1. Тәблиғдә нә илә үзләшә биләрик, амма нәјә әминик?

 ТӘБЛИҒДӘ тәгибләрлә үзләшәҹәјимизи билирик. Ола билсин, ҝәләҹәкдә бу тәгибләр даһа да артаҹаг (Дән. 11:44; 2 Тим. 3:12; Вәһј 16:21). Амма әмин ола биләрик ки, Јеһова бизә лазым олан көмәји ҝөстәрәҹәк. Чүнки Јеһова һәмишә хидмәтчиләринә көмәк едиб, онлара һәтта ән чәтин тәјинатларынын өһдәсиндән ҝәлмәјә ҝүҹ вериб. Онлардан бири Һизгијал пејғәмбәр иди. О, Бабилдә әсарәтдә олан јәһудиләрә тәблиғ едирди. Ҝәлин онун һәјатындан бәзи һадисәләрә нәзәр салаг.

2. Јеһова Һизгијалын тәблиғ едәҹәји инсанлары неҹә тәсвир етмишди? Бу мәгаләдә нә һагда данышаҹағыг? (Һизгијал 2:3—6).

² Һизгијал нә ҹүр инсанлара тәблиғ едирди? Јеһова онларын «өткәм», «инадкар», «үсјанкар» олдугларыны демишди. Онлар гангаллар кими зәрәрли, әгрәбләр кими тәһлүкәли идиләр. Буна ҝөрә дә Јеһова дәфәләрлә Һизгијала демишди: «Онлардан горхма»! (Һизгијал 2:3—6 ајәләрини охујун.) Һизгијал пејғәмбәр тәблиғ етмәк тапшырығынын өһдәсиндән ҝәлә билди, чүнки 1) ону Јеһова ҝөндәрмишди, 2) мүгәддәс руһ она ҝүҹ верирди вә 3) Аллаһын Кәламындан гүввәт алырды. Бу амилләр Һизгијала неҹә көмәк етди? Бәс бизә неҹә көмәк едир?

3. Чох јәгин ки, Һизгијалы һансы сөзләр мөһкәмләндирмишди вә Јеһова ону неҹә үрәкләндирирди?

³ Јеһова Һизгијала демишди: «Мән сәни ҝөндәрирәм» (Һизг. 2:3, 4). Јәгин ки, бу сөзләр Һизгијалы мөһкәмләндирмишди. Јеһова Мусаны вә Әшијаны Өз пејғәмбәри  кими тәјин едәндә дә бәнзәр сөзләр демишди (Чых. 3:10; Әшј. 6:8). О һәмчинин бу ики пејғәмбәрә тәјинатларындакы чәтинликләрин өһдәсиндән ҝәлмәјә көмәк етмишди. Һизгијал бүтүн бунлары билирди. Буна ҝөрә дә Јеһова Һизгијала ики дәфә «Мән сәни ҝөндәрирәм» дејәндә о, Јеһованын она дајаг олаҹағына архајын ола биләрди. Бундан әлавә, «Һизгијал» китабында «мәнә Јеһованын сөзү назил олду» ифадәсинә чох раст ҝәлирик (Һизг. 3:16). Һәмчинин Һизгијал пејғәмбәр «мәнә јенә Јеһованын сөзү назил олду» ифадәсини дә дәфәләрлә ишләтмишди (Һизг. 6:1). Шүбһәсиз, пејғәмбәр ону Јеһованын ҝөндәрдијинә там әмин иди. Бундан әлавә, онун атасы каһин иди вә јәгин, она пејғәмбәрләрдән вә Јеһованын онлары үрәкләндирмәсиндән данышмышды. Јеһова Исһага, Јагуба вә Әрәмјаја белә демишди: «Мән сәнинләјәм» (Јар. 26:24; 28:15; Әрм. 1:8).

4. Чох јәгин ки, һансы сөзләр Һизгијала ҝүҹ вермишди?

⁴ Үмуми ҝөтүрдүкдә Исраил халгы Һизгијалын тәблиғинә неҹә һај верәҹәкди? Јеһова демишди: «Исраил әһли сәнә гулаг асмајаҹаг, чүнки онлар Мәнә гулаг асмаг истәмирләр» (Һизг. 3:7). Халг Һизгијалын дедикләрини гәбул етмәмәклә, әслиндә, Јеһованы гәбул етмирди. Бу сөзләр Һизгијалы әмин едирди ки, халгын она гулаг асмамасы онун бир пејғәмбәр кими ишинин өһдәсиндән ҝәлмәдијини ҝөстәрмир. Һәмчинин Јеһова Һизгијалы әмин етмишди ки, онун бәјан етдији һөкм хәбәри ҝерчәкләшәндә исраиллиләр биләҹәкләр ки, «араларында пејғәмбәр олуб» (Һизг. 2:5; 33:33). Шүбһәсиз, бу тәсәлли сөзләри Һизгијала хидмәтини иҹра етмәјә ҝүҹ вермишди.

5. Әшија 44:8 ајәсиндәки һансы сөзләр бизә ҝүҹ верир?

⁵ Бизи дә тәблиғ етмәјә Јеһова ҝөндәриб. Буну билмәк бизә ҝүҹ верир. Јеһова бизи Өз «шаһидләри» адландырыр (Әшј. 43:10). Бу неҹә дә бөјүк шәрәфдир! Јеһова Һизгијала «горхма» дедији кими, бизә дә «ваһимәләнмә» дејир. Нәјә ҝөрә әлејһдарларымыздан горхмамалыјыг? Чүнки Һизгијал кими, бизи дә Јеһова ҝөндәриб вә Онун көмәјинә архалана биләрик. (Әшија 44:8 ајәсини охујун.)

6. а) Јеһованын бизә дәстәк олаҹағыны һансы сөзләр ҝөстәрир? б) Нәји билмәк бизи руһландырыр?

⁶ Јеһова бизә дајаг олаҹағына сөз верир. Мисал үчүн, О «сиз Мәним шаһидләримсиниз» сөзләриндән әввәл белә сөзләр демишди: «Сујун ичиндән кечсән дә, сәнинлә олаҹағам, чајлардан кечсән дә, батмајаҹагсан, одун ичиндән кечсән дә, јанмајаҹагсан, алов сәни гарсамајаҹаг» (Әшј. 43:2). Тәблиғ едәркән бәзән ҹошғун чаја бәнзәр манеәләрлә, одлу-аловлу сынагларла үзләширик. Бунунла белә, Јеһованын көмәји сајәсиндә биз хидмәтимизи давам етдиририк (Әшј. 41:13). Һизгијалын дөврүндә олдуғу кими, бу ҝүн дә чохлары чатдырдығымыз хәбәрә гулаг асмаг истәмир. Онларын бизи гәбул етмәмәси о демәк дејил ки, биз Јеһованын јахшы Шаһиди дејилик. Биз һәр шејә рәғмән сәдагәтлә мүждәни бәјан едәндә Јеһова биздән разы галыр вә буну билмәк бизә гол-ганад верир. Һәвари Булус демишди: «Һәрәси зәһмәтинә ҝөрә мүкафатыны алаҹаг» (1 Кор. 3:8; 4:1, 2). Узун мүддәтдир өнҹүл кими хидмәт едән бир баҹы дејир: «Нә јахшы ки, Јеһова мүкафаты зәһмәтимизә ҝөрә верир».

7. Ҝөрдүјү ҝөрүнтүнү һәр дәфә јадына саланда, чох ҝүман ки, Һизгијал һансы һиссләри кечирирди? (Үз габығындакы шәклә бахын.)

⁷ Һизгијал Аллаһын руһунун нә гәдәр гүдрәтли олдуғуна шаһид олмушду. О, ҝөрүнтүдә ҝөрмүшдү ки, мүгәддәс руһ гүдрәтли руһани мәхлуглары, нәһәнҝ сәмави арабанын чархларыны һәрәкәтә ҝәтирир (Һизг. 1:20, 21). Бу ҝөрдүкләри онда һансы һиссләри доғурмушду? О јазмышды: «Буну ҝөрәндә үзүстә јерә дөшәндим». Ҝөрдүкләри ону о гәдәр валеһ етмишди ки, о, јерә дөшәнмишди (Һизг. 1:28). Јәгин, сонралар Һизгијал һәр дәфә бу мөһтәшәм ҝөрүнтүнү јадына саланда әмин олурду ки, Јеһованын руһунун сајәсиндә хидмәтини иҹра едә биләҹәк.

8, 9. а) Јеһованын әмри Һизгијала неҹә тәсир етди? б) Јеһова Һизгијалы даһа неҹә ҝүҹләндирди?

⁸ Јеһова Һизгијала белә деди: «Еј бәни-адәм, галх ајаға, сәнинлә данышаҹағам». Бу әмр вә Аллаһын мүгәддәс руһу она ҝүҹ верди ки, ајаға галхсын. Һизгијал белә јазмышды: «Руһ дахилимә ҝирди вә мәни ајаға галдырды» (Һизг. 2:1, 2). Бундан сонра бүтүн хидмәти бојунҹа о, Јеһованын әлини, јәни мүгәддәс руһуну өз үзәриндә һисс едирди (Һизг. 3:22; 8:1; 33:22; 37:1; 40:1). Јеһованын руһу Һизгијалы ҝүҹләндирди ки, о, алдығы тапшырығы јеринә јетирсин, јәни «дикбаш вә инадкар» халга тәблиғ етсин (Һизг. 3:7). Јеһова Һизгијала деди: «Онлар нә гәдәр инадкардырса, Мән дә сәни бир о гәдәр гәтијјәтли етмишәм. Сәнин алныны алмаз кими сәрт етмишәм, чахмагдашындан да бәрк етмишәм. Онлардан горхма, сифәтләри сәни ваһимәјә салмасын» (Һизг. 3:8, 9, һаш.). Бир нөв, Јеһова Һизгијала белә демишди: «Гојма  бу инсанларын инадкарлығы сәни руһдан салсын. Сәнә ҝүҹ верәҹәјәм».

⁹ Бундан сонра Јеһованын руһу Һизгијалы тәблиғ етдији әразијә чәкиб апарды. Һизгијал јазмышды: «Үзәримдә Јеһованын әлинин ҝүҹүнү һисс едирдим». Тәблиғ едәҹәји хәбәри там гаврамасы вә әминликлә тәблиғ едә билмәси үчүн пејғәмбәрә дүз бир һәфтә лазым ҝәлди (Һизг. 3:14, 15). Сонра Јеһова ону дүзәнлијә јөнәлтди, һәмин вахт руһ онун ичинә дахил олду (Һизг. 3:23, 24). Артыг Һизгијал хидмәтинә башламаға һазыр иди.

10. Тәблиғ ишини иҹра етмәк үчүн һансы көмәјә еһтијаҹымыз вар вә нәјә ҝөрә?

¹⁰ Тәблиғ ишини иҹра етмәк үчүн һансы көмәјә еһтијаҹымыз вар? Бу суала ҹаваб вермәк үчүн ҝәлин Һизгијалла нә баш вердијини јадымыза салаг. Һәлә тәблиғ етмәјә башламамышдан әввәл Јеһованын руһу она ҝүҹ-гүввәт верди. Ејнилә бу ҝүн дә биз тәблиғ ишимизи јалныз Јеһованын руһу сајәсиндә иҹра едә биләрик. Нәјә әсасән белә дејирик? Чүнки Шејтан тәблиғ ишимизи дајандырмаг үчүн бизә гаршы вурушур (Вәһј 12:17). Инсан дүшүнҹәси илә баханда Шејтан биздән гат-гат ҝүҹлү ҝөрүнә биләр. Амма шаһидлик иши васитәсилә биз она галиб ҝәлирик (Вәһј 12:9—11). Һансы мәнада? Биз тәблиғ ишиндә иштирак етмәклә ҝөстәририк ки, Шејтанын һәдәләриндән горхмуруг. Биз һәр дәфә тәблиғ едәндә Шејтан мәғлубијјәт јашајыр. Демәли, тәгибләрлә үзләшмәјимизә бахмајараг, тәблиғ ишини иҹра етмәјимиз нәјин ҝөстәриҹисидир? Бу, ону ҝөстәрир ки, мүгәддәс руһ бизә ҝүҹ верир вә Јеһова биздән разыдыр (Мәт. 5:10—12; 1 Бут. 4:14).

11. Аллаһын руһу бизә неҹә көмәк едәҹәк вә ону һәмишә алмаг үчүн нә етмәлијик?

¹¹ Јеһова мәҹази мәнада Һизгијалын үзүнү вә алныны сәрт етмишди. Буну билмәк бизи нәјә әмин едир? Аллаһын руһу хидмәтдә үзләшдијимиз истәнилән чәтинлији  ашмаға бизә көмәк едә биләр (2 Кор. 4:7—9). Јеһованын бизә мүгәддәс руһуну һәмишә вермәси үчүн нә етмәлијик? Биз дурмадан дуа едиб, Јеһовадан мүгәддәс руһ диләмәлијик вә әмин олмалыјыг ки, Јеһова бизим дуаларымызы ешидәҹәк. Иса Мәсиһ шаҝирдләринә белә демишди: «Дурмадан диләјин,.. дурмадан ахтарын,.. дурмадан гапыны дөјүн». Онда Јеһова «Ондан истәјәнләрә мүгәддәс руһ» верәҹәк (Лука 11:9, 13; Һәв. 1:14; 2:4).

12. Һизгијал 2:9—3:3 ајәләринә әсасән, тумар һарадан назил олмушду вә ичиндә нә јазылмышды?

¹² Һизгијал тәкҹә мүгәддәс руһдан јох, Аллаһын Кәламындан да ҝүҹ алмышды. Ҝөрүнтүдә Һизгијал тумар тутан бир әл ҝөрмүшдү. (Һизгијал 2:9—3:3 ајәләрини охујун.) Бу тумар һарадан назил олмушду? Онун ичиндә нә јазылмышды? Бу тумар Һизгијалы неҹә мөһкәмләндирди? Ҝәлин бу суаллары ҹавабландыраг. Тумар Аллаһын тахтындан назил олмушду. Јәгин, Јеһова тумары Һизгијала онун даһа өнҹә ҝөрдүјү дөрд мәләкдән бири васитәсилә вермишди (Һизг. 1:8; 10:7, 20). Тумарда Аллаһын сөзләри — һөкм хәбәри јазылмышды. Бу хәбәр тумарын һәр ики тәрәфинә әтрафлы шәкилдә јазылмышды. Һизгијал бу сөзләри әсирликдә олан үсјанкар халга чатдырмалы иди (Һизг. 2:7).

13. Јеһова Һизгијала нә етмәји бујурур вә нәјә ҝөрә бу тумар Һизгијал үчүн ширин иди?

¹³ Јеһова Һизгијала дејир: «Тумары је, мәдәни онунла долдур». Һизгијал Аллаһын сөзүнә итаәт едиб, тумары ахыра гәдәр јејир. Ҝөрүнтүнүн бу һиссәсинин мәнасы нәдир? Һизгијал бәјан едәҹәји хәбәри там мәнимсәмәли иди, санки бу хәбәр онун ҹанына һопмалы иди, дахили варлығыны һәрәкәтә ҝәтирмәли иди. Сонра мараглы бир шеј баш верир. Һизгијал һисс едир ки, бу тумар «бал кими ширин дадыр» (Һизг. 3:3). Нәјә ҝөрә? Чүнки Јеһованы тәмсил етмәк Һизгијал үчүн ширин, чох хош бир һал иди (Зәб. 19:8—11). Һизгијал миннәтдар иди ки, Јеһова ону Өз пејғәмбәри тәјин едиб.

14. Нәјин сајәсиндә Һизгијал тәјинатыны иҹра етмәјә һазыр олду?

¹⁴ Сонра Јеһова Һизгијала дејир: «Сәнә дедијим һәр сөзү динлә вә үрәјинә јаз» (Һизг. 3:10). Бу сөзләрлә Јеһова Һизгијала бујурур ки, тумарда јазылан сөзләри јаддашына һәкк етсин вә онлар барәдә дүшүнсүн. Белә етмәк Һизгијалын өз иманыны мөһкәмләндирди. Һәмчинин бу тумарда онун халга чатдыраҹағы сәрт һөкм хәбәри јазылмышды (Һизг. 3:11). Аллаһын хәбәри Һизгијалын үрәјиндә вә дилиндә оландан сонра артыг Һизгијал тәјинатыны ахырадәк иҹра етмәјә һазыр иди. (Зәбур 19:14 ајәси илә әлагәләндирин.)

15. Дөзүм ҝөстәрмәк үчүн нәләри «үрәјимизә јазмалыјыг»?

¹⁵ Хидмәтимизи дөзүмлә јеринә јетирмәк үчүн биз дә Аллаһын сөзләри васитәсилә даима иманымызы мөһкәмләндирмәлијик. Биз Јеһованын дедији һәр сөзү «үрәјимизә јазмалыјыг». Онун дедикләри исә Мүгәддәс Китабда гејд олунуб. Бәс Аллаһын Кәламынын бизим фикирләримизи, һиссләримизи вә нијјәтләримизи даим јөнләндирмәси үчүн нә едә биләрик?

16. Аллаһын Кәламыны мәнимсәмәк үчүн нә етмәлијик?

¹⁶ Биз јемәк јејәндә вә ону һәзм едәндә организмимиз мөһкәмләнир. Ејнилә Аллаһын Кәламыны мүталиә едәндә вә  онун үзәриндә дүшүнәндә руһани ҹәһәтдән мөһкәмләнирик. Тумарла бағлы ҝөрүнтүдән өјрәндикләримизи унутмамалыјыг. Јеһова истәјир ки, биз «мәдәмизи» Онун Кәламы илә долдураг, јәни ону там мәнимсәјәк. Бунун үчүн нә етмәлијик? Дуа етмәли, мүталиә етмәли вә охудугларымызын үзәриндә дүшүнмәлијик. Әввәла, дуа едәрәк үрәјимизи Аллаһын бизә өјрәтмәк истәдији фикирләрә һазырлајырыг. Сонра Мүгәддәс Китабдан бир һиссәни охујуруг. Даһа сонра исә дајаныб дүшүнүрүк, охудугларымызын дәринлијинә варырыг. Бунун бизә һансы хејри олур? Охудугларымызын үзәриндә нә гәдәр чох дүшүнүрүксә, Аллаһын Кәламы ҹанымыза бир о гәдәр јахшы һопур.

17. Нәјә ҝөрә Мүгәддәс Китабдан охудугларымыз үзәриндә дүшүнмәлијик?

¹⁷ Аллаһын Кәламыны охујуб үзәриндә дүшүнмәк нәјә ҝөрә ваҹибдир? Охудугларымыз бизә ҝүҹ-гүввәт верир. Бунун сајәсиндә биз инди хош хәбәри тәблиғ едә билирик. Һәм дә бу бизә ҝәләҹәкдә көмәк едәҹәк, чүнки тезликлә чох ҝүман ки, сәрт һөкм хәбәрини бәјан едәҹәјик. Бундан әлавә, Аллаһын ҝөзәл хүсусијјәтләри үзәриндә дүшүнәндә Онунла мүнасибәтләримиз даһа да мөһкәмләнир. Нәтиҹәдә, биз чох ширин, хош бир һисс дујуруг, јәни дахилимиздә гәлб раһатлығы вә мәмнунлуг һисси олур (Зәб. 119:103).

18. Әразимиздәки инсанлар һансы һәгигәти дана билмәјәҹәкләр вә нәјә ҝөрә?

¹⁸ Дүздүр, Һизгијалдан фәргли олараг, биз пејғәмбәрлик етмирик. Амма Јеһованын Өз Кәламында бизим дөврүмүзә гәдәр горујуб сахладығы хәбәри О, «битди» дејәнә гәдәр бәјан етмәјә әзмлијик. Инсанлара һөкм чыхармаг вахты чатанда артыг әразимиздәки инсанлар дејә билмәјәҹәкләр ки, Аллаһын хәбәрдарлығыны ешитмәјибләр вә ја Аллаһ онлары ҝөрмәздән ҝәлиб (Һизг. 3:19; 18:23). Әксинә, бизим тәблиғ етдијимиз хәбәрин Аллаһдан олдуғуну дана билмәјәҹәкләр.

19. Хидмәтимизи иҹра етмәјә бизә нә ҝүҹ верир?

¹⁹ Бизә хидмәтимизи иҹра етмәјә нә ҝүҹ верир? Һизгијалы мөһкәмләндирән үч амил. Биз тәблиғ етмәјә давам едирик, чүнки билирик ки, бизи Јеһова ҝөндәриб. Онун мүгәддәс руһу бизә ҝүҹ верир вә Кәламындан гүввәт алырыг. Јеһованын көмәји сајәсиндә хидмәтимизи иҹра етмәјә вә «ахыра кими» дөзмәјә әзмлијик (Мәт. 24:13).