләрини әјан едир. Биз исә Онунла дуа васитәсилә данышырыг. Дуада ән мәһрәм фикирләримизи, һиссләримизи Онунла бөлүшүрүк. Дуаларымызы динләмәк Јеһоваја чох хошдур. (Мәсәлләр 15:8 ајәсини охујун.) Меһрибан достумуз Јеһова дуаларымызы динләмәклә јанашы, онлара ҹаваб да верир. Һәрдән ҹавабы тез  алырыг, һәрдән исә ејни мәсәлә барәдә дәфәләрлә дуа етмәли олуруг. Бунунла белә, әмин ола биләрик ки, дуамызын ҹавабыны лазыми вахтда вә ән јахшы шәкилдә алаҹағыг. Амма Аллаһ дуамыза ҝөзләдијимиз кими јох, башга ҹүр дә ҹаваб верә биләр. Мисал үчүн, бәлкә дә, О, үзләшдијимиз чәтинлији арадан галдырмајаҹаг, амма она дөзмәк үчүн бизә һикмәт вә ҝүҹ верәҹәк (1 Кор. 10:13).

8. Дуа әнамыны гијмәтләндирдијимизи неҹә ҝөстәрә биләрик?

⁸ Бәнзәрсиз дуа әнамыны гијмәтләндирдијимизи неҹә ҝөстәрә биләрик? Бунун бир үсулу Аллаһын «һәмишә дуа един» бујруғуна әмәл етмәкдир (1 Салон. 5:17). Јеһова бизи дуа етмәјә мәҹбур етмир. Әксинә, ирадә азадлығымыза һөрмәтлә јанашыр вә «даима дуа един» дејә нәсиһәт едир (Ром. 12:12). Одур ки, ҝүн әрзиндә дәфәләрлә дуа етмәклә бу әнамы гијмәтләндирдијимизи ҝөстәририк. Әлбәттә ки, дуа едәркән Јеһоваја шүкр етмәји вә Ону мәдһ етмәји дә унутмамалыјыг (Зәб. 145:2, 3).

9. Бир гардаш дуа әнамы барәдә нә дүшүнүр, бәс сиз бу барәдә нә дүшүнүрсүнүз?

⁹ Јеһоваја хидмәт етдикҹә, Онун дуаларымыза неҹә ҹаваб вердијини ҝөрдүкҹә, дуа әнамына миннәтдарлығымыз даһа да артмалыдыр. Ҝәлин ҝөрәк 47 ил тамвахтлы хидмәтдә олмуш Крис адлы гардаш нә дејир: «Һәр сәһәри Јеһоваја дуа илә ачмаг ифадәолунмаз бир һиссдир. Сүбһ шәфәги шеһ үстүндә бәрг вуран заман Јеһова илә данышмаг мөһтәшәмдир! Бу мәни Јеһованын бәхш етдији бүтүн әнамлара, о ҹүмләдән дуа әнамына ҝөрә шүкр етмәјә сөвг едир. Ҝүнүн сонунда дуа едәндән сонра исә тәмиз виҹданла башымы јастыға гојурам».

10. Нәјә ҝөрә мүгәддәс руһ әнамыны гијмәтләндирмәлијик?

¹⁰ Даһа бир ҝөрүнмәјән гијмәтли әнам Аллаһын фәал гүввәсидир. Иса Мәсиһ бизи  даима мүгәддәс руһ диләмәјә тәшвиг едир (Лука 11:9, 13). Јеһова мүгәддәс руһу васитәсилә бизи гүввәтләндирир, һәтта бизә «инсан ҝүҹүндән үстүн олан ҝүҹ» верир (2 Кор. 4:7; Һәв. 1:8). Аллаһын мүгәддәс руһунун сајәсиндә үзләшә биләҹәјимиз истәнилән чәтинлијә дөзә биләрик.

11. Мүгәддәс руһ бизә нәдә көмәк едир?

¹¹ Мүгәддәс руһ Јеһоваја хидмәтдә саһиб олдуғумуз тәјинатлары иҹра етмәјә көмәк едир. Мүгәддәс руһун сајәсиндә баҹарыг вә габилијјәтләримизи пүхтәләшдирә, мәсиһи өһдәликләрини јеринә јетирә билирик. Биз дәрк едирик ки, Јеһоваја хидмәтдә әлдә етдијимиз наилијјәтләрә өз ҝүҹүмүзлә јох, мүгәддәс руһун ҝүҹү илә саһиб олмушуг.

12. Зәбур 139:23, 24 ајәләринә әсасән, мүгәддәс руһун бизә неҹә көмәк етмәсини диләјә биләрик?

¹² Мүгәддәс руһу гијмәтләндирдијимизи даһа бир јолла ҝөстәрә биләрик. Јеһоваја дуа едә биләрик ки, бизә үрәјимиздәки јанлыш фикир вә истәкләри мүәјјән етмәјә көмәк етсин. (Зәбур 139:23, 24 ајәләрини охујун.) Бу барәдә дуа етсәк, Јеһова мүгәддәс руһу васитәсилә јанлыш фикир вә истәкләримизи бизә ашкар едәҹәк. Бундан сонра исә онларла мүбаризә апармаг үчүн Аллаһдан мүгәддәс руһ диләмәлијик. Бунунла ҝөстәрәҹәјик ки, Јеһованын мүгәддәс руһуну үстүмүздән ҝөтүрмәсинә сәбәб олаҹаг һеч бир шеј етмәк истәмирик (Ефес. 4:30).

13. Мүгәддәс руһ әнамына ҝөрә миннәтдарлығымызы неҹә артыра биләрик?

¹³ Мүгәддәс руһ әнамына ҝөрә миннәтдарлығымызы артырмаг үчүн бу ҝүн онун сајәсиндә һансы ишләрин ҝөрүлдүјү барәдә дүшүнмәлијик. Иса Мәсиһ ҝөјә галхмаздан өнҹә шаҝирдләринә демишди: «Мүгәддәс руһ үзәринизә ҝәләндә сиз гүввәт алаҹагсыныз вә... јерин уҹгарларынадәк мәним шаһидим олаҹагсыныз» (Һәв. 1:8). Бу сөзләр неҹә дејилмишдисә, елә дә јеринә јетди. Мүгәддәс руһун сајәсиндә бу ҝүн дүнјанын дөрд бир јанында јашајан  тәхминән сәккиз милјон јарым инсан Јеһоваја ибадәтдә бирләшиб. Һәмчинин биз руһани ҹәннәтдә јашајырыг, чүнки Аллаһын мүгәддәс руһу һәр биримиздә мәһәббәт, севинҹ, сүлһ, сәбир, хејирхаһлыг, јахшылыг, иман, мүлајимлик, өзүнә һаким олмаг кими хүсусијјәтләр јетишдирир. Бунларын һамысы «руһун бәһрәси»нә дахилдир (Гал. 5:22, 23). Бәли, мүгәддәс руһ әнамы бәнзәрсиз әнамдыр!

14. Хидмәтдә иштирак едәркән һансы дәстәји алырыг?

¹⁴ Башга бир ҝөрүнмәјән әнама да саһибик. Бу, Аллаһла вә Онун тәшкилатынын сәмави һиссәси илә бирликдә чалышмагдыр (2 Кор. 6:1). Һәр дәфә шаҝирд һазырламаг ишиндә иштирак едәндә онларла әмәкдашлыг етмиш олуруг. Һәвари Булус өзү вә бу ишдә чалышан диҝәрләри барәдә демишди: «Биз Аллаһын әмәкдашларыјыг» (1 Кор. 3:9). Хидмәтдә иштирак едәндә биз һәмчинин Исанын әмәкдашлары олуруг. Иса Мәсиһ давамчыларына «бүтүн халгларын ичиндә шаҝирд һазырлајын» тапшырығыны верәркән демишди: «Мән... һәмишә сизинләјәм» (Мәт. 28:19, 20). Бәс мәләкләр? Нә хошдур ки, «јер үзүнүн сакинләринә... әбәди мүждә» бәјан едәркән мәләкләр бизә лазыми истигамәт верир! (Вәһј 14:6).

15. Хидмәтимиздә Јеһованын һансы ваҹиб ролу вар? Мүгәддәс Китабдан нүмунә чәкин.

¹⁵ Бу сәмави көмәк сајәсиндә нәләрә наил олуруг? Падшаһлыг хәбәри тохумуну сәпәндә бәзи тохумлар мүнбит торпаға дүшүр вә бөјүјүр (Мәт. 13:18, 23). Үрәкдәки тохумлары бөјүдән вә бәһрәли едән кимдир? Иса Мәсиһ демишди: «Атам ҹәлб етмәсә, һеч ким мәним ардымҹа ҝәлә билмәз» (Јәһ. 6:44). Мүгәддәс Китабда буна даир конкрет нүмунә вар. Һәвари Булусун Филиппи шәһәриндән кәнарда бир груп гадына шаһидлик вердији һадисәни јадымыза салаг. Мүгәддәс Китабда бу гадынлардан бири, Лидија барәдә јазылыб: «Јеһова онун үрәјини ачды ки, о, Булусун дедикләрини гәбул етсин» (Һәв. 16:13—15). Јеһова Лидија кими милјонларла инсаны Өзүнә ҹәлб едиб.

16. Хидмәтдә әлдә етдијимиз наилијјәтләрә ҝөрә шәрәфи кимә вермәлијик?

¹⁶ Хидмәтдә әлдә етдијимиз наилијјәтләрә ҝөрә кимә борҹлујуг? Булусун Коринф јығынҹағына јаздығы нөвбәти сөзләр бу суала ҹаваб верир: «Мән әкдим, Аполлос сулады, Аллаһ исә бөјүтдү. Буна ҝөрә әкән дә, сулајан да һеч нәдир, чүнки бөјүдән Аллаһдыр» (1 Кор. 3:6, 7). Булус кими, биз дә хидмәтдә әлдә етдијимиз наилијјәтләрә ҝөрә шәрәфи Јеһоваја вермәлијик.

17. Аллаһла, Мәсиһлә вә мәләкләрлә бирҝә чалышмағын бизим үчүн шәрәф олдуғуну неҹә ҝөстәрә биләрик?

¹⁷ Аллаһла, Мәсиһлә вә мәләкләрлә бирҝә чалышмағын бизим үчүн шәрәф олдуғуну неҹә ҝөстәрә биләрик? Хош хәбәри мүждәләмәк ишиндә әлимиздән ҝәләни етмәклә. Бу иши ҝөрмәјин мүхтәлиф јоллары вар. Мәсәлән, иҹтимаи әразиләрдә вә ев-ев шаһидлик вермәк (Һәв. 20:20). Гејри-формал шаһидлији севәнләр дә аз дејил. Онлар танымадыглары инсанларла меһрибанлыгла саламлашыб сөһбәтә башламаға чалышырлар. Инсанлар сөһбәтә мараг ҝөстәрәндә еһмалҹа сөһбәти Падшаһлыг һагда мүждәјә јөнәлдирләр.

18, 19. а) Һәгигәт тохумуну неҹә суварырыг? б) Јеһованын Мүгәддәс Китабы өјрәнән бир нәфәрә неҹә көмәк етдијини нәгл един.

¹⁸ «Аллаһын әмәкдашлары» олан бизләр һәгигәт тохумларыны сәпмәклә јанашы, онлары сувармалыјыг. Буна ҝөрә дә кимсә  мараг ҝөстәрәндә тәкрарән онун јанына ҝедирик. Јахуд да башгасынын онунла әлагә сахлајыб Мүгәддәс Китаб дәрсинә башламасыны тәшкил едирик. Дәрсдән-дәрсә Јеһованын онун үрәјиндә вә дүшүнҹәсиндә неҹә дәјишиклик етдијини ҝөрмәк бизи чох севиндирир.

¹⁹ Ҹәнуби Африкада јашајан Рапалалани адлы бир ара һәкиминин нүмунәсинә нәзәр салаг. О, ҹаду-пити илә инсанлары мүалиҹә едирди. Мүгәддәс Китаб дәрсләриндә өјрәндикләри хошуна ҝәлирди. Амма орада өлән әҹдадларла әлагә јаратмаг барәдә јазыланлары гәбул етмәк она чәтин иди (Ган. 18:10—12). Заман кечдикҹә, о, Јеһованын көмәји илә дүшүнҹәсини дәјишди. Бу иш онун јеҝанә доланышыг јери олса да, бир мүддәт сонра ишини атды. Һал-һазырда 60 јашы олан бу гардаш дејир: «Јеһованын Шаһидләринә чох миннәтдарам. Онларын мәнә чох көмәји дәјиб, мәнә иш тапмаға көмәк едибләр. Әсас да Јеһоваја миннәтдарам. О мәнә һәјатымда дәјишикликләр етмәјә көмәк едиб. Инди мән Јеһованын вәфтиз олунмуш хидмәтчиси кими тәблиғ ишиндә иштирак едирәм».

20. Нә етмәк әзминдәсиниз?

²⁰ Бу мәгаләдә ҝөрүнмәјән дөрд әнамдан данышдыг. Бу әнамларын ән дәјәрлиси Јеһова илә јахын дост олмаг шәрәфидир. Бу әнам сајәсиндә диҝәр ҝөрүнмәјән әнамларын да фајдасыны ҝөрүрүк: дуа васитәсилә Јеһоваја јахынлашырыг, Онун мүгәддәс руһунун көмәјини ҝөрүрүк вә хидмәтдә сәмави көмәк алырыг. Ҝәлин бундан сонра да ҝөрүнмәјән әнамлара ҝөрә миннәтдарлығымызы артыраг. Јеһова кими ҝөзәл Достумуз олдуғуна ҝөрә даима шүкүр едәк!