1, 2. а) Мәсәлләр 16:31 ајәсинә әсасән, јашлы диндашларымыза неҹә јанашмалыјыг? б) Бу мәгаләдә һансы суаллары мүзакирә едәҹәјик?

 АРКАНЗАС штатынын (АБШ) дөвләт паркында јердән алмаз тапмаг мүмкүндүр. Амма бу алмазлар тәбии, ҹилаланмамыш шәкилдәдир. Буна ҝөрә дә чох адам онлары ҝөрсә дә, бунун алмаз олдуғуну баша дүшмүр вә јанындан өтүб кечир.

² Јеһоваја сәдагәтлә хидмәт едән јашлы баҹы-гардашларымыз бир нөв бу алмазлара охшајыр. Мүгәддәс Китабда ағ сачлар таҹа бәнзәдилир. (Мәсәлләр 16:31 ајәсини охујун; Мәс. 20:29.) Амма бу гијмәтли хәзинәләр асанлыгла нәзәрдән гача биләр. Јашлыларын нә гәдәр гијмәтли олдуғуну дәрк едән ҝәнҹләр мадди хәзинәдән гат-гат дәјәрли бир хәзинәјә саһиб олурлар. Бу мәгаләдә үч суал мүзакирә олунур: Нәјә ҝөрә јашлы баҹы-гардашлар Јеһованын ҝөзүндә гијмәтли хәзинәдир? Онлар Јеһованын тәшкилатында һансы дәјәрли јери тутурлар? Бу баҹы-гардашлардан даһа чох шеј өјрәнмәк үчүн нә едә биләрик?

3. Зәбур 92:12—15 ајәләринә әсасән, нәјә ҝөрә јашлы мәсиһиләр Јеһова үчүн әзиздир?

³ Јеһоваја садиг олан јашлы диндашларымыз Онун үчүн әзиздир. Јеһова онларын дахилән неҹә инсан олдуғуну билир, онларын ҝөзәл хүсусијјәтләрини ҝөрүр вә гијмәтләндирир. Онлар Јеһованын јолунда узун илләр әрзиндә газандыглары тәҹрүбәни ҝәнҹләрлә бөлүшүрләр вә Јеһова буну  чох дәјәрләндирир (Әјј. 12:12; Мәс. 1:1—4). Јеһова һәмчинин онларын дөзүмүнү гијмәтләндирир (Мәл. 3:16). Онларын һәјаты чәтинликсиз өтүшмәсә дә, иманлары сарсылмаз галыб. Ҝәләҹәјә үмидләри һәгигәти өјрәндикләри вахтдан даһа мөһкәмдир. Онлар «сачлары ағаранда да» Јеһованын адыны бәјан етмәјә давам едирләр, буна ҝөрә дә Јеһова онлары севир. (Зәбур 92:12—15 ајәләрини охујун.)

4. Јашлы мәсиһиләри һансы фикирләр руһландыра биләр?

⁴ Әҝәр јаша долмусунузса, әмин олун ки, Јеһова кечмишдә етдијиниз хидмәти унутмајыб (Ибр. 6:10). Сиз тәблиғ ишини һәмишә ҹанла-башла дәстәкләмисиниз вә сәмави Атамыз бундан чох разыдыр. Һәјатда чохлу проблемләрлә үзләшмисиниз, һәтта бәзиләриниз бөјүк гәлб ағрысы јашамысыныз. Аллаһын салеһ нормаларына бағлы галмысыныз, чијинләриниздә бөјүк мәсулијјәт јүкү дашымысыныз, башгаларына тәлим вермисиниз. Јеһованын сүрәтлә һәрәкәт едән тәшкилаты илә ајаглашмаг үчүн вар ҝүҹүнүзлә чалышмысыныз. Башгаларына дајаг олмусунуз вә онлары тамвахтлы хидмәтә тәшвиг етмисиниз. Садиг олдуғунуз үчүн Јеһова сизи чох севир. О, «садиг бәндәләрини тәрк етмәз»! (Зәб. 37:28). О сөз вериб: «Башыныз ағаранадәк сизи ҝәздирәҹәјәм» (Әшј. 46:4). Буна ҝөрә дә елә дүшүнмәјин ки, јаша долмусунуз дејә, Јеһованын тәшкилатында артыг елә дә әһәмијјәтли дејилсиниз. Бу, гәтијјән белә дејил!

5. Јашлы мәсиһиләр нәји билмәлидир?

⁵ Јашлы баҹы-гардашларын әввәлки ҝүҹләри олмаса да, илләр әрзиндә газандыглары бөјүк тәҹрүбәләри вар. Буна ҝөрә дә онларын Јеһованын тәшкилатына чох саһәдә көмәји дәјә биләр. Һәм кечмишдәки, һәм дә мүасир дөврдәки нүмунәләрдән ҝөрәҹәјимиз кими, јашлы олмалары онлары Јеһова үчүн јарарсыз етмир.

6, 7. Мүгәддәс Китабдан садиглијинә ҝөрә мүкафат алан инсанларын нүмунәсини чәкин.

⁶ Мүгәддәс Китабда гоҹа јашларында белә, Јеһоваја хидмәтдә чох иш ҝөрән садиг инсанларын нүмунәси вар. Мәсәлән,  Мусанын тәхминән 80 јашы оланда Јеһова ону пејғәмбәр вә Исраил халгынын рәһбәри тәјин етмишди. Дәнјал пејғәмбәрин јашы, ҝөрүнүр, 90-ы һаглајандан сонра да Јеһованын елчиси кими, Онун бујурдуғу ишләри ҝөрүрдү. Һәвари Јәһја Аллаһын илһамы илә «Вәһј» китабыны јазанда, бөјүк еһтималла, онун да јашы 90-дан чох иди.

⁷ Јеһованын садиг хидмәтчиләри арасында еләләри дә вар иди ки, танынмыш, ҝөркәмли дејилдиләр вә онлар асанлыгла нәзәрдән гача биләрди. Амма Јеһова онлары да ҝөрүрдү вә сәдагәтләринә ҝөрә мүкафатландырырды. Мәсәлән, «салеһ вә мөмин» инсан олан Шәмун һагда Мүгәддәс Китабда гыса данышылса да, Јеһованын нәзәри онун үзәриндә иди вә она көрпә Исаны ҝөрмәји нәсиб етди. Үстәлик, Шәмун Иса илә анасы барәдә пејғәмбәрлик сөјләди (Лука 2:22, 25—35). Һәмчинин дул олан пејғәмбәр Һәннәни јадымыза салаг. Онун 84 јашы олса да, «һәмишә мәбәддә олурду». Јеһова онун даима «ибадәт ҝөрүшләриндә» олмасыны мүкафатсыз гојмады. Она да көрпә Исаны ҝөрмәк нәсиб олду. Һәм Шәмун, һәм дә Һәннә Јеһованын ҝөзүндә чох дәјәрли идиләр (Лука 2:36—38).

8, 9. Дул оландан сонра да баҹылар һансы төһфәни верирләр?

⁸ Бизим дөврүмүздә Јеһоваја сәдагәтлә хидмәт едән јашлы баҹы-гардашлар ҝәнҹләр үчүн ҝөзәл өрнәкдир. Ҝәлин Лоис Дидур баҹынын нүмунәсинә нәзәр салаг. Ҹәми 21 јашы оланда о, Канадада хүсуси өнҹүл кими хидмәт етмәјә башламышды. Даһа сонра о, һәјат јолдашы Ҹонла бирҝә узун илләр сәјјар хидмәтдә олду. Сонралар 20 илдән чох Канада Бејтелиндә хидмәт етдиләр. Лоис баҹынын 58 јашы оланда онлара Украјна Бејтелиндә хидмәт етмәк тәклиф олунду. Бәс онлар һансы гәрары вердиләр? Башга өлкәдә хидмәт етмәк үчүн јашларынын чох олдуғуну дүшүндүләр? Хејр, онлар бу тәклифи гәбул етдиләр вә Ҹон гардаш филиал комитәсинә тәјин олунду. Әфсуслар олсун ки, једди ил сонра Ҹон гардаш вәфат етди, амма Лоис баҹы өз тәјинатында галмаг гәрарына ҝәлди. Инди Лоисин 81 јашы вар. О, Украјна Бејтелиндә ҹанла-башла хидмәт етмәјә давам едир вә Бејтел аиләси ону чох истәјир.

⁹ Лоис кими баҹылар әрләри өләндән сонра, ола билсин, әввәлки гәдәр диггәт ҝөрмүрләр; буна бахмајараг, дул галмалары онларын дәјәрини ашағы салмыр. Узун илләр әрләринә дәстәк олан вә һал-һазырда сәдагәтлә хидмәт едән бу баҹылар Јеһова үчүн чох әзиздир (1 Тим. 5:3). Һәмчинин онлар ҝәнҹләри дә чох руһландырырлар.

10. Тони гардаш һансы ҝөзәл нүмунәни гојуб?

¹⁰ Сәһһәтләринә ҝөрә евдән чөлә чыха билмәјән вә башгаларынын көмәјиндән асылы олан јашлы баҹы-гардашларымыз да  бизим үчүн руһани хәзинәдир. Мәсәлән, Тони адлы гардаш гоҹалар евиндә јашајыр. О, 1942-ҹи илин августунда 20 јашы оланда Пенсилванијада вәфтиз олунмушду. Бир мүддәт сонра о, һәрби хидмәтә чағырылды вә битәрәф олдуғу үчүн она ики ил јарым һәбс ҹәзасы кәсдиләр. О, јолдашы Һилда илә бирҝә ики өвладыны һәгигәтдә бөјүдүб. Тони гардаш илләр әрзиндә үч јығынҹагда сәдрлик едән нәзарәтчи * кими вә рајон топлантысынын нәзарәтчиси кими хидмәт едиб. О, һәбсханаларда јығынҹаглар вә Мүгәддәс Китаб дәрсләри кечирирди. Инди Тони гардашын 98 јашы олса да, о, әл-голуну јанына салыб отурмаг фикриндә дејил. Гардаш Јеһоваја хидмәт етмәк вә аид олдуғу јығынҹагла сых әмәкдашлыг етмәк үчүн әлиндән ҝәләни едир!

11. Евдән чөлә чыха билмәјән јашлы диндашларымызын бизим үчүн дәјәрли олдуғуну неҹә ҝөстәрә биләрик?

¹¹ Евдән чөлә чыха билмәјән јашлы диндашларымыза неҹә һөрмәт ҝөстәрә биләрик? Ағсаггаллар гајғы ҝөстәрмәлидир ки, онлар имкан дахилиндә јығынҹагда вә тәблиғдә иштирак етсинләр. Биз онлары зијарәт етмәклә вә ја видеозәнҝ едәрәк онларла мараглана биләрик. Диггәтли олмасаг, бу јашлы баҹы-гардашлар асанлыгла јадымыздан чыха биләр. Онлардан бәзиләри өзләри һагда данышмаға елә дә мејилли дејилләр вә ја буну мүнасиб билмирләр. Амма онлара вахт ајырыб, суаллар версәк, һәмчинин онлар Јеһованын тәшкилатында дујдуглары севинҹ һагда данышанда диггәтлә гулаг ассаг, бунун бөјүк хејрини ҝөрәҹәјик.

12. Өз јығынҹағымызда һансы хәзинәләри тапа биләрик?

¹² Өз јығынҹағымыздакы јашлы баҹы-гардашларла мараглансаг, онларын неҹә мөһтәшәм иман тәзаһүр етдирдикләри бизи мәәттәл гоја биләр. Һариат адлы бир баҹы узун илләр әрзиндә Нју-Ҹерсидә (АБШ) бир јығынҹагда хидмәт едиб. Сонра о, гызынын јанына көчдү. Јени јығынҹағындакы баҹы-гардашлар вахт ајырыб, онунла јахындан таныш олдулар вә санки бир хәзинә кәшф етдиләр. Һариат баҹы 1920-ҹи илләрдә һәгигәти өјрәндији вахтларда саһә хидмәтиндә башына ҝәлән әһвалатлары данышыб, онлары руһландырырды. Сән демә, һәмин вахтлар баҹы хидмәтә чыханда диш фырчасыны да өзү илә ҝөтүрүрдү, чүнки һәр ан һәбс олуна биләрди. Белә ки, 1933-ҹү илдә о, һәр дәфә бир һәфтә олмагла ики дәфә һәбсдә олуб. Һәбсдә оланда үч балаҹа ушағына һәјат јолдашы бахырды. Јолдашы Јеһованын Шаһиди олмаса да, баҹыја чох дәстәк олурду. Һәгигәтән дә, Һариат баҹы кими јашлы диндашларымызын гәдрини билмәлијик, онлар буна лајигдир!

13. Нәјә ҝөрә Јеһованын тәшкилатында јашлыларын өзәл јери вар?

¹³ Јеһованын тәшкилатында јашлы баҹы-гардашларымызын өзәл јери вар. Онлар һәјатлары бојунҹа Јеһованын һәм Өз тәшкилатындан, һәм дә шәхсән онлардан разы галмасынын дәфәләрлә шаһиди олублар. Онлар өз сәһвләриндән чох шеј өјрәнибләр. Онлара «һикмәт чешмәси» кими јанашын вә тәҹрүбәләриндән бәһрәләнин (Мәс. 18:4). Вахт ајырыб онларла јахындан таныш олсаныз, иманыныз мөһкәмләнәҹәк вә онлардан хејли шеј өјрәнәҹәксиниз!

14. Ганунун тәкрары 32:7 ајәси ҝәнҹләри нәјә тәшвиг едир?

¹⁴ Јашлыларла данышмаг үчүн өзүнүз тәшәббүс ҝөстәрин. (Ганунун тәкрары 32:7 ајәсини охујун.) Бәлкә дә, онларын  ҝөзләринин нуру зәифләјиб, аста ҝәзирләр, дилләри сөз тутмур, амма үрәкләри ҹавандыр вә Јеһованын гаршысында јахшы ада саһибдирләр (Ваиз 7:1). Јеһованын онлара нә үчүн дәјәр вердијини унутмајын. Онлара һәмишә һөрмәт ҝөстәрин. Әлјәсә кими олун. О, сонунҹу дәфә Илјасын јанында олмаг фүрсәтини әлдән вермәди. Әлјәсә тәкидлә үч дәфә: «Сәндән ајрылмајаҹағам», — демишди (2 Пад. 2:2, 4, 6).

15. Јашлылара һансы суаллары верә биләрик?

¹⁵ Јашлылара меһрибанҹасына суаллар верәрәк онларла марагландығынызы ҝөстәрин (Мәс. 1:5; 20:5; 1 Тим. 5:1, 2). Мәсәлән, соруша биләрсиниз: «Ҝәнҹ оланда һәгигәти тапдығыныза сизи нә әмин етмишди? Һәјатда үзләшдијиниз һансы һадисәләр сизи Јеһоваја јахынлашдырыб? Јеһоваја хидмәтдә севинҹинизи горумағын сирри нәдәдир?» (1 Тим. 6:6—8). Онлар данышанда ҹан-дилдән гулаг асын.

16. Јашлы вә ҝәнҹ мәсиһиләрин бир-бири илә үнсијјәт етмәсинин һәр икисинә һансы фајдасы вар?

¹⁶ Јашлы вә ҝәнҹ мәсиһиләр бир-бири илә сөһбәт едәндә бу, һәр икисинә фајда ҝәтирир (Ром. 1:12). Сиз ҝәнҹләр Јеһованын Өз садиг хидмәтчиләринин гејдинә галдығына бир даһа әмин олаҹагсыныз, јашлылар исә севилдикләрини һисс едәҹәкләр. Онлар бөјүк мәмнунијјәтлә сизә Јеһовадан алдыглары немәтләр һагда данышаҹаглар.

17. Нәјә әсасән дејә биләрик ки, Јеһоваја садиг олан јашлы диндашларымыз илләр өтдүкҹә даһа да ҝөзәлләшир?

¹⁷ Адәтән заһири ҝөзәллик илләр өтдүкҹә солур, анҹаг Јеһоваја садиг галан мәсиһиләр илләр өтдүкҹә Онун ҝөзүндә даһа да ҝөзәлләшир (1 Салон. 1:2, 3). Нәјә әсасән белә демәк олар? Чүнки илләр әрзиндә Аллаһын руһу онлары формалашдырыб вә онларда ҝөзәл хүсусијјәтләр һасил едиб. Бу дәјәрли баҹы-гардашларымызы нә гәдәр јахшы танысаг вә тәҹрүбәсиндән јарарлансаг, о гәдәр чох онларын гәдрини биләҹәјик вә онлара дәјәрли хәзинә кими јанашаҹағыг!

18. Нөвбәти мәгаләдә нә һагда данышаҹағыг?

¹⁸ Тәкҹә ҝәнҹләр јашлылары јох, јашлылар да, өз нөвбәсиндә, ҝәнҹләри гијмәтләндирәндә јығынҹаг мөһкәмләнир. Нөвбәти мәгаләдә өјрәнәҹәјик ки, јашлы баҹы-гардашлар јығынҹагдакы ҝәнҹләрә дәјәр вердикләрини неҹә ҝөстәрә биләр.