1. Кимәсә Мүгәддәс Китаб дәрси кечмәјин вә онун вәфтиз олундуғуну ҝөрмәјин бөјүк шәрәф олдуғуну 2 Коринфлиләрә 3:1—3 ајәләри неҹә ҝөстәрир? (Үз габығындакы шәклә бахын.)

МҮГӘДДӘС КИТАБЫ өјрәнән адамын вәфтиз олундуғуну ҝөрәндә һансы һиссләри кечирирсиниз? Шүбһәсиз, чох севинирсиниз (Мәт. 28:19). Она сиз дәрс кечмисинизсә, севинҹинизин һәдди-һүдуду олмур! (1 Салон. 2:19, 20). Јени вәфтиз олунмуш шаҝирдләр тәкҹә онлара дәрс кечән инсанын јох, бүтүн јығынҹағын «зәманәт мәктублары»дыр. (2 Коринфлиләрә 3:1—3 ајәләрини охујун.)

2. а) Һансы ваҹиб суалын үзәриндә дүшүнмәлијик вә нә үчүн? б) Мүгәддәс Китаб дәрси нәјә дејилир? (Һашијәјә бахын.)

² Чох хошдур ки, өтән дөрд ил әрзиндә бүтүн дүнјада һәр ај орта һесабла 10 000 000 Мүгәддәс Китаб дәрси * кечирилиб. Һәмин илләр әрзиндә һәр ил тәхминән 280 000-дән чох адам Јеһованын Шаһиди кими вәфтиз олунуб. Бәс Мүгәддәс Китабы өјрәнән милјонларла диҝәр шаҝирдә вәфтиз олунмаға неҹә көмәк едә биләрик? Һәлә ки, Јеһова сәбир ҝөстәрәрәк инсанларын Мәсиһин шаҝирди олмасына имкан верир. Буна ҝөрә онларын тез бир заманда вәфтиз олунмасы үчүн әлимиздән ҝәләни етмәлијик. Вахт сүрәтлә ҝедир! (1 Кор. 7:29а, 1 Бут. 4:7).

3. Бу мәгаләдә нәји мүзакирә едәҹәјик?

 ³ Шаҝирд һазырламағын тәҹили олдуғуну нәзәрә алараг, Рәһбәрлик Шурасы филиаллардан хаһиш етмишди ки, даһа чох инсана вәфтиз олунмаға көмәк етмәјин јолларыны арашдырыб тапсынлар. Бу вә нөвбәти мәгаләдән сәриштәли өнҹүлләрин, хүсуси тәјинатлы мүждәчиләрин вә рајон нәзарәтчиләринин тәҹрүбәсиндән јарарланаҹағыг * (Мәс. 11:14; 15:22). Онлар изаһ едир ки, Мүгәддәс Китаб мүәллимләри вә онларын шаҝирдләри дәрсләрин даһа бәһрәли олмасы үчүн нә етмәлидир. Бу мәгаләдә һәр бир шаҝирдин вәфтизә доғру ирәлиләмәси үчүн зәрури олан беш мәсләһәт мүзакирә олунур.

4. Гапы ағзында кечирилән Мүгәддәс Китаб дәрсләри һагда нәји билмәлијик?

⁴ Бир чох баҹы-гардашымыз Мүгәддәс Китаб дәрсләрини ев сакинләринин елә гапысы ағзында кечирир. Бу, Мүгәддәс Китаба мараг ојатмаг үчүн јахшы башланғыҹдыр. Амма чох вахт бу мүзакирәләр гыса олур вә һәр һәфтә алынмыр. Инсанын марағыны артырмаг үчүн бәзи тәблиғчиләр онун әлагә мәлуматыны истәјир. Сонра нөвбәти зијарәтә гәдәр онунла Мүгәддәс Китабдакы бәзи фикирләри бөлүшмәк үчүн зәнҝ едир вә ја месаж ҝөндәрир. Лакин бәзән бу ҹүр гыса мүзакирәләр ајларла давам едир вә сәмәрәли дәрсләр кечирилмир. Сизҹә, шаҝирд Аллаһын Кәламыны өјрәнмәк үчүн бундан артыг вахт вә ҝүҹ сәрф етмирсә, һәср олунуб вәфтиз олунмаг үчүн лазыми гәдәр инкишаф едәҹәк? Јәгин ки, јох.

5. Иса Мәсиһин Лука 14:27—33 ајәләриндә вурғуладығы һансы фикир шаҝирд һазырламаг ишимизә көмәк едә биләр?

⁵ Бир дәфә Иса Мәсиһ онун давамчысы олмаг истәјәнләрин нә етмәли олдуғуну изаһ етмишди. О, гүллә тикмәк истәјән адамы вә мүһарибәјә чыхан падшаһы мисал чәкмишди. Демишди ки, гүллә тикән адам тикинтини гуртара билмәк үчүн «әввәлҹә отуруб мәсрәфләри» һесабламалыдыр, падшаһ да ордусунун галиб ҝәлиб-ҝәлмәјәҹәјини мүәјјән етмәк үчүн «отуруб мәсләһәтчиләри илә мәшвәрәт» етмәлидир. (Лука 14:27—33 ајәләрини охујун.) Бунунла Иса демәк истәјирди ки, онун давамчысы олмаг истәјән кәс бунун нә демәк олдуғу һагда јахшыҹа дүшүнмәлидир. Шаҝирдимизә бу саһәдә көмәк етмәк үчүн тәшвиг едә биләрик ки, һәр һәфтә дәрс кечмәк үчүн вахт ајырсын. Буну неҹә едә биләрик?

6. Дәрс кечдијиниз инсанын инкишаф етмәси үчүн нә етмәк олар?

 ⁶ Гапы ағзында кечдијиниз дәрсләрин вахтыны узатмагдан башлајын. Һәр нөвбәти сөһбәт заманы әлавә бир ајә мүзакирә етмәк олар. Ев сакини сөһбәтин нисбәтән узун чәкмәсиндән нараһат олмурса, сөһбәти давам етдирмәк үчүн һарадаса отурмағы тәклиф един. Ҹавабындан биләҹәксиниз ки, Мүгәддәс Китабы өјрәнмәк онун үчүн нә дәрәҹәдә әһәмијјәтлидир. Даһа сонра исә онун инкишафыны сүрәтләндирмәк үчүн һәфтәдә ики дәфә дәрс кечмәји тәклиф едә биләрсиниз. Амма һәфтәдә бир-ики дәфә дәрс кечмәклә иш битмир.

7. Мүәллим кечәҹәји һәр дәрсә неҹә һазырлаша биләр?

⁷ Бир мүәллим кими, сиз кечәҹәјиниз һәр дәрсә габагҹадан һазырлашмалысыныз. Бунун үчүн әввәлҹә арашдыраҹағыныз материалы охујун вә ајәләри ачын. Әсас фикирләрә диггәт јетирин. Дәрсин адыны, јарымбашлыглары, абзаса аид суаллары, охумаг үчүн тәјин олунмуш ајәләри, шәкилләри, мөвзуну ачыгламаға көмәк едәҹәк видеолары нәзәрдән кечирин. Сонра шаҝирдинизин мөвзуну раһат баша дүшүб, тәтбиг етмәси үчүн мәлуматы садә вә ајдын шәкилдә неҹә ачыглаја биләҹәјинизи дүшүнүн (Нәһ. 8:8; Мәс. 15:28а).

8. Колослулара 1:9, 10 ајәләриндән шаҝирдимиз үчүн дуа етмәк барәдә нә өјрәнирик?

⁸ Дәрсә һазырлашмаға шаҝирдиниз вә онун вәзијјәти һагда Јеһоваја дуа етмәк дә дахилдир. Јеһовадан көмәк истәјин ки, инсанын үрәјинә јол тапмаг үчүн Мүгәддәс Китабдан дүзҝүн истифадә етмәји баҹарасыныз. (Колослулара 1:9, 10 ајәләрини охујун.) Шаҝирдинизин чәтин баша дүшәҹәји, јахуд разылашмајаҹағы мәгамлары мүәјјән един. Унутмајын ки, мәгсәдиниз инсана вәфтизә доғру ирәлиләмәјә көмәк етмәкдир.

9. Мүәллим шаҝирдә дәрсә јахшы һазырлашмаға неҹә көмәк едә биләр? Изаһ един.

⁹ Биз үмид едирик ки, мүнтәзәм Мүгәддәс Китаб дәрсләри сајәсиндә шаҝирдин үрәјиндә Јеһованын вә Мәсиһин етдикләринә ҝөрә миннәтдарлыг јаранаҹаг вә о, даһа чох өјрәнмәк истәјәҹәк (Мәт. 5:3, 6). Шаҝирд дәрсдән там фајда әлдә етмәк үчүн фикрини өјрәндикләринә көкләмәлидир. Бунун үчүн она һәр дәрсә габагҹадан һазырлашмағын, јәни мәтни охујуб, ону неҹә тәтбиг едә биләҹәји һагда өнҹәдән  дүшүнмәјин ваҹиблијини баша салын. Буну неҹә етмәк олар? Бирликдә һазырлашын, гој о буну әјани шәкилдә ҝөрсүн *. Суалларын конкрет ҹавабыны тапмағын јолуну ҝөстәрин вә изаһ един ки, әсас сөзләрин, јахуд ифадәләрин алтындан хәтт чәкмәклә ҹавабы тез јадына салаҹаг. Сонра ҹавабы өз сөзләри илә демәјә тәшвиг един. Беләҹә, дәрси гаврајыб-гаврамадығыны биләҹәксиниз. Шаҝирдинизә бир шејин дә ваҹиблијини баша салмалысыныз.

10. Мүгәддәс Китабы һәр ҝүн мүталиә етмәк нәјә ҝөрә ваҹибдир вә бундан там фајданы неҹә әлдә етмәк олар?

¹⁰ Мүәллимлә һәр һәфтә дәрс кечмәкдән әлавә, шаҝирд өзү дә һәр ҝүн бәзи шејләри етмәлидир. О, Јеһоваја гулаг асмалы вә Онунла данышмалыдыр. Јеһоваја гулаг асмаг үчүн һәр ҝүн Мүгәддәс Китабы мүталиә етмәлидир (Јуш. 1:8; Зәб. 1:1—3). Она jw.org сајтында јерләшән «Мүгәддәс Китабын мүталиә ҹәдвәли» * вәрәгәсиндән истифадә етмәји өјрәдин. Мүталиәдән там фајда әлдә етмәси үчүн һәмчинин шаҝирди тәшвиг един ки, охудугларындан Јеһова илә бағлы нә өјрәндији вә өзү үчүн һансы нәтиҹә чыхардығы һагда дүшүнсүн (Һәв. 17:11; Јаг. 1:25).

11. Шаҝирд дүзҝүн дуа етмәји неҹә өјрәнә биләр вә Јеһоваја тез-тез дуа етмәси нә үчүн ваҹибдир?

¹¹ Шаҝирдинизи һәр ҝүн Јеһоваја дуа едиб Онунла данышмаға тәшвиг един. Һәр дәрсин әввәлиндә вә ахырында үрәкдән дуа един вә дуаларынызда шаҝирдинизин дә адыны чәкин. Сизин дуанызы ешитдикҹә о, үрәкдән дуа етмәји, дуасында Јеһова Аллаһа мүраҹиәт етмәји вә Иса Мәсиһин ады илә дуа етмәји өјрәнәҹәк (Мәт. 6:9; Јәһ. 15:16). Тәсәввүр едирсиниз, һәр ҝүн Мүгәддәс Китабы мүталиә етмәк (Јеһоваја гулаг асмаг) вә дуа етмәк (Јеһова илә данышмаг) шаҝирдинизи Јеһоваја неҹә јахынлашдыраҹаг?! (Јаг. 4:8). Бунлара вәрдиш етсә, шаҝирд вәфтизә доғру ирәлиләјәҹәк. Она бу саһәдә башга нә көмәк едә биләр?

12. Шаҝирдин Јеһоваја јахын олмасына неҹә көмәк етмәк олар?

¹² Шаҝирдин Мүгәддәс Китаб дәрси заманы өјрәндикләри тәкҹә ағлына јох,  үрәјинә дә нүфуз етмәлидир. Нә үчүн? Чүнки үрәк — һиссләр вә арзулар инсаны һәрәкәтә тәшвиг едир. Иса Мәсиһ мәнтигли шәкилдә өјрәдирди вә ону динләмәк инсанлара хош иди. Амма инсанлары Исанын ардынҹа ҝетмәјә тәшвиг едән онун өјрәтдикләринин үрәкләринә нүфуз етмәси иди (Лука 24:15, 27, 32). Шаҝирдиниз Јеһованын ҝерчәк Варлыг олдуғуну, Она јахынлашмағын мүмкүн олдуғуну баша дүшмәлидир, Јеһованын она Ата, Аллаһ вә Дост ола биләҹәјини анламалыдыр (Зәб. 25:4, 5). Истәнилән мөвзу заманы диггәти Аллаһын неҹә ҝөзәл Варлыг олдуғуна ҹәмләјин (Чых. 34:5, 6; 1 Бут. 5:6, 7). Шаҝирдә Јеһованын фүсункар хүсусијјәтләрини — мәһәббәтини, хејирхаһлығыны, шәфгәтини ҝөрмәјә көмәк един. Иса Мәсиһ демишди ки, «биринҹи вә ән бөјүк әмр» Јеһованы севмәкдир (Мәт. 22:37, 38). Шаҝирдин үрәјиндә Јеһоваја гаршы дәрин мәһәббәт ојадын.

13. Шаҝирдә Јеһованы јахындан танымаға даһа неҹә көмәк едә биләрсиниз?

¹³ Шаҝирдлә сөһбәт едәркән Јеһованы нә гәдәр чох севдијиниздән данышын. Бу, шаҝирдинизи дүшүндүрә биләр ки, онун Јеһова илә шәхси мүнасибәти олмалы, Ону севмәлидир (Зәб. 73:28). Мәсәлән, ола билсин, тәлим вәсаитиндә, јахуд орада ҝәтирилән ајәдә Јеһованын мәһәббәти, һикмәти, әдаләти, јахуд гүдрәти илә бағлы сизә хүсусилә тәсир едән һансыса фикир вар. Буну шаҝирдинизә билдирин, гој о ҝөрсүн ки, Јеһованы севмәјинизин сәбәбләриндән бири нәдир. Вәфтизә доғру ирәлиләмәк үчүн шаҝирд даһа бир шеј етмәлидир.

14. Ибраниләрә 10:24, 25 ајәләринә әсасән, јығынҹагда иштирак етмәк шаҝирдин инкишафында һансы ролу ојнајыр?

¹⁴ Һәр биримиз шаҝирдимизин вәфтиз олунмасыны истәјирик. Она бу саһәдә көмәк етмәјин ваҹиб үсулларындан бири ибадәт ҝөрүшләриндә иштирак етмәјә тәшвиг етмәкдир. Тәҹрүбәли мүәллимләр гејд едир ки, тез бир заманда јығынҹаға ҝәлмәјә башлајан шаҝирдләр даһа тез инкишаф едир (Зәб. 111:1). Бәзи мүәллимләр шаҝирдә изаһ едир ки, Мүгәддәс Китаб биликләринин јарысыны дәрс кечән заман, јарысыны да јығынҹагда алаҹаг. Шаҝирдинизә Ибраниләрә 10:24, 25 ајәләрини охујун вә јығынҹаглара ҝәлмәјин она неҹә фајда ҝәтирәҹәјини изаһ един. Она «Ибадәт ҝөрүшләримиз неҹә кечирилир?» *  адлы видеону ҝөстәрин. Шаҝирдинизә көмәк един ки, һәр һәфтә ибадәт ҝөрүшләриндә иштирак етмәк һәјатынын ваҹиб һиссәси олсун.

15. Инсаны мүнтәзәм олараг јығынҹаг ҝөрүшләриндә иштирак етмәјә неҹә тәшвиг едә биләрик?

¹⁵ Бәс әҝәр шаҝирдиниз һәлә јығынҹаға ҝәлмәјибсә, јахуд һәрдәнбир ҝәлирсә, нә едә биләрсиниз? Тәзәликҹә јығынҹагда өјрәндијиниз һәр һансы фикри шөвглә она данышын. Бу ону јығынҹаға ади дәвәтдән даһа чох тәшвиг едәҹәк. Она јығынҹагда һал-һазырда арашдырылан «Ҝөзәтчи гүлләси» журналыны, јахуд «Мәсиһи һәјаты вә ибадәти. Иш дәфтәри» вәрәгәсини верин. Нөвбәти һәфтә мүзакирә олунаҹаг мөвзулары она ҝөстәрин вә һансынын онун үчүн даһа мараглы олдуғуну сорушун. Илк ибадәт ҝөрүшү она индијә кими һеч бир дини ҝөрүшүн бағышламадығы ҝөзәл тәәссүраты бағышлајаҹаг (1 Кор. 14:24, 25). Јығынҹагда таныш олдуғу инсанлар она вәфтизә доғру ирәлиләмәјә көмәк едәҹәк, һәмчинин о, орадакы инсанларын ҝөзәл нүмунәсиндән дә чох шеј өјрәнәҹәк.

16. Шаҝирдин вәфтизә доғру ирәлиләмәсинә неҹә көмәк едә биләрик вә нөвбәти мәгаләдә нә һагда данышаҹағыг?

¹⁶ Шаҝирдинизин вәфтиз олунмасы үчүн Мүгәддәс Китаб дәрсләрини неҹә кечирә биләрсиниз? Шаҝирдинизи тәшвиг един ки, дәрсләрә һәр һәфтә вахт ајырсын вә габагҹадан һазырлашсын, бу она дәрсләрин ваҹиблијини баша дүшмәјә көмәк едәҹәк. Һәмчинин ону тәшвиг един ки, Јеһова илә һәр ҝүн үнсијјәт етсин вә Она јахынлашсын. Шаҝирддә јығынҹагларда иштирак етмәјә һәвәс ојадын. (« Вәфтизә доғру ирәлиләмәси үчүн шаҝирд нә етмәлидир?» адлы чәрчивәјә бахын.) Нөвбәти мәгаләдән өјрәнәҹәјимиз кими, шаҝирдә вәфтизә доғру ирәлиләмәјә көмәк етмәк үчүн мүәллимин өһдәсинә дүшән даһа беш шеј вар.