1. Ерамызын биринҹи әсринин сонларында һәвари Јәһја һансы вәзијјәтдә иди?

ЕРАМЫЗЫН биринҹи әсринин сонларында һәвари Јәһја чох чәтин бир вәзијјәтдә иди. О, артыг јашланмышды, Патмос адасында һәбсдә иди вә ҝөрүнүр, сағ галан јеҝанә һәвари иди (Вәһј 1:9). О билирди ки, һәгигәтә гаршы чыханлар јығынҹагларда јалан тәлимләр јајыр вә парчаланмаја сәбәб олур. Ҝерчәк мәсиһилијин јанан кичик оҹағы да сөнмәк үзрә иди (Јһд. 4; Вәһј 2:15, 20; 3:1, 17).

2. Вәһј 7:9—14 ајәләринә әсасән, Јәһјаја һансы мөһтәшәм вәһј назил олмушду? (Үз габығындакы шәклә бахын.)

² Белә бир ағыр дөнәмдә һәвари Јәһјаја ҝәләҹәклә бағлы мөһтәшәм вәһј назил олур. Вәһјдә мәләкләр диҝәр дөрд мәләјә Аллаһын гулларынын сонунҹу мөһүрләнмәсинә гәдәр бөјүк мүсибәтин мәһведиҹи күләкләрини сахламағы тапшырыр (Вәһј 7:1—3). Бу гуллардан ибарәт груп Мәсиһлә бирҝә ҝөјдә идарә едәҹәк 144 000 нәфәрдән ибарәтдир (Лука 12:32; Вәһј 7:4). Даһа сонра Јәһја башга бир групдан сөз ачыр. Бу груп о гәдәр бөјүк иди ки, Јәһја тәәҹҹүбүнү вурғулајараг «будур» дејир. О, һансы мәнзәрәјә шаһид олмушду? Јәһја «һәр халга, һәр тајфаја, һәр үммәтә вә һәр дилә мәнсуб адамлардан ибарәт, һеч кәсин сајмаға гадир олмадығы бөјүк бир издиһам» ҝөрүр. Онлар «Гузунун гаршысында дурмушдулар». (Вәһј 7:9—14 ајәләрини охујун.) Ҝәләҹәкдә милјонларла инсанын һәгиги ибадәтдә иштирак едәҹәјини билмәјин Јәһјаја неҹә севинҹ бәхш етдијини бир дүшүнүн!

3. а) Нә үчүн Јәһјанын ҝөрдүјү вәһј иманымызы мөһкәмләндирмәлидир? б) Бу мәгаләдән нә өјрәнәҹәјик?

³ Сөзсүз ки, һәмин ҝөрүнтү Јәһјанын иманыны мөһкәмләндирмишди. Бу ҝөрүнтү бизим иманымызы даһа чох мөһкәмләндирмәлидир, чүнки биз онун јеринә јетдији дөврдә јашајырыг! Бизим дөврүмүздә милјонларла инсан Јеһоваја ибадәтә гошулуб, онлар бөјүк мүсибәтдән сағ чыхмаг  вә јер үзүндә әбәди јашамаг үмидинә маликдирләр. Мәгаләдә Јеһованын тәхминән сәксән ил бундан өнҹә халгына бөјүк издиһамын ким олдуғуну неҹә ачыгладығыны өјрәнәҹәјик. Һәмчинин бөјүк издиһам барәдә ики шеји арашдыраҹағыг: 1) издиһамын бөјүклүјүнү вә 2) үзвләринин һәр халгдан ибарәт олмасыны. Бу ики мәгам мүбарәк издиһамын арасында олмаг үмиди олан һәр бир кәсин иманыны мөһкәмләндирәҹәк.

4. Христиан дүнјасы нәји анламыр вә Мүгәддәс Китаб Тәдгигатчылары бу саһәдә онлардан неҹә фәргләнирди?

⁴ Христиан дүнјасы итаәткар инсанларын бир ҝүн јер үзүндә әбәди јашајаҹағына даир һәгигәти өјрәтмир (2 Кор. 4:3, 4). Бу ҝүн әксәр христиан динләри бүтүн јахшы инсанларын өләндән сонра ҝөјә ҝетдијини өјрәдир. Лакин 1879-ҹу илдән етибарән «Ҝөзәтчи гүлләси» журналыны нәшр едән Мүгәддәс Китаб Тәдгигатчыларындан ибарәт кичик груп онлардан фәргләнирди. Онлар Аллаһын јер үзүндә Ҹәннәти бәрпа едәҹәјини вә милјонларла итаәткар инсанын ҝөјдә јох, јер үзүндә јашајаҹағыны анлајырдылар. Лакин һәмин итаәткар инсанларын ким олдуғуну ајдын анламалары мүәјјән вахт алмышды (Мәт. 6:10).

5. Мүгәддәс Китаб Тәдгигатчылары 144 000 нәфәрлә бағлы нәјә инанырды?

⁵ Шүбһәсиз, Мүгәддәс Китаб Тәдгигатчылары Кәлам әсасында һәмчинин анламышды ки, бир груп инсан Иса Мәсиһлә бирҝә ҝөјдә идарә етмәк үчүн «јердән сатын» алынаҹаг (Вәһј 14:3). Һәмин груп 144 000 фәал һәср олунмуш мәсиһидән ибарәт олуб, јер үзүндә олдуғу мүддәтдә Аллаһа сәдагәтлә ибадәт едән кәсләрдир. Бәс онлар бөјүк издиһамла бағлы нәјә инанырды?

6. Мүгәддәс Китаб Тәдгигатчылары бөјүк издиһамла бағлы нәјә инанырды?

⁶ Јәһја алдығы вәһјдә бу издиһамын «тахтын вә Гузунун гаршысында» дурдуғуну ҝөрмүшдү (Вәһј 7:9). Бу сөзләрә ҝөрә Мүгәддәс Китаб Тәдгигатчылары белә нәтиҹәјә ҝәлмишдиләр ки, 144 000 нәфәр кими, бөјүк издиһам да ҝөјдә јашајаҹаг. Әҝәр һәр ики груп ҝөјдә јашајаҹагса, онларын бир-бириндән фәрги нәдә олаҹаг? Мүгәддәс Китаб Тәдгигатчылары дүшүнүрдү ки, јер үзүндә олдуғу мүддәтдә Аллаһа тамлыгла итаәт етмәјәнләр бөјүк издиһама дахил олаҹаг. Онлардан бәзиләри кифајәт гәдәр тәмиз һәјат тәрзи сүрсә дә, ола билсин, христиан килсәсинин үзвү олараг галмаға давам едирди. Мүгәддәс Китаб Тәдгигатчылары беләләринин Аллаһы мүәјјән гәдәр севдијини, лакин бу севҝинин Иса Мәсиһлә бирҝә идарә едәҹәк гәдәр ҝүҹлү олмадығыны дүшүнүрдүләр. Вә буна ҝөрә дә белә гәнаәтә ҝәлмишдиләр ки, бөјүк издиһамын Аллаһа мәһәббәти јетәринҹә мөһкәм олмадығы үчүн тахтда отурмаға јох, онун гаршысында дурмаға лајигдир.

7. Мүгәддәс Китаб Тәдгигатчылары миниллик заманы јер үзүндә кимләрин јашајаҹағыны дүшүнүрдүләр вә гәдимдә јашамыш дәјәрли инсанларла бағлы һансы гәнаәтә ҝәлмишдиләр?

⁷ Бәс онда јер үзүндә кимләр јашајаҹаг? Мүгәддәс Китаб Тәдгигатчылары дүшүнүрдү ки, 144 000 нәфәр вә бөјүк издиһам ҝөјә галхандан сонра милјонларла диҝәр инсан јер үзүндә јашајыб Мәсиһин миниллик һакимијјәти дөврүндә немәтләр алаҹаг. Онлар милјонларла диҝәр инсанын Јеһоваја минилликдән өнҹә хидмәт едәҹәјини ҝөзләмирдиләр. Елә фикирләширдиләр ки, бу инсанлар Јеһова һаггында Мәсиһин миниллик һакимијјәти заманы өјрәнәҹәкләр. Бундан сонра Јеһованын ганунларына ујғун јашајанлара јер үзүнүн әбәди  сакини олмаг нәсиб олаҹаг, Она гаршы чыханлар исә мәһв олаҹаг. Мүгәддәс Китаб Тәдгигатчылары һәмчинин елә дүшүнүрдү ки, һәмин вахт јер үзүндә «әмир» кими хидмәт едәҹәк кәсләр, ола билсин, миниллијин сонунда ҝөјләрдә јашамаг мүкафаты алаҹаг. Миниллик заманы дирилән «гәдимдә јашамыш дәјәрли инсанлар» да (Иса Мәсиһ јер үзүнә ҝәлмәздән әввәл өлән Аллаһа садиг инсанлар) әмирләрин сырасында олаҹаг (Зәб. 45:16).

8. Мүгәддәс Китаб Тәдгигатчылары Аллаһын нијјәтиндә һансы үч групун олдуғуну ҝүман едирди?

⁸ Беләликлә, Мүгәддәс Китаб Тәдгигатчылары үч групун олдуғуну дүшүнүрдү: 1) Иса Мәсиһлә бирҝә ҝөјдә һакимијјәт сүрәҹәк 144 000 нәфәр; 2) Аллаһа даһа аз сәдагәт ҝөстәрән вә ҝөјдә Мәсиһин тахты гаршысында дураҹаг бөјүк издиһам; 3) Мәсиһин миниллик һакимијјәти заманы јер үзүндә јашајыб, Јеһова һагда өјрәнәҹәк милјонларла диҝәр инсан *. Амма Јеһованын мәсләһәт билдији вахт һәгигәт шәфәги бу мәсәләни даһа да ишыгландырды (Мәс. 4:18).

9. а) Јер үзүндәки бөјүк издиһам һансы мәнада «тахтын вә Гузунун гаршысында» дура биләр? б) Нә үчүн Вәһј 7:9 ајәсинин бу изаһы мәнтиглидир?

⁹ Јәһјанын алдығы вәһјдәки бөјүк издиһамын кимлији 1935-ҹи илдә ајдын олду. Јеһованын Шаһидләри баша дүшдүләр ки, бөјүк издиһамын «тахтын вә Гузунун гаршысында» дурмасы үчүн һәрфи мәнада ҝөјдә олмаларына еһтијаҹ јохдур. Бу, мәҹази мәна дашыјыр. Бөјүк издиһам јердә јашајаҹағына рәғмән, Јеһованын һакимијјәтини танымагла вә Она табе олмагла тахтын гаршысында, фидјә гурбанлығына иман ҝәтирмәклә исә «Гузунун гаршысында» дајана биләр (Әшј. 66:1). Һәмчинин Мәтта 25:31, 32 ајәләриндә, ҝүнаһлы инсанлар да дахил, «бүтүн халглар»ын Мәсиһин шанлы тахты өнүндә јығышаҹағы дејилир. Ајдындыр ки, бүтүн бу халглар ҝөјдә јох, јердәдирләр. Бу изаһат мәнтиглидир вә нәјә ҝөрә Мүгәддәс Китабда бөјүк издиһамын ҝөјә галдырылаҹағы барәдә һеч бир мәлуматын олмадығына ајдынлыг ҝәтирир. Јалныз бир груп инсана ҝөјдә әбәди һәјат мүкафаты вәд олунуб; бу, Иса Мәсиһлә бирҝә «јер үзәриндә падшаһлыг едәҹәк» 144 000 нәфәрдир (Вәһј 5:10).

10. Нәјә ҝөрә бөјүк издиһам Јеһова һагда минилликдән өнҹә өјрәнмәјә башламалыдыр?

¹⁰ Беләҹә, 1935-ҹи илдән бәри Јеһованын Шаһидләри Јәһјаја назил олан вәһјдәки бөјүк издиһамын сәдагәтли мәсиһиләрдән ибарәт олдуғуну вә јер үзүндә әбәди јашамаға үмид етдијини анлајыб. Бөјүк мүсибәтдән сағ чыхмаг үчүн бу издиһам Јеһова һагда минилликдән өнҹә өјрәнмәјә башламалыдыр. Онлар баш верәҹәк һадисәләрдән гуртулмаг үчүн Мәсиһин миниллик һакимијјәтиндән өнҹә ҝүҹлү иман тәзаһүр етдирмәлидир (Лука 21:34—36).

11. Нәјә ҝөрә бәзи Мүгәддәс Китаб Тәдгигатчылары минилликдән сонра кимләринсә ҝөјә галхаҹағыны дүшүнүрдү?

¹¹ Бәс јер үзүндәки нүмунәви инсанларын бәзиләринин миниллијин сонунда ҝөјә галдырылаҹағы фикри һагда нә демәк олар? Бу еһтимал «Ҝөзәтчи гүлләси» журналынын 1913-ҹү ил 15 феврал сајында ирәли сүрүлмүшдү. Ола билсин, бәзиләри белә дүшүнүрдү: «Нәјә ҝөрә Аллаһын кечмишдә јашамыш садиг хидмәтчиләри дириләндән сонра јер үзүндә јашамалыдыр, амма о гәдәр садиг олмајан мәсиһиләр ҝөјләр мүкафаты алмалыдыр?» Әлбәттә, бу ҹүр дүшүнҹә ики  јанлыш еһтималын әсасында формалашмышды: 1) бөјүк издиһамын ҝөјдә јашајаҹағы фикри, 2) бөјүк издиһамын Аллаһа даһа аз сәдагәт ҝөстәрән мәсиһиләрдән ибарәт олмасы фикри.

12, 13. Мәсһ олунмушлар вә бөјүк издиһам алаҹаглары мүкафат барәдә нәјин фәргиндәдир?

¹² Лакин гејд олундуғу кими, Јеһованын Шаһидләри 1935-ҹи илдән бәри ајдын баша дүшүрләр ки, Армаҝеддондан сағ чыханлар Јәһјанын вәһјдә ҝөрдүјү һәмин бөјүк издиһамдыр. Онлар јер үзүндә олаҹаг «бөјүк мүсибәтдән» чыхараг уҹадан дејәҹәкләр: «Хиласымыза ҝөрә тахтда отуран Аллаһымыза вә Гузуја борҹлујуг» (Вәһј 7:10, 14). Бундан әлавә, Мүгәддәс Китабда дејилир ки, ҝөјләр һәјатына дириләнләр үчүн Аллаһ гәдимдә јашамыш садиг хидмәтчиләринә нисбәтән «даһа јахшы бир тәдбир ҝөрүб» (Ибр. 11:40). 1935-ҹи илдә ајдын олан изаһатдан сонра гардашлар јер үзүндә јашамаг үмидинә малик кәсләри Јеһоваја хидмәт етмәјә даһа шөвглә дәвәт етмәјә башладылар.

¹³ Бөјүк издиһамдан оланлар үмидләринә ҝөрә севинирләр. Онлар баша дүшүрләр ки, сәдагәтли хидмәтчиләриндән кимин ҝөјдә, кимин јердә хидмәт едәҹәјинә Јеһова гәрар верир. Һәм мәсһ олунмушлар, һәм дә бөјүк издиһам дәрк едир ки, онларын мүкафаты јалныз Јеһованын Мәсиһин фидјә гурбанлығы васитәсилә изһар етдији лүтфү сајәсиндә мүмкүндүр (Ром. 3:24).

14. Нәјә ҝөрә 1935-ҹи илдән сонра бөјүк издиһамла бағлы пејғәмбәрлијин неҹә јеринә јетәҹәји чохларында суал доғурурду?

¹⁴ 1935-ҹи илдә Јеһованын халгы Јәһјанын вәһјини даһа ајдын баша дүшәндән сонра, чохларына һәлә дә мараглы иди ки, ҝөрәсән, јерүзү үмидинә малик оланларын сајҹа чох олмасы неҹә мүмкүн олаҹаг. Мәсәлән, бөјүк издиһамын кимлији даһа ајдын оланда Роналд Паркин адлы гардаш 12 јашында иди. О дејир: «Һәмин вахт бүтүн дүнјада һарадаса 56 000 тәблиғчи вар иди вә чохлары, бәлкә дә, әксәријјәти мәсһ олунмуш иди. Она ҝөрә дә бөјүк издиһама о гәдәр дә бөјүк демәк олмазды».

15. Бөјүк издиһамын сајы неҹә артмаға башлады?

¹⁵ Амма нөвбәти онилликләр әрзиндә бир чох өлкәләрә хүсуси тәјинатлы мүждәчиләр тәјин олунду вә Јеһованын Шаһидләринин сајы сүрәтлә артмаға башлады. 1968-ҹи илдә исә «Әбәди һәјата апаран һәгигәт» китабы әсасында Мүгәддәс Китаб дәрсләри кечирилмәјә башлады. Мүгәддәс Китаб  һәгигәтләринин садә шәкилдә изаһ олунмасы даһа чох инсаны һәгигәтә ҹәлб етди. Дөрд илин ичиндә јарым милјондан чох инсан вәфтиз олунду. Католик Килсәсинин Латын Америкасында вә диҝәр өлкәләрдә тәсир ҝүҹүнү итирмәси, һәмчинин Шәрги Авропа вә Африканын бәзи јерләриндә фәалијјәтимизә гојулан гадағаларын ҝөтүрүлмәси нәтиҹәсиндә милјонларла инсан вәфтиз олунду (Әшј. 60:22). Сон илләр әрзиндә Јеһованын тәшкилаты инсанлара Мүгәддәс Китаб тәлимләрини өјрәнмәјә көмәк етмәк үчүн диҝәр еффектив вәсаитләр һазырлајыб. Шүбһә јохдур ки, Јеһова һал-һазырда сајы сәккиз милјондан чох олан бөјүк бир издиһам топлајыр.

16. Бөјүк издиһам кимләрдән ибарәтдир?

¹⁶ Јәһја алдығы вәһји гәләмә аларкән бөјүк издиһамын «һәр халга, һәр тајфаја» мәнсуб олдуғуну гејд едир. Даһа әввәл Зәкәријјә пејғәмбәр буна бәнзәр бир пејғәмбәрлик сөјләмишди. О демишди: «О ҝүнләрдә бүтүн халглардан олан, мүхтәлиф дилләрдә данышан он адам бир јәһудинин әтәјиндән јапышыб дејәҹәк: “Биз дә сәнинлә ҝедирик, чүнки ешитмишик, Аллаһ сизинләдир”» (Зәк. 8:23).

17. Бүтүн халглардан вә дилләрдән олан инсанлара көмәк мәгсәдилә нәләр едилир?

¹⁷ Јеһованын Шаһидләри баша дүшүр ки,  бүтүн дилләрдән олан инсанларын јығылмасы үчүн хош хәбәр чохлу дилләрдә тәблиғ олунмалыдыр. Јеһованын тәшкилаты 130 илдән чохдур ки, Мүгәддәс Китаба әсасланан материаллары тәрҹүмә едир. Һал-һазырда исә тәрҹүмә иши ҝөрүлмәмиш мигјасда, јүзләрлә дилдә һәјата кечирилир. Бүтүн милләтләрин ичиндән бөјүк бир издиһам топламагла Јеһова, һәгигәтән дә, мүасир дөврдә мөҹүзә ҝөстәрир! Руһани гиданын ҝетдикҹә даһа чох дилә тәрҹүмә олунмасы сајәсиндә һәр халгдан олан инсанлар Јеһоваја ибадәтдә бирләшир. Үстәлик,Јеһованын Шаһидләри фәал тәблиғ ишләри илә вә араларындакы мәһәббәтлә таныныр. Буна шаһид олмаг, һәгигәтән, иманымызы мөһкәмләндирир! (Мәт. 24:14; Јәһ. 13:35).

18. а) Әшија 46:10, 11 ајәләринә әсасән, нәјә ҝөрә Јеһованын бөјүк издиһамла бағлы пејғәмбәрлијини һәјата кечирмәси бизи тәәҹҹүбләндирмир? б) Нәјә ҝөрә јер үзүндә јашамаг үмиди оланлар нәдәнсә мәһрум олундугларыны дүшүнмүр?

¹⁸ Бөјүк издиһамла бағлы пејғәмбәрлик гәлбимизи фәрәһләндирир! Тәәҹҹүблү дејил ки, Јеһова мөһтәшәм шәкилдә бу пејғәмбәрлији һәјата кечирир. (Әшија 46:10, 11 ајәләрини охујун.) Бөјүк издиһамын үзвләри Јеһованын онлара вердији үмиди чох гијмәтләндирир. Онлар Иса илә ҝөјдә хидмәт етмәк үчүн Аллаһын мүгәддәс руһу илә мәсһ олунмадыгларына ҝөрә өзләрини нәдәнсә мәһрум һисс етмирләр. Аллаһын Кәламында мүгәддәс руһун рәһбәрлик етдији бир чох киши вә гадын һагда охујуруг, буна бахмајараг, онлар 144 000 нәфәрә дахил дејилләр. Мәсәлән, Вәфтизчи Јәһја (Мәт. 11:11). Јахуд Давуд пејғәмбәр (Һәв. 2:34). Онлар вә сајсыз-һесабсыз диҝәр инсан јер үзүндә јашамаг үчүн дирилдиләҹәк. Бөјүк издиһамла јанашы, онларын һамысынын Јеһоваја вә Онун һакимијјәтинә сәдагәтләрини ҝөстәрмәк имканы олаҹаг.

19. Јәһјанын бөјүк издиһамла бағлы ҝөрдүјү вәһјин јеринә јетмәси јашадығымыз дөвр һагда нә дејир?

¹⁹ Тарихдә илк дәфәдир ки, Аллаһ бүтүн милләтләрдән олан милјонларла инсаны бир ибадәтдә бирләшдириб. Јер үзүндә, јахуд ҝөјдә јашамаға үмид етмәјимиздән асылы олмајараг, һәр биримиз әлимиздән ҝәләни етмәлијик ки, даһа чох инсана «башга гојунлар»дан ибарәт бөјүк издиһамын сырасына гошулмаға көмәк едәк (Јәһ. 10:16). Тезликлә Јеһова вәд етдији бөјүк мүсибәт заманы бәшәријјәтә чохлу зүлмләр верән һөкумәтләри вә динләри мәһв едәҹәк. Бөјүк издиһамын бүтүн үзвләринә неҹә дә бөјүк шәрәф нәсиб олуб: онлар јер үзүндә әбәдијјәт боју Јеһоваја хидмәт едәҹәк! (Вәһј 7:14).