1. Мәтта 7:13, 14 ајәләринә әсасән, биз һансы сәфәрә чыхмышыг?

ҺАМЫМЫЗ јол ҝедирик. Мәгсәдимиз Јеһованын рәһбәрлији алтында олаҹаг јени дүнјаја чатмагдыр. Һәр ҝүн чалышырыг ки, һәјата апаран бу јолдан сапмајаг. Амма Иса демишкән, бу јол енсиздир вә бу јолда јеримәк бәзән чәтин олур. (Мәтта 7:13, 14 ајәләрини охујун.) Гејри-камил олдуғумуз үчүн асанлыгла бу јолдан сапа биләрик (Гал. 6:1).

2. Бу мәгаләдә нәји мүзакирә едәҹәјик? (« Тәвазөкар олун, аддымларынызы дүзәлдин» адлы чәрчивәјә бахын.)

² Һәјата апаран енсиз јолдан сапмамаг үчүн дүшүнҹә вә һәрәкәтләримизи дүзәлтмәјә һазыр олмалыјыг. Һәвари Булус Коринфдәки диндашларыны тәшвиг едирди ки, дүзәлмәјә давам етсинләр (2 Кор. 13:11). Бу мәсләһәт бизә дә аиддир. Бу мәгаләдә мүзакирә едәҹәјик ки, Мүгәддәс Китаб вә јеткин достларымыз аддымларымыза дүзәлиш етмәјә вә һәјата апаран јолдан сапмамаға неҹә көмәк едә биләр. Һәмчинин өјрәнәҹәјик ки, Јеһованын тәшкилатындан ҝәлән ҝөстәришләрә ујғун давранмаг нә заман чәтин ола биләр. Ҝөрәҹәјик ки, тәвазөкар олмағымыз һәрәкәтләримиздә дүзәлишләр едәркән Јеһоваја хидмәтдә севинҹимизи итирмәмәјә неҹә көмәк едәҹәк.

3. Аллаһын Кәламы сизә неҹә көмәк едә биләр?

³ Фикирләримизи вә һиссләримизи тәһлил етмәјә чалышанда бир аз мүшкүлә дүшүрүк. Чүнки үрәјимиз хаиндир вә онун бизи һансы јола апардығындан баш ачмаг чәтиндир (Әрм. 17:9). Биз чох асанлыгла јанлыш фикирләрә алдана биләрик (Јаг. 1:22). Она ҝөрә дә өзүмүзү тәһлил етмәк үчүн Аллаһын Кәламына үз тутмалыјыг. Аллаһын Кәламы бизим дахилән неҹә инсан олдуғумузу, үрәјимизин дүшүнҹә вә нијјәтләрини үзә чыхарыр (Ибр. 4:12, 13). Аллаһын Кәламы бир нөв рентҝен апараты  кимидир, дахилимиздәкиләри ҝөрмәјә көмәк едир. Амма Мүгәддәс Китабын вә Јеһованын тәјин етдији сәлаһијјәтли шәхсләрин вердији мәсләһәтин хејрини ҝөрмәк үчүн тәвазөкар олмалыјыг.

4. Талут падшаһын гүрурландығыны нә ҝөстәрир?

⁴ Талут падшаһын һадисәси ҝөстәрир ки, тәвазөкарлыг чатышмајанда нәләр баш верир. Талут падшаһ о гәдәр гүрурланмышды ки, дүшүнҹә вә һәрәкәтләринә дүзәлиш етмәли олдуғуну һәтта үрәјиндә белә гәбул етмирди (Зәб. 36:1, 2; Һәб. 2:4). Талутун бу ҹүр инсан олдуғу Јеһова она конкрет ҝөстәриш верән заман үзә чыхды. Јеһова она демишди ки, әмалигәләри мәғлуб едән заман о неҹә давранмалыдыр, амма о итаәт етмәди. Сонра Ишмуил пејғәмбәр бу мәсәлә илә бағлы Талутла ачыг данышанда о, сәһвини бојнуна алмады. Әксинә, елә дә ҹидди сәһв етмәдијини дејәрәк вә башгаларыны ҝүнаһландырараг өзүнә бәраәт газандырды (1 Ишм. 15:13—24). Талут әввәл дә белә давранмышды (1 Ишм. 13:10—14). Тәәссүф ки, о, үрәјинин гүрурланмасына јол вермишди. Талут дүшүнҹәсини дүзәлтмәди, она ҝөрә дә Јеһова ону тәнбеһ едиб, рәдд етди.

5. Талутдан һансы ибрәти ҝөтүрүрүк?

⁵ Талутдан ибрәт ҝөтүрмәк үчүн нөвбәти суалларын үзәриндә дүшүнмәлијик: «Аллаһын Кәламындакы һансыса мәсләһәти охујаркән өзүмә бәраәт газандырмаг мејилим вар? Елә дә ҹидди сәһв етмәдијими дүшүнүрәм? Етдијим һәрәкәтә ҝөрә башгасыны ҝүнаһландырырам?» Бу суалларын һансынаса мүсбәт ҹаваб вердиксә, демәли, дүшүнҹәмизә дүзәлиш етмәлијик. Әкс һалда, үрәјимиз елә гүрурланар ки, Јеһова биздән үз дөндәрәр (Јаг. 4:6).

6. Талут падшаһла Давуд падшаһ арасында һансы фәрг вар иди?

⁶ Ҝәлин Талут падшаһла хәләфи Давуд падшаһ арасындакы фәргә бахаг. Давуд «Јеһованын ганунундан» һәзз алырды (Зәб. 1:1—3). О билирди ки, Јеһова һәлимләри хилас едир, амма мәғрурлара гаршы дурур (2 Ишм. 22:28). Буна ҝөрә дә Давуд Аллаһын ганунунун онун дүшүнҹәсини дүзәлтмәсинә изин верирди. О јазмышды: «Мәнә нәсиһәт верән Јеһоваја шүкүрләр олсун! Ҝеҹәләр үрәјим дә мәни ислаһ едир» (Зәб. 16:7).

7. Тәвазөкарыгса, нә едәҹәјик?

⁷ Һәлим, тәвазөкар олсаг, изин верәҹәјик ки, биз сәһв јола гәдәм гојмаздан өнҹә Аллаһын Кәламы сәһв дүшүнҹәмизи дүзәлтсин. Аллаһын Кәламы, санки бир сәс кими дејәҹәк: «Јол будур. Бу јолла ҝет». Бу јолдан саға вә ја сола дөнсәк, о бизи хәбәрдар едәҹәк (Әшј. 30:21). Јеһоваја гулаг асмағын бизә хејри чохдур (Әшј. 48:17). Мисал үчүн, һәр һансы инсанын бизә дүзәлиш етмәсинин ҝәтирдији дилхорчулуг һиссини јашамајаҹағыг. Бундан әлавә, бизимлә өвлады кими даврандығыны баша дүшдүјүмүз үчүн Јеһоваја јахынлашаҹағыг (Ибр. 12:7).

8. Јагуб 1:22—25 ајәләринә әсасән, Аллаһын Кәламыны ҝүзҝү кими неҹә истифадә едә биләрик?

⁸ Аллаһын Кәламы ҝүзҝү кимидир. (Јагуб 1:22—25 ајәләрини охујун.) Адәтән һәр ҝүн евдән чыхмаздан өнҹә ҝүзҝүјә бахырыг. Беләҹә, башгалары бизи ҝөрмәмиш өзүмүздә лазыми дүзәлишләр едирик. Ејнилә, һәр ҝүн Аллаһын Кәламыны охујанда ҝөрүрүк ки, һансыса саһәдә дүшүнҹәмизә дүзәлиш етмәлијик. Бәзиләри евдән чыхмаздан өнҹә һәр сәһәр ҝүнүн ајәсини охумағын көмәји дәјдијини дејир. Онлар охудуглары фикирләр һагда дүшүнүрләр. Сонра исә ҝүн боју Аллаһын Кәламындакы мәсләһәтләри тәтбиг етмәјә чалышырлар. Бундан әлавә, биз һәр ҝүн Мүгәддәс Китабы охумалы  вә охудугларымыз үзәриндә дүшүнмәлијик. Бәлкә дә, бу чох садә ҝөрүнүр, амма һәјата апаран енсиз јолдан сапмамаға көмәк едәҹәк ән ваҹиб шејләрдән биридир.

9. Достумуз бизә нә вахт дүзәлиш етмәли ола биләр?

⁹ Һеч олуб ки, сизи Јеһовадан узаглашдыраҹаг бир јола аддым атасыныз? (Зәб. 73:2, 3). Бу заман јеткин достунуз ҹәсарәтини топлајыб сизә сәһвинизи ҝөстәрибсә, ону динләјиб, мәсләһәтинә әмәл етмисиниз? Белә етмисинизсә, дүз давранмысыныз вә јәгин ки, достунузун етдији хәбәрдарлыға ҝөрә она миннәтдар олмусунуз (Мәс. 1:5).

10. Достунузун сизә дүзәлиш етмәсинә неҹә мүнасибәт ҝөстәрмәлисиниз?

¹⁰ Аллаһын Кәламында дејилир: «Достун вурдуғу јара сәдагәтиндәндир» (Мәс. 27:6). Нәјә ҝөрә белә демәк олар? Ҝәлин белә бир нүмунәјә бахаг: Тәсәввүр един ки, машын јолуну кечмәк үзрәсиниз вә бирдән телефон фикринизи јајындырыр. Сиз саға-сола бахмадан јолу кечмәјә башлајырсыныз. Бу заман достунуз голунуздан тутуб сизи сәкијә дартыр. Елә бәрк тутур ки, голунуз ҝөјәрир, анҹаг о, ҹәлд һәрәкәт етдији үчүн сизи машын вурмур. Голунуз ҝүнләрлә ағрыса да, достунуздан инҹимәрсиниз. Әксинә, сизи хилас етдији үчүн она миннәтдар оларсыныз. Ејнилә, достунуз дејирсә ки, һәрәкәтләриниз вә ја данышығыныз Јеһованын салеһ нормаларына ујғун дејил, әввәл-әввәл бу сизи инҹидә биләр. Анҹаг онун мәсләһәти хәтринизә дәјмәсин, она аҹыглы галмајын. Бу, ахмаглыг оларды (Ваиз 7:9). Әксинә, миннәтдар олун ки, достунуз ҹәсарәтини топлајыб сизинлә данышыб.

11. Достун мәсләһәтини рәдд етмәјә нә сәбәб ола биләр?

¹¹ Достун мәсләһәтини рәдд етмәјә нә сәбәб ола биләр? Гүрур. Гүрурлу инсанлар «гулагларына хош ҝәләни ешитмәк» истәјир. Онлар һәгигәтә гулаг асмыр (2 Тим. 4:3, 4). Өзләрини башгаларындан даһа ағыллы, даһа ваҹиб һесаб едир. Лакин һәвари Булус јазмышды: «Өзү бир шеј олмаја-олмаја, өзү һаггында јүксәк фикирдә олан инсан өзүнү алдадыр» (Гал. 6:3). Сүлејман падшаһ бу вәзијјәти чох ҝөзәл вурғуламышды. О јазмышды: «Касыб, амма ағыллы ҹаван даһа мәсләһәт гәбул етмәјән гоҹа, сәфеһ падшаһдан јахшыдыр» (Ваиз 4:13).

12. Галатијалылара 2:11—14 ајәләринә әсасән, һәвари Бутрус бизим үчүн һансы нүмунәни гојуб?

¹² Ҝәлин һәвари Бутрусун нүмунәсинә бахаг, ҝөрәк һәвари Булус башгаларынын јанында она сәһвини ҝөстәрәндә о, неҹә давранмышды. (Галатијалылара 2:11—14 ајәләрини охујун.) Бутрус диггәтини мәсләһәтин верилмә тәрзинә вә һарада верилдијинә ҹәмләјиб Булусдан инҹијә биләрди. Амма Бутрус һикмәтли инсан иди. О, мәсләһәти гәбул етди вә Булуса гаршы кин сахламады. Әксинә, сонралар Булусу әзиз гардашым адландырмышды (2 Бут. 3:15).

13. Мәсләһәт верәркән һансы мәгамлары нәзәрә алмалыјыг?

¹³ Әҝәр достунуза дүзәлиш етмәји лазым билирсинизсә, нәләри нәзәрә алмалысыныз? Достунузла данышмаздан әввәл өзүнүздән сорушун: «Мән “һәддән артыг салеһ” дејиләм ки?» (Ваиз 7:16). Һәддән артыг салеһ инсан башгаларыны Јеһованын јох, өз нормалары әсасында мүһакимә едир вә чох да мәрһәмәтли олмур. Бу һагда фикирләшәндән сонра, јенә дә дүшүнүрсүнүзсә ки, достунузла данышмалысыныз, онда проблемин нә олдуғуну там мүәјјән един вә  суаллар верәрәк она сәһвини ҝөрмәјә көмәк един. Диггәтли олун ки, дедикләринизин Мүгәддәс Китаб әсасы олсун, унутмајын, достунуз сизә јох, Аллаһа һесабат верәҹәк (Ром. 14:10). Аллаһын Кәламындакы һикмәти әлдә рәһбәр тутун вә кимәсә мәсләһәт верәндә Иса кими шәфгәтли олун (Мәс. 3:5; Мәт. 12:20). Бу нәјә ҝөрә ваҹибдир? Чүнки биз башгалары илә неҹә рәфтар едириксә, Јеһова да бизимлә елә рәфтар едәҹәк (Јаг. 2:13).

14. Аллаһын тәшкилаты бизи нә илә тәмин едир?

¹⁴ Јеһова тәшкилатынын јер үзү һиссәси васитәсилә бизә һәјата апаран јолда бәләдчилик едир. Бу тәшкилат Аллаһын Кәламындакы мәсләһәтләрә әмәл едә билмәјимиз үчүн видеолар, нәшрләр тәгдим едир вә ибадәт ҝөрүшләри тәшкил едир. Өјрәндијимиз бүтүн биликләр тамамилә Мүгәддәс Китаба әсасланыр. Рәһбәрлик Шурасы тәблиғ ишинин ән јахшы шәкилдә иҹра олунмасы үчүн гәрар гәбул едәндә мүгәддәс руһа бел бағлајыр. Буна бахмајараг, шура тәблиғ ишинин тәшкили илә бағлы вердији гәрары вахташыры нәзәрдән кечирир. Нәјә ҝөрә? Чүнки «бу дүнјанын сәһнәси дәјишир» вә Аллаһын тәшкилаты дәјишән вәзијјәтә ујғунлашмалыдыр (1 Кор. 7:31).

15. Бәзи тәблиғчиләр һансы чәтинликлә үзләшир?

¹⁵ Аллаһын тәшкилаты Мүгәддәс Китаб тәлимләринә јени изаһатлар ҝәтирәндә вә ја әхлаг мәсәләләринә даир ҝөстәришләр верәндә биз буну тәрәддүд етмәдән гәбул едирик. Бәс әҝәр тәшкилат һәјатымызын диҝәр саһәләринә тәсир едәҹәк дәјишикликләр едирсә, биз неҹә мүнасибәт ҝөстәрәҹәјик? Мәсәлән, сон илләрдә ибадәт евләринин тикинтиси вә гуллуғу үчүн лазым олан вәсаитләрин гијмәти кәскин шәкилдә артыб. Буна ҝөрә дә Рәһбәрлик Шурасы гәрар верди ки, бир ибадәт евиндән даһа чох јығынҹаг истифадә етсин. Бу дәјишиклик нәтиҹәсиндә јығынҹаглар бирләшдирилиб вә бәзи ибадәт евләри сатылыб. Әлдә олунан пул ибадәт евинә даһа чох тәләбат олан әразиләр үчүн ајрылыр. Сизин јашадығыныз әразидә ибадәт еви сатылыбса вә јығынҹаглар бирләшдирилибсә, ола билсин, јени вәзијјәтә ујғунлашмаг сизин үчүн чәтиндир. Бәзи тәблиғчиләр јығынҹаглара ҝетмәк үчүн даһа узун јол гәт етмәли олур. Бир башгалары ибадәт евинин тикинтисиндә вә гуллуғунда бөјүк зәһмәт чәкдикләри үчүн  ибадәт евинин сатылмасына пис ола биләр. Дүшүнә биләрләр ки, вахтлары вә ҝүҹләри һәдәр ҝедиб. Буна бахмајараг, онлар бу дәјишиклији дәстәкләјирләр вә буна ҝөрә тәрифә лајигдирләр.

16. Колослулара 3:23, 24 ајәләриндәки мәсләһәтә әмәл етмәк севинҹимизи горумаға неҹә көмәк едәҹәк?

¹⁶ Нә едириксә Јеһова үчүн етдијимизи вә Онун Өз тәшкилатына рәһбәрлик етдијини унутмасаг, севинҹимизи горујаҹағыг. (Колослулара 3:23, 24 ајәләрини охујун.) Давуд падшаһ бизә ҝөзәл нүмунә гојуб. О, мәбәдин тикинтисинә ианә едәркән демишди: «Мән кимәм, халгым кимдир ки, Сәнә белә бәхшишләр верәк? Һәр шеји бизә Сән вермисән, Сәнин әлиндән алдығымызы Сәнин Өзүнә гајтарырыг» (1 Салн. 29:14). Биз дә ианә едәндә Јеһованын бизә вердикләрини Онун Өзүнә гајтарырыг. Буна бахмајараг, Јеһова Онун иши наминә вахтымызы, ҝүҹүмүзү вә вәсаитимизи сәрф етмәјимизи чох гијмәтләндирир (2 Кор 9:7).

17. Аддымларыныза дүзәлиш етмәк лазым ҝәләндә, нә үчүн руһдан дүшмәмәлисиниз?

¹⁷ Һәјата апаран енсиз јолдан сапмамаг үчүн һамымыз аддымбаддым Иса Мәсиһин изи илә ҝетмәлијик (1 Бут. 2:21). Әҝәр ҝөрсәниз ки, аддымларыныза дүзәлиш етмәк лазымдыр, руһдан дүшмәјин. Әслиндә, бу она дәлаләт едир ки, сиз Јеһованын ҝөстәрдији јолла ҝетмәк истәјирсиниз. Унутмајын ки, Јеһова бизим һал-һазырда гејри-камил олдуғумузу билдији үчүн Исанын нүмунәсини камил шәкилдә изләмәјимизи ҝөзләмир.

18. Мәгсәдимизә чатмаг үчүн нә етмәлијик?

¹⁸ Ҝәлин нәзәримизи ҝәләҹәјә ҹәмләјәк. Дүшүнҹә вә һәрәкәтләримизә дүзәлиш етмәјә һазыр олаг (Мәс. 4:25; Лука 9:62). Тәвазөкар галаг, бундан сонра да севинәк, дүзәлмәјә чалышаг (2 Кор. 13:11). Әҝәр белә даврансаг, «мәһәббәт вә сүлһ Аллаһы» бизимлә олаҹаг. Онда биз нәинки мәнзилбашына чатаҹағыг, ора ҝетдијимиз јол бојунҹа севинҹ дујаҹағыг.