Мән 1934-ҹү илдә дүнјаја ҝөз ачмышам. Валидејнләрим, Фред вә Една Молоһан артыг 20 ил иди ки, Мүгәддәс Китаб Тәдгигатчылары (Јеһованын Шаһидләри) идиләр. Чох миннәтдарам ки, онлар мәнә Јеһоваја мәһәббәт ашылајыблар. Биз Канзас штатынын ҹәнуб-шәргиндә јерләшән Парсонс адлы кичик бир шәһәрдә јашајырдыг. Ҝетдијимиз јығынҹағын демәк олар ки, бүтүн үзвләри мәсһ олунмуш мәсиһиләр иди. Аиләмиз мүнтәзәм шәкилдә јығынҹаг ҝөрүшләриндә вә тәблиғ ишиндә иштирак едирди. Адәтән шәнбә ҝүнләри ҝүнорта вахты күчә тәблиғи едирдик, о вахт иҹтимаи шаһидлији белә адландырырдыг. Бәзән јорулурдуг. Амма тәблиғдән сонра атам һәмишә бизи дондурма јемәјә апарырды.

Ҝетдијимиз кичик јығынҹағын тәблиғ әразиси бөјүк иди, бура бир нечә балаҹа шәһәр вә чохлу фермалар дахил иди. Фермерләрә тәблиғ едәндә онлар адәтән нәшрләримизин мүгабилиндә пул јеринә тәрәвәз, јумурта, дири тојуг верирдиләр. Атам нәшрләримизин пулуну әввәлҹәдән өдәдијинә ҝөрә әлимиздә чох пул галмырды. Бу әрзаглар доланышығымыза көмәк едирди.

Валидејнләрим тәблиғ үчүн патефон алмышдылар. Онлар тәкрар сөһбәтләрдә вә Мүгәддәс Китаб дәрсләриндә Ҹозеф Рутерфорд гардашын нитгләрини сәсләндирирдиләр. Мән балаҹа олдуғума ҝөрә патефону гоша билмирдим, амма атамла анама көмәк еләмәк хошума ҝәлирди.

Атам 1936-ҹы илин «Форд» маркалы машынынын үстүнә бөјүк сәсҝүҹләндириҹи гурашдырмышды. Сәсли машын адландырдығымыз бу машын Падшаһлыг хәбәринин јајылмасында чох еффектив иди. Адәтән, инсанларын диггәтини чәкмәк үчүн әввәлҹә  мусиги сәсләндирир, сонра исә Мүгәддәс Китаба әсасланан нитг гошурдуг. Нитгин сонунда марагланан инсанлара әдәбијјат тәклиф едирдик.

Бир дәфә Канзасын кичик шәһәри олан Черивејлдә атам машыны базар ҝүнләри чох адамын истираһәт етдији паркда сахламышды. Онда полис әмәкдашы атама јахынлашыб демишди ки, сәсли машыны јалныз паркдан кәнарда сахлаја биләр. Атам етираз етмәдән машыны паркла үзбәүз күчәјә сүрмүшдү. Инсанлар орадан да һәр шеји раһат ешидә билирдиләр. Бу кими һадисәләр заманы атамын вә бөјүк гардашым Ҹерринин јанында олмағы хошлајырдым.

1930-ҹу илләрин сонунда хүсуси компанијаларда иштирак етмәјә башладыг. Биз әлејһдарларын чох олдуғу әразиләрдә гыса бир заманда һамыја тәблиғ етмәли идик. Јухарыда гејд етдијим кими, сүбһ ачылмамыш ојаныр вә буклетләри сакитҹә гапыларын алтындан ичәри итәләјирдик. Сонра һеч кимин полис тәрәфиндән јахаланмадығына әмин олмаг үчүн шәһәрдән кәнар бир јердә ҝөрүшүрдүк.

Һәмчинин һәмин илләр информасија јүрүшләри адландырдығымыз мараглы хидмәт нөвү вар иди. Падшаһлығы бәјан етмәк үчүн биз плакатлар тахыр вә бүтүн шәһәр боју јүрүш едирдик. Јадымдадыр, бир дәфә шәһәримиздә кечирилән јүрүшдә баҹы-гардашлар «Дин тәлә вә јаландыр» јазылы плакат тахмышдылар. Онлар евимиздән башлајыб шәһәрин ичи илә тәхминән 1,6 километр јол ҝедиб сонра ҝери гајытмышдылар. Хошбәхтликдән, бу јүрүш заманы һеч бир етиразла гаршылашмадылар, әксинә чохлары онлары марагла мүшаһидә едирди.

Топлантыларда иштирак етмәк үчүн чох вахт аиләликҹә Канзасдан Техаса ҝедирдик. Атам Миссури-Канзас-Техас дәмирјолунда ишләдији үчүн ҝедишһаггы өдәмәдән гоһумларымызы зијарәт едә вә топлантылара гатыла билирдик. Бөјүк дајым Фред Висмар вә јолдашы Јулели, Техасын Темпл шәһәриндә јашајырды. Дајым һәгигәти 1900-ҹү илләрдә, ҝәнҹ јашларында оланда өјрәнмиш вә вәфтиз олунмушду. Анам да дахил, бүтүн баҹылары һәгигәти ондан ешидиб. Дајым зонал хидмәтчи (буҝүнкү рајон нәзарәтчиси) олдуғу үчүн Техасдакы бүтүн баҹы-гардашлар ону јахшы таныјырды. О, чох меһрибан, дејиб-ҝүлән инсан иди. Дајым һәгигәт јолунда ҹан гојурду вә сөзсүз ки, онун нүмунәси ҝәнҹлик илләримдә мәнә ҝөзәл тәсир бағышламышды.

1941-ҹи илдә биз гатарла Миссури штатынын Сент-Луис шәһәринә бөјүк топлантыја јолландыг. Топлантыда бүтүн ушаглара тапшырылды ки, Ҹозеф Рутерфорд гардашын «Падшаһын өвладлары» мәрузәсини динләмәләри үчүн хүсуси сыраларда әјләшсинләр. Мәрузәнин сонунда ушаглары бөјүк сүрприз ҝөзләјирди. Ҹозеф Рутерфорд вә онун көмәкчиләри 15 000 ушағын һәр биринә хүсуси һәдијјә — «Ушаглар» адлы јени китаб тәгдим етдиләр.

1943-ҹү илин апрел ајында Канзас штатынын Кофивил шәһәриндә «Һәрәкәтә кечәк» адлы кичик, амма әламәтдар топланты кечирилди. Бүтүн јығынҹагларда јени мәктәбин — Теократик Хидмәт Мәктәбинин кечириләҹәји елан олунду. Һәмчинин бу мәктәбдә истифадә етмәк үчүн 52 дәрсдән ибарәт  јени китабча пајланды. Елә һәмин ил мән мәктәбдә илк тапшырыгла чыхыш етмишдим. Топлантыны мәним үчүн хүсуси едән бир сәбәб дә вар иди. Һәмин топлантыда мән ики нәфәрлә бирҝә јахынлыгдакы ферманын сојуг бир ҝөлүндә вәфтиз олундум.

1951-ҹи илдә орта мәктәби битирдикдән сонра ҝәләҹәјимлә бағлы бәзи гәрарлар вермәлијдим. Гардашым Ҹерри әввәлләр Бејтелдә хидмәт етмишди. Мәним дә ән бөјүк арзум Бејтелдә хидмәт етмәк иди, буна ҝөрә дә Бруклин филиалына әризә ҝөндәрдим. Чох кечмәмиш Бејтелә дәвәт олундум вә 1952-ҹи ил мартын 10-да хидмәтә башладым. Бу гәрарым Јеһоваја там хидмәт етмәк үчүн ҝөзәл имканлар ачды.

Чапханада ишләјиб, журналларын вә диҝәр нәшрләрин һазырланмасында иштирак етмәк истәјирдим. Амма мәнә чапханада ишләмәк нәсиб олмады. Мәни әввәлҹә офисиант, сонра мәтбәх ишчиси тәјин етдиләр. Севә-севә ҝөрдүјүм бу ишдә чох шеј өјрәндим. Мәтбәхин иш ҹәдвәлинин дәјишкән олмасы сајәсиндә ҝүн әрзиндә бош вахтым олурду. Чох вахт һәмин саатларда Бејтелин китабханасына ҝедиб мүталиә илә мәшғул олурдум. Бунун руһән бөјүмәјимдә вә иманымын мөһкәмләнмәсиндә бөјүк ролу олду. Һәмчинин гаршыма мәгсәд гојдум ки, Бејтелдә баҹардығым гәдәр узун мүддәт хидмәт едим. Ҹерри 1949-ҹу илдә Бејтел хидмәтини дајандырыб Патриша адлы баҹы илә аилә гурмушду. Онлар Бруклинә јахын јашајырдылар вә Бејтел хидмәтимин илк илләриндә мәнә чох дәстәк олдулар.

Бејтелә ҝәлмәјимдән гыса мүддәт сонра гардашлар Бејтелдән олан натигләрин сајыны артырмаг үчүн сечим апардылар. Сијаһыда олан гардашлары Бруклиндән 322 километр мәсафәдә јерләшән јығынҹаглары зијарәт едиб ачыг мәрузә илә чыхыш етмәјә вә баҹы-гардашларла хидмәтдә әмәкдашлыг етмәјә тәјин етдиләр. Сијаһыда мәним дә адым вар иди. Мән бөјүк һәјәҹанла јығынҹаглары зијарәт етмәјә вә мәрузәләр сөјләмәјә башладым. О вахтлар мәрузәләр бир саат давам едирди. Адәтән гатарла сәјаһәт едирдим. Индијә кими јадымдадыр, 1954-ҹү илин гыш ајы иди, базар ҝүнү ҝүнорта саатларында гатарла Нју-Јорка гајыдырдым. Ахшама Бејтелә чатмалыјдым. Амма јолда ҝүҹлү күләк әсмәјә, гар јағмаға башлады. Гатарын електрик мүһәррикиндә гысагапанма баш верди вә електрик кәсилди. Нәтиҹәдә Нју-Јорка базар ертәси сәһәр саат беш радәләриндә анҹаг ҝәлиб чата билдим. Орадан Бруклинә ҝедән метроја миниб дүз иш јеримә, мәтбәхә ҝетдим. Бир аз ҝеҹикмишдим, үстәлик бүтүн ҝеҹәни јата билмәдијимә ҝөрә чох јорғун идим. Амма баҹы-гардашлара хидмәт етмәјин вә чохлу јени достлар газанмағын ҝәтирдији севинҹ истәнилән әзијјәтләри унутдурурду.

Бејтел хидмәтимин илк илләриндә WBBR радиостансијасында јајымланан програмда иштирак етмәјә дәвәт алдым. Студија Колумбија Һајтс, 124 үнванындакы офисин икинҹи мәртәбәсиндә јерләширди. Мән һәр һәфтә јајымланан Мүгәддәс Китаб дәрси програмында иштирак едәнләрдән бири идим. Бејтел аиләсинин чохданкы үзвү олан Александр Макмиллан гардаш бу радио верилишләрдә мүнтәзәм олараг иштирак едирди. Өз арамызда ону Мак дејә чағырырдыг. Онун Јеһоваја сәдагәти бизләрә, Бејтел аиләсинин ҝәнҹ үзвләринә ҝөзәл өрнәк иди.

1958-ҹи илдә Ҝилад Мәктәби илә әмәкдашлыг етмәјә дәвәт алдым. Мәктәбин мәзунларынын виза мәсәләләри вә сәјаһәтләринин тәшкилијлә мәшғул олурдум. Һәмин илләрдә тәјјарә илә сәјаһәт чох баһа олдуғуна ҝөрә анҹаг бир нечә мәзун тәјјарә илә ҝедә билирди. Африкаја вә Узаг Шәргә тәјин олунанларын чоху јүк ҝәмиләри илә сәјаһәт едирди. Өзәл һава јоллары фәалијјәтә башлајанда авиабилетләрин гијмәти хејли уҹузлашды вә беләҹә, мәзунларын чохуну тәјјарә илә јола сала билдик.

1960-ҹы илдә мәнә Бирләшмиш Штатлардан Авропаја, 1961-ҹи илдә кечириләҹәк бејнәлхалг топлантылара чартер учушлары тәшкил етмәји тапшырдылар. Топлантыда иштирак етмәк үчүн мән дә чартер рејси илә Нју-Јоркдан Алманијаја, Һамбурга учдум. Топлантыдан сонра Бејтелдән олан үч гардашла бирҝә машын кирајәләјиб Ромадакы филиалы зијарәт етмәк үчүн Алманијадан Италијаја јолландыг. Орадан Франсаја, Пиренеј дағларындан кечәрәк тәблиғ ишимизин гадаға алтында олдуғу Испанијаја ҝетдик. Нәшрләримизи һәдијјә кими бүкүб Барселонадакы баҹы-гардашлара ҝәтирә билмишдик. Бурадакы баҹы-гардашлары ҝөрмәк неҹә дә хош иди! Сонра машынла Амстердама ҝәлдик, орадан да тәјјарә илә Нју-Јорка гајытдыг.

1962-ҹи илдә мәнә бејнәлхалг топлантылара гатылаҹаг 583 нәфәрин сәјаһәтини тәшкил етмәк тапшырылды. «Әбәди хош хәбәр» адлы бу топланты 1963-ҹү илдә бүтүн дүнјада кечириләҹәкди. Онлар дүнјанын дөрд бир јанында Авропа, Асија вә Сакит океанын ҹәнуб һиссәсиндә кечирилән топлантыларда иштирак едәҹәк, сонра исә сәјаһәтләрини Гонолулу (Һавај) вә Пасадендә (Калифорнија) баша вураҹагдылар. Маршрут үзрә онлар Ливан вә Иорданијада олаҹаг вә Мүгәддәс Китабда гејд олунан әразиләри зијарәт етмәк үчүн тәшкил олунан хүсуси турлара гатыла биләҹәкдиләр. Бизим шөбә учушлары, отелләрин резервасијасыны вә визаларла бағлы бүтүн мәсәләләри һәлл едирди.

1963-ҹү или мәним үчүн хүсуси едән диҝәр бир сәбәб дә вар иди. Ијунун 29-у Миссуридән олан Лајла Роҹерс адлы диндашымла аилә гурдум. О, үч ил иди ки, Бејтел аиләсинин үзвү иди. Тојумуздан бир һәфтә сонра топлантылара гатылмаг мәгсәдилә дүнја сәјаһәтинә чыхдыг, Јунаныстан, Мисир вә Ливанда олдуг. Бејрутдан Иорданијадакы кичик һава лиманына учдуг. Орада фәалијјәтимизә мәһдудијјәтләр гојулдуғу үчүн бизә демишдиләр ки, Јеһованын Шаһидләринә чәтин ки виза версинләр. Буна ҝөрә дә Иорданијада башымыза нә ҝәләҹәјини билмирдик. Амма ора чатанда һејрәтдән донуб галдыг: бир груп баҹы-гардаш әлләриндә «Јеһованын Шаһидләри, хош ҝәлмисиниз!» јазылы плакатла һава лиманынын терминалында дајанмышды. Мүгәддәс Китабда јазылмыш тарихи әразиләри өз ҝөзләримизлә ҝөрмәк мөһтәшәм иди! Биз Ибраһим пејғәмбәрин, Исһагын, Јагубун јашадығы јерләри, Иса Мәсиһин вә һәвариләрин тәблиғ етдији вә мәсиһилијин «јерин нәһајәтләринәдәк» јајылдығы әразиләри ҝөрдүк (Һәв. 13:47).

55 илдир ки, һәјат јолдашым Лајла алдығымыз бүтүн тәјинатларда мәнимлә әмәкдашлыг едир. Фәалијјәтимизин гадаға алтында олдуғу вахтларда бир нечә дәфә Испанија вә Португалијада олмушуг. Орадакы диндашларымыза дәстәк олур, нәшрләр вә бәзи лазыми шејләр апарырдыг. Һәтта Испанијанын Кадис шәһәриндә һәбсдә олан бәзи гардашлары да зијарәт етмәк имканымыз олуб. Онлара руһландырыҹы нитг сөјләмәк имканым олдуғуна ҝөрә чох шадам!

1963-ҹү илдән бәри Африка, Австралија, Мәркәзи вә Ҹәнуби Америка, Авропа, Узаг Шәрг, Һавај,  Јени Зеландија вә Пуерто-Рикоја бејнәлхалг топланты турларынын тәшкилинә көмәк едирәм. Лајла илә бирҝә чохлу унудулмаз топлантыларда иштирак етмишик. Белә топлантылардан бири дә 1989-ҹу илдә Варшавада (Полша) кечирилән топланты иди. Топлантыја Русијадан да баҹы-гардашлар ҝәлмишди, бу, онларын гатылдығы илк топланты иди. Топлантыда Совет Иттифагында етигадларына ҝөрә узун илләр һәбсдә олан бир нечә баҹы-гардашла таныш олмушдуг.

Бүтүн дүнјадакы филиаллары зијарәт едиб Бејтел аиләләрини вә хүсуси тәјинатлы мүждәчиләри руһландырмаг да мәним үчүн әсл севинҹ мәнбәјидир. Сонунҹу дәфә Ҹәнуби Кореја филиалыны зијарәт едәркән Сувонда һәбсдә олан 50 гардашла ҝөрүшмәк имканымыз олмушду. Бу гардашлар чох мүсбәт әһвал-руһијјәдә идиләр. Онлар јенидән манеәсиз шәкилдә Јеһоваја хидмәт едәҹәкләри ҝүнү сәбирсизликлә ҝөзләјирләр. Бу ҝөрүш бизи олдугҹа руһландырмышды! (Ром. 1:11, 12).

Јеһованын илләр әрзиндә халгына неҹә бәрәкәт вермәсинә шаһид олмушам. 1943-ҹү ил, вәфтиз олдуғум вахт һарадаса 100 000 тәблиғчи вар идисә, инди 240 өлкәдә 8 000 000-дан чох инсан Јеһоваја хидмәт едир. Бу, артымда Ҝилад мәзунларынын пајы бөјүкдүр. Онларын чоху илә әмәкдашлыг етдијимә вә тәјин олундуглары әразиләрә чатмаларына көмәк едә билдијимә ҝөрә чох бәхтијарам!

Севинирәм ки, ҝәнҹ јашымда дүзҝүн гәрар вериб Бејтел хидмәти үчүн әризә долдурдум. Јеһова бу илләр әрзиндә атдығым бүтүн аддымларда мәнә дајаг олуб, башымдан бол-бол бәрәкәт јағдырыб! Лајла илә бирҝә Бејтел хидмәтиндән бөјүк севинҹ дујуруг. Үстәлик хошбәхтик ки, 50 илдән чох вахт әрзиндә Бруклиндәки јығынҹагларла әмәкдашлыг етмәк вә өмүрлүк достлар газанмаг имканымыз олуб.

Лајланын мәнә һәр ҝүн дәстәк олмасы сајәсиндә Бејтел хидмәтини давам етдирә билирәм. Јашым 84-ү һагласа да, һәлә дә дәјәрли ишлә мәшғул олмаг имканым вар, инди филиалын јазышмаларла бағлы ишләриндә көмәк едирәм.

Јеһованын мөһтәшәм тәшкилатынын үзвү олмаг вә Она ибадәт едәнләрлә етмәјәнләр арасындакы фәрги ҝөрмәк мәни фәрәһләндирир. Инди Мәлаки 3:18 ајәсиндәки сөзләри даһа ајдын анлајырыг: «Сиз јенә салеһ адамла шәр адам арасында, Аллаһа гуллуг едәнлә етмәјән арасында фәрги ҝөрәҹәксиниз». Һәр өтән ҝүн үмидсиз, бәдбәхт инсанларын артдығы Шејтан дүнјасынын тәнәззүлә уғрамасына шаһид олуруг. Лакин Јеһова Аллаһы севәнләр, Она ибадәт едәнләр, һәтта бу чәтин зәманәдә јашамаларына бахмајараг, хошбәхтдирләр вә ҝәләҹәјә үмидлә бахырлар. Падшаһлыг хәбәрини бәјан етмәк һәгигәтән бөјүк шәрәфдир! (Мәт. 24:14). Аллаһын Падшаһлығынын бу көһнә дүнјаны јепјени Ҹәннәтлә әвәз едәҹәји ҝүнү һәсрәтлә ҝөзләјирик. Чох тезликлә јени дүнјада сағламлыг, әбәди һәјат вәди дә дахил, бүтүн немәтләри алаҹағыг. Онда Јеһованын салеһ бәндәләри әбәдијјәт боју хошбәхт өмүр сүрәҹәкләр!