1. Јеһова бизи нәјә тәшвиг едир?

МӘҺӘББӘТ ҝөстәрмәк Јеһоваја хошдур (Мик. 7:18). О истәјир ки, хидмәтчиләри дә мәһәббәт ҝөстәрсин. О бизи буна тәшвиг едир. Амма әввәлҹә бу хүсусијјәтә нәләрин дахил олдуғуну билмәлијик.

2. Хесед нәдир?

² Мүгәддәс Китабын бир чох јериндә «мәһәббәт» кими тәрҹүмә олунан сөз ибрани дилиндә хесед сөзүдүр. Бу сөзүн мәнасы нәдир? Мүгәддәс Китабын «Јени Дүнја Тәрҹүмәси»нин лүғәтиндә дејилир ки, хесед өзүнә «мәһәббәт, өһдәлик, сәдагәт вә бағлылыг һиссләрини дахил едир». Һәмчинин бу сөз хејирхаһлыг, јахшылыг, лүтф кими дә тәрҹүмә едилиб. «Чох вахт бу сөзлә Аллаһын инсанлара бәсләдији мәһәббәт тәсвир едилир. Һәмчинин инсанлар арасындакы мүнасибәтләрә аид ишләнир». Мәһәббәт тәзаһүр етдирмәкдә Јеһова ән али нүмунәдир. Бу мәгаләдә өјрәнәҹәјик ки, Јеһова инсанлара гаршы бу хүсусијјәти неҹә тәзаһүр етдирир. Нөвбәти мәгаләдә исә данышаҹағыг ки, Јеһованын хидмәтчиләри олан бизләр Ондан өрнәк алараг бир-биримизә гаршы неҹә мәһәббәт ҝөстәрә биләрик.

3. Јеһова Муса пејғәмбәрә Өзү барәдә нәји бәјан етмишди?

³ Исраиллиләр Мисирдән чыхандан гыса мүддәт сонра Јеһова Муса пејғәмбәрә адыны вә хүсусијјәтләрини бәјан етмишди. О демишди: «Јеһова, Јеһова, рәһмли вә мәрһәмәтли, сәбирли, мәһәббәти бол, һәгигәти әнҝин олан Аллаһ. Минләрҹә нәсилләрә мәһәббәт ҝөстәрән, тәгсири, асилији вә ҝүнаһлары бағышлајан... Аллаһ» (Чых. 34:6, 7). Белә ҝөзәл  сөзләрлә Јеһова мәһәббәт хүсусијјәти һагда ваҹиб бир мәгамы вурғуламышды. Һансы мәгамы?

4, 5. а) Јеһова Өзүнү неҹә тәсвир едиб? б) Биз һансы суаллары арашдыраҹағыг?

⁴ Јеһова садәҹә мәһәббәтли Аллаһ олдуғуну јох, «мәһәббәти бол олан» Аллаһ олдуғуну вурғулајыр. Бу ифадәјә Мүгәддәс Китабда дәфәләрлә раст ҝәлинир (Сај. 14:18; Нәһ. 9:17; Зәб. 86:15; 103:8; Јуил 2:13; Јун. 4:2). Бүтүн ајәләрдә бу ифадә јалныз вә јалныз Јеһоваја аид ишләнир. Инсана аид исә һеч бир јердә истифадә едилмир. Јеһованын мәһәббәт хүсусијјәтини дәфәләрлә вурғуламасы мараглы мәгамдыр. Ҝөрүндүјү кими, мәһәббәт хүсусијјәти Јеһова үчүн чох өнәмлидир *. Давуд падшаһ әбәс јерә нөвбәти сөзләри демәмишди: «Еј Јеһова, Сәнин мәһәббәтин ҝөјләрә чатыр... Пәрвәрдиҝара, мәһәббәтин неҹә дә әзиздир! Бәшәр оғуллары ганадларынын көлҝәсинә сығынар» (Зәб. 36:5, 7). Јеһованын мәһәббәти, Давуд кими, сизин үчүн дә дәјәрлидир?

⁵ Јеһованын мәһәббәтинин нә олдуғуну даһа дәриндән анламаг үчүн ики суалы арашдыраҹағыг: 1) Јеһова кимләрә хүсуси мәһәббәт ҝөстәрир? 2) Јеһованын мәһәббәтдән гајнагланан ишләриндән биз неҹә фајдаланырыг?

6. Јеһова кимләрә хүсуси мәһәббәт ҝөстәрир?

⁶ Јеһова кимләрә хүсуси мәһәббәт ҝөстәрир? Мүгәддәс Китабда дејилир ки, биз чох шеји севә биләрик. Мәсәлән, «әкинчилији», «тәрбијәни», «билији», «ејш-ишрәти», «һикмәти» вә саирә (2 Салн. 26:10; Мәс. 12:1; 21:17; 29:3). Амма хесед дедикдә әшјаја вә ја мәфһума јох, јалныз инсанлара бәсләнән мәһәббәт нәзәрдә тутулур. Јеһова бу хүсусијјәти һәр кәсә гаршы ҝөстәрмир, Онунла хүсуси мүнасибәтдә оланлара гаршы ҝөстәрир. Аллаһымыз достларына гаршы сәдагәтлидир. Онларла бағлы ҝөзәл нијјәти вар вә онлара олан мәһәббәти һеч вахт түкәнмир.

7. Јеһова бүтүн инсанлары севдијини неҹә ҝөстәриб?

⁷ Дүздүр, Јеһова бүтүн бәшәријјәти севир. Иса Мәсиһ Никодем адлы бир нәфәрә демишди: «Аллаһ дүнјаны [бәшәријјәти] о гәдәр севир ки, јеҝанә Оғлуну онун уғрунда фәда етди. Буну она ҝөрә етди ки, она иман едәнләр мәһв олмасын, онларын әбәди һәјаты олсун» (Јәһ. 3:1, 16; Мәт. 5:44, 45).

8, 9. а) Нәјә ҝөрә Јеһова хидмәтчиләринә мәһәббәт ҝөстәрир? б) Инди нә һагда данышаҹағыг?

 ⁸ Анҹаг јухарыда гејд олундуғу кими, Јеһова јалныз Онунла мөһкәм мүнасибәтдә олан кәсләрә, Өз хидмәтчиләринә хүсуси мәһәббәт ҝөстәрир. Буну Давуд падшаһын вә Дәнјал пејғәмбәрин дедији сөзләрдән ајдын ҝөрмәк олар. Мәсәлән, Давуд падшаһ демишди: «Сәни таныјанлардан мәһәббәтини... әсирҝәмә». «Јеһованын мәһәббәти исә әбәдијјән Ондан горханларладыр». Дәнјал пејғәмбәр исә белә демишди: «Сәни севиб әмрләринә риајәт едәнләрә мәһәббәт ҝөстәрән... Аллаһ Јеһова!» (Зәб. 36:10; 103:17; Дән. 9:4). Бу сөзләрдән ҝөрмәк олар ки, Јеһова хидмәтчиләринә она ҝөрә мәһәббәт ҝөстәрир ки, хидмәтчиләри Ону таныјыр, севир, әмрләринә риајәт едир вә Ондан горхурлар. Јеһова Она дүзҝүн шәкилдә ибадәт едәнләрә, Өз хидмәтчиләринә хүсуси мәһәббәт ҝөстәрир.

⁹ Биз Јеһоваја хидмәт етмәјә башламаздан өнҹә О, бүтүн инсанлары севдији кими, бизи дә севирди (Зәб. 104:14). Амма Јеһованын хидмәтчиси оландан сонра О бизә хүсуси мәһәббәт ҝөстәрир. Белә ки, О, һәр бир хидмәтчисинә белә бир әминлик верир: «Мәһәббәтим үстүндән галхмајаҹаг» (Әшј. 54:10). Доғрудан да, Давуд да өз һәјатындан ҝөрмүшдү ки, «Јеһова Өз садиг бәндәсини» уҹалдыр (Зәб. 4:3). Бәс Јеһованын мәһәббәтинин гаршылығында биз нә етмәлијик? Мәзмурчу демишди: «Ағыллы кимдирсә, гој бунлары нәзәрә алсын, Јеһованын хејирхаһ әмәлләринә јахшы-јахшы диггәт етсин» (Зәб. 107:43). Бу мәсләһәти Јеһова верир, буна ҝөрә дә ҝәлин ҝөрәк О, хидмәтчиләринә хејирхаһлығы, мәһәббәти һансы үч саһәдә ҝөстәрир вә бунун бизә һансы фајдасы вар.

10. Јеһованын мәһәббәтинин түкәнмәз олмасындан биз неҹә фајдаланырыг? (Зәбур 31:7).

¹⁰Аллаһын мәһәббәти түкәнмәздир. 136-ҹы мәзмурун илк ајәсиндә дејилир: «Јеһоваја  шүкүр един! О, кәрамәтлидир, мәһәббәти әбәдидир» (Зәб. 136:1). «Мәһәббәти әбәдидир» ифадәси бу мәзмурда 26 дәфә вурғуланыр. Бу мәзмуру башдан-ајаға охујанда адам Јеһованын халгына нә гәдәр јолларла мәһәббәт ҝөстәрдијинә мәәттәл галыр. Дәфәләрлә тәкрарланан «мәһәббәти әбәдидир» ифадәси Јеһованын халгына олан мәһәббәтинин дәјишмәз олдуғуна әмин едир. Јеһованын Өз хидмәтчиләриндән һәләм-һәләм әлини үзмәдијини билмәк чох руһландырыҹыдыр! Јеһова Она хидмәт едән инсанлара бағлы галыр, хүсусилә дә дарда олан вахтларында онларын јанында олур. Бизә фајдасы: Јеһованын бизә бағлы олдуғуну билмәк бизә севинҹ вә ҝүҹ верир ки, чәтинликләрә таб ҝәтирәк вә һәјата апаран јолда јеримәјә давам едәк. (Зәбур 31:7 ајәсини охујун.)

11. Зәбур 86:5 ајәсинә әсасән, Јеһованы хидмәтчиләрини бағышламаға нә тәшвиг едир?

¹¹Аллаһ мәһәббәтиндән ирәли ҝәләрәк бағышлајыр. Јеһова ҝөрәндә ки, ҝүнаһ ишләјән инсан төвбә едиб, өз пис әмәлләриндән әл чәкиб, мәһәббәтиндән ирәли ҝәләрәк ону бағышлајыр. Давуд Јеһова һагда демишди: «Бизимлә ҝүнаһларымыза ҝөрә рәфтар етмир, тәгсирләримизә ҝөрә пајымыза дүшән ҹәзаны вермир» (Зәб. 103:8—11). Давуд виҹдан әзабынын неҹә ағыр јүк олдуғуну билирди. Амма ејни заманда о ҝөрмүшдү ки, Јеһова бағышлајан Аллаһдыр. Јеһованы хидмәтчиләрини бағышламаға нә тәшвиг едир? Ҹаваб Зәбур 86:5 ајәсиндә јазылыб. (Ајәни охујун.) Бәли, Давуд дуасында дедији кими, Јеһова хидмәтчиләрини бағышлајыр, чүнки Ону чағыранлара гаршы мәһәббәти болдур.

12, 13. Кечмиш сәһвләримизә ҝөрә виҹдан әзабы чәкириксә, бизә нә көмәк едә биләр?

¹² Ҝүнаһ ишләјәндә виҹдан әзабы чәкмәјимиз нормалдыр, һәтта бу, јахшыдыр. Бу бизи төвбә етмәјә вә сәһвимизи дүзәлтмәјә тәшвиг едир. Амма Јеһованын бәзи хидмәтчиләри кечмишдә етдикләри сәһвләрә ҝөрә өзләрини чох ҝүнаһкар һисс едирләр. Онлар Аллаһдан әфв диләјиб, үрәкдән төвбә етсәләр дә, јенә дә дүшүнүрләр ки, Аллаһ онлары бағышламаз. Ола билсин,  сиз дә бу ҹүр һиссләр кечирирсиниз. Онда Јеһованын Өз хидмәтчиләринә мәһәббәт ҝөстәрмәјә һазыр олдуғуну билмәјин сизә чох көмәји олаҹаг.

¹³Бизә фајдасы. Гејри-камил олсаг да, Јеһоваја тәмиз виҹданла хидмәт едә биләрик. Чүнки «Онун Оғлу Исанын ганы бизи бүтүн ҝүнаһлардан тәмизләјир» (1 Јәһ. 1:7). Етдијиниз сәһвләрә ҝөрә руһдан дүшәндә унутмајын ки, Јеһова төвбә едән инсаны бағышламаға һазырдыр. О, буну чох истәјир. Давуд Јеһованын мәһәббәти илә бағышламаға һазыр олмасыны белә әлагәләндирмишди: «Ҝөјләр јердән нә гәдәр уҹадырса, мәһәббәти дә Ондан горханлара о гәдәр бөјүкдүр. Шәрг гәрбдән нә гәдәр узагдырса, ҝүнаһларымызы биздән о гәдәр узаглашдырды» (Зәб. 103:11, 12). Доғрудан да, Јеһова ҹомәрдликлә әфв едир (Әшј. 55:7).

14. Давудун сөзләринә әсасән, Јеһованын мәһәббәти бизи неҹә мүдафиә едир?

¹⁴Аллаһын мәһәббәти бизи руһани ҹәһәтдән горујур. Давуд дуасында демишди: «Пәнаһҝаһым Сәнсән, мәни бәладан горујарсан, мәни гуртулуш сәдалары илә дөврәләјәрсән... Јеһоваја ҝүвәнәнләри исә Онун мәһәббәти әһатә едәр» (Зәб. 32:7, 10). Гәдимдә шәһәри әһатә едән диварлар инсанлары горудуғу кими, Јеһованын да мәһәббәти дивартәк бизи әһатә едәрәк Онунла мүнасибәтләримизә зәрәр вураҹаг һәр шејдән горујур. Бундан әлавә, Јеһова мәһәббәти илә бизи Өзүнә тәрәф чәкир (Әрм. 31:3).

15. Нәјә ҝөрә Јеһованын мәһәббәтини пәнаһҝаһа, истеһкама бәнзәтмәк олар?

¹⁵ Давуд Јеһованын Өз халгыны горудуғуну ҝөстәрмәк үчүн башга бир бәнзәтмәдән дә истифадә етмишди. О јазмышды: «Аллаһ мәһәббәт Аллаһыдыр, мәним галамдыр О!» Давуд Јеһова һагда һәмчинин нөвбәти сөзләри демишди: «О, мәним хејирхаһымдыр! Одур истеһкамым, пәнаһҝаһым, хиласкарым, галам, галханым» (Зәб. 59:17; 144:2). Давуд Јеһованын мәһәббәтини галаја, истеһкама бәнзәдир. Дүнјанын һарасында јашајырыгса јашајаг, Јеһованын хидмәтчиси олдуғумуз мүддәтдә, Онунла дәјәрли мүнасибәтләримизи горумаг үчүн лазым олан һәр шејлә бизи тәмин едәҹәк. Бизә ејни әминлији 91-ҹи мәзмур верир. Бу мәзмурун јазары демишди: «Јеһоваја дејәрәм: “Пәнаһҝаһым, истеһкамым, Аллаһым Сәнсән”» (Зәб. 91:1—3, 9, 14). Муса пејғәмбәр дә буна бәнзәр тәсвирлә Јеһованы «сығынаҹағы» адландырмышды (Зәб. 90:1, һаш.). Бундан әлавә, өмрүнүн сонуна јахын Муса пејғәмбәр гәлбохшајан бир бәнзәтмәдән истифадә етмишди. О јазмышды: «Та бинеји-гәдимдән Аллаһ пәнаһ јеридир, сәни әбәди голлары үстүндә ҝәздирир» (Ган. 33:27). «Сәни әбәди голлары үстүндә ҝәздирир» ифадәси бизә Јеһова һагда нә дејир?

16. Јеһова бизә неҹә көмәк едир? (Зәбур 136:23).

¹⁶ Јеһоваја пәнаһҝаһымыз кими јанашанда өзүмүзү тәһлүкәсизликдә һисс едирик. Амма бәзән олур ки, руһ дүшкүнлүјүнә гапылырыг вә һеч ҹүр дирчәлә билмирик. Белә вахтларда Јеһова биздән өтрү нә едир? (Зәбур 136:23 ајәләрини охујун.) О бизи голларына алыб, еһмалҹа галдырыр вә көмәк едир ки, јенидән ајаг үстә дураг (Зәб. 28:9; 94:18). Бизә фајдасы: Биз билирик ки, һәр заман Јеһоваја архалана биләрик. Бу бизә ики саһәдә көмәк едир. Биринҹиси, билирик ки, һарада јашамағымыздан асылы олмајараг, пәнаһ  јеримиз вар. Икинҹиси, сәмави Атамыз бизим гајғымыза галыр.

17. Јеһованын мәһәббәти сајәсиндә нәјә әминик? (Зәбур 33:18—22).

¹⁷ Арашдырдығымыз кими, әмин ола биләрик ки, сынагларла үзләшәркән Јеһова бизә дајаг олаҹаг, садиг галмағымыза көмәк едәҹәк (2 Кор. 4:7—9). Әрәмја пејғәмбәр демишди: «Јеһованын мәһәббәтинә ҝөрә мәһв олмадыг. Онун мәрһәмәти түкәнмәздир» (Мәрс. 3:22). Биз әмин ола биләрик ки, Јеһова һеч вахт мәһәббәтини биздән әсирҝәмәјәҹәк. Мәзмурчу да демишди: «Јеһованын ҝөзү Ондан горханларын, Ондан мәһәббәт уманларын үзәриндәдир». (Зәбур 33:18—22 ајәләрини охујун.)

18, 19. а) Биз нәји јадда сахламалыјыг? б) Нөвбәти мәгаләдә нә һагда данышаҹағыг?

¹⁸ Нәји јадда сахламалыјыг? Биз Јеһоваја хидмәт етмәјә башламаздан өнҹә О, бүтүн инсанлары севдији кими, бизи дә севирди. Амма Онун хидмәтчиси оландан сонра бизә һәмчинин хүсуси мәһәббәт ҝөстәрмәјә башлады. Бу мәһәббәтиндән ирәли ҝәләрәк, О бизи ҝүҹлү голлары илә гуҹаглајыб мүдафиә едир. Јеһова һәмишә бизә јахын олаҹаг вә бизимлә бағлы ҝөзәл вәдләрини һәјата кечирәҹәк. О истәјир ки, биз әбәдијјәт боју Онун досту олаг! (Зәб. 46:1, 2, 7). Буна ҝөрә дә һансы сынагла үзләшириксә үзләшәк, Јеһова бизә ҝүҹ верәҹәк ки, садиг галаг.

¹⁹ Биз өјрәндик ки, Јеһова хидмәтчиләринә мәһәббәтини һансы јолларла ифадә едир. О истәјир ки, биз дә бир-биримизә хүсуси мәһәббәт ҝөстәрәк. Бәс буну неҹә едә биләрик? Нөвбәти мәгаләдә бу һагда данышаҹағыг.