1. Бизи һансы суал нараһат едә биләр?

ЈАЛАН динин мәһви, Мәҹуҹ өлкәсиндән олан Јәҹуҹун һүҹуму, Армаҝеддон мүһарибәси. Бизи гаршыда ҝөзләјән бу һадисәләр һагда дүшүнәндә нараһат олурсунуз? Бәлкә дә, нә вахтса дүшүнмүсүнүз: «Ҝөрәсән, мән бу дәһшәтли һадисәләр заманы сәдагәтими горуја биләҹәјәм?» Әҝәр ағлыныза нә вахтса белә фикирләр ҝәлибсә, бу мәгаләнин әсас ајәсинин сизә бөјүк көмәји дәјәҹәк. Бу сөзләри Иса шаҝирдләринә демишди: «Гој үрәјиниз нараһат олмасын... Иман един» (Јәһ. 14:1). Ҝүҹлү иман гаршыдакы чәтинликләрә дөзмәјә көмәк едәҹәк.

2. Иманымызы неҹә мөһкәмләндирә биләрик вә бу мәгаләдә нә һагда данышаҹағыг?

² Иманымызын ҝәләҹәк сынаглар гаршысында мөһкәм олмасы үчүн фикир вермәлијик ки, бу ҝүн сынагларла үзләшәндә неҹә давранырыг. Онда биләҹәјик, иманымызы һансы саһәдә мөһкәмләндирмәлијик. Һәр сынагдан чыхдыгҹа иманымыз ҝүҹләнир. Беләҹә, ҝәләҹәкдәки сынаглара таб ҝәтирә биләҹәјик. Бу мәгаләдә Исанын шаҝирдләринин үзләшдији дөрд вәзијјәтә нәзәр салаҹағыг. Бу вәзијјәтләр ҝөстәрмишди ки, онлар иманларыны мөһкәмләндирмәлидир. Өјрәнәҹәјик ки, биз дә буна бәнзәр вәзијјәтләрлә үзләшә биләрик вә бунлар бизи ҝәләҹәк сынаглара һазырлаја биләр.

3. Мәтта 6:30, 33 ајәләринә әсасән, Иса иманла бағлы һансы фикри ачыг-ајдын демишди?

³ Тәбии ки, аилә башчысы истәјир ки, арвадынын вә ушагларынын башынын үстүндә дамы, јемәји, әјин-башы олсун. Амма индики дөврдә аиләни бүтүн бунларла тәмин етмәк асан дејил.  Бәзи диндашларымыз ишләрини итириб вә нә гәдәр чалышсалар да, јени иш тапа билмирләр. Кимиси дә мәсиһи үчүн мүнасиб олмадығына ҝөрә һансыса ишдән имтина едиб. Белә мәгамларда Јеһованын аиләмизи һансыса јолла тәмин едәҹәјинә ҝүҹлү иман лазымдыр. Иса Мәсиһ Дағүстү вәзиндә буну шаҝирдләринә ачыг-ајдын демишди. (Мәтта 6:30, 33 ајәләрини охујун.) Јеһованын бизи һеч вахт атмајаҹағына тамамилә әмин олсаг, диггәтимизи лазым олан ишә, Падшаһлығын ишинә ҹәмләјә биләҹәјик. Јеһованын көмәјини ҝөрдүкҹә О бизим үчүн даһа ҝерчәк олаҹаг вә иманымыз мөһкәмләнәҹәк.

4, 5. Бир аиләјә мадди сыхынтылара дөзмәјә нә көмәк етди?

⁴ Ҝәлин Венесуеладан олан Кастро аиләсинин һадисәсинә бахаг. Онлар мадди сыхынтылары заманы Јеһованын дәстәјини ҝөрмүшдүләр. Бир заманлар онларын өз фермасы вар иди, орадан ҝәлән ҝәлирлә доланырдылар. Лакин сонра силаһлы гулдур дәстәси мүлкләрини әлә кечириб, онлары орадан говду. Аилә башчысы Миҝел дејир: «Инди бир нәфәрин мүвәггәти вердији балаҹа торпаг саһәсини әкиб-беҹәририк. Демәк олар, бүтүн доланышығымыз бундан асылыдыр. Һәр ҝүнүмү Јеһоваја дуа илә ачырам, хаһиш едирәм ки, бизә буҝүнлүк рузимизи јетирсин». Бу аиләнин доланышығы чәтин олса да, онлар әминдир ки, Јеһова онларын ҝүндәлик тәләбатларыны тәмин етмәјә гадирдир. Бунун сајәсиндә Кастро аиләси мүнтәзәм олараг јығынҹагда вә тәблиғдә иштирак едир. Онлар Падшаһлығын ишини биринҹи јерә гојурлар вә Јеһова онларын зәрури еһтијаҹыны тәмин едир.

⁵ Бу чәтин дөвр әрзиндә Миҝел вә арвады Јурај бүтүн диггәтләрини Јеһованын неҹә гајғыларына галдығына ҹәмләдиләр. Бәзән Јеһова диндашлары васитәсилә онлара көмәк едирди. Онлар бу аиләјә имкан дахилиндә мадди јардым едирдиләр, Миҝелә иш тапмаға көмәк едирдиләр. Јахуд да филиалын ҝөстәрдији јардым васитәсилә Јеһова онларын зәрури тәләбатларыны өдәјирди. Јеһова онлары һеч вахт тәк гојмады. Беләҹә, бу аиләнин иманы ҝүҹләнди. Јеһованын онлара дәстәк олдуғу бир һадисәни данышан заман евин бөјүк гызы Һоселин бу сөзләри демишди: «Јеһованын әлини бу дәрәҹәдә ачыг-ајдын ҝөрмәк адамы һејран гојур. Мәним үчүн Јеһова һәјатым боју архалана биләҹәјим Достдур. Үзләшдијимиз чәтинликләр бизи ҝәләҹәкдәки даһа ағыр сынаглара һазырлады».

6. Мадди сыхынтыларыныз олан заман иманынызы неҹә мөһкәмләндирә биләрсиниз?

⁶ Һал-һазырда мадди сыхынты ичиндәсиниз? Шүбһәсиз, бу дөнәм сизин үчүн чох чәтиндир. Амма бу вәзијјәтдә дә иманынызы мөһкәмләндирә биләрсиниз. Дуа едиб, Иса Мәсиһин Мәтта 6:25—34 ајәләрини охујун вә онларын үзәриндә дүшүнүн. Һәмчинин бизим дөврүмүздә мадди сыхынтыларына бахмајараг, Јеһоваја ибадәти һәр  шејдән үстүн тутан хидмәтчиләринә Јеһованын неҹә дајаг олдуғуна диггәт јетирин (1 Кор. 15:58). Беләҹә, әминлијиниз артаҹаг ки, Јеһова сизинлә охшар вәзијјәтдә оланлара көмәк етдији кими, сизә дә көмәк едәҹәк. Јеһова билир, сизин нәјә еһтијаҹыныз вар вә буну тәмин етмәјин јолуну да билир. Јеһованын көмәјини өз һәјатынызда ҝөрдүкҹә иманыныз ҝүҹләнәҹәк вә ҝәләҹәкдә даһа ҝүҹлү сынаглара дөзә биләҹәксиниз (Һәб. 3:17, 18).

7. Мәтта 8:23—26 ајәләринә әсасән, «ҝүҹлү фыртына» Исанын шаҝирдләринин иманыны неҹә сынады?

⁷ Бир дәфә Иса вә шаҝирдләри дәниздә ҝүҹлү фыртына илә үзләшмишдиләр. Иса бу һадисә васитәсилә онлара иманларыны һансы саһәдә мөһкәмләндирмәли олдугларыны ҝөстәрди. (Мәтта 8:23—26 ајәләрини охујун.) Елә ҝүҹлү фыртына гопмушду ки, гајыға су долурду. Бу заман Иса һәр шејдән бихәбәр јатырды. Шаҝирдләр тәлаш ичиндә иди. Исаны ојадыб онлары хилас етмәсини хаһиш етдиләр. Иса мүлајимликлә онлары мәзәммәт едәрәк деди: «Нијә горхдунуз, еј аз иманлылар?» Онлар анламалы идиләр ки, Јеһова Иса Мәсиһи вә онунла бирликдә оланлары асанлыгла горуја биләр. Бу һадисәдән өзүнүз үчүн нә ҝөтүрдүнүз? Һәјатда истәр һәгиги, истәр мәҹази фыртыналарла үзләшәк, мөһкәм иман бунлара дөзмәјә көмәк едәҹәк.

8, 9. Анелин иманы неҹә сынанды вә она нә көмәк етди?

⁸ Ҝөрүн Пуерто-Рикода јашајан Анел адлы субај баҹынын үзләшдији чәтин сынагдан сонра иманы неҹә мөһкәмләнмишди. Онун үзләшдији «фыртына» һәгиги иди. 2017-ҹи илдә баш вермиш Марија гасырғасы заманы Анелин еви дармадағын олмушду вә о, ишини итирмишди. Анел дејир: «Һәјатымын бу чәтин ҝүнләриндә чох нараһатчылыг кечирирдим. Амма дуа васитәсилә Јеһоваја етибар етмәји өјрәндим вә нараһатчылыгларымын әл-голуму бағламасына јол вермәдим».

⁹ Анелә бу чәтин сынаға дөзмәјә һәмчинин итаәткарлыг көмәк етди. О дејир: «Тәшкилатдан ҝәлән ҝөстәришләрә итаәт етмәк мәнә тәлаша гапылмамаға көмәк етди. Јеһованын баҹы-гардашлар васитәсилә мәнә неҹә дајаг олдуғуну ҝөрдүм. Онлар мәни һәм руһландырдылар, һәм мадди ҹәһәтдән көмәк етдиләр. Јеһова мәнә о гәдәр шеј верди ки, мән Ондан һеч бу гәдәр шеј истәјә билмәздим. Иманым һәдсиз дәрәҹәдә мөһкәмләнди».

10. «Ҝүҹлү фыртына» илә үзләшән заман нә едә биләрсиниз?

¹⁰ Һал-һазырда һәјатынызда «ҝүҹлү фыртына» баш галдырыб? Ола биләр ки, тәбии фәлакәтдән зәрәр чәкмисиниз, јахуд мәҹази фыртына илә үзләшмисиниз. Мәсәлән, сағламлығынызда ҹидди проблем вар вә буна ҝөрә мәјуслуға гапылмысыныз, өзүнүзү чарәсиз һисс едирсиниз. Бәзән нараһатчылыг кечирмәјиниз  нормалдыр. Амма јол вермәјин ки, бу нараһатчылыг сизин Јеһоваја етибар етмәјинизә мане олсун. Үрәкдән дуа едиб Јеһоваја јахынлашын. Онун кечмишдә сизә неҹә көмәк етдијини јадыныза салын вә бу сизин иманынызы ҝүҹләндирәҹәк (Зәб. 77:11, 12). Әмин ола биләрсиниз ки, Јеһова сизи һеч вахт атмајаҹаг, нә инди, нә дә ҝәләҹәкдә.

11. Рәһбәрлик едән гардашлара нә үчүн итаәт етмәлијик?

¹¹ Сизә сынаглара дөзмәјә башга нә көмәк едә биләр? Анелин дә гејд етдији кими, итаәткарлыг. Јеһованын вә Исанын тәјин етдији инсанлара етибар етмәји өјрәнин. Елә анлар олаҹаг ки, рәһбәрлик едән гардашларын ҝөстәришләри сизә ағлабатан ҝөрүнмәјәҹәк. Амма Јеһова итаәткарлыға мүкафат верир. Аллаһын Кәламындан вә баҹы-гардашларымызын һадисәсиндән билирик ки, итаәткарлыг һәјатлары хилас едир (Чых. 14:1—4; 2 Салн. 20:17). Бу кими нүмунәләрин үзәриндә дүшүнүн. Онда сиз тәшкилатын һәм инди, һәм дә ҝәләҹәкдә верәҹәји ҝөстәришләрә һәвәслә итаәт едәҹәксиниз (Ибр. 13:17). Беләҹә, сиз тезликлә баш верәҹәк ән ҝүҹлү фыртынадан горхмајаҹагсыныз (Мәс. 3:25).

12. Лука 18:1—8 ајәләриндә һагсызлыға дөзмәјин иманла әлагәли олдуғу неҹә ҝөстәрилир?

¹² Иса билирди ки, үзләшдикләри һагсызлыглар шаҝирдләринин иманыны сынајаҹаг. Буна дөзмәјә көмәк етмәк үчүн Иса онлара бир нүмунә чәкмишди. Бу һагда «Лука» китабында јазылыб. Бир дул гадын һагг-наһаг танымајан һакимә дәфәләрлә үз тутур ки, әдаләти бәргәрар етсин. О әминдир ки, исрарлы олмасы нәтиҹәсиз галмајаҹаг. Ахырда һаким онун хаһишини јеринә јетирир. Бурадан нә өјрәнирик? Јеһова әдаләтсиз дејил. Буна ҝөрә дә Иса демишди: «Әҝәр о, белә етдисә, мәҝәр сәбирли Аллаһ Ондан ҝеҹә-ҝүндүз имдад диләјән сечилмишләри үчүн әдаләти бәрпа етмәјәҹәк?» (Лука 18:1—8 ајәләрини охујун.) Сонра Иса сөзүнә белә давам етди: «Ҝөрәсән, инсан Оғлу ҝәләндә јер үзүндә белә иман тапаҹаг?» Биз һагсызлыгла үзләшәндә сәбримиз вә дөзүмүмүзлә дул гадын кими ҝүҹлү имана саһиб олдуғумузу ҝөстәрмәлијик. Бу ҹүр иманын сајәсиндә архајыныг ки, Јеһова ҝеҹ-тез бизим хејримизә һәрәкәтә кечәҹәк. Һәмчинин дуанын ҝүҹүнә дә иман етмәлијик. Бәзән Јеһова дуамыза ағлымыза белә ҝәлмәјән тәрздә ҹаваб верә биләр.

13. Дуа етмәк һагсызлыгла үзләшән бир аиләјә неҹә көмәк етмишди?

¹³ Ҝәлин Конго Демократик Республикасында јашајан Веро адлы баҹынын башына ҝәләнләрә нәзәр салаг. Баҹы иманда олмајан јолдашы вә 15 јашлы гызы илә бир кәнддә јашајырды. Һәрби дәстәнин һүҹуму уҹбатындан јашадыглары кәнддән гачмалы олурлар.  Поста чатанда әсҝәрләр онлары сахлајыр вә өлдүрмәклә һәдәләјир. Веро баҹы ағламаға башлајанда гызы ону сакитләшдирмәк үчүн уҹа сәслә дуа едир вә дөнә-дөнә Јеһованын адыны чәкир. Дуасыны битирәндән сонра командир сорушур: «Сәнә белә дуа етмәји ким өјрәдиб?» О дејир: «Анам Мәтта 6:9—13 ајәләрдә јазылан дуаја әсасән өјрәдиб». Командир гыза дејир: «Валидејнләринлә бирликдә сағ-саламат ҝет. Гој Аллаһыныз Јеһова сизи горусун!»

14. Иманымыз неҹә сынана биләр вә бизә дөзмәјә нә көмәк едәҹәк?

¹⁴ Бу кими һадисәләр бизи өјрәдир ки, дуаја һеч вахт өнәмсиз јанашмајаг. Бәс дуамыза дәрһал вә хүсуси тәрздә ҹаваб алмырыгса, онда неҹә? Исанын мәсәлиндәки дул гадындан өрнәк алараг дуа етмәјә давам един. Әмин олун ки, Јеһова сизи һеч вахт атмајаҹаг, дүз вахтында вә Өзү мәсләһәт билдији јолла дуаныза ҹаваб верәҹәк. Даима Јеһовадан мүгәддәс руһ диләјин (Филип. 4:13). Унутмајын ки, Јеһова тезликлә сизә о гәдәр бол немәтләр верәҹәк ки, кечмишдәки әзабларынызы унудаҹагсыныз. Јеһованын көмәји илә үзләшдијиниз сынаглара дөздүкҹә иманыныз ҝүҹләнәҹәк вә гаршыдакы сынаглара да таб ҝәтирәҹәксиниз (1 Бут. 1:6, 7).

15. Мәтта 17:19, 20 ајәләринә әсасән, Исанын шаҝирдләри һансы чәтинликлә үзләшмишди?

¹⁵ Иса шаҝирдләринә өјрәтмишди ки, иман сајәсиндә үзләшдикләри бүтүн манеәләри аша биләрләр. (Мәтта 17:19, 20 ајәләрини охујун.) Онлар әввәлләр инсанларын ичинә ҝирән ҹинләри говмушдулар, амма бир дәфә буну баҹармамышдылар. Проблем нәдә иди? Иса изаһ етди ки, иманларыны артырмалыдырлар. Онлара деди ки, иманлары мөһкәм олса, һәтта дағ бојда олан манеәләри аша биләрләр! Бу ҝүн биз дә ашылмаз кими ҝөрүнән чәтинликләрлә үзләширик.

16. Иманы Гејди баҹыја башына ҝәлән фаҹиәјә дөзмәјә неҹә көмәк етди?

¹⁶ Ҝәлин Гватемаладан олан Гејди адлы баҹынын һадисәсинә бахаг. Јығынҹагдан евә гајыданда әри Еди ҹинајәткарлар тәрәфиндән гәтлә јетирилмишди. Гејдинин иманы она бу бөјүк дәрдә дөзмәјә неҹә көмәк етди? О дејир: «Дуа бүтүн гајғы јүкүмү Јеһованын үзәринә гојмаға көмәк едир. Дуадан сонра үрәјимдә гәлб раһатлығы јараныр. Јеһова аилә үзвләрим, јығынҹагдакы достларым васитәсилә гајғыма галыр. Хидмәтдә фәал олмаг гәлбимин ағрысыны јүнҝүлләшдирмәјә вә сабаһ үчүн һәддән артыг нараһат олмадан бир ҝүн кечирмәјә көмәк едир. Башыма ҝәлән бу һадисә мәни өјрәтди ки, ҝәләҹәкдә һансы сынагла үзләширәмсә үзләшим, Јеһованын, Исанын вә тәшкилатын көмәји илә онун өһдәсиндән ҝәлә биләрәм».

17. Дағ бојда чәтинликләрлә үзләшәндә нә едә биләрик?

¹⁷ Јахыныныз вәфат етдијинә ҝөрә јас ичиндәсиниз? Онда дирилмә үмидинә иманынызы  мөһкәмләндирмәк үчүн Мүгәддәс Китабда јазылмыш дирилмә һадисәләрини охујун. Бәлкә, аилә үзвүнүз јығынҹагдан кәнар едилдији үчүн кәдәр ичиндәсиниз? Мүталиә едәрәк әминлијинизи артырын ки, Јеһованын тәрбијә үсулу һәмишә ән јахшы үсулдур. Һансы проблемләрлә үзләширсинизсә үзләшин, јаранан вәзијјәтдән истифадә едиб иманынызы мөһкәмләндирин. Дуа едиб үрәјинизи Јеһоваја бошалдын. Өзүнүзү тәҹрид етмәјин, әксинә, баҹы-гардашлара јахын олун (Мәс. 18:1). Сизә чәтинлијә дөзмәјә көмәк едәҹәк ишләрлә мәшғул олун, һәтта буну ҝөз јашлары ичиндә етмәли олсаныз да (Зәб. 126:5, 6). Јенә дә јығынҹаг ҝөрүшүндә, тәблиғ ишиндә иштирак етмәјә, Мүгәддәс Китабы охумаға давам един. Һәмчинин диггәтинизи Јеһованын ҝәләҹәкдә сизләрә һазырладығы мөһтәшәм немәтләрә ҹәмләјин. Јеһованын сизә дајаг олдуғуну ҝөрдүкҹә, иманыныз чох мөһкәмләнәҹәк.

18. Иманынызын зәиф олдуғуну ҝөрсәниз, нә едә биләрсиниз?

¹⁸ Кечмишдә вә ја инди үзләшдијиниз сынаглар иманынызын зәиф олдуғуну үзә чыхарыбса, руһдан дүшмәјин, буна иманынызы мөһкәмләндирмәк үчүн бир фүрсәт кими бахын. Һәвариләр Исадан хаһиш едәрәк демишди: «Иманымызы артыр» (Лука 17:5). Биз дә Јеһовадан ејни шеји хаһиш едә биләрик. Һәмчинин бу мәгаләдә һаггында данышдығымыз баҹы-гардашлардан да нүмунә ҝөтүрә биләрик. Миҝел вә Јурај кими, Јеһованын сизә дајаг олдуғу вахтлары хатырлајын. Веро баҹынын гызы вә Анел кими, Јеһоваја һәрарәтлә дуа един, хүсусилә чәтинликләрлә үзләшәндә. Гејди кими, сиз дә унутмајын ки, Јеһова достларыныз вә аилә үзвләриниз васитәсилә сизә көмәк едә биләр. Һал-һазыркы сынаглар заманы Јеһоваја сығынсаныз, ҝәләҹәкдәки сынаглара дөзмәк үчүн Јеһованын сизә дајаг олаҹағына даһа чох әмин олаҹагсыныз.

19. Иса нәјә әмин иди вә сиз дә нәјә әмин ола биләрсиниз?

¹⁹ Иса шаҝирдләринә иманларынын зәиф олдуғу саһәләри ҝөстәрди. Амма о әмин иди ки, Јеһованын көмәји илә онлар ҝәләҹәкдәки сынаглардан башыуҹа чыхаҹаглар (Јәһ. 14:1; 16:33). Һәмчинин Иса әмин иди ки, ҝүҹлү иманлары сајәсиндә бөјүк издиһам гаршыдан ҝәлән бөјүк мүсибәтдән сағ чыхаҹаг (Вәһј 7:9, 14). Бәс сиз бу издиһамын сырасында олаҹагсыныз? Әҝәр инди јаранан һәр вәзијјәтдә иманынызы мөһкәмләндирсәниз, Јеһованын лүтфү сајәсиндә сиз дә ола биләрсиниз! (Ибр. 10:39).