1. Иса давамчыларына һансы нүмунәни гојмушду вә онлар онун нүмунәсини неҹә изләдиләр? (Үз габығындакы шәклә бахын.)

ИСА МӘСИҺ јер үзүндә јашајаркән инсанларын ону динләјәҹәјинә үмидини итирмәдән тәблиғ едирди (Јәһ. 4:35, 36). О истәјир ки, давамчылары да бу ҹүр даврансын (Лука 10:1, 5—11, 17). Нә гәдәр ки Иса јер үзүндә иди, шаҝирдләри тәблиғдә шөвглә иштирак едирдиләр (Јәһ. 16:32). Амма о өләндән сонра шаҝирдләрин бир мүддәтлик тәблиғә һәвәси сојуду. Дириләндән сонра Иса онлары јенидән диггәти тәблиғә ҹәмләмәјә тәшвиг етди. О, ҝөјә галхандан сонра шаҝирдләр о гәдәр бөјүк шөвглә тәблиғ едирди ки, дүшмәнләр белә демишди: «Сиз исә өз тәлиминизи бүтүн Јерусәлимә јајмысыныз» (Һәв. 5:28).

2. Јеһова бу ҝүн тәблиғ ишини неҹә аванд едиб?

² Иса илк мәсиһиләрин тәблиғ ишинә рәһбәрлик едирди вә Јеһова да онларын ишини аванд едирди. Беләҹә, чох инсан һәгигәти гәбул етди. Мәсәлән, ерамызын 33-ҹү илинин Әллинҹи ҝүн бајрамында 3000-ә јахын инсан вәфтиз олунду (Һәв. 2:41). Шаҝирдләрин сајы ҝет-ҝедә даһа да артырды (Һәв. 6:7). Үстәлик, Иса демишди ки, ахырзаманда тәблиғ иши даһа ҝениш вүсәт алаҹаг (Јәһ. 14:12; Һәв. 1:8).

3, 4. Нәјә ҝөрә бәзи тәблиғчиләр үчүн тәблиғ иши чәтиндир вә бу мәгаләдә нә һагда данышаҹағыг?

³ Һәр биримиз чалышырыг ки, инсанларын хош хәбәрә һај верәҹәјинә үмидимизи итирмәјәк. Бәзи әразиләрдә јашајан баҹы-гардашлар үчүн бу, асандыр. Чүнки о гәдәр чох инсан Мүгәддәс Китабы өјрәнмәк истәјир ки, һәтта онлара дәрс кечмәјә тәблиғчи тапылмыр; онлар адларыны сијаһыја јаздырыб нөвбәләрини ҝөзләмәли олурлар. Амма елә әразиләр вар  ки, орада тәблиғ иши чох чәтиндир. Инсанлары евдә тапмаг мүмкүн дејил, евдә оланлар исә Мүгәддәс Китаба демәк олар ки, мараг ҝөстәрмир.

⁴ Әҝәр јашадығыныз әразидә тәблиғ иши чәтиндирсә, бу мәгаләдәки мәсләһәтләрдән јарарлана биләрсиниз. Мәгаләдә бәзи тәблиғчиләрин даһа чох инсана мүждәни чатдырмаг үчүн истифадә етдији үсуллардан данышаҹағыг. Һәмчинин өјрәнәҹәјик ки, инсанларын хош хәбәрә мүнасибәтиндән асылы олмајараг, нәјә ҝөрә шөвглә тәблиғ етмәјә давам етмәлијик.

5. Бир чох Јеһованын Шаһиди һансы чәтинликләрә үзләшир?

⁵ Ҝетдикҹә инсанлара евләриндә тәблиғ етмәк чәтинләшир. Бәзи әразиләрдә инсанлар мүһафизә олунан биналарда вә ја гапалы јашајыш комплексләриндә јашајыр. Ола билсин, гапычы вә ја мүһафизәчи ев сакининин иҹазәси олмадан киминсә јашајыш әразисинә ҝирмәсинә иҹазә вермәсин. Башга тәблиғчиләр манеәсиз шәкилдә ев-ев тәблиғ едә билсәләр дә, инсанлары евдә тапмаға чәтинлик чәкирләр. Елә тәблиғчиләр дә вар ки, аз адамын јашадығы кәндләрдә вә уҹгар әразиләрдә тәблиғ едир. Онлар бир евә чатмаг үчүн хејли јол гәт етмәли олур. Һәлә ев сакининин евдә олуб-олмајаҹағы мәлум дејил. Бу кими чәтинликләрә бахмајараг, әлимиз тәблиғ ишиндән сојумамалыдыр. Үзләшдијимиз манеәләри ашмаг вә даһа чох инсана тәблиғ етмәк үчүн нә едә биләрик?

6. Һансы мәнада тәблиғчиләр балыгчылара бәнзәјир?

⁶ Иса тәблиғ ишинин балыгчылыг ишинә бәнзәтмишди (Марк 1:17). Бәзән балыгчылар ҝүнләрлә балыг тута билмир. Амма онлар тәслим олмур. Онлар мүәјјән тәдбирләр ҝөрүрләр: балыг тутмаг үчүн вахты, мәканы вә үсулу дәјиширләр. Биз дә хидмәтимиздә бу ҹүр дәјишикликләр едә биләрик. Ҝәлин бу һагда данышаг.

7. Мүхтәлиф вахтларда тәблиғ етмәклә һансы нәтиҹәни әлдә едә биләрик?

⁷ Мүхтәлиф вахтларда тәблиғ един. Инсанларын евдә олма еһтималынын јүксәк олдуғу вахтларда тәблиғ етсәк, даһа чох инсана раст ҝәләҹәјик. Ахы нә вахтса инсанлар евләринә ҝәлир. Бәзи баҹы-гардашымыз ҝүнорта вә ја ахшамүстү тәблиғ етмәјә үстүнлүк верир, чүнки бу вахт даһа чох инсана раст ҝәлирләр. Үстәлик, бу вахтларда ев сакинләри елә дә ҝәрҝин олмур вә гулаг асмаға мејилли олур. Һәмчинин истәсәниз, Дејвид адлы ағсаггалын истифадә етдији үсулу сынагдан кечирә биләрсиниз. О, әмәкдашы илә саһәдә бир-ики саат тәблиғ едәндән сонра ачылмајан гапылары ҝедиб јенә дөјүр. Дејвид дејир: «Икинҹи дәфә нә гәдәр инсанын гапыны ачдығыны ҝөрәндә мәәттәл галырам» *.

8. Ваиз 11:6 ајәсини тәблиғ ишинә неҹә тәтбиг едә биләрик?

⁸ Биз тәслим олмамалыјыг. Мәгаләнин әсас ајәсиндә неҹә давранмалы олдуғумуз ҝөстәрилир. (Ваиз 11:6 ајәсини охујун.) Дејвид дә тәслим олмады. О, бир гапыны дәфәләрлә дөјәндән сонра, нәһајәт, ев сакинини евдә тапды. Мүгәддәс Китаб әсасында сөһбәт о адама мараглы ҝәлди. О белә деди: «Бурада сәккиз илдир јашајырам, амма бир дәфә дә олсун Јеһованын Шаһидләри гапымы дөјмәјиб». Дејвид дејир: «Фикир вермишәм ки, дәфәләрлә етдијим ҹәһдләрдән сонра евдә тапылан инсанлар адәтән хош хәбәрә гулаг асыр».

9. Бәзи тәблиғчиләр инсанлара тәблиғ етмәк үчүн һансы үсуллардан истифадә едир?

 ⁹ Мүхтәлиф мәканларда тәблиғ един. Бәзи тәблиғчиләр инсанлара хош хәбәри чатдырмаг үчүн тәблиғ мәканыны дәјишибләр. Мәсәлән, күчә тәблиғи вә әдәбијјат арабалары илә тәблиғ ҝөзәл нәтиҹәләр вериб. Бунун сајәсиндә ев-ев тәблиғә иҹазә верилмәјән биналарда јашајанлара раст ҝәлмәк мүмкүн олуб. Бу кими үсуллар Јеһованын Шаһидләринә көмәк едир ки, инсанларла үзбәүз сөһбәт етсинләр. Һәмчинин бир чох тәблиғчи фикир вериб ки, паркда, базарда вә ишҝүзар әразидә инсанлар сөһбәт етмәјә вә әдәбијјат ҝөтүрмәјә даһа мејилли олур. Боливијада хидмәт едән Флоран адлы бир рајон нәзарәтчиси дејир: «Биз маркетләрдә вә ишҝүзар әразиләрдә ҝүнорта саат 1—3 арасы тәблиғ едирик. Чүнки һәмин саатларда сатыҹыларын иши нисбәтән аз олур. Адәтән ҝөзәл сөһбәтләримиз алыныр вә һәтта Мүгәддәс Китаб дәрсинә башлајырыг».

10. Инсанлара тәблиғ етмәк үчүн даһа нә едә биләрик?

¹⁰ Мүхтәлиф үсуллардан истифадә един. Тутаг ки, сиз һансыса гапыны дәфәләрлә дөјмүсүнүз, мүхтәлиф вахтларда ҝәлмисиниз, амма евдә һеч кими тапмамысыныз. Бәс һәмин ев сакининә тәблиғ етмәјин башга һансыса јолу вар? Катарина дејир: «Евиндә һеч вахт тапмадығым инсанлара мәктуб јазырам, үз-үзә дејәҹәјим фикирләри мәктубда гејд едирәм». Демәли, нә өјрәнирик? Әлиниздән ҝәләни един ки, бу вә ја диҝәр үсулла саһәниздәки һәр бир кәсә тәблиғ едәсиниз.

11. Нәјә ҝөрә инсанлар тәблиғ етдијимиз мүждәјә лагејд јанашыр?

¹¹ Бәзи инсанлар бәјан етдијимиз мүждәјә лагејд јанашыр. Аллаһ вә Мүгәддәс Китаб һаггында нәсә өјрәнмәјә еһтијаҹ дујмадыгларыны дүшүнүрләр. Дүнјада бу гәдәр әзаб-әзијјәтин олдуғуна ҝөрә Аллаһа инанмырлар. Онлар Мүгәддәс Китаба ујғун јашадыгларыны иддиа едән дин хадимләринин икиүзлүлүјүнү ҝөрдүјү үчүн Мүгәддәс Китаб барәсиндә нәсә өјрәнмәк истәмирләр. Бир башгаларынын башы иш-ҝүҹә, аиләләринә, проблемләринә гарышыб вә дүшүнмүрләр ки, Мүгәддәс Китаб онлара неҹәсә көмәк едәр. Инсанлар тәблиғ етдијимиз мүждәјә лагејд јанашса да, севинҹимизи неҹә горуја биләрик?

12. Филиппилиләрә 2:4 ајәсини тәблиғ ишиндә неҹә тәтбиг едә биләрик?

¹² Инсанлара ҹаныјананлыг ҝөстәрин. Бир чох инсан әввәлҹә хош хәбәрә лагејд јанашса да, даһа сонра тәблиғчинин онлара ҹаныјананлыг ҝөстәрдијини ҝөрүб, хош хәбәрә гулаг асыб. (Филиппилиләрә 2:4 ајәсини охујун.) Мәсәлән, әввәлки абзасларда ады чәкилән Дејвид гардаш дејир: «Кимсә данышдыгларымызын она мараглы олмадығыны дејәндә биз Мүгәддәс Китабы вә нәшрләримизи чантаја гојуб дејирик: “Бөлүшә биләрсиниз, нијә белә дүшүнүрсүнүз?”» Ҹаныјананлыг ҝөстәрмәјимиз инсанларын диггәтиндән јајынмајаҹаг. Бәлкә дә, нә дедијимиз онларын јадында галмајаҹаг, амма ҝөстәрдијимиз сәмими мүнасибәти унутмајаҹаглар. Һәтта ев сакини данышмағымыза имкан вермәсә дә, биз достјана мүнасибәтимиз вә үз ифадәмизлә һисс етдирә биләрик ки, онлара дәјәр веририк.

13. Нә едә биләрик ки, хош хәбәр һәр ев сакининә мараглы ҝәлсин?

¹³ Ев сакининә башга неҹә ҹаныјананлыг ҝөстәрә биләрик? Тәблиғ едәркән онларын тәләбатыны вә марагларыны нәзәрә алмагла. Тутаг ки, бу евдә ушағын олдуғуна диггәт јетирдиниз, онда, ола билсин, валидејнләрә ушагларын тәрбијәси илә, јахуд аиләнин хошбәхтлији илә бағлы Мүгәддәс Китабдакы мәсләһәтләр мараглы ҝәләр. Јахуд ҝөрүрсүнүзсә ки, гапыда чохлу гыфыл вар, ев сакини илә бу дүнјада ҹинајәткарлығын артмасындан, горху-һүркү ичиндә јашадығымыздан даныша биләрсиниз. Онда, ола билсин, ев сакининә ҝәләҹәкдә ҹинајәткарлығын даһа олмајаҹағыны билмәк мараглы ҝәлсин. Бир сөзлә, тәблиғ етдијиниз һәр бир инсана Аллаһын Кәламындакы мәсләһәтләрин дәјәрини ҝөстәрин. Бир аз өнҹә ады чәкилән Катарина дејир: «Һәгигәти  өјрәнмәјим сајәсиндә һәјатымын неҹә јахшылашдығыны һәмишә јадыма салырам». Бу, Катаринаја көмәк едир ки, инсанларла әминликлә данышсын вә сөзсүз ки, инсанлар да буну һисс едир.

14. Мәсәлләр 27:17 ајәсинә әсасән, тәблиғ әмәкдашлары бир-биринә неҹә көмәк едә биләр?

¹⁴ Башгаларынын көмәјиндән јарарланын. Биринҹи әсрдә һәвари Булус ишләтдији тәблиғ вә тәлим үсулларыны Тимутијә дә өјрәдирди вә ону тәшвиг едирди ки, о, бу үсуллары башгаларына да өјрәтсин (1 Кор. 4:17). Тимути кими, биз дә јығынҹағымыздакы тәҹрүбәли тәблиғчиләрдән өјрәнә биләрик. (Мәсәлләр 27:17 ајәсини охујун.) Мәсәлән, Шон адлы бир гардаш бир мүддәт кәнд әразисиндә өнҹүллүк едирди. Бу кәндин ҹамааты динләринә бағлы инсанлар иди. Гардаш севинҹини неҹә горуду? О дејир: «Мүмкүн гәдәр чалышырдым тәблиғә әмәкдашсыз ҝетмәјим. Бир евдән о бири евә ҝедәркән јол боју бир-биримизә тәблиғ баҹарығымызы јахшылашдырмаға көмәк едирдик. Мәсәлән, ев сакини илә неҹә данышдығымызы тәһлил едирдик. Сонра исә мүзакирә едирдик ки, ҝәлән дәфә белә вәзијјәтлә гаршылашсаг, башга неҹә ҹаваб верә биләрик».

15. Нәјә ҝөрә тәблиғ ишиндә дуанын ваҹиб ролу вар?

¹⁵ Дуада Јеһовадан көмәк истәјин. Һәр дәфә тәблиғдә иштирак едәркән Јеһовадан сизә јол ҝөстәрмәсини хаһиш един. Онун гүдрәтли мүгәддәс руһунун көмәји олмаса, һеч биримиз һеч нәјә наил ола билмәрик (Зәб. 127:1; Лука 11:13). Дуада Јеһовадан конкрет көмәк истәјин. Мәсәлән, Јеһовадан хаһиш едә биләрсиниз ки, сизи Онун һаггында өјрәнмәк истәјән, динләмәјә һазыр олан инсанларын јанына јөнәлтсин. Дуаныза ујғун давранараг раст ҝәлдијиниз һәр кәсә тәблиғ един.

16. Нәјә ҝөрә фәрди мүталиә тәблиғ иши үчүн зәруридир?

¹⁶ Фәрди мүталиәјә вахт ајырын. Аллаһын Кәламында дејилир: «Аллаһын јахшы, хош вә камил ирадәсини дәрк [един]» (Ром. 12:2). Аллаһ һаггында һәгигәти билдијимизә әминлијимиз нә гәдәр чох олса, тәблиғдә бир о гәдәр инамла данышаҹағыг. Катарина дејир: «Бир мүддәт өнҹә анладым ки, Мүгәддәс Китабын бәзи әсас тәлимләринә иманымы мөһкәмләндирмәлијәм. Буна ҝөрә дә Јараданын мөвҹудлуғуна, Мүгәддәс Китабын Аллаһын Кәламы олдуғуна вә Аллаһа мәхсус тәшкилатын олдуғуна дәлилләри тәфсилаты илә арашдырдым». Катарина дејир ки, фәрди мүталиә сајәсиндә иманы мөһкәмләнди вә хидмәтдә севинҹи артды.

17. Нәјә ҝөрә Иса Мәсиһ тәблиғ етмәјә давам едирди?

¹⁷ Бахмајараг ки, бәзиләри Исанын дедикләринә гаршы лагејд иди, о, јенә дә үмидини итирмәдән тәблиғ етмәјә давам едирди. Чүнки билирди ки, инсанларын һәгигәти билмәјә чох еһтијаҹы вар вә мүмкүн гәдәр чох инсанын хош хәбәри гәбул етмәсинә имкан јарадырды. О һәм дә билирди ки, әввәл-әввәл гулаг асмајан инсанлар сонрадан гулаг асмаг истәјәҹәк. Елә Исанын өз аиләсини ҝөтүрәк. Јер үзүндә хидмәт етдији үч ил јарым әрзиндә һеч бир гардашы онун шаҝирди олмады (Јәһ. 7:5). Амма Иса дириләндән сонра онлар онун давамчысы олдулар (Һәв. 1:14).

18. Нәјә ҝөрә биз тәблиғ ишинә давам едирик?

¹⁸ Биз билмирик Мүгәддәс Китаб һәгигәтләрини кимләр гәбул едиб, Јеһованын хидмәтчиси олаҹаг. Бәзиләринә мүждәјә һај вермәк үчүн башгаларына нисбәтән даһа чох вахт лазымдыр. Һәтта бизә гулаг  асмаг истәмәјәнләр ҝөзәл давранышымызы вә үмидлә тәблиғ етмәјә давам етдијимизи ҝөрүб, ола билсин, ахырда «Аллаһы мәдһ етсинләр» (1 Бут. 2:12).

19. 1 Коринфлиләрә 3:6, 7 ајәләринә әсасән, тәблиғ иши илә бағлы нәји унутмамалыјыг?

¹⁹ Биз әкиб-суласаг да, бөјүдәнин Аллаһ олдуғуну унутмамалыјыг. (1 Коринфлиләрә 3:6, 7 ајәләрини охујун.) Ефиопијада хидмәт едән Ҝетаһун гардаш дејир: «Јашадығым әразидә 20 илдән чох вахт әрзиндә мәндән башга Јеһованын Шаһиди олмајыб. Амма инди мән дә дахил олмагла, бурада 14 тәблиғчи вар. Һәјат јолдашым вә үч өвладым да вәфтиз олунан 13 нәфәрин сырасындадыр. Ибадәт ҝөрүшләриндә исә орта һесабла 32 нәфәр иштирак едир». Ҝетаһун хошбәхтдир ки, тәблиғ етмәјә давам едиб вә Јеһованын сәмими гәлбли инсанлары Өз тәшкилатына ҹәлб етмәсини сәбирлә ҝөзләјиб! (Јәһ. 6:44).

20. Һансы мәнада биз хиласедиҹиләрә бәнзәјирик?

²⁰ Јеһова үчүн бүтүн инсанларын һәјаты гијмәтлидир. Јеһова Иса Мәсиһә сон ҝәлмәздән өнҹә бүтүн милләтләрдән олан инсанлары топламаг иши һәвалә едиб вә бизә дә бу ишдә Иса илә әмәкдашлыг етмәк шәрәфи нәсиб едиб (Һәг. 2:7). Тәблиғ ишини хиласетмә ишинә, бизи исә гәза заманы мәдәндә галмыш ишчиләри хилас едән хиласедиҹиләрә бәнзәтмәк олар. Ҹәми бир нечә ишчи сағ тапылса да, бүтүн хиласедиҹиләрин әмәји әвәзсиздир. Ејни шеји тәблиғ иши илә дә бағлы демәк олар. Биз билмирик, Шејтан дүнјасындан һәлә нә гәдәр инсаны хилас едә биләҹәјик. Амма Јеһова истәнилән тәблиғчи васитәсилә онлара көмәк едә биләр. Боливијада јашајан Андреас гардаш дејир: «Һесаб едирәм ки, бир нәфәрин һәгигәти гәбул едиб вәфтиз олунмасында бир тәблиғчинин јох, чохларынын әмәји кечиб». Ејнилә, ҝәлин биз дә тәблиғ ишиндә үмидлә иштирак етмәјә давам едәк. Онда Јеһова ишимизи аванд едәҹәк вә хидмәтдән әсл севинҹ дујаҹағыг.