ДҮНЈАНЫН һәр бир јериндә мәсиһи ағсаггаллар онлара һәвалә олунан иши чох гијмәтләндирирләр. Онлар бизим үчүн әсл һәдијјәдир! Бу јахынларда тәшкилатда белә бир дәјишиклик баш верди: јашлы мәсиһи ағсаггаллара өһдәләриндә олан бәзи бөјүк мәсулијјәтләри ҹаван ағсаггаллара өтүрмәк бујрулду.

Бу дәјишиклик ондан ибарәтдир ки, рајон нәзарәтчиләри вә теократик мәктәбләрдә тәлим верән гардашлар 70 јашына чатанда тәјинатларындан азад олунаҹаглар. Ејнилә, филиал комитәсинин вә ја јығынҹағын ағсаггаллар шурасынын координатору кими хидмәт едән гардашлар 80 јашына чатанда бу вә бу кими диҝәр тәјинатларыны ҹаван ағсаггаллара тәһвил верәҹәкләр. Бәс гоҹаман ағсаггалларымыз бу дәјишиклијә неҹә һај вердиләр? Онлар Јеһоваја вә Онун тәшкилатына етибар етдикләрини ҝөстәрдиләр.

Тәхминән 49 ил филиал комитәсинин координатору кими хидмәт етмиш Кен гардаш дејир: «Мән бу гәрарла там разы идим. Буну билән ҝүн Јеһоваја дуа едиб координатор кими хидмәт етмәјә јарарлы ҹаван бир гардаша еһтијаҹымызын олдуғуну билдирдим». Бүтүн дүнјадакы јашлы ағсаггаллар бу јенилијә белә әһвал-руһијјә илә јанашдылар. Сөзсүз ки, онлар  баҹы-гардашлара хидмәт етмәји севдикләри үчүн әввәл-әввәл мүәјјән мәјуслуг кечирмишдиләр.

Ағсаггаллар шурасынын координатору кими хидмәт етмиш Есперандијо адлы бир ағсаггал дејир: «Ачығы, буна ҝөрә бир аз пис олмушдум». Лакин о әлавә едир: «Әслиндә, ҝетдикҹә писләшән сәһһәтимин гајғысына галмаг үчүн мәнә даһа чох вахт лазым иди». Јығынҹаг үчүн әсил һәдијјә олан Есперандијо гардаш бу ҝүн дә Јеһоваја хидмәтини сәдагәтлә давам етдирир.

Бәс узун мүддәт сәјјар нәзарәтчи кими хидмәт етдикдән сонра диҝәр хидмәт нөвләринә тәјин олунан гардашлар барәдә нә демәк олар? 38 ил сәјјар нәзарәтчи кими хидмәт етмиш Алан адлы гардаш дејир: «Буну өјрәнәндә јеримдәҹә донуб галдым». Бунунла белә, ҝәнҹ гардашлара тәлим вермәјин нә гәдәр фајда ҝәтирдијини анлајан бу гардаш Јеһоваја хидмәтини сәдагәтлә давам етдирир.

Үмумиликдә 40 илә јахын сәјјар нәзарәтчи вә тәлиматчы кими хидмәт етмиш Рассел адлы гардаш өзүнүн вә һәјат јолдашынын әввәл-әввәл кечирдији нараһатлыг барәдә дејир: «Биз тәјинатымызы чох севирдик вә хидмәтимизи давам етмәјә ҝүҹүмүзүн чатдығыны һисс едирдик». Рассел гардаш вә һәјат јолдашы һал-һазырда хидмәт етдикләри јығынҹагла өз тәҹрүбә вә баҹарыгларыны бөлүшүр. Онларла әмәкдашлыг едән тәблиғчиләр бундан бөјүк севинҹ әлдә едир.

Ола билсин, сиз јухарыда ады чәкилән гардашларын кечирдији һиссләри кечирмәмисиниз. Онда 2-ҹи Ишмуил китабында јазылмыш бир һадисә сизә бу һиссләри анламаға көмәк едәр.

Ҝәлин Абсаламын атасы Давуда гаршы чыхдығы һадисәни јадымыза салаг. Давуд падшаһ Јерусәлимдән Иордан чајынын шәрг саһилинә, Маһанајимә гачыр. Падшаһын вә јанындакы инсанларын бурада галмаг үчүн мүәјјән шејләрә еһтијаҹы вар иди. Һәмин вахт баш верәнләри хатырлајырсыныз?

Бу әразидә јашајан үч киши јорған-дөшәк, мүхтәлиф әрзаглар вә лазыми габ-гаҹаг ҝәтирир. Онлардан бири Бәрзиллај иди (2 Ишм. 17:27—29). Бир мүддәтдән сонра Абсаламын үсјаны јатырылыр вә Давуд падшаһ Јерусәлимә ҝери гајыдыр. Бәрзиллај ону Иордан чајына гәдәр өтүрүр. Бәрзиллајын етдикләринин гаршылығында падшаһ ону Јерусәлимдә јашамаға дәвәт едир вә ону азугә илә тәмин едәҹәјини дејир. Әслиндә, Бәрзиллај «варлы-һаллы адам иди» вә онун бу азугәјә еһтијаҹы да јох иди (2 Ишм. 19:31—33). Чох јәгин ки, Давуд падшаһ онда олан кејфијјәтләри бәјәндији үчүн онун мәсләһәтләриндән, тәҹрүбәсиндән фајдаланмаг истәјирди. Сөзсүз ки, Бәрзиллај үчүн падшаһ сарајында јашамаг вә ишләмәк бөјүк шәрәф оларды.

Реалист вә тәвазөкар инсан олан Бәрзиллај падшаһа дејир: «Сәксән јашым вар, јахшыны писдән ајырд едә билмирәм». О, бунунла нә  демәк истәјирди? Сөзсүз ки, Бәрзиллај бу јашына гәдәр һикмәт газанмышды. Бир мүддәт сонра Рәһабам падшаһа јахшы мәсләһәт верән ағсаггаллар кими, о да јахшы мәсләһәтләр верә билирди (1 Пад. 12:6, 7; Зәб. 92:12—14; Мәс. 16:31). Демәли, Бәрзиллај «јахшыны писдән ајырд едә билмирәм» дејәндә гоҹалығын өзү илә ҝәтирдији физики мәһдудијјәтләри нәзәрдә тутурду. О вурғуламышды ки, јашынын чох олмасы онун дад билмә вә ешитмә габилијјәтинә тәсир едиб (Ваиз 12:4, 5). Беләҹә, Бәрзиллај Давуд падшаһа чох јәгин ки, өз оғлу олан Кимһамы Јерусәлимә апармағы тәклиф едир (2 Ишм. 19:35—40).

Вәзијјәтә реал бахан Бәрзиллај јашыны нәзәрә алараг бу мәсулијјәтдән имтина етмишдир. Јухарыда бәһс етдијимиз дәјишиклијин әсасында ејни сәбәб дурур. Ајдындыр ки, бу дәјишиклик олунаркән Бәрзиллајын һадисәсиндә олдуғу кими тәкҹә бир нәфәрин вәзијјәти вә баҹарығы јох, бүтүн дүнјадакы мәсиһи ағсаггаллар үчүн нәјин даһа јахшы олдуғу нәзәрә алынмышдыр.

Ихтијар јашына чатмыш бу тәвазөкар гардашлар дәрһал анладылар ки, онларын узун илләрдир јеринә јетирдикләри мәсулијјәтләри ҹаван гардашлар ҝөрмәји баҹарсалар, Јеһованын тәшкилаты ҝәләҹәк инкишаф үчүн мөһкәмләнәҹәк. Бәрзиллај өз оғлуну, һәвари Булус Тимутини јетишдирдији кими, бу ҝүн дә ҹаван гардашларын јетишмәсиндә чох вахт елә јашлы гардашларын әмәји кечир (1 Кор. 4:17; Филип. 2:20—22). Бу ҹаван гардашлар исә өз нөвбәсиндә «Мәсиһин бәдәнини» инша етмәјә јарарлы олан «инсан тимсалында һәдијјәләр» олдугларыны доғрулдурлар (Ефес. 4:8—12; Сај. 11:16, 17, 29 ајәләри илә әлагәләндирин).

Мүәјјән мәсулијјәтләрини ҹаванлара тәһвил вермиш бир чох јашлы ағсаггалларын гаршысында јени вә даһа ҝениш имканлар ачылыб.

19 ил сәјјар нәзарәтчи кими хидмәт етмиш Марко гардаш дејир: «Инди шәраитим јығынҹағымыздакы баҹыларын мәсиһи олмајан әрләри илә марагланмаға даһа чох әл верир».

28 ил сәјјар нәзарәтчи кими хидмәт етмиш Ҝералдо гардаш дејир: «Јени мәгсәдләримиздән бири гејри-фәаллара көмәк етмәк вә даһа чох инсанла Мүгәддәс Китаб дәрси кечмәкдир». Гардаш билдирир ки, һал-һазырда һәјат јолдашы илә бирҝә 15 нәфәрә Мүгәддәс Китаб дәрси кечир вә гејри-фәал олан бир чохлары артыг јығынҹаглара ҝәлмәјә башлајыб.

Јухарыда ады чәкилән Алан гардаш дејир: «Инди хидмәтин бүтүн нөвләриндә иштирак етмәк имканымыз даһа чохдур. Биз иҹтимаи шаһидлик едир, ишҝүзар әразиләрдә вә гоншулугда тәблиғ едирик. Ики гоншумуз ибадәт евимизи зијарәт едиб».

Јығынҹагда јени тәјинат алмыш баҹарыглы вә сәдагәтли гоҹаман гардашлар, сизин төһфә верә биләҹәјиниз башга бир саһә дә вар. Сиз газандығыныз дәјәрли тәҹрүбәни јығынҹағыныздакы ҹаван гардашларла бөлүшмәклә Јеһованын тәшкилатыны дәстәкләјә биләрсиниз. Јухарыда ады чәкилән Рассел гардаш дејир: «Јеһова баҹарыглы, ҝөзәл ҝәнҹләр јетишдирир вә онлара шәрәфли ишләр һәвалә едир. Нәтиҹәдә, бүтүн диндашларымыз енержи долу бу гардашларын тәлим вә рәһбәрлијиндән фајдаланыр!» (« Ҝәнҹ гардашларын потенсиалыны үзә чыхарын» адлы чәрчивәјә бахын.)

Бу јахынларда фәргли бир хидмәт нөвүнә башламысынызса, никбинлијинизи горујун. Сиз чәкдијиниз зәһмәт сајәсиндә артыг чох сајда инсанын һәјатына рәнҝ гатмысыныз. Бу ҝүнә гәдәр севилмисиниз вә бундан сонра да севиләҹәксиниз.

Ән өнәмлиси исә, сиз Јеһованын үрәјиндә силинмәз хош хатирәләр гојмусунуз. О, һеч вахт «кечмишдә вә инди мүгәддәсләрә хидмәт едәрәк Онун адына ҝөстәрдијиниз мәһәббәти вә  чәкдијиниз зәһмәти» унутмаз (Ибр. 6:10). Јеһованын бу вәди тәкҹә кечмишдә ҝөрдүјүнүз ишләрлә бағлы дејил. Биз Аллаһ үчүн о гәдәр дәјәрлијик ки, О нә кечмишдә, нә дә инди Онун уғрунда етдикләримизи унутмаз!

Ола билсин, бу јени дәјишиклијин сизә аидијјәти јохдур. Бунунла белә, бу мәсәләнин бир уҹу сизә дә тохунур. Ҝәлин бахаг неҹә.

Әҝәр сизин әразиниздә тәјинаты дәјишмиш јашлы гардашлар варса, онларын јеткинлијиндән вә илләрлә газандыглары тәҹрүбәдән фајдалана биләрсиниз. Онлардан мәсләһәт алын, фикирләрини сорушун. Ҝөрүн индики тәјинатларында тәҹрүбәләриндән неҹә истифадә едирләр.

Һәм јени үсулла хидмәт едән јашлы мәсиһиләр, һәм дә јашлыларын тәҹрүбәсиндән јарарланан баҹы-гардашлар бир шејә әмин ола биләрләр ки, Јеһова Она узун илләр хидмәт етмиш вә һал-һазырда да хидмәтинә давам едән һәр бир кәсин сәдагәтини јүксәк гијмәтләндирир.