1. Һарадан билирик ки, Јеһова бизим Она јахын олмағымызы истәјир?

 ЈЕҺОВА бизи Она јахынлашмаға сәсләјир (Јаг. 4:8). О бизим һәм Аллаһымыз, һәм Атамыз, һәм дә Достумуз олмаг истәјир. О, дуаларымыза ҹаваб верир, чәтинликләрә дөзмәјә көмәк едир. Тәшкилаты васитәсилә бизә тәлим верир, бизи горујур. Бәс Јеһоваја јахынлашмаг үчүн биз нә етмәлијик?

2. Јеһоваја неҹә јахынлаша биләрик?

² Јеһоваја јахынлашмаг үчүн биз Она дуа етмәли, Кәламыны охумалы вә охудугларымызын үзәриндә дүшүнмәлијик. Бунун сајәсиндә Јеһоваја мәһәббәтимиз вә миннәтдарлығымыз артдыгҹа-артаҹаг. Она итаәт етмәк вә Ону шәрәфләндирмәк истәјимиз аловланаҹаг. Ахы О, буна лајигдир (Вәһј 4:11). Биз Јеһованы даһа јахындан таныдыгҹа, Она вә бизә көмәк етмәк үчүн истифадә етдији тәшкилата етибарымыз ҝүҹләнәҹәк.

3. Шејтан һансы фәндлә бизи Јеһовадан ајырмаға чалышыр, бәс Јеһовадан вә тәшкилатындан үз дөндәрмәмәјә бизә нә көмәк едәҹәк? (Зәбур 31:13, 14).

³ Амма Шејтан бизи Јеһовадан ајырмаг истәјир. О, хүсусилә дә биз чәтинликләрлә үзләшәндә јаранан фүрсәтдән истифадә едир. Бәс о һансы фәнди ишләдир? Шејтан бизим Јеһоваја вә тәшкилатына етибарымызы јаваш-јаваш өлдүрмәк истәјир. Амма биз онун һүҹумларына гаршы дура биләрик. Јеһоваја иманымызын вә Она етибарымызын сарсылмаз олмасы сајәсиндә биз һеч вахт нә Ондан, нә дә тәшкилатындан үз дөндәрмәјәҹәјик. (Зәбур 31:13, 14 ајәләрини охујун.)

4. Бу мәгаләдә нә һагда данышаҹағыг?

 ⁴ Бу мәгаләдә биз јығынҹагдан хариҹдә үзләшдијимиз үч чәтинлик барәдә данышаҹағыг. Онларын һәр бири бизим Јеһоваја вә тәшкилатына етибарымыза көлҝә сала биләр. Бу неҹә баш верә биләр вә Шејтанын ҹәһдләрини боша чыхармаг үчүн нә едә биләрик?

5. Проблемләр Јеһоваја вә Онун тәшкилатына етибарымызы неҹә сарсыда биләр?

⁵ Бәзән мүхтәлиф проблемләримиз олур. Мәсәлән, аилә үзвләримиз тәрәфиндән тәгиб олунуруг, јахуд ишимизи итиририк. Проблемләримиз Јеһоваја вә тәшкилатына етибарымызы сарсыда биләр. Бу неҹә баш верә биләр? Үзләшдијимиз проблем узун мүддәт давам едәндә, ола биләр ки, биз үмидсизлијә гапылаг вә руһдан дүшәк. Шејтан белә фүрсәтләри фөвтә вермәјиб, бизим үрәјимиздә Јеһованын мәһәббәтинә шүбһә ојатмаға чалышыр. Истәјир ки, биз башымыза ҝәлән проблемләрә ҝөрә Јеһованы вә тәшкилатыны ҝүнаһландыраг. Белә бир шеј Мисирдә бәзи исраиллиләрлә баш вермишди. Әввәл-әввәл исраиллиләр инанырды ки, Муса илә Һаруну Јеһова ҝөндәриб вә онлар халгы әсарәтдән гуртараҹаг (Чых. 4:29—31). Амма сонра фирон халгын ишини ағырлашдыранда онлар башларына ҝәләнләрә ҝөрә Муса илә Һаруну ҝүнаһландырыб дејирдиләр: «Сизин уҹбатыныздан фиронун, әјанларынын нифрәтинә туш олдуг. Сиз онларын әлинә гылынҹ вердиниз ки, әһәдимизи кәссинләр» (Чых. 5:19—21). Ҝөрүндүјү кими, онлар Аллаһын садиг хидмәтчиләрини ҝүнаһкар билирдиләр. Чох һејиф! Әҝәр сиз дә узун мүддәтдир ки, чәтинликләрлә үзләширсинизсә, Јеһоваја вә Онун тәшкилатына етибарынызы неҹә мөһкәм сахлаја биләрсиниз?

6. Һәбгуг пејғәмбәрдән проблемләрә дөзмәклә бағлы нә өјрәнирик? (Һәбгуг 3:17—19).

⁶ Дуа едиб үрәјинизи Јеһоваја бошалдын вә Ондан көмәк истәјин. Һәбгуг пејғәмбәрин дә башына чохлу бәлалар ҝәлмишди. Һәтта бир мәгамда онда елә фикир јаранмышды ки, Јеһова она нәзәр јетирмир. Буна ҝөрә дә о, үрәјиндәкиләри Јеһоваја данышды. Она белә деди: «Еј Јеһова, нә вахтадәк имдад диләјәҹәјәм, Сәнсә ешитмәјәҹәксән?.. Нијә бу зүлм-ситәми ҝөтүрүрсән?» (Һәб. 1:2, 3). Јеһова мөмин бәндәсинин дуасыны ҹавабсыз гојмады (Һәб. 2:2, 3). Һәбгуг Јеһованын кечмишдә халгына вердији гуртулуш һагда дүшүндү вә бундан сонра онун үрәји фәрәһлә долду. Пејғәмбәрдә әминлик јаранды ки, Јеһова ону севир вә истәнилән чәтинлијә дөзмәјә көмәк едәҹәк. (Һәбгуг 3:17—19 ајәләрини охујун.) Бундан нә өјрәнирик? Чәтинликләрлә үзләшәндә Јеһоваја дуа един, һиссләринизи Онунла бөлүшүн вә Онун көмәјинә архаланын. Бу заман әмин олун ки, Јеһова сизә дөзмәк үчүн ҝүҹ верәҹәк. Онун дәстәјини һисс едәндә исә иманыныз даһа да мөһкәм олаҹаг.

7. Шерлинин гардашы онун иманыны сарсытмаг үчүн нә дејирди, бәс Јеһоваја иманыны мөһкәм сахламаға она нә көмәк етди?

⁷ Руһани ишләрдән галмајын. Бу, Папуа-Јени Гвинејадан олан Шерли b баҹыја чәтинликләрә дөзмәјә көмәк етмишди. Шерлинин аиләси чох касыб иди, һәтта елә вахтлар олурду ки, гарындолусу јемәјә чөрәкләри олмурду. Гардашы онун Јеһоваја етибарыны сарсытмаға чалышырды. О белә дејирди: «Бәс дејирдин Аллаһ сизә көмәк едир? Һаны? Аҹындан өлүрсүнүз. Вахтыны бош  јерә тәблиғә сәрф едирсән». Шерли етираф едир: «Бәзән мәндә белә суал јаранырды: “Ҝөрәсән, Јеһова бизә көмәк едир?” Онда о дәгигә Јеһоваја дуа едирдим вә ағлымдан кечән бүтүн фикирләри Јеһоваја дејирдим. Мүгәддәс Китабы вә нәшрләримизи охумаға давам едирдим. Тәблиғдә вә јығынҹаг ҝөрүшләриндә мүнтәзәм иштирак едирдим». Гыса мүддәт сонра Шерли баша дүшдү ки, әслиндә, Јеһова онларын аиләсинин гејдинә галыр. Һәлә индијә гәдәр онлар аҹ галмајыблар вә хошбәхтдирләр. Шерли дејир: «Јеһованын дуаларымы ҹавабсыз гојмадығыны ҝөрдүм» (1 Тим. 6:6—8). Әҝәр сиз дә руһани ишләрдән галмасаныз, нә чәтинлик, нә дә шүбһә сизи Јеһовадан ајырмајаҹаг.

8. Бәзән мәсул гардашларымыз нә илә үзләширләр?

⁸ Әлејһдарларымыз медиа вә сосиал шәбәкәләр васитәсилә Јеһованын тәшкилатындакы мәсул гардашлар һаггында јалан, јахуд тәһриф олунмуш мәлуматлар јајырлар (Зәб. 31:13). Бәзи гардашларымыз һәбс олунуб вә ҹинајәткар кими мәһкум едилиб. Бу бизим иманымызы сынаја биләр. Һәвари Булус һагсыз јерә иттиһам олунуб, һәбс олунанда биринҹи әсрдәки мәсиһиләр дә ејни вәзијјәтлә үзләшмишдиләр. Һәмин вахт онлар неҹә даврандылар?

9. Һәвари Булус һәбсдә оларкән бәзи мәсиһиләр нә етдиләр?

⁹ Булус Ромада һәбсдә оланда бәзи мәсиһиләр она дәстәк олмадылар (2 Тим. 1:8, 15). Ҝөрәсән нәјә ҝөрә? Бәлкә дә, ҹамаат Булуса ҹинајәткар кими бахырды дејә бундан утанырдылар, ја да горхурдулар ки, бирдән онлар да тәгиб олунар (2 Тим. 2:8, 9). Сәбәб һәр нә олса да, тәсәввүр етмәк олар, Булус неҹә пис олмушду. О, онлардан өтрү чохлу әзијјәтләрә гатлашмышды, һәтта һәјатыны тәһлүкәјә атмышды (Һәв. 20:18—21; 2 Кор. 1:8). Ҝәлин биз Булусу дар ҝүндә атан о инсанлара охшамајаг! Бәс мәсул гардашлар тәгиб олунанда биз нәји унутмамалыјыг?

10. Мәсул гардашлар тәгиб олунанда нәји унутмамалыјыг вә нә үчүн?

 ¹⁰ Тәгибләримизин сәбәбини вә бунун архасында кимин дурдуғуну унутмајын. 2 Тимутијә 3:12 ајәсиндә дејилир: «Мәсиһ Исанын шаҝирди кими мөмин һәјат сүрмәк истәјәнләрин һамысы тәгиб олунаҹаг». Демәли, Шејтанын мәсул гардашларымызы һәдәф алмасы бизи тәәҹҹүбләндирмәмәлидир. Шејтан бунунла һәм онларын иманыны сарсытмаг, һәм дә бизләри горхуја салмаг истәјир (1 Бут. 5:8).

11. Онисифордан нә өјрәнирик? (2 Тимутијә 1:16—18).

¹¹ Гардашлара дәстәк олун вә онлара вәфалы галын. (2 Тимутијә 1:16—18 ајәләрини охујун.) Булус һәбс олунанда Онисифор адлы гардаш тамамилә башга ҹүр давранмышды. О, Булусун һәбсдә олмасындан утанмырды, әксинә, Булусу ахтарыб тапды вә она әлиндән ҝәлән көмәји ҝөстәрди. Һәтта Онисифор бунунла өз һәјатыны тәһлүкәјә атмышды. Бундан нә өјрәнирик? Мәсул гардашларымыз тәгиб олунанда биз инсан горхусуна гапылмамалыјыг, нә дә ки онлардан көмәк әлимизи чәкмәмәлијик. Әксинә, онларын мүдафиәсиндә дурмалыјыг вә онларын дадына чатмалыјыг (Мәс. 17:17). Онларын бизим мәһәббәтимизә вә дәстәјимизә еһтијаҹы вар.

12. Русијадакы баҹы-гардашлардан нә өјрәнирик?

¹² Русијадакы баҹы-гардашлар һәбсдә олан диндашларына дајаг олмагда ҝөзәл нүмунәдир. Киминсә мәһкәмә иши оланда чохлу баҹы-гардаш мәһкәмә залына ҝәлиб онлара дајаг олур. Бундан нә өјрәнирик? Мәсул гардашларымыза гара јахыланда, онлар һәбс олунанда вә ја тәгиб олунанда горхуја дүшмәјин. Онлар үчүн дуа един, аилә үзвләринин гејдинә галын вә мүхтәлиф јолларла онлара дәстәк олун (Һәв. 12:5; 2 Кор. 1:10, 11).

13. Ришхәндләр Јеһоваја вә Онун тәшкилатына етибарымызы неҹә сарсыда биләр?

¹³ Бәзән иманда олмајан гоһумларымыз, иш вә мәктәб јолдашларымыз тәблиғ етдијимизә ҝөрә, јахуд Јеһованын јүксәк әхлаг нормаларына ујғун јашадығымыза ҝөрә бизи әлә салырлар (1 Бут. 4:4). Онлар белә сөзләр дејирләр: «Јахшы инсансан, амма һејиф ки, бу диндәсән. Сизин дининиздә чох гадағалар вар. Индики дөврдә белә јашамаг мүмкүн дејил». Јахуд јығынҹагдан кәнаредилмә тәдбирини гынајараг белә дејирләр: «Бу, инсафсызлыгдыр, мәһәббәтиниз һарада галды?» Белә сөзләр үрәјимизә шүбһә тохуму сәпә биләр. Биздә белә фикирләр јарана биләр: «Бәлкә, доғрудан да, Јеһова чох тәләбкардыр вә тәшкилатда гајда-ганунлар чох сәртдир». Белә вәзијјәтләрлә үзләшәндә сизә Јеһовадан вә Онун тәшкилатындан узаглашмамаға нә көмәк едә биләр?

14. Кимсә бизә Јеһованын ганунларына бағлы галдығымыза ҝөрә ришхәнд едәндә буна неҹә јанашмалыјыг? (Зәбур 119:50—52).

¹⁴ Јеһованын гајда-ганунларына бағлы галын. Әјјуб тәнәләрә мәруз галса да, Јеһованын ганунларына бағлы галмышды. Әјјубун сахта достлары ону инандырмаг истәјирдиләр ки, Аллаһын гајда-ганунларына ујғун јашамағын Аллаһ үчүн һеч бир әһәмијјәти јохдур (Әјј. 4:17, 18; 22:3). Амма Әјјуб бу ҹүр јаланлара алданмады. О, Јеһованын доғруја вә јанлыша даир нормаларынын дүзҝүн олдуғуну билирди вә онлара бағлы галмаға әзмли иди. Ким нә десә дә, Әјјуб Јеһоваја садиг галды (Әјј. 27:5, 6). Бундан нә өјрәнирик?  Киминсә ришхәндли сөзләринә ҝөрә Јеһованын гајда-ганунларына шүбһә етмәјин. Өз һәјатыныза нәзәр салын. Мәҝәр Јеһованын бујругларынын доғрулуғуна вә сизин хејринизә олдуғуна дәфәләрлә шаһид олмамысыныз? Вар ҝүҹүнүзлә чалышын ки, Јеһованын гајда-ганунларына бағлы галан тәшкилатдан узаглашмајасыныз. Онда ким сизи лаға гојурса-гојсун, Јеһовадан ајрылмајаҹагсыныз. (Зәбур 119:50—52 ајәләрини охујун.)

15. Бризит баҹыја нә үчүн ришхәнд едирдиләр?

¹⁵ Ҝәлин Һиндистандан олан Бризит адлы баҹынын һадисәсинә бахаг. Аилә үзвләри баҹыја әгидәсинә ҝөрә лағ едирди. Бризит баҹы 1997-ҹи илдә вәфтиз олунмушду. Әри онун иманына шәрик дејилди. Баҹынын вәфтизиндән гыса мүддәт сонра әри ишини итирди. Буна ҝөрә дә әри гәрара ҝәлди ки, Бризити вә гызларыны ҝөтүрүб валидејнләринин јанына көчсүн. Орада Бризитин чәтинликләри даһа да артды. Әри ишсиз олдуғуна ҝөрә аиләни доландырмаг үчүн баҹы бүтүн ҝүнү ишләмәли олду. Үстәлик, көчдүкләри шәһәрә ән јахын јығынҹаг 350 километр узагда иди. Бир тәрәфдән дә, әринин гоһумлары баҹыны иманына ҝөрә чох инҹидирди. Вәзијјәт о һәддә чатды ки, Бризитҝил јенидән көчмәли олду. Амма сонра гәфил јолдашы вәфат етди. Бу һадисәдән сонра исә баҹынын 12 јашлы гызы хәрчәнҝдән һәјатыны итирди. Бүтүн бунлар азмыш кими, гоһумлары баш верәнләрә ҝөрә Бризити ҝүнаһландырырдылар. Дејирдиләр ки, әҝәр о, Јеһованын Шаһиди олмасајды, бүтүн бу фаҹиәләр баш вермәзди. Буна бахмајараг, баҹынын Јеһоваја етибары итмәди вә Онун тәшкилатындан узаглашмады.

16. Бризит Јеһоваја вә Онун тәшкилатына бағлы галдығы үчүн һансы мүкафатлары алды?

¹⁶ Бризит јығынҹагдан узагда јашадығы үчүн рајон нәзарәтчиси она мәсләһәт ҝөрдү ки, јашадығы әразидә тәблиғ етсин вә өз евиндә јығынҹаг кечирсин. Әввәл-әввәл она елә ҝәлирди ки, бу ишин өһдәсиндән ҝәлә билмәјәҹәк. Амма Бризит баҹы верилән мәсләһәтә әмәл етди. О, хош хәбәри тәблиғ едирди, евиндә ибадәт ҝөрүшләри  кечирирди вә гызлары илә аиләви ибадәт кечирмәк үчүн һәмишә вахт ајырырды. Бәс нәтиҹә нә олду? О, хејли адамла Мүгәддәс Китаб дәрсинә башлады, һәтта онлардан бәзиләри вәфтиз олунду. 2005-ҹи илдә баҹы өнҹүл хидмәтинә башлады. Онун Јеһоваја етибары вә тәшкилата сәдагәти мүкафатсыз галмады. Һал-һазырда гызлары сәдагәтлә Јеһоваја хидмәт едирләр. Һәмин әразидә исә ики јығынҹаг вар! Бризит бүтүн гәлби илә әминдир ки, јашадығы чәтинликләрә вә гоһумларынын ришхәндләринә Јеһованын вердији ҝүҹ сајәсиндә таб ҝәтириб.

17. Нәјә әзмли олмалыјыг?

¹⁷ Шејтан истәјир ки, проблемләримиз заманы Јеһованын бизи тәрк етдијинә инанаг вә тәшкилатында олмағымызын һәјатымызы чәтинләшдирдијини дүшүнәк. Мәсул гардашлара бөһтан атыланда, онлар тәгиб олунанда вә һәбс олунанда Шејтанын мәгсәди бизи горхуја салмагдыр. Һәмчинин о, ришхәндләр васитәсилә бизим Јеһованын гајда-ганунларына вә тәшкилатына етибарымызы сарсытмаг истәјир. Амма биз онун фәндләриндән аҝаһыг вә о бизи алдада билмәз (2 Кор. 2:11). Нә олурса олсун, Јеһоваја, Онун тәшкилатына садиг галын вә Шејтанын јаланларына ујмајын! Унутмајын, Јеһова һеч вахт сизи атмајаҹаг (Зәб. 28:7). Гој һеч нә сизи Јеһовадан ајырмасын! (Ром. 8:35—39).

18. Нөвбәти мәгаләдә нә һагда данышаҹағыг?

¹⁸ Биз бу мәгаләдә јығынҹагдан хариҹдә үзләшдијимиз чәтинликләрдән данышдыг. Амма ола биләр ки, јығынҹаг дахилиндә дә мүәјјән вәзијјәтләр јарансын вә бу заман Јеһоваја вә тәшкилатына садиглијимиз сынансын. Нөвбәти мәгаләдә өјрәнәҹәјик ки, бу вәзијјәтләрдә Јеһовадан ајрылмамаға бизә нә көмәк едә биләр.