1. Һәр кәсин верә биләҹәји ән јахшы гәрар һансыдыр?

АДӘТӘН валидејнләрин вердији гәрарларын өвладларына бөјүк тәсири олур. Валидејнләр јахшы гәрарлар вермәсә, нәтиҹәдә ушаглар әзијјәт чәкә биләр. Амма һикмәтли гәрар версәләр, ушагларынын хошбәхт вә мәналы һәјат сүрмәләри үчүн бөјүк имкан јаратмыш олаҹаглар. Тәбии ки, ушаглар өзләри дә дүзҝүн сечимләр етмәлидир. Һәр кәсин верә биләҹәји ән јахшы гәрар мәһәббәтли Атамыз Јеһоваја хидмәт етмәкдир (Зәб. 73:28).

2. Иса вә валидејнләри һансы гәрарлары вермишди?

² Јусифлә Мәрјәмин һәјатда әсас мәгсәди ушагларына Јеһоваја ибадәт етмәјә көмәк етмәк иди вә вердикләри гәрарлар буну ачыг-ајдын ҝөстәрирди (Лука 2:40, 41, 52). Исанын да вердији гәрарлар Јеһованын нијјәтиндәки ролуну јеринә јетирмәјә көмәк едирди (Мәт. 4:1—10). Иса хејирхаһ, сәдагәтли вә ҹәсарәтли инсан кими бөјүдү. Аллаһдан горхан һәр бир валидејн бу ҹүр оғулу олдуғу үчүн фәхр вә севинҹ дујар.

3. Бу мәгаләдә һансы суаллары арашдыраҹағыг?

³ Бу мәгаләдә нөвбәти суаллары арашдыраҹағыг. Јеһова Иса илә бағлы һансы гәрарлары верди? Јусифлә Мәрјәм һансы гәрарлары вермишди вә валидејнләр онлардан нә өјрәнә биләр? Иса һансы гәрарлары вермишди вә ҝәнҹләр ондан неҹә нүмунә ҝөтүрә биләр?

4. Јеһова Иса илә бағлы һансы ваҹиб гәрары вермишди?

⁴ Јеһова Иса үчүн мөһтәшәм валидејнләр сечмишди (Мәт.  1:18—23; Лука 1:26—38). Мәрјәмин Мүгәддәс Китабда јазылмыш сәмими сөзләри Јеһоваја вә Кәламына дәрин мәһәббәтини ҝөстәрир (Лука 1:46—55). Јусифин Јеһованын ҝөстәришинә әмәл етмәсиндән ҝөрүнүр ки, онун үрәјиндә Аллаһ хофу вар иди вә Ону разы салмаг истәјирди (Мәт. 1:24).

5, 6. Јеһова Оғлунун нәләрлә үзләшмәсинә изин верди?

⁵ Диггәт јетирин ки, Јеһова Иса үчүн варлы валидејнләр сечмәди. Иса анадан оландан сонра Јусиф вә Мәрјәмин ҝәтирдији гурбанлар онларын касыб олдуғуну ҝөстәрир (Лука 2:24). Ола билсин ки, Јусифин Насирәдә евинин јахынлығында кичик дүканы вар иди, о орада дүлҝәр кими ишләјирди. Ҝөрүнүр, онлар садә һәјат сүрүрдү, хүсусилә дә нәзәрә алсаг ки, аиләдә ән азы једди ушаг вар иди (Мәт. 13:55, 56).

⁶ Јеһова Исаны тәһлүкәләрдән горујурду, амма ону бүтүн чәтинликләрдән мүдафиә етмирди (Мәт. 2:13—15). Мисал үчүн, Исанын гоһумлары она иман ҝәтирмирди. Тәсәввүр етмәк олар, аилә үзвләринин белә, Исанын Мәсиһ олдуғуну әввәл-әввәл гәбул етмәмәси ону неҹә мәјус едирди (Марк 3:21; Јәһ. 7:5). Һәмчинин, ола билсин, Иса өҝеј атасы Јусифин иткисинә таб ҝәтирмәли олмушду. Јусифин өлүмүндән сонра о, бөјүк оғул кими, јәгин атасынын пешәсини давам етдирмишди (Марк 6:3). Бөјүдүкҹә Иса аилә мәсулијјәтләрини дашымағы өјрәнди. Јәгин ки, аиләсини доландырмаг үчүн о чох зәһмәт чәкирди. Буна ҝөрә дә бүтүн ҝүнү ишләјиб јорулмағын нә демәк олдуғуну јахшы билирди.

7. а) Әр-арвадлара валидејнлик мәсулијјәтини иҹра етмәјә һансы суалларын үзәриндә фикирләшмәк көмәк едә биләр? б) Мәсәлләр 2:1—6 ајәләринә әсасән, валидејнләр ушагларына нә өјрәтмәлидир?

⁷ Аиләлисинизсә вә өвлад саһиби олмаг истәјирсинизсә, фикирләшин: «Биз тәвазөкар, руһани дүшүнҹәли инсаныг? Јеһова дәјәрли көрпә һәдијјәсинин гајғысына галмаг үчүн бизи бир валидејн кими сечәрди?» (Зәб. 127:3, 4). Әҝәр сиз артыг валидејнсинизсә, өзүнүздән сорушун: «Өвладыма әмәксевәрлији ашылајырам?» (Ваиз 3:12, 13). «Өвладымы Шејтан дүнјасындакы физики вә әхлаги тәһлүкәләрдән горумаг үчүн әлимдән ҝәләни едирәм?» (Мәс. 22:3). Ушагларынызы һәр бир чәтинликдән горуја билмәрсиниз, бу мүмкүн дејил. Амма сиз  онлары һәјатын ҝерчәкликләринә һазырлаја биләрсиниз, бунун үчүн сәбир вә севҝи ҝөстәрәрәк онлара Аллаһын Кәламындакы мәсләһәтләрә үз тутмағы өјрәдин. (Мәсәлләр 2:1—6 ајәләрини охујун.) Мәсәлән, һансыса гоһумунуз Јеһоваја хидмәт етмәји дајандырса, өвладыныза көмәк един ки, Мүгәддәс Китабдан Јеһоваја садиг галмағын нәјә ҝөрә ваҹиб олдуғуну баша дүшсүн (Зәб. 31:23). Јахуд јахынларыныздан кимсә вәфат едәндә ушағыныза ҝөстәрин ки, Мүгәддәс Китаб она дәрдә дөзмәјә вә тәсәлли тапмаға неҹә көмәк едә биләр (2 Кор. 1:3, 4; 2 Тим. 3:16).

8. Ганунун тәкрары 6:6, 7 ајәләринә әсасән, Јусифлә Мәрјәмин һансы өһдәчилији вар иди?

⁸ Јусифлә Мәрјәм Јеһованын валидејнләрә вердији бујруглара риајәт етдији үчүн Исанын бөјүјүб Аллаһын рәғбәтини газанмасына көмәк едә билмишди. (Ганунун тәкрары 6:6, 7 ајәләрини охујун.) Онлар Јеһованы үрәкдән севирди вә әсас мәгсәдләри о иди ки, ушагларына да бу мәһәббәти ашыласынлар.

9. Јусифлә Мәрјәм һансы ваҹиб гәрарлары вермишди?

⁹ Јусифлә Мәрјәм башга һикмәтли гәрарлар да вермишди, онлар аиләликҹә Јеһоваја мүнтәзәм ибадәт едирди. Шүбһә јохдур ки, онлар һәр һәфтә Насирәдәки синагога, һәмчинин һәр ил Јерусәлимә Пасха бајрамына ҝедирдиләр (Лука 2:41; 4:16). Ола билсин, онлар бу сәфәрләр заманы Исаја вә диҝәр өвладларына Јеһованын халгынын тарихини өјрәдирдиләр. Бәлкә дә, јолүстү Мүгәддәс Китабда адлары чәкилән әразиләри зијарәт едирдиләр. Күлфәт артдыгҹа, јәгин Јусифлә Мәрјәм үчүн ибадәти мүнтәзәм иҹра етмәк асан дејилди. Амма онлар бунун бөјүк хејрини ҝөрүрдүләр! Ибадәти һәр шејдән үстүн тутдуглары үчүн аиләнин Јеһова илә сых мүнасибәти вар иди.

10. Валидејнләр Јусифлә Мәрјәмдән нә өјрәнә биләр?

¹⁰ Аллаһ хофу олан валидејнләр Јусифлә Мәрјәмдән нә өјрәнә биләр? Илк нөвбәдә, сөздә вә һәрәкәтдә өвладларыныза Јеһованы үрәкдән севдијинизи ҝөстәрин. Ушагларыныза верә биләҹәјиниз ән ҝөзәл һәдијјә онлара Јеһованы севмәји өјрәтмәкдир. Һәмчинин ушагларыныза өјрәтмәли  олдуғунуз ән ваҹиб дәрсләрдән бири дә онлара мүталиәјә, дуаја, јығынҹаглара вә тәблиғдә иштирак етмәјә мүнтәзәм вахт ајырмағы ашыламагдыр (1 Тим. 6:6). Әлбәттә, сиз ушагларынызы мадди шејләрлә дә тәмин етмәлисиниз (1 Тим. 5:8). Анҹаг унутмајын ки, ушагларынызын бу көһнә дүнјанын сонундан хилас олуб, јени дүнјаја дахил олмасы мадди шејләрин јох, Јеһова илә сых мүнасибәтләри сајәсиндә мүмкүн олаҹаг * (Һизг. 7:19; 1 Тим. 4:8).

11. а) 1 Тимутијә 6:17—19 ајәләриндәки нәсиһәт валидејнләрә өвладларынын тәрбијәсиндә неҹә көмәк едир? б) Аиләликҹә гаршыныза һансы мәгсәдләри гоја биләрсиниз вә һансы немәтләри алаҹагсыныз? (« Гаршыныза һансы мәгсәдләри гојаҹагсыныз?» адлы чәрчивәјә бахын.)

¹¹ Неҹә дә хошдур ки, чохлу валидејн аиләләринин руһани рифаһы үчүн дүзҝүн гәрарлар верир! Бу аиләләр даим бирҝә ибадәт едир. Јығынҹаглара вә бөјүк топлантылара гатылыр. Хош хәбәри мүждәләјир. Һәтта бәзи аиләләр аз ишләнән әразиләрдә хидмәт едир. Диҝәрләри Бејтели зијарәт едир, јахуд тикинти лајиһәләримиздә чалышыр. Бу ҹүр аиләләр мадди гурбанлар вермәли олур вә сөзсүз ки, бу, чәтинликсиз өтүшмүр. Анҹаг Јеһова онлара бол-бол руһани немәт верир. (1 Тимутијә 6:17—19 ајәләрини охујун.) Чох вахт бу ҹүр аиләләрдә бөјүјән ушаглар өјрәндикләри јахшы вәрдишләри тәрҝитмир вә буна ҝөрә һеч вахт пешман олмур! * (Мәс. 10:22).

12. Иса Мәсиһ бөјүдүкҹә нә етмәли иди?

¹² Иса Мәсиһин сәмави Атасы һәмишә һикмәтли гәрарлар вермишди, онун јер үзүндәки валидејнләринин дә гәрарлары дүзҝүн иди. Амма Иса бөјүдүкҹә өзү гәрарлар вермәли иди (Гал. 6:5). Һамымызда олдуғу кими, онда да ирадә азадлығы вар иди. Иса Мәсиһ истәсәјди, өз марағыны һәјатда һәр шејдән үстүн тутарды. Амма о, Јеһова илә јахшы мүнасибәтләрини горумағы сечди (Јәһ. 8:29). Ушаглар онун нүмунәсини неҹә изләјә биләр?

13. Иса Мәсиһ ушаг јашларында һансы ваҹиб сечими етмишди?

¹³ Иса Мәсиһ ушаг јашларында валидејнләринә итаәт етмәји сечди. О, һеч вахт өзүнүн даһа чох билдијини дүшүнәрәк валидејнләринин тәрбијәсини рәдд етмирди. Онларын сөзүндән чыхмырды (Лука 2:51). Шүбһәсиз, аиләнин бөјүк ушағы кими үзәринә дүшән мәсулијјәтләрә ҹидди јанашырды. Сөзсүз ки, Иса Јусифдән дүлҝәрлији өјрәнмәк үчүн чох зәһмәт чәкмишди, бунун сајәсиндә аиләсини доландыра билирди.

14. Һарадан билирик ки, Иса Аллаһын Кәламыны дәриндән өјрәнирди?

 ¹⁴ Иса Мәсиһин валидејнләри јәгин ки, она мөҹүзәви шәкилдә дүнјаја ҝәлмәси вә Аллаһын елчисинин онун һагда дедикләрини данышмышдылар (Лука 2:8—19, 25—38). Амма Иса бу билдикләри илә јанашы, өзү дә Мүгәддәс Јазылары дәриндән мүталиә едирди. Буну һарадан билирдик? Һәлә ушаг јашларында Јерусәлимдәки мүәллимләр онун «зәкасына вә ҹавабларына валеһ олурду» (Лука 2:46, 47). Ҹәми 12 јашында исә Иса Аллаһын Кәламыны елә јахшы мүталиә етмишди ки, Јеһованын онун Атасы олдуғуна артыг әмин олмушду (Лука 2:42, 43, 49).

15. Иса Мәсиһ Аллаһын ирадәсини јеринә јетирмәјә гәрарлы олдуғуну неҹә ҝөстәрди?

¹⁵ Иса баша дүшәндә ки, Аллаһын нијјәтиндә һансы ролу вар, бу тәјинаты гәбул етди (Јәһ. 6:38). О билирди ки, чохлары она нифрәт едәҹәк вә јәгин бу һагда дүшүнмәк онун үчүн ағыр иди. Буна бахмајараг, Аллаһа итаәт етмәјә гәрар верди. Ерамызын 29-ҹу илиндә вәфтиз олунанда о, бүтүн диггәтини Аллаһын ирадәсини јеринә јетирмәјә ҹәмләди (Ибр. 10:5—7). Һәтта ишҝәнҹә дирәјиндә ҹан верәндә дә Аллаһын ирадәсиндән бојун гачырмағы ағлына белә ҝәтирмәди (Јәһ. 19:30).

16. Ушаглар Исадан нә өјрәнә биләр?

¹⁶ Валидејнләринизә итаәт един. Сизин дә валидејнләриниз Јусифлә Мәрјәм кими гејри-камилдир. Амма Јеһова онлара сизи горумаг, тәрбијә етмәк вә јол ҝөстәрмәк тапшырығы вериб. Валидејнләринизин сөзүнә гулаг ассаныз вә мөвгеләринә һөрмәт етсәниз, ҝүзәраныныз хош олаҹаг (Ефес. 6:1—4).

17. Јушә 24:15 ајәсинә әсасән, ушаглар өзләри һансы гәрары вермәлидир?

¹⁷ Кимә ибадәт едәҹәјинизә гәрар верин. Сиз шәхсән өзүнүз Јеһованы танымалы, Онун ирадәсиндән аҝаһ олмалы вә сиздән нә ҝөзләнилдијини дәрк етмәлисиниз (Ром. 12:2). Бундан сонра һәјатынызын ән ваҹиб гәрарыны — Јеһоваја хидмәт етмәк гәрарыны вермәјә һазыр олаҹагсыныз. (Јушә 24:15 ајәсини охујун; Ваиз 12:1.) Мүгәддәс Китабы мүнтәзәм мүталиә етсәниз, Јеһоваја мәһәббәтиниз ҝетдикҹә артаҹаг вә иманыныз мөһкәмләнәҹәк.

18. Ушаглар һансы гәрары вермәлидир вә бунун нәтиҹәси нә олаҹаг?

 ¹⁸ Гој гәрарыныз Јеһованын ирадәсини һәр шејдән үстүн тутмаг олсун. Шејтан дүнјасы иддиа едир ки, габилијјәтинизи өз мәнфәәтиниз үчүн истифадә етсәниз, хошбәхт олаҹагсыныз. Әслиндә исә мадди мәгсәдләрә ҹан атанлар «өзләринә чохлу әзаб чәкдирмишләр» (1 Тим. 6:9, 10). Јеһоваја гулаг ассаныз, Онун ирадәсини һәјатда һәр шејдән үстүн тутсаныз, һәр ишиниз аванд олаҹаг вә һикмәтлә һәрәкәт едәҹәксиниз (Јуш. 1:8).

19. Валидејнләр нәји унутмамалыдыр?

¹⁹ Әзиз валидејнләр, әлиниздән ҝәләни един ки, ушагларыныз Јеһоваја хидмәт етсин. Јеһоваја ҝүвәнин, О сизә һикмәтли гәрарлар вермәјә көмәк едәҹәк (Мәс. 3:5, 6). Унутмајын ки, ушагларыныза сөзләриниздән чох, әмәлләриниз тәсир едир. Буна ҝөрә дә елә гәрарлар верин ки, онлара Јеһованын рәғбәтини газанмаға зәмин јаратсын.

20. Јеһоваја хидмәт етмәјә гәрар верән ҝәнҹләри һансы немәтләр ҝөзләјир?

²⁰ Әзиз ушаглар, валидејнләриниз сизи һәјатда һикмәтли гәрарлар вермәјә истигамәтләндирә биләр. Анҹаг бу гәрарлары сиз өзүнүз вериб, Аллаһын рәғбәтини газанмалысыныз. Буна ҝөрә дә Исадан нүмунә ҝөтүрүн вә мәһәббәтли Јарадана ибадәт един. Бу гәрары версәниз, индинин өзүндә долғун, зәнҝин вә рәнҝарәнҝ һәјатыныз олаҹаг (1 Тим. 4:16). Ҝәләҹәкдә исә сизә ән хошбәхт һәјат нәсиб олаҹаг!