Бејтелдән олан гардашлар бир илдән чох иди ки, Стејтон-Ајленддә (Нју-Јорк шәһәри) WBBR радиостансијасынын тикинтиси илә мәшғул идиләр. Әввәлҹә онлар әразини тәмизләдиләр. Сонра ишчиләр үчүн бөјүк бир ев, студија вә аваданлыглар үчүн исә ајрыҹа бина тикдиләр. Бу ишләр тамамланандан сонра гардашлар радиојајым үчүн аваданлыглар әлдә етмәјә башладылар. Амма онлар мүәјјән манеәләрлә үзләшдиләр.

Стансијанын әсас антенини гурашдырмаг гардашлар үчүн чох чәтин иди. Онлар 91 метр узунлуғунда олан антени 61 метр һүндүрлүјүндә олан ики дирәјин арасында һоризонтал шәкилдә асмалы идиләр. Илк ҹәһд уғурсуз олду, амма Јеһованын көмәјинә архаланараг онлар нәһајәт буну баҹардылар. Бу лајиһәдә чалышанлардан бири, Калвин Просер демишди: «Әҝәр илк ҹәһдимиз уғурлу олсајды, бәлкә дә, синәмизә дөјүб белә дејәҹәкдик: “Һалал олсун бизә, ҝөр нә етдик!”» Гардашлар баша дүшүрдүләр ки, буну Јеһованын сајәсиндә баҹардылар. Лакин онларын проблемләри бунунла битмәди.

Һәмин дөврдә радиојајым һәлә илк аддымларыны атырды. Буна ҝөрә дә лазыми аваданлыглары тапмаг елә дә асан дејилди. Бунунла белә, гардашлар јахынлыгда әллә дүзәлдилмиш вә истифадә олунмуш 500 ваттлыг бир радиоөтүрүҹү әлдә етдиләр. Онлар микрофон алмадылар, ади телефонун микрофонундан истифадә етдиләр. Феврал ајы иди, гардашлар бир ҝеҹә бу әлдәгајырма ҹиһазы сынагдан кечирмәјә гәрар вердиләр. Онлар сынаг үчүн нә исә јајымламалы идиләр. Буна ҝөрә дә Падшаһлыг нәғмәләрини охудулар. Ернест Лоу гардаш һәмин ҝүн баш верән ҝүлмәли  бир һадисәни хатырлајыб дејир ки, гардашлар нәғмә охујан вахт онлардан тәхминән 25 километр узаглыгда олан һаким Рутерфорддан b зәнҝ ҝәлир. О, Бруклиндә өз радиосунда гардашларын нәғмә охудуғуну ешидир.

Рутерфорд гардаш зарафатла дејир: «Бу сәс-күјү дајандырын. Пишик сүрүсү кими охујурсунуз». Гардашлар бир аз пәрт олуб тез радиоөтүрүҹүнү сөндүрүрләр. Амма радионун ишләдијинә вә артыг илк јајыма һазыр олдуғуна әмин олурлар.

1924-ҹү ил февралын 24-дә илк рәсми јајым заманы Рутерфорд гардаш радиостансијанын «Мәсиһин тапшырдығы иши ҝөрмәјә» һәср олундуғуну билдирди. О, гејд етди ки, бу стансијанын мәгсәди «дининдән, етигадындан асылы олмајараг һәр бир инсана һансы дөврдә јашадығымызы Мүгәддәс Китаб әсасында баша салмагдыр».

Илк јајым уғурлу алынды. WBBR дүз 33 ил тәшкилатымызын радиојајым фәалијјәтиндә апарыҹы рол ојнады.

1924-ҹү илин ијулунда Оһајо штатынын пајтахты Колумбусда Мүгәддәс Китаб Тәдгигатчыларынын топлантысы кечирилди. Дүнјанын дөрд бир тәрәфиндән гонаглар ҝәлмишди. Топлантыда алман, әрәб, франсыз, инҝилис, италјан, Литва, маҹар, полјак, рус, Украјна, јунан вә Скандинавија дилләриндә нитгләр сәсләндирилди. Топлантынын һиссәләри радио васитәсилә јајымланды. Гардашлар јерли бир гәзетдән хаһиш етдиләр ки, топланты програмынын һәр ҝүнү илә бағлы һесабатлар дәрҹ етсин.

Ҹүмә ахшамы, ијулун 24-ү 5 миндән чох баҹы-гардаш топлантынын кечирилдији шәһәрдә тәблиғә јолланды. Онлар 30 минә јахын китаб пајладылар вә минләрлә инсанла Мүгәддәс Китаб дәрсинә башладылар. «Ҝөзәтчи гүлләси»ндә һәмин ҝүнүн «топлантынын ән севинҹли һиссәси» олдуғу гејд олунмушду.

Топлантынын диҝәр әламәтдар һадисәси ҹүмә ҝүнү, 25 ијулда баш верди. Һәмин вахт Рутерфорд гардаш дин хадимләринә гаршы ҹәсарәтли бир бәјанат олан иттиһам актыны охуду. Һүгуги сәнәд шәклиндә олан бу актда сијаси, дини вә коммерсија лидерләри иттиһам олунурду. Актда дејилирди ки, онлар «инсанлара Аллаһын бәшәријјәтә немәтләр вермәк үчүн ҝөрдүјү  тәдбирләр һагда өјрәнмәјә мане олурлар». Бундан әлавә, иттиһамда гејд олунурду ки, бу лидерләр «Милләтләр Ҹәмијјәтини дәстәкләјирләр вә ону Аллаһын падшаһлығынын јер үзүндәки сијаси симасы» адландырырлар. Бу хәбәри инсанлара бәјан етмәк үчүн Мүгәддәс Китаб Тәдгигатчыларына бөјүк ҹәсарәт лазым иди.

Бу топлантынын баҹы-гардашлара тәсири илә бағлы «Ҝөзәтчи гүлләси»ндә јазылмышды: «Колумбусда кечирилән топланты Мәсиһин кичик ордусунун иманыны мөһкәмләндирди... Дүшмәнин онлара гаршы истифадә едәҹәји истәнилән ҝүҹ вә ја гызмар охлар гаршысында горхмаз олмаға көмәк етди». Һәмин топлантыда иштирак етмиш Лио Клаус адлы гардаш хатырлајыр: «Топлантыдан сонра бу бәјанаты әразимиздәки инсанлара чатдырмаг үчүн үрәјимиз алышыб јанырды».

Октјабр ајында Мүгәддәс Китаб Тәдгигатчылары «Килсә хадимләринә гаршы иттиһам» адлы вәрәгәнин милјонларла нүсхәсини пајладылар. Бу, Рутерфорд гардашын килсә әлејһинә бәјанатынын чап версијасы иди. Оклаһома штатынын кичик бир шәһәри олан Кливленддә Франк Ҹонсон гардаш она тәјин олунан саһәдә бу вәрәгәләри пајлајыб баҹы-гардашларла ҝөрүшмәли иди. О бу иши 20 дәгигә тез гуртарыр. Амма диҝәр тәблиғчиләри ачыг бир јердә дајаныб ҝөзләмәси тәһлүкәли иди. Чүнки тәблиғ етмәси шәһәр сакинләрини гәзәбләндирмишди вә онлар гардашы ахтарырдылар. Она ҝөрә дә Франк гардаш јахынлыгдакы килсәдә ҝизләнмәк гәрарына ҝәлир, амма орада һеч кимин олмадығыны ҝөрүб бош дајанмыр. Гардаш «Килсә хадимләринә гаршы иттиһам» вәрәгәсини пасторун Библијасынын арасына вә һәр отураҹағын үзәринә гојур. О буну ҹәлд едиб килсәдән чыхыр. Амма һәлә вахты галдығы үчүн диҝәр ики килсәјә дә ҝириб ејни шеји едир.

Сонра Франк гардаш гача-гача тәблиғчиләрлә ҝөрүшмәли олдуғу јерә ҝедир. Орада јанаҹагдолдурма мәнтәгәсинин архасында ҝизләниб онун далынҹа дүшән адамлары изләјир. Һәмин адамлар орадан машынла өтүб-кечирләр, амма ону ҝөрмүрләр. Онлар ҝедән кими јахынлыгдакы әразидә тәблиғ едән баҹы-гардашлар машынла ҝәлиб Франк гардашы ҝөтүрүрләр вә бирликдә орадан узаглашырлар.

Һәмин гардашлардан бири о ҝүнү хатырлајараг дејир: «Ораны тәрк едәндә үч килсәнин јанындан кечиб ҝетдик. Һәр килсәнин габағында 50-јә јахын адам дурмушду. Онлардан бәзиләри вәрәгәни охујур, бәзиләри исә әлини јухары галдырыб ону пастора ҝөстәрирдиләр. Јахшы ки, вахтында арадан чыхмышдыг. Аллаһымыз Јеһоваја шүкүр едирдик ки, бизи горуду вә Падшаһлығын дүшмәнләринин әлинә дүшмәмәк үчүн бизә һикмәт верди».

Башга өлкәләрдә дә Мүгәддәс Китаб Тәдгигатчылары бу ҹүр ҹәсарәтлә шаһидлик верирдиләр. Франсанын шималында Јосеф Крет Полшадан ҝәлән мәдән ишчиләринә тәблиғ едирди. Гардаш «Өләнләр тезликлә дириләҹәк» адлы нитглә чыхыш етмәли иди. Баҹы-гардашлар шәһәр сакинләринә дәвәтнамәләр пајлајырдылар, амма кешиш килсәјә ҝәләнләрә ора ҝетмәмәклә бағлы хәбәрдарлыг етмишди. Буна бахмајараг, инсанлар онун дедијинин әксини етдиләр. Кешишин өзү дә дахил олмагла, 5 миндән чох инсан нитгә гулаг асмаға ҝәлмишди. Јосеф гардаш кешиши өз етигадыны мүдафиә етмәјә дәвәт етди, амма кешиш истәмәди. Нитгдән сонра гардаш әлиндәки бүтүн нәшрләри ора ҝәләнләрә пајлады. Чүнки бу инсанларын Аллаһын Кәламына сусадығыны ҝөрүрдү (Амус 8:11).

Африкада Клод Браун гардаш хош хәбәри Гызыл Саһилә (индики Гана) чатдырмышды. Онун нитгләри вә пајладығы нәшрләр сајәсиндә һәгигәт  һәмин өлкәдә тез бир заманда јајылды. Әҹзачылығы охујан Ҹон Бланксон адлы бир нәфәр онун нитгләриндән бирини динләмәјә ҝәлмишди. О, дәрһал баша дүшдү ки, һәгигәти тапыб. Ҹон демишди: «Һәгигәт мәни ҹуша ҝәтирмишди. Әҹзачылыг мәктәбиндә бу барәдә һамыја данышырдым».

Ҹон Үч үгнум тәлиминин Мүгәддәс Китаба әсасланмадығыны баша дүшүр. Буна ҝөрә дә бир ҝүн килсәјә ҝедиб кешишә Үч үгнум барәдә суал верир. Кешиш гышгырыб ону говур: «Сән христиан дејилсән, сән Иблисә мәхсуссан. Рәдд ол бурадан!»

Евә гајыданда Ҹон кешишә мәктуб јазыр вә ону Үч үгнум тәлимини һамынын гаршысында мүдафиә етмәјә чағырыр. Буна ҹаваб олараг кешиш Ҹону әҹзачылыг мәктәбинин досентинин отағына чағыртдырыр. Досент ондан кешишә доғрудан да мәктуб јазыб-јазмадығыны сорушур. Ҹон дејир:

— Бәли, јазмышам.

Досент Ҹондан кешишә мәктуб јазыб үзр истәмәји тәләб едир. Буна ҝөрә дә Ҹон белә мәктуб јазыр: «Һөрмәтли кешиш, мүәллим деди ки, сиздән үзр истәјим. Мән үзр истәмәјә һазырам, амма бир шәртлә ки, сиз јалан тәлимләр өјрәтдијинизи бојнунуза аласыныз». Досент мәәттәл галыб сорушур:

— Бланксон, буну јазмаг истәјирсән?

— Бәли, мүәллим, бундан артыг һеч нә јаза билмәрәм.

— Сән мәктәбдән говулаҹагсан. Дүшүнмә ки, һөкумәт килсәсинин кешишинә гаршы чыхыб дөвләт мәктәбиндә гала биләрсән.

— Ахы мүәллим, сиз дәрс изаһ едәндә биз нәјисә баша дүшмүрүксә, суал веририк, дүздү?

— Дүздүр.

— Елә мән дә буну еләмишәм. Бу кешиш бизә Мүгәддәс Китабы өјрәдирди. Мән дә она суал вердим. Әҝәр о, суала ҹаваб верә билмирсә, мән ондан нијә үзр истәмәлијәм?

Ҹон Бланксон гардаш нә кешишдән үзр истәјир, нә дә мәктәбдән говулур.

«Ҝөзәтчи гүлләси» һәмин ил әрзиндә ҝөрүлән ишләри белә иҹмал етмишди: «Биз Давудун бу сөзләринә шәрикик: “Дөјүш үчүн белими гүввәтлә гуршајарсан” (Зәбур 18:39). Бу ил чох руһландырыҹы ил олду. Чүнки Рәббимизин әлини үзәримиздә һисс етдик... Она һәгигәтән һәср олунан кәсләр... бөјүк севинҹлә шаһидлик вердиләр».

Илин сонунда гардашлар даһа бир радиостансија ачмағы планлашдырдылар. Бу стансија Чикаго јахынлығында инша едилди. Онун адыны «Кәлам» мәнасыны верән «WORD» гојдулар. 5000 ваттлыг радиоөтүрүҹүсү олан бу јени стансија Падшаһлыг һагда мүждәни јүзләрлә километр узаға, һәтта шималда јерләшән Канадаја өтүрә биләҹәкди.

1925-ҹи илдә руһани нур даһа да ҝур шәфәг сачаҹагды. Белә ки, Мүгәддәс Китаб Тәдгигатчылары Вәһј 12-ҹи фәсли даһа ајдын баша дүшәҹәкдиләр. Бу билик бәзиләри үчүн бүдрәмә дашы олаҹагды. Әксәријјәт исә ҝөјдә баш верән ҝөзәҝөрүнмәз һадисәләри вә бунларын Аллаһын јер үзүндәки халгына тәсирини даһа ајдын баша дүшдүкләринә ҝөрә севинәҹәкдиләр.