1—3. а) Мүгәддәс Китаб һәгигәтләринә неҹә јанашмалыјыг? Нүмунә чәкин. (Мәгаләнин әввәлиндәки шәкилләрә бахын.) б) Бу мәгаләдә һансы суаллары нәзәрдән кечирәҹәјик?

БУ ҜҮН мағазадан нә исә алыб сонра ҝери гајтармаг ади һал алыб. Һесабламалара әсасән, бәзи өлкәләрдә алынан малларын 9 фаизи, онлајн сифаришләрин исә 30 фаиздән чоху ҝери гајтарылыр. Малларын ҝери гајтарылма сәбәбләри мүхтәлиф олур, бәзән мәһсул алыҹынын истәдијиндән фәргләнир, бәзән гүсурлу чыхыр вә ја хошуна ҝәлмир. Буна ҝөрә дә мәһсул ја дәјишдирилир, ја да ҝери гајтарылыр.

² Сөзсүз ки, биз Мүгәддәс Китаб һәгигәтләринә белә јанашмаг истәмәрик. Биз ки, һәгигәти өјрәнмишик, башга сөзлә, алмышыг, ону сатмаг, јәни тәрк етмәк истәмәрик. (Мәсәлләр 23:23 ајәсини охујун; 1 Тим. 2:4.) Өтән мәгаләдә арашдырдыг ки, һәгигәти өјрәнмәк үчүн чохлу вахт сәрф етмишик. Бундан әлавә, ола билсин, карјерадан имтина етмишик, кимләрләсә мүнасибәтимизи дәјишмәли олмушуг, дүшүнҹә вә давранышымыза дүзәлиш етмишик. Јеһованын бәјәнмәдији адәт-әнәнәләрә риајәт етмәјә сон гојмушуг. Лакин биз әминик ки, әлдә етдијимиз немәтләр өдәдијимиз дәјәрдән гат-гат артыгдыр.

 ³ Иса Мәсиһ Аллаһын Падшаһлығы һаггында һәгигәтин ону тапанлар үчүн нә гәдәр дәјәрли олдуғуну ҝөстәрәрәк мирвари ахтаран бир таҹир барәдә мәсәл чәкмишди. Таҹир дәјәрли мирвари тапанда ону алмаг үчүн «дәрһал һәр шејини» сатмышды (Мәт. 13:45, 46). Ејнилә, биз дә һәгигәти, јәни Аллаһын Падшаһлығы вә Мүгәддәс Китабда олан диҝәр дәјәрли һәгигәтләр барәдә өјрәнәндә ону әлдә етмәк үчүн лазым олан гурбанлар вермишик. Һәгигәт бизим үчүн бундан сонра да дәјәрли олса, ону һеч вахт сатмајаҹағыг. Лакин әфсуслар олсун ки, Аллаһын хидмәтчиләриндән бәзиләри һәгигәти лазымынҹа дәјәрләндирмәмиш вә һәтта ону сатмышдылар. Ҝәлин һеч вахт онлара бәнзәмәјәк! Һәгигәти јүксәк гијмәтләндирдијимизи вә ону һеч вахт сатмајаҹағымызы ҝөстәрмәк үчүн Мүгәддәс Китабда дејилдији кими, «даима һәгигәт јолунда» јеримәлијик. (3 Јәһја 2—4 ајәләрини охујун.) Һәгигәт јолунда јеримәк ону һәјатымызда һәр шејдән үстүн тутмаг вә она ујғун јашамаг демәкдир. Бу мәгаләдә үч суала ҹаваб тапаҹағыг. Бәзиләри нәјә ҝөрә вә неҹә һәгигәти сатыблар? Бу ҹүр ҹидди сәһвдән неҹә гача биләрик? Һәгигәтдә јеримәк гәтијјәтимизи неҹә мөһкәмләндирә биләрик?

4. Биринҹи әсрдә јашајан бәзи инсанлар һәгигәти нә үчүн сатмышдылар?

⁴ Биринҹи әсрдә бәзи инсанлар Иса Мәсиһин тәлимләринә һај версәләр дә, сонралар һәгигәт јолу илә ҝетмәмишдиләр. Мәсәлән, Иса Мәсиһ мөҹүзә илә бөјүк бир издиһамы једиздирәндән сонра ҹамаат онун ардынҹа Ҹәлилә дәнизинин о бири тајына кечмишди. Орада Иса Мәсиһ онлары тәәҹҹүбләндирән сөзләр сөјләмишди: «Әҝәр инсан Оғлунун бәдәнини јемәсәниз, ганыны ичмәсәниз, һәјата говушмајаҹагсыныз». Инсанлар Мәсиһдән дедикләринин һансы мәнаны кәсб етдијини сорушмаг әвәзинә, бүдрәјиб демишдиләр: «Бу нә данышыр?! Бу сөзләрә неҹә гулаг асмаг олар?!» Беләҹә, «онун шаҝирдләриндән бир чоху өз көһнә мәшғулијјәтләринә гајытды вә даһа онун ардынҹа ҝетмәди» (Јәһ. 6:53—66).

5, 6. а) Сон заманлар бәзиләринин һәгигәти тәрк етмәсинә сәбәб нәдир? б) Инсанын һәгигәтдән тәдриҹән узаглашмасы неҹә баш верир?

⁵ Әфсуслар олсун ки, бу ҝүн бәзиләри һәгигәтдән узаглашыб. Кимиси Мүгәддәс Китаб ајәләринә ҝәтирилән јени изаһатлары гәбул едә билмәјиб, кимиси мүәјјән мөвгејә саһиб олан һансыса гардашын сөзүндән вә ја һәрәкәтиндән бүдрәјиб. Бир башгалары верилән дүзәлишдән инҹидијинә, јахуд диндашы илә арасында баш верән сөз-сөһбәтә ҝөрә һәгигәтдән узаглашыб. Бәзиләри исә тәлимләримизи тәһриф едән дөнүкләри вә ја диҝәр әлејһдарлары дәстәкләмәјә башлајыблар. Беләләри Јеһовадан вә јығынҹагдан билә-билә узаглашыблар (Ибр. 3:12—14). Каш ки, онлар һәвари Бутрус кими Иса Мәсиһә иманларыны вә етибарларыны горујардылар! Мәсиһ һәвариләриндән онларын да ҝетмәк истәјиб-истәмәдијини сорушанда Бутрус дәрһал демишди: «Аға, кимин јанына ҝедәк? Әбәди һәјатын сөзләри сәндәдир» (Јәһ. 6:67—69).

⁶ Еләләри дә вар ки, һәгигәтдән тәдриҹән, һеч өзләри дә билмәдән узаглашыб. Белә инсанлары саһилдән јаваш-јаваш узаглашан гајыға бәнзәтмәк олар. Буна ҝөрә дә Мүгәддәс Китаб бизи диггәтли олмаға сәсләјир (Ибр. 2:1). Һәгигәти билә-билә тәрк едән инсанлардан фәргли олараг, бәзиләри фәргиндә олмадан һәгигәтдән узаглашыр. Истәнилән һалда, онлар  Јеһова илә мүнасибәтләрини корлајырлар, һәтта белә давам етсәләр, ону итирә биләрләр. Бәс биз бу ҹүр аҹынаҹаглы вәзијјәтә дүшмәмәк үчүн нә едә биләрик?

7. Һансы аддым һәгигәти тәрк етмәмәјимизә көмәк едәҹәк?

⁷ Һәгигәтдә јеримәк үчүн биз Јеһованын бүтүн дедикләрини гәбул едиб итаәт етмәлијик. Һәгигәт һәјатымызда әсас јери тутмалыдыр вә Мүгәддәс Китаб принсипләринә ујғун јашамалыјыг. Падшаһ Давуд дуасында Јеһоваја демишди: «Мәнә Өз јолунда тәлим вер, һәгигәтиндә аддымлајым» (Зәб. 86:11). О, Јеһованын јолунда јеримәјә гәти гәрарлы иди. Биздә дә бу гәтијјәт олмалыдыр. Әкс һалда, һәгигәти алмаг үчүн нәләри вердикләримиз һагда дүшүнүб, һәтта онларын бәзиләрини ҝери алмаг истәјәҹәјик. Лакин биз баша дүшүрүк ки, һәгигәти там гәбул етмәлијик. Һансыса һәгигәти гәбул етмәји, һансыныса гәбул етмәмәји сечә билмәрик. Мүгәддәс Китабда јазылдығы кими, биз «һәгигәти там дәрк» едәрәк бу јолда јеримәлијик (Јәһ. 16:13). Ҝәлин кечән мәгаләдә һәгигәти алмаг үчүн өдәдијимиз беш шејин үзәриндә јенидән дүшүнәк. Бунун сајәсиндә һәгигәти алмаг үчүн өдәдијимиз дәјәрин һеч «бир гәпијиндә» дә ҝөзүмүз олмајаҹаг (Мәт. 6:19).

8. Мәсиһинин вахтындан ағылла истифадә етмәмәси, һәгигәтдән узаглашмасына неҹә сәбәб олур? Нүмунә чәкин.

⁸ Вахт. Һәгигәтдән узаглашмамаг үчүн биз вахтымыздан ағылла истифадә етмәлијик. Еһтијаты әлдән версәк, вахтымызын чох һиссәси истираһәтә, һоббиләримизә, интернетдә долашмаға вә ја телевизора бахмаға ҝедәҹәк. Дүздүр, бу ишләрлә мәшғул олмагда пис бир шеј јохдур, амма јаваш-јаваш бу шејләр әввәлләр фәрди мүталиәјә вә руһани ишләрә ајырдығымыз вахты оғурлаја биләр. Ҝәлин бунунла бағлы Емма * баҹынын һадисәсинә бахаг. Ушаглыгдан онун атлара бөјүк һәвәси вар иди. Јаранан илк фүрсәтдә ат сүрмәјә ҝедирди. Бир мүддәтдән сонра баҹы вахтынын чохуну бу мәшғулијјәтә сәрф етдијинә ҝөрә нараһат олмаға башлады. Буна ҝөрә дә о, дәјишикликләр еләди вә нәтиҹәдә истираһәтә таразлы јанашмағы өјрәнди. Она һәмчинин кечмиш родео јарышчысы Кори Велсин * һадисәси дә тәсир еләмишди. Емма баҹы инди вахтынын чох һиссәсини ибадәтә, аиләсинә вә диндашларына ајырыр. Баҹы инди өзүнү Јеһоваја даһа јахын һисс еләјир вә вахтындан ағылла истифадә еләдији үчүн чох хошбәхтдир.

9. Мадди шејләр бәзи диндашларымызы гаршыларына руһани мәгсәдләр гојмагдан неҹә јајындырмышды?

⁹ Мадди шејләр. Һәмишә һәгигәтдә јеримәк үчүн мадди шејләрә таразлы јанашмаг ҝәрәкдир. Һәгигәти илк дәфә өјрәнмәјә башлајанда руһани мәгсәдләр мадди шејләрә олан марағымызы үстәләмишди. Һәгигәтдә јеримәк үчүн мадди гурбанлар вердијимизә ҝөрә севинирдик. Анҹаг вахт кечдикҹә башгаларынын сон модел електрон ҹиһазлар алдығыны вә мадди рифаһ ичәрисиндә јашадығыны ҝөрәндә өзүмүзү нәләрдәнсә мәһрум һисс едә биләрик. Бу, әлимиздә олан шејләрлә гане олмамаға вә диггәтимизи ибадәтә јох, маддијјата ҹәмләмәјә ҝәтириб чыхара биләр. Јәгин бу мәгамда Димасын һадисәси јадыныза дүшдү. Димасын дүнјаја олан севҝиси һәвари Булусла бирҝә етдији хидмәти  дајандырмасына ҝәтириб чыхармышды (2 Тим. 4:10). Димас нә үчүн Булусу тәрк етмишди? Ҝөрүнүр о, мадди шејләри руһани ишләрдән чох севмишди, бәлкә дә, Булусла хидмәт етмәк үчүн даһа гурбанлар вермәк истәмирди. Бурадан һансы нәтиҹәни чыхарырыг? Ола билсин, кечмишдә биз дә мадди шејләрә үстүнлүк вермишик. Еһтијатлы олмасаг, бу мәһәббәт јенидән аловлана, һәтта һәгигәтә олан мәһәббәтимизи сөндүрә биләр.

10. Һәгигәт јолунда јеримәк үчүн һансы тәзјигләрә синә ҝәрмәлијик?

¹⁰ Шәхси мүнасибәтләр. Һәгигәт јолунда јеримәјә давам етмәк истәјириксә, Јеһоваја хидмәт етмәјән инсанларын бизә тәсир етмәсинә јол вермәмәлијик. Һәгигәти өјрәнмәјә башлајанда Јеһованын Шаһиди олмајан танышларымыз вә аилә үзвләримизлә мүнасибәтләримиз дәјишди. Бәзиләри етигадымыза нормал јанашды, диҝәрләри сәрт гаршылады (1 Бут. 4:4). Һәрчәнд биз аилә үзвләримизлә мүнасибәтләримизи јахшы сахламаға вә онларла меһрибан давранмаға чалышырыг, диггәтли олмалыјыг ки, онлары разы салмагдан өтәри Јеһованын гојдуғу гајда-ганунлары позмајаг. Аилә үзвләримизлә мүнасибәтләри горумаға чалышмагла јанашы, 1 Коринфлиләрә 15:33 ајәсиндә јазыланлары да јадда сахлајараг јалныз Јеһованы севәнләрлә јахын мүнасибәтләр гурмалыјыг.

11. Аллаһа мәгбул олмајан дүшүнҹә вә давранышдан неҹә узаг дура биләрик?

¹¹ Аллаһа мәгбул олмајан дүшүнҹә вә давраныш. Һәгигәт јолунда јеријәнләр мүгәддәс олмалыдыр (Әшј. 35:8; 1 Бутрус 1:14—16 ајәләрини охујун). Һәгигәтә ҝәләндә һәр биримиз Мүгәддәс Китабда јазылмыш принсипләрә ујғун јашамаг үчүн дәјишиклик етмәли олмушуг. Һәтта бәзиләри көклү дәјишикликләр едибләр. Истәнилән һалда, биз һеч вахт паклығы, мүгәддәслији бу дүнјанын позғун һәјат тәрзинә дәјишмәмәлијик. Бәс әхлагсызлыға сөвг едән мејилләрә мәғлуб олмамаг үчүн нә едә биләрик? Јеһованын бизи мүгәддәс етмәк үчүн өдәдији јүксәк дәјәр — әзиз Оғлу Иса Мәсиһин төкүлән ганы һаггында дүшүнүн (1 Бут. 1:18, 19). Јеһованын ҝөзүндә тәмиз галмаг үчүн Иса Мәсиһин фидјә гурбанлығынын нә гәдәр дәјәрли олдуғуну даима јадда сахламалыјыг.

12, 13. а) Нә үчүн бајрамлара Јеһованын ҝөзү илә бахмаг ваҹибдир? б) Биз нәји мүзакирә едәҹәјик?

¹² Аллаһа мәгбул олмајан ишләр вә адәт-әнәнәләр. Аиләдә, ишдә, мәктәбдә бизи ад ҝүнләринә, бајрамлара гатылмаға тәһрик едә биләрләр. Бәс бу ҹүр тәзјиглә үзләшәндә Јеһоваја мәгбул олмајан шәнликләрдә иштирак етмәмәк үчүн нә едә биләрик? Сөзсүз ки, һәмин шәнликләрин нә үчүн Јеһоваја мәгбул олмадығыны унутмамалыјыг. Бунун үчүн нәшрләримиздән бајрамларын мәншәји һагда јазыланлары охуја биләрик. Бајрамларда иштирак етмәмәјимизин сәбәби барәдә дүшүнәндә Рәббә мәгбул олан јолда јеридијимизә әмин олаҹағыг (Ефес. 5:10). Јеһоваја вә Онун Кәламына етибар етсәк, «инсан горхусу»на гапылмајаҹағыг (Мәс. 29:25).

¹³ Биз һәгигәт јолунда әбәдијјәт боју јеримәјә үмид едирик. Бәс бу јолда јеримәк гәтијјәтимизи неҹә артыра биләрик? Бизә бу саһәдә үч шеј көмәк едә биләр.

14. а) Мүгәддәс Китабы өјрәнмәјә давам етмәјимиз ону сатмамаг гәтијјәтимизи неҹә мөһкәмләндирир? б) Һикмәт, тәрбијә вә дәрракә нә үчүн ваҹибдир?

¹⁴ Илк нөвбәдә, Аллаһын Кәламындакы  дәјәрли һәгигәтләри өјрәнмәјә вә үзәриндә дүшүнмәјә давам един. Буну мүнтәзәм етмәк үчүн вахт ајырын. Нә гәдәр чох мүталиә етсәниз, һәгигәти бир о гәдәр чох севәҹәксиниз вә ону һеч вахт сатмаг истәмәјәҹәксиниз. Бундан әлавә, һәгигәти алмаг үчүн Мәсәлләр 23:23 ајәсиндә дејилдији кими, «һикмәти, тәрбијәни, дәрракәни» дә алмалыјыг. Тәкҹә билик кифајәт дејил, һәгигәти һәјатымызда тәтбиг етмәлијик. Дәрракә сајәсиндә Јеһованын бүтүн дедикләри арасында ујғунлуғу ҝөрә билирик. Һикмәт бизи билдијимиз шејләрә ујғун давранмаға сөвг едир. Һәрдән һәгигәт нәләрин үзәриндә ишләмәли олдуғумузу ҝөстәрәрәк бизи тәрбијәләндирир. Ҝәлин Јеһованын ҝүмүшдән дә гијмәтли олан өјүдләринә дәрһал әмәл едәк (Мәс. 8:10).

15. Һәгигәт гуршағы бизи неҹә горујур?

¹⁵ Икинҹиси, һәр ҝүн Мүгәддәс Китаб һәгигәтләринә ујғун јашамаға гәтијјәтли олун. Һәгигәт гуршағыны белинизә бағлајын (Ефес. 6:14). Гәдимдә гуршаг әсҝәрин белини вә дахили органларыны горујурду. Амма бунун үчүн әсҝәр гуршағы белинә мөһкәм бәркитмәли иди. Бош бағланмыш гуршаг о гәдәр дә еффектив дејилди. Бәс һәгигәт гуршағы бизи неҹә мүдафиә едир? Әҝәр һәгигәти гуршаг кими белимизә мөһкәм бәркитсәк, о, бизи јанлыш дүшүнҹәдән горујаҹаг вә дүзҝүн гәрарлар вермәјә көмәк едәҹәк. Сынагларла үзләшән заман, јахуд сәһв иш ҝөрмәјә мејил едәндә Мүгәддәс Китаб һәгигәти сајәсиндә Аллаһа мәгбул давранмаға гәтијјәтли олаҹағыг. Әсҝәр дөјүшә гуршагсыз ҝетмәдији кими, биз дә һәгигәт гуршағыны белимиздән чыхармамаға гәтијјәтли олмалыјыг. Ону белимизә бәрк-бәрк бағламалы, јәни һәгигәтә ујғун јашамалыјыг. Әсҝәрин тахтығы гуршагда һәмчинин гылынҹ тахмаг үчүн јер олурду. Ҝәлин ҝөрәк руһун гылынҹы һәгигәт јолунда јеримәк гәтијјәтимизи неҹә мөһкәмләндирә биләр.

16. Һәгигәти башгалары илә бөлүшмәк һәгигәт јолунда јеримәк гәтијјәтимизи неҹә мөһкәмләндирир?

¹⁶ Үчүнҹүсү, чалышын Мүгәддәс Китабдакы һәгигәтләри башгаларына өјрәтмәјә мүмкүн гәдәр чох вахт сәрф едәсиниз. Бу јолла «руһун гылынҹыны, јәни Аллаһын сөзүнү» әлиниздә бәрк-бәрк тутаҹагсыныз (Ефес. 6:17). Һәр биримиз «һәгигәт кәламындан дүзҝүн истифадә» етмәк үчүн мүәллимлик габилијјәтимизи инкишаф етдирмәјә ҹан атмалыјыг (2 Тим. 2:15). Биз Мүгәддәс Китабдан истифадә едәрәк инсанлара һәгигәти өјрәтмәклә Аллаһын сөзләрини өз үрәјимизә вә зеһнимизә һәкк едирик вә нәтиҹәдә һәгигәтдә јеримәк әзмимиз мөһкәмләнир.

17. Нәјә ҝөрә һәгигәт сизин үчүн дәјәрлидир?

¹⁷ Һәгигәт Јеһованын бизә дәјәрли бәхшишидир. Онун сајәсиндә биз ән дәјәрли шејә, Аллаһымыз Јеһова илә јахын мүнасибәтләрә саһибик. Бу ҝүнә гәдәр өјрәндикләримиз һәлә башланғыҹдыр. Аллаһ бизә әбәдијјәт боју тәлим верәҹәјини вәд едиб. Одур ки, һәгигәти дәјәрли мирваритәк гијмәтләндирин. «Һәгигәти ал, ону сатма» ҝөстәришинә әмәл етмәјә давам един. Онда «мәнә Өз јолунда тәлим вер, һәгигәтиндә аддымлајым» дејән Давуд пејғәмбәр кими сөзүнүзүн үстүндә дура биләҹәксиниз (Зәб. 86:11).