1. Шаҝирдләри илә кечирдији сонунҹу ҝеҹә Иса Мәсиһ нә һагда данышмышды?

ИСА МӘСИҺ шаҝирдләри илә кечирдији сонунҹу ҝеҹә мәһәббәт ҝөстәрмәк, севмәк һагда тәхминән 30 дәфә сөз ачмышды. О демишди ки, шаҝирдләри бир-бирини севмәлидир (Јәһ. 15:12, 17). Онларын бир-биринә олан мәһәббәти елә габарыг олмалыдыр ки, инсанлар онларын Мәсиһин һәгиги давамчылары олдуғуну ајдын ҝөрсүн (Јәһ. 13:34, 35). Иса Мәсиһин һаггында бәһс етдији мәһәббәт садәҹә һиссдән ибарәт дејил. Бу, мәһәббәтин ән али дәрәҹәси олан фәдакар мәһәббәтдир. О демишди: «Достлары уғрунда ҹаныны фәда едән инсанын мәһәббәтиндән бөјүк мәһәббәт јохдур. Әмрләримә әмәл едирсинизсә, мәним достларымсыныз» (Јәһ. 15:13, 14).

2. а) Аллаһын хидмәтчиләри арасында һансы хүсусијјәтләр һөкм сүрүр? б) Бу мәгаләдә һансы суаллары мүзакирә едәҹәјик?

² Һәгиги, фәдакар мәһәббәт вә мөһкәм бирлик бу ҝүн Јеһованын хидмәтчиләрини фәргләндирән хүсусијјәтләрдир (1 Јәһ. 3:10, 11). Неҹә дә хошдур ки, миллијјәтиндән, гәбиләсиндән, һансы дилдә данышмасындан, бөјүдүјү мүһитдән асылы олмајараг Јеһованын хидмәтчиләри арасында бу ҹүр мәһәббәт һөкм сүрүр. Бәс нәјә ҝөрә бу ҝүн мәһәббәт  ҝөстәрмәк хүсусилә ваҹибдир? Јеһова Аллаһ вә Иса Мәсиһ мәһәббәтләри илә бизи неҹә мөһкәмләндирир? Ајры-ајрылыгда һәр биримиз башгаларыны руһландырыб мөһкәмләндирмәк үчүн бу ҹүр мәһәббәти неҹә ҝөстәрә биләрик? (1 Кор. 8:1).

3. Јашадығымыз бу «сон дәрәҹә чәтин» дөвр инсанлара неҹә тәсир едир?

³ Јашадығымыз сон дәрәҹә чәтин бир дөврдә өмрүмүз «әзабла, гәм-гүссә илә» кечдији үчүн инсанлар мүхтәлиф дәрәҹәли мәнәви изтираблардан әзијјәт чәкир (Зәб. 90:10; 2 Тим. 3:1—5). Чох адам бу изтираблара таб ҝәтирә билмәдији үчүн јашамаг истәмир. Һесабламалара әсасән, һәр ил 800 000-дән чох инсан, јәни һәр 40 санијәдә бир нәфәр интиһар едир. Әфсуслар олсун ки, һәтта бәзи мәсиһиләр дә бу ҹүр изтираблара дөзмәјиб өзләринә гәсд етмишдиләр.

4. Мүгәддәс Китабда кимләр өзләринә өлүм арзуламышды?

⁴ Гәдим дөврдә дә Аллаһын бәзи мөмин бәндәләри јашадыглары чәтинликләрдән о гәдәр тәнҝә ҝәлмишдиләр ки, өзләринә өлүм арзуламышдылар. Мәсәлән, әзаблар ичиндә гыврылан Әјјуб пејғәмбәр аһ-зарла демишди: «Безмишәм, даһа јашамаг истәмирәм» (Әјј. 7:16; 14:13). Јунус пејғәмбәр вәзијјәтин дәјишилмәсинә ҝөрә елә мәјус олмушду ки, Јеһоваја бу сөзләри демишди: «Инди исә, еј Јеһова, јалварырам, ҹанымы ал. Нијә јашајырам, өлсәм, бундан јахшыдыр» (Јун. 4:3). Һәмчинин Јеһованын садиг хидмәтчиси олан Илјас пејғәмбәр елә үмидсиз иди ки, демишди: «Даһа бәсдир! Јеһова, ҹанымы ал» (1 Пад. 19:4). Бунунла белә, Јеһова үчүн бу хидмәтчиләри чох әзиз иди вә О, онларын јашамасыны истәјирди. Аллаһ бәндәләрини кечирдији бу һиссләрә ҝөрә гынамады. Әксинә, онлара өлмәк истәјини дәф етмәјә көмәк етди вә бундан сонра да сәдагәтлә хидмәт етмәләри үчүн руһландырды.

5. Нә үчүн баҹы-гардашларымызын мәһәббәтимизә бу ҝүн даһа чох еһтијаҹы вар?

⁵ Бүтүн баҹы-гардашларымыз бу ҹүр һиссләр кечирмәсә дә, әксәријјәти стрессли вәзијјәтләрлә үзләшир вә мәһәббәтимизә еһтијаҹлары вар. Мәсәлән, онларын бәзиләри истеһзалара, тәгибләрә мәруз галыр. Диҝәрләри иш јериндә тәһгирләрин, гејбәтин гурбаны олур. Кимиси иш саатларынын чох олмасындан, ҝәрҝин иш режиминдән јорулуб. Бир башгаларыны аилә проблемләри, ола билсин, иманда олмајан һәјат јолдашынын арамсыз тәнгидләри әлдән салыб. Бу вә бу кими диҝәр тәзјигләрлә үзләшән баҹы-гардашлар һәм физики, һәм дә мәнәви ҹәһәтдән битиб-түкәнирләр. Бәс онлара ким дајаг ола биләр?

6. Јеһова Аллаһын мәһәббәти хидмәтчиләрини неҹә мөһкәмләндирир?

⁶ Јеһова Аллаһ хидмәтчиләрини түкәнмәз мәһәббәтинә әмин едәрәк руһән мөһкәмләндирир. О, исраиллиләрә демишди: «Мәнә әзиз олдун, сәни шәрәфләндирдим, сәни севдим... Горхма, Мән сәнинләјәм» (Әшј. 43:4, 5). Тәсәввүр етмәк олар бу сөзләр халгы неҹә руһландырмышды. Јеһованын бир хидмәтчиси кими сиз дә әмин ола биләрсиниз ки, Она чох әзизсиниз *. Аллаһын Кәламында Јеһованын сәдагәтли бәндәләринә нөвбәти вәд верилир: «О, Гадир Аллаһдыр, сәнә ниҹат верәҹәк. Сәнә ҝөрә шадланаҹаг, севинҹи јерә-ҝөјә сығмајаҹаг» (Сәф. 3:16, 17).

7. Һансы мәнада Јеһова Аллаһын мәһәббәти ананын өвладына бәсләдији мәһәббәтә бәнзәјир? (Мәгаләнин әввәлиндәки шәклә бахын.)

 ⁷ Јеһова Аллаһ үзләшдијимиз истәнилән сынаг заманы бизә дајаг олаҹағына вә тәсәлли верәҹәјинә сөз верир. «Сиз бәсләнәҹәксиниз, күрәкдә ҝәздириләҹәк, диз үстдә ојнадылаҹагсыныз. Ана оғлуну овундурдуғу кими, Мән дә сизи овундураҹағам» (Әшј. 66:12, 13). Гајғыкеш ананын баласыны күрәјиндә ҝәздирдијини, диз үстдә ојнатдығыны тәсәввүрүнүздә ҹанландырын! Јеһова бунунла мөмин бәндәләрини нә гәдәр нәвазишлә севдијини, онлара бәсләдији мәһәббәтин нә гәдәр бөјүк олдуғуну ҝөстәрир. Сиз Јеһова үчүн чох дәјәрли вә әзизсиниз. Буна зәррә гәдәр дә шүбһә етмәјин (Әрм. 31:3).

8, 9. Иса Мәсиһин мәһәббәти бизи неҹә мөһкәмләндирир?

⁸ Јеһованын бизи севдијинә шүбһә етмәмәјимизин диҝәр сәбәби дә вар: «Аллаһ дүнјаны о гәдәр севир ки, јеҝанә Оғлуну онун уғрунда фәда етди. Буну она ҝөрә етди ки, она иман едәнләр мәһв олмасын, онларын әбәди һәјаты олсун» (Јәһ. 3:16). Иса Мәсиһ дә өз һәјатыны бизим уғрумузда гурбан вермәклә мәһәббәтинин бөјүклүјүнү ҝөстәрди. Һәгигәтән дә, белә бир мәһәббәти дујмаг инсана гол-ганад верир! Аллаһын Кәламында јазылыб ки, һеч бир дәрд-бәла, ағры-аҹы бизи Мәсиһин мәһәббәтиндән ајыра билмәз (Ром. 8:35, 38, 39).

⁹ Бәзән үзләшдијимиз проблемләр бизи физики, емосионал ҹәһәтдән зәифләдир, јахуд Јеһоваја хидмәтдә севинҹимизи алыр. Лакин Мәсиһин мәһәббәти һагда дүшүнмәк бизә дөзмәк үчүн ҝүҹ верә биләр. (2 Коринфлиләрә 5:14, 15 ајәләрини охујун.) Бу мәһәббәт бизә һәтта фәлакәт, тәгиб, шәхси проблемләр вә нараһатлыглар заманы белә, тәслим олмамаға, јашамаг ешгимизи горујуб Јеһоваја хидмәти давам етдирмәјә тәкан верир.

10, 11. Руһдан дүшмүш диндашымызы мөһкәмләндирмәк кимин мәсулијјәтидир? Изаһ един.

¹⁰ Јеһова Аллаһ бизә һәмчинин јығынҹаг васитәсилә мәһәббәтини ҝөстәрир. Баҹы-гардашларымыза мәһәббәт бәсләмәклә Јеһованын мәһәббәтинә гаршылыг вермиш олуруг. Биз әлимиздән ҝәләни едиб онлара дәјәрли олдугларына, Јеһованын онлары севдијинә әмин етмәлијик (1 Јәһ.  4:19—21). Һәвари Булус јазмышды: «Инди олдуғу кими, бундан сонра да бир-биринизә тәсәлли верин вә бир-биринизи мөһкәмләндирин» (1 Салон. 5:11). Бу, јалныз ағсаггалларын мәсулијјәти дејил. Јығынҹағын һәр бир үзвү Јеһова Аллаһдан вә Иса Мәсиһдән өрнәк алараг баҹы-гардашлара тәсәлли вериб руһландыра биләр. (Ромалылара 15:1, 2 ајәләрини охујун.)

¹¹ Јығынҹагда емосионал позунтулары олан бәзи баҹы-гардашларын мүтәхәссис көмәјинә вә тибби мүалиҹәјә еһтијаҹы ола биләр (Лука 5:31). Ағсаггаллар вә јығынҹағын диҝәр үзвләри әгли сағламлыг үзрә мүтәхәссис олмадыгларыны баша дүшүрләр. Лакин јығынҹағын һәр бир үзвү «гәмҝинләрә тәскинлик верин, зәифләрә дајаг олун вә һамыја гаршы сәбир ҝөстәрин» мәсләһәтинә әмәл етмәклә диндашларына әвәзсиз көмәк едә биләр (1 Салон. 5:14). Белә баҹы-гардашларын дәрдинә шәрик олмаг, онлара сәбирлә јанашмаг, руһландырмаг һәр бир мәсиһинин борҹудур. Бәс сиз баҹы-гардашлара дајаг олур, онлары руһландырырсыныз? Буну неҹә етмәји билсәниз, даһа чох фајда вермиш оларсыныз.

12. Јығынҹағын ҝөстәрдији мәһәббәт бир баҹыны неҹә дирчәлтди?

¹² Мәһәббәтимиз мәнәви изтираб чәкәнләри неҹә дирчәлдә биләр? Авропада јашајан бир баҹы бөлүшүр: «Һәрдән өзүмү өлдүрмәк истәјирәм. Лакин мәним мөһкәм дәстәк командам вар. Ҝетдијим јығынҹаг һәјатымы хилас едиб. Баҹы-гардашлар һәмишә мәни руһландырыр, мәһәббәт ҝөстәрирләр. Депрессијадан әзијјәт чәкдијими ҹәми бир нечә нәфәр билсә дә, бүтүн јығынҹаг һәмишә мәнә дајаг олур. Бир әр-арвад елә бил доғма ата-анамдыр. Онлар мәним гајғыма галырлар, демәк олар ҝүнүн 24 сааты јанымдадырлар». Дүздүр, һамынын бу ҹүр көмәк етмәк имканы олмур, амма һәр биримиз мәнәви изтираб чәкән диндашларымыза дајаг олмаг үчүн нәсә едә биләрик *.

13. Башгаларыны руһландырмаг үчүн нә едә биләрик?

¹³ Јахшы динләјиҹи олун (Јаг. 1:19). Гаршы тәрәфи ҹаныјананлыгла динләмәк мәһәббәтин тәҹәссүмүдүр. Инсанын кечирдији һиссләри баша дүшмәк үчүн нәзакәтлә суаллар вермәк олар. Онда диндашыныз онун дәрдинә шәрик олдуғунузу ҝөрәҹәк. Гој бу һәмчинин сизин симаныздан ҝөрүнсүн. Ола билсин, кимсә данышаркән ән хырда деталларына гәдәр изаһ едир. Бу заман сәбирли олун вә инсанын сөзүнү кәсмәмәјә чалышын. Диггәтлә гулаг асараг онун һансы һиссләри кечирдијини даһа јахшы анлаја биләҹәксиниз. Онда диндашынызын етибарыны газанаҹагсыныз вә чох ҝүман ки, о, дедикләринизә гулаг асаҹаг. Һиссләринә биҝанә олмадығынызы ҝөрмәк она сөзүн әсл мәнасында тәсәлли верә биләр.

14. Нә үчүн инсанлара тәнгиди мүнасибәт бәсләмәмәлијик?

¹⁴ Тәнгиди јанашмајын. Депрессијадан әзијјәт чәкән инсана тәнгиди мүнасибәт онун өзүнү даһа пис һисс етмәсинә ҝәтириб чыхара биләр. Бу заман көмәк етмәк үчүн ҝөстәрдијиниз ҹәһдләр боша чыхаҹаг. «Дүшүнмәдән дејилән сөз гылынҹ зәрбәсинә бәнзәр, һикмәтли инсанын дили исә мәлһәмдир» (Мәс. 12:18). Әлбәттә ки, биз биләрәкдән депрессијада олан инсана јаралајыҹы сөзләримизлә «зәрбә» ендирмәрик. Лакин бир шеј вар ки, билмәдән вурдуғумуз зәрбә дә инсаны дәриндән јаралајыр. Иман баҹы-гардашларымызы мәһәббәтлә мөһкәмләндирмәк  истәјириксә, өзүмүзү онун јеринә гојараг вәзијјәтини анламаға чалышмалыјыг (Мәт. 7:12).

15. Һансы аләтин көмәји илә башгаларыны мәһәббәтлә мөһкәмләндирә биләрик?

¹⁵ Аллаһын Кәламы илә тәсәлли един. (Ромалылара 15:4, 5 ајәләрини охујун.) Мүгәддәс Китаб тәсәлливериҹи фикирләрлә долу олан бөјүк хәзинәдир. Чүнки о, бизә «дөзүм вә тәсәлли верән» Аллаһын сөзүдүр. Бизә гәлб раһатлығы бәхш едән ајәләрлә јанашы, Мүгәддәс Китаба әсасланан боллуҹа вәсаитләрә саһибик. Мәсәлән, «Ҝөзәтчи Гүлләси нәшрләринин индекси» вә «Јеһованын Шаһидләринин нәшрләри үзрә ахтарыш» вәсаитләриндән јарарлана биләрик. Бу вәсаитләр мүхтәлиф чәтинликләрлә мүбаризә апармаг үчүн Мүгәддәс Китаба әсасланан руһландырыҹы фикирләр тапмағымыза көмәк едир. Тапдығымыз фикирләр сајәсиндә диндашымызы руһландырмаг вә тәсәлли вермәк ҹәһдләримиз даһа еффектив олаҹаг.

16. Депрессијада олан диндашымыза көмәк етмәк үчүн һансы хүсусијјәтләри тәзаһүр етдирмәлијик?

¹⁶ Мүлајим вә нәвазишли олун. Бу хүсусијјәтләр башгаларыны руһландыраркән ҝөстәрдијимиз мәһәббәт хүсусијјәтинин ваҹиб јөнүдүр. Јеһова «мәрһәмәтли Ата вә һәр ҹүр тәсәлли» Аллаһыдыр, О, хидмәтчиләринә гаршы рәһмлидир. (2 Коринфлиләрә 1:3—6 ајәләрини охујун; Лука 1:78; Ром. 15:13.) Јеһованын бу хүсусијјәтләрини тәзаһүр етдирән һәвари Булус бизим үчүн ҝөзәл өрнәкдир. О демишди: «Биз сизинлә көрпәләрини әмиздириб әзизләјән ана кими нәвазишлә давранмышыг. Сизи севдијимиз үчүн сизә нәинки Аллаһын мүждәсини чатдырмаға, һәтта өз ҹанымызы да вермәјә һазыр олмушуг, ахы сиз бизә чох әзиз идиниз» (1 Салон. 2:7, 8). Биз дә бу ҹүр илаһи хүсусијјәтләри тәзаһүр етдирмәклә руһдан дүшән баҹы-гардашларымызын дуаларына ҹаваб ола биләрик.

17. Баҹы-гардашларымызы руһландырмаг үчүн онлара неҹә мүнасибәт бәсләмәлијик?

¹⁷ Диндашларыныздан мүкәммәллик ҝөзләмәјин. Реалист олун. Онлардан гүсурсузлуг ҝөзләмәјиниз мәјуслугла нәтиҹәләнәр (Ваиз 7:21, 22). Унутмајын ки, Јеһова Аллаһ да биздән мүкәммәллик јох, реал шејләр ҝөзләјир. Аллаһымыздан өрнәк алараг биз дә бир-биримизин гејри-камиллијинә сәбирлә јанашмалыјыг (Ефес. 4:2, 32). Диндашларымызын Јеһоваја хидмәтдә әлләриндән ҝәләни етмәдикләринә ејһам вурмагданса, онлары етдикләри шејләрә ҝөрә тәрифләмәк даһа дүзҝүн олар. Беләҹә, онлары руһландыраҹағыг. Сәмими тәриф сөзләримиз онлары мөһкәмләндирәҹәк вә онлар Јеһоваја хидмәтдә етдикләриндән севинҹ дујаҹаглар. Разылашарсыныз ки, бу, диндашларымызы башгалары илә мүгајисә едәрәк онларын гәлбини јараламагдан гат-гат јахшыдыр (Гал. 6:4).

18. Башгаларыны мәһәббәтлә мөһкәмләндирмәјә бизи нә тәшвиг едир?

¹⁸ Јеһованын һәр бир хидмәтчиси Она вә һәјатыны фидјә олараг гурбан верән Мәсиһә чох әзиздир (Гал. 2:20). Биз диндашларымызы чох севирик вә истәјирик ки, онлара сәмими гајғы ҝөстәрәк. Тәравәт мәнбәји олмаг үчүн «ҝәлин сүлһә апаран вә бир-биримизи руһландыран шејләрә ҹан атаг» (Ром. 14:19). Јер үзүнүн Ҹәннәт олаҹағы ҝүнү сәбирсизликлә ҝөзләјирик, бах онда руһдан дүшмәјә һеч бир сәбәб галмајаҹаг! О заман нә хәстәлик, нә мүһарибә, нә өлүм, нә тәгиб, нә мәишәт проблемләри, нә дә гәм-кәдәр олмајаҹаг. Миниллијин сонунда бәшәријјәт камиллијә јетишәҹәк. Јеһова сонунҹу сынагдан кечәнләри өвладлыға ҝөтүрәҹәк вә онлар «Аллаһын өвладларынын шанлы азадлығына» говушаҹаглар (Ром. 8:21). Ҝәлин бундан сонра да бир-биримизи мәһәббәтлә мөһкәмләндирәк вә бу мөһтәшәм мүкафаты алмаг үчүн бир-биримизә дајаг олаг!