1, 2. 1 Тимутијә 6:20 ајәсинә әсасән, Тимутијә нәләр һәвалә олунмушдур?

БИЗ бәзән дәјәрли шејләримизи башгаларына әманәт едирик. Мәсәлән, пулумузу банка гојуруг. Архајыныг ки, пулумуз етибарлы јердәди, нә итәҹәк, нә дә оғурланаҹаг. Буна ҝөрә дә кимәсә дәјәрли бир шеј әманәт етмәјин нә демәк олдуғуну јахшы билирик.

² 1 Тимутијә 6:20 ајәсини охујун. Һәвари Булус Тимутијә хатырлатмышды ки, она дәјәрли бир шеј — Аллаһын бәшәријјәтлә бағлы нијјәти һаггында һәгигәт әманәт олунуб. Һәмчинин Тимутијә «Аллаһын сөзүнү» тәблиғ етмәк һәвалә олунмушду (2 Тим. 4:2, 5). Булус Тимутијә тапшырмышды ки, она верилмиш әманәти горусун. Булус кими, бизә дә дәјәрли шејләр әманәт олунуб. Бунлар нәдир? Јеһованын бизә әманәт етдији хәзинәни нәјә ҝөрә горумалыјыг?

3, 4. Мүгәддәс Китабдакы һәгигәтләрин гијмәтли олмасынын бәзи сәбәбләри һансылардыр?

³ Јеһова бизә лүтф едәрәк Кәламындакы дәјәрли һәгигәтләр һаггында дәгиг билик вериб. Бу һәгигәтләр чох дәјәрлидир, чүнки онлар бизә Јеһова илә јахын мүнасибәтләр гурмағын вә әсл хошбәхтлијә наил олмағын јолуну өјрәдир. Биз бу һәгигәтләри гәбул едиб, онлара ујғун јашајанда јалан тәлимләрдән вә әхлагсыз әмәлләрдән азад олуруг (1 Кор. 6:9—11).

⁴ Бу һәгигәтләри дәјәрли едән диҝәр амил исә одур ки, Јеһова онлары «әбәди һәјата апаран јолда јеримәјә мејли олан» тәвазөкар инсанлара ачыр (Һәв. 13:48). Бу тәвазөкар инсанлар гәбул едир ки, һал-һазырда Јеһова Мүгәддәс  Китабдакы һәгигәтләри садиг вә ағыллы нөкәр васитәсилә өјрәдир (Мәт. 11:25; 24:45). Биз бу һәгигәтләри тәкбашына анлаја билмәрик, онлары анламаг гәдәр исә дәјәрли һеч нә јохдур (Мәс. 3:13, 15).

5. Јеһова бизә башга нә әманәт едиб?

⁵ Јеһова һәмчинин бизә Онунла вә нијјәти илә бағлы һәгигәти башгаларына өјрәтмәк кими шәрәфли иш әманәт едиб (Мәт. 24:14). Чатдырдығымыз мүждә чох дәјәрлидир, чүнки бунун сајәсиндә инсанлар Јеһованын халгынын сыраларына гошулур вә әбәди јашамаг үмиди әлдә едир (1 Тим. 4:16). Шәраитимиз дахилиндә аз вә ја чох хидмәт етмәјимиздән асылы олмајараг, биз һал-һазырда ҝөрүлән ән ваҹиб ишә төһфә веририк (1 Тим. 2:3, 4). Јеһованын әмәкдашы олмаг неҹә дә бөјүк шәрәфдир! (1 Кор. 3:9).

6. Әманәти горуја билмәјәнләрлә нә баш верди?

⁶ Тимутинин јашадығы дөврдә бәзиләри Аллаһын әмәкдашы олмаг шәрәфини гијмәтләндирмәдиләр. Мәсәлән, Димас дүнјаны севиб, Булусла хидмәт етмәк шәрәфини әлдән верди (2 Тим. 4:10). Ҝөрүнүр, Фиҝел вә Һермоҝен Булусун үзләшдији тәгибләрлә үзләшмәкдән горхдуглары үчүн тәблиғ етмәји дајандырдылар (2 Тим. 1:15). Һименеј, Александр вә Филит дөнүк олдулар вә һәгигәти тәрк етдиләр (1 Тим. 1:19, 20; 2 Тим. 2:16—18). Јәгин ки, бу инсанларын һамысы бир вахтлар руһән ҝүҹлү иди. Амма онлар нәјин әсл дәјәрә малик олдуғуну ајырд едә билмәдиләр.

7. Шејтан бизи јолдан чыхармаг үчүн һансы фәндләрә әл атыр?

⁷ Јеһованын әманәтинә хәјанәт едәк дејә Шејтан һансы фәндләрә әл атыр? Ҝәлин бәзиләринә нәзәр салаг. О, әјләнҹә вә күтләви информасија васитәсилә бизи һәгигәтдән сојудаҹаг фикирләр вә һәрәкәтләр ашылајыр. Дост-танышымызын тәзјиги, јахуд тәгибләр васитәсилә бизи горхутмаға чалышыр, истәјир ки, тәблиғ ишини дајандыраг. Һәмчинин истәјир ки, дөнүкләрин сахта биликләринә гулаг асыб һәгигәтдән дөнәк (1 Тим. 6:20, 21).

8. Даниелин башына ҝәләнләрдән нә өјрәнирик?

⁸ Еһтијатлы олмасаг, тәдриҹән һәгигәтдән узаглашарыг. Ҝәлин әввәлләр видеоојунлар ојнамағы чох севән Даниел * адлы бир гардашын нүмунәсинә бахаг. О дејир: «Һарадаса он јашым оландан видеоојунлар ојнамаға башладым. Әввәл-әввәл ојнадығым ојунлар, демәк олар ки, зәрәрсиз иди. Амма вахт кечдикҹә зоракы вә спиритизмлә әлагәли ојунлар ојнамаға  башладым». Вәзијјәт о јерә ҝәлиб чатмышды ки, гардаш ҝүн әрзиндә тәхминән 15 саат видеоојун ојнајырды. Даниел дејир: «Дахилимдә һисс едирдим ки, ојнадығым ојунлар вә онлара бу гәдәр вахт сәрф етмәјим мәни Јеһовадан узаглашдырыр. Амма мән өзүмү инандырмышдым ки, Мүгәддәс Китабда дејиләнләр мәнә аид дејил». Әҝәр еһтијатлы олмасаг, әјләнҹә чох асанлыгла бизи һәгигәтдән сојуда биләр. Бу баш версә, Јеһованын бизә вердији әманәти итирә биләрик.

9. 1 Тимутијә 1:18, 19 ајәләринә әсасән, Булус Тимутини нәјә тәшвиг етмишди?

⁹ 1 Тимутијә 1:18, 19 ајәләрини охујун. Булус Тимутини әсҝәрә бәнзәтмишди вә тапшырмышды ки, «шанлы мүбаризәни» давам етдирсин. Бу мүбаризә физики јох, руһани мүбаризә иди. Һансы мәнада мәсиһиләр дөјүшдә олан әсҝәрә бәнзәјир? Мәсиһин әсҝәри кими бизә һансы хүсусијјәтләри инкишаф етдирмәк лазымдыр? Ҝәлин ҝөрәк Булусун бәнзәтмәсиндән һансы беш дәрси өјрәнирик. Бунлар бизә һәгигәтдән бәрк-бәрк јапышмаға көмәк едәҹәк.

10. Нәјә ҝөрә мөмин инсан олмалыјыг?

¹⁰ Мөмин инсан олмаға ҹан атын. Јахшы әсҝәр сәдагәтли олур. О, севдији кәсләри вә ја дәјәр вердији шејләри горумаг наминә дөјүшүр. Булус Тимутини тәшвиг едирди ки, мөмин инсан, јәни Аллаһа сәдагәтли инсан олмаг үчүн вар ҝүҹү илә чалышсын (1 Тим. 4:7). Аллаһа мәһәббәтимиз вә сәдагәтимиз нә гәдәр ҝүҹлү олса, һәгигәтдән јапышмаг истәјимиз дә бир о гәдәр ҝүҹлү олаҹаг (1 Тим. 4:8—10; 6:6).

11. Нәјә ҝөрә өзүнүтәрбијә ваҹибдир?

¹¹ Өзүнүтәрбијәнин ваҹиблијини унутмајын. Дөјүшә һәмишә һазыр олмаг үчүн әсҝәр даим үзәриндә ишләмәлидир. Тимути руһани ҹәһәтдән ҝүҹлү гала билмишди, чүнки о, Булусун Аллаһдан илһам алараг вердији мәсләһәтә әмәл етмишди. Булус она мәсләһәт вермишди ки, јанлыш истәкләрдән гачсын, илаһи хүсусијјәтләрә ҹан атсын вә диндашлары илә отуруб-дурсун (2 Тим. 2:22). Бунун үчүн өзүнүтәрбијә ҝәрәк иди. Ҝүнаһлы истәкләримизлә мүбаризә апармаг үчүн бу хүсусијјәт бизә дә лазымдыр (Ром. 7:21—25). Өзүнүтәрбијә һәмчинин көһнә шәхсијјәти әјнимиздән чыхарыб, јенисини ҝејинмәк үчүн дә лазымдыр (Ефес. 4:22, 24). Еләҹә дә, јорғун иш ҝүнүндән сонра јығынҹагда иштирак етмәк үчүн бәзән өзүмүзү мәҹбур етмәли олуруг (Ибр. 10:24, 25).

12. Мүгәддәс Китабдан даһа мәһарәтлә истифадә етмәји неҹә өјрәнә биләрик?

¹² Әсҝәр силаһдан истифадә етмәји өјрәнмәлидир. Пүхтәләшмәк үчүн о буну мүнтәзәм етмәлидир. Ејнилә, биз дә Аллаһын Кәламыны дүзҝүн истифадә етмәји баҹармалыјыг (2 Тим. 2:15). Биз бу баҹарыгларымызын бәзиләринә јығынҹаг ҝөрүшләриндә јијәләнирик. Башгаларыны Аллаһын Кәламындакы һәгигәтләрин дәјәрли олдуғуна инандырмаг үчүн мүнтәзәм фәрди мүталиә етмәлијик. Мүгәддәс Китаб васитәсилә иманымызы ҝүҹләндирмәлијик. Мүгәддәс Китабы садәҹә охумагла кифајәтләнмәмәлијик. Охудугларымызын үзәриндә дүшүнүб нәтиҹә чыхармалыјыг, нәшрләримиздән истифадә едәрәк арашдырма апармалыјыг. Бу, ајәләри дүзҝүн баша дүшмәјимизә вә изаһ етмәјимизә көмәк едәҹәк (1 Тим. 4:13—15). Онда инсанлары өјрәтмәк үчүн Аллаһын Кәламындан истифадә етмәји баҹараҹағыг. Онлара да Мүгәддәс Китаб ајәсини садәҹә охумагла кифајәтләнмәмәлијик. Истәјирик ки, тәблиғ етдијимиз инсанлар ајәни вә бу ајәнин  онлара һансы аидијјәти олдуғуну баша дүшсүн. Мүгәддәс Китабы мүнтәзәм олараг мүталиә етсәк, инсанлара тәлим верәркән ондан даһа мәһарәтлә истифадә етмәји баҹараҹағыг (2 Тим. 3:16, 17).

13. Ибраниләрә 5:14 ајәсинә әсасән, нәјә ҝөрә дәркетмә габилијјәтимизи ишләтмәлијик?

¹³ Дәркетмә габилијјәтинизи ишләдин. Әсҝәр тәһлүкәни габагҹадан ҝөрүб ондан гачмағы баҹармалыдыр. Биз дә зәрәримизә олаҹаг вәзијјәтләри ҝөрмәји баҹармалы вә өзүмүзү һәмин тәһлүкәдән горумаг үчүн һәрәкәтә кечмәлијик (Мәс. 22:3; Ибраниләрә 5:14 ајәсини вә һашијәни охујун). Мисал үчүн, истираһәт вә әјләнҹәни ағылла сечмәлијик. Телевизија верилишләриндә вә филмләрдә чох вахт әдәбсиз һәрәкәтләр нүмајиш олунур. Бу ҹүр һәрәкәтләр Аллаһа ағыр ҝедир вә зәрәри гачылмаздыр. Одур ки, биз белә әјләнҹә нөвләриндән узаг дуруруг, чүнки онлар Аллаһа мәһәббәтимизи тәдриҹән зәифләдә биләр (Ефес. 5:5, 6).

14. Дәркетмә габилијјәтини ишләтмәк Даниелә неҹә көмәк етди?

¹⁴ Јухарыда ады чәкилән Даниел вахт кечдикҹә дәрк етди ки, проблем зоракы вә спиритизмлә әлагәли видеоојунлар ојнамасындадыр. Бу проблеминин өһдәсиндән ҝәлмәк үчүн о, «Ҝөзәтчи Гүлләсинин китабханасы»нда ахтарыш апарды. Бу һансы нәтиҹәни верди? Даниел зәрәрли ојунлар ојнамаға сон гојду. Онлајн ојунлара абунәчиликдән чыхды вә диҝәр ојунчуларла әлагәсини кәсди. О дејир: «Видеоојунлара сәрф етдијим вахты һәјәт-баҹа ишләринә вә јығынҹагдакы достларыма ајырмаға башладым». Һал-һазырда Даниел өнҹүл вә ағсаггал кими хидмәт едир.

15. Јалан рәвајәтләр нәјә ҝөрә тәһлүкәлидир?

¹⁵ Тимути кими, биз дә дөнүкләрин јајдығы јалан мәлуматларын тәһлүкәсини дәрк етмәлијик (1 Тим. 4:1, 7; 2 Тим. 2:16). Мисал үчүн, дөнүкләр баҹы-гардашлар һагда јалан рәвајәтләр јајмаға, јахуд Јеһованын тәшкилатына етибарымызы сарсытмаға чалышыр. Бу ҹүр сахта мәлуматлар иманымызы сарсыда биләр. Онлара алданмамалыјыг. Чүнки бу ҹүр рәвајәтләри «әглән позғун вә һәгигәтдән мәһрум адамлар» јајыр. Онларын мәгсәди «мүбаһисә вә сөз давасы» јаратмагдыр (1 Тим. 6:4, 5). Бу  инсанлар истәјир ки, биз онларын јајдығы бөһтанлара инанаг вә үрәјимиздә диндашларымыза гаршы шүбһә јарансын.

16. Нәләрин диггәтимизи јајындырмасына јол вермәмәлијик?

¹⁶ Диггәтинизи јајындырмајын. Тимути «Мәсиһ Исанын ҹәсур әсҝәри кими» әсас диггәтини мадди ишләрә вә ја диҝәр дүнјәви мәгсәдләрә јох, хидмәтә ҹәмләмәли иди (2 Тим. 2:3, 4). Тимути кими, биз дә үрәјимиздә мал-мүлкә саһиб олмаг истәјинин јаранмасына јол вермәмәлијик, әкс һалда, диггәтимиз јајынаҹаг. «Вар-дөвләтин алдадыҹы гүввәси» Јеһоваја севҝимизи, Онун Кәламына миннәтдарлығымызы вә орада јазыланлары башгалары илә бөлүшмәк истәјимизи зәифләдәҹәк (Мәт. 13:22). Биз садә һәјат сүрмәли, вахтымызы вә ҝүҹүмүзү Падшаһлығы «һәр шејдән үстүн» тутмаға сәрф етмәлијик (Мәт. 6:22—25, 33).

17, 18. Јеһова илә достлуғумузу горумаг үчүн нә етмәлијик?

¹⁷  Дәрһал һәрәкәтә кечмәјә һазыр олун. Әсҝәрин һәмишә өзүнү горумаг планы олмалыдыр. Јеһованын бизә вердији әманәти горумаг үчүн биз тәһлүкәни ҝөрән кими дәрһал һәрәкәтә кечмәлијик. Бунун үчүн нә етмәк лазымдыр? Неҹә давранаҹағымызы әввәлҹәдән планлашдырмалыјыг.

¹⁸ Мисал үчүн, адәтән биналарын фөвгәладә һаллар үчүн тәхлијә планы вә тәҹили чыхышлары олур. Габагҹадан һазырлашмағын сајәсиндә һадисә баш верән заман инсанлар дәрһал бинаны тәрк едә билир. Ејнилә, биз дә интернетдә оларкән, һансыса верилишә вә ја филмә бахаркән гәфләтән әдәбсиз, зоракы сәһнә, јахуд дөнүкләрин јајдығы мәлуматла гаршылашарыгса, дәрһал һансы «чыхышдан» истифадә едәҹәјимизи билмәлијик. Буна һазырлыглы олсаг, бизә руһән зәрәр вураҹаг вәзијјәтләрдән гачмаг үчүн дәрһал һәрәкәтә кечә биләҹәјик вә Јеһованын ҝөзүндә тәмиз галаҹағыг (Зәб. 101:3; 1 Тим. 4:12).

19. Јеһованын вердији әманәти горусаг, һансы немәтләри дадаҹағыг?

¹⁹ Јеһованын бизә вердији әманәти — Мүгәддәс Китабдакы һәгигәтләри вә онлары инсанлара өјрәтмәк шәрәфини горумалыјыг. Онда виҹданымыз тәмиз олаҹаг, мәналы һәјат сүрәҹәјик вә инсанлара Јеһованы танымаға көмәк етдијимиз үчүн севинҹ дујаҹағыг. Аллаһын көмәјилә, биз Онун әманәтини горуја биләҹәјик (1 Тим. 6:12, 19).