«БУРА көчәндә өзүмү чох нараһат һисс едирдим. Һеч билмирдим, бурада өзүмә дост тапа биләҹәјәм, ја јох. Билмирдим, мәни неҹә гаршылајаҹаглар». Бу сөзләри јашадығы јердән тәхминән 1400 километр аралыда јерләшән әразијә көчмүш Ален * гардаш дејир.

Әҝәр сиз дә башга јығынҹаға кечмисинизсә, јәгин бу һиссләр сизә танышдыр. Јени јығынҹаға өјрәшмәјә сизә нә көмәк едә биләр? Өјрәшмәк сиз дүшүндүјүнүздән дә чәтин ҝәлирсә, нә едә биләрсиниз? Бәлкә дә, сиз һеч бир јығынҹаға кечмәмисиниз, амма сизин јығынҹаға кечәнләр вар. Онлара јығынҹаға өјрәшмәјә неҹә көмәк едә биләрсиниз? Мәгаләдә бу суаллара ҹаваб верилир.

Ҝәлин бир нүмунәјә бахаг: ағаҹы бир јердән башга јерә әкәндә о, «стресс» јашајыр. Ағаҹы торпагдан чыхаранда, адәтән, онун көкүнүн әксәр һиссәсини кәсирләр ки, дашымаг раһат олсун. Тәзә јерә әкиләндән дәрһал сонра ағаҹ јени көкләр атмаға башлајыр. Ејнән, башга јығынҹаға кечмәк дә сизи стрессә сала биләр. Әввәлки јығынҹагда сиз, санки, көк атмышдыныз: достлуг мүнасибәтләри гурмушдунуз, сабит руһани графикиниз вар иди. Инди исә дүшдүјүнүз јени мүһитә өјрәшмәк үчүн «тәзә көкләр» атмалысыныз. Бу ишдә сизә Мүгәддәс Китабын бир нечә принсипи көмәк едә биләр. Ҝәлин онлары бир-бир арашдыраг.

Аллаһын Кәламыны мүнтәзәм охујан инсан «ахар сулар кәнарында әкилмиш, барыны мөвсүмүндә верән ағаҹтәк олар, јарпаглары солмаз, һәр ишиндә уғур газанар» (Зәб. 1:1—3).

Неҹә ки, ағаҹын сағлам галмасы үчүн ону мүнтәзәм суламаг лазымдыр, мәсиһинин дә руһани ҹәһәтдән мөһкәм галмасы үчүн Аллаһын Кәламындан мүнтәзәм «гидаланмасы» мүтләгдир. Одур ки, руһани графикиниздән галмајын: һәр ҝүн Мүгәддәс Китабы охујун, јығынҹаглары бурахмајын, аиләви ибадәти вә шәхси мүталиәни мүнтәзәм кечирин. Әввәлки јығынҹағынызда руһани ҹәһәтдән сағлам галмаг үчүн нәләр едирдинизсә, бурада да ејни ишләри ҝөрүн.

«Су верәнә су вериләр» (Мәс. 11:25).

Тәблиғ ишиндә фәал олмагла руһланаҹаг вә јени јығынҹаға даһа тез өјрәшәҹәксиниз. Кевин адлы ағсаггал дејир: «Арвадымла мәнә ән чох көмәк едән о олду ки, јени јығынҹаға көчән кими көмәкчи өнҹүл хидмәтинә башладыг. Бунун сајәсиндә биз тез бир заманда баҹы-гардашларла, өнҹүлләрлә вә әрази илә таныш ола билдик». Әввәл јашадығы јердән тәгрибән 1600 километр аралыда јерләшән әразијә көчмүш Роҹер гардаш дејир: «Јени јығынҹаға өјрәшмәјин ән еффектив јолу мүмкүн гәдәр тез-тез тәблиғә чыхмагдыр. Һәмчинин ағсаггаллара һәр ишдә көмәк етмәјә һазыр олдуғунузу сөјләјин, мәсәлән, ибадәт евини тәмизләмәкдә, ҝөрүшүн һансыса бәндләриндә експромт чыхыш етмәкдә, кимисә ҝөрүшә апарыб-ҝәтирмәкдә. Баҹы-гардашлар сиздә фәдакарлыг руһу ҝөрсәләр, онлара сизинлә мүнасибәт гурмаг даһа раһат олаҹаг».

«Үрәјинизи ҝениш ачын» (2 Кор. 6:13).

Даһа чох баҹы-гардаша мәһәббәт ҝөстәрин. Мелисаҝил аиләликҹә јени јығынҹаға көчәндән сонра бүтүн диггәтләрини тәзә достлар тапмаға ҹәмләмишдиләр. Мелиса баҹы дејир: «Биз јығынҹагдан әввәл вә сонра баҹы-гардашларла сөһбәт едирдик. Бунун сајәсиндә  үнсијјәтимиз, садәҹә салам-сағолла мәһдудлашмырды». Бу, һәмин аиләјә, һәмчинин гыса мүддәтә јығынҹаг үзвләринин адыны јадда сахламаға көмәк етмишди. Мелиса баҹы дејир: «Биз бир-биримизә телефон нөмрәләримизи вердик. Беләҹә, баҹы-гардашлар јығынҹағын ишләринә вә диҝәр фәалијјәтләрә бизи дә ҹәлб етмәк үчүн бизи асанлыгла тапа билирдиләр».

Әҝәр јени инсанларла таныш олмаг фикри сизи горхудурса, садә шејләрдән башлајын. Мәсәлән, ичиниздән ҝәлмәсә дә, ҝүлүмсәјин. Тәбәссүм инсанлары сизә ҹәлб едәҹәк. Мүгәддәс Китабда јазылдығы кими, «нурлу ҝөзләр үрәји шад едәр» (Мәс. 15:30). Бөјүјүб боја-баша чатдығы јердән узаға көчән Рејчел дејир: «Тәбиәтән утанҹаг инсанам. Јени јығынҹагдакы баҹы-гардашларла сөһбәт етмәк мәнә чәтиндир, һәрдән өзүмү буна мәҹбур едирәм. Ибадәт евинә ҝәләндә бир јердә отуруб һеч кәслә үнсијјәт етмәјән инсанлары ахтарырам. Дүшүнүрәм, јәгин онлар да мәним кими утанҹагдырлар». Бу чох ҝөзәл үсулдур. Сиз дә јығынҹагдан әввәл вә сонра киминләсә үнсијјәт етмәји гаршыныза мәгсәд гојун.

Ола билсин, илк бир нечә һәфтә танымадығыныз инсанларын арасында сыхылаҹагсыныз. Нараһат олмајын, вахт кечдикҹә сизә јад ҝәлән шејләр доғмалашаҹаг. Лакин бунун үчүн өзүнүзә јени достлар тапмалысыныз.

Бәзи ағаҹлар јени јердә нисбәтән ҝеҹ көк атыр. Јени јығынҹаға өјрәшмәк дә беләдир: алышмаг үчүн киминә аз, киминә чох вахт лазым олур. Әҝәр сиз артыг узун мүддәтдир јени јығынҹаға кечмисиниз, амма һәлә дә ора алыша билмәмисинизсә, Мүгәддәс Китабын нөвбәти принсипләринә әмәл един:

«Ҝәлин јахшы иш ҝөрмәкдән јорулмајаг, чүнки тагәтдән дүшмәсәк, вахтында бичәҹәјик» (Гал. 6:9).

Өзүнүзә вахт верин. Ола билсин, сизә јени мүһитә өјрәшмәк үчүн ҝөзләдијиниздән чох вахт лазымдыр. Мәсәлән, Ҝиладдан сонра башга өлкәдә хүсуси тәјинатлы мүждәчи кими хидмәт едән бир чох баҹы-гардаш јени јерә өјрәшәнә гәдәр бир нечә ил өз өлкәләринә ҝетмир. Бунун сајәсиндә онлар һәмин әразидәки диндашлары илә доғмалашыр вә јени мәдәнијјәтә өјрәширләр.

Бир нечә дәфә мүхтәлиф әразиләрә көчмүш Алехандро гардаш өз тәҹрүбәсиндән билир ки, алышмаг үчүн сәбир лазымдыр. О дејир: «Сонунҹу дәфә көчәндә һәјат јолдашым деди ки, бүтүн достлары галыб көһнә јығынҹагда». Гардаш она хатырлатды ки, ики ил бундан әввәл көһнә әразијә көчәндә дә о, ејни сөзү демишди. Ики ил әрзиндә о, башгаларына диггәт ҝөстәрмиш, беләҹә, танымадығы инсанлар онун јахын достларына чеврилмишди.

«Демә: “Әввәлки ҝүнләр индикиндән јахшы иди”. Мүдрик адам белә демәз» (Ваиз 7:10).

Гәтијјән јени јығынҹағынызы көһнә јығынҹагла мүгајисә етмәјин. Ола билсин, јени јығынҹагдакы баҹы-гардашлар көһнә јығынҹағыныза нисбәтән ја чох гапалы, ја да һәддән артыг үнсијјәтҹилдир. Амма сиз онларын мүсбәт ҹәһәтләринә фикир верин, неҹә ки, сиз дә онларын сиздә мүсбәт шејләри ҝөрмәсини истәјирсиниз. Мараглыдыр ки, јени јығынҹаға кечмәк бир нечә баҹы-гардашы өзүнә бу суалы вермәјә сөвг етмишди: «Доғруданмы, мән “бүтүн гардашлығы” севирәм?» (1 Бут. 2:17).

«Дурмадан диләјин, сизә вериләҹәк» (Лука 11:9).

 Мүнтәзәм дуа едиб Јеһовадан көмәк истәјин. Дејвид адлы ағсаггал дејир: «Бу проблеми тәкбашына ашмаға чалышмајын. Әксәр шејләри биз јалныз Јеһованын көмәји илә баҹара биләрик. Одур ки, дуа един!» Јухарыда ады чәкилән Рејчел дә бу фикрә шәрикдир. О дејир: «Һәјат јолдашымла мән јығынҹаг тәрәфиндән ҹүзи дә олса сојуглуг ҝөрәндә Јеһоваја дуа едиб дејирдик: “Јеһова, нә олар, бизә ҝөстәр, биз нәји дүз етмирик, нијә баҹы-гардашлара бизимлә јахын мүнасибәт гурмаг чәтиндир?” Сонра чалышырдыг, онларла чохлу вахт кечирәк».

Әҝәр өвладларыныза да јени јығынҹаға өјрәшмәк чәтиндирсә, онларла бирҝә дуа един. Јени достлар тапа билсинләр дејә, баҹы-гардашларла хош вахт кечирмәләри үчүн шәраит јарадын.

Инди ҝөрәк јығынҹағын көһнә үзвләри јениләрә неҹә көмәк едә биләр. Јығынҹағыныза јени баҹы-гардашлар ҝәлән кими онларла достлашмаға чалышын. Тәсәввүр един ки, сиз тәзә јығынҹаға кечмисиниз. Јығынҹаг үзвләринин сизи неҹә гаршыламасыны истәјәрдиниз? Јениләрә ејни мүнасибәти ҝөстәрин (Мәт. 7:12). Онлары аиләви ибадәт ахшамына, бирликдә JW телевизијасынын ајлыг програмына бахмаға дәвәт един. Тәблиғә чыхмағы тәклиф един. Садә бир сүфрә ачыб гонаг чағырын. Әмин олун, онлар бу гонагпәрвәрлијинизи узун мүддәт унутмајаҹаглар. Нөвбәти абзасда јениләрә көмәк етмәјин башга јоллары да ҝөстәрилир.

Карлос адында бир гардаш дејир: «Кечдијимиз јени јығынҹагда бир баҹы бизә гијмәтләри мүнасиб олан мағазаларын сијаһысыны верди. Бунун бизә чох бөјүк көмәји дәјди». Әҝәр сизин әразијә көчән баҹы-гардашлар иглими фәргли олан әразидән ҝәлибләрсә, онлара нөвбәти көмәји ҝөстәрә биләрсиниз: онлара изаһ един, сизин әразидә һава исти, сојуг вә ја јағышлы оланда неҹә ҝејинмәк лазымдыр. Сиз онлара һәмчинин халгын тарихи, инсанларын дини инанҹлары барәдә данышмагла тәблиғ ишиндә уғурлу олмаға көмәк едә биләрсиниз.

Мәгаләнин әввәлиндә ады чәкилән Ален гардаш бир илдән чохдур ки, јени јығынҹагда хидмәт едир. О дејир: «Баҹы-гардашларла таныш олмаг үчүн әввәл-әввәл өзүмү мәҹбур едирдим. Амма инди онлар артыг мәнә доғма кимидир, мән өзүмү чох раһат һисс едирәм». Ален баша дүшдү ки, јени јығынҹаға кечмәклә, әслиндә, о, достларыны итирмәјиб, әксинә јени вә өмүрлүк достлар газаныб.