Јараданымыз Јеһова Аллаһ јалана нифрәт едир. Буну Мәсәлләр 6:16—19 ајәләриндән ҝөрмәк олар: «Алты шеј вар ки, Јеһованын зәһләси ҝедир, једди шејдән икраһ едир: тәкәббүрлә бахан ҝөзләр, јалан данышан дил, ҝүнаһсыз ган төкән әлләр, фитнә гуран үрәк, шәр үчүн тәләсән ајаг, нәфәси јаланла ҝедиб-ҝәлән шаһид, гардашлар арасына нифаг салан кәс».

Доғрулуғу севән Јеһова Аллаһ бујурур ки, Онун ризасыны газанмаг истәјириксә, вердији ганунлара әмәл етмәлијик. Мәсәлән, Колослулара 3:9 ајәсиндә дејилир ки, «бир-биринизә јалан данышмајын. Көһнә шәхсијјәти әмәлләри илә бирҝә әјниниздән» чыхарын. Јалан данышанлары чох аҹы агибәт ҝөзләјир. Зәбур 5:6 ајәсиндә јазылыб: «Јалан данышанлары мәһв едәрсән». Биз јалана Јеһова Аллаһ кими јанашсаг, һәмишә доғру данышмаға тәшвиг олунаҹағыг.

Амма бу, о демәк дејил ки, кимсә биздән мүәјјән мәлуматы чыхармаг истәјәндә билдијимиз һәр шеји ачыб данышмалыјыг. Мәсәлән, пис нијјәтли инсанларын мүәјјән мәлуматлары билмәсинә ҝәрәк јохдур. Мәсиһиләр онлара дүшмән кәсилмиш дүнјада јашадыглары үчүн Иса Мәсиһин «илан кими еһтијатлы, ҝөјәрчин кими мәсум олун» нәсиһәтинә диггәт јетирмәлидирләр (Мәт. 10:16; Јәһ. 15:19). Мәсиһ өзү дә бу саһәдә ҝөзәл нүмунәдир. О да мүәјјән мәгамларда бәзи мәлуматлары данышмамаға үстүнлүк верирди, хүсусән дә о һалларда ки, бүтүн мәлуматы данышмаг онун өзүнүн вә ја давамчыларынын зијанына ола биләрди. Вә гејд едәк ки, бу заман о, јалана әл атмырды. О, садәҹә олараг, ја һеч нә демирди, ја да сөһбәти башга сәмтә јөнәлдирди (Мәт. 15:1—6; 21:23—27; Јәһ. 7:3—10).

Һәрдән инсан горхунун вә диҝәр инсан факторларынын уҹбатындан јалан данышыр. Бу һал һәвари Бутрусун да башына ҝәлмишди: о, Иса Мәсиһи таныдығыны үч дәфә данмышды. Бу һәрәкәти она виҹдан әзабы јашатды (Лука 22:54—62). Амма о, үрәкдән төвбә етди вә Аллаһын әфвини газанды. Аллаһын она сонралар һәвалә етдији шәрәфли тапшырыглар онун бу әфвә лајиг ҝөрүлдүјүнә ишарәдир. Ҝөрдүјүмүз кими, әҝәр инсан јалан данышыбса, мәрһәмәт тапмаг үчүн төвбә етмәли вә Аллаһын нифрәт етдији бу әмәли бир дә төрәтмәмәлидир.

Јалан данышыб сонра мәрһәмәт ахтармагданса, јахшы олмаздымы ки, һәмишә һәгигәти данышаг?! Беләҹә, биз һәм инсанларын јанында етибардан дүшмәрик, һәм дә Јараданымызла мүнасибәтләримизә хәләл ҝәлмәз. Зәбур 15:1, 2 ајәләри дә бизи буна сәсләјир: «Еј Јеһова, чадырында ким меһман олар? Мүгәддәс дағында ким јашајар? О кәс ки камиллик јолу илә ҝедир, әмәлләри доғрудур, үрәјиндә һәгигәти данышар».

Мүгәддәс Китаб бизи дүрүст олмаға чағырыр. Јалан данышмаг ҝүнаһа јазылан әмәлдир. Буна ҝөрә дә, Аллаһын Кәламы бизи бу әмәлдән чәкиндириб бир-биримизә һәгигәти сөјләмәјә сәсләјир (Ефес. 4:25). Бу мәсләһәтә әмәл етмәклә биз виҹданымызы тәмиз сахлајаҹаг, баҹы-гардашларла арамыздакы сүлһү вә мәһәббәти горујаҹаг вә һагг Аллаһ Јеһованын адыны уҹалдаҹағыг (Зәб. 31:5; Ибр. 13:18).