1, 2. а) Халглар тезликлә һансы бәјанаты верәҹәк? б) Һансы суаллара ҹаваб тапмалыјыг?

ТӘСӘВВҮР ЕДИН КИ, халглар узун мүддәтдир ҝөзләнилән «сүлһ вә тәһлүкәсизлик» бәјанатыны верир. Бәлкә дә, онлар дүнјада һеч вахт бу ҹүр тәһлүкәсизлијин олмадығы илә өјүнәҹәкләр. Һәр шејин онларын нәзарәти алтында олдуғуна инанмағымызы ҝөзләјәҹәкләр. Амма онлар нөвбәти һадисәләрин гаршысында тамамилә аҹиз галаҹаглар! Мүгәддәс Китабдакы пејғәмбәрлијә әсасән, онлар «гәфил мәһвә уғрајаҹаглар вә һеч ҹүрә хилас ола билмәјәҹәкләр» (1 Салон. 5:3).

² Ҹавабыны тапмалы олдуғумуз нөвбәти суаллар вар: «Бөјүк мүсибәт заманы нәләр баш верәҹәк? Јеһова һәмин вахт бизим неҹә давранмағымызы истәјир? Бөјүк мүсибәтдә садиг галмаг үчүн өзүмүзү неҹә һазырлаја биләрик?» (Мәт. 24:21).

3. Вәһј 17:5, 15—18 ајәләринә әсасән, Аллаһ Бөјүк Бабили неҹә мәһв едәҹәк?

³ Вәһј 17:5, 15—18 ајәләрини охујун. «Бөјүк Бабил» мәһв едиләҹәк! Гејд етдијимиз кими, һәмин вахт халглар баш верән һадисәләр гаршысында аҹиз галаҹаг. Чүнки «бу фикри онларын үрәјинә Аллаһ» гојаҹаг. Һансы фикри? Христиан дүнјасы * да дахил, бүтүн јалан динләри мәһв етмәк фикрини. Аллаһ бу фикри «ал-гырмызы рәнҝли» вәһши һејванын «он бујнуз»унун  үрәјинә гојаҹаг. Бирләшмиш Милләтләр Тәшкилатыны, јәни «вәһши һејван»ы дәстәкләјән «он бујнуз» бүтүн сијаси гүввәләри тәмсил едир (Вәһј 17:3, 11—13; 18:8). Һәмин сијаси гүввәләр јалан динә гаршы галхаҹаг вә бу, бөјүк мүсибәтин башланғыҹы олаҹаг. Бу, бүтүн дүнја үчүн дәһшәтли фәлакәт олаҹаг!

4. а) Халглар еһтимал ки, јалан динә һүҹумларыны нә илә изаһ едәҹәк? б) Һәмин динләрин кечмиш үзвләри еһтимал ки, нә едәҹәк?

⁴ Биз билмирик халглар Бөјүк Бабилә һүҹумларыны нә илә изаһ едәҹәк. Ола билсин, динләрин сүлһә манеә јаратдыгларыны вә даима сијасәтә гарышдыгларыны сәбәб ҝәтирәҹәкләр. Бәлкә дә, дини тәшкилатларын һәдсиз дәрәҹәдә вар-дөвләтә вә мүлкә саһиб олдуғуну сөјләјәҹәкләр (Вәһј 18:3, 7). Бөјүк еһтимал ки, халглар бу һүҹум заманы јалан динләрин бүтүн үзвләрини мәһв етмәјәҹәк, онлар дини тәшкилатлара сон гојаҹаг. Бу тәшкилатлар мәһв оландан сонра онларын кечмиш үзвләри дин хадимләринин өз вәдләрини һәјата кечирә билмәдијини анлајаҹаг. Буна ҝөрә дә һәмин динләрдән узаг дурмаға чалышаҹаг.

5. Јеһова бөјүк мүсибәтлә бағлы нәји вәд едиб вә нәјә ҝөрә?

⁵ Бөјүк Бабилә һүҹумун нә гәдәр давам едәҹәји барәдә Мүгәддәс Китабда һеч нә јазылмајыб. Амма билирик ки, бу, нисбәтән гыса вахт кәсији әрзиндә баш верәҹәк (Вәһј 18:10, 21). Јеһова «сечдији адамлар»ын вә һагг динин мәһв олмамасы үчүн бөјүк мүсибәтин ҝүнләрини гысалдаҹағыны вәд едиб (Марк 13:19, 20). Бәс бөјүк мүсибәтин башламасындан Армаҝеддон мүһарибәсинә гәдәрки мүддәтдә Јеһова бизим неҹә давранмағымызы истәјир?

6. Нәјә ҝөрә јалан динлә әлагәләри кәсмәк кифајәт дејил?

⁶ Өтән мәгаләдә арашдырдығымыз кими, Јеһова хидмәтчиләринин Бөјүк Бабилдән узаг дурмағыны истәјир. Лакин јалан динлә әлагәни кәсмәк кифајәт дејил.  Биз һагг дини — Јеһованын пак ибадәтини дәстәкләмәјә гәрарлы олмалыјыг. Ҝәлин буну етмәјин ики јолуну арашдыраг.

7. а) Јеһованын јүксәк әхлаг нормаларына неҹә бағлы гала биләрик? б) Ибраниләрә 10:24, 25 ајәләри хүсусилә инди бирҝә топлашмағын ваҹиблијини неҹә вурғулајыр?

⁷ Илк нөвбәдә, биз Јеһованын јүксәк әхлаг нормаларына бағлы галмалыјыг. Биз дүнјанын әхлаг дәјәрләрини әсла гәбул етмәмәлијик. Мәсәлән, биз ејниҹинсли инсанлар арасында никаһ вә диҝәр һомосексуал һәјат тәрзи дә дахил, ҹинси әхлагсызлығын һеч бир нөвүнү гәбул етмирик (Мәт. 19:4, 5; Ром. 1:26, 27). Икинҹиси, диндашларымызла бирҝә ибадәт етмәјә давам етмәлијик. Вә буну мүмкүн олан һәр јердә, истәр ибадәт евиндә, истәр диндашларымызын евиндә, истәрсә дә башга јердә, һәтта ҝизлиндә едирик. Нә баш верирсә-версин, ибадәт үчүн бирҝә јығышмаға сон гојмајаҹағыг. Белә ки, «о ҝүнүн јахынлашдығыны ҝөрдүкҹә» бирҝә топлашмаға даһа чох еһтијаҹымыз вар. (Ибраниләрә 10:24, 25 ајәләрини охујун.)

8. Еһтимал ки, ҝәләҹәкдә һансы хәбәри чатдыраҹағыг?

⁸ Еһтимал ки, бөјүк мүсибәт заманы башга хәбәр чатдыраҹағыг. Һал-һазырда биз Аллаһын Падшаһлығы һагда хош хәбәри тәблиғ едирик вә шаҝирд һазырламаға чалышырыг. Амма о вахт чатдыраҹағымыз хәбәр чох ҝүман ки, олдугҹа сәрт олаҹаг. Мүгәддәс Китабда һәмин хәбәр шиддәтли долу илә мүгајисә едилир (Вәһј 16:21). Ола билсин, Шејтан дүнјасынын тезликлә мәһв олаҹағыны бәјан едәҹәјик. Вахты чатанда биз бу хәбәрин нәдән ибарәт олдуғуну вә ону неҹә чатдырмалы олдуғумузу дәгиг биләҹәјик. Ҝөрәсән, һәмин вахт јүз илләрдир истифадә олунан үсулларла тәблиғ едәҹәјик? Јохса һансыса башга үсуллардан истифадә едәҹәјик? Буну заман ҝөстәрәҹәк! Һәр бир һалда, ҝөрүнүр, бизә Јеһованын һөкм хәбәрини ҹәсарәтлә бәјан етмәк шәрәфи нәсиб олаҹаг! (Һизг. 2:3—5).

9. Еһтимал ки, халглар бәјан едәҹәјимиз хәбәрә неҹә реаксија верәҹәк, амма нәдән архајын ола биләрик?

⁹ Чох јәгин ки, бәјан едәҹәјимиз хәбәрә ҝөрә халглар бизи бирдәфәлик сусдурмаға чалышаҹаг. Бу ҝүн тәблиғ ишиндә Јеһованын дәстәјинә бел бағладығымыз кими, һәмин вахт да Она еһтијаҹымыз олаҹаг. Әмин ола биләрик ки, Аллаһымыз ирадәсини һәјата кечирмәк үчүн бизә боллуҹа ҝүҹ-гүввәт верәҹәк (Мик. 3:8).

10. Лука 21:25—28 ајәләриндә пејғәмбәрлик олундуғу кими, бәшәријјәт бөјүк мүсибәт заманы баш верәнләрә неҹә реаксија ҝөстәрәҹәк?

¹⁰ Лука 21:25—28 ајәләрини охујун. Бөјүк мүсибәт заманы инсанлар әбәдијјән вар олаҹағыны дүшүндүкләри һәр шејин — сијаси, коммерсија системләринин вә бу дүнјанын парчасы олан диҝәр шејләрин мәһв олмаға башладығыны ҝөрүб дәһшәтә ҝәләҹәк. Бәшәр тарихинин ән гаранлыг дөврүнә гәдәм гојан инсанлар һәјатларына ҝөрә горхараг «әзаб чәкәҹәк» (Сәф. 1:14, 15). Һәмин дөврдә, јәгин ки, һәтта Јеһованын халгы үчүн дә һәјат ағырлашаҹаг. Бу дүнјанын бир һиссәси олмадығымыз үчүн, ола билсин, мүәјјән чәтинликләр јашајаҹағыг. Ола билсин, һәтта һәјат үчүн зәрури олан шејләрә мөһтаҹ галаг.

11. а) Нә үчүн Јеһованын Шаһидләри диггәт мәркәзиндә олаҹаг? б) Биз нә үчүн бөјүк мүсибәтдән горхмамалыјыг?

¹¹ Бөјүк мүсибәтин һансыса мәгамында инсанлар өз динләринин бағландығыны,  Јеһованын хидмәтчиләринин исә һәлә дә фәалијјәтләрини давам етдирдијини ҝөрүб гәзәбләнәҹәк. Онларын гәзәбинин неҹә бөјүк әкс-сәда верәҹәјини, бәлкә дә, буну сосиал шәбәкәләрдә ишыгландыраҹагларыны јалныз тәсәввүр едә биләрик. Халглар вә онларын һакими Шејтан мәһв олмајан тәк дин олдуғумуз үчүн бизә нифрәт едәҹәк. Онлар бүтүн динләри јер үзүндән силмәк мәгсәдинә наил олмајаҹаглар. Одур ки, биз онларын диггәт мәркәзинә чевриләҹәјик. Бу мәгамда халглар Мәҹуҹ өлкәсиндән олан Јәҹуҹун * ролуну иҹра едәҹәк. Онлар бирләшиб вар ҝүҹләри илә Јеһованын халгына гаршы амансыз һүҹума кечәҹәк (Һизг. 38:2, 14—16). Бөјүк мүсибәт заманы нәләрин баш верә биләҹәјини дүшүнәрәк нараһат олмаға башлаја биләрик, хүсусилә дә деталлары дәгиг билмәдијимизә ҝөрә. Лакин бир шеј дәгигдир: биз бөјүк мүсибәтдән горхмамалыјыг. Јеһова һәјатымызы хилас етмәк үчүн бизә рәһбәрлик верәҹәк (Зәб. 34:19). Биз гамәтимизи дүзәлдиб башымызы дикәлдәҹәјик, чүнки биләҹәјик ки, гуртулушумуз јахындыр *.

12. «Садиг вә ағыллы нөкәр» бизи баш верәҹәк һадисәләрә неҹә һазырлајыб?

¹² «Садиг вә ағыллы нөкәр» бөјүк мүсибәт заманы садиг галмағымыз үчүн нечә вахтдыр бизи һазырлајыр (Мәт. 24:45). О, буну мүхтәлиф үсулларла едиб. Мәсәлән, бунлардан бири 2016—2018-ҹи илләрдә кечирилән топлантылардыр. Бу топлантыларда Јеһованын ҝүнү јахынлашдыгҹа бизә лазым олаҹаг хүсусијјәтләри мөһкәмләндирмәјә тәшвиг олунурдуг. Ҝәлин бу хүсусијјәтләрә гысаҹа нәзәр салаг.

13. Јеһоваја сәдагәтимизи неҹә мөһкәмләндирә биләрик вә нә үчүн буну инди етмәлијик?

¹³ Сәдагәт. 2016-ҹы илдә кечирилмиш реҝионал топланты «Јеһоваја садиг галын!» адланырды. Топлантыдан өјрәндик ки, Јеһова илә мүнасибәтләримиз мөһкәм олса, Она садиг галаҹағыг. Бу мүнасибәтләри үрәкдән етдијимиз дуалар вә Мүгәддәс Китабын дәрин мүталиәси сајәсиндә мөһкәмләндирә биләрик. Бунлар бизә һәтта ән ағыр сынагларын өһдәсиндән ҝәлмәјә ҝүҹ верир. Биз баша дүшүрүк ки, Шејтанын дүнјасы сона јахынлашдыгҹа Аллаһа вә Падшаһлығына сәдагәтимиз даһа шиддәтли сынаглара мәруз галаҹаг. Ҝүман ки, биз бундан сонра да ришхәнд һәдәфи олаҹағыг (2 Бут. 3:3, 4). Бунун башлыҹа сәбәбләриндән бири Шејтан дүнјасынын һеч бир һиссәсини дәстәкләмәмәјимиздир. Сәдагәтимизи индидән мөһкәмләндирмәлијик ки, бөјүк мүсибәт заманы садиг галаг.

14. а) Јер үзүндә рәһбәрлик едән гардашларла бағлы һансы дәјишиклик олаҹаг? б) Нәјә ҝөрә һәмин вахт садиг олмалыјыг?

¹⁴ Бөјүк мүсибәт заманы јер үзүндә рәһбәрлик едән гардашларла бағлы дәјишиклик олаҹаг. Һәмин вахт һәлә јер үзүндә олан мәсһ олунмушлар Армаҝеддон мүһарибәсиндә вурушмаг үчүн ҝөјә галдырылаҹаг (Мәт. 24:31; Вәһј 2:26, 27). Бу, о демәкдир ки, Рәһбәрлик Шурасы артыг бизимлә бирҝә јер үзүндә олмајаҹаг.  Амма бөјүк издиһам башсыз галмајаҹаг. Башга гојунлардан олан тәҹрүбәли гардашлар бизә рәһбәрлик едәҹәк. Сәдагәтимизи һәмин гардашлара дәстәк олмагла вә Аллаһын онлар васитәсилә вердији ҝөстәришләрә әмәл етмәклә ҝөстәрмәлијик. Хиласымыз бундан асылы олаҹаг!

15. Дөзүмүмүзү неҹә мөһкәмләндирә биләрик вә нә үчүн буну инди етмәк ваҹибдир?

¹⁵ Дөзүм. 2017-ҹи илдә кечирилмиш реҝионал топланты «Тәслим олма!» адланырды. Бу топланты сынаглар гаршысында дөзүмүмүзү мөһкәмләндирмәјә көмәк етди. Өјрәндик ки, дөзүмлү олмағымыз вәзијјәтин јахшы олмасына бағлы дејил. Јеһоваја етибар етмәклә дөзүмүмүзү мөһкәмләндирә биләрик (Ром. 12:12). Ҝәлин Иса Мәсиһин вәдини һеч вахт унутмајаг: «Ахыра кими дөзән хилас олаҹаг» (Мәт. 24:13). Бу вәд үзләшдијимиз истәнилән чәтинлијә рәғмән сәдагәтли галмалы олдуғумузу ҝөстәрир. Инди үзләшдијимиз бүтүн сынаглара дөзсәк, бөјүк мүсибәт башламаздан өнҹә даһа ҝүҹлү олаҹағыг.

16. Бизи ҹәсарәтли едән нәдир вә индидән ҹәсарәтимизи неҹә мөһкәмләндирә биләрик?

¹⁶ Ҹәсарәт. 2018-ҹи илин реҝионал топлантысынын мөвзусу «Ҹәсур ол!» адланырды. Бу топлантыда вурғуланмышды ки, бизи ҹәсарәтли едән габилијјәтләримиз дејил. Дөзүм Јеһоваја етибардан гајнагландығы кими, әсл ҹәсарәт дә Јеһоваја етибардан гајнагланыр. Бәс Јеһоваја етибарымызы неҹә мөһкәмләндирә биләрик? Онун Кәламыны һәр ҝүн охумагла вә кечмишдә халгыны неҹә хилас етдији үзәриндә дүшүнмәклә (Зәб. 68:20; 2 Бут. 2:9). Бөјүк мүсибәт заманы халглар һүҹума кечәндә бизә һәмишәкиндән даһа чох ҹәсарәт вә Јеһоваја етибар етмәк ҝәрәк олаҹаг (Зәб. 112:7, 8; Ибр. 13:6). Әҝәр бу ҝүндән Јеһоваја етибар етсәк, Јәҹуҹун һүҹуму илә үзләшмәјә ҹәсарәтимиз чатаҹаг *.

17. Армаҝеддон мүһарибәсиндән нә үчүн горхмаг лазым дејил? (Үз габығындакы шәклә бахын.)

¹⁷ Әввәлки мәгаләдә гејд олундуғу кими, әксәријјәтимизин һәјаты ахырзаманда  кечир. Амма бизим һәмчинин бөјүк мүсибәтдән хилас олмаг үмидимиз вар. Армаҝеддон мүһарибәси бу шәр дүнјаја бирдәфәлик сон гојаҹаг. Буна ҝөрә дә нәдәнсә горхмаға лүзум јохдур. Чүнки бу, Јеһованын мүһарибәси олаҹаг (Мәс. 1:33; Һизг. 38:18—20; Зәк. 14:3). Иса Мәсиһ Јеһованын әмри илә Онун ордусуна башчылыг едәҹәк. Онун јанында дирилән мәсһ олунмушлар вә милјардларла мәләк олаҹаг. Онлар бирликдә Шејтана, онун ҹинләринә вә јер үзүндәки ордуларына гаршы дөјүшәҹәк (Дән. 12:1; Вәһј 6:2; 17:14).

18. а) Јеһова бизи нәјә әмин едир? б) Вәһј 7:9, 13—17 ајәләриндәки сөзләр ҝәләҹәјә әминлијимизи неҹә артырыр?

¹⁸ Јеһова бизи әмин едәрәк дејир: «Сәнә гаршы дүзәлдилән һеч бир силаһ кара ҝәлмәјәҹәк» (Әшј. 54:17). Јеһованын садиг хидмәтчиләриндән ибарәт «бөјүк бир издиһам» бөјүк мүсибәтдән сағ чыхаҹаг! Бундан сонра онлар мүгәддәс хидмәти иҹра етмәјә давам едәҹәкләр. (Вәһј 7:9, 13—17 ајәләрини охујун.) Мүгәддәс Китаб бизә хилас олаҹағымыза даир әминлик верир! Билирик ки, Јеһова вәфалы бәндәләрини һифз едир (Зәб. 31:23). Јеһованы севән вә адыны уҹалдан һәр кәс Аллаһымызын Өз мүгәддәс адына бәраәт газандырдығыны ҝөрмәкдән севинҹ дујаҹаг (Һизг. 38:23).

19. Тезликлә бизи неҹә ҝәләҹәк ҝөзләјир?

¹⁹ Бир анлыг дүшүнүн, әҝәр 2 Тимутијә 3:2—5 ајәләриндә Шејтандан тәмизләнмиш јени дүнјада јашајан инсанларын хүсусијјәтләри тәсвир олунсајды, орада нә јазыларды? (“ «Инсанлар ҝәләҹәкдә» адлы чәрчивәјә бахын.) Рәһбәрлик шурасынын үзвү олмуш Ҹорҹ Гангас * гардаш белә демишди: «Әҝәр бүтүн дүнја баҹы-гардашлардан ибарәт олса иди, ҝөрүн һәјат неҹә оларды! Тезликлә сизин јер үзүндә ҝөзәл бир һәјат сүрмәк имканыныз олаҹаг. Јеһова вар олдугҹа сиз дә јашајаҹагсыныз. Биз әбәдијјән јашајаҹағыг». Неҹә дә мөһтәшәм үмиддир!