1, 2. Аллаһ бизим ибадәтимизи нә заман гәбул едир?

 «ИБАДӘТ» дејәндә тәсәввүрүнүздә нә ҹанланыр? Бәлкә дә, тәвазөкар бир гардашын јатағынын јанында диз чөкәрәк һәрарәтлә Јеһоваја дуа етмәси. Ја да меһрибан бир аиләнин бирликдә һәвәслә Мүгәддәс Китабы арашдырмасы.

² Һәр ики вәзијјәт ибадәт сајылыр. Бәс Јеһова онларын ибадәтини гәбул едир? Әҝәр бу ибадәт Јеһованын ирадәсинә мәгбулдурса, еләҹә дә мәһәббәт вә һөрмәтдән гајнагланырса, бәли, гәбул едир. Биз Јеһованы чох севирик. Билирик ки, јалныз О, ибадәтә лајигдир вә чалышырыг, ибадәтимиз ән јүксәк сәвијјәдә олсун.

3. Бу мәгаләдә нәји арашдыраҹағыг?

³ Бу мәгаләдә Јеһованын гәдим дөврдә гәбул етдији ибадәтдән данышаҹағыг вә бу ҝүн Она мәгбул олан ибадәтин сәккиз саһәсинә тохунаҹағыг. Бу заман дүшүнүн ҝөрүн ибадәтинизи һансы саһәләрдә јахшылашдыра биләрсиниз. Һәмчинин өјрәнәҹәјик ки, нәјә ҝөрә Јеһоваја дүзҝүн шәкилдә ибадәт етмәк бизә хошбәхтлик ҝәтирир.

4. Мәсиһиликдән әввәл Јеһованын хидмәтчиләри Она мәһәббәтләрини вә еһтирамларыны неҹә ҝөстәрмишдиләр?

⁴ Мәсиһиликдән әввәл Һабил, Нуһ, Ибраһим вә Әјјуб кими садиг инсанлар Јеһоваја еһтирам вә мәһәббәт тәзаһүр етдирмишдиләр. Онлар буну Јеһоваја итаәт етмәклә, иман ҝәтирмәклә вә гурбанлар вермәклә ҝөстәрмишдиләр. Јеһованын онларын неҹә ибадәт етмәләрини ҝөзләдији илә бағлы Мүгәддәс Китабда әтрафлы һеч нә дејилмир. Амма ајдындыр ки, онлар Јеһованы шәрәфләндирмәк үчүн әлләриндән ҝәләни едирдиләр, Јеһова да онларын ибадәтини гәбул  едирди. Сонра Јеһова Муса пејғәмбәр васитәсилә Ибраһимин нәслинә ганунлар верди. Бу ганунлара Јеһоваја бәјәндији тәрздә ибадәт етмәк үчүн конкрет ҝөстәришләр дахил иди.

5. Јеһова мәсиһиләрә неҹә ибадәт етмәји бујуруб?

⁵ Иса Мәсиһин дирилмәсиндән сонра Јеһова артыг хидмәтчиләриндән Мусанын ганунуна риајәт етмәји тәләб етмирди (Ром. 10:4). Мәсиһиләр јени бир гануна, «Мәсиһин ганунуна» риајәт етмәли идиләр (Гал. 6:2). Онлардан бу гануну әзбәрләмәк, ганунлар күллијјатына әмәл етмәк тәләб олунмурду. Мәсиһиләр Исанын нүмунәсини изләмәли вә онун өјрәтдикләринә әмәл етмәли идиләр. Бу ҝүн дә мәсиһиләр Исанын нүмунәсини изләмәк үчүн әлләриндән ҝәләни едирләр. Бунунла онлар Јеһованын разылығыны газанырлар вә ҹанлары тәравәтләнир (Мәт. 11:29).

6. Бу мәгалә бизә һансы саһәдә көмәк едә биләр?

⁶ Ибадәтимизә дахил олан һәр саһәни нәзәрдән кечирәркән өзүнүзә нөвбәти суалы верин: «Бу саһәдә һансы инкишафа наил олмушам»? Һәмчинин өзүнүзә нөвбәти суалы верә биләрсиниз: «Ибадәтими неҹә јахшылашдыра биләрәм?» Сөзсүз ки, етдијиниз инкишафа баханда гәлбиниз севинир. Инкишаф етмәли олдуғунуз саһәләри ҝөрмәк үчүн исә сиз Јеһоваја дуа едиб көмәк истәјә биләрсиниз.

7. Јеһова бизим үрәкдән ҝәлән дуаларымыза неҹә јанашыр?

⁷ Јеһоваја дуа едәркән Она ибадәт едирик. Аллаһын Кәламында бизим дуаларымыз бухура бәнзәдилир. Мүгәддәс чадырда вә мәбәддә тәгдим етмәк үчүн бухур хүсуси һазырланырды. (Зәб. 141:2). Бу бухурун Аллаһа хош ҝәлән әтри вар иди. Ејнилә Јеһова бизим дә үрәкдән ҝәлән дуаларымыздан хошланыр, һәтта садә сөзләрдән истифадә етсәк белә (Мәс. 15:8; Ган. 33:10). Мәһәббәтимизи вә миннәтдарлығымызы ифадә едән дуаларымызы ешитмәк Јеһованын гәлбини севиндирир. Јеһова истәјир ки, биз гајғыларымыз, үмидимиз вә арзуларымыз һаггында Онунла бөлүшәк. Үрәјинизи Јеһоваја бошалтмаздан әввәл нә дејәҹәјиниз барәдә дүшүнүн. Онда сиз сәмави Атаныза ән јахшы «бухуру» тәгдим едәҹәксиниз.

8. Јеһованы мәдһ етмәк үчүн һансы ҝөзәл имканымыз вар?

⁸ Биз инсанларын гаршысында Јеһованы мәдһ едәркән Она ибадәт едирик (Зәб. 34:1). Башгаларына Јеһованын фүсункар кејфијјәтләринә вә ҝөрдүјү ишләрә валеһ олдуғумуз һагда данышанда Јеһованы мәдһ едирик. Мәдһ сөзләри шүкранла долу үрәкдән гајнагланыр. Вахт ајырыб Јеһованын бизим үчүн етдији хејирхаһ ишләр барәдә дүшүнсәк, Ону мәдһ етмәк үчүн һәмишә чохлу сәбәбләримиз олаҹаг. Тәблиғ иши бизә хүсусилә ҝөзәл имкан јарадыр ки, «Аллаһа мәдһ гурбаны, Онун адыны бәјан едән дилимизин бәһрәсини тәгдим едәк» (Ибр. 13:15). Јеһоваја дуа етмәмишдән әввәл нә дејәҹәјимиз барәдә диггәтлә дүшүнүрүк. Ејнилә тәблиғ едәҹәјимиз инсанлара нә дејәҹәјимиз барәдә дә габагҹадан јахшыҹа дүшүнмәлијик. Биз истәјирик ки, ҝүҹүмүз чатан ән јахшы «мәдһ гурбаны»ны тәгдим едәк. Буна ҝөрә дә хидмәтдә һәгигәти башгалары илә бөлүшәндә үрәкдән данышырыг.

9. Ибадәт ҝөрүшләриндә иштирак етмәк Аллаһын халгына һансы фајданы ҝәтирир? Өз нүмунәнизи чәкин.

⁹ Јығынҹагларда иштирак едәркән Јеһоваја ибадәт едирик. Јеһова исраиллиләрә бујурмушду: «Илдә үч дәфә... бүтүн  кишиләр Аллаһыныз Јеһованын сечдији јердә Онун һүзуруна ҝәлмәлидир» (Ган. 16:16). Һәмин вахт онлар евләрини, әкин-бичин саһәләрини нәзарәтсиз гојмалы олурдулар. Амма Јеһова онлара вәд етмишди: «Илдә үч дәфә Аллаһыныз Јеһованын һүзуруна ҝедәндә сизин торпагларыныза ҝөз дикән олмајаҹаг» (Чых. 34:24). Исраиллиләр Јеһоваја бүтүн гәлбләри илә иман етдикләри үчүн һәр ил бу бајрамларда иштирак едирдиләр. Бунунла онларын боллуҹа немәтләр алмаг имканы јаранырды. Мәсәлән, Гануну даһа дәриндән өјрәнирдиләр, Аллаһын кәрамәти барәдә дүшүнүрдүләр, Аллаһы севәнләрлә бирҝә руһландырыҹы үнсијјәт едирдиләр (Ган. 16:15). Биз дә ибадәт ҝөрүшләриндә иштирак етмәк үчүн әлимиздән ҝәләни едәндә ејни немәтләри алырыг. Үстәлик, биз јығынҹагда гыса вә мәналы шәрһләр вермәк үчүн һазырлашанда ҝөрүн Јеһова неҹә севинир!

10. Нәјә ҝөрә нәғмә охумаг ибадәтдә ваҹиб јер тутур?

¹⁰ Биз нәғмә охујаркән Јеһоваја ибадәт едирик (Зәб. 28:7). Исраиллиләр үчүн һәмд нәғмәси ифа етмәк ибадәтдә өнәмли јер тутурду. Давуд падшаһ мәбәддә мәзмур охумаг үчүн 288 лавили тәјин етмишди (1 Салн. 25:1, 6—8). Бу ҝүн дә биз һәмд нәғмәләри охујаркән Јеһоваја мәһәббәтимизи ифадә едирик. Сәсимизин ҝөзәл олуб-олмамасы ваҹиб дејил. Бир мәгам үзәриндә дүшүнүн: данышаркән һәр биримиз «дәфәләрлә сәһв едирик», амма бу бизим јығынҹагда вә хидмәтдә данышмағымыза манеә дејил (Јаг. 3:2). Ејнилә сәсимизин ҝөзәл олмадығыны дүшүндүјүмүзә ҝөрә Јеһованы нәғмәләрдә тәрәннүм етмәкдән чәкинмәмәлијик.

11. Зәбур 48:13 ајәсиндә јазыланлара әсасән, нәјә ҝөрә аиләмизлә бирҝә Мүгәддәс Китабы мүталиә етмәјә вахт ајырмалыјыг?

¹¹ Биз Мүгәддәс Китабы мүталиә едәркән вә ушагларымыза Јеһова һагда өјрәдәркән Јеһоваја ибадәт едирик. Шәнбә ҝүнү гануну имкан јарадырды ки, исраиллиләр ҝүндәлик ишләрини бир кәнара гојуб, Јеһова илә мүнасибәтләрини мөһкәмләндирсинләр (Чых. 31:16, 17). Онларын арасындакы иманлы инсанлар өвладларына Јеһова һагда, Онун хејирхаһлығы һагда өјрәдирдиләр. Биз дә мәсулијјәт дашыјырыг ки, Аллаһын Кәламыны дәриндән мүталиә етмәк үчүн вахт ајыраг. Бу, ибадәтимизин бир һиссәсидир вә Јеһоваја јахынлашмағымыза көмәк едир (Зәб. 73:28). Биз аиләмизлә бирҝә Мүгәддәс Китабы мүталиә едәндә јени нәслә — ушагларымыза Јеһова илә араларында мөһкәм бағларын јаранмасына көмәк едирик. (Зәбур 48:13 ајәсини охујун.)

12. Јеһова мүгәддәс чадырын әшјаларыны һазырлајанларын ишинә неҹә јанашырды вә биз бундан нә өјрәнирик?

¹² Ибадәт јерләринин тикинтисиндә вә тәмир-бәрпасында иштирак едәркән Јеһоваја ибадәт едирик. Аллаһын Кәламында дејилир ки, мүгәддәс чадырын тикинтиси вә онун әшјаларынын дүзәлдилмәси «мүгәддәс иш» иди (Чых. 36:1, 4). Бу ҝүн дә Јеһова ибадәт евләринин вә диҝәр теократик биналарын тикинтисинә мүгәддәс хидмәт кими бахыр. Бәзи баҹы-гардашлар бу ишләрә чохлу вахт сәрф едирләр. Онларын Падшаһлыг ишинә вердикләри бу мүһүм төһфәни гијмәтләндирмәмәк олар?! Әлбәттә ки, онлар тәблиғ ишиндә дә иштирак едирләр. Ола биләр ки, онлардан бәзиләри һәтта өнҹүл кими хидмәт етмәк истәсин. Ағсаггаллар бу зәһмәткеш баҹы-гардашлары, тәләбләрә  ҹаваб верирләрсә, өнҹүл кими тәјин етмәјә тәрәддүд етмәјәҹәкләр. Бунунла да тикинти ишләрини дәстәкләдикләрини ҝөстәрәҹәкләр. Фәрги јохдур, бизим тикинти ишиндән башымыз чыхыр, ја јох, һәр биримиз бу биналарын тәмиз вә јахшы вәзијјәтдә галмасына көмәк едә биләрик.

13. Јеһованын јолунда етдијимиз ианәләрә неҹә јанашмалыјыг?

¹³ Падшаһлыг ишини дәстәкләмәк үчүн ианә едәркән Јеһоваја ибадәт едирик. Исраиллиләр Јеһованын һүзуруна әлибош ҝәлмәмәли идиләр (Ган. 16:16). Онлар имканларынын јол вердији гәдәр бәхшиш ҝәтирмәли идиләр. Бунунла онлар руһани ҹәһәтдән мөһкәм галмалары үчүн Јеһованын ҝөрдүјү тәдбирләрә миннәтдарлыгларыны билдирирдиләр. Бәс биз Јеһоваја мәһәббәтимизи вә алдығымыз руһани немәтләрә ҝөрә миннәтдарлығымызы неҹә ифадә едә биләрик? Бунун бир јолу јығынҹағымызы вә үмумдүнја ишини имканымыз чәрчивәсиндә мадди ҹәһәтдән дәстәкләмәкдир. Һәвари Булус буну белә ифадә етмишди: «Үрәкдән верилән бәхшиш Аллаһа хүсусилә хошдур, чүнки О, инсандан ҝүҹү чатаны ҝөзләјир, ҝүҹү чатмајаны јох» (2 Кор. 8:4, 12). Јеһова үрәкдән вердијимиз истәнилән ианәни, һәтта хырда бир шеји дә гијмәтләндирир (Марк 12:42—44; 2 Кор. 9:7).

14. Мәсәлләр 19:17 ајәсинә әсасән, Јеһова бизим диндашларымыза көмәк етмәјимизә неҹә јанашыр?

¹⁴ Еһтијаҹы олан диндашларымыза јардым әли узадаркән Јеһоваја ибадәт едирик. Јеһова сөз вермишди ки, исраиллиләр касыб сојдашларына сәхавәт ҝөстәрәндә әвәзини Өзү верәҹәк (Ган. 15:7, 10). Бәли, биз һәр дәфә еһтијаҹы олан диндашымыза әл тутанда Јеһова буну Она верилмиш бәхшиш кими гәбул едир. (Мәсәлләр 19:17 ајәсини охујун.) Мәсәлән, Булус һәбсдә оларкән Филиппидәки мәсиһиләр она һәдијјәләр ҝөндәрмишди. Булус буну «Аллаһа хош ҝедән, Она мәгбул олан гурбан» адландырмышды (Филип. 4:18). Јығынҹағыныза ҝөз ҝәздирин вә өзүнүзә нөвбәти суалы верин: «Кимин көмәјә еһтијаҹы вар?» Јеһова ҝөрәндә ки, вахтымызы, ҝүҹүмүзү, баҹарығымызы вә мадди вәсаитимизи еһтијаҹы оланлара көмәк етмәк үчүн истифадә едирик, гәлби шад олур. О, буну ибадәтимизин бир һиссәси һесаб едир (Јаг. 1:27).

15. Јеһоваја ибадәт вахт вә ҝүҹ тәләб етсә дә, нәјә ҝөрә ағыр дејил?

¹⁵ Пак ибадәт вахт вә ҝүҹ тәләб едир. Амма бу, ағыр дејил (1 Јәһ. 5:3). Чүнки биз Јеһованы севдијимиз үчүн Она ибадәт едирик. Ҝәлин белә бир нүмунәјә бахаг. Бир ушаг атасына нәсә һәдијјә етмәк истәјир. О отуруб шәкил чәкир. Онун буна саатларла вахты ҝетсә дә, буна ҝөрә пешман дејил. Чүнки атасыны севир вә атасына бу һәдијјәни вермәк ону севиндирир. Ејнилә биз дә Јеһованы севдијимиз үчүн бөјүк мәмнунијјәтлә вахтымызы вә ҝүҹүмүзү ибадәтә һәср едирик.

16. Ибраниләрә 6:10 ајәсинә әсасән, Јеһова Онун гәлбини севиндирмәк үчүн һәр хидмәтчисинин чәкдији зәһмәтә неҹә јанашыр?

¹⁶ Мәһәббәтли валидејн ушагларынын һамысындан ејни һәдијјәни ҝөзләмир. О баша дүшүр ки, һәр ушаг фәрглидир вә онларын габилијјәтләри дә фәрглидир. Ејнилә сәмави Атамыз да һәр биримизин вәзијјәтиндән аҝаһдыр. Ола билсин, сиз таныдығыныз вә ја севдијиниз бир чох адамдан даһа чох шеј етмәји баҹарырсыныз. Јахуд да  башгалары гәдәр чох шеј едә билмирсиниз. Бәлкә дә, јашыныз, сәһһәтиниз, аилә мәсулијјәтиниз буна јол вермир. Белә вәзијјәтдә руһдан дүшмәјин (Гал. 6:4). Јеһова сизин зәһмәтинизи унутмајаҹаг. Әҝәр сиз Јеһоваја вар ҝүҹүнүзлә вә дүзҝүн нијјәтлә хидмәт едирсинизсә, О сиздән разы галаҹаг. (Ибраниләрә 6:10 ајәсини охујун.) О һәтта хидмәтлә бағлы үрәјиниздән кечәнләри ҝөрүр. Јеһова истәјир ки, ҝүҹүнүз чатан гәдәр етдијиниз хидмәт сизә севинҹ вә мәмнунлуг ҝәтирсин.

17. а) Ибадәтин һансыса саһәләриндә чәтинлијимиз варса, һансы аддымлары ата биләрик? б) « Хошбәхтлијинизә хошбәхтлик гатын» чәрчивәсиндәки һансы саһәнин сизә көмәји дәјиб вә неҹә?

¹⁷ Әҝәр бизим ибадәтимизин һансыса саһәсиндә, мәсәлән, мүталиә етмәк вә ја тәблиғ етмәк саһәсиндә чәтинлијимиз варса, нә едә биләрик? Бу ишләрә нә гәдәр чох вахт ајырсаг, бир о гәдәр чох зөвг алаҹағыг вә даһа чох хејрини ҝөрәҹәјик. Ибадәтимизи мүәјјән фәалијјәт нөвүнә, мәсәлән, идман етмәјә вә ја мусиги аләтиндә мәшг етмәјә бәнзәтмәк олар. Әҝәр биз буну һәрдән бир етсәк, бөјүк инкишафа наил олмајаҹағыг. Амма буну һәр ҝүн етмәјә гәрар версәк, нәтиҹә фәргли олаҹаг. Әввәлҹә буну аз-аз едә биләрик, тәдриҹән вахты артырмаг олар. Зәһмәтимизин бәһрәсини ҝөрдүкҹә биз һәмин вахты сәбирсизликлә ҝөзләјәҹәјик вә бу ишдән бөјүк зөвг алаҹағыг. Бәс ејни шеји ибадәтинизә тәтбиг едә биләрсиниз?

18. Аллаһын бизи јаратма мәгсәдинә ујғун давранмаг үчүн нә етмәлијик вә бунун бизә һансы хејри олаҹаг?

¹⁸ Биз Јеһоваја бүтүн гәлбимизлә ибадәт етмәлијик, Јеһова бизи бунун үчүн јарадыб. Белә етдикдә биз хошбәхт вә мәналы һәјат сүрүрүк вә Јеһоваја әбәдијјән хидмәт етмәк үмидимиз олур (Мәс. 10:22). Бизим артыг индидән гәлб раһатлығымыз вар. Чүнки билирик ки, Јеһова хидмәтчиләринә проблемләрлә үзләшәндә көмәк едир (Әшј. 41:9, 10). Доғрудан да, Јеһоваја ибадәт етдијимиз үчүн хошбәхт олмаға чохлу әсасымыз вар. О, бүтүн хилгәти тәрәфиндән шәрәфләнмәјә лајиг Аллаһдыр! (Вәһј 4:11).