1, 2. Руһани ҹәһәтдән инкишаф етдикҹә нәји өјрәнирик? Нүмунә чәкин.

БАЛАҸА ушаға һәдијјә верирләр. Валидејнләри она дејир ки, һәдијјә верәнә «чох сағ ол» десин. Ушаг да онларын дедији кими едир. О, инди буну механики етсә дә, бөјүдүкҹә валидејнин бу нәсиһәтини, миннәтдарлыг билдирмәјин ваҹиблијини баша дүшүр. Артыг механики јох, сәмими-гәлбдән тәшәккүр едир, чүнки миннәтдар олмағы өјрәниб.

² Ејнилә, биз дә һәгигәти тәзә-тәзә өјрәнәндә Јеһованын гајда-ганунларына риајәт етмәјин ваҹиблијини өјрәнмишик. Руһани ҹәһәтдән бөјүдүкҹә Јеһованын дүшүнҹә тәрзини — Онун бәјәндији вә бәјәнмәдији шејләри, мүхтәлиф вәзијјәтләрә неҹә јанашдығыны даһа јахшы дәрк едирик. Јеһова кими дүшүнмәји өјрәнмәклә, Онун дүшүнҹәсини һәрәкәтләримиздә вә гәрарларымызда әкс етдирмәјә чалышмагла ҝөстәририк ки, Онун дүшүнҹә тәрзини мәнимсәјирик.

3. Нә үчүн Јеһованын дүшүнҹә тәрзини әкс етдирмәк чәтин ола биләр?

³ Јеһованын дүшүнҹә тәрзини әкс етдирмәји өјрәнмәк бөјүк фәрәһдир, амма ҝүнаһлы олдуғумуз үчүн бәзән вәзијјәтә Онун кими бахмаг чәтин ола биләр. Мисал үчүн, ола билсин, Јеһованын әхлаги тәмизлијә, маддијјата, тәблиғ ишинә, гандан истифадәјә вә диҝәр мәсәләләрә бахышыны там дәрк едә билмирик. Бәс һәр шејә Јеһованын ҝөзү илә бахмағы неҹә  өјрәнә биләрик? Бу бизә һәм инди, һәм дә ҝәләҹәкдә дүзҝүн гәрарлар вермәјә неҹә көмәк едәҹәк?

4. Һәвари Булусун дүшүнҹәмизи јениләшдирмәклә бағлы вердији мәсләһәтә неҹә әмәл едә биләрик?

⁴ Ромалылара 12:2 ајәсини охујун. Һәвари Булус бу ајәдә Јеһова кими дүшүнмәји өјрәнмәк үчүн нә едә биләҹәјимизи тәсвир едир. Өнҹәки мәгаләдә өјрәндик ки, «бундан сонра бу зәманәјә» ујғунлашмамаг үчүн дүнјәви дүшүнҹә тәрзи илә гидаланмамалыјыг. Һәвари Булус һәмчинин дүшүнҹәмизи јениләшдирмәјин дә ваҹиблијини вурғулајыр. Бу о демәкдир ки, Јеһованын Кәламыны мүталиә едәрәк Онун бахыш тәрзини анламалы, бунун үзәриндә дәриндән дүшүнмәли вә Онун дүшүнҹәсини әкс етдирмәјә чалышмалыјыг.

5. Охумагла мүталиә арасындакы фәрги изаһ един.

⁵ Мүталиә етмәк садәҹә мәлуматы охујуб суалларын ҹавабыны ишарәләмәк демәк дејил. Мүталиә заманы мәлуматын Јеһова, Онун јоллары вә дүшүнҹә тәрзи һагда нә дедији үзәриндә әтрафлы дүшүнүрүк. Јеһованын вердији әмрләрин, гојдуғу гадағаларын сәбәбини анламаға чалышырыг. Һәмчинин һәјатымызда вә бахыш тәрзимиздә дәјишмәли олдуғумуз мәгамлар үзәриндә дүшүнүрүк. Тәбии ки, һәр дәфә мүталиә едәркән бүтүн бунларын үзәриндә дүшүнмәк олмур. Лакин јахшы олар ки, һеч олмаса, мүталиә үчүн ајырдығымыз вахтын јарысыны охудугларымызын үзәриндә дүшүнәк (Зәб. 119:97; 1 Тим. 4:15).

6. Јеһованын бахыш тәрзи үзәриндә дүшүнәркән нә баш верир?

⁶ Мүнтәзәм олараг Јеһованын Кәламы үзәриндә дүшүнәндә мөһтәшәм бир шејә шаһид олуруг. Јеһованын дүшүнҹә тәрзинин мүкәммәл олдуғуну там дәрк едирик, буна һеч бир шүбһәмиз галмыр. Јеһованын бахыш тәрзини анламаға вә дәстәкләмәјә башлајырыг. Дүшүнҹәмиз јениләшир вә беләҹә, јени дүшүнҹә тәрзинә јијәләнирик. Вахт кечдикҹә Јеһованын дүшүнҹә тәрзини мәнимсәмиш олуруг.

7, 8. а) Јеһованын маддијјата мүнасибәти неҹәдир? (Мәгаләнин әввәлиндәки шәкилләрә бахын.) б) Әҝәр маддијјата Јеһованын ҝөзү илә бахсаг, һәјатда нәјә үстүнлүк верәҹәјик?

⁷ Унутмајаг ки, дүшүнҹәләримиз тәкҹә нәјә неҹә јанашмағымыза јох, һәрәкәтләримизә дә тәсир едир (Марк 7:21—23; Јаг. 2:17). Ҝәлин буну даһа јахшы баша дүшмәк үчүн бир нечә вәзијјәтә нәзәр салаг. Мәсәлән, Инҹилдән Јеһованын маддијјата мүнасибәтини ајдын ҝөрмәк олар. Аллаһ Өз Оғлуну бөјүтмәси үчүн Мәрјәмлә Јусифи сечди, бахмајараг ки, онлар имканлы дејилдиләр (Лав. 12:8; Лука 2:24). Иса Мәсиһ дүнјаја ҝәләндә Мәрјәм ону «төвләдә ахура гојду, чүнки меһманханада јер тапа билмәмишдиләр» (Лука 2:7). Јеһова Оғлунун даһа јахшы шәраитдә дүнјаја ҝәлмәси үчүн тәдбир ҝөрә биләрди. Лакин Оғлунун руһани дүшүнҹәли бир аиләдә бөјүјүб боја-баша чатмасы Онун үчүн даһа ваҹиб иди.

⁸ Бу һадисәдән Јеһованын мадди шејләрә неҹә јанашдығыны өјрәнирик. Бәзи валидејнләрин фикри-зикри өвладларынын мадди рифаһындадыр, бахмајараг ки, бу, ушағын Јеһова илә мүнасибәтләрини корлаја биләр. Ајдындыр ки, Јеһова үчүн Онунла мүнасибәтләримиз һәр шејдән үстүндүр. Бәс сиз Јеһованын дүшүнҹә тәрзинә јијәләнмисиниз? Әмәлләриниз бу барәдә нә дејир? (Ибраниләрә 13:5 ајәсини охујун.)

9, 10. Башгаларыны бүдрәтмәк мәсәләсинә Јеһова кими јанашдығымызы неҹә ҝөстәрә биләрик?

 ⁹ Диҝәр бир вәзијјәт Јеһованын башгаларыны бүдрәтмәк мәсәләсинә бахыш тәрзидир. Иса Мәсиһ демишди: «Иман едән бу кичикләрдән бирини ҝүнаһа сүрүкләјән адамын бојнуна дәјирман дашы асыб ону дәнизә атсајдылар, даһа јахшы оларды» (Марк 9:42). Неҹә дә ҝүҹлү сөзләрдир! Иса Мәсиһ Јеһованын хүсусијјәтләрини мүкәммәл шәкилдә әкс етдирдији үчүн, әмин ола биләрик ки, Јеһова да бу мәсәләјә олдугҹа ҹидди јанашыр вә инсанын һәрәкәтләри илә диндашыны бүдрәтдијини веҹинә алмамасы Онун диггәтиндән јајынмыр (Јәһ. 14:9).

¹⁰ Биз дә бу мәсәләјә Јеһова вә Иса Мәсиһ кими јанашырыг? Бәс һәрәкәтләримиз бу барәдә нә дејир? Тутаг ки, ҝејим-кеҹим мәсәләсиндә һансыса хүсуси тәрзә үстүнлүк веририк. Амма бу тәрз јығынҹагда кимәсә пис тәсир едир, јахуд кимдәсә шәһвәт ојадыр. Белә олан һалда диндашымыза мәһәббәт бизи севдијимиз тәрздән имтина етмәјә тәшвиг едәҹәк? (1 Тим. 2:9, 10).

11, 12. Пислијә Јеһова кими јанашмаг вә өзүмүзә һаким олмаг бизи неҹә мүдафиә едир?

¹¹ Үчүнҹү нүмунә: Јеһова пислијә нифрәт едир (Зәб. 5:4). Дүздүр, О билир ки, ҝүнаһлы олдуғумуздан бәзән дүзҝүн давранмаг бизим үчүн елә дә асан дејил. Бунунла белә, бизим дә Онун кими пислијә нифрәт етмәјимизи истәјир. (Зәбур 97:10 ајәсини охујун.) Јеһованын пислијә нә үчүн нифрәт етдији һагда дүшүнмәк Онун бахыш тәрзини мәнимсәмәјә көмәк едәҹәк вә пислијә гаршы дурмаг әзмимизи мөһкәмләндирәҹәк.

¹² Јеһова кими пислијә нифрәт етмәји өјрәнмәјин сајәсиндә һәтта Мүгәддәс Китабда конкрет олараг ады чәкилмәјән пис әмәлләри ајырд едә биләҹәјик. Мисал үчүн, позғун давранышын бир нөвү олан гуҹаг рәгси бу ҝүн дүнјада ҝетдикҹә мәшһурлашыр. Бәзиләри бу рәгсин ҹинси әлагә илә ејни шеј олмадығыны һесаб едәрәк ону гәбаһәт сајмыр *. Бәс бу ҹүр дүшүнҹә һәр ҹүр пислијә нифрәт едән Аллаһын дүшүнҹәсини әкс етдирир? Ҝәлин өзүмүзә һаким олмағы вә Јеһованын икраһ етдији әмәлләрдән икраһ етмәји өјрәнәрәк писликдән узаг дураг (Ром. 12:9).

13. Јеһованын мүәјјән вәзијјәтләрә неҹә јанашдығы барәдә дүшүнмәк ҝәләҹәк гәрарларымыза неҹә тәсир едәҹәк?

¹³ Мүталиә заманы Јеһованын һәр һансы вәзијјәтә бахыш тәрзини ҝәләҹәкдә үзләшә биләҹәјимиз вәзијјәтдә неҹә әкс етдирә биләҹәјимиз һагда дүшүнмәлијик. Беләҹә, ҹәлд гәрар вермәли олдуғумуз вәзијјәтләр гаршысында аҹиз галмајаҹағыг (Мәс. 22:3). Ҝәлин Мүгәддәс Китабдан бир нечә нүмунәјә нәзәр салаг.

14. Һәзрәти Јусифин Фитфирин арвадынын тәклифләрини рәдд етмәсиндән нә өјрәнирик?

¹⁴ Фитфирин арвады Һәзрәти Јусифи јолдан чыхармаға чалышанда о, дәрһал онун тәклифини рәдд етмишди. Ајдындыр ки, Јусиф Јеһованын никаһда сәдагәт мәсәләсинә неҹә јанашдығы үзәриндә дүшүнмүшдү. (Јарадылыш 39:8, 9 ајәләрини охујун.) Һәмчинин Фитфирин арвадына вердији ҹаваб ҝөстәрир ки, Јусиф Јеһованын дүшүнҹәсини мәнимсәмишди. О, Фитфирин арвадына демишди: «Инди мән неҹә белә бир јаманлыг едиб Аллаһа гаршы ҝүнаһ ишләјә биләрәм?» Бәс бизим һаггымызда нә демәк олар? Тәсәввүр един  ки, иш јолдашыныз сизә хүсуси мүнасибәт бәсләмәјә башлајыб. Јахуд телефонунуза сексуал характерли шәкил вә месажлар ҝөндәрилир *. Јеһованын бу кими мәсәләләрә неҹә јанашдығы үзәриндә дүшүнсәк, Онун дүшүнҹә тәрзини мәнимсәсәк, һәмчинин неҹә давранаҹағымызы өнҹәдән гәрарлашдырсаг, Она садиг галмаг даһа асан олаҹаг.

15. Үч ибрани ҝәнҹ кими Јеһоваја сәдагәтимизи неҹә горуја биләрик?

¹⁵ Сәдраһ, Мисаһ, Абиднағу адлы үч ибрани ҝәнҹин нүмунәсини нәзәрдән кечирәк. Падшаһ Навуходоносор онлардан уҹалтдығы гызыл һејкәлә сәҹдә гылмағы тәләб етмишди. Ҝәнҹләрин падшаһа вердији гәти вә ајдын ҹавабдан ҝөрүнүрдү ки, онлар Јеһоваја садиг галмағын нә демәк олдуғу һагда өнҹәдән дүшүнмүшдүләр (Чых. 20:4, 5; Дән. 3:4—6, 12, 16—18). Бәс бизим һагда нә демәк олар? Тутаг ки, мүдириниз сиздән јалан динлә бағлы бир мәрасимин кечирилмәси үчүн пул вермәјинизи истәјир. Сиз нә едәҹәксиниз? Буна һәмин вахт гәрар вермәкдәнсә, нијә дә Јеһованын бу кими мәсәләләрә неҹә јанашдығы барәдә индидән дүшүнмәјәсиниз? Онда белә вәзијјәтләрлә үзләшәндә үч ибрани ҝәнҹ кими дүзҝүн давранмаг, дүзҝүн сөзләр сечмәк сизә асан олаҹаг.

16. Јеһованын дүшүнҹә тәрзини гаврамаг тәҹили тибби мүдахиләјә еһтијаҹ јаранан заман бизә неҹә көмәк едир?

¹⁶ Јеһоваја сәдагәтли галмаг һагда өнҹәдән дүшүнмәк тәҹили тибби мүдахиләјә еһтијаҹ јаранан заман да карымыза ҝәләҹәк. Ајдындыр ки, биз халис ган вә онун дөрд әсас компонентинин көчүрүлмәсинин гәти әлејһинәјик. Лакин ганын истифадә олундуғу бәзи тибби проседурлар заманы һәр бир мәсиһи Мүгәддәс Китабдакы принсипләр әсасында шәхсән гәрар вермәли олур (Һәв. 15:28, 29). Бәс бу кими мәсәләләри нә заман гәрарлашдырмалыјыг? Ағыр вәзијјәтдә хәстәханаја дүшәндә вә тез-тәләсик гәрар вермәли оланда? Әлбәттә јох. Јахшы олар ки, индидән арашдырма апараг, мөвгејимизи ҝөстәрән  тибби сәнәди долдураг вә бу барәдә һәкимимизлә данышаг *.

17—19. Јеһованын дүшүнҹәсинә индидән бәләд олмаг нә үчүн ваҹибдир? Һазырлыглы олмағымыз ҝәрәкән вәзијјәтә даир нүмунә чәкин.

¹⁷ Сонда ҝәлин Бутрусун «өзүнә јазығын ҝәлсин, Аға!» дејәрәк Иса Мәсиһә вердији јанлыш мәсләһәти бир дә хатырлајаг. Она дәрһал ҹаваб вермәклә Мәсиһ ҝөстәрмишди ки, Јеһованын онунла бағлы ирадәси вә Мүгәддәс Јазыларда онун һәјаты вә өлүмү илә бағлы јазыланлар һагда дәриндән дүшүнүб. Бу биликләр онун Јеһоваја садиг галмаг вә һәјатыны уғрумузда гурбан вермәк гәтијјәтини мөһкәмләндирмишди. (Мәтта 16:21—23 ајәләрини охујун.)

¹⁸ Јеһова Аллаһын бизимлә дә бағлы ирадәси вар. О истәјир ки, Онун досту олаг вә тәблиғ ишиндә мүмкүн гәдәр чох иштирак едәк (Мәт. 6:33; 28:19, 20; Јаг. 4:8). Бутрусун Иса Мәсиһә дедији кими, ола билсин, бизи дә кимсә јахшы нијјәтдән ирәли ҝәләрәк бу ишдән јајындырмаға чалышсын. Мисал үчүн, мүдириниз сизә даһа чох маашы олан јүксәк вәзифәли иш тәклиф едә биләр. Амма билирсиниз ки, бу иш сизин ибадәтә ајырдығыныз вахты мәһдудлашдыраҹаг. Јахуд әҝәр мәктәблисинизсә, тутаг ки, сизә евдән узагда әлавә тәһсил алмаг үчүн тәклиф ҝәлир. Бу кими вәзијјәтләр јаранарса, сизә дуа етмәк, ахтарыш апармаг, аилә үзвләриниз, јахуд ағсаггалларла мәсләһәтләшмәк лазым ҝәлмәјәҹәк ки? Мәҝәр индидән Јеһованын бу вәзијјәтә неҹә јанашдығыны өјрәнмәк вә Онун дүшүнҹә тәрзини мәнимсәмәк даһа јахшы олмаз? Онда ҝәләҹәкдә белә бир тәклиф алсаныз, бу сизин үчүн сынаг олмајаҹаг. Артыг руһани мәгсәдләр гојдуғунуз, үрәјиниздә гәти гәрар вердијиниз үчүн сиздән садәҹә гәрарыныза ујғун давранмаг тәләб олунаҹаг.

¹⁹ Ҝөзләнилмәдән баш верә биләҹәк диҝәр вәзијјәтләрдә дә неҹә давранаҹағынызы индидән дүшүнә биләрсиниз. Дүздүр, башыныза ҝәлә биләҹәк бүтүн вәзијјәтләрә өзүнүзү һазыр едә билмәзсиниз. Әҝәр шәхси мүталиә заманы Јеһованын бахышы һаггында дүшүнсәниз, өјрәндикләринизи јадыныза салараг үзләшдијиниз вәзијјәтә тәтбиг едә биләҹәксиниз. Одур ки, ҝәлин Јеһованын мүхтәлиф вәзијјәтләрә неҹә јанашдығыны арашдыраг, дүшүнҹәмизи Јеһованын дүшүнҹәсинә ујғунлашдыраг вә буну һәм индики, һәм дә ҝәләҹәк гәрарларымызда неҹә тәтбиг едә биләҹәјимиз һагда дүшүнәк.

20, 21. а) Нә үчүн азадлығымыз јени дүнјада бизә севинҹ бәхш едәҹәк? б) Инди һәјатдан мәмнунлуг дујмаг үчүн нә едә биләрик?

²⁰ Биз бөјүк сәбирсизликлә јени дүнјаны ҝөзләјирик. Әксәријјәтимизин үмиди јер үзү Ҹәннәтдә әбәди јашамагдыр. Аллаһын Падшаһлығынын һакимијјәти алтында бәшәријјәт бу дүнјада чәкдијимиз әзаб-әзијјәтләрдән хилас олаҹаг. Сөзсүз ки, онда да ирадә азадлығымыз олаҹаг вә һәр биримиз севдијимиз, үстүнлүк вердијимиз шејләри сечмәкдә сәрбәст олаҹағыг.

²¹ Дүздүр, азадлығымыз мәһдудијјәтсиз олмајаҹаг. Јени дүнјада јашајаҹаг һәлим инсанлар нәјин јахшы, нәјин пис олдуғуна гәрар верәркән Јеһованын дүшүнҹә тәрзини вә вердији ганунлары рәһбәр тутаҹаглар. Бу да өз нөвбәсиндә бөјүк хошбәхтлик вә әмин-аманлыг ҝәтирәҹәк (Зәб. 37:11). О вахт јетишәнә гәдәр дә Јеһованын дүшүнҹә тәрзини мәнимсәјәрәк севинҹ дуја биләрик.