1. Нә үчүн Јеһова Аллаһа итаәт етмәлијик?

ЈЕҺОВА АЛЛАҺ бизим Јараданымыз олдуғу үчүн Она итаәт етмәлијик *. Онун Өз јаратдыглары үчүн ганунлар гојмаға һаггы чатыр (Вәһј 4:11). Лакин Јеһоваја итаәт етмәк үчүн башга бир тутарлы сәбәбимиз дә вар — Онун рәһбәрлији ән мүкәммәлдир. Тарих боју инсан һакимијјәтләри башгалары үзәриндә мүәјјән сәлаһијјәт вә ҝүҹә саһиб олуб. Онларын идарәчилијинә нәзәр саланда ҝөрүрүк ки, Јеһова ән һикмәтли, ән мәһәббәтли, ән рәһмли вә ән мәрһәмәтли Һакимдир (Чых. 34:6; Ром. 16:27; 1 Јәһ. 4:8).

2. Ибраниләрә 12:9—11 ајәләринә әсасән, Јеһоваја ибадәт етмәк үчүн һансы сәбәбләримиз вар?

² Јеһова истәмир ки, Она табе олмағымызын башлыҹа сәбәби горху олсун. Әксинә, истәјир ки, биз Ону севдијимиз, гајғыкеш Атамыз һесаб етдијимиз үчүн итаәт едәк. Ибраниләрә јаздығы мәктубда һәвари Булус изаһ едир ки, биз «руһани һәјатымызын Атасына даһа бөјүк һәвәслә итаәт едиб» јашамалыјыг, чүнки О, «бизим хејримиз үчүн» бизә тәрбијә верир. (Ибраниләрә 12:9—11 ајәләрини охујун.)

3. а) Јеһоваја итаәт етдијимизи неҹә ҝөстәририк? б) Һансы суаллары арашдыраҹағыг?

³ Јеһоваја итаәт етдијимизи неҹә ҝөстәририк? Әлимиздән ҝәлини едиб һәр саһәдә Она табе олмагла вә өз ағлымыза ҝүвәнмәк мејли илә мүбаризә апармагла (Мәс. 3:5). Јеһованын ҝөзәл кејфијјәтләрини өјрәндикҹә Она итаәт етмәк бизә даһа асан олур. Чүнки Онун бу хүсусијјәтләри ҝөрдүјү бүтүн ишләрдә әкс олунур (Зәб. 145:9). Јеһова  һагда нә гәдәр чох өјрәнсәк, Она олан мәһәббәтимиз бир о гәдәр артаҹаг. Јеһованы севәндә артыг узун-узады олар-олмазлар сијаһысына еһтијаҹымыз олмур. Биз дүшүнҹә вә һиссләримизи Аллаһын бәјәндији кими формалашдырыр, Онун бәјәнмәдији шејләрдән узаг дуруруг (Зәб. 97:10). Лакин бәзән Јеһоваја итаәт етмәк асан олмур. Буна сәбәб нә ола биләр? Ағсаггаллар, аталар вә аналар вали Нәһәмјадан, Давуд падшаһдан вә Исанын анасы Мәрјәмдән нә өјрәнә биләр? Мәгаләдә бу суалларын ҹавабыны тапаҹағыг.

4, 5. Ромалылара 7:21—23 ајәләринә әсасән, нәјә ҝөрә Јеһоваја итаәт етмәк чәтин ҝәлә биләр?

⁴ Јеһоваја итаәт етмәјимизи чәтинләшдирән сәбәбләрдән бири мирас алдығымыз ҝүнаһ вә гејри-камиллијимиздир. Үсјанкарлыг ганымыздадыр. Адәмлә Һәвва Аллаһа гаршы үсјан едиб, гадаған олунмуш мејвәдән јејәндән сонра өз ганунларыны гојдулар (Јар. 3:22). Бу ҝүн дә инсанларын әксәријјәти Аллаһа әһәмијјәт вермир; нәјин јахшы, нәјин пис олдуғуна өзләри гәрар вермәк истәјир.

⁵ Һәтта Јеһова Аллаһы таныјан вә севән кәсләр дә Она там итаәт ҝөстәрмәјә чәтинлик чәкә биләр. Һәвари Булус да белә бир чәтинликлә үзләшмишди. (Ромалылара 7:21—23 ајәләрини охујун.) Ејнилә биз дә Јеһованын бәјәндији кими давранмаг истәјирик. Амма даима јанлыш шејләр етмәк мејлимизә гаршы мүбаризә апармалыјыг.

6, 7. Јеһоваја итаәт етмәјимизи чәтинләшдирән икинҹи сәбәб һансыдыр? Нүмунә чәкин.

⁶ Јеһоваја итаәт етмәјимизи чәтинләшдирән диҝәр бир сәбәб бөјүдүјүмүз мәдәнијјәтин тәсиридир. Бир чох инсанын дүшүнҹәси Јеһованын ирадәси илә тәзад тәшкил едир. Одур ки ҹәмијјәтдә ҝениш јајылмыш дүшүнҹә тәрзиндән азад олмаг үчүн даим мүбаризә апармалыјыг. Ҝәлин бир нүмунәјә нәзәр салаг.

⁷ Бәзи әразиләрдә даһа чох пул газанмалары үчүн ҝәнҹләрә тәзјиг ҝөстәрилмәси ади һалдыр. Мери * адлы бир баҹы бу ҹүр чәтинликлә үзләшмишди. Јеһова Аллаһ һагда өјрәнмәздән өнҹә о, јашадығы өлкәдәки ән престижли университетләрдән бириндә тәһсил алырды. Аиләси она тәзјиг ҝөстәрирди ки, јүксәк маашлы, јахшы бир вәзифәдә ишләсин. Мери өзү дә буну истәјирди. Лакин Јеһова һагда өјрәндикҹә, Она мәһәббәти артдыгҹа, Мери мәгсәдләрини дәјишди. Лакин бу онун үчүн о гәдәр дә асан дејилди. Белә ки, Мери дејир: «Бәзән чохлу пул газана биләҹәјим иш имканларым олур. Амма билирәм ки, бу мәним Јеһоваја индики кими хидмәт етмәјимә мане олаҹаг. Алдығым тәрбијәјә ҝөрә “јох” демәк мәнә һәлә дә чәтиндир. Һәмин вахт Јеһоваја јалварырам ки, хидмәтимә мане олаҹаг иш тәклифиндән имтина етмәјимә көмәк етсин» (Мәт. 6:24).

8. Инди нәји арашдыраҹағыг?

⁸ Јеһоваја итаәт етмәк бизим өз хејримизәдир. Лакин мүәјјән сәлаһијјәти оланлар — ағсаггаллар, аталар вә аналар даһа бир сәбәбә ҝөрә Јеһоваја итаәт етмәлидир: онларын башгаларына көмәк етмәк имканы вар. Инди Мүгәддәс Китабдакы бәзи нүмунәләр әсасында сәлаһијјәтдән Јеһованы разы салан тәрздә истифадә етмәјин јолларыны арашдыраҹағыг.

9. Нәһәмја һансы чәтинликләрлә үзләшмишди?

⁹ Јеһова ағсаггаллара Өз гузуларына чобанлыг етмәк кими ваҹиб бир сәлаһијјәт  вериб (1 Бут. 5:2). Ағсаггаллар Нәһәмјанын Јеһованын халгы илә рәфтарындан чох шеј өјрәнә биләр. Нәһәмја Јәһуданын валиси олараг јүксәк сәлаһијјәтә малик иди (Нәһ. 1:11; 2:7, 8; 5:14). Онун үзләшдији бәзи чәтинликләри тәсәввүр едәк. Нәһәмја хәбәр тутмушду ки, мәбәддән налајиг тәрздә истифадә олунур вә исраиллиләр Ганунун тәләбини һечә сајараг лавилиләрә мадди дәстәк олмур. Јәһудиләр Шәнбәјә даир гануну позурду вә бәзи кишиләр јаделли гадынларла евләнмишди. Вали Нәһәмја бу чәтин вәзијјәтин өһдәсиндән ҝәлмәли иди (Нәһ. 13:4—30).

10. Нәһәмја үзләшдији чәтинликләр гаршысында неҹә давранды?

¹⁰ Нәһәмја сәлаһијјәтиндән истифадә едәрәк халгы өз гојдуғу ганунлара әмәл етмәјә мәҹбур етмәди. Әксинә, Јеһоваја үрәкдән дуа едәрәк она јол ҝөстәрмәсини диләди вә халга Јеһованын ганунларыны хатырлатды (Нәһ. 1:4—10; 13:1—3). Нәһәмја һәмчинин тәвазөкарҹасына халгла чијин-чијинә ишләди, һәтта онлара Јерусәлимин диварларыны бәрпа етмәкдә көмәк етди (Нәһ. 4:15).

11. 1 Салоникилиләрә 2:7, 8 ајәләринә әсасән, ағсаггаллар јығынҹагла неҹә рәфтар етмәлидир?

¹¹ Ағсаггаллар Нәһәмјанын үзләшдији чәтинликләрлә үзләшмәсәләр белә, ондан бир нечә саһәдә өрнәк ала биләрләр. Мәсәлән, онлар баҹы-гардашларынын рифаһы үчүн әлләриндән ҝәләни едирләр вә сәлаһијјәтләринә ҝөрә өзләрини башгаларындан үстүн сајмырлар. Әксинә, јығынҹагдакы һәр бир баҹы-гардашла нәвазишлә давранырлар. (1 Салоникилиләрә 2:7, 8 ајәләрини охујун.) Онларын дәрин мәһәббәти вә тәвазөкар давранышы башгалары илә неҹә данышмаларында әкс олунур. Ендрју адлы тәҹрүбәли бир ағсаггал дејир: «Фикир вермишәм ки, ағсаггалларын меһрибан вә достјана мүнасибәти баҹы-гардашлара мүсбәт тәсир едир. Бу хүсусијјәтләр јығынҹағы ағсаггалларла әмәкдашлыг  етмәјә тәшвиг едир». Узун илләрдир ағсаггал кими хидмәт едән Тони гардаш гејд едир: «Филиппилиләрә 2:3 ајәсиндәки мәсләһәти тәтбиг етмәјә вә һәмишә башгаларыны өзүмдән үстүн тутмаға чалышырам. Бу мәнә өзүмү диктатор кими апармамаға көмәк едир».

12. Нә үчүн ағсаггалларын тәвазөкар олмасы ваҹибдир?

¹² Ағсаггаллар Јеһова кими тәвазөкар олмалыдыр. Јеһова Каинатда ән Али Һаким олмасына рәғмән, әјилиб «мәзлуму тоз-торпагдан галдырыр» (Зәб. 18:35; 113:6, 7). Мүгәддәс Китабда дејилир ки, Јеһова тәкәббүрлү, гүрурлу инсанлардан икраһ едир (Мәс. 16:5).

13. Нә үчүн ағсаггаллар дилини ҹиловламағы баҹармалыдыр?

¹³ Јеһоваја итаәт едән ағсаггал дилини ҹиловламағы баҹармалыдыр. Әкс һалда, кимсә она һөрмәтсизлик едәрсә, о да кобуд ҹаваб верә биләр (Јаг. 1:26; Гал. 5:14, 15). Јухарыда адыны чәкдијимиз Ендрју адлы гардаш дејир: «Һәрдән мәнә ағсаггал кими һөрмәт етмәдијини дүшүндүјүм баҹы вә ја гардаша кобуд ҹаваб вермәк истәјирдим. Лакин Мүгәддәс Китабдакы иманлы кишиләрин нүмунәсини арашдырыб, дәриндән дүшүнмәк мәнә тәвазөкар вә һәлим олмағын ваҹиблијини анламагда көмәк етди». Ағсаггаллар јығынҹагдакы баҹы-гардашларла, еләҹә дә диҝәр ағсаггалларла мәһәббәтлә давранараг вә онларла меһрибан данышараг Јеһоваја итаәт етдикләрини ҝөстәрир (Кол. 4:6).

14. Јеһова аталара һансы сәлаһијјәти вериб вә онлардан нә ҝөзләјир?

¹⁴ Јеһова аталары аиләнин башы олараг тәјин едиб вә онлардан ушагларына тәлим-тәрбијә вермәји ҝөзләјир (1 Кор. 11:3; Ефес. 6:4). Амма аталарын аиләдә сәлаһијјәти нисбидир, онлар аиләнин баниси Јеһованын гаршысында мәсулијјәт дашыјыр (Ефес. 3:14, 15). Аталар өз сәлаһијјәтләриндән Аллаһы разы салан тәрздә истифадә етмәклә Јеһоваја итаәт етдикләрини ҝөстәрирләр. Онлар Давуд падшаһын һәјаты һагда охумагла ондан чох шеј өјрәнә биләрләр.

15. Давуд падшаһ һансы мәнада аталар үчүн ҝөзәл өрнәкдир?

¹⁵ Јеһова Давуду тәкҹә аиләси үзәриндә јох, бүтүн Исраил халгы үзәриндә башчы гојмушду. Падшаһ кими Давуд бөјүк сәлаһијјәт саһиби иди. Һәрдән о, бу сәлаһијјәтиндән дүзҝүн истифадә етмир вә ҹидди ҝүнаһлара јол верирди (2 Ишм. 11:14, 15). Бунунла белә, Давуд тәрбијәни гәбул  етмәклә Јеһоваја итаәтини ҝөстәрмишди. О, Јеһоваја дуада үрәјини бошалдырды. Вә вар ҝүҹү илә чалышырды ки, Јеһованын мәсләһәтинә әмәл етсин (Зәб. 51:1—4). Үстәлик, Давуд тәкҹә кишиләрин јох, һәтта гадынларын да мәсләһәтинә гулаг асаҹаг гәдәр тәвазөкар иди (1 Ишм. 19:11, 12; 25:32, 33). О, сәһвләриндән дәрс ҝөтүрмүш вә Јеһоваја хидмәти һәјатында биринҹи јерә гојмушду.

16. Аталар Давуд падшаһдан һансы ваҹиб дәрсләри өјрәнә биләр?

¹⁶ Ҝәлин ҝөрәк аталар Давуд падшаһдан һансы ваҹиб дәрсләри өјрәнә биләр: Јеһованын сизә һәвалә етдији сәлаһијјәтдән суи-истифадә етмәјин. Сәһвләринизи бојнунуза алын вә Мүгәддәс Китаб әсасында верилмиш мәсләһәти гәбул един. Беләҹә, аилә үзвләриниз тәвазөкарлығыныза ҝөрә сизә һөрмәт едәҹәк. Аиләнизлә бирҝә дуа едәндә үрәјинизи Јеһоваја бошалдын. Гој аилә үзвләриниз Јеһоваја нә дәрәҹәдә мөһтаҹ олдуғунузу ҝөрсүн. Һәр шејдән зијадә, Јеһоваја хидмәти һәјатынызын амалы един (Ган. 6:6—9). Сизин јахшы нүмунәниз аиләнизә верә биләҹәјиниз ән дәјәрли һәдијјәдир.

17. Јеһова аналара һансы мәсулијјәти вериб?

¹⁷ Јеһова аналара аиләдә шәрәфли бир мәсулијјәт тапшырыб вә онлара ушагларынын үстүндә мүәјјән сәлаһијјәт вериб (Мәс. 6:20). Ананын сөзләри вә давранышы өвладынын һәјатында дәрин вә силинмәз из гоја биләр (Мәс. 22:6). Ҝәлин ҝөрәк аналар Исанын анасы Мәрјәмдән нә өјрәнә биләр.

18, 19. Аналар Мәрјәмдән нә өјрәнә биләр?

¹⁸ Мәрјәм Мүгәддәс Јазылары јахшы билирди. О, Јеһоваја дәрин һөрмәт бәсләјирди вә Онунла мөһкәм достлуг мүнасибәтләри гурмушду. Мәрјәм Јеһовадан ҝәлән рәһбәрлијә, һәтта онун бүтүн һәјатыны дәјишәҹәк ҝөстәришә белә, көнүл хошлуғу илә итаәт едирди (Лука 1:35—38, 46—55).

¹⁹ Әзиз аналар, сиз Мәрјәмдән бир чох саһәдә нүмунә ҝөтүрә биләрсиниз. Неҹә? Илк нөвбәдә, Мүгәддәс Китабын шәхси мүталиәси вә мүнтәзәм шәхси дуалар васитәсилә Јеһова илә достлуғунузу горумагла. Икинҹиси, Јеһованы разы салмаг үчүн һәјатынызда дәјишикликләр етмәјә һазыр олмагла. Мәсәлән, ола билсин, валидејнләриниз тез өзүндән чыхан вә сәрт данышан олуб. Еләдирсә, јәгин сиз дә ушагларла бу ҹүр давранмағын нормал олдуғуну дүшүнүрсүнүз. Һәтта Јеһованын ганунларыны өјрәнәндән сонра белә, ушагларыныза гаршы мүлајим вә сәбирли давранмаг сизә чәтин ҝәлә биләр, әләлхүсус јорғун вахтынызда онлар сизин сөзүнүзә бахмајанда (Ефес.  4:31). Бу кими вәзијјәтләрдә дуа едәрәк Јеһовадан көмәк истәмәк хүсусилә ваҹибдир. Лидја адлы бир баҹы дејир: «Бәзән оғлум сөзүмә бахмајанда, онунла һирсли данышмамаг үчүн дурмадан дуа етмәли олурам. Һәтта сөзүмү јарымчыг гојуб сакитҹә Јеһоваја дуа едирәм. Дуа мәни сакитләшдирир» (Зәб. 37:5).

20. Бәзи аналар һансы чәтинликлә үзләшир вә бунун өһдәсиндән неҹә ҝәлмәк олар?

²⁰ Бәзи аналарын белә бир чәтинлији вар — онлар өвладларына севҝиләрини ифадә едә билмирләр (Тит. 2:3, 4). Сәбәбләрдән бири одур ки, онлар валидејнләрлә ушагларын арасында исти, сәмими мүнасибәтләрин олмадығы аиләләрдә бөјүјүб. Әҝәр сиз дә белә аиләдә бөјүмүсүнүзсә, валидејнләринизин сәһвини тәкрарламајын. Јеһованын ирадәсинә итаәт едән ана ушагларыны севдијини ҝөстәрмәји өјрәнмәлидир. Дүшүнҹә тәрзини, һиссләрини вә давранышыны дәјишмәк она чәтин ҝәлә биләр. Лакин бу мүмкүндүр вә бу, һәм ананын өзүнә, һәм дә аиләсинә даһа чох хошбәхтлик бәхш едәҹәк.

21, 22. Әшија 65:13, 14 ајәләринә әсасән, Јеһоваја итаәт етмәк бизә һансы немәтләр бәхш едир?

²¹ Давуд падшаһ Јеһоваја итаәт етмәјин ҝәтирдији немәтләрдән аҝаһ иди. О јазмышды: «Јеһованын бујруглары доғрудур, үрәји севиндирир, Јеһованын әмри сафдыр, ҝөзләрә нур верир... Онлар гулуна нәсиһәт верир, онлара әмәл едәнин бөјүк мүкафаты вар» (Зәб. 19:8, 11). Бу ҝүн биз Јеһоваја итаәт едәнләрлә Онун мәсләһәтини рәдд едәнләр арасындакы фәрги ҝөрүрүк. Јеһоваја итаәт едәнләр «үрәк ҹошгунлуғундан» һајгырыр. (Әшија 65:13, 14 ајәләрини охујун.)

²² Ағсаггаллар, аталар вә аналар ҹанла-башла Јеһоваја итаәт едәндә һәјатлары даһа јахшы, аиләләри даһа хошбәхт олур вә бүтүн јығынҹагда бирлик һөкм сүрүр. Ән өнәмлиси исә, онлар Јеһова Аллаһын гәлбини севиндирирләр (Мәс. 27:11). Бизим үчүн бундан бөјүк севинҹ ола биләр?!