1, 2. а) Нәјин сајәсиндә һәр ҝүнүн чәтинлијинә дөзә билирик? Изаһ един. б) Бу мәгаләдә нәји арашдыраҹағыг?

«ҮЗЛӘШДИЈИМ сынаглар һагда дүшүнәндә баша дүшүрәм ки, өз ҝүҹүмә онлара таб ҝәтирә билмәздим». Нә вахтса сиз дә бу сөзләри демисиниз? Бу һисс чохларына танышдыр. Ола билсин, бу сөзләри ҹидди хәстәлик, јахуд әзизинизин өлүмүнә таб ҝәтирмәли оландан сонра демисиниз. Ҝери бојлананда баша дүшүрсүнүз ки, јалныз мүгәддәс руһун бәхш етдији «инсан ҝүҹүндән үстүн олан ҝүҹ» сајәсиндә ҝүнбәҝүн дөзә билмисиниз (2 Кор. 4:7—9).

² Шәр дүнјанын тәсиринә гаршы дурмаг үчүн дә мүгәддәс руһун көмәјинә еһтијаҹымыз вар (1 Јәһ. 5:19). Үстәлик, биз «шәр руһи гүввәләрә» гаршы мүбаризә апармалы олуруг (Ефес. 6:12). Бу мәгаләдә мүгәддәс руһун һансы ики јолла бүтүн бу проблемләрә дөзмәјә көмәк етдијини арашдыраҹағыг. Һәмчинин мүгәддәс руһдан там фајдаланмаг үчүн нә етмәли олдуғумуздан данышаҹағыг.

3. Јеһова чәтинликләрә дөзмәјимизә неҹә көмәк едир?

³ Мүгәддәс руһ чәтинликләрә бахмајараг, мәсулијјәтләримизи јеринә јетирмәјә ҝүҹ верир. Һәвари Булус анлајырды ки, сынаглар гаршысында Јеһоваја хидмәти «Мәсиһин ҝүҹү»нә ҝүвәнмәси сајәсиндә давам етдирә билмишди (2 Кор. 12:9). Икинҹи тәблиғ сәјаһәти заманы Булус хидмәтә чох вахт ајырмагла јанашы, өзүнү доландырмаг үчүн ишләјирди. Коринфдә оланда о, Аквиласла Прискилланын евиндә јашајырды. Онлар чадыр тикирдиләр. Булус ејни пешәнин саһиби олдуғу үчүн бәзи ҝүнләр онларла бирҝә ишләјирди (Һәв. 18:1—4). Мүгәддәс руһ  Булуса һәм ишини ҝөрмәјә, һәм дә хидмәтини иҹра етмәјә ҝүҹ верирди.

4. 2 Коринфлиләрә 12:7б—9 ајәләринә әсасән, Булусун һансы чәтинлији вар иди?

⁴ 2 Коринфлиләрә 12:7б—9 ајәләрини охујун. Бу ајәләрдә Булус «ҹисмимә бир тикан батырылыб» дејәндә нәји нәзәрдә тутурду? Бир јеримизә тикан батанда јери ҝөјнәдир. Булус да чәтинлијинин она бу ҹүр ағры вердијини дејирди. О, бу чәтинлији она әзаб верән «Шејтанын елчиси» адландырмышды. Ола билсин, Булусун тикана бәнзәр чәтинликләринин сәбәбкары бирбаша Шејтан, јахуд да онун ҹинләри дејилди. Лакин Булусун ҹисминдәки тиканы ҝөрән шәр гүввәләр, санки бу тиканы даһа дәринә басыб онун ағрысыны даһа да артырырдылар. Бәс Булус нә едирди?

5. Јеһова Булусун дуасына неҹә ҹаваб верди?

⁵ Әввәл-әввәл һәвари Булус бу тикандан гуртулмаг истәјирди. О дејир: «Бунунла бағлы Рәббә [Јеһоваја] дүз үч дәфә јалвардым ки, ҹанымы бу бәладан гуртарсын». Дуаларына рәғмән, Булус ҹисминдәки тикандан гуртула билмәмишди. Бу, о демәк иди ки, Јеһова Булусун дуасына ҹаваб вермәди? Гәтијјән! Јеһова онун дуасыны ҹавабсыз гојмамышды. О, Булусун проблемини арадан галдырмаса да, она дөзмәјә ҝүҹ вермишди. Јеһова демишди: «Сән зәиф оланда Мәним ҝүҹүм өзүнү бүтүнлүклә ҝөстәрир» (2 Кор. 12:8, 9). Булус Јеһованын көмәји сајәсиндә севинҹини вә гәлб раһатлығыны горуја билмишди! (Филип. 4:4—7).

6. а) Јеһова дуаларымыза неҹә ҹаваб верә биләр? б) Абзасда ҝәтирилән ајәләрдәки һансы вәд сизи мөһкәмләндирир?

⁶ Сиз дә Булус кими, әзабдан гуртулмаг үчүн нә вахтса Јеһоваја јалвармысыныз? Јалварышларыныза рәғмән проблеминиз һәлл олунмајанда, јахуд даһа да ағырлашанда Јеһованын сиздән наразы олдуғуну дүшүнүрсүнүз? Әҝәр беләдирсә, Булусун нүмунәсини хатырлајын. Јеһова онун дуаларына ҹаваб вердији кими, мүтләг сизин дуаларыныза да ҹаваб верәҹәк! Ола билсин, Јеһова проблеминизи арадан галдырмасын. Амма мүгәддәс руһу васитәсилә сизә чәтинлијә дөзмәјә ҝүҹ верәҹәк (Зәб. 61:3, 4). Проблемләр сизи, санки вуруб јерә сәрсә дә, билин ки, тәк дејилсиниз, Јеһова сизинләдир (2 Кор. 4:8, 9; Филип. 4:13).

7, 8. а) Мүгәддәс руһ һансы мәнада күләјә бәнзәјир? б) Бутрус мүгәддәс руһун фәалијјәтини неҹә тәсвир етмишди?

⁷ Мүгәддәс руһ бизә даһа һансы јолла көмәк едир? Мүгәддәс руһу күләјә бәнзәтмәк олар. Дәнизин туфанлы олмасына бахмајараг, күләјин сајәсиндә ҝәми мәнзилбашына чата биләр. Ејнилә мүгәддәс руһун сајәсиндә туфана бәнзәр чәтинликләрдән кечиб Аллаһын вәд етдији јени дүнјаја доғру ирәлиләјә биләрик.

⁸ Һәвари Бутрус бир балыгчы кими дәниз сәфәрләринә өјрәшмишди. Ҝөрүнүр, буна ҝөрә о, мүгәддәс руһун фәалијјәтини тәсвир етмәк үчүн дәнизчиликлә әлагәли олан терминдән истифадә етмишди. О демишди: «Пејғәмбәрлик һеч вахт инсан истәји илә мејдана ҝәлмәјиб, инсанлар мүгәддәс руһ тәрәфиндән јөнәлдиләрәк Аллаһдан ҝәлән сөзләри данышыблар». Бурада «јөнәлдиләрәк» кими тәрҹүмә олунан јунан сөзү һәрфән «апармаг» мәнасыны верир (2 Бут. 1:21).

9. Һәвари Бутрус «апармаг» сөзүнү истифадә едәрәк һансы тәсвири јаратмышды?

⁹ Һәвари Бутрус «апармаг» сөзү илә һансы тәсвири јаратмышды? Һәмин јунан сөзүн охшар формасыны «Һәвариләрин ишләри» китабыны јазан Лука истифадә етмишди. О јазмышды ки, күләк ҝәмини «апарырды»  (Һәв. 27:15). Одур ки, Бутрус Кәламын мүгәддәс руһла «јөнәлдиләрәк» јазылдығыны дејәркән, бир алимин тәбиринҹә десәк, «дәнизчилијә даир ҝөзәл метафора» истифадә етмишди. Күләк ҝәмини апарыб мәнзил башына чатдырдығы кими, мүгәддәс руһ да Мүгәддәс Китаб јазарларыны вә пејғәмбәрләри јөнәлдирди ки, онлар ҝөрдүкләри иши баша вурсунлар. Һәмин алим демишди: «Пејғәмбәрләр, мәҹази диллә десәк, јелкәнләри галдырырды». Јеһова Өз үзәринә дүшән иши ҝөрүрдү: «күләк», јәни мүгәддәс руһ верирди. Мүгәддәс Китаб јазарлары исә өз өһдәләринә дүшән иши иҹра едирди: онлар руһун ҝөстәрдији истигамәтә ҝедирди.

10, 11. Мүгәддәс руһун бизи ирәли апармасы үчүн һансы ики аддымы атмалыјыг? Нүмунә чәкин.

¹⁰ Әлбәттә, Јеһованын мүгәддәс руһ васитәсилә Кәламыны јаздырдығы дөвр артыг кечмишдә галыб. Лакин О, һәлә дә мүгәддәс руһ васитәсилә халгына ҝүҹ верир. Јеһова инди дә Өз үзәринә дүшән иши ҝөрүр. Бәс мүгәддәс руһун бизи јөнәлтмәси үчүн нә едә биләрик? Биз өз үзәримизә дүшән иши иҹра етмәлијик. Бура нә дахилдир?

¹¹ Ҝәлин бир нүмунәјә бахаг. Күләкдән сәмәрәли истифадә етмәк истәјән дәнизчијә ики шеј ҝәрәкдир. Илк нөвбәдә, о, гајығын күләкли јердә олмасына диггәт јетирмәлидир. Ахы гајыг лиманда, күләјин әсдији јердән узагда дурса, неҹә һәрәкәт едә биләр? Икинҹиси, о, јелкәнләри мүмкүн гәдәр јухары галдырмалы вә там ачмалыдыр. Тәбии ки, гајығын ирәли ҝетмәси үчүн күләјин әсмәси кифајәт дејил, јелкәнләр күләји тутмалыдыр. Ејнилә дә, јалныз мүгәддәс руһун көмәји сајәсиндә Јеһоваја хидмәти давам етдирә биләрик. Мүгәддәс руһдан јарарланмаг үчүн исә ики аддым атмалыјыг. Биринҹиси, биз Аллаһын руһунун бирбаша тәсир етдији јердә олмалыјыг, јәни мүгәддәс руһун тәсиринин олдуғу ишләрдә иштирак етмәлијик. Икинҹиси, јелкәнләримизи мүмкүн гәдәр јухары галдырмалыјыг, јәни бу ишләри  баҹардығымыз гәдәр јахшы ҝөрмәјә чалышмалыјыг (Зәб. 119:32). Бунлары едәндә мүгәддәс руһ мүгавимәт вә сынаг далғаларыны ашмаға вә јени дүнјаја доғру тутдуғумуз истигамәтдә сәдагәтлә ирәли ҝетмәјә көмәк едәҹәк.

12. Инди нәји арашдыраҹағыг?

¹² Бураја гәдәр мүгәддәс руһун бизә көмәк етдији ики јолу арашдырдыг. Мүгәддәс руһ бизә ҝүҹ верир вә сынаглар гаршысында сәдагәтимизи горумаға көмәк едир. Һәмчинин ирәли ҝетмәјә вә әбәди һәјата апаран јолда јеримәјә көмәк едир. Инди исә арашдыраҹағыг ки, мүгәддәс руһдан фајдаланмаг үчүн һансы дөрд аддымы атмалыјыг.

13. 2 Тимутијә 3:16, 17 ајәләринә әсасән, Кәлам бизә неҹә тәсир едә биләр вә бунун үчүн нә етмәлијик?

¹³ Биринҹиси, Аллаһын Кәламыны мүталиә един. (2 Тимутијә 3:16, 17 ајәләрини охујун.) «Аллаһдандыр» кими тәрҹүмә олунмуш јунан сөзү һәрфән «Аллаһ үфүрүб» демәкдир. Аллаһ Өз руһу васитәсилә сөзләрини Мүгәддәс Китаб јазарларынын фикринә «үфүрүрдү». Мүгәддәс Китабы охујанда вә үзәриндә дүшүнәндә Онун бујруглары ағлымыза вә үрәјимизә нүфуз едир. Аллаһын сөзү һәјатымызда Онун ирадәсинә ујғун дәјишикликләр етмәјә тәшвиг едир (Ибр. 4:12). Лакин мүгәддәс руһдан там фајдаланмаг үчүн Аллаһын Кәламыны мүнтәзәм мүталиә етмәјә вә охудугларымызын үзәриндә дәриндән дүшүнмәјә вахт ајырмалыјыг. Онда Аллаһын Кәламы бүтүн сөзләримизә вә әмәлләримизә тәсир едәҹәк.

14. а) Нәјә ҝөрә дејә биләрик ки, мүгәддәс руһ јығынҹагларымызда фәалијјәт ҝөстәрир? б) Јығынҹаглара «ачыг јелкәнлә» гатылмаг үчүн нә етмәлијик?

¹⁴ Икинҹиси, Аллаһа диндашларынызла бирҝә ибадәт един (Зәб. 22:22). Мүәјјән мәнада јығынҹагларымызы «күләк әсән» јер адландырмаг олар. Јеһованын руһу јығынҹагларымызда фәалијјәт ҝөстәрир (Вәһј 2:29). Буну нәјин әсасында дејә биләрик? Чүнки диндашларымызла бирҝә ибадәт етмәк үчүн јығышанда дуа едиб Аллаһдан мүгәддәс руһ истәјирик, Аллаһын Кәламына әсасланан һәмд нәғмәләри охујуруг, һәмчинин мүгәддәс руһла тәјин олунан гардашларын Мүгәддәс Китаба әсасланан ҝөстәришләрини динләјирик. Мүгәддәс руһ һәмчинин баҹылара да өз бәндләрини һазырламаға көмәк едир. Мүгәддәс руһдан там фајдаланмаг үчүн јығынҹаглара өнҹәдән һазырлашмалы вә шәрһ вермәлијик. Беләҹә, јығынҹаға «ачыг јелкәнлә» гатылмыш олаҹағыг.

15. Мүгәддәс руһ тәблиғ ишимизә неҹә көмәк едир?

¹⁵ Үчүнҹүсү, тәблиғ ишиндә иштирак един. Тәблиғ вә тәлим ишиндә Аллаһын Кәламындан истифадә етмәклә мүгәддәс руһун бизә көмәк етмәсинә јол веририк (Ром. 15:18, 19). Амма Аллаһын мүгәддәс руһундан там фајдаланмаг үчүн тәблиғдә мүнтәзәм олараг иштирак етмәли вә мүмкүн олан һәр фүрсәтдә Мүгәддәс Китаба мүраҹиәт етмәлијик. Тәблиғдә даһа сәриштәли олмаг үчүн «Мәсиһи һәјаты вә ибадәти. Иш дәфтәри»ндәки сөһбәт планларындан истифадә едә биләрик.

16. Мүгәддәс руһу алмағын бирбаша јолу һансыдыр?

¹⁶ Дөрдүнҹүсү, Јеһоваја дуа един (Мәт. 7:7—11; Лука 11:13). Мүгәддәс руһу алмағын бирбаша јолу ону Јеһовадан диләмәкдир. Дуаларымызын Јеһоваја чатмасына вә ја Јеһованын бизә мүгәддәс руһ бәхшишини вермәсинә һеч бир шеј, нә һәбсхана диварлары, нә дә Шејтан мане ола билмәз (Јаг. 1:17). Мүгәддәс руһдан там фајда әлдә етмәк үчүн неҹә дуа етмәлијик? Дуа һагда даһа дәриндән өјрәнмәк үчүн  ҝәлин Луканын Мүждәсиндә тәсвир олунан нүмунәни нәзәрдән кечирәк *.

17. Лука 11:5—9, 13 ајәләриндә јазылмыш мәсәлдән дуа һагда нә өјрәнирик?

¹⁷ Лука 11:5—9, 13 ајәләрини охујун. Исанын чәкдији мәсәл мүгәддәс руһу неҹә диләмәли олдуғумузу ҝөстәрир. Мәсәлдә киши истәдији шеји «исрар етдији үчүн» әлдә едир. О, ҝеҹәјарысы олмасына бахмајараг, достундан көмәк истәмәјә чәкинмир *. Иса Мәсиһ бу нүмунәни дуа мөвзусу илә неҹә әлагәләндирмишди? О демишди: «Дурмадан диләјин, сизә вериләҹәк; дурмадан ахтарын, тапаҹагсыныз; дурмадан гапыны дөјүн, сизә ачаҹаглар». Бундан нә өјрәнирик? Мүгәддәс руһун бизә көмәк етмәсини истәјириксә, ону дурмадан диләмәлијик.

18. Исанын чәкдији мәсәлә әсасән, Јеһованын бизә мүгәддәс руһ верәҹәјинә нә үчүн әмин ола биләрик?

¹⁸ Исанын чәкдији мәсәл һәмчинин Јеһованын мүгәддәс руһу нә үчүн вердијини анламаға да көмәк едир. Мәсәлдәки киши ҝеҹәјарысы ҝәлән гонағыны јахшы гаршыламаг истәјирди. О, баша дүшүрдү ки, гонағын габағына јемәк гојмалыдыр, лакин һеч нәји јох иди. Иса демишди ки, киши исрар етдији үчүн гоншусу она чөрәк верир. Иса нәји вурғуламаг истәјирди? Әҝәр гејри-камил инсан исрар едән гоншусуна көмәк етмәјә һазырдырса, ҝөрүн сәхавәтли Аллаһымыз Ондан исрарла мүгәддәс руһ диләјәнләрә көмәк етмәјә нә гәдәр истәклидир! Буна ҝөрә дә Јеһовадан мүгәддәс руһ диләјәркән Онун дуаларымыза ҹаваб верәҹәјинә архајын ола биләрик (Зәб. 10:17; 66:19).

19. Галиб чыхаҹағымыза нә үчүн әмин ола биләрик?

¹⁹ Әмин ола биләрик ки, Шејтан бизи мәғлуб етмәк үчүн нә гәдәр ҹәһд етсә дә, биз галиб чыхаҹағыг. Чүнки мүгәддәс руһ бизә ики јолла көмәк едир. Биринҹиси, чәтинликләрә дөзмәјә ҝүҹ верир. Икинҹиси, мүгәддәс руһ, санки јелкәнләримизи һава илә долдурараг јени дүнјаја чатана гәдәр Јеһоваја хидмәтдә ирәлиләмәјимизә көмәк едир. Ҝәлин мүгәддәс руһун көмәјиндән там фајдаланмаға гәти гәрарлы олаг!