1. «Ајыг олмаг» нә демәкдир? (2 Тимутијә 4:5).

 БИЗИ мәјус едән вәзијјәтләрлә үзләшәндә Јеһоваја вә Онун тәшкилатына садиглијимиз сынана биләр. Белә вәзијјәтдә нә едә биләрик? Биз һәр шејдә ајыг олмалы вә ојаг галыб, иман јолунда дәјанәтли олмалыјыг. (2 Тимутијә 4:5 ајәсини охујун.) «Ајыг олмаг» о демәкдир ки, биз сакитлијимизи горумалыјыг, ајдын дүшүнмәлијик, вәзијјәтә Јеһованын нәзәри илә бахмалыјыг. Онда дүшүнҹәләримизә һиссләримиз һаким кәсилмәјәҹәк.

2. Бу мәгаләдә нә һагда данышаҹағыг?

² Әввәлки мәгаләдә јығынҹагдан хариҹдә үзләшә биләҹәјимиз үч чәтинликдән данышдыг. Бу мәгаләдә исә јығынҹаг дахилиндә Јеһоваја сәдагәтимизи сынајаҹаг вәзијјәтләрдән данышаҹағыг. Бунлар һансы вәзијјәтләрдир? 1) Диндашымызын бизә гаршы һагсызлыг етмәси, 2) ҹәза алмағымыз, 3) тәшкилатдан ҝәлән дәјишикликләрә ујғунлашмағын чәтин ҝәлмәси. Ҝәлин ҝөрәк, бу ҹүр вәзијјәтләрлә үзләшәндә ајыг олмаг вә Јеһоваја сәдагәтимизи горумаг үчүн нә едә биләрик.

3. Диндашымызын бизә һагсызлыг етдијини дүшүнәндә һансы һиссләри кечирә биләрик?

³ Һеч олуб ки, һансыса диндашыныз, хүсусилә дә мәсул гардаш сизә гаршы һагсызлыг етсин? Јәгин ки, гардашын нијјәти сизи инҹитмәк олмајыб (Ром. 3:23; Јаг. 3:2). Амма ола билсин, онун давранышы сизин гәлбинизә дәјиб. Һәтта буна ҝөрә јухунуз әршә чәкилиб. Бәлкә дә, ағлыныза белә фикирләр ҝәлиб: «Гардаш неҹә белә даврана биләр? Бу неҹә Аллаһын тәшкилатыдыр?» Шејтан бизим белә дүшүнмәјимизи истәјир (2 Кор. 2:11). Бејнимиздә белә мәнфи фикирләр олса, биз Јеһовадан  вә Онун тәшкилатындан узаглашарыг. Бәс бу заман ајыг галмаға вә јанлыш фикирләри дәф етмәјә бизә нә көмәк едә биләр?

4. Һагсызлыгла үзләшәндә Јусиф сајыглығыны неҹә горуду вә биз ондан нә өјрәнирик? (Јарадылыш 50:19—21).

⁴ Кинә вә һиддәтә јол вермәјин. Јусиф јенијетмә јашларында оланда бөјүк гардашлары онунла пис давранырдылар. Она нифрәт едирдиләр, һәтта бәзи гардашлары ону өлдүрмәк истәјирди (Јар. 37:4, 18—22). Ахырда онлар Јусифи гул кими сатдылар. Бунун да нәтиҹәсиндә Јусиф тәхминән 13 ил ағыр чәтинликләрлә үзләшди. Јусиф Јеһованын ону севдијинә шүбһә едә биләрди. О дүшүнә биләрди ки, дарда оланда Јеһова ону атыб. Анҹаг Јусиф јол вермәди ки, гәлбиндә кин, һиддәт баш галдырсын. О, сакитлијини горуду, бунун да сајәсиндә сајыглығыны итирмәди. Гардашларындан гисас алмаг үчүн әлинә фүрсәт дүшсә дә, Јусиф онлардан һејиф чыхмады. Әксинә, онлара мәһәббәт ҝөстәрди, онлары бағышлады (Јар. 45:4, 5). Јусиф ајдын дүшүнә билдији үчүн белә давранды. О, фикрини өз проблемләринә ҹәмләмәмишди. О, вәзијјәтә ҝениш бахырды, Јеһованын ирадәсини нәзәрә алырды. (Јарадылыш 50:19—21 ајәләрини охујун.) Ондан нә өјрәнирик? Әҝәр кимсә сизә һагсызлыг едибсә, гојмајын үрәјиниздә Јеһоваја гаршы гәзәб јарансын, јахуд Онун сизи тәрк етдији фикрини ағлыныза ҝәтирмәјин. Әксинә, Јеһованын үзләшдијиниз сынаға дөзмәјә неҹә көмәк етдијини ҝөрмәјә чалышын. Һәмин инсана ҝәлдикдә исә ону бағышлајын вә унутмајын ки, «мәһәббәт чохлу ҝүнаһын үстүнү өртүр» (1 Бут. 4:8).

5. Микеас һагсызлыгла үзләшдијини дүшүнсә дә, ајыглығыны неҹә горуду?

⁵ Ҝәлин Ҹәнуби Америкада ағсаггал кими хидмәт едән Микеас b гардашын һадисәсинә бахаг. Она елә ҝәлмишди ки, ағсаггаллар бир мәсәлә илә бағлы онунла чох рәһмсиз давраныблар. «Мән өмрүмдә белә стрес кечирмәмишдим. Өзүмә јер тапа билмирдим. Ҝеҹәләр ҝөзүмә јуху ҝетмирди. Ағламагдан башга әлимдән һеч нә ҝәлмирди»,— дејә о бөлүшүр. Амма Микеас ајыглығыны горуду вә өзүнү әлә алмаг үчүн вар ҝүҹү илә чалышды. О, тез-тез Јеһоваја дуа едирди, Ондан мүгәддәс руһ, дөзмәјә ҝүҹ истәјирди. Һәмчинин нәшрләримиздән она көмәк едәҹәк фикирләр ахтарырды. Микеас гардашдан нә өјрәнирик? Әҝәр диндашынызын сизә гаршы һагсызлыг етдијини дүшүнүрсүнүзсә, сакитлијинизи горујун, мәнфи һиссләринизи ҹиловлајын. Һәмчинин нәзәрә алын ки, биз һәмин инсанын сөзләринин вә һәрәкәтләринин сәбәбини там билә билмәрик. Белә вәзијјәтләрлә үзләшәндә Јеһоваја дуа един. Хаһиш един ки, вәзијјәтә һәмин инсан тәрәфдән бахмағыныза көмәк етсин. Онда диндашынызын сизи гәсдән инҹитмәдијини, нијјәтинин пис олмадығыны дүшүнмәк даһа асан олаҹаг вә онун сәһвинин үстүндән кечә биләҹәксиниз (Мәс. 19:11). Унутмајын ки, Јеһова сизин вәзијјәтиниздән аҝаһдыр вә сизә дөзмәјә ҝүҹ верәҹәк (2 Салн. 16:9; Ваиз 5:8).

6. Ҹәзаја Јеһованын мәһәббәтинин ифадәси кими бахмаг нәјә ҝөрә ваҹибдир? (Ибраниләрә 12:5, 6, 11).

⁶ Ҹәза алмаг инсана емосионал ҹәһәтдән ағыр ҝәлир. Әҝәр биз диггәтимизи јалныз һиссләримизә ҹәмләсәк, һагсыз јерә вә ја сәрт шәкилдә ҹәзаландығымызы дүшүнәрик вә беләҹә, бизә верилән тәрбијәнин әһәмијјәтини кичилдәрик. Белә етсәк,  чох ваҹиб бир шеји — ҹәзанын Јеһованын мәһәббәтинин ифадәси олдуғуну нәзәрдән гачырарыг. (Ибраниләрә 12:5, 6, 11 ајәләрини охујун.) Бу заман һиссләрә гапылсаг, Шејтан бу вәзијјәтдән истифадә едәр. О истәјир ки, биз тәрбијәни рәдд едәк. Ән бетәри исә Јеһовадан вә јығынҹагдан узаглашаг. Бәс ҹәза алмысынызса, ајыглығы горумаға сизә нә көмәк едә биләр?

7. а) Шәкилдә ҝөрүндүјү кими, Бутрус тәнбеһи гәбул едәндән сонра Јеһованын иши үчүн неҹә јарарлы олду? б) Бутрусун һадисәсиндән нә өјрәндиниз?

⁷ Тәнбеһи гәбул едиб, лазыми дәјишикликләр един. Иса Мәсиһ бир нечә дәфә һәвари Бутрусу башга һәвариләрин гаршысында тәнбеһ етмишди (Марк 8:33; Лука 22:31—34). Јәгин, Бутрус һәмин вахт чох хәҹаләт чәкмишди. Буна бахмајараг, о, Иса Мәсиһә садиг галды. О, тәнбеһи гәбул етди вә өз сәһвиндән нәтиҹә чыхартды. Јеһова да Бутруса сәдагәтинә ҝөрә мүкафат верди вә она јығынҹагда ваҹиб мәсулијјәтләр һәвалә олунду (Јәһ. 21:15—17; Һәв. 10:24—33; 1 Бут. 1:1). Һәвари Бутрусдан нә өјрәнирик? Тәнбеһ олундуғумуза ҝөрә утансаг да, јахшы олар ки, диггәтимизи кечирдијимиз һиссләрә ҹәмләмәјәк. Әксинә, ҹәзаны гәбул едиб, лазыми дүзәлишләр едәк. Бу һәм өз хејримизә олаҹаг, һәм дә башгаларынын. Белә етсәк, Јеһованын иши үчүн даһа чох јарарлы олаҹағыг.

8, 9. Бернардо ҹәзаландығына ҝөрә әввәл-әввәл һансы һиссләри кечирирди, бәс сонра дүшүнҹәсинә неҹә дүзәлиш етди?

⁸ Ҝәлин Мозамбикдән олан Бернардо адлы бир гардашын башына ҝәләнләрдән данышаг. О, ағсаггал тәјинатындан азад олунмушду. Гардаш әввәл-әввәл өзүнү чох пис һисс едирди. О дејир: «Чох инҹимишдим, чүнки алдығым ҹәзаны һагсызлыг һесаб едирдим». Бернардо нараһат иди ки, јығынҹагдакы баҹы-гардашларын ҝөзүндән дүшәҹәк. О әлавә едир: «Ҹәзанын наһаг јерә верилмәдијини баша дүшмәјә вә Јеһоваја, Онун тәшкилатына јенидән етибар етмәјә мәнә бир нечә ај лазым ҝәлди». Бернардоја вәзијјәтә дүзҝүн јанашмаға нә көмәк етди?

⁹ Бернардо дүшүнҹәсини дәјишди. О дејир: «Мән ағсаггал оланда баҹы-гардашлара Ибраниләрә 12:7 ајәсини охујурдум вә бу ајә әсасында онлара Јеһованын вердији тәрбијәјә д үзҝүн јанашмаға көмәк едирдим. Инди мән өзүмдән сорушурам:  “Бу ајәни ким тәтбиг етмәлидир?” Бүтүн Јеһованын Шаһидләри, ичи мән гарышыг». Сонра Бернардо Јеһоваја вә Онун тәшкилатына етибарыны мөһкәмләндирмәк үчүн башга аддымлар атды. О, мүнтәзәм олараг Мүгәддәс Китабы охумаға вә онун үзәриндә дәриндән дүшүнмәјә даһа чох вахт ајырырды. Һәмчинин о, баҹы-гардашларын онун һаггында нә дүшүндүјүнә ҝөрә нараһат олса да, хидмәтдә онларла әмәкдашлыг едирди, јығынҹагларда шәрһләр верирди. Бир мүддәтдән сонра Бернардо јенидән ағсаггал кими тәјин олунду. Әҝәр сиз дә Бернардо кими ҹәза алдығыныза ҝөрә утанырсынызса, һиссләрә гапылмајын, мәсләһәти гәбул един вә лазыми дүзәлишләр един c (Мәс. 8:33; 22:4). Әҝәр белә етсәниз, әмин олун ки, Јеһова Она вә тәшкилатына садиглијинизи мүкафатсыз гојмајаҹаг.

10. Бәзи исраиллиләрин садиглији неҹә сынанды?

¹⁰ Тәшкилатда олан дәјишикликләр бизим сәдагәтимизи сынаја биләр. Һәтта еһтијатлы олмасаг, Јеһовадан узаглашарыг. Мәсәлән, Јеһова Муса пејғәмбәрә Ганун вермәздән әввәл Исраилдә каһин вәзифәсини аилә башчылары иҹра едирди. Онлар гурбанҝаһ тикирдиләр вә аиләләринин адындан Јеһоваја гурбан тәгдим едирдиләр (Јар. 8:20, 21; 12:7; 26:25; 35:1, 6, 7; Әјј. 1:5). Амма Ганун вериләндән сонра бунунла бағлы бәзи дәјишикликләр олду. Јеһова гурбан тәгдим етмәк үчүн Һарун нәслиндән каһинләр тәјин етди. Буна ҝөрә дә артыг аилә башчылары бу мәсулијјәти иҹра едә билмәздиләр. Ишдир, кимсә буна ҹәһд етсәјди, һәјатыны итирә биләрди d (Лав. 17:3—6, 8, 9). Бәлкә дә, Гарун, Датан, Абирам вә 250 иҹма башчысы елә буна ҝөрә Мусанын вә Һарунун рәһбәрлијинә гаршы чыхмышды (Сај. 16:1—3). Дәгиг дејә билмәрик. Һәр неҹә олса да, онлар Јеһоваја садиг галмадылар. Бәс тәшкилатда олан дәјишикликләр бизим сәдагәтимизи сынајанда нә едә биләрик?

11. Кәһат оғулларындан олан бәзи лавилиләрдән нә өјрәнирик?

¹¹ Тәшкилати дәјишикликләри үрәкдән дәстәкләјин. Сәһрада олдуглары мүддәтдә Кәһат оғулларынын мүһүм мәсулијјәтләри вар иди. Һәр дәфә исраиллиләр јола дүшәндә онлар Әһд сандығыны халгын өнүндә апарырдылар (Сај. 3:29, 31; 10:33; Јуш. 3:2—4). Бу, чох шәрәфли мәсулијјәт иди. Амма исраиллиләр Вәд едилмиш дијарда мәскунлашандан сонра вәзијјәт дәјишди. Даһа Әһд сандығыны мүнтәзәм дашымаг лазым ҝәлмәди. Белә ки, Сүлејман тахта чыхдығы дөврә гәдәр артыг кәһатлылара башга ишләр һәвалә олунмушду. Онлардан кимиси мәзмур охујан иди, кимиси дарваза кешикчиси иди, кимиси дә анбарда ишләјирди (1 Салн. 6:31—33; 26:1, 24). Һеч јердә јазылмајыб ки, кәһатлылар индики ишләриндән шикајәтләнсинләр, јахуд даһа јүксәк вәзифә тәләб етсинләр. Бу һадисәдән нә өјрәнирик? Јеһованын тәшкилатынын етдији дәјишикликләри вә һәтта сизин тәјинатыныза тәсир едән дәјишикликләри үрәкдән дәстәкләјин. Сизә верилән истәнилән тәјинаты севинҹлә иҹра един. Унутмајын ки, сизин Јеһованын ҝөзүндә дәјәриниз тәјинатынызла өлчүлмүр. Јеһова үчүн сизин итаәткарлығыныз  иҹра етдијиниз истәнилән тәјинатдан даһа гијмәтлидир (1 Ишм. 15:22).

12. Заинанын Бејтел хидмәти дајананда о һансы һиссләри кечирмишди?

¹² Ҝәлин Јахын Шәргдә јашајан Заина адлы баҹынын һадисәсинә бахаг. О, 23 илдән артыг Бејтелдә хидмәт етмишди. Бу хидмәт баҹы үчүн чох әзиз иди. Амма сонра о, саһәјә тәјин олунду. Заина дејир: «Тәјинатым дәјишдијинә ҝөрә чох сарсылмышдым. Өзүмү лазымсыз һисс едирдим. Өзүм-өзүмдән сорушурдум: “Ҝөрәсән, нәји дүз етмәмишәм?”» Бу, азмыш кими, бир тәрәфдән дә јығынҹагдакы баҹы-гардашлар өз сөзләри илә ону јаралајырдылар. Әфсуслар олсун ки, онлар баҹыја белә дејирдиләр: «Әҝәр јахшы олсајдын, сәни орада сахлајардылар». Бир мүддәт о, елә пәришан һалда иди ки, һәр ҝеҹә ағлајырды. Амма о дејир: «Мән зәррә гәдәр дә јол вермәдим ки, тәшкилата вә Јеһованын мәһәббәтинә мәндә шүбһә јарансын». Нәјин сајәсиндә Заина ајыглығыны горуја билди?

13. Заина бәдбин фикирләрә неҹә үстүн ҝәлди?

¹³ Заина бәдбин фикирләрә үстүн ҝәлди. О, буна неҹә наил олду? Заина нәшрләримиздән өз вәзијјәтинә ујғун мәгаләләр охујурду. «Ҝөзәтчи гүлләси» журналынын 2001-ҹи ил 1 феврал сајында олан «Мәјуслуға үстүн ҝәлә биләрсиниз!» адлы мәгаләнин она бөјүк көмәји дәјди. Һәмин мәгаләдә Мүгәддәс Китабын јазарларындан бири олан Маркын нүмунәси ҝәтирилмишди. Гејд олунмушду ки, тәјинаты дәјишдијинә ҝөрә, ола билсин, Марк да мәјус олмушду. Заина дејир: «Маркын нүмунәси мәјуслуғумун өһдәсиндән ҝәлмәјә көмәк едән бир дәрман кими олду». Һәм дә Заина өзүнү достларындан тәҹрид етмәди, тәклијә чәкилмәди вә өзүнү јазыгламады. О өзүнә хатырлатды ки, тәшкилаты Јеһованын руһу идарә едир вә о, мәсул гардашлар үчүн гијмәтлидир. О һәмчинин анлајырды ки, тәшкилат үчүн ән үмдә мәсәлә Јеһованын ишини ән јахшы шәкилдә иҹра етмәк олмалыдыр.

14. Владо гардаша һансы дәјишиклијә ујғунлашмаг чәтин иди, бәс она бу саһәдә нә көмәк етди?

¹⁴ Словенијада ағсаггал кими хидмәт едән 73 јашлы Владо гардаш исә башга бир вәзијјәтлә үзләшмишди. Онун олдуғу јығынҹаг башга бир јығынҹагла бирләшдирилди вә онларын истифадә етдији ибадәт еви бағланды. Владо гардаш дејир: «Мән баша дүшә билмирдим ки, нәјә ҝөрә бу ҝөзәлликдә  ибадәт еви даһа истифадә олунмајаҹаг. Чох пис олмушдум. Чүнки ибадәт евини тәзәҹә тәмир етмишдик. Һәм дә дүлҝәр олдуғум үчүн ора өз әлләримлә бир нечә мебел дүзәлтмишдим. Үстәлик, јығынҹаглар бирләшдији үчүн чох шеј дәјишди. Мәним кими јашлы тәблиғчиләрә исә буна ујғунлашмаг чәтин иди». Верилән ҝөстәришләрә табе олмаға Владоја нә көмәк етди? О дејир: «Тәшкилатдан ҝәлән ҝөстәришләрә ујғунлашмаг һеч вахт мүкафатсыз галмыр. Бу дәјишикликләр бизи гаршыда олаҹаг даһа бөјүк дәјишикликләрә һазырлајыр». Бәс сиз јығынҹағын бирләшмәси вә ја тәјинатын дәјишмәси кими вәзијјәтләрлә үзләшмисиниз? Бу дәјишикликләрә ујғунлашмаг сизин үчүн чәтиндир? Әмин олун ки, Јеһова сизин һиссләринизи баша дүшүр. Бу ҹүр дәјишикликләри дәстәкләсәниз, һәмчинин Јеһоваја вә Онун тәшкилатына садиг галсаныз, Јеһова буну әвәзсиз гојмајаҹаг (Зәб. 18:25).

15. Јығынҹагдахили чәтинликләрлә үзләшәндә ајыглығымызы неҹә горуја биләрик?

¹⁵ Шејтан системинин сонуна јахынлашдыгҹа јығынҹаг дахилиндә чәтинликләрин олмасы гачынылмаздыр. Бу ҹүр чәтинликләр бизим Јеһоваја садиглијимизи сынаја биләр. Буна ҝөрә дә һәр шејдә ајыг олмалыјыг. Әҝәр диндашынызын сизинлә һагсыз даврандығыны дүшүнүрсүнүзсә, инҹик галмајын. Ҹәза алдығыныза ҝөрә утансаныз да, чалышын, тәрбијәни гәбул едиб дәјишәсиниз. Әҝәр Јеһованын тәшкилатындакы дәјишикликләр сизә дә аиддирсә, верилән ҝөстәриши үрәкдән гәбул едиб, она ујғун давранын.

16. Јеһоваја вә Онун тәшкилатына етибарынызы неҹә горуја биләрсиниз?

¹⁶ Сизә чәтин ҝәлән вәзијјәтлә үзләшәндә Јеһоваја вә Онун тәшкилатына етибарынызы горумағы баҹарарсыныз. Бунун үчүн сиз һәр шејдә ајыг олмалысыныз, јәни сакитлијинизи горумалысыныз, ајдын дүшүнмәлисиниз вә вәзијјәтә Јеһова кими бахмалысыныз. Мүгәддәс Китабдан сизинкинә бәнзәр вәзијјәтләрин өһдәсиндән ҝәлән мөмин инсанларын һадисәләрини охујун вә онларын нүмунәси үзәриндә дүшүнүн. Дуа едиб Јеһовадан көмәк истәјин. Өзүнүзү диндашларыныздан һеч вахт тәҹрид етмәјин. Бу мәсләһәтләрә әмәл етсәниз, ҝәләҹәкдә нә баш верирсә-версин, Шејтан сизи Јеһовадан вә Онун тәшкилатындан ајырмаға мүвәффәг олмајаҹаг (Јаг. 4:7).