1. Јеһова хидмәтчиләринә неҹә јанашыр?

 ЈЕҺОВА јер үзүндәки хидмәтчиләринә нәзәр саланда нә ҝөрүр? О бизим һәм севинҹли, һәм дә кәдәрли анларымыздан аҝаһдыр (Зәб. 37:18). Јеһова ҝөрәндә ки, емосионал јараларымыз ола-ола хидмәтдә әлимиздән ҝәләни едирик, бизимлә гүрур дујур. Бундан әлавә, О бизә көмәк етмәјә, бизә тәсәлли вермәјә һазырдыр.

2. Јеһова гәлбисыныг инсанлар үчүн нә едир вә биз Онун гајғысыны неҹә дуја биләрик?

² Зәбур 147:3 ајәсиндә дејилир ки, Јеһова гәлбисыныгларын «јараларыны сарыјыр». Бу ајәдә Јеһованын емосионал јарасы олан инсанлара нәвазишлә гајғы ҝөстәрдији тәсвир олунуб. Бәс Јеһованын бу гајғысыны неҹә дуја биләрик? Ҝәлин бир нүмунәјә бахаг. Тәҹрүбәли һәким јаралы инсаны сағалтмаг үчүн чох шеј едә биләр, амма сағалмаг үчүн ҝәрәк һәмин инсан һәкимин мәсләһәтләринә дәгигликлә әмәл етсин. Бу мәгаләдән ҝөрәҹәјик ки, Јеһова емосионал јарасы олан инсанлара Кәламы васитәсилә нә дејир вә Онун мәсләһәтләринә неҹә әмәл етмәк олар.

ЈЕҺОВА БИЗӘ ДӘЈӘРЛИ ОЛДУҒУМУЗУ ХАТЫРЛАДЫР

3. Нәјә ҝөрә бәзи инсанлар өзләрини дәјәрсиз һисс едирләр?

³ Јашадығымыз дүнјада инсанларын бир-биринә севҝиси, демәк олар, һеч дәрәҹәсиндәдир. Бунун да нәтиҹәсиндә инсанлар өзләрини дәјәрсиз һисс едирләр. Һелен a баҹы дејир: «Валидејнләримдән севҝи ҝөрмәмишәм. Атам чох әзазил инсан олуб. О, һәр ҝүн сөзләри илә бизи алчалдырды». Ола билсин, Һелен кими сизинлә дә ушаглыгда амансыз рәфтар едибләр, һеј алчалдыблар,  севилмәдијинизи һисс етдирибләр. Белә һалда, киминсә сизи һәгигәтән севдијинә инанмаг чәтин ола биләр.

4. Зәбур 34:18 ајәсинә әсасән Јеһова бизи нәјә әмин едир?

⁴ Инсанларын сизинлә неҹә рәфтар етмәсиндән асылы олмајараг, Јеһованын сизи севдијинә, дәјәр вердијинә әмин ола биләрсиниз. О, «гәлбисыныглара јахындыр». (Зәбур 34:18 ајәсини охујун.) Әҝәр өзүнүзү пәришан һисс едирсинизсә, унутмајын ки, Јеһова үрәјиниздә јахшы шејләри ҝөрүб вә сизи Өзүнә шәхсән ҹәлб едиб (Јәһ. 6:44). О сизә көмәк етмәјә һәмишә һазырдыр, чүнки Онун ҝөзүндә дәјәрлисиниз.

5. Иса башгаларынын хор бахдығы инсанлара неҹә јанашырды вә биз бундан нә өјрәнирик?

⁵ Исанын нүмунәсиндән Јеһованын бизә олан мүнасибәти барәдә өјрәнә биләрик. Јер үзүндә оларкән Иса башгаларынын хор бахдығы инсанлара диггәт ҝөстәрирди, онларын һалына аҹыјырды (Мәт. 9:9—12). Мәсәлән, ҹидди хәстәлији олан бир гадын сағалмаг үмиди илә Исанын палтарына тохунанда о, гадыны иманына ҝөрә тәрифләмишди вә она үрәк-дирәк вермишди (Марк 5:25—34). Иса Атасынын хүсусијјәтләрини мүкәммәл шәкилдә әкс етдирирди (Јәһ. 14:9). Буна ҝөрә дә Јеһованын сизә дәјәр вердијинә әмин ола биләрсиниз. Јеһова иманынызы, Она олан севҝинизи вә диҝәр ҝөзәл хүсусијјәтләринизи ҝөрүр.

6. Дәјәрсизлик һиссинин өһдәсиндән неҹә ҝәлмәк олар?

⁶ Әҝәр вахташыры өзүнүзү дәјәрсиз һисс едирсинизсә, онда нә едә биләрсиниз? Јеһова үчүн дәјәрли олдуғунузу ҝөстәрән ајәләри охујуб үзәриндә дүшүнүн b (Зәб. 94:19). Әҝәр һансыса мәгсәдинизә чата билмәмисинизсә, јахуд башгалары  гәдәр чох шеј едә билмирсинизсә, буна ҝөрә өзүнүзү гынамајын. Јеһова сиздән ҝүҹүнүз чатмајан бир шеји етмәјинизи ҝөзләмир (Зәб. 103:13, 14). Әҝәр кимсә сизә гаршы кечмишдә зоракы давраныбса, һәмин инсанын һәрәкәтинә ҝөрә өзүнүзү ҝүнаһландырмајын. Сиз бу ҹүр рәфтара лајиг дејилдиниз! Јеһова пислији төрәдән һәмин инсанларла һагг-һесаб чәкәҹәк, онларын гурбанлары илә јох (1 Бут. 3:12). Буну һәмишә јадынызда сахлајын. Сандра адлы баҹы ушаг вахты амансыз рәфтара мәруз галмышды. О дејир: «Тез-тез дуа едиб Јеһоваја јалварырдым ки, өзүмә таразлы јанашмаға, Онун нәзәри илә бахмаға көмәк етсин».

7. Кечмишдә јашадыгларыныз Јеһоваја хидмәтдә һансы фајданы верә биләр?

⁷ Әмин олун, Јеһова сизин васитәнизлә башгаларына көмәк едә биләр. О сизи тәблиғ ишиндә Онун әмәкдашы олмаг шәрәфинә лајиг ҝөрүб (1 Кор. 3:9). Һәјатда јашадыгларыныза ҝөрә инсанларын һиссләрини баша дүшә, онларын һалына аҹыја биләрсиниз. Сизин онлара бөјүк көмәјиниз дәјә биләр. Бајаг ады чәкилән Һелен вахтилә Јеһованын вә баҹы-гардашларын дәстәјини ҝөрмүшдү. Инди о өзү инсанлара көмәк едир. Һелен дејир: «Дәјәрсиз олдуғуму дүшүнүрдүм, амма Јеһованын сајәсиндә севилдијими, јарарлы олдуғуму һисс едирәм». Һелен һал-һазырда өнҹүл кими хидмәт етмәкдән бөјүк севинҹ дујур.

ЈЕҺОВА ОНУН ӘФВИНИ ГӘБУЛ ЕТМӘЈИМИЗИ ИСТӘЈИР

8. Әшија 1:18 ајәсиндә Јеһова бизи нәјә әмин едир?

⁸ Јеһованын бәзи хидмәтчиләри вәфтиздән әввәл вә һәтта сонра ишләдикләри ҝүнаһлара ҝөрә дәрин пешманчылыг һисси кечирирләр. Амма унутмамалыјыг ки, Јеһова бизә олан әнҝин мәһәббәтиндән ирәли ҝәләрәк фидјә вериб. Сөзсүз, О бизим бу һәдијјәни гәбул етмәјимизи истәјир. Јеһова бизи әмин едир ки, әҝәр Онунла арамыздакы «мәсәләләри һәлл» етсәк c, О, ҝүнаһларымызы тамамилә бағышлајаҹаг. (Әшија 1:18 ајәсини охујун.) Јеһованын кечмиш ҝүнаһларымызы јада салмадығыны биләндә үрәјимиз миннәтдарлыгла долур! Бундан әлавә, О, ҝөрдүјүмүз јахшы ишләри һеч вахт унутмур (Зәб. 103:9, 12; Ибр. 6:10).

9. Нәјә ҝөрә диггәтимизи кечмишимизә јох, бу ҝүнүмүзә вә ҝәләҹәјимизә ҹәмләмәлијик?

⁹ Һәлә дә кечмиш сәһвләринизә ҝөрә пешманчылыг чәкирсинизсә, баҹардығыныз гәдәр чалышын диггәтинизи кечмишә јох, бу ҝүнүнүзә вә ҝәләҹәјинизә ҹәмләјәсиниз. Ҝәлин һәвари Булусун нүмунәсинә бахаг. О бир заманлар мәсиһиләри амансызҹасына тәгиб етдији үчүн пешман иди, лакин билирди ки, Јеһова ону бағышлајыб (1 Тим. 1:12—15). Бәс о, кечмишдәки ҝүнаһлары барәдә дүшүнмәјә давам едирди? Неҹә ки Булус нүфузлу фәриси олмаг үчүн әлдә етдији наилијјәтләри јада салмырды, ејнилә кечмиш ҝүнаһлары барәдә чох дүшүнмүрдү (Филип. 3:4—8, 13—15). Әксинә, о, хидмәтини ҹанла-башла јеринә јетирирди. Һәмчинин диггәтини ҝәләҹәјә көкләмишди. Булус кими сиз дә кечмиши дәјишә билмәзсиниз, амма индики шәраитиниздә Јеһованы шәрәфләндирә биләрсиниз. Һәмчинин Онун вәд етдији ҝөзәл ҝәләҹәк барәдә дүшүнә биләрсиниз.

10. Нә вахтса киминсә гәлбини јараламышыгса, нә едә биләрик?

¹⁰ Ола биләр, нә вахтса киминсә гәлбини јараламысыныз вә буна ҝөрә виҹдан әзабы чәкирсиниз. Бу заман нә едә биләрсиниз?  Вәзијјәти дүзәлтмәк үчүн әлиниздән ҝәләни един. Һәмчинин пешман олдуғунузу һәмин инсана сәмими шәкилдә билдирин (2 Кор. 7:11). Гәлбини јараладығыныз инсана көмәк олмасы үчүн Јеһоваја дуа един. Јеһованын сајәсиндә һәм о, һәм дә сиз раһатлыг тапа вә хидмәтинизи давам етдирә биләрсиниз.

11. Јунус пејғәмбәрин һадисәсиндән нә өјрәнә биләрик? (Шәклә бахын.)

¹¹ Кечмишдә етдијиниз сәһвләрдән нәтиҹә чыхарын вә Јеһованын вердији истәнилән тапшырығы јеринә јетирин. Јунус пејғәмбәрин һадисәсини јадымыза салаг. Аллаһ она Нејнәваја ҝетмәји бујурса да, о, тамамилә әкс истигамәтә гачмышды. Јеһова Јунусу ҹәзаландырды вә о, сәһвини баша дүшдү (Јун. 1:1—4, 15—17; 2:7—10). Јеһова бу пејғәмбәриндән әлини үзмәди, Нејнәваја ҝетмәк үчүн она даһа бир фүрсәт верди. Бу дәфә Јунус дәрһал Аллаһын сөзүнә итаәт етди. О, јол вермәди ки, кечмишдәки сәһвинә ҝөрә чәкдији пешманчылыг Јеһовадан ҝәлән тапшырығы јеринә јетирмәјә мане олсун (Јун. 3:1—3).

ЈЕҺОВА МҮГӘДДӘС РУҺУ ВАСИТӘСИЛӘ БИЗӘ ТӘСКИНЛИК ВЕРИР

12. Емосионал травма вә ја итки илә үзләшәндә Јеһова бизә неҹә тәскинлик верир? (Филиппилиләрә 4:6, 7).

¹² Емосионал травма аланда вә ја јахынымызы итирәндә Јеһова мүгәддәс руһу васитәсилә бизә тәскинлик верир. Рон вә Карол адлы бир әр-арвадын аиләсиндә фаҹиә баш вермишди: онларын оғлу интиһар етмишди. Онлар дејир: «Башымыз чох бәла ҝөрүб, амма бу, јашадығымыз ән бетәр дәрд иди. Ҝүнләрлә ҝөзүмүзә јуху ҝетмәди. Һәмин ҝеҹәләри елә һеј дуа едирдик. Нәтиҹәдә, Филиппилиләрә 4:6, 7 ајәләриндә тәсвир олунан гәлб раһатлығыны дујдуг». (Ајәләри охујун.) Ола билсин, һал-һазырда гәлбинизи парампарча едән бир сынагла үзләширсиниз. Онда дуа едиб үрәјинизи Јеһоваја бошалдын. Јеһоваја истәдијиниз гәдәр, узун-узун дуалар един (Зәб. 86:3; 88:1). Ондан дөнә-дөнә мүгәддәс руһ истәјин. Јеһова һеч вахт сизин хаһишинизи ҝери чевирмәз (Лука 11:9—13).

13. Мүгәддәс руһ бизә Јеһоваја хидмәтимизи сәдагәтлә давам етдирмәјә неҹә көмәк едә биләр? (Ефеслиләрә 3:16).

¹³ Үзләшдијиниз һансыса ағыр сынаг сизи тагәтдән салыб? Мүгәддәс руһун вердији ҝүҹлә сиз Јеһоваја хидмәтинизи давам етдирә биләрсиниз. (Ефеслиләрә 3:16 ајәсини охујун.) Ҝөрүн Флора адлы баҹынын башына нә ҝәлмишди. О, әри илә бирликдә хүсуси тәјинатлы мүждәчи кими хидмәт едирди. Бир ҝүн баҹы өјрәнир ки, әри она хәјанәт едиб; нәтиҹәдә, онлар бошанырлар. Баҹы дејир: «Онун хәјанәти мәнә елә бөјүк зәрбә олду ки, башга һеч нә фикирләшә билмирдим. Бу дәрдә дөзә билмәк үчүн дурмадан дуа едиб Јеһовадан мүгәддәс руһ диләјирдим. О, јаралы гәлбимә шәфа верди. Әввәл-әввәл буна таб ҝәтирә билмәјәҹәјими дүшүнсәм дә, Јеһованын вердији ҝүҹ сајәсиндә буну баҹардым». Флора баҹы Јеһованын көмәји илә Она даһа чох етибар етдијини һисс едир. О әминдир ки, Јеһова бүтүн сынаглары боју она дајаг олаҹаг. Флора сөзүнә әлавә едир: «Зәбур 119:32 ајәсиндәки сөзләр мәнә аиддир. Орада дејилир: “Әмрләринин јолунда гачаҹағам, чүнки Сән бу истәји үрәјимә гојмусан”».

14. Јеһовадан мүгәддәс руһ алмаг үчүн нә едә биләрик?

¹⁴ Јеһовадан мүгәддәс руһ диләјәндән сонра дуаныза ујғун неҹә даврана биләрсиниз? Јеһованын мүгәддәс руһуну даһа чох ала биләҹәјиниз ишләрлә мәшғул олун. Мәсәлән, ибадәт ҝөрүшләринә вә тәблиғә ҝедин. Һәр ҝүн Мүгәддәс  Китабы мүталиә етмәјин сајәсиндә ағлынызы Јеһоваја мәгбул фикирләрлә долдура биләҹәксиниз (Филип. 4:8, 9). Охујан заман сынагларла үзләшән инсанларын һадисәләринә диггәт јетирин вә Јеһованын онлара неҹә дөзүм вердији барәдә дәриндән дүшүнүн. Бајаг ады чәкилән Сандра баҹы чохлу шиддәтли сынагларла үзләшмишди. О дејир: «Јусифин һадисәси мәни чох руһландырыр. Јусиф јол вермәди ки, үзләшдији һагсызлыглар вә чәтинликләр Јеһова илә мүнасибәтини зәифләтсин» (Јар. 39:21—23).

ЈЕҺОВА ДИНДАШЛАРЫМЫЗ ВАСИТӘСИЛӘ БИЗӘ ТӘСӘЛЛИ ВЕРИР

15. Бизә кимләр тәсәлли верә биләр вә буну неҹә едә биләрләр? (Һәмчинин шәклә бахын.)

¹⁵ Биз әзаб чәкәндә Јеһова диндашларымыз васитәсилә бизә тәсәлли верир (Кол. 4:8). Баҹы-гардашлар Јеһованын бизә олан мәһәббәтинин ҹанлы нүмунәләридир. Онларын бизә вахт ајырмасы, бизи ҹаныјананлыгла динләмәси гәлбимизи овундура биләр. Диндашларымыз һансыса руһландырыҹы ајә охуја, бизимлә бирҝә дуа едә биләрләр d (Ром. 15:4). Бәзән һансыса баҹы вә ја гардаш бизә Јеһованын дүшүнҹәсини хатырладараг таразлығы горумағымыза көмәк едә биләр. Һәмчинин диндашымыз әмәли көмәк ҝөстәрмәклә, мәсәлән, бизә јемәк биширмәклә дајаг ола биләр.

16. Диндашларымыздан дәстәк алмаг үчүн нә етмәк лазым ҝәлә биләр?

¹⁶ Башгаларындан дәстәк ҝөрмәк үчүн бәзән буну онлардан истәмәк лазым ҝәлир. Баҹы-гардашлар бизи севир вә онлар бизә көмәк  етмәк истәјирләр (Мәс. 17:17). Амма, ола билсин, онлар нә һиссләр кечирдијимизи, нәјә еһтијаҹ дујдуғумузу билмәсинләр (Мәс. 14:10). Мәнәви ҹәһәтдән әзаб чәкирсинизсә, һиссләринизи јеткин мәсиһиләрлә бөлүшүн. Һансы саһәдә көмәјә еһтијаҹ дујдуғунузу онлара ачыг билдирин. Ола билсин, дәрдинизи өзүнүзә јахын һисс етдијиниз бир-ики ағсаггала данышасыныз. Бәзи баҹылар һиссләрини башга јеткин баҹы илә бөлүшәндә раһатлыг тапыр.

17. Баҹы-гардашлардан дәстәк алмағымыза нәләр мане ола биләр вә бу манеәләри неҹә аша биләрик?

¹⁷ Нә гәдәр истәсәниз дә, өзүнүзү башгаларындан тәҹрид етмәјин. Бәлкә дә, о гәдәр кәдәрлисиниз ки, һеч кими ҝөрмәк, һеч кимлә данышмаг истәмирсиниз. Ола билсин, бәзән баҹы-гардашлар һиссләринизи баша дүшмәсин вә ја дүзҝүн сөзләр ишләтмәсин (Јаг. 3:2). Амма гојмајын, бу кими шејләр сизи баҹы-гардашлардан узаглашдырсын, онларын верә биләҹәји дәстәкдән сизи мәһрум етсин. Депрессијадан әзијјәт чәкән Гавин адлы ағсаггал дејир: «Чох вахт ән истәмәдијим шеј достларымла вахт кечирмәк олур». Бунунла белә, Гавин гардаш бу һиссләринә галиб ҝәлиб баҹы-гардашларла вахт кечирир вә бунун она бөјүк хејри олур. Еми адлы баҹы дејир: «Кечмишдә јашадыгларыма ҝөрә инсанлара етибар етмәк мәнә чәтиндир. Амма чалышырам, диндашларымы Јеһова кими севмәји, онлара етибар етмәји өјрәним. Билирәм ки, бу, Јеһованы севиндирир. Мән өзүм дә бундан севинҹ дујурам».

ЈЕҺОВАНЫН ВӘДЛӘРИ СИЗӘ ШӘФА ВЕРСИН

18. Ҝәләҹәкдә нәјин олмасыны сәбирсизликлә ҝөзләјирик вә бунун үчүн индидән нә едә биләрик?

¹⁸ Әминик ки, Јеһова тезликлә физики вә емосионал јараларымызы тамамилә сағалдаҹаг (Вәһј 21:3, 4). Һәмин вахт кечмишдә јашадығымыз дәһшәтли шејләр артыг хатырланмајаҹаг (Әшј. 65:17). Ҝөрдүјүмүз кими, Јеһова сызылдајан јараларымызы индидән сарыјыр. Одур ки, Онун сизә тәсәлли вермәк вә көмәк етмәк үчүн ҝөрдүјү тәдбирләрдән там јарарланын. Јеһованын гајғынызы чәкдијинә бир ан белә шүбһә етмәјин (1 Бут. 5:7).